“3. O Mataupu Faavae o le Perisitua,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020).
“3. O Mataupu Faavae o le Perisitua,” Tusitaulima Aoao.
3.
Mataupu Faavae o le Perisitua
3.0
Faatomuaga
O le perisitua o le pule ma le mana a le Atua. E ala i le perisitua, ua faataunuuina ai e le Tama Faalelagi Lana galuega “ia aumaia le tino ola pea ma le ola faavavau o le tagata” (Mose 1:39). Ua toina mai e le Atua le pule ma le mana i Ona atalii ma afafine i le lalolagi e fesoasoani ai i le faatinoina o lenei galuega (tagai i le mataupu 1).
3.1
Toefuataiga o le Perisitua
O Le Ekalesia a Iesu Keriso o le Au Paia o Aso e Gata Ai e na’o le pau lea o le faalapotopotoga i le lalolagi e i ai le pule o le perisitua. Na mauaina e le Perofeta o Iosefa Samita le Perisitua Arona ma ona ki mai ia Ioane le Papatiso (tagai i le Mataupu Faavae ma Feagaiga 13:1). Na ia mauaina le Perisitua Mekisateko ma ona ki mai Aposetolo o Peteru, Iakopo, ma Ioane (tagai i le Mataupu Faavae ma Feagaiga 27:12–13).
I totonu o le Malumalu o Katelani, na faaali atu ai Mose, Elaia, ma Elia ia Iosefa Samita ma tuuina atu ia te ia isi pule e tatau ai mo le faataunuuina o le galuega a le Atua i aso e gata ai (tagai i le Mataupu Faavae ma Feagaiga 110:11–16).
E tofu umia e uso taitasi o le Au Peresitene Sili ma le Korama a Aposetolo e Toasefululua ki uma nei o le perisitua i le taimi nei. E valaauina ma faatagaina e nei taitai ia isi tagata o le Ekalesia e faaaoga le pule ma le mana o le perisitua a le Atua e fesoasoani ai i Lana galuega o le faaolataga ma le faaeaga.
3.2
O Faamanuiaga o le Perisitua
E ala mai i feagaiga ma sauniga o le perisitua, ua faia ai e le Atua ia avanoa faamanuiaga sili i Ana fanau uma. O nei faamanuiaga ua aofia ai le:
-
Papatisoga ma le avea ai ma tagata o Le Ekalesia a Iesu Keriso o le Au Paia o Aso e Gata Ai.
-
O le meaalofa o le Agaga Paia.
-
Taumafa i le faamanatuga.
-
Pule ma le mana e auauna atu ai i valaauga ma tofiga i le Ekalesia.
-
Mauaina o faamanuiaga faapeteriaka ma isi faamanuiaga faaleperisitua o le faamalologa, faamafanafanaga, ma le taitaiga.
-
O le faaeeina i le mana o le Atua i totonu o le malumalu.
-
O le faamauina o se tasi i tagata o le aiga mo le faavavau.
-
O le folafolaga o le ola e faavavau.
E mafai e fanau a le Atua ona maua nei faamanuiaga o le perisitua ma lagona le olioli tele pe a latou ola i le talalelei a Iesu Keriso.
3.3
Perisitua Mekisateko ma le Perisitua Arona
I le Ekalesia, o le perisitua e lua ona vaega: o le Perisitua Mekisateko ma le Perisitua Arona (tagai i le Mataupu Faavae ma Feagaiga 107:1).
3.3.1
Perisitua Mekisateko
O le Perisitua Mekisateko “o le Perisitua Paia, e tusa ma le Faatulagaga a le Alo o le Atua” (Mataupu Faavae ma Feagaiga 107:3). O le mana lea e mafai ai e atalii ma afafine o le Atua ona avea e faapei o Ia (tagai i le Mataupu Faavae ma Feagaiga 84:19–21; 132:19–20).
“O Le Perisitua Mekisateko e umia le aiā o le au peresitene.” O loo i ai le “mana ma le pule i luga o tofi uma i le ekalesia i tupulaga uma o le lalolagi, e taitai ai i mea faaleagaga” (Mataupu Faavae ma Feagaiga 107:8). E ala mai i lenei pule, e taitai ai e taitai o le Ekalesia ma faatautaia ia galuega uma faaleagaga a le Ekalesia (tagai i le Mataupu Faavae ma Feagaiga 107:18).
O le Peresitene o le Ekalesia o le faitaulaga sili pulefaamalumalu lea i le Perisitua Mekisateko (tagai i le Mataupu Faavae ma Feagaiga 107:65–67). O le peresitene o le siteki o le faitaulaga sili pulefaamalumalu lea i le siteki (tagai i le Mataupu Faavae ma Feagaiga 107:8, 10; tagai foi i le mataupu 6 i le tusitaulima lenei). O le epikopo o le faitaulaga sili pulefaamalumalu lea i le uarota (tagai i le Mataupu Faavae ma Feagaiga 107:17; tagai foi i le mataupu 7 i le tusitaulima lenei).
Mo faamatalaga e uiga i tofi ma tiutetauave o le Perisitua Mekisateko, tagai i le 8.1.
3.3.2
Perisitua Arona
O le Perisitua Arona “o se faaopoopoga i … le Perisitua Mekisateko” (Mataupu Faavae ma Feagaiga 107:14). O loo aofia ai ki:
-
O le auaunaga a agelu.
-
O le talalelei o le salamo.
-
O le faatautaiga o sauniga i fafo, e aofia ai le papatisoga mo le faamagaloga o agasala.
(Tagai i le Mataupu Faavae ma Feagaiga 13:1; 84:26–27; 107:20.)
O le epikopo o le peresitene lea o le Perisitua Arona i le uarota (tagai i le Mataupu Faavae ma Feagaiga 107:15).
Mo faamatalaga e uiga i tofi ma tiutetauave o le Perisitua Arona, tagai i le 10.1.3.
3.4
Pule o le Perisitua
O le pule o le perisitua o le faatagaga lea e fai ai ma sui o le Atua ma galue i Lona suafa. I le Ekalesia, o le pule uma o le perisitua e faaaoga i lalo o le taitaiga a i latou o ē umia ki o le perisitua.
O tamatane agavaa o le Ekalesia e mauaina le pule o le perisitua e ala i le faaee atu o le perisitua ma le faauuga i tofi o le perisitua. E mafai e tagata uma o le Ekalesia ona faaaoga le pule faamatuu, pe a vaetofiaina pe tofiaina foi i latou e fesoasoani i le faataunuuina o le galuega a le Atua. O tagata o le Ekalesia e tali atu mo i latou lava i le Atua ma i latou na Ia tofia e pulefaamalumalu, mo le auala latou te faaaoga ai Lana pule (tagai i le 3.4.4).
3.4.1
O Ki o le Perisitua
O ki o le perisitua o le pule lea e taitai ai le faaaogaina o le perisitua e fai ma sui o fanau a le Atua. O le faaaogaina o le pule uma o le perisitua i le Ekalesia e taitaia e i latou o ē umia ki o le perisitua (tagai i le Mataupu Faavae ma Feagaiga 65:2).
3.4.1.1
O I Latou O Ē Umia Ki o le Perisitua
O Iesu Keriso e umiaina ki uma o le perisitua. I lalo o Lana taitaiga, e tuuina atu ai ki o le perisitua i alii e faaaoga i valaauga fitoitonu e fesoasoani ai i le faataunuuina o le galuega a le Atua, e pei ona faamalamalama atu i lalo.
Ua faaee e le Alii i luga o Ana Aposetolo taitasi ia ki uma e faatatau i le malo o le Atua i le lalolagi. O le Aposetolo sinia o loo soifua, o le Peresitene o le Ekalesia, ua na’o le pau lea o le tagata i luga o le fogaeleele ua faatagaina e faaaogaina na ki uma o le perisitua (tagai i le Mataupu Faavae ma Feagaiga 81:1–2; 107:64–67, 91–92; 132:7).
I lalo o le taitaiga a le Peresitene o le Ekalesia, o taitai perisitua nei e tuuina atu i ai ki ina ia mafai ai ona latou pulefaamalumalu i o latou eria o tiutetauave.
-
Peresitene o siteki ma itu.
-
Epikopo ma peresitene o paranesi.
-
Peresitene o korama o le Perisitua Mekisateko ma le Perisitua Arona.
-
Peresitene o malumalu.
-
Peresitene o misiona ma peresitene o nofoaga autu e a’oa’o ai faifeautalai.
-
Peresitene o nofoaga faasolopito o le Ekalesia.
O nei taitai e mauaina ki o le perisitua pe a vaetofia i latou i o latou valaauga.
E le tuuina atu i isi ki o le perisitua, e aofia ai fesoasoani i taitai perisitua i lotoifale po o peresitene o faalapotopotoga o le Ekalesia. O nei taitai e tuuina atu i ai le pule faamatuu pe a vaetofia i latou ma pe a latou mauaina ni tofiga i lalo o le taitaiga a i latou o loo umiaina ki o le perisitua. O peresitene o faalapotopotoga a le Ekalesia e pulefaamalumalu i lalo o le taitaiga a i latou o loo umia ki o le perisitua (tagai i le 4.2.4
3.4.1.2
Faatulagaga Tatau i le Galuega a le Atua
O ki o le perisitua e faamautinoa ai ua faataunuuina le galuega a le Atua mo le faaolataga ma le faaeaga i se faiga faatulagaina tatau (tagai i le Mataupu Faavae ma Feagaiga 42:11; 132:8). O i latou e umia ki o le perisitua e taitaia le galuega a le Alii i totonu o eria o o latou tiutetauave. O lea pule e pulefaamalumalu ai e mo na’o tiutetauave patino o le valaauga o le taitai e aoga i ai. Pe a faamalolo ia taitai perisitua mai o latou valaauga, latou te le toe umiaina nei ki.
O i latou uma o ē auauna atu i le Ekalesia e vaetofia pe tofia i lalo o le taitaiga a lē o loo umiaina ia ki o le perisitua.
3.4.2
Faaeega ma le Faauuga o le Perisitua
I lalo o le taitaiga a i latou o loo umia ki o le perisitua, e faaee atu ai le Perisitua Arona ma le Perisitua Mekisateko i luga o tamatane agavaa o le Ekalesia (tagai i le Mataupu Faavae ma Feagaiga 84:14–17). A uma ona faaee atu le perisitua talafeagai, ona faauu lea o le tagata i se tofi i lena perisitua, e pei o le tiakono po o se toeaina. O sē e umia le perisitua e faaaogaina le perisitua e tusa ai ma aia tatau ma tiute o lena tofi (tagai i le Mataupu Faavae ma Feagaiga 107:99).
E tatau ona tauivi alii taitasi i le Ekalesia a Iesu Keriso ia agavaa e maua ma faaaoga le Perisitua Mekisateko e auauna atu ai i isi. Pe a maua e se alii lenei perisitua, na te osia se feagaiga e faataunuu ma le faamaoni ona tiutetauave faaleperisitua. Na te mauaina foi mai le Atua se tautoga, po o se folafolaga, o faamanuiaga e faavavau (tagai i le Mataupu Faavae ma Feagaiga 84:33–44; tagai foi i le Taiala i Tusitusiga Paia, “Tautoga ma Feagaiga o le Perisitua”).
Mo nisi faamatalaga e uiga i le faaeega ma le faauuga o le perisitua, tagai i le 8.1.1, 10.6, 18.10, ma le 38.2.5.
3.4.3
Faamatuuina Atu o le Pule o le Perisitua e Auauna Atu Ai i le Ekalesia
O le pule o le perisitua e auauna atu ai i le Ekalesia e faamatuu atu i tagata o le ekalesia faapenei:
-
E ala i le vaetofiaina i se valaauga o le Ekalesia
-
E ala i se tofiga mai taitai pulefaamalumalu o le Ekalesia
3.4.3.1
Vaetofiaina
Pe a vaetofia ia tagata o le Ekalesia i lalo o le taitaiga a i latou o ē umia ki o le perisitua, ua tuuina atu ia i latou le pule mai le Atua e galulue ai i lena valaauga. Mo se faataitaiga:
-
O se tamaitai e valaauina ma vaetofiaina e le epikopo e avea ma peresitene o le Aualofa e tuu atu i ai le pule e taitai ai le galuega a le Aualofa i le uarota.
-
O se alii po o se tamaitai e valaauina ma vaetofiaina e se tasi o le au epikopo e avea ma faiaoga i le Peraimeri e tuu atu i ai le pule e faiaoga ai i tamaiti Peraimeri i le uarota.
O i latou uma o ē valaauina ma vaetofiaina, e auauna atu i lalo o le taitaiga a i latou o loo pulefaamalumalu ia i latou (tagai i le 3.4.1.2).
Pe a faamalolo tagata o le Ekalesia mai se valaauga, e le toe i ai ia i latou le pule e fesootai ma le valaauga.
Mo nisi faamatalaga e uiga i le vaetofiaina o tagata mo valaauga i le Ekalesia, tagai i le 18.11.
3.4.3.2
Tofiga
O taitai pulefaamalumalu o le Ekalesia e mafai ona faamatuu atu le pule e ala i se tofiga. Pe a maua e alii ma tamaitai nei tofiga, e tuuina atu ia i latou le pule mai le Atua e galulue ai. Mo se faataitaiga:
-
E faamatuu atu e le Au Peresitene Sili ma le Korama a Aposetolo e Toasefululua le pule i Fitugafulu o ē tofia e puleaina eria ma pulefaamalumalu i konafesi faalesiteki.
-
E faamatuu atu e peresitene o misiona le pule i faifeautalai alii ma tamaitai o ē tofia e taitai ma aoao isi faifeautalai.
-
E faamatuu atu le pule i tagata o le Ekalesia e auauna atu ai o ni uso o auaunaga ma tuafafine o auaunaga. E tulai mai lenei mea pe a tofia i latou i lalo o le taitaiga a le epikopo e peresitene o korama a toeaina po o le peresitene o le Aualofa.
O le pule e faamatuu atu i se tofiga e tapulaa i tiutetauave patino ma le umi o le tofiga.
Mo nisi faamatalaga e uiga i tofiga e ala i le faamatuu atu, tagai i le 4.2.5.
3.4.4
Faaaogaina o le Pule o le Perisitua i le Amiotonu
E faaaoga e taitai ma tagata o le Ekalesia le pule o le perisitua e faaee atu pe faamatuu atu e faamanuiaina ai olaga o isi.
E na’o le amiotonu e mafai ona faaaogaina ai lenei pule (tagai i le Mataupu Faavae ma Feagaiga 121:36). E faaaogaina i le faatauanau, tali-tiga, agamaualalo, agamalu, alofa, ma le agalelei (tagai i le Mataupu Faavae ma Feagaiga 121:41–42). E fefautuaai faatasi taitai ma isi i se agaga o le lotogatasi ma saili atu i le finagalo o le Alii e ala i faaaliga (tagai i le Mataupu Faavae ma Feagaiga 41:2). Mo faamatalaga e uiga i le fefautuaai faatasi ma isi, tagai i le 4.4.3.
O i latou e faaaogaina le pule o le perisitua, latou te le fai faamalosia o latou loto i luga o isi. Latou te le faaaogaina mo ni faamoemoega manatu faapito. Afai e faaaogaina e se tagata ma le amioletonu lenei pule, “e aveese e le lagi i latou lava [ma] e faanoanoa le Agaga o le Alii” (Mataupu Faavae ma Feagaiga 121:37).
O nisi valaauga i le Ekalesia e aofia ai se tiutetauave e pulefaamalumalu. Mo faamatalaga e uiga i le pulefaamalumalu i le Ekalesia, tagai i le 4.2.4.
3.5
Mana o le Perisitua
O le mana o le perisitua o le mana lea o le Atua, lea Na te faaaogaina e faamanuia ai Ana fanau. E tafe atu le mana o le perisitua a le Atua i tagata uma o le Ekalesia—tamaitai ma alii—pe a latou tausia feagaiga latou te osia ma Ia. E osia e tagata o le ekalesia nei feagaiga pe a latou mauaina sauniga o le perisitua. (Tagai i le Mataupu Faavae ma Feagaiga 84:19-20.)
O faamanuiaga o le mana o le perisitua e mafai e tagata o le ekalesia ona maua e aofia ai le:
-
Taitaiga mo o latou olaga.
-
Faaaliga e iloa ai pe faapefea ona faataunuu le galuega ua faauuina, vaetofia, pe tofia ai i latou e fai.
-
Fesoasoani ma le malosi e avea atili ai e faapei o Iesu Keriso ma le Tama Faalelagi.
3.5.1
Feagaiga
O se feagaiga o se folafolaga paia i le va o le Atua ma Ana fanau. E tuuina mai e le Atua ia tuutuuga mo le feagaiga, ma e malilie Lana fanau e usitaia na tuutuuga. E folafola mai le Atua e faamanuia Ana fanau pe a latou faataunuuina le feagaiga.
E osifeagaiga tagata o le ekalesia ma le Atua pe a latou mauaina sauniga o le faaolataga ma le faaeaga (tagai i le 18.1). O i latou uma e tumau e oo i le iuga i le tausiga o a latou feagaiga o le a mauaina le ola e faavavau (tagai i le 2 Nifae 31:17–20; Mataupu Faavae ma Feagaiga 14:7).
O matua, taitai o le Ekalesia, ma isi e fesoasoani i tagata taitoatasi ia saunia e osia feagaiga pe a latou mauaina sauniga o le talalelei. Latou te faamautinoaina ua malamalama le tagata i feagaiga na te osia. A uma ona osia e se tagata se feagaiga, latou te fesoasoani ia te ia ia tausia. (Tagai i le Mosaea 18:8–11, 23–26.)
3.5.2
Sauniga
O se sauniga o se faatinoga paia e faia i le pule o le perisitua. O sauniga ua leva ona avea pea ma se vaega o le talalelei a Iesu Keriso (tagai i le Kenese 1:28; Mose 6:64–65).
I le tele o sauniga, e osifeagaiga ai tagata taitoatasi ma le Atua. O faataitaiga e aofia ai le papatisoga, le faamanatuga, o le faaeega paia, ma le sauniga o le faamauga o le faaipoipoga. I isi sauniga e pei o faamanuiaga faapeteriaka po o faamanuiaga o e mama’i, e le osia ai e tagata taitoatasi ni feagaiga, ae latou te mauaina le taitaiga ma le malosiaga e tausi ai feagaiga.
O sauniga e i ai o latou faauigaga faafaatusa e faasino atu ai tagata taitoatasi i le Tama Faalelagi ma Iesu Keriso. I sauniga e aofia ai feagaiga, e fesoasoani le faatusa e malamalama ai tagata taitoatasi i folafolaga latou te faia ma faamanuiaga latou te mauaina e ala i lo latou faamaoni.
O sauniga taitasi e mafai ai e tagata taitoatasi ona maua faamanuiaga faaleagaga silisili. Na faaalia mai e le Alii, “I sauniga [o le perisitua], ua faaalia ai le mana o le faale-atua” (Mataupu Faavae ma Feagaiga 84:20). O sauniga o le faaolataga ma le faaeaga e taua tele mo le ola e faavavau. Mo nisi faamatalaga, tagai i le 18.1.
O tagata taitoatasi o soifua e mauaina sauniga o le faaolataga ma le faaeaga mo i latou lava. I nofoaga e mafai ai, ona latou toe foi atu lea i le malumalu e faatino nei sauniga sui mo i latou ua maliliu. Mo nisi faamatalaga e uiga i le faatinoina o sauniga mo ē ua maliliu, tagai i le mataupu 28.
3.6
O Le Perisitua ma le Fale
O tagata uma o le Ekalesia o ē tausia a latou feagaiga—tamaitai, alii, ma tamaiti—e faamanuiaina i le mana o le perisitua a le Atua i o latou fale e faamalolosia ai i latou lava ma o latou aiga (tagai i le 3.5). O le a fesoasoani lenei mana i tagata o le au paia i le faiga o le galuega a le Atua o le faaolataga ma le faaeaga i o latou lava olaga faaletagata ma aiga (tagai i le 2.2).
O alii e umia le Perisitua Mekisateko e mafai ona tuuina atu faamanuiaga faaleperisitua i tagata o aiga e avatu ai le taitaiga, faamalologa, ma le faamafanafanaga. Pe a manaomia, e mafai e tagata o le Ekalesia ona saili atu foi mo nei faamanuiaga mai tagata o le aiga lautele, uso o auaunaga, po o taitai o le Ekalesia i le lotoifale. Mo nisi faamatalaga e uiga i faamanuiaga o le perisitua, tagai i le 18.13 ma le 18.14.