Lesona 3 Anomea mo le Sauniuniga o le Vasega: Faalagolago ia Iesu Keriso, Lo Tatou Faaola ma le Taitai i le Muai Olaga
“Lesona 3 Anomea mo le Sauniuniga o le Vasega: Faalagolago ia Iesu Keriso, Lo Tatou Faaola ma le Taitai i le Muai Olaga,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 3 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
Ua aoao atu Iesu i le Fono Tele
Lesona 3: Anomea mo le Sauniuniga o le Vasega
Faalagolago ia Iesu Keriso, Lo Tatou Faaola ma le Taitai i le Muai Olaga
E ui lava e te le manatuaina, ae o lou aafiaga ma Iesu Keriso na amata a o lei taitai ona e fanau mai. O lena sootaga ma le malamalama i le fuafuaga a le Tama Faalelagi, e mafai ona aumaia ai le faamoemoe ma le uiga i lou olaga i le lalolagi. O le Iunite 2 o le a fesoasoani e te malamalama atili ai i le matafaioi taua a le Faaola i le Fono Tele i le Lagi, i le fuafuaga o le fiafia a le Tama, i le Foafoaga, ma i isi tala na faasoa mai i le Feagaiga Tuai. A o e suesue i anomea o lenei lesona, mafaufau pe mafai faapefea e nei upumoni ona fausia lou faalagolago ia Iesu Keriso.
Vaega 1
E mafai faapefea e le ata o le faaolataga ona aumaia le faamoemoega ma le filemu i lo‘u olaga?
Pe na i ai se taimi na e leiloa ai i se togavao, se motu toatele o tagata, po o se aai tele? Na faapeī se aafiaga na oo ia te oe?
E pei lava ona e leiloa i se togavao po o se aai tele, atonu foi na e lagonaina pe atonu foi e i ai se aso e te lagona ai lou leiloa i le uiga ma le faamoemoega o lou olaga. A o e mafaufau i ia lagona, mafaufau loloto i upu nei mai ia Elder Robert D. Hales o le Korama a Aposetolo e Toasefululua:
Ata
Elder Robert D. Hales
Sa ou mafaufau soo ai i le leai o se faamoemoe o fanau a le Atua e feoai i le lalolagi pouliuli ma le pagatia, e lē iloaina po o ai i latou, pe o fea na latou o mai ai, pe aisea ua latou i ai i le lalolagi, po o fea latou te o i ai pe a mavae o latou olaga faaletino.
E le tatau ona tatou feoai solo. Ua faaalia mai e le Atua upumoni e faavavau e tali ai fesili nei. …
O le fuafuaga o le faaolataga o se tasi o oa silisili o le malamalama e mafai ona tuuina atu i tagata ona o loo faamalamalama mai ai le faamoemoega e faavavau o le olaga. (“The Plan of Salvation: A Sacred Treasure of Knowledge to Guide Us,” Ensign, Oct. 2015, 25-26)
Na tuuina mai e lo tatou Tama Faalelagi Lana fuafuaga o le faaolataga i le Fono Tele i le Lagi. O iina na tatou aoao ai afai tatou te mulimuli i Lana fuafuaga, e mafai ona avea i tatou e faapei o Ia, toe foi atu i Lona afioaga, ma maua le ola e faavavau, “o le meaalofa silisili lea o meaalofa uma a le Atua” (Mataupu Faavae ma Feagaiga 14:7).
Ua tatou aoaoina foi o le fuafuaga a le Tama o le a manaomia ai se Faaola, o lē o le a mafai ai e i tatou ona faatoilaloina le oti faaletino ma le faaleagaga. Na filifilia e le Tama Faalelagi ia Iesu e avea ma Faaola (tagai Aperaamo 3:27).
Na molimau mai Peresitene Thomas S. Monson:
Ata
Peresitene Thomas S. Monson
E taua i le fuafuaga [o le faaolataga] o lo tatou Faaola, o Iesu Keriso. Ana le aunoa ma Lana taulaga togiola, semanu e leiloloa tagata uma. (“O Le Ala Atoatoa i le Fiafia,” Liahona, Nov. 2016, 80)
Ata
aikona, mafaufau loloto
Mafaufau Loloto e Sauniuni ai mo le Vasega
Na faapefea e lou malamalama i le fuafuaga o le faaolataga ona aumaia le uiga po o le faamoemoe i lou olaga? Afai e te lagona le le mautonu e uiga i le faamoemoega o lou olaga, e mafai faapefea ona fesoasoani le suesueina o le fuafuaga o le faaolataga ma le matafaioi a le Faaola?
Vaega 2
Aisea na tatou taliaina ai Iesu Keriso e avea ma o tatou Faaola i le muai olaga?
Ua tuuina mai e le Penina Tau Tele se tala manaia ia Aperaamo o loo aoao e uiga i paneta ma fetu. Na vaai Aperaamo o le fetu pulea ma sili lona susulu ua ta‘ua o Kolape ma e sili ona latalata i le afioaga o le Atua (tagai Aperaamo 3:2–17).
Na aoaoina foi e Aperaamo e pei lava ona i ai eseesega i le va o fetu, e i ai eseesega i le va o fanau agaga a le Atua. O nisi agaga e “sili ona atamamai” nai lo isi, ae o le Alii le Atua e “sili atu [ona] atamai nai lo i latou uma” (Aperaamo 3:18–19). (Manatua: O le atamai i lenei fuaitau e faasino i le malamalama ma le upumoni ua maua e se tagata [tagai Mataupu Faavae ma Feagaiga 93:28, 36].)
I le anotusi lenei, lea e faatusa i ai Kolape ia Iesu Keriso (tagai Aperaamo 3:3, 16), o le a se mea o aoao mai ai i tatou e uiga ia te Ia?
Faitau le Aperaamo 3:22–24, ma vaavaai mo mea e mafai ona tatou aoaoina e uiga i la tatou sootaga ma Iesu Keriso i le muai olaga. (Manatua: O le atamai i lenei fuaitau e faasino i fanau agaga a le Tama Faalelagi.)
Na aoaoina e Aperaamo e faapea o le latalata o Kolape i le Atua na avea ai “o le [fetu] silisili lea … ona ua latalata [mai] ia te [Ia]” (Aperaamo 3:16). E faapena foi ia i tatou, i le avea ai ma fanau a le Atua. O lo tatou atamai, malamalama, ma le mamalu o le a faalagolago i lo tatou latalata atu i le Foafoa, o Iesu Keriso, o le e “latalata tele atu i le nofoalii o le Atua” ma ua “faatuina … e pulea i latou uma na ua i ai i le faatulagaga e tasi” (Aperaamo 3:2, 3).
Ata
aikona, mafaufau loloto
Mafaufau Loloto e Sauniuni ai mo le Vasega
E mafai faapefea e le iloaina o le silisiliese o Iesu Keriso i le muai olaga ona musuia oe e faalagolago ia te Ia ma faalatalata atili atu ia te Ia?
Vaega 3
E mafai faapefea e Iesu Keriso ona fesoasoani ia te a‘u e faatoilalo tosinaga leaga o siomia ai a’u?
E i ai taimi, atonu e te lagona ai le lofituina i le tetee o Satani a o e taumafai e mulimuli ia Iesu Keriso ma ola i Lana talalelei. Atonu e fesoasoani le manatua e le o le taimi muamua lenei ua e molimauina ai pe aafia ai i faatosinaga leaga a Satani.
Ata
aikona, suesue
Suesue e Sauniuni ai mo le Vasega
Faitau le Mose 4:1–4, ma vaavaai mo le eseesega i le va o Satani ma le Faaola.
O le fouvale o Satani na amata ai le mea ua ta‘ua i le tusi o Faaaliga, o le Taua i le Lagi (tagai Faaaliga 12:7). Sa tau i le va o i latou o e sa tutu faatasi ma le Tama Faalelagi ma Iesu Keriso ma i latou sa tetee ia i Laua ma filifili e mulimuli ia Satani.
Ata
aikona, suesue
Suesue e Sauniuni ai mo le Vasega
Faitau le Faaaliga 12:7–11, ma mafaufau e maka i au tusitusiga paia pe na faapefea ona e faatoilaloina Satani ma e na mulimuli ia te ia i le muai olaga. (Manatua: Sa ta‘ua Atamu o Mekaeli i le muai olaga [tagai Taiala i Tusitusiga Paia, “Mekaeli,” ChurchofJesusChrist.org].) E mafai faapefea ona faatatau mea na e faailogaina pe mafaufau i ai a o e faitauina i lau taua faifai pea ma Satani iinei i le lalolagi?
Sa saunoa Gordon B. Hinckley e uiga i lenei feteenaiga:
Ata
Peresitene Gordon B. Hinckley
O lena taua, e ese le tiga, e ese le malosi, e lei faamutaina lava. O le taua lea i le va o le upu moni ma le mea sese, i le va o le saolotoga ma le faamalosia, i le va o e mulimuli ia Keriso ma i latou o e ua faafitia o Ia. …
… O loo faaauau i o tatou lava olaga, i aso taitasi, i o tatou aiga, i a tatou galuega, i a tatou faapotopotoga faaleaoga. … O loo tatou aafia uma ai—tamaitiiti, autalavou, po o le tagata matua, o i tatou taitoatasi. (“An Unending Conflict, a Victory Assured,” Ensign, Iuni 2007, 6, 9)
Na ofoina mai e Brother Ahmad S. Corbitt o le Au Peresitene Aoao o Alii Talavou se savali o le faamoemoe i la tatou taua faifai pea ma le tiapolo:
Ata
Brother Ahmad S. Corbitt
Sa faaseseina ma le faafiapoto e Satani se vaega e tasi vaetolu o fanau agaga a le Tama Faalelagi e tuu atu ia manumalo o ia nai lo le Atua. Ae le o outou! Sa vaaia e le Aposetolo o Ioane faapea na outou faatoilaloina Satani “i le upu o [la outou] molimau.”An Unending Conflict, a Victory Assured [Faaaliga 12:11]. …
… O le iloa ai na e faatoilaloina muamua Satani e ala i le upu o lau molimau, o le a fesoasoani ai e te alofa, faasoa, ma valaaulia i le asō ma aso uma---e valaaulia isi e o mai ma vaai, o mai ma fesoasoani, ma o mai ma avea ai ma ni o, a o faifai pea le matamataita o lena taua mo agaga o fanau a le Atua. (“E Mafai Ona E Faapotopotoina Isaraelu!,” Liahona, Me 2021, 61)
Ata
aikona, faatino
Faatino
Mafaufau ma le agaga tatalo pe mafai faapefea e le faamalosia o lou faatuatua ia Iesu Keriso ma Lana talalelei ona fesoasoani ia te oe e faatoilalo ai Satani ma “tetee” atu i ana faaosoosoga (Alema 37:33). E mafai foi ona e faailoa mai se faatinoga na e faia (pe mafai foi ona fai) e fesoasoani ia te oe e faatoilalo ai faatosinaga a Satani i lou olaga.
