famli we i stap wokbaot kolosap long tempol

3.

Ol Prinsipol blong Prishud

3.0

Fas Toktok

Prishud hem i atoriti mo paoa blong God. Tru long prishud, Papa long Heven i mekem ol wok blong Hem oli kamtru blong “mekem man i nomo save ded mo i kasem laef we i no save finis” (Moses 1:39). God i givim atoriti mo paoa long ol boe mo ol gel blong Hem we oli stap long wol blong save help blong kareaot wok ia (luk long japta 1).

3.1

Restoresen blong Prishud

Jos Ia blong Jisas Kraes blong Ol Lata-dei Sent i wan oganaesesen ia nomo long wol we i gat prishud atoriti. Profet Josef Smit i kasem Aronik Prishud wetem ol ki we oli kam wetem; hem i kasem olgeta long Jon Baptaes (luk long Doktrin mo Ol Kavenan 13:1). Hem i kasem Melkesedek Prishud wetem ol ki we oli kam wetem; hem i kasem long Pita, Jemes mo Jon (luk long Doktrin mo Ol Kavenan 27:12–13).

Insaed long Ketlan Tempol, Moses, Elaeas mo Elaeja oli bin kamkamaot long Josef Smit mo oli bin givim long hem moa atoriti ia we i nid blong gat blong mekem ol wok blong God long ol las dei ia (luk long Doktrin mo Ol Kavenan 110:11–16).

Wanwan memba blong Fas Presidensi mo Kworom blong Olgeta Twelef Aposol i holem evriwan long ol prishud ki ia tedei. Olgeta lida ia oli save singaotem mo givim raet long ol nara memba blong Jos blong yusum atoriti mo paoa blong prishud blong God blong help long wok blong Hem blong fasin blong sevem man mo fasin blong kam olsem wan god.

3.2

Ol Blesing blong Prishud

Tru long ol kavenan mo ol odinens blong prishud, God i mekem ol bigfala blesing oli stap blong evriwan long ol pikinini blong Hem oli yusum. Olgeta blesing ia i tekem:

• Baptaes mo membasip blong Jos Ia blong Jisas Kraes blong Ol Lata-dei Sent.

• Presen we i Tabu Spirit.

• Tekem mo kaekae sakramen.

• Atoriti mo paoa blong givim seves long ol koling mo ol wok we oli givim long yumi blong mekem insaed long Jos.

• Kasem ol petriakel blesing mo ol nara prishud blesing blong hiling, kamfot mo toktok blong soem rod.

• Kasem ful paoa blong God insaed long tempol.

• Sil wetem ol memba blong famli blong taem we i no save finis.

• Promes blong kasem laef we i no save finis.

Ol pikinini blong God oli save kasem olgeta blesing ia blong prishud mo filim bigfala glad ia taem oli stap laef folem gospel blong Jisas Kraes.

3.3

Melkesedek Prishud mo Aronik Prishud

Insaed long Jos, prishud i gat tufala pat: Melkesedek Prishud mo Aronik Prishud (luk long Doktrin mo Ol Kavenan 107:1).

3.3.1

Melkesedek Prishud

Melkesedek Prishud i “Tabu Prishud, we i folem Oda blong Pikinini blong God” (Doktrin mo Ol Kavenan 107:3). Hem i paoa, we ol boe mo ol gel blong God oli save yusum blong save kam olsem Hem (luk long Doktrin mo Ol Kavenan 84:19–21; 132:19–20).

“Melkesedek Prishud i holem raet blong stap olsem wan presidensi.” Hem i gat “paoa mo atoriti ova long evri ofis insaed long jos, hemia long eni taem blong wol ia, blong lidim ol samting long saed blong spirit” (Doktrin mo Ol Kavenan 107:8). Tru long atoriti ia, ol lida blong Jos oli daerektem mo lukaotem evri wok blong Jos long saed blong spirit (luk long Doktrin mo Ol Kavenan 107:18).

Presiden blong Jos, hem i prisaeding hae pris ova long Melkesedek Prishud (luk long Doktrin mo Ol Kavenan 107:65–67 Stek presiden, hem i prisaeding hae pris insaed long stek (luk long Doktrin mo Ol Kavenan 107: 8,10; luk tu long japta 6 insaed long hanbuk ia). Bisop hem i prisaeding hae pris insaed long wod (luk long Doktrin mo Ol Kavenan 107:17; luk tu long japta 7 insaed long hanbuk ia).

Blong kasem infomesen abaot ol ofis mo ol responsabiliti blong Melkesedek Prishud, luk long 8.1.

3.3.2

Aronik Prishud

Aronik Prishud i prishud ia we i moa daon, mo i “pat blong … Melkesedek Prishud” (Doktrin mo Ol Kavenan 107:14). Hem i tekem ol ki blong:

• Seves blong olgeta enjel.

• Gospel ia blong fasin blong sakem sin.

• Mekem ol odinens we man i save luk, we i tekem tu baptaes blong kam klin aot long sin.

(Luk long Doktrin mo Ol Kavenan 3:1; 84:26–27; 107:20.)

Bisop hem i presiden blong Aronik Prishud insaed long wod (luk long Doktrin mo Ol Kavenan 107:15).

Blong kasem infomesen abaot ol ofis mo ol responsabiliti blong Aronik Prishud, luk long 10.1.3.

3.4

Prishud Atoriti

Prishud atoriti hem i raet ia blong ripresentem God mo mekem samting long nem blong Hem. Insaed long Jos, evri prishud atoriti, oli yusum anda long daereksen blong olgeta ia we oli holem ol ki blong prishud.

Olgeta we oli ol man mo memba blong Jos mo oli klin inaf, oli kasem prishud atoriti tru long prishud we oli pasem i kam long olgeta, mo tru long odinesen long ol prishud ofis ia. Evri memba blong Jos oli save yusum atoriti ia we oli pasem i kam long olgeta taem we oli setem olgeta apat, o taem oli kasem wok blong help mekem wok blong God i kamtru. Ol memba bae oli ansa long God mo long olgeta we Hem i bin jusum olgeta blong oli prisaed, long wei we oli stap yusum atoriti ia (luk long 3.4.4).

3.4.1

Ol Ki blong Prishud

Ol ki blong prishud oli atoriti ia blong daerektem yus blong prishud long bihaf blong ol pikinini blong God. Yus blong evri atoriti blong prishud insaed long Jos, olgeta we oli holem ol prishud ki ia nao oli daerektem (luk long Doktrin mo Ol Kavenan 65:2).

3.4.1.1

Olgeta we Oli Holem Ol Ki blong Prishud

Jisas Kraes i holem evri ki blong prishud. Anda long daereksen blong Hem, oli bin givim ol prishud ki long olgeta we oli ol man, blong oli yusum long ol spesifik koling blong help mekem wok blong God i kamtru, olsem we oli eksplenem andanit ia.

Lod i bin givim, long wanwan long Ol Aposol blong Hem, evri ki we i blong kingdom blong God long wol ia. Senia Aposol we i stap laef, we i Presiden blong Jos, i wan man ia nomo, long wol, we i gat raet blong yusum evri prishud ki ia (luk long Doktrin mo Ol Kavenan 81:1–2; 107:64–67, 91–92; 132:7).

Anda long daereksen blong Presiden blong Jos, ol prishud lida ia oli kasem ol ki blong oli save prisaed long ol eria blong responsabiliti blong olgeta.

• Ol presiden blong stek mo distrik.

• Ol bisop mo ol branj presiden.

• Ol presiden blong kworom blong Melkesedek mo Aronik Prishud.

• Ol tempol presiden.

• Ol misin presiden mo ol presiden blong ol misinari trening senta.

• Ol presiden blong ol histri ples blong Jos.

Olgeta lida ia oli kasem ol ki blong prishud taem oli stap setem olgeta apat long ol koling blong olgeta.

Oli no stap givim ol prishud ki long ol narawan; oli no givim long ol kaonsela blong ol lokol prishud lida, o ol kaonsela blong ol presiden blong ol oganaesesen blong Jos. Ol lida ia oli kasem atoriti we oli givim long olgeta taem we oli setem olgeta apat mo taem we oli kasem ol wok blong mekem anda long daereksen blong olgeta we oli holem ol ki blong prishud. Ol presiden blong ol oganaesesen blong Jos oli prisaed anda long daereksen blong olgeta we oli holem ol ki blong prishud (luk long 4.2.4

wod kaonsel miting

3.4.1.2

Oda insaed long Wok blong God

Ol ki blong prishud oli meksua se wok blong God blong fasin blong sevem man mo fasin blong kam olsem wan god i stap hapen long wan fasin we i gat oda long hem (luk long Doktrin mo Ol Kavenan 42:11; 132:8). Olgeta we oli holem ol ki blong prishud, oli daerektem wok blong Lod insaed long ol eria blong responsabiliti blong olgeta. Prisaeding atoriti ia i laef nomo from spesifik responsabiliti we i go wetem koling blong lida ia. Taem oli rilisim ol prishud lida long ol koling blong olgeta, oli nomo holem ol ki ia we i go wetem ol koling ia.

Evriwan we i givim seves insaed long Jos, oli setem olgeta apat, o oli givim wok long olgeta anda long daereksen blong wan we i holem ol ki blong prishud.

3.4.2

Givim Prishud mo Odinesen long Prishud

Anda long daereksen blong olgeta we oli holem ol ki blong prishud, oli stap givim Aronik Prishud mo Melkesedek Prishud long olgeta we oli ol man we oli klin inaf, mo oli memba blong Jos (luk long Doktrin mo Ol Kavenan 84:14–17). Afta we oli givim stret prishud, oli odenem man ia i go long wan ofis insaed long prishud ia, olsem wan dikon o wan elda. Wan we i holem prishud i yusum prishud ia folem ol raet mo ol diuti blong ofis ia (luk long Doktrin mo Ol Kavenan 107:99).

Wanwan man insaed long Jos Ia blong Jisas Kraes i mas traehad blong i klin inaf blong kasem mo yusum Melkesedek Prishud blong givim seves long ol narawan. Taem we i gat wan man we i kasem prishud ia, hem i mekem wan kavenan blong hem i mas fetful blong mekem ol prishud responsabiliti blong hem. Mo tu, hem i kasem, long God, wan strong promes blong kasem ol blesing we oli no save finis Doktrin mo Ol Kavenan 84:33–44; luk tu long Gaed long Ol Skripja, “Promes, Strong Promes mo Kavenan blong Prishud”).

Blong gat moa infomesen abaot fasin blong givim prishud mo odinesen long prishud, luk long 8.1.1, 10.6, 18.10, mo 38.2.5.

3.4.3

Givimaot Atoriti blong Prishud blong Givim Seves Insaed long Jos

Oli givimaot, long ol memba blong Jos, prishud atoriti blong oli givim seves insaed long Jos long ol wei ia:

• Taem oli setem olgeta apat i go long wan koling blong Jos

• Taem ol prisaeding lida blong Jos oli givim wan wok blong mekem

3.4.3.1

Stap Setem Apat

Taem we oli stap setem apat ol memba blong Jos anda long daereksen blong olgeta we oli holem ol ki blong prishud, oli kasem atoriti we i kam long God blong wok long koling ia. Eksampol:

• Wan woman we bisop i singaotem mo setem hem apat olsem presiden blong wod Rilif Sosaeti, i kasem atoriti blong daerektem wok ia blong Rilif Sosaeti insaed long wod.

• Wan man o wan woman we wan memba blong bisoprik i singaotem mo i setem hem apat olsem wan Praemeri tija, i kasem atoriti ia blong tijim ol pikinini blong Praemeri insaed long wod.

Evriwan we oli singaotem mo setem olgeta apat, oli givim seves anda long daereksen blong olgeta we oli prisaed ova long olgeta (luk long 3.4.1.2).

Taem we oli rilisim ol memba blong Jos long wan koling, oli nomo gat atoriti ia we i go wetem koling ia.

Blong kasem moa infomesen abaot fasin blong setem apat ol memba blong kasem ol koling blong Jos, luk long 18.11.

3.4.3.2

Wok we Oli Givimaot o Asaenmen

Ol prisaeding lida blong Jos oli save givimaot atoriti tru long asaenmen. Taem ol man mo ol woman oli kasem ol asaenmen ia, o ol wok ia blong mekem, oli kasem atoriti we i kam long God blong oli mekem samting. Eksampol:

• Fas Presidensi mo Kworom blong Olgeta Twelef Aposol i save givimaot atoriti i go long Olgeta Seventi we oli kasem wok blong lukaotem ol eria, mo blong oli prisaed long ol stek konfrens.

• Ol misin presiden oli givimaot atoriti i go long ol misinari, we oli man mo woman, we oli kasem wok blong lidim mo trenem ol nara misinari.

• Oli stap givimaot atoriti i go long ol memba blong Jos blong givim seves olsem ol givhan brata mo ol givhan sista. Hemia i hapen taem we oli kasem wok we i kam long presiden blong kworom blong ol elda o presiden blong Rilif Sosaeti, anda long daereksen blong bisop.

Atoriti we oli givimaot tru long asaenmen, i gat limit blong hem we i folem spesifik responsabiliti ia mo i longfala i kasem taem we asaenmen ia i finis.

Blong kasem moa infomesen abaot asaenmen tru long fasin blong givimaot wok o atoriti, luk long 4.2.5.

3.4.4

Yusum Prishud Atoriti long Stret mo Gud Fasin

Ol lida mo ol memba blong Jos oli yusum prishud atoriti we oli pasem i go long olgeta, o prishud atoriti we oli givimaot blong blesem laef blong ol narawan.

Atoriti ia, oli save yusum nomo long stret mo gud fasin (luk long Doktrin mo Ol Kavenan 121:36). Oli yusum nomo wetem fasin blong winim tingting blong man, wetem fasin blong gat longfala tingting long hadtaem, wetem fasin we i kaen (luk long Doktrin mo Ol Kavenan 121:41–42). Ol lida oli kaonsel, o toktok wetem ol narawan long wan spirit blong yuniti mo oli lukaotem tingting blong Lod tru long revelesen (luk long Doktrin mo Ol Kavenan 41:2). Blong kasem moa infomesen abaot fasin blong stap kaonsel o toktok wetem ol narawan, luk long 4.4.3.

Olgeta we oli stap yusum prishud atoriti, oli no mas fosem tingting blong olgeta long ol narawan. Oli no yusum hemia tu blong ol selfis stamba tingting. Sapos wan i yusum atoriti ia long fasin we i no stret mo i nogud, “ol heven, oli kamaot long [hem] olgetawan nomo [mo] Spirit blong Lod i harem nogud” (Doktrin mo Ol Kavenan 121:37).

Sam long ol koling blong Jos i tekem wan responsabiliti blong stap prisaed. Blong kasem moa infomesen abaot fasin blong stap prisaed long Jos, luk long 4.2.4.

tufala yang man mo wan woman oli stap toktok

3.5

Prishud Paoa

Prishud paoa i paoa blong God, we Hem i stap yusum blong blesem ol pikinini blong Hem. Prishud paoa blong God i go long evri memba blong Jos—ol woman mo ol man—taem oli stap kipim ol kavenan ia we oli bin mekem wetem Hem. Ol memba oli mekem olgeta kavenan ia taem oli kasem ol odinens blong prishud. (luk long Doktrin mo Ol Kavenan 84:19–20.)

Ol blesing blong prishud paoa we ol memba oli save kasem, i tekem:

• Fasin blong luksave rod insaed long laef blong olgeta.

• Revelesen blong save olsem wanem blong mekem ol wok we oli bin odenem, setem apat, o givimaot long olgeta blong mekem, oli kamtru.

• Kasem help mo paoa blong kam moa olsem Jisas Kraes mo Papa long Heven.

3.5.1

Ol Kavenan

Wan kavenan i wan tabu promes we i stap bitwin God mo ol pikinini blong Hem. God i givim ol kondisen blong kavenan ia, mo ol pikinini blong Hem oli agri blong obei ol kondisen ia. God i promesem blong blesem ol pikinini blong Hem taem oli stap mekem kavenan ia i kamtru.

Ol memba oli mekem ol kavenan wetem God taem oli kasem ol odinens blong fasin blong sevem man, mo fasin blong kam olsem wan god (luk long 18.1). Evriwan we i stap strong kasem en blong stap kipim ol kavenan blong olgeta, bambae oli kasem laef we i no save finis (luk long 2 Nifae 31:17–20; Doktrin mo Ol Kavenan 14:7).

Ol papa mo mama, ol lida blong Jos, mo ol narawan oli helpem wanwan man mo woman blong rere blong mekem ol kavenan taem oli kasem ol odinens blong gospel. Oli meksua se man o woman ia i andastanem ol kavenan we bambae hem i mekem. Afta we wan i mekem wan kavenan, oli helpem hem blong kipim kavenan ia. (Luk long Mosaea 18:8–11, 23–26.)

3.5.2

Ol Odinens

Wan odinens hem i wan samting we oli mekem, we hem i tabu, tru long atoriti blong prishud. Oltaem, ol odinens oli bin pat blong gospel blong Jisas Kraes (luk long Jenesis 1:28; Moses 6:64–65).

Long plante odinens, wanwan man o woman i mekem ol kavenan wetem God. Samfala eksampol oli baptaes, sakramen, endaomen, mo odinens blong mared siling. Long ol nara odinens, olsem ol petriakel blesing o ol blesing we oli givim long ol sikman, wanwan man o woman i no mekem wan kavenan, be oli kasem toktok we i soem rod insaed long laef blong olgeta, mo oli kasem paoa blong stap kipim ol kavenan.

Ol odinens oli gat wan simbol we i gat mining, we i poenem rod long wanwan man o woman i go long Papa long Heven mo Jisas Kraes. Insaed long ol odinens we i tekem ol kavenan, simbol fasin ia i helpem wanwan man o woman blong i andastanem ol promes we oli mekem mo ol blesing we oli kasem tru long fasin blong olgeta blong stap fetful.

Wanwan long ol odinens ia i letem wanwan man o woman blong kasem ol rij blesing long saed blong spirit. Lod i talemaot tru long revelesen: “Insaed long ol odinens [blong prishud], i gat paoa we i olsem hemia blong God, i kamaot” (Doktrin mo Ol Kavenan 84:20). Ol odinens blong fasin blong sevem man mo blong kam olsem wan god, oli wan mas blong kasem laef we i no save finis. Blong kasem moa infomesen, luk long 18.1.

Ol man mo woman we oli laef i stap, oli kasem ol odinens blong fasin blong sevem man mo blong kam olsem wan god, blong olgetawan. Long weaples we i posibol, nao bae oli save gobak long tempol blong mekem ol odinens, long bihaf blong olgeta we oli ded finis. Blong kasem moa infomesen abaot fasin blong mekem ol odinens blong ol dedman, luk long japta 28.

wan woman we i stap kasem wan prishud blesing

3.6

Prishud mo Hom

Evri memba blong Jos we oli kipim ol kavenan blong olgeta—ol woman, ol man, mo ol pikinini—oli kasem blesing ia blong gat paoa blong prishud blong God insaed long hom blong olgeta, blong mekem olgetawan mo ol famli blong olgeta i kam strong moa (luk long 3.5). Paoa ia bae i helpem ol memba blong mekem wok ia blong God blong fasin blong sevem man mo fasin blong kam olsem wan god insaed long laef blong olgeta wanwan mo insaed long famli blong olgeta (luk long 2.2).

Ol man we oli holem Melkesedek Prishud oli save givim ol prishud blesing long ol memba blong famli blong olgeta blong oli givim daereksen, hiling mo kamfot. Taem we i nid, ol memba blong Jos oli save lukaotem tu ol blesing ia taem oli askem long ol nara memba blong famli, ol givhan brata, o ol lokol lida blong Jos, blong givim long olgeta. Blong gat moa infomesen abaot ol prishud blesing, luk long 18.13 mo 18.14.