wod kaonsel miting

4.

Lidasip mo Ol Kaonsel Insaed long Jos Ia blong Jisas Kraes

4.0

Fas Toktok

Olsem wan lida insaed long Jos, oli bin singaotem yu tru long insperesen tru long ol wokman blong Lod, we oli kasem raet ia. Yu, yu gat spesel janis blong helpem wok blong Papa long Heven blong “stap mekem man i nomo save ded mo i kasem laef we i no save finis” i hapen (Moses 1:39). Yu mekem hemia taem yu stap leftemap tingting blong ol memba blong mekem wok blong God blong fasin blong sevem man mo fasin blong kam olsem wan god blong olgeta wanwan, mo blong famli blong olgeta, mo ol narawan (luk long japta 1 Bambae yu faenem glad taem yu stap givim seves long ol pikinini blong God.

Taem yu stap folem ol eksampol blong Jisas Kraes, plante taem, bae yu givim seves long ol narawan, wan afta narawan. Bae yu gat ol janis tu blong givim lidasip insaed long ol miting mo ol aktiviti blong Jos. Antap long hemia, maet yu save givim wan impoten seves tru long ol kaonsel. Hemia i save tekem ol presidensi miting, ol wod kaonsel miting, mo ol nara miting.

Seves blong yu we yu konsekretem i nidim blong yu mekem sakrifaes blong taem, be yu no mas tingting nating, o lego ol stret nid blong yu mo ol nid blong famli blong yu. Lukaotem blong Tabu Spirit i lidim yu blong i helpem yu blong yu skelem gud mo mekem ol responsabiliti blong yu (luk long Mosaea 4:27).

4.1

Stamba Tingting blong Gat Lidasip Insaed long Jos

Ol lida oli stap leftemap tingting blong ol memba blong joen long wok blong God taem oli kam “ol tru man blong folem … Jisas Kraes” (Moronae 7:48). Blong mekem hemia, ol lida oli traehad, faswan, blong stap ol fetful disaepol blong Sevya. Afta, oli save helpem ol narawan blong kam kolosap moa long Hem. Long rod ia blong stap helpem ol narawan, oli kam ol disaepol we oli gud moa olgetawan (luk long Mosaea 18:26; Doktrin mo Ol Kavenan 31:5).

4.2

Ol Prinsipol blong Lidasip Insaed long Jos

Long taem blong seves blong Hem long wol ia, Sevya i bin setem eksampol blong lidasip blong Jos blong Hem. Stamba tingting blong Hem, i blong mekem wok blong Papa blong Hem long Heven mo stap helpem ol narawan blong oli andastanem mo stap laef folem gospel blong Hem (luk long Jon 5:30; Mosaea 15:7). Hem i lavem olgeta we Hem i lidim, mo i soem sem lav ia taem Hem i stap givim seves long olgeta (luk long Jon 13:3–5).

Sevya i bin bildimap ol narawan long saed blong paoa blong mekem samting taem Hem i bin stap givim long olgeta responsabiliti ia mo ol janis ia blong groap (luk long Matiu 10:5–8; Jon 14:12). Hem i leftemap tingting blong man, mo i bin stretem olgeta wetem fasin blong talem samting i klia mo wetem lav (luk long Jon 21:15–17).

Lod i talem: “Naoia, evri man i mas lanem diuti blong hem, mo i mas lanem blong wok strong wetem strong tingting long ofis we oli bin putum hem long hem” (Doktrin mo Ol Kavenan 107:99). Ol toktok ia, oli blong evriwan we oli kasem responsabiliti ia blong givim seves mo lid insaed long Jos ia blong Sevya.

Sapos yu praktisim ol prinsipol insaed long japta ia, bae i save helpem yu blong lidim man insaed long Jos ia blong Sevya long wan wei we i wok gud moa.

4.2.1

Rere long Saed blong Spirit

Jisas i mekem Hem i rere long saed blong spirit blong mekem misin blong Hem long wol ia (luk long Luk 4:1–2). Semmak, yu rere long saed blong spirit taem yu stap kam kolosap moa long Papa long Heven tru long prea, skripja stadi, mo fasin blong stap obei long ol komanmen blong Hem. Blong stap folem ol profet blong Hem tu i helpem yu blong rere long saed blong spirit (luk long Doktrin mo Ol Kavenan 21:4–6).

Lukaotem revelesen blong andastanem ol nid blong olgeta we yu stap lidim mo olsem wanem blong mekem wok blong God we oli singaotem yu from, i hapen.

Lod i bin promesem tu blong givim ol presen long saed blong spirit long olgeta we oli stap lukaotem ol presen ia (luk long Doktrin mo Ol Kavenan 46:8). Taem yu putum tingting blong yu i stap daon, mo prea long Papa long Heven blong kasem ol presen ia, bambae Hem i givim yu moa paoa blong save lidim man, mo leftemap olgeta we yu stap givim seves long olgeta.

4.2.2

Givhan long Evriwan long Ol Pikinini blong God

Jisas, Hemwan i bin givhan long ol pipol, i go aot blong leftemap man mo blong tijim olgeta we oli filim se oli stap olgetawan, oli nomo gat hop, o oli lus. Hem i bin luksave tabu fasin blong wanwan man o woman, mo hamas oli impoten blong taem we i no save finis.

Lavem ol pipol we yu stap wok blong olgeta, semmak olsem we Jisas i bin mekem. Prea “wetem evri paoa blong hat” blong yufala i fulap wetem lav ia blong Hem (Moronae 7:48). Stanemap ol frensip we oli tru. Go aot mo go lukluk olgeta we maet oli filim se oli stap olgetawan, oli nidim kamfot, o oli gat ol nara nid. Lav blong yu bae i blesem laef blong olgeta, mo bae i helpem ol pipol blong wantem kam long Kraes.

Helpem wanwan man mo woman blong mekem oli jenisim laef blong olgeta moa, mo blong mekem bilif blong olgeta long Papa long Heven mo Jisas Kraes i kam strong moa. Helpem olgeta blong rere blong mekem ol kavenan taem oli stap kasem ol nekis odinens blong olgeta. Leftemap tingting blong olgeta blong kipim ol kavenan we oli bin mekem mo blong oli tekem mo yusum ol blesing blong fasin blong sakem sin. Helpem olgeta blong save se oli save progres blong kasem ful tabu paoa blong olgeta, i nomata long wanem jalenj oli stap fesem.

4.2.3

Tijim Gospel blong Jisas Kraes

Evri lida oli ol tija. Traehad blong stap folem eksampol blong Sevya olsem wan tija (luk long japta 17; Teaching in the Savior’s Way). Tru long ol toktok mo ol aksen blong yu, tijim doktrin ia blong Jisas Kraes mo olgeta prinsipol blong gospel blong Hem (luk long 3 Nifae 11:32–33; Doktrin mo Ol Kavenan 42:12–14). Tijing we i wok gud moa long laef blong man, i givim insperesen long ol pipol blong oli mekem rilesensip blong olgeta wetem God i kam strong moa mo i mekem oli laef moa folem gospel, mo long wei ia, blong oli stap progres i go from laef we i no save finis.

Blong stap tij folem wei blong Sevya, i moa bitim blong jes stap toktok; i minim blong stap lisin, mo stap askem ol kwestin long wei we Hem i bin mekem (luk long Matiu16:13–17).

Ol tija we oli gud blong tij, oli ol man o woman we oli wok strong tu blong stap lanem samting. Mekem fasin blong stadi long toktok blong God i wan hae fas wok insaed long laef blong yu. Blong stap lanem Gospel hem i wan rod we i blong ful laef.

Tij aot long ol skripja mo ol toktok blong ol profet blong las dei (luk long Doktrin mo Ol Kavenan 52:9. Tingbaot se “trutok we oli prijim … hem i gat moa bigfala paoa long tingting blong ol pipol bitim … eni narafala samting” (Alma 31:5).

Lukaotem paoa blong Spirit taem yu stap rere mo stap tij. Tabu Spirit i tekem trutok i go long hat mo maen blong olgeta we yu stap tijim (luk long 2 Nifae 33:1).

Sapos oli singaotem yu, o oli givim wok long yu blong yu prisaed long wan miting blong Jos, o long wan aktiviti blong Jos, meksua se tijing ia, i leftemap man, mo doktrin i stret (luk long Doktrin mo Ol Kavenan 50:21–23).

4.2.4

Prisaed long Stret mo Gud Fasin

Lod i talemaot tru long revelesen se: “I nid blong i mas gat ol presiden, o ol prisaeding ofisa” long Jos blong Hem (Doktrin mo Ol Kavenan 107:21). Olgeta we oli holem ol ki blong prishud, oli prisaed insaed long ol eria blong responsabiliti blong olgeta, olsem wan kworom o wan wod.

Ol nara oganaesesen insaed long Jos, we i tekem Rilif Sosaeti, Ol Yang Woman, Praemeri, mo Sandei Skul, i gat wan prisaeding ofisa tu we i lidim olgeta. Ol lida ia, oli singaotem mo oli setem apat olgeta, mo wan we i holem ol prishud ki, o wan we oli givim raet long hem blong mekem wok ia, i givim atoriti long ol lida ia (luk long 3.4.3).

Wanwan prisaeding ofisa i wok anda long daereksen blong wan we i holem ol ki blong prishud (luk long 3.4.1). Fasin ia i givim oda mo ol klia laen blong responsabiliti mo fasin blong stap akaontebol blong mekem wok blong Lod.

Wan prisaeding ofisa, i save givim long wan narawan, wan wok we i blong sot taem, blong hem i prisaed. Eksampol: sapos wan presiden blong Rilif Sosaeti i no stap long wan Rilif Sosaeti Sandei miting, bae hem i givim wok long fas kaonsela blong hem blong prisaed long miting ia.

Wan lida we i prisaed long wan oganaesesen blong Jos, long wan miting, o aktiviti, i mekemsua se oli stap mekem ol stamba tingting blong Lod i kamtru. Taem hem i mekem olsem, lida ia i stap folem ol prinsipol blong gospel, ol polisi blong Jos, mo daereksen we i kam long Tabu Spirit.

Olgeta we oli prisaed, oli folem eksampol blong Jisas Kraes blong givim seves wetem fasin we i kaen, we i no flas, mo wetem lav ia we i stret evriwan (luk long Jon 13:13–15). Wan koling o wan asaenmen blong prisaed i no mekem se, hem we i kasem hemia, i moa impoten o i gat moa paoa bitim ol narawan (luk long Doktrin mo Ol Kavenan 84:109–10).

Sapos oli bin singaotem yu, o oli bin givim wan asaenmen long yu blong yu prisaed, folem tijing blong Sevya we i talem se: “mo sapos wan long yufala i wantem kam bos blong yufala, hem i mas kam olsem slef nomo blong yufala” (Matiu 20:27; luk long ol ves 26–28). Kaonsel wetem ol narawan, mo lukaotem blong kam wan blong stap andastanem tingting blong Lod, mo blong mekem wok ia blong Hem (luk long Doktrin mo Ol Kavenan 41:2; luk tu long 4.4 insaed long hanbuk ia).

Hem i no stret blong wantem prisaed long eni oganaesesen blong Jos ia blong Lod (luk long Doktrin mo Ol Kavenan 121:34–37). Be, putum tingting i stap daon mo stap fetful blong givim seves long ples we oli singaotem yu blong wok long hem. Traehad blong mekem wok blong Lod wetem wan ae we i lukluk nomo long glori blong Hem (luk long Doktrin mo Ol Kavenan 4:5).

miting blong wod

4.2.5

Givimaot Wok mo Meksua se Wanwan I Ansa From

Sevya i givim long ol disaepol blong Hem ol asaenmen mo ol responsabiliti we oli gat mining (luk long Luk 10:1). Mo tu, Hem i mekem olgeta oli mas ansa from ol wok we oli kasem blong mekem (luk long Luk 9:10).

Olsem wan lida, yu save helpem ol narawan blong oli groap taem yu givimaot ol wok long olgeta. Long wei ia, bae yu helpem olgeta tu blong kasem ol blesing we oli kam taem yu stap givim seves. Traehad blong yusum mo tekem evri memba blong kam mekem wok ia blong God.

Fasin blong stap givimaot wok bae i mekem tu se seves blong yu i wok gud moa. Sapos yu traem blong mekem plante tumas, bae yu “spolem [yuwan] nomo” (Eksodas 18:18). Lukaotem givhan blong Spirit abaot wanem wok blong givimaot blong mekem se yu save lukluk nomo long ol samting we oli kam faswan mo oli moa impoten long yu.

Fasin blong givimaot wok, i moa bitim blong givim wan asaenmen blong wan i mekem. Hem i tekem tu blong stap tijim mo stap trastem nara man blong mekem asaenmen ia i hapen. Plante taem, i tekem olgeta samting ia:

• Sidaon o toktok wetem man o woman ia blong invaetem hem blong givim seves long Lod tru long wan wok. Helpem man o woman blong andastanem asaenmen ia mo stamba tingting biaen long hem.

• Kaonsel tugeta abaot wok ia, mo hu bakegen i save kam, mo wetaem nao bae wok ia i finis. Meksua se man o woman ia i andastanem, mo i wantem akseptem asaenmen ia. Talemaot tras blong yu long paoa blong hem blong mekem wok ia.

• Leftemap tingting blong man o woman ia blong lukaotem insperesen abaot wei blong mekem wok ia i kamtru. Soem se yu trastem hem, mo helpem hem blong i mekem wok blong hem i hapen. Givim daereksen mo sapot tu olsem we i nid blong mekem.

• Wanwan taem, askem man o woman ia blong givim wan ripot long wok ia we yu bin givimaot long hem. Akseptem ol bes hadwok blong hem, mo talemaot tangkyu blong yu from ol samting we hem i bin mekem.

Ol gaedlaen blong givim wan koling insaed long 30.1.1 oli mas folem taem oli stap givimaot wok, olsem we i nidim.

4.2.6

Rere Ol Narawan blong Stap Ol Lida mo Ol Tija

Sevya i mekem rere Ol Aposol blong Hem oli kam ol lida insaed long Jos blong Hem. Semmak, yu stap helpem ol narawan blong oli rere blong stap olsem ol lida mo ol tija. Wok blong Lod i lukluk blong stap helpem ol pipol, be i no jes blong lukaotem ol program blong Jos. Olgeta program ia, oli no stap olsem ol risal ia. Oli stap blong helpem ol pipol blong oli groap.

Taem yu stap tingting long huia nao i save givim seves long ol koling blong Jos, o i save kasem wok blong mekem, yu mas prea. Tingbaot se Lod bae i mekem olgeta we Hem i singaotem, bae oli kwalifae. Wanem i moa impoten, i we, oli wantem mo glad blong mekem wok, bambae oli lukaotem help blong Lod wetem tingting we i stap daon, mo bae oli traehad blong stap klin inaf. Ol koling mo ol asaenmen i save helpem olgeta blong oli gro taem hemia i givim janis long olgeta blong praktisim fet blong olgeta, i givim janis blong wok had, mo filim God i stap mekem ol hadwok blong olgeta i kam bigwan. Soem rod mo helpem ol yut, ol niu memba mo ol narawan we oli nidim moa sapot blong oli mekem ol koling blong olgeta.

Samtaem, ol semfala pipol ia, oli singaotem olgeta plante taem long ol lidasip posisen. Hemia i save kam olsem wan hevi samting long solda blong olgeta mo blong famli blong olgeta, mo tu, i tekemaot ol janis long ol narawan. Lukaot blong givim janis long evri memba blong oli givim seves mo oli gro.

Blong gat moa infomesen abaot ol koling blong Jos, luk long japta 30.

4.2.7

Mekem Plan blong Ol Miting, Ol Lesen mo Ol Aktiviti we Oli Gat Ol Klia Stamba Tingting

Lukaotem insperesen we i kam long Lod blong mekem plan blong ol miting, ol lesen, mo ol aktiviti we oli gat ol klia stamba tingting. Olgeta stamba tingting ia, oli sapos blong mekem wanwan man, woman, mo ol famli oli kam strong moa, oli tekem olgeta oli go kolosap moa long Kraes, mo i helpem olgeta blong mekem wok ia blong fasin blong sevem man mo hemia blong kam olsem wan god i hapen (luk long ol japta 1 mo 2). Taem yu mekem ol plan, folem olgeta prinsipol insaed long 4.4.2 mo long ol japta 20 mo 29.

4.2.8

Stap Skelem Ol Hadwok blong Yu

Fulap taem, luklukbak long ol responsabiliti blong yu mo hamas yu stap kam antap long saed blong spirit olsem wan lida. Tingting long hamas nao olgeta we yu stap lidim oli stap kam antap long saed blong spirit.

Sakses blong yu olsem wan lida, bae yu skelem faswan wetem ol komitmen blong yu blong stap helpem ol pikinini blong God blong oli kam ol fetful disaepol blong Jisas Kraes. From se evri pipol i gat fridom blong mekem joes, sam oli save jusum blong oli aot long kavenan rod ia. Long sam taem, hemia i save daonem tingting blong yu, be taem yu stap tanem yuwan i go long Lod, bambae Hem i leftemap yu mo i givim kamfot long yu (luk long Alma 26:27). Bae yu save kam blong save se Lod i stap glad wetem ol hadwok blong yu taem yu stap filim Spirit i wok tru long yu.

4.3

Ol Kaonsel Insaed long Jos

Papa long Heven i stanemap ol kaonsel olsem wan impoten pat blong kasem insperesen, blong mekem ol desisen, mo blong mekem wok blong Hem i hapen. Ol kaonsel oli bin stap bifo oli bin mekem wol ia. Wanwan long yumi i bin tekpat long ol kaonsel ia bifo yumi kam long wol ia. (Luk long Doktrin mo Ol Kavenan 121:32; Ebraham 3:22–28.)

Folem paten ia, Jos Ia blong Jisas Kraes, ol kaonsel long evri level nao oli lidim Jos ia. Eksampol: Kaonsel blong Fas Presidensi mo Kworom blong Olgeta Twelef Aposol (luk long 5.1.1.1), Ol Eria Presidensi (luk long 5.2.1), ol stek presidensi, mo ol bisoprik, evriwan ia oli stap long ol kaonsel. Antap long ol stek mo wod kaonsel, wanwan presidensi blong wan Jos oganaesesen, blong wan kworom, o wan klas, hem i stap olsem wan kaonsel tu.

Lod i bin givim instraksen long ol lida blong Jos blong kaonsel tugeta blong mekem wok ia blong Hem (luk long Doktrin mo Ol Kavenan 41:2–3). Ol kaonsel oli givim ol janis blong ol memba blong kaonsel blong kasem revelesen taem oli lukaotem blong andastanem ol nid blong ol pikinini blong God, mo mekem ol plan blong hao blong lukluk long ol nid ia.

tu man, tufala i stap toktok

4.4

Ol Prinsipol blong Ol Kaonsel we Oli Wok Gud

Sam long ol prinsipol blong ol kaonsel we oli wok gud, oli putum long aotlaen blong seksen ia.

4.4.1

Ol Stamba Tingting blong Ol Kaonsel

Fas stamba tingting blong ol kaonsel, hem i blong helpem ol memba blong oli wok tugeta blong lukaotem ol tabu help abaot ol samting we bae i blesem wanwan man, woman, mo famli (luk long Doktrin mo Ol Kavenan 43:8–9). Ol kaonsel oli tokbaot plante blong stap helpem ol memba blong oli kasem ol odinens, mo blong oli kipim ol kavenan we i go wetem ol odinens ia. Ol memba blong kaonsel oli lukaotem tu, insperesen ia, long saed blong mekem plan mo kodinetem wok blong Lod long ol eria we oli responsibol long hem.

Sam administresen bisnis, olsem kalenda blong ol plan, bae i no nid blong toktok raon long hem insaed long wan kaonsel miting. Plante long ol samting ia, oli save lukluk long hem tru long komunikesen bifo mo afta long ol miting.

Ol memba blong kaonsel oli lukluk moa long wanwan man, woman mo famli we oli gat ol nid we oli mas lukluk long ol hariap. Ol kaonsel oli help blong kodinetem givhan we bae i go. Blong gat moa infomesen abaot sam long ol nid ia, wetem ol risos blong stap andastanem mo stap givhan, luk long Help blong Laef insaed long Gospel Laebri.

4.4.2

Stap Rere from Ol Kaonsel Miting

Tingting i stap se ol presidensi mo ol kaonsel oli mas mit oltaem. Ol lida oli lukaotem blong Lod i soem rod long olgeta taem oli mekem plan blong ol kaonsel miting blong olgeta. Mo tu, oli lukaotem blong ol memba blong kaonsel oli givim tingting blong disaed long saed blong wanem blong toktok raon long hem.

Ol lida oli letem ol memba blong kaonsel oli save abaot ol poen blong toktok raon long olgeta; oli mekem hemia bifo miting i tekples. Ol memba blong kaonsel oli rere blong serem ol niu tingting abaot ol poen ia. Long saed blong ol wod mo stek kaonsel, plante samting ia blong rere long hem, i bin hapen finis long ol presidensi miting.

Ol memba blong kaonsel oli mekem olgeta oli rere long saed blong spirit blong oli tekpat long ol kaonsel miting.

4.4.3

Ol Toktok Storian mo Ol Desisen

Lod i talem: “Be wan nomo i mas toktok, mo evri narawan i mas lisin long ol toktok blong hem, blong mekem se taem evriwan i toktok finis, nao evriwan i kam antap tru long evriwan, mo blong evri man i gat wan semmak janis blong toktok” (Doktrin mo Ol Kavenan 88:122). Prinsipol ia, i semmak tu long ol kaonsel blong Jos.

Long taem blong wan kaonsel miting, lida (o wan we lida i givim wok ia long hem,) i eksplenem poen blong toktok raon long hem. Nao lida i leftemap tingting blong evri memba blong kaonsel i toktok, i askem ol kwestin, mo i lukaotem ol aedia.

Ol lida oli leftemap tingting blong ol memba blong oli toktok wetem open maen mo wetem ones fasin. Ol defren bakgraon, ol defren yia blong wanwan, ol defren eksperiens, mo ol defren wei blong ol memba blong kaonsel oli lukluk samting, i mekem kaonsel ia i rij. Ol memba oli givim ol tingting mo oli lisin long wanwan wetem respek. Taem oli stap lukaot blong save tingting blong Lod, i gat wan spirit blong insperesen mo yuniti we i save win i stap.

Long wan kaonsel we i gat ol woman, mo ol man, lida i lukaotem ol niu tingting mo ol aedia we oli kam long tugeta saed ia. Plante taem, ol woman mo ol man oli gat ol defren lukluk we i givim gudfala balens ia we i nid. Ol man mo ol woman oli mekem ol moa gud desisen, mo oli gat moa bigfala sakses long seves blong Lod taem oli tekem se wanwan kontribusen blong olgeta i impoten mo oli wok tugeta.

Wan lida i lidim ol toktok storian blong kaonsel. Be, lida ia, man o woman, i mas lisin moa bitim we hem i toktok. Taem wan lida blong kaonsel i serem wei we hem i lukluk i eli tumas, bae i save stopem ol narawan blong givim tingting. Taem we i nid, kaonsel lida, long wan wei we i kaen, i jenisim daereksen, o jenisim poen blong toktok raon long hem.

Afta long wan toktok storian, lida i save disaed blong tekem wan aksen, o i save disaed blong mekem wan desisen afta, mo save go lukaotem moa infomesen mo help blong Lod. Desisen ia, i mas kamaot tru long toktok storian mo Spirit i konfemem. Rod ia blong kaonsel, i help blong tekem ol desisen we i gat insperesen we i go bitim bes jajmen blong wan lida. Lida i save sendem wan poen i go long wan defren kaonsel.

Samtaem, ol memba blong kaonsel oli gat ol filing we oli no stretem abaot wan impoten desisen. Taem hemia i hapen, lida i save wet long wan nara miting blong lukluk long poen ia i go moa, mo lukaotem konfemesen blong Spirit, mo lukaotem yuniti. Long sam kes, wan memba blong kaonsel bae i wantem mit wetem lida hemwan, blong save tokbaot ol tingting mo wari blong hem.

4.4.4

Yuniti

Lod i bin givim instraksen long ol disaepol blong Hem blong oli “mas wan” (Doktrin mo Ol Kavenan 38:27). Ol memba blong kaonsel oli lukaot blong kam wan long wanem samting oli wantem, mo stamba tingting blong olgeta wetem hemia blong Papa long Heven mo Jisas Kraes. Oli traehad blong oli stap wan long ol toktok storian mo desisen blong olgeta.

Ol memba blong kaonsel oli mas traem blong stap longwe long fasin blong raorao, jajmen we i no stret mo i no gud, mo fasin blong stap gosip (luk long 3 Nifae 11:28–30). Taem oli mekem samting long yuniti, Papa long Heven bae i blesem ol efot blong olgeta.

4.4.5

Aksen mo Fasin blong Stap Akaontebol

Ol memba blong kaonsel oli mekem plante long ol wok blong olgeta bifo mo afta long kaonsel miting. Long taem blong ol miting, oli lukaotem insperesen blong stap developem ol plan blong mekem ol desisen we oli bin tekem. Kaonsel lida i invaetem ol memba blong mekem ol wok we oli bin givimaot long saed blong ol plan ia. Ol memba blong kaonsel, plante taem, oli invaetem ol narawan long oganaesesen blong olgeta blong oli save help. Wanwan man, woman, i no mas gat tumas wok blong mekem we bae i hevi tumas long hem.

Ol memba blong kaonsel oli givim ripot blong ol wok we oli bin givimaot long olgeta. Plante taem, progres i nidim blong ol lida oli luklukgud long ol wok ia, mo blong oli mas folemap oltaem ol wok ia.

4.4.6

Ol Konfidensiol Samting

Ol lida oli mas lukaotgud taem oli serem ol praevet infomesen wetem wan kaonsel. Plante taem, oli askem raet blong wan memba blong oli serem infomesen ia.

Kaonsel i respektem tingting blong eniwan we i no wantem blong oli serem infomesen blong hem. Ol memba blong kaonsel oli no mas serem ol praevet infomesen aotsaed long kaonsel, be nomo sapos i nid blong mekem wan wok we kaonsel lida i bin givim.

Samfala mata, oli no stret tumas blong tokbaot long fored blong wan ful kaonsel. Olsem we i stret, ol lida oli luklukbak long ol mata ia wetem wanwan memba blong kaonsel. O, oli save sendem sam mata i go long wan defren kaonsel.