fonotaga a le aufono a le uarota

4.

Taitaiga ma Aufono i le Ekalesia a Iesu Keriso

4.0

Faatomuaga

I le avea ai o se taitai i le Ekalesia, ua valaauina oe e ala i musumusuga e auala mai i auauna faatagaina a le Alii. Ua ia te oe le avanoa e fesoasoani ai i le galuega a le Tama Faalelagi o le “aumaia [o] le tino ola pea ma le ola faavavau o le tagata” (Mose 1:39). E te faia lenei mea e ala i le faamalosiau atu i tagata o le ekalesia ia punouai i le galuega a le Atua mo le faaolataga ma le faaeaga mo i latou lava, o latou aiga, ma isi (tagai i le mataupu 1). O le a e maua le olioli a o e auauna atu i fanau a le Atua.

O le mulimuli i faataitaiga a Iesu Keriso o le a tele ina e auauna atu i isi ta’i toatasi. O le a e maua foi le avanoa e tuu atu ai le taitaiga i fonotaga/sauniga ma gaoioiga a le Ekalesia. E le gata i lea, e mafai foi ona e tuuina atu le auaunaga taua e ala i aufono. O nei aufono e aofia ai fonotaga a au peresitene, fonotaga a aufono o le uarota, ma isi.

O lau auaunaga faapaiaina e manaomia ai le ositaulagaina o le taimi, ae aua ne’i faatuatuana’i i ou lava manaoga ma manaoga o lou aiga. Saili le taitaiga a le Agaga Paia e fesoasoani ia te oe e faapaleni ma faataunuu ou tiutetauave (tagai i le Mosaea 4:27).

4.1

O Le Faamoemoega o le Taitaiga i le Ekalesia

E uunaia e taitai ia tagata o le ekalesia ia punouai i le galuega a le Atua e ala i le avea ai ma “soo moni o … Iesu Keriso” (Moronae 7:48). Ina ia faia lenei mea, e taumafai muamua taitai e avea ma soo faamaoni o le Faaola. Ona mafai lea ona latou fesoasoani i isi ia faalatalata atili atu ia te Ia. I le faagasologa o le fesoasoani atu i isi, e avea ai i latou o ni soo lelei atu (tagai i le Mosaea 18:26Mataupu Faavae ma Feagaiga 31:5

4.2

Mataupu Faavae o le Taitaiga i le Ekalesia

I le taimi o Lana galuega i le lalolagi, sa faatu ai e le Faaola le faataitaiga o le taitaiga mo Lana Ekalesia. O Lona faamoemoega tutotonu o le faia o le finagalo o Lona Tama Faalelagi ma fesoasoani i isi ia malamalama ma ola i Lana talalelei (tagai i le Ioane 5:30; Mosaea 15:7). Sa alofa o Ia i ē sa Ia taitaia ma sa faaali atu i ai lena alofa e ala i le auauna atu ia i latou (tagai i le Ioane 13:3–5).

Sa faateleina e le Faaola le malosiaga o isi e ala i le tuuina atu ia i latou o tiutetauave ma avanoa e tuputupu ae ai (tagai i le Mataio 10:5–8; Ioane 14:12). Sa Ia faamalosiauina ma faasa’o i latou i le manino ma le alofa (tagai i le Ioane 21:15–17).

Na fetalai le Alii, “Ia tuu atu nei i tagata taitoatasi e a’oa’o lona tiute, ma galue i le tofi ua tofi i ai o ia, i le filiga atoa” (Mataupu Faavae ma Feagaiga 107:99). O nei upu e faatatau ia i latou uma o ē mauaina se tiutetauave e auauna atu ai ma taitai i le Ekalesia a le Faaola.

O le faaaogaina o mataupu faavae o i lenei mataupu o le a fesoasoani ia te oe e taitai ai ma le mataalia atili i le Ekalesia a le Faaola.

4.2.1

Saunia Faaleagaga

Sa saunia e Iesu o Ia lava faaleagaga mo Lana misiona i le lalolagi (tagai i le Luka 4:1-2). E faapena foi ona e saunia faaleagaga e ala i le faalatalata atili atu i le Tama Faalelagi e ala i le tatalo, suesue i tusitusiga paia, ma le usiusitai i Ana poloaiga. O le mulimuli i Ana perofeta e fesoasoani foi ia te oe e te saunia ai faaleagaga (tagai i le Mataupu Faavae ma Feagaiga 21:4–6).

Saili i faaaliga e te malamalama ai i manaoga o i latou e te taitaia ma le auala e faataunuu ai le galuega ua valaauina oe e le Atua e fai.

Ua folafola mai foi le Alii e faaee atu meaalofa faaleagaga i luga o i latou o ē saili i ai (tagai i le Mataupu Faavae ma Feagaiga 46:8). Pe a e valaau atu ma le lotomaualalo i le Tama Faalelagi ia maua nei meaalofa, o le a Ia faateleina lou tomai e taitai ma si’itia i latou e te auauna atu i ai.

4.2.2

Auauna Atu i Fanau Uma a le Atua

Sa auauna patino atu Iesu i tagata, ma aapa atu e si’itia ma a’oa’o i latou sa lagonaina le tuuatoatasi, leai se faamoemoe, pe ua sē. Sa Ia aloa’ia le natura paia ma le taua e faavavau o tagata taitoatasi.

Alofa i tagata e te auauna atu i ai e pei ona sa faia e Iesu. Tatalo “ma le malosi atoa o le loto” ina ia faatumulia i Lona alofa (Moronae 7:48). Ia faavae ni faauooga faamaoni. Aapa atu ia i latou atonu o tuuatoatasi, manaomia le faamafanafanaga, po o nisi manaoga o i ai. O lou alofa o le a faamanuiaina ai o latou olaga ma fesoasoani ai i tagata ia mananao e o mai ia Keriso.

Fesoasoani i tagata taitasi e faaloloto lo latou liua ma le malosi o lo latou faatuatua i le Tama Faalelagi ma Iesu Keriso. Fesoasoani ia i latou ia saunia e osia feagaiga pe a latou mauaina o latou sauniga e sosoo ai. Fautuaina i latou e tausia feagaiga na latou osia ma ia taumamafa i faamanuiaga o le salamo. Fesoasoani ia i latou ia iloa e mafai ona latou agai i luma e faataunuu lo latou gafatia paia e ui i luitau latou te fetaiai.

4.2.3

A’oa’o Atu le Talalelei a Iesu Keriso

O taitai uma lava o faiaoga. Tauivi e mulimuli i le faataitaiga a le Faaola i le avea ai ma se faiaoga (tagai i le mataupu 17; Aoao Atu i le Ala a le Faaola). E ala atu i au upu ma faatinoga, ia aoao atu le aoaoga faavae a Iesu Keriso ma mataupu faavae o Lana talalelei (tagai i le 3 Nifae 11:32–33; Mataupu Faavae ma Feagaiga 42:12–14). O le aoao atu ma le mataalia e musuiaina tagata e faamalosia lo latou sootaga ma le Atua ma ola i le talalelei, ma alualu i luma e agai atu i le ola e faavavau.

O le aoao atu i le ala a le Faaola e sili atu i le na’o le tautala; o loo aofia ai le faalogo ma faia fesili i le ala na Ia faia ai (tagai i le Mataio 16:13–17).

O faiaoga lelei o tagata aoao filiga foi i latou. Ia avea le suesue i afioga a le Atua o se faamuamua maualuga i lou olaga. O le aoaoina o le talalelei o se faagasologa i le olaga atoa.

A’oa’o atu mai tusitusiga paia ma upu a perofeta o aso e gata ai (tagai i le Mataupu Faavae ma Feagaiga 52:9). Manatua “o le folafolaina atu o le upu [e i ai] sona uiga mamana tele atu i luga o mafaufau o tagata nai lo … o se isi lava mea” (Alema 31:5).

Saili le faatosinaga a le Agaga a o e sauni e aoao atu. E molioo atu e le Agaga Paia le upumoni i loto ma mafaufau o i latou e te aoaoina (tagai i le 2 Nifae 33:1).

Afai e valaauina oe pe tofia e pulefaamalumalu i se sauniga/fonotaga po o se gaoioiga a le Ekalesia, ia mautinoa e faagaeetia ma ia sa’o aoaoga faavae autu (tagai i le Mataupu Faavae ma Feagaiga 50:21–23).

4.2.4

Pulefaamalumalu i le Amiotonu

Na faaali mai e le Alii, e faapea “ona e tatau ai, e i ai peresitene, po o mautofi pulefaamalumalu” i Lana Ekalesia (Mataupu Faavae ma Feagaiga 107:21). O i latou e umia ki o le perisitua e pulefaamalumalu i o latou eria o tiutetauave, e pei o se korama po o se uarota.

O isi faalapotopotoga a le Ekalesia, e aofia ai le Aualofa, Tamaitai Talavou, Peraimeri, ma le Aoga Sa, e taitai foi e se taitai pulefaamalumalu. O nei taitai e valaauina, vaetofia, ma tuuina atu i ai le pule faamatu’u e se tasi e umia ki o le perisitua po o se tasi na te faatagaina (tagai i le 3.4.3).

O taitai pulefaamalumalu taitasi, e auauna atu i lalo o le taitaiga a se tagata o loo umia ki o le perisitua (tagai i le 3.4.1). O lenei faatulagaga ua aumaia ai le faatulagaga maopoopo ma laina manino o le tiutetauave ma le tali atu o le tagata lava ia i le faiga o le galuega a le Alii.

E mafai e se taitai pulefaamalumalu ona faamatuu atu i se isi tagata se tofiga e le tumau e pulefaamalumalu ai. Mo se faataitaiga, afai o le a le auai le peresitene o le Aualofa i se sauniga a le Aualofa i se Aso Sa, o le a ia tofia lona fesoasoani muamua e pulefaamalumalu i le sauniga/fonotaga.

O se taitai e pulefaamalumalu i se faalapotopotoga a le Ekalesia, fonotaga, po o se gaoioiga e faamautinoaina e ausia faamoemoega a le Alii. O le faia o lea mea, e mulimuli ai le taitai i mataupu faavae o le talalelei, aiaiga faavae a le Ekalesia, ma le taitaiga a le Agaga Paia.

O i latou e pulefaamalumalu e mulimuli i le faataitaiga a Iesu Keriso i le auauna atu ma le agalelei, agamalu, ma le alofa mama (tagai i le Ioane 13:13–15). O se valaauga po o se tofiga e pulefaamalumalu e le faapea o le a sili atu ai le taua po o le mamalu o le tagata ua mauaina nai lo isi (tagai i le Mataupu Faavae ma Feagaiga 84:109–10).

Afai na valaauina pe tofia oe e pulefaamalumalu, mulimuli i le aoaoga a le Faaola e faapea “o se fia sili ia te outou, ia fai o ia ma a outou auauna” (Mataio 20:27; tagai i fuaiupu 26–28). Fefautuaai ma isi ma saili le lotogatasi ia malamalama i le finagalo o le Alii ma le faia o Lana galuega (tagai i le Mataupu Faavae ma Feagaiga 41:2; tagai foi i le 4.4 i le tusitaulima lenei).

E le o se mea talafeagai le faufau e pulefaamalumalu i se faalapotopotoga i le Ekalesia a le Alii (tagai i le Mataupu Faavae ma Feagaiga 121:34--37). Ae, ia auauna atu ma le lotomaualalo ma le faamaoni i le tofiga ua valaauina ai oe. Taumafai malosi e fai le galuega a le Alii ma le manatu tasi i Lona mamalu (tagai i le Mataupu Faavae ma Feagaiga 4:5).

fonotaga po o sauniga a le uarota

4.2.5

Faamatuu Atu Tiutetauave ma Faamautinoa le Tali Atu I Ai

Na tuuina atu e le Faaola i Ona soo ni tofiga ma ni tiutetauave ‘anoa (tagai i le Luka 10:1). Na Ia tuu atu foi ia i latou se avanoa e tali atu ai mo le galuega na tuu atu ia i latou e fai (tagai i le Luka 9:10).

I le avea ai ma se taitai, e mafai ona e fesoasoani i isi ia tuputupu ae e ala i le faamatuu atu o tofiga ia i latou. O lea auala o le a e fesoasoani ai foi ia i latou ia maua faamanuiaga e maua mai le auauna atu. Tauivi e faaauai tagata uma o le au paia i le faiga o le galuega a le Atua.

O le faamatuu atu o le a sili ai foi ona aoga lau auaunaga. Afai e te taumafai e fai le tele na’ua o mea, o le a mautinoa lava lou “matua tigaina” (Esoto 18:18). Saili i le taitaiga a le Agaga e uiga i mea e faamatuu atu ina ia mafai ai ona e taulai atu i au faamuamua aupito maualuluga.

O le faamatuu atu e telē atu i le na o le tuu atu o se tofiga. E aofia ai foi le aoao atu ma le faatuatuaina o se isi tagata na te faataunuuina le tofiga. E masani ona aofia ai elemene nei:

• Ia fono ma le tagata e valaaulia o ia e auauna atu i le Alii i se tofiga. Fesoasoani i le tagata ia malamalama i le tofiga ma ona faamoemoega.

• Fefautuaai faatasi e uiga i le tofiga, pe o ai isi e mafai ona aofia ai, ma le taimi e tatau ona faamae’aina ai. Faamautinoa ua malamalama le tagata ma ua taliaina ma le loto i ai le tofiga. Faailoa atu le talitonuga ia te ia ma ona tomai.

• Ia fautuaina le tagata e saili ia musumusuga e uiga i le ala e faataunuu ai le tofiga. Faaali atu lou faatuatuaina ma fesoasoani ia manuia le tagata. Tuu atu le taitaiga ma le lagolago e pei ona manaomia.

• Ia fesili atu i lea taimi ma lea taimi i le tagata e lipoti mai e uiga i le tofiga. Ia talia taumafaiga silisili a le tagata, ma faailoa atu le talisapaia o mea ua ia faia.

O taiala mo le tuuina atu o se valaauga i le 30.1.1 e tatau foi ona mulimulitaia pe a faamatuu atu, pe a talafeagai ai.

4.2.6

Saunia Isi Ia Avea ma Taitai ma Faiaoga

Sa saunia e le Faaola Ana Aposetolo e avea ma taitai i Lana Ekalesia. E faapena foi ona e fesoasoani i isi ia saunia e avea ma taitai ma faiaoga. O le galuega a le Alii e taulai i le fesoasoani atu i tagata, ae le na ona faatautaia o polokalama a le Ekalesia. E le uma nei polokalama ia i latou lava. E i ai pea e fesoasoani ai ia tuputupu ae tagata.

Pe a mafaufauina po o ai e mafai ona galue i valaauga po o tofiga o le Ekalesia, ia agaga tatalo. Ia manatua o le a faaagavaaina e le Alii i latou Na te valaauina. O le mea e aupito sili ona taua o lo latou naunau e auauna atu, o le a sailia ma le lotomaualalo le fesoasoani a le Alii ma o loo taumafai ia agavaa. O valaauga ma tofiga e mafai ona fesoasoani ia i latou e tuputupu a’e ai e ala i le tuuina atu o avanoa e faaaoga ai o latou faatuatua, galue malosi, ma lagona o loo faalauteleina e le Atua a latou taumafaiga. Tuu atu le taitaiga ma le lagolagosua i le autalavou, tagata fou, ma isi atonu e manaomia se lagolagosua faaopoopo i le faataunuuina o o latou valaauga.

O nisi taimi o tagata lava ia e toe valaau foi i tofiga faaleautaitai. O lea tulaga e mafai ona mamafatū ia i latou ma o latou aiga ma aveesea ai avanoa mai isi. Saili ia tuu atu avanoa i tagata uma o le au paia e auauna atu ai ma tuputupu a’e ai.

Mo nisi faamatalaga e uiga i valaauga o le Ekalesia, tagai i le mataupu e 30.

4.2.7

Fuafua Fonotaga, Lesona, ma Gaoioiga ma ni Faamoemoega Manino

Saili musumusuga mai le Alii i le fuafuaina o fonotaga, lesona, ma gaoioiga e i ai ni faamoemoega manino. O nei faamoemoega e tatau ona faamalolosia ai tagata taitoatasi ma aiga, aumaia faalatalata atili ai i latou ia Keriso, ma fesoasoani ai i le faataunuuina o le galuega a le Atua o le faaolataga ma le faaeaga (tagai i mataupu 1ma le 2 Pe a fuafuaina, mulimuli i mataupu faavae o loo i le 4.4.2 ma i le mataupu 20 ma le29.

4.2.8

Iloiloina o Au Taumafaiga

Ia iloilo e le aunoa ou tiutetauave ma le tuputupu a’e faaleagaga o se taitai. Ia mafaufau foi i le tuputupu a’e o i latou e te taitaia.

O le faamanuiaina o oe o se taitai e muai fuaina i lau tautinoga e fesoasoani i fanau a le Atua ia avea ma soo faamaoni o Iesu Keriso. Talu ai ua tofu tagata uma ma le faitalia, atonu e filifili nisi e ō ese mai le ala o feagaiga. E i ai taimi e ono faalotovaivaia ai oe i lenei mea, ae pe a e liliu atu i le Alii, o le a Ia siitia oe ma faamafanafana ia te oe (tagai i le Alema 26:27). E mafai ona e iloa ua fiafia le Alii i au taumafaiga pe a e lagonaina le Agaga o loo galue e ala atu ia te oe.

4.3

Aufono i le Ekalesia

Ua faavaeina e le Tama Faalelagi ia aufono o se vaega taua o le mauaina o musumusuga, faia o faaiuga, ma le faataunuuina o Lana galuega. Sa i ai aufono a o le’i foafoaina le lalolagi. Sa tofu auai i tatou taitasi i nei aufono a o le’i o mai i le lalolagi. (Tagai i le Mataupu Faavae ma Feagaiga 121:32; Aperaamo 3:22-28.)

O le mulimulita’i i lea mamanu, ua pulea ai le Ekalesia a Iesu Keriso i aufono i tulaga uma. Mo se faataitaiga, o le Aufono a le Au Peresitene Sili ma le Korama a Aposetolo e Toasefululua (tagai i le 5.1.1.1), Au Peresitene o Eria (tagai i le 5.2.1), au peresitene o siteki, ma au epikopo o aufono uma lava. E le gata i aufono a siteki ma uarota, o au peresitene taitasi o se faalapotopotoga a le Ekalesia, korama, po o vasega o se aufono foi.

Ua faatonuina e le Alii ia taitai o Lana Ekalesia e fefautuaai faatasi i le faiga o Lana galuega (tagai i le Mataupu Faavae ma Feagaiga 41:2–3). O aufono e maua ai avanoa mo sui auai o aufono e maua faaaliga a o latou saili ia malamalama i manaoga o fanau a le Atua ma fuafua pe faapefea ona fesoasoani ia taulimaina.

tamaloloa e toalua o loo talanoa

4.4

O Mataupu Faavae o Aufono Aoga

O nisi o mataupu faavae o aufono aoga ua faataoto atu i le vaega lenei.

4.4.1

Faamoemoega o Aufono

O le uluai faamoemoega o aufono o le fesoasoani lea i tagata o le ekalesia ia galulue faatasi i le sailia o le taitaiga faalelagi e uiga i mataupu o le a faamanuiaina ai tagata taitasi ma aiga (tagai i le Mataupu Faavae ma Feagaiga 43:8–9). E tuu atu e aufono le faamamafa faapitoa e fesoasoani ai i tagata ia maua sauniga ma tausisia feagaiga e o faatasi ai. E saili foi sui auai o aufono i musumusuga e uiga i le fuafuaina ma le faamaopoopoina o le galuega a le Alii i eria o o latou tiutetauave.

O nisi o pisinisi o le faatautaiga, e pei o le fuafuaina o kalena, atonu e le manaomia ona talanoaina i se fonotaga a le aufono. O le tele o ia mea e mafai ona taulima e ala i fesootaiga a o lei faia fonotaga po o le mae’a foi.

E tuu atu e sui auai o le aufono le amana’ia faapitoa i tagata taitoatasi ma aiga e i ai manaoga tuga. E fesoasoani aufono e faamaopoopo le lagolagosua. Mo faamatalaga e uiga i nisi o nei manaoga, faatasi ai ma punaoa mo le malamalama ma le lagolagoina, tagai i le Life Help i le Gospel Library.

4.4.2

Sauniuniga mo Fonotaga a le Aufono

Ua faamoemoe i au peresitene ma aufono e fono e le aunoa. E saili e taitai le taitaiga a le Alii i le fuafuaina o fonotaga a aufono. Latou te sailia foi manatu mai sui auai o aufono i le filifilia o mea e talanoaina.

E vave faailoa atu e taitai i sui auai o aufono ia iloa mataupu mo talanoaga. E sauniuni sui auai o aufono e faasoa mai malamalamaaga e uiga i nei mataupu. Mo aufono a uarota ma siteki, o le tele o lenei sauniuniga e tupu i fonotaga a au peresitene.

E sauniuni faaleagaga ia sui auai o le aufono ina ia tofu sao i fonotaga a le aufono.

4.4.3

Talanoaga ma Faaiuga

Na fetalai mai le Alii, “Ia tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai o tagata uma, o le a faapea ona mafai ona faagaeetia ai o tagata uma, ma ina ia mafai ona maua ai e tagata taitoatasi le avanoa tutusa” (Mataupu Faavae ma Feagaiga 88:122). E faatatau lenei mataupu faavae i aufono a le Ekalesia.

I le taimi o se fonotaga a se aufono, e faamalamalama atu e le taitai (po o se tasi ua tofia e le taitai) le mataupu ua mafaufauina. Ona fautuaina lea e le taitai le talanoaga i sui auai uma o le aufono, ma faia fesili ma sailia ni manatu.

E fautuaina e le taitai ia sui auai e tatala mai le talanoa ma ia faamaoni. O tulaga eseese, o tausaga, poto masani, ma manatu faaalia o sui auai o le aufono e faamauoa ai le aufono. E fefaasoaai e sui auai ia fautuaga ma faalogologo le tasi i le isi ma le faaaloalo. A o latou saili ia iloa le finagalo o le Alii, e mafai ona manumalo ai se agaga o musumusuga ma le lotogatasi.

I se aufono e aofia ai tamaitai ma alii, e saili e le taitai ia malamalamaaga ma manatu mai i nei itu e lua. O alii ma tamaitai e tele ina eseese manatu e maua mai ai le paleni e moomia. E taunuu alii ma tamaitai i faaiuga lelei atu ma sili atu le faamanuiaina i le galuega a le Alii ao latou faatauaina saofaga a le tasi ma le isi ma galulue faatasi.

E taiala e se taitai le talanoaga a le aufono. Peitai, e ao ona tele atu lana faalogologo nai lo le tautala. Pe a vave ona faasoa atu e se taitai o le aufono sona manatu, e mafai ona taofiofia ai sao a isi. Pe a tatau ai, e toetata’i fimalie e le taitai o le aufono pe toefaataulai le talanoaga.

A maea le talanoaga, e mafai e le taitai ona fai se tonu o se auala o le faatinoga pe toe tolopo se faaiuga a o sailia nisi faamatalaga ma se taitaiga. O le faaiuga e tatau ona faaalia i le talanoaga ae faamautu e le Agaga. O le faagasologa o le aufono e fesoasoani e aumaia ai faaiuga musuia e i talaatu o se faautautaga sili a se taitai lava ia. E mafai foi e le taitai ona faasino le mataupu i se aufono e ese.

O nisi taimi atonu e i ai ni lagona le mautinoa o sui auai o le aufono e uiga i se faaiuga taua. A oo ina tupu lenei mea, e mafai e le taitai ona faatali mo se isi fonotaga e lauiliu atili ai le mataupu ma saili le faamautuuga faaleagaga ma le lototagasi. I nisi o tulaga, atonu e manao se sui auai o le aufono e talanoa ma le taitai na o ia e talanoaina ai ona atugaluga.

4.4.4

Lotogatasi

Na aoaoina e Iesu Ona soo ina “ia tasi” (Mataupu Faavae ma Feagaiga 38:27). E saili sui auai o aufono ia tasi i le faanaunauga ma le faamoemoega ma le Tama Faalelagi ma Iesu Keriso. Latou te taumafai malosi mo le lotogatasi i a latou talanoaga ma faaiuga.

E tatau i sui auai o aufono ona aloese mai finauga, faamasinoga amioletonu, ma le faitatala (tagai i le 3 Nifae 11:28--30). A o latou galulue i le lotogatasi, o le a faamanuia e le Tama Faalelagi a latou taumafaiga.

4.4.5

O Faatinoga ma le Tali Atu mo A’u Lava

E faia e tagata o le aufono le tele o a latou galuega ao lei amataina ma i le mae’a ai o fonotaga a le aufono. I le taimi o fonotaga, latou te sailia ia musumusuga i le atiina a’e o fuafuaga e faatino ai faaiuga. E valaaulia e le taitai o le aufono ia sui auai e faataunuu ia tofiga e tusa ai ma nei fuafuaga. E masani ona valaaulia e sui auai o aufono isi ia latou faalapotopotoga e fesoasoani atu. E le tatau ona mamafatu ni tofiga o tagata taitoatasi.

E lipoti atu sui auai o aufono e uiga i o latou tofitofiga. O le alualu i luma e masani ona manaomia ai le gauai atu faifai pea ma tofitofiga e tulitatao ai.

4.4.6

Lē Faalaua’iteleina

E faaaoga e taitai le faautautaga pe a faasoa atu faamatalaga patino i se aufono. E masani lava latou te sailia se faatagaga a se sui auai e faasoa atu ai lenei faamatalaga.

E faaaloalogia e le aufono le manao o soo se tasi e talosagaina le le faalauaiteleina. E le tatau i sui auai o le aufono ona faasoa atu faamatalaga patino i fafo atu o le aufono sei vagana ai ua manaomia e faataunuu ai se tofiga mai le taitai o le aufono.

O nisi mataupu e maaleale tele naua e le tatau ai ona aumaia i luma o se aufono atoa. Pe a talafeagai ai, e toeiloilo e taitai nei mataupu faatasi ai ma sui auai taitasi o le aufono. Pe e mafai foi ona latou faasino nisi o mataupu i se aufono e ese.