« ៧. គណៈប៊ីស្សព » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( ឆ្នាំ ២០២០ ) ។
« ៧. គណៈប៊ីស្សព » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ
៧.
គណៈប៊ីស្សព
៧.១
ប៊ីស្សព និងទីប្រឹក្សារបស់គាត់
ប៊ីស្សពកាន់កូនសោទាំងឡាយនៃបព្វជិតភាព ដើម្បីដឹកនាំកិច្ចការសាសនាចក្រនៅក្នុងវួដ ( សូមមើល ៣.៤.១ ) ។ គាត់ និងទីប្រឹក្សារបស់គាត់បង្កើតបានជាគណៈប៊ីស្សព ។ ពួកគាត់ទទួលបានការដឹកនាំមកពីគណៈប្រធានស្ដេក ។ ពួកគាត់មើលថែដល់សមាជិកវួដដោយសេចក្ដីស្រឡាញ់ តាមរយៈការជួយពួកគេឲ្យក្លាយទៅជាអ្នកដើរតាមដ៏ពិតរបស់ព្រះយេស៊ូវគ្រីស្ទ ( សូមមើល មរ៉ូណៃ ៧:៤៨ ) ។
ប៊ីស្សព និងទីប្រឹក្សារបស់គាត់គឺជាសង្ឃជាន់ខ្ពស់ ។ ប្រសិនបើពួកគាត់មិនមែនជាសង្ឃជាន់ខ្ពស់ នៅពេលពួកគាត់ត្រូវបានហៅឲ្យបម្រើទេ នោះពួកគាត់គួរតែត្រូវបានតែងតាំងឲ្យធ្វើជាសង្ឃជាន់ខ្ពស់ មុនពេលញែកចេញពួកគាត់ឲ្យបម្រើ ។
ប៊ីស្សពមានការទទួលខុសត្រូវដ៏សំខាន់ចំនួនប្រាំ ៖
-
គាត់គឺជាសង្ឃជាន់ខ្ពស់ជាអធិបតីនៅក្នុងវួដ ។
-
គាត់គឺជាប្រធានបព្វជិតភាពអើរ៉ុន ។
-
គាត់គឺជាចៅក្រមទូទៅមួយរូប ។
-
គាត់សម្របសម្រួលកិច្ចការនៃសេចក្តីសង្រ្គោះ និងភាពតម្កើងឡើង រួមមានការថែទាំដល់អ្នកខ្វះខាតផងដែរ ។
-
គាត់មើលការខុសត្រូវលើកំណត់ត្រា ហិរញ្ញវត្ថុ និងការប្រើប្រាស់សាលាប្រជុំ ។
ដោយសារប៊ីស្សពកាន់កូនសោនៃបព្វជិតភាព នោះគាត់មានសិទ្ធិទទួលបានវិវរណៈសម្រាប់វួដ ( សូមមើល គោលលទ្ធិ និង សេចក្ដីសញ្ញា ១២៨:១១ ) ។ ហេតុដូច្នេះហើយ ការទទួលខុសត្រូវមួយចំនួនមានតែគាត់ប៉ុណ្ណោះទើបអាចធ្វើបាន ។ ការទទួលខុសត្រូវទាំងនេះមានរៀបរាប់នៅក្នុងជំពូកនេះ ។
ការទទួលខុសត្រូវដ៏សំខាន់បំផុតរបស់ប៊ីស្សពគឺ ត្រូវមើលថែជំនាន់ដែលកំពុងពេញវ័យនៅក្នុងវួដ ( កុមារ យុវវ័យ និងយុវមជ្ឈិមវ័យនៅលីវ ) ។ ដើម្បីឲ្យគាត់អាចផ្ចង់អារម្មណ៍លើការទទួលខុសត្រូវនេះបាន នោះគាត់ត្រូវផ្ទេរភារកិច្ចជាច្រើន ( សូមមើល ៤.២.៥ ) ។ គាត់អាចផ្ទេរភារកិច្ចឲ្យទៅទីប្រឹក្សារបស់គាត់ ស្មៀន និងជំនួយការស្មៀន លេខាប្រតិបត្តិ ថ្នាក់ដឹកនាំកូរ៉ុម និងអង្គការទាំងឡាយ ព្រមទាំងអ្នកផ្សេងទៀតផងដែរ ។
ប្រសិនបើប៊ីស្សពមិនអាចមកបំពេញការទទួលខុសត្រូវរបស់គាត់បាន នោះទីប្រឹក្សាមួយរូបអាចធ្វើកិច្ចការជំនួសគាត់ជាបណ្តោះអាសន្នបាន លើកលែងតែករណីដែលមានចែងនៅក្នុងក្បួនខ្នាតនេះប៉ុណ្ណោះ ។ ប៊ីស្សព ឬទីប្រឹក្សារបស់គាត់ប្រឹក្សាជាមួយនឹងប្រធានស្ដេក ប្រសិនបើគាត់មានសំណួរអំពីទីប្រឹក្សា ដែលធ្វើកិច្ចការជំនួសប៊ីស្សពនោះ ។
៧.១.១
សង្ឃជាន់ខ្ពស់ជាអធិបតី
ប៊ីស្សពគឺជាថ្នាក់ដឹកនាំចម្បងខាងវិញ្ញាណរបស់វួដ ។ គាត់ធ្វើជាគំរូតាមរយៈការបម្រើ « ដោយដួងចិត្តបរិសុទ្ធជ្រះថ្លា » ( ម៉ូសាយ ១៨:១២ ) ។ គាត់បង្រៀន លើកស្ទួយ និងបំផុសគំនិត ( សូមមើល ម៉ាថាយ ២០:២៨ ) ។ គាត់ធ្វើតាមគោលការណ៍នៃភាពជាអ្នកដឹកនាំនៅក្នុង គោលលទ្ធិ និង សេចក្ដីសញ្ញា ១២១:៣៤–៤៦ ។
ប៊ីស្សពគឺជាសិស្សដ៏ស្មោះត្រង់មួយរូបរបស់ព្រះយេស៊ូវគ្រីស្ទ ។ គាត់ស្មោះត្រង់ចំពោះសេចក្តីសញ្ញារបស់គាត់ ។ គាត់ស្មោះត្រង់ចំពោះភរិយា និងគ្រួសារគាត់។ គាត់ធ្វើជាគំរូនៃសេចក្តីសុចរិតសម្រាប់គ្រួសាររបស់គាត់ វួដ និងសហគមន៍ ។ ( សូមមើល ធីម៉ូថេ ទី១ ៣:២–៧ ) ។ ទីប្រឹក្សារបស់គាត់គឺជាបុរសដែលមានបុគ្គលិកលក្ខណៈស្រដៀងគ្នានេះ ។
ប៊ីស្សពផ្តល់ការណែនាំ និងការប្រឹក្សាដល់ថ្នាក់ដឹកនាំដទៃទៀតនៅក្នុងវួដ ។ គាត់លើកទឹកចិត្តពួកគេឲ្យបំពេញតាមការទទួលខុសត្រូវរបស់ពួកគេ ។
៧.១.១.១
អង្គការទាំងឡាយក្នុងវួដ និងកូរ៉ុមបព្វជិតភាព
ប៊ីស្សពមានការទទួលខុសត្រូវលើអង្គការសមាគមសង្គ្រោះ និងក្រុមយុវនារីវួដ ។ គាត់ចាត់ទីប្រឹក្សារបស់គាត់ឲ្យទទួលខុសត្រូវលើសាលាថ្ងៃអាទិត្យ និងអង្គការបឋមសិក្សា ព្រមទាំងកម្មវិធីវួដផ្សេងទៀត ។ ( សូមមើល ៩.៣.១, ១១.៣.១, ១២.៣.១ និង ១៣.២.១ ) ។
ការទទួលខុសត្រូវរបស់ប៊ីស្សពលើកូរ៉ុមបព្វជិតភាពអើរ៉ុនមានចែងនៅក្នុង ៧.១.២ ។ ការទទួលខុសត្រូវរបស់គាត់លើកូរ៉ុមអែលឌើរមានចែងនៅក្នុង ៨.៣.១ ។
ប៊ីស្សពក៏ដឹកនាំប្រធានកូរ៉ុមអែលឌើរ និងប្រធានសមាគមសង្គ្រោះក្នុងការមើលខុសត្រូវលើការផ្តល់ការងារបម្រើផងដែរ ។ គាត់ជួបជាមួយប្រធានទាំងពីររូបនេះរួមគ្នា យ៉ាងហោចណាស់មួយត្រីមាសម្តង ដើម្បីដោះស្រាយតម្រូវការរបស់បុគ្គលម្នាក់ៗ និងក្រុមគ្រួសារ ( សូមមើល ២១.២ ) ។
៧.១.១.២
ពិធីបរិសុទ្ធ និងការប្រសិទ្ធពរ
ប៊ីស្សពដឹកនាំការគ្រប់គ្រងពិធីបរិសុទ្ធ និងការប្រសិទ្ធពរនៅក្នុងវួដដូចខាងក្រោម ៖
-
ពិធីសាក្រាម៉ង់
-
ការដាក់ឈ្មោះ និងការប្រសិទ្ធពរទារក
-
ពិធីបុណ្យជ្រមុជទឹក និងពិធីបញ្ជាក់ដល់កុមារអាយុ ៨ ឆ្នាំដែលមានក្នុងកំណត់ត្រា ( សម្រាប់កុមារដែលមានពិការភាពខាងបញ្ញា សូមមើល ៣៨.២.៨.១; សម្រាប់អ្នកប្រែចិត្តជឿថ្មី សូមមើល ៣១.២.៣.២ )
-
ការប្រគល់បព្វជិតភាពអើរ៉ុន និងការតែងតាំងតំណែងឌីកុន គ្រូ និងសង្ឃ
សម្រាប់ព័ត៌មានអំពីពិធីបរិសុទ្ធ និងការប្រសិទ្ធពរទាំងឡាយ សូមមើល ជំពូកទី ១៨ ។
៧.១.១.៣
ក្រុមប្រឹក្សា និងការប្រជុំនានា
ប៊ីស្សពដឹកនាំក្រុមប្រឹក្សាវួដ និងក្រុមប្រឹក្សាយុវវ័យវួដ ( សូមមើល ២៩.២.៥ និង ២៩.២.៦ ) ។ ប៊ីស្សពប្រើប្រាស់ក្រុមប្រឹក្សាទាំងនេះ ដើម្បីជួយសម្របសម្រួលកិច្ចការនៃសេចក្តីសង្រ្គោះ និងភាពតម្កើងឡើងនៅក្នុងវួដ ។ ភាគច្រើនគាត់ផ្ទេរភារកិច្ចនេះ ហើយតាមដានលើការចាត់តាំងនានា ( សូមមើល ៤.២.៥ ) ។
ប៊ីស្សពអញ្ជើញថ្នាក់ដឹកនាំឲ្យប្រឹក្សាជាមួយគ្នា អំពីរបៀបដើម្បីបង្កើតកម្លាំង និងសាមគ្គីភាពខាងវិញ្ញាណនៅក្នុងវួដ ។ គាត់លើកទឹកចិត្តសមាជិកក្រុមប្រឹក្សាទាំងអស់ឲ្យស្វែងរកការបំផុសគំនិត និងចូលរួមក្នុងការពិភាក្សា ។ ( សូមមើល គោលលទ្ធិ និង សេចក្តីសញ្ញា ៨៨:១២២; សូមមើលផងដែរ ៤.៤. នៅក្នុងក្បួនខ្នាតនេះ ) ។
គណៈប៊ីស្សពដាក់ផែនការការប្រជុំសាក្រាម៉ង់ និងការប្រជុំវួដដទៃទៀតដែលមានចែងនៅក្នុង ជំពូកទី ២៩ ។ ប៊ីស្សពធ្វើជាអធិបតីនៅក្នុងការប្រជុំវួដទាំងឡាយ លើកលែងតែមានសមាជិកមួយរូបនៃគណៈប្រធានស្តេក ពួកចិតសិបនាក់ប្រចាំតំបន់របស់គាត់ ឬអ្នកមានសិទ្ធិអំណាចទូទៅមានវត្តមាននៅទីនោះ ។ ទីប្រឹក្សារបស់ប៊ីស្សពអាចដឹកនាំការប្រជុំទាំងនេះបាន ។ ពួកគាត់ក៏ធ្វើជាអធិបតីផងដែរ ប្រសិនបើប៊ីស្សពអវត្តមាន ។
៧.១.១.៤
ការហៅបម្រើ និងការដោះលែង
ការទទួលខុសត្រូវរបស់ប៊ីស្សពសម្រាប់ការហៅបម្រើ និងការដោះលែងមានចែងនៅក្នុង ជំពូកទី ៣០ ។ គាត់អាចចាត់តាំងឲ្យទីប្រឹក្សារបស់គាត់ផ្តល់ការហៅបម្រើ និងការដោះលែង ដូចមានចែងនៅក្នុង ៣០.៨ បាន ។
៧.១.២
ប្រធានបព្វជិតភាពអើរ៉ុន
« គណៈប៊ីស្សពគឺជាគណៈប្រធាននៃបព្វជិតភាព [ អើរ៉ុន ] នេះ ហើយកាន់កូនសោទាំងឡាយ ឬសិទ្ធិអំណាចនៃរបស់ដដែល » ( គោលលទ្ធិ និង សេចក្ដីសញ្ញា ១០៧:១៥; សូមមើលផងដែរ ខទី ២០ ) ។ ប៊ីស្សពមានការទទួលខុសត្រូវដូចខាងក្រោម ក្នុងនាមជាប្រធាននៃបព្វជិតភាពអើរ៉ុននៅក្នុងវួដ ។ ទីប្រឹក្សារបស់គាត់ជួយដល់គាត់ ។
-
គាំទ្រឪពុកម្ដាយនៅក្នុងការបង្រៀនយុវវ័យ ។ ជួយយុវវ័យឲ្យបម្រើដោយស្មោះត្រង់ ចុះ និងរក្សាសេចក្ដីសញ្ញាដ៏ពិសិដ្ឋ ហើយរៀបចំខ្លួនដើម្បីទទួលពិធីបរិសុទ្ធនៅក្នុងព្រះវិហារបរិសុទ្ធ ។ ជួយយុវជនឲ្យរៀបចំខ្លួនដើម្បីបានតែងតាំងនៅក្នុងតំណែងបព្វជិតភាព និងបម្រើបេសកកម្មពេញម៉ោង ។ ប្រសិនបើយុវនារីមានបំណងប្រាថ្នាចង់បម្រើបេសកកម្មពេញម៉ោង សូមជួយពួកគេឲ្យរៀបចំខ្លួន ។ កម្មវិធីកុមារ និងយុវវ័យអាចជួយដល់កិច្ចខិតខំទាំងនេះបាន ( សូមមើលគេហទំព័រ ChildrenandYouth.ChurchofJesusChrist.org ) ។
-
មើលការខុសត្រូវលើកូរ៉ុមបព្វជិតភាពអើរ៉ុន និងថ្នាក់យុវនារី ។ ប៊ីស្សពគឺជាប្រធានកូរ៉ុមសង្ឃ ( សូមមើល គោលលទ្ធិ និង សេចក្ដីសញ្ញា ១០៧:៨៧–៨៨ ) ។ ទីប្រឹក្សាទីមួយរបស់គាត់មានទំនួលខុសត្រូវលើកូរ៉ុមគ្រូ ។ ទីប្រឹក្សាទីពីររបស់គាត់មានទំនួលខុសត្រូវលើកូរ៉ុមឌីកុន ។ សម្រាប់ព័ត៌មានបន្ថែមអំពីការដឹកនាំកូរ៉ុមបព្វជិតភាពអើរ៉ុន សូមមើល ១០.៣, ១០.៤ និង ១០.៥ ។
-
ប្រឹក្សាជាមួយប្រធានក្រុមយុវនារីវួដ ។ ប៊ីស្សពមិនផ្ទេរភារកិច្ចនេះដល់ទីប្រឹក្សាទេ ។ គាត់ និងទីប្រឹក្សារបស់គាត់ក៏ចូលរួមជាប្រចាំនៅក្នុងការប្រជុំ ការបម្រើ និងសកម្មភាពនានារបស់ក្រុមយុវនារីផងដែរ ។ ( សូមមើល ១១.៣.១ ) ។
-
ជួបនឹងយុវវ័យម្នាក់ៗជាទៀងទាត់ ។ សម្រាប់គោលការណ៍ណែនាំអំពីការប្រជុំទាំងនេះ សូមមើល ៣១.៣.១ ។
-
គាំទ្រដល់ក្រុមគ្រួសារ ក៏ដូចជាថ្នាក់ដឹកនាំ និងគ្រូបង្រៀនអង្គការបឋមសិក្សា នៅក្នុងកិច្ចខិតខំរបស់ពួកគេដើម្បីជួយកុមារឲ្យចុះ និងរក្សាសេចក្ដីសញ្ញា ( សូមមើល ជំពូកទី ១២ ) ។
៧.១.៣
ចៅក្រមទូទៅ
ប៊ីស្សពគឺជាចៅក្រមទូទៅនៅក្នុងវួដ ( សូមមើល គោលលទ្ធិ និង សេចក្ដីសញ្ញា ១០៧:៧១–៧៤ ) ។ គាត់ខិតខំធ្វើតាមគំរូរបស់ព្រះអង្គសង្គ្រោះ ក្នុងនាមជាចៅក្រមសុចរិតម្នាក់ ( សូមមើល នីហ្វៃទី៣ ២៧:២៧ ) ។ គាត់មានការទទួលខុសត្រូវដូចខាងក្រោម ៖
-
ជួយយុវវ័យ និងមជ្ឈិមវ័យឲ្យមានគុណសម្បត្តិគ្រប់គ្រាន់ ហើយមានភាពស័ក្តិសមក្នុងការកាន់ប័ណ្ណចូលព្រះវិហារបរិសុទ្ធ ។
-
ដឹកនាំការសម្ភាសនានាដូចមានចែងនៅក្នុង ៣១.២ ។ គាត់អាចផ្តល់សិទ្ធិអំណាចដល់ទីប្រឹក្សារបស់គាត់ឲ្យដឹកនាំការសម្ភាសមួយចំនួនបាន ( សូមមើល ៣១.២.២ ) ។ សម្រាប់គោលការណ៍ណែនាំ សូមមើល ៣១.១ ។
-
ជួបជាមួយសមាជិកវួដទាំងឡាយ ដែលស្វែងរកការណែនាំខាងវិញ្ញាណ ដែលមានបញ្ហាផ្ទាល់ខ្លួនជាទម្ងន់ ឬដែលបានប្រព្រឹត្តអំពើរំលងធ្ងន់ធ្ងរ ដោយការជួយពួកគេឲ្យទាញយកព្រះចេស្ដានៃការព្យាបាលរបស់ព្រះយេស៊ូវគ្រីស្ទ ។ ប៊ីស្សពអាចសុំឲ្យទីប្រឹក្សារបស់គាត់ ប្រធានកូរ៉ុមអែលឌើរ និងប្រធានសមាគមសង្គ្រោះ ព្រមទាំងអ្នកផ្សេងទៀតឲ្យជួបជាមួយសមាជិកវួដអំពីបញ្ហាមួយចំនួនបាន ។ ទោះជាយ៉ាងណាក៏ដោយ មានតែប៊ីស្សពប៉ុណ្ណោះដែលអាចជួបជាមួយសមាជិកវួដអំពីបញ្ហានៃភាពស័ក្ដិសម ការរំលោភបំពាន និងការអនុម័តឲ្យប្រើប្រាស់មូលនិធិដង្វាយតមអាហារ ។ សម្រាប់គោលការណ៍ណែនាំ សូមមើល ៣១.១ ។
-
នៅក្រោមការដឹកនាំរបស់ប្រធានស្ដេក សូមប្រជុំក្រុមប្រឹក្សាសមាជិកភាពតាមការចាំបាច់ ។ សម្រាប់គោលការណ៍ណែនាំ សូមមើល ជំពូកទី ៣២ ។
៧.១.៤
ការសម្របសម្រួលកិច្ចការនៃសេចក្តីសង្រ្គោះ និងភាពតម្កើងឡើង
ប៊ីស្សពសម្របសម្រួលកិច្ចការនៃសេចក្ដីសង្គ្រោះ និងភាពតម្កើងឡើងនៅក្នុងវួដ ( សូមមើល ជំពូកទី ១ ) ។ ទីប្រឹក្សារបស់គាត់ និងថ្នាក់ដឹកនាំវួដដទៃទៀតជួយដល់គាត់ ។
ប៊ីស្សពជួយសមាជិកឲ្យរស់នៅតាមដំណឹងល្អ ។ គាត់ជួយពួកគេឲ្យពង្រឹងសេចក្ដីជំនឿរបស់ពួកគេលើព្រះវរបិតាសួគ៌ និងលើព្រះយេស៊ូវគ្រីស្ទ និងដង្វាយធួនរបស់ទ្រង់ ( សូមមើល គោលលទ្ធិ និង សេចក្ដីសញ្ញា ២០:២៩ ) ។ គាត់បង្រៀនពួកគេឲ្យអធិស្ឋាន និងសិក្សាព្រះគម្ពីរ ។ គាត់អញ្ជើញពួកគេឲ្យចុះសេចក្តីសញ្ញា តាមរយៈការទទួលពិធីបរិសុទ្ធនៃសេចក្តីសង្រ្គោះ និងភាពតម្កើងឡើង ។ គាត់លើកទឹកចិត្តពួកគេឲ្យរក្សាសេចក្ដីសញ្ញារបស់ពួកគេ ។
ប៊ីស្សពពង្រឹងសមាជិកទាំងឡាយក្នុងសាសនាចក្រ ។ គាត់លើកទឹកចិត្តក្រុមគ្រួសារឲ្យចូលរួមក្នុងការអធិស្ឋានជាគ្រួសារឲ្យបានទៀងទាត់ ហើយរៀនដំណឹងល្អជាមួយគ្នា រួមទាំងនៅក្នុងរាត្រីជួបជុំក្រុមគ្រួសារផងដែរ ។ គាត់បង្រៀនពួកគេឲ្យស្រឡាញ់គ្នា និងបម្រើគ្នាទៅវិញទៅមក ។ គាត់បង្រៀនតាមពាក្យសម្ដី និងគំរូថា ការហៅបម្រើក្នុងសាសនាចក្រអាចត្រូវបានបំពេញដោយមិនបង្អាក់ដល់ការទទួលខុសត្រូវក្នុងគ្រួសារឡើយ ។ គាត់ត្រូវប្រាកដថា សកម្មភាពទាំងឡាយក្នុងសាសនាចក្រគាំទ្រដល់កិច្ចខិតខំរបស់ឪពុកម្តាយក្នុងការចិញ្ចឹមកូនៗរបស់ពួកគេនៅក្នុងសេចក្ដីសុចរិត ។
បន្ថែមទៅលើការជួយសមាជិកឲ្យរស់នៅតាមដំណឹងល្អ នោះប៊ីស្សពមានការទទួលខុសត្រូវផ្សេងៗទៀតនៅក្នុងកិច្ចការនៃសេចក្ដីសង្គ្រោះ និងភាពតម្កើងឡើង ។ ឧទាហរណ៍ គាត់ ៖
-
ជួយបុរសទាំងឡាយឲ្យរៀបចំខ្លួនដើម្បីបានតែងតាំងនៅក្នុងតំណែងបព្វជិតភាព ។
-
ដឹកនាំកិច្ចខិតខំដើម្បីមើលថែសមាជិកដែលខ្វះខាតនៅក្នុងវួដ ( សូមមើល ៧.១.៤.១ និង ២២.២.១ ) ។
-
ណែនាំគណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ កាលពួកគាត់ដឹកនាំកិច្ចខិតខំធ្វើការងារបម្រើនៅក្នុងវួដ ( សូមមើល ២១.២.១ ) ។
-
សម្របសម្រួលកិច្ចការរបស់គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ កាលពួកគាត់ដឹកនាំកិច្ចខិតខំរបស់វួដ ដើម្បីចែកចាយដំណឹងល្អ និងពង្រឹងសមាជិកថ្មី ក៏ដូចជាសមាជិកដែលត្រឡប់មកវិញ ( សូមមើល ២៣.១ ) ។
-
សម្របសម្រួលកិច្ចការរបស់គណៈប្រធានកូរ៉ុមអែលឌើរ និងគណៈប្រធានសមាគមសង្គ្រោះ កាលពួកគាត់ដឹកនាំកិច្ចការព្រះវិហារបរិសុទ្ធ និងពង្សប្រវត្តិនៅក្នុងវួដ ( សូមមើល ២៥.២ ) ។
-
ជួយសមាជិកឲ្យរៀបចំខ្លួនទទួលបានប័ណ្ណចូលព្រះវិហារបរិសុទ្ធ និងពិធីបរិសុទ្ធក្នុងព្រះវិហារបរិសុទ្ធ ( សូមមើល ២៧.១ ) ។
៧.១.៤.១
ការដឹកនាំកិច្ចខិតខំដើម្បីមើលថែសមាជិកដែលមានសេចក្ដីត្រូវការខាងសាច់ឈាម
ប៊ីស្សពមានសិទ្ធិអំណាចដ៏ទេវភាពដើម្បីស្វែងរក និងមើលថែសមាជិកដែលមានសេចក្ដីត្រូវការខាងសាច់ឈាម ( សូមមើល គោលលទ្ធិ និង សេចក្ដីសញ្ញា ៨៤:១១២ ) ។ ភាគច្រើនគាត់ផ្ទេរភារកិច្ចនេះដល់គណៈប្រធានសមាគមសង្គ្រោះ និងគណៈប្រធានកូរ៉ុមអែលឌើរ ។
កាតព្វកិច្ចមួយចំនួនមានតែប៊ីស្សពប៉ុណ្ណោះដែលអាចធ្វើបាន ។ ឧទាហរណ៍ គាត់កំណត់ប្រភេទ ចំនួនទឹកប្រាក់ និងរយៈពេលនៃជំនួយខាងសាច់ឈាមដែលត្រូវផ្ដល់ឲ្យដោយសាសនាចក្រ ។ ដើម្បីធ្វើដូច្នេះបាន ជាញឹកញាប់ គាត់ពិគ្រោះយោបល់ជាមួយនឹងប្រធានសមាគមសង្គ្រោះ និងប្រធានកូរ៉ុមអែលឌើរ ។ សម្រាប់ព័ត៌មានបន្ថែម សូមមើល ២២.៤ និង ២២.៥ ។
សមាជិកនៃគណៈប៊ីស្សពបង្រៀនគោលការណ៍នៃការមើលថែទាំដល់សមាជិកដែលខ្វះខាត និងស្ថាបនាភាពខ្លួនទីពឹងខ្លួន ( សូមមើល ២២.១ ) ។ ពួកគាត់ក៏បង្រៀនពីច្បាប់តមអាហារផងដែរ ( សូមមើល ២២.២.២ ) ។ ពួកគាត់មើលការខុសត្រូវលើការប្រមូលដង្វាយតមអាហារ ( សូមមើល ៣៤.៣.២ ) ។
ប៊ីស្សពណែនាំថ្នាក់ដឹកនាំវួដផ្សេងទៀតអំពីការទទួលខុសត្រូវរបស់ពួកគេ ដើម្បីមើលថែដល់សមាជិកដែលខ្វះខាត ។ គាត់ក៏ដឹកនាំក្រុមប្រឹក្សាវួដនៅក្នុងកិច្ចខិតខំទាំងនេះដែរ ។
សម្រាប់ព័ត៌មានបន្ថែមអំពីរបៀបដែលប៊ីស្សពមើលថែដល់សមាជិកដែលខ្វះខាត សូមមើល ២២.៦.១ ។
៧.១.៥
កំណត់ត្រា ហិរញ្ញវត្ថុ និងសាលាប្រជុំ
ប៊ីស្សពមើលការខុសត្រូវលើកំណត់ត្រាវួដ ហិរញ្ញវត្ថុវួដ និងសាលាប្រជុំ ។ គាត់អាចចាត់តាំងកិច្ចការភាគច្រើនដែលទាក់ទងនឹងកំណត់ត្រា និងហិរញ្ញវត្ថុទៅឲ្យទីប្រឹក្សា និងស្មៀនរបស់គាត់ ។ គាត់អាចចាត់ឲ្យទីប្រឹក្សាមួយរូបរបស់គាត់បម្រើជាអ្នកតំណាងអគារវួដ ឬគាត់អាចហៅសមាជិកផ្សេងទៀតឲ្យធ្វើកិច្ចការនេះ ។
សម្រាប់ព័ត៌មានអំពីកំណត់ត្រា សូមមើល ជំពូកទី ៣៣ ។ សម្រាប់ព័ត៌មានអំពីហិរញ្ញវត្ថុ សូមមើល ជំពូកទី ៣៤ ។ សម្រាប់ព័ត៌មានអំពីសាលាប្រជុំ សូមមើល ជំពូកទី ៣៥ ។
៧.២
ភាពខុសគ្នារវាងគណៈប្រធានសាខា និងគណៈប៊ីស្សព
នៅក្នុងសាខា អ្នកកាន់បព្វជិតភាពម៉ិលគីស្សាដែកមួយរូបត្រូវបានហៅជាប្រធានសាខា ។ គាត់កាន់កូនសោនៃបព្វជិតភាព ដែលចាំបាច់ដើម្បីធ្វើជាអធិបតី ( សូមមើល ៣.៤.១.១ ) ។ គាត់ និងទីប្រឹក្សារបស់គាត់បម្រើដូចជាគណៈប៊ីស្សពដែរ ប៉ុន្តែមានភាពខុសគ្នាដូចខាងក្រោម ៖
-
ប្រធានសាខាអាចជាអែលឌើរ ឬសង្ឃជាន់ខ្ពស់ ។ ប៊ីស្សពត្រូវតែជាសង្ឃជាន់ខ្ពស់ ។
-
ប្រធានសាខាមិនត្រូវបានធ្វើពិធីញែកចេញជាសង្ឃជាន់ខ្ពស់ជាអធិបតីនោះទេ ។ ប៉ុន្ដែគាត់ធ្វើជាអធិបតីលើសាខា និងមានការទទួលខុសត្រូវទាំងអស់ដូចបានរៀបរាប់នៅក្នុង ៧.១.១ ។
-
ទីប្រឹក្សានៅក្នុងគណៈប្រធានសាខាមិនអាចចេញប័ណ្ណចូលព្រះវិហារបរិសុទ្ធបានទេ ( សូមមើល ២៦.៣.១ ) ។
៧.៣
លេខាប្រតិបត្តិវួដ និងជំនួយការលេខាប្រតិបត្តិវួដ
គណៈប៊ីស្សពផ្ដល់អនុសាសន៍ឲ្យអ្នកកាន់បព្វជិតភាពម៉ិលគីស្សាដែកមួយរូប បម្រើជាលេខាប្រតិបត្តិវួដ ។ ពួកគាត់ផ្ដល់អនុសាសន៍នេះទៅកាន់គណៈប្រធានស្ដេក ។ លេខាប្រតិបត្តិវួដគួរតែមានភាពស័ក្ដិសមកាន់ប័ណ្ណចូលព្រះវិហារបរិសុទ្ធ ។ គាត់ត្រូវបានហៅ និងញែកចេញដោយសមាជិកម្នាក់នៃគណៈប្រធានស្តេក ឬក្រុមប្រឹក្សាជាន់ខ្ពស់ម្នាក់ដែលបានចាត់តាំង ។
លេខាប្រតិបត្តិធ្វើការយ៉ាងជិតស្និទ្ធជាមួយនឹងប៊ីស្សព និងទីប្រឹក្សារបស់គាត់ ប៉ុន្ដែគាត់មិនមែនជាសមាជិកក្នុងគណៈប៊ីស្សពនោះទេ ។ គាត់មានការទទួលខុសត្រូវដូចខាងក្រោម ៖
-
ជួបជាមួយគណៈប៊ីស្សព និងរៀបចំរបៀបវារៈតាមការចាត់តាំង ។
-
បម្រើជាសមាជិកម្នាក់ក្នុងក្រុមប្រឹក្សាវួដ ហើយចូលរួមការប្រជុំក្រុមប្រឹក្សាវួដ ។ ដូចដែលបានដឹកនាំដោយគណៈប៊ីស្សព តាមដានការចាត់តាំងដែលបានធ្វើនៅក្នុងការប្រជុំទាំងនេះ ។
-
ដាក់កាលវិភាគណាត់ជួបសម្រាប់គណៈប៊ីស្សព ។
-
ដាក់កាលវិភាគសម្ភាសសម្រាប់យុវវ័យ និងមជ្ឈិមវ័យ ដែលត្រូវបន្ដប័ណ្ណចូលព្រះវិហារបរិសុទ្ធរបស់ពួកគេ ។
-
ប្រសិនបើបានចាត់តាំងដោយគណៈប៊ីស្សព តាមដានកិច្ចខិតខំរបស់វួដដើម្បីជួយសមាជិកឲ្យទទួលបានទស្សនាវដ្ដីសាសនាចក្រ ( សូមមើល ៣៨.៨.៧ ) ។
-
ជួយដល់គណៈប៊ីស្សពជាមួយនឹងបញ្ហាថ្នាក់សិក្ខាសាលា និងថ្នាក់វិទ្យាស្ថាន ដូចជាការជួយសមាជិកវួដឲ្យចុះឈ្មោះចូលរៀនជាដើម ( សូមមើល ជំពូកទី ១៥ ) ។
-
រក្សាបញ្ជីឈ្មោះ និងអាសយដ្ឋានបច្ចុប្បន្នរបស់សមាជិកវួដដែលបម្រើនៅក្នុងកងទ័ព ។ ត្រូវប្រាកដថា ថ្នាក់ដឹកនាំវួដស្គាល់សមាជិកទាំងនេះ ( សូមមើល ៣៨.៩.២ ) ។ ជូនដំណឹងទៅលេខាប្រតិបត្តិស្តេក នៅពេលសមាជិកមានផែនការចូលបម្រើកងទ័ព ។
ជំនួយការលេខាប្រតិបត្តិវួដម្នាក់ ឬពីរនាក់អាចត្រូវបានហៅតាមសេចក្តីត្រូវការ ។ ពួកគេត្រូវបានចេញអនុសាសន៍ដោយគណៈប៊ីស្សព ហើយត្រូវបានហៅ និងញែកចេញ ដោយសមាជិកមួយរូបនៃគណៈប្រធានស្តេក ឬទីប្រឹក្សាជាន់ខ្ពស់ដែលបានចាត់តាំង ។ បងប្អូនប្រុសទាំងនេះគួរតែមានភាពស័ក្ដិសមកាន់ប័ណ្ណចូលព្រះវិហារបរិសុទ្ធ ។
៧.៤
ស្មៀនវួដ និងជំនួយការស្មៀនវួដ
ប៊ីស្សពផ្ដល់អនុសាសន៍ឲ្យអ្នកកាន់បព្វជិតភាពម៉ិលគីស្សាដែកមួយរូប បម្រើជាស្មៀនវួដ ។ គាត់ផ្ដល់អនុសាសន៍នេះទៅកាន់គណៈប្រធានស្ដេក ។ ស្មៀនគួរតែមានភាពស័ក្ដិសមកាន់ប័ណ្ណចូលព្រះវិហារបរិសុទ្ធ ។ គាត់ត្រូវបានហៅ និងញែកចេញដោយសមាជិកម្នាក់នៃគណៈប្រធានស្តេក ឬក្រុមប្រឹក្សាជាន់ខ្ពស់ម្នាក់ដែលបានចាត់តាំង ។
ជំនួយការស្មៀនវួដក៏អាចត្រូវបានហៅផងដែរ ( សូមមើល ៣៣.៤.៣ ) ។ ពួកគាត់ត្រូវបានហៅ និងធ្វើពិធីញែកចេញដោយសមាជិកម្នាក់នៃគណៈប្រធានស្តេក ឬក្រុមប្រឹក្សាជាន់ខ្ពស់ម្នាក់ដែលបានចាត់តាំង ។
ស្មៀនធ្វើការយ៉ាងជិតស្និទ្ធជាមួយនឹងប៊ីស្សព និងទីប្រឹក្សារបស់គាត់ ប៉ុន្ដែពួកគាត់មិនមែនជាសមាជិកក្នុងគណៈប៊ីស្សពនោះទេ ។ ការទទួលខុសត្រូវរបស់ស្មៀនវួដ និងជំនួយការស្មៀនវួដមានចែងនៅក្នុង ៣៣.៤.២ និង ៣៣.៤.៣ ។