o se alii o loo tuuina atu se lauga i le sauniga faamanatuga

36.

Faavaeina, Suia, ma le Faaigoaina o Iunite Fou

36.0

Faatomuaga

O tagata o le Ekalesia e auai i faapotopotoga e fua i nofoaga o latou nonofo ai (tagai i le Mosaea 25:17–24). O nei faapotopotoga e tatau ai mo le faatulagaina ma le faiga o le galuega a le Ekalesia i lalo o le pule tatau o le perisitua. O taitai o faapotopotoga e tuuina atu i ai ki o le perisitua e faataga ai le faatinoga o sauniga o le perisitua. O faapotopotoga e fesoasoani foi i tagata o le ekalesia e faamalolosia le faatuatua o le tasi ma le isi a o latou tapuai atu i le Atua, a’oa’o i a’oa’oga a Iesu Keriso ma auauna atu.

O faapotopotoga a le Ekalesia (e ta’ua foi o iunite) e aofia ai siteki, itu, uarota, ma paranesi. E faavaeina, suia, pe le toe faaauauina pe a seiiloga e manaomia.

E galulue taitai e faateleina le malosi faaleagaga o tagata a o le’i fautuaina atu e faavae se iunite fou pe suia ia tuaoi o se iunite. E faato’a tatau ona faavae ia iunite fou pe afai ua lava le malolosi o iunite o i ai nei.

Mo le lagolago i le Iunaite Setete ma Kanata, valaau le 1-801-240-1007. I fafo atu o le Iunaite Setete ma Kanata, valaau le ofisa o le eria.

36.1

Faavaeina po o le Suia o Siteki ma Itu

O siteki e faavaeina mai i itu po o le vaevaeina o siteki o loo i ai. E mafai e se peresitene o le siteki po o le misiona ona fautua atu e faavaeina se siteki fou. Na te muai faamautinoa o le a ausia tulaga manaomia aupito itiiti o loo faaalia i le siata lea.

Tulaga Manaomia Aupito Itiiti e Faavae ai se Siteki

	I.S. ma Kanata	Isi atunuu uma
Numera o tagata o le au paia (toaaga ma ē le toaaga mai)	I.S. ma Kanata 3,000	Isi atunuu uma 1,900
Numera o ē umia le Perisitua Mekisateko e toaaga, totogi atoa le sefuluai e gafatia ona auauna atu i tofiga faaleautaitai	I.S. ma Kanata 180	Isi atunuu uma 120
Numera o uarota	I.S. ma Kanata 5	Isi atunuu uma 5

O itu e faavae mai paranesi i totonu o se misiona po o se siteki o loo i ai. E leai se numera aupito itiiti o tagata o le au paia po o paranesi e moomia ina ia faavaeina ai se itu.

E tatau i se itu ona i ai le maualuga o le malosiaga e moomia mo se siteki ia le itiiti ifo ma le ono masina a o lei mafai ona fautua atu e se peresitene o le misiona e fai ma se siteki.

O tuaoi o se siteki po o se itu e mulimuli i tuaoi o iunite o loo i ai i totonu. Ina ia fautua atu se suiga i tuaoi o se siteki po o se itu pe siitia atu se iunite i se siteki po o se itu e tuaoi, o peresitene o siteki po o misiona o loo aafia, latou te fuafuaina ma faamaopoopoina le talosaga.

E amata e se peresitene o le siteki po o le misiona se talosaga fou i le “Boundary and Leadership Proposals.” Afai na te le mafai ona faaaoga le polokalama i le initoneti, e mafai ona ia sii maia fomu pepa i le kilikiina o le sootaga.

O le faamaoniga o ni suiga ua fautuaina mai mo se siteki e sau mai le Au Peresitene Sili ma le Korama a le Toasefululua. E masani lava, latou te faia se faaiuga i totonu o le ono vaiaso e maua ai le talosaga ua mae’a ona faatumu.

36.2

Faavaeina po o le Suia o Uarota ma Paranesi i Siteki

O uarota ma paranesi i siteki e faavaeina mai iunite o loo i ai. E mafai e se peresitene o le siteki ona fautua atu le faavaeina o se uarota po o se paranesi fou i le siteki. Na te muai faamautinoa o le a ausia e le iunite fou tulaga manaomia aupito itiiti o loo faaalia i le siata lenei.

Tulaga Manaomia Aupito Itiiti e Faavae ai se Uarota

	I.S. ma Kanata	Isi atunuu uma
Numera o tagata o le au paia (toaaga ma ē le toaaga mai)	I.S. ma Kanata 300	Isi atunuu uma 150
Numera o ē umia le Perisitua Mekisateko e toaaga, totogi atoa le sefuluai e gafatia ona auauna atu i tofiga faaleautaitai	I.S. ma Kanata 1 mo le ta’i to’a 20 tagata o le au paia (toaaga ma ē le toaaga mai). E tatau ona i ai se numera aupito itiiti e to’a 20.	Isi atunuu uma 1 mo le ta’i to’a 20 tagata o le au paia (toaaga ma ē le toaaga mai). E tatau ona i ai se numera aupito toaitiiti e to’a 15.

Tulaga Manaomia Aupito Itiiti e Faavae ai se Paranesi i se Siteki

Numera o tagata o le au paia (toaaga ma ē le toaaga mai)	20
Numera o ē umia le Perisitua Mekisateko e toaaga, totogi atoa le sefuluai e gafatia ona galulue i tulaga faaletaitaiga	4

E mafai e se peresitene o le siteki ona fautua atu le suia o se paranesi e avea ma se uarota pe a ausia e le iunite ia tulaga manaomia aupito itiiti ma ua ia silafia se tasi e mafai ona avea ma epikopo.

E mafai e se peresitene o le siteki ona fautua atu le toefaatulagaina po o le le toe faaauauina o uarota ma paranesi pe a ua manino se manaoga.

E amata e se peresitene o le siteki se talosaga fou i le “Boundary and Leadership Proposals.” Afai e le mafai ona ia faaaogaina le polokalama i le initoneti, e mafai ona ia sii maia i lalo fomu pepa i le kilikiina o le sootaga.

E na’o le Au Peresitene Sili e mafai ona faamaoniaina le talosaga. E masani lava, latou te faia se faai’uga i totonu o le fa vaiaso talu ona maua le talosaga ua mae’a ona faatumu.

36.3

Faavaeina po o le Suia o Paranesi i Misiona

E mafai e se peresitene o le misiona ona fautua atu le faavaeina o ni paranesi fou i se misiona. E leai se numera faatulagaina aupito itiiti o tagata e moomia ina ia faavaeina ai se paranesi i se misiona. Peitai, o le mea e masani ai, o nei paranesi fou e tatau ona le itiiti ifo i le to’a 4 i latou e umia le perisitua. E le itiiti ifo ma le to’atasi e tatau ona umia le Perisitua Mekisateko e toaga ma totogi atoa le sefuluai.

E amata e se peresitene o le misiona se talosaga fou i le “Boundary and Leadership Proposals.” Afai e le mafai ona ia faaaogaina le polokalama i le initoneti, e mafai ona ia sii maia i lalo fomu pepa i le kilikiina o le sooga.

E mafai e le Au Peresitene o le Eria ona tuu atu le faamaoniga mulimuli po o le teena o se talosaga a se peresitene o le misiona e:

• Faavae ai ma faaigoa se paranesi fou i se misiona.

• Le toefaaauauina ai se paranesi i se misiona.

• Suia tuaoi o le paranesi i se misiona pe afai e le aafia i le suiga se siteki, se itu, po o se isi misiona.

E tatau i le Au Peresitene o le Eria ona auina atu le talosaga ua faamaoniaina i le laumua o le Ekalesia mo le faagasologa a o le’i mafai ona faavaeina pe suia le paranesi i polokalama a le Ekalesia.

E mafai e le Au Peresitene o le Eria ona ioeina ae le tuuina atua le faamaoniga mulimuli o le talosaga a se peresitene o le misiona e:

• Sitiia atu se paranesi i se isi siteki, itu, po o se misiona.

• Suia le igoa o se paranesi o i ai i se misiona.

• Suia tuaoi o le paranesi i se misiona pe afai e aafia i le suiga se siteki, se itu, po o se isi misiona.

• Faavae pe suia se paranesi o se misiona mo talavou nofofua matutua po o tagata matutua nofofua; tagata o le ekalesia e le tautatala i le gagana masani i le lotoifale; tagata o le au paia o loo tausia i nofoaga faapitoa, polokalama faapitoa e togafitia ai, po o falepuipui; po o tagata o le au paia o loo i le militeli.

I tulaga nei, e iloiloina e le Au Peresitene o le Eria le talosaga, ma afai latou te ioeina, latou te auina atua mo le faamaoniga. E na’o le Au Peresitene Sili e mafai ona tuuina mai le faamaoniga faai’u. E masani lava, latou te faia se faaiuga i totonu o le fa vaiaso talu ona maua le talosaga ua mae’a ona faatumu.

aiga i le lotu

36.4

Faaigoaina o Iunite o le Ekalesia

O le igoa o se iunite e tatau ona fesoasoani e mataulia ai e i latou o ē nonofo i le eria. E masani lava, e le tatau ona suia igoa o iunite o loo i ai nei.

Afai e na ona manao se peresitene o le siteki po o se peresitene o le misiona e suia le igoa o se iunite, na te le tau manaomia ona faaaoga le polokalama i le initoneti. Na te auina atu le talosaga e ala i le valaau atu i le 1-801-240-1007. I fafo atu o le Iunaite Setete ma Kanata, e valaau atu o ia i le ofisa o le eria.

Afai e manaomia le suia o le igoa o se iunite ona o le toefaatulagaina o tuaoi, e amata e le peresitene o le siteki po o le misiona se talosaga fou i le faaaogaina o le polokalama i le initoneti i le Boundary and Leadership Proposals. Afai e le mafai ona ia faaaogaina le polokalama i le initoneti, e mafai ona ia sii maia i lalo fomu pepa i le kilikiina o le sootaga.

E na’o le Au Peresitene Sili e mafai ona faamaoniaina nei talosaga.

E mafai e Au Peresitene o Eria ona faamaoniaina ni talosaga e faavae ma faaigoa ni paranesi fou i misiona (tagai i le 36.3).

36.4.1

Faaigoaina o Siteki ma Itu

O le upu muamua i le igoa o le siteki po o le itu o se tasi o mea nei:

• O le aai o loo tu ai le laumua o le siteki po o le itu

• Se isi aai i le siteki po o le itu e lauiloa i tagata o le au paia

• O se vaega taua o le faataatiaga faafaafanua i totonu o tuaoi o le siteki po o le itu

I totonu o le Iunaite Setete ma Kanata, o le upu lona lua o le setete po o le itumalo o loo tu ai le siteki po o le itu. I isi atunuu, o le upu lona lua o le igoa o le atunuu.

Pe a sili atu i le tasi le siteki po o le itu e i ai i le aai e tasi, o le upu lona tolu o se uiga e iloagofie ai i totonu o tuaoi o le iunite. O loo faaali atu i lalo nisi uiga e iloagofie ai e faatagaina mo igoa o siteki ma itu:

• Faasinoala faatapasā (matu, saute, sasa’e, po o sisifo)

• Nuu po o le pitonuu

• Vaega taua o le faataatiaga faafaafanua

O loo faaali atu i lalo nisi uiga e iloagofie ai e le faatagaina mo igoa o siteki ma itu:

• O isi faaupuga faasinoala (mo se faataitaiga, sautesisifo)

• Igoa o tagata

Pe a tutusa le igoa o se aai ma le setete, itumalo, po o le atunuu, e le toe ta’ua faalua i le igoa. Mo se faataitaiga:

• Siteki a Idaho Falls Taylor Mountain, ae le o le Siteki a Idaho Falls Idaho Taylor Mountain

• Siteki a le Aai o Mékisikō Asateka, ae le o le Siteki a le Aai o Mékisikō Mékisikō Asateka

36.4.2

Faaigoaina o Uarota ma Paranesi

E faaigoa se uarota po o se paranesi i se uiga e iloagofie ai i totonu o ona tuaoi. O loo faaali atu i lalo nisi uiga e iloagofie ai e faatagaina mo igoa o uarota ma paranesi:

• Aai

• Nuu po o le pitonuu

• Magaala

• Paka

• A’oga

• Vaega taua o le faataatiaga faafaafanua

O loo faaali atu i lalo nisi uiga e iloagofie ai e le faatagaina mo igoa o uarota ma paranesi:

• Faasinoala faatapasā (mo se faataitaiga, sasa’e po o matusisifo)

• Igoa o tagata

• O igoa e faavae i le na’o se vaaiga (mo se faataitaiga, Vaaiga o le Malumalu Vaaiga o le Mauga po o le Vaaiga o le Vaitafe)

• Tuufaatasia o ni igoa se lua e fatu ai se igoa fou

O le igoa e na’o le tasi le uiga e iloagofie ai, e faaaoga i le igoa o le uarota po o le paranesi. Afai e sili atu ma le tasi le uarota po o le paranesi e tutusa igoa, e faaopoopo la i ai se numera e pei o le Uarota a Pesega 1 ma le Uarota a Pesega 2.

O le igoa o le uarota po o le paranesi e tatau ona i ai i le gagana a le eria. Afai e le faaaogaina e le gagana le alafapeta faa-Roma, e tatau ona aofia ai se faaliliuga o mataitusi faa-Roma i le talosaga.

36.5

Faatinoina o Suiga na Fautuaina

36.5.1

Suiga o Siteki ma Itu

O le tusi o le faamaoniga mo le faavaeina po o le le toefaaauauina o se siteki po o se itu, e masani lava ona faailoa atu ai le aso o le a faia ai le suiga. E le tatau ona faasilasila atu lea aso se’i vagana ua talanoaina e le Pulega Aoao ua tofiaina ia auiliiliga ma le peresitene o le siteki po o le misiona. E le faasilasilaina suiga tonu seia aulia le konafesi a le siteki po o le itu.

E faailoa atu e peresitene o siteki po o misiona i le laumua o le Ekalesia po o le latou ofisa o le eria pe a mae’a ona faia ia suiga.

36.5.2

Suiga o Uarota ma Paranesi

A uma ona maua e se peresitene o le siteki po o le misiona se faamaoniga mo suiga o se uarota po o se paranesi, e masani lava e 90 aso e na te tuuina atu ai suiga i tagata o le au paia mo le lagolagoina. Afai na te manaomia ona faatuatuai e sili atu ma le 90 aso, na te talosagaina se faatagaga mai le Ofisa o le Au Peresitene Sili.

E faailoa atu e peresitene o siteki po o misiona i le laumua o le Ekalesia po o le latou ofisa o le eria pe a mae’a ona faia ia suiga. E le faafouina faamatalaga o faafanua ma iunite sei vagana ua faamaumauina e le laumua o le Ekalesia.

tagata o loo pepese i le lotu

36.6

Polokalama a Iunite Faavae

Ua atiina a’e e le Ekalesia le Polokalama a Iunite Faavae mo le faaaogaina e ni nai paranesi toalaiti po o faatasiga laiti o tagata auai o le au paia ua faatagaina, ua ta’ua o vaega (tagai i le 37.7 mo nisi faamatalaga e uiga i vaega). E mafai e se Au Peresitene o le Eria ona faatagaina le faaaogaina o le Polokalama a Iunite Faavae i paranesi laiti po o ni vaega i soo se mea e faatatau i ai soo se mea o tulaga nei:

• O loo i ai le Ekalesia i ona tulaga tau amata.

• E salalau solo tagata o le au paia i le faataatiaga faafaafanua.

• O le aofai o tagata o le au paia e toalaiti, ma o loo faatoa tau amata foi ona ati a’e le tulaga faaletaitaiga.

• E i ai manaoga faapitoa o tagata o le au paia i le gagana pe o loo tausia i nofoaga faapitoa, polokalama e togafitia ai, po o falepuipui.

E mafai foi e se Au Peresitene o le Eria ona faatagaina le faaaoga o le Polokalama a Iunite Faavae i misiona po o siteki o loo tulai mai ai tulaga nei.

O taiala mo lenei polokalama o loo tuuina atu i le Tusitaiala mo le Polokalama a Iunite Faavae.. O isi faamatalaga o loo tuuina atu i le Tusitaiala a le Paranesi, Tusitaiala a Taitai Perisitua ma Ausilali, Tusitaiala mo le Aiga, ma le Tusitaiala Faafaiaoga.