“31. Ol Intaviu mo Ol Nara Miting wetem Ol Memba,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“31. Ol Intaviu mo Ol Nara Miting wetem Ol Memba,” Jeneral Hanbuk.
31.
Ol Intaviu mo Ol Nara Miting wetem Ol Memba
31.0
Fas Toktok
Plante taem, Jisas i stap givhan long ol narafala man wan afta wan (luk long, eksampol, Jon 4:5–26; 3 Nifae 17:21). Hem i lavem wanwan long ol pikinini blong God. Hem i stap helpem olgeta wanwan.
Olsem wan Jos lida mo wokman blong Jisas Kraes, yu tu yu gat ol janis blong helpem ol wanwan long ol pikinini blong God, long progres blong olgeta long saed blong spirit. Wan impoten wei we yu save mekem hemia hem i tru long ol intaviu mo nara wan-tu-wan miting. Sam long ol seves blong yu we i gat moa mining bae i hapen wan afta wan. Long ol taem olsem, yu save givim lav olsem hemia blong Sevya, stap leftemap “ol han we oli hang i kamdaon” mo mekem i kam moa strong ”ol ni ia we oli no strong” (Doktrin mo Ol Kavenan 81:5).
Long japta ia, toktok ia intaviu i stap minim wan miting bitwin wan lida mo wan man o woman, blong luk sapos man o woman ia i save tekpat long wan odinens o kasem wan koling (luk long 31.2). Plante taem, wan memba blong bisoprik o stek presidensi nao i stap kondaktem ol intaviu ia. Toktok ia intaviu i minim tu ol givhan intaviu we wan memba blong Rilif Sosaeti o presidensi blong kworom blong ol elda i stap kondaktem (luk long 21.3).
Antap long ol intaviu ia, i gat fulap narafala risen moa blong wan Jos lida i save mit wetem wanwan memba (luk long 31.3). Eksampol, bisoprik i stap gat ol miting evri taem wetem wanwan yut long wod (luk long 31.3.1). Nomata sapos yu no givim seves insaed long wan bisoprik, bisop i save askem yu blong mit wetem wan memba we i stap long nid blong yu save givim sapot mo givhan we i gogohed. O, wan memba i save kam long yu taem hem i stap go tru wan jalenj blong hemwan o famli.
Japta ia i save helpem evri lida we oli gat ol janis blong mit wetem wanwan memba. Ol lida ia i save tekem tu Rilif Sosaeti, kworom blong ol elda, mo Ol Yang Woman lida, ol givhan brata mo sista, o ol narafalawan we bisop i asaenem olgeta.
31.1
Ol Prinsipol we Oli Lidim Wok
31.1.1
Rere long Saed blong Spirit
Sapos yu gat responsabiliti ia blong mit wetem wan memba, Lod bae i blesem yu wetem insperesen we yu nidim taem yu stap lukaotem. Rere long yuwan long saed blong spirit tru long prea, skripja stadi, mo stap laef long stret mo gud fasin. Lisin long smol voes blong Tabu Spirit. Bae hem i lidim yu tru long ol tingting mo filing. Hem i save helpem yu blong tingbaot ol tijing we yu bin stadi long hem insaed long ol skripja, mo ol toktok blong ol profet long ol dei blong tedei, we i save helpem man ia we yu stap mit wetem (luk long Doktrin mo Ol Kavenan 84:85; 100:5–8).
Gospel Laebri i gat wan koleksen blong Counseling Resources. Taem yu stap rere blong mit wetem wan memba, tingting blong luklukbak long ol infomesen abaot ol topik we yu save yusum long situesen blong hem.
Tabu Spirit i save lidim memba ia tu we bae yu mit wetem. Maet yu wantem blong invaetem hem blong rere long saed blong spirit from miting blong yutufala tu.
Tingting blong prea wetem memba ia taem yu statem miting. Hemia i save invaetem wan spirit blong tingting we i stap daon mo fet, taem yu askem God wetem fasin blong stap wan, from help blong Hem (luk long Doktrin mo Ol Kavenan 6:32; 29:6).
Long taem blong intaviu o miting, maet bae wan problem o kwestin i save kam antap we yu no filim yu rere blong tokbaot. Yu save givim tingting se yu mo memba ia, wanwan long yutufala bae i lukaotem blong Lod i lidim yutufala—eksampol, tru long stadi, prea, mo fasin blong livim kakae. Maet yu save yusum ol infomesen we i go wetem situesen tu long Counseling Resources o Laef Help insaed long Gospel Laebri. Afta, yutufala i save mit bakegen blong tokbaot sam moa samting.
Sapos memba ia i bin mekem wan series sin, pasem hem i go long bisop.
31.1.2
Helpem Memba blong Filim Lav blong God
Olsem wan Jos lida, yu yu ripresentem Sevya. Wan impoten pat blong misin blong Hem, hem i blong talemaot lav blong God long ol pikinini blong Hem (luk long Jon 3:16–17). Taem ol memba oli kam luk yu blong wan intaviu o from help long wan jalenj blong olgetawan, plante taem, wanem we oli nidim blong save moa, hem i we Papa long Heven i lavem olgeta. Lav ia save mekem olgeta i kam moa strong, givim insperesen long olgeta blong kam long Kraes, sakem sin, mo mekem ol gudfala joes.
Ol skripja mo ol toktok blong ol profet long ol las dei ia, i invaetem Spirit mo i tijim doktrin we i stret evriwan. Yusum olgeta fulap, wetem fasin blong tingbaot filing blong ol narawan mo lav, taem yu mit wetem ol memba. Yusum olgeta blong givim insperesen, mo blong leftemap tingting, be i no blong fosem man, o mekem man i fraet (luk long Luk 9:56).
Putumaot fulap taem blong miting. Memba ia i no mas filim se yu tu yu bisi. Lisin gud long hem.
31.1.3
Helpem Memba blong Lukaotem Paoa blong Sevya
Jisas Kraes i tekem long Hemwan, ol sin blong yumi “blong mekem se hem i save tekemaot ol sin blong [yumi] folem paoa ia blong hem we i mekem man i kam fri” (Alma 7:13). Hem i tekem tu long Hemwan ol hadtaem, ol soa blong bodi, ol samting we yumi no strong long hem “mekem se hem i save … olsem wanem blong helpem ol man blong hem” (luk long Alma 7:11–12).
Leftemap tingting blong ol memba blong go long Hem. Helpem olgeta blong lukaotem paoa blong Hem blong mekem olgeta i kam strong, blong kasem kamfot mo kamaot long sin mo harem nogud. Paoa ia i kam taem yumi eksasaesem fet long Jisas Kraes, stap folem eksampol blong Hem, kasem ol prishud odinens, stap kipim ol kavenan, mo stap mekem samting folem voes blong Tabu Spirit.
31.1.4
Helpem Memba blong Filim Gud mo Sef
Sam memba oli bin gat ol eksperiens we i mekem olgeta i wari o filim ol samting i hevi tumas taem oli mit wetem wan Jos lida. Lukaotem ol wei blong helpem olgeta blong filim kwaet, sef mo filim gud. Faenemaot wanem yu save mekem blong helpem memba ia.
Oltaem givim tingting ia long memba se hem i save gat wan nara man i stap wetem hem long taem blong intaviu o miting. Taem yu stap mit wetem wan memba we i oposit seks long yu, wan pikinini, o wan yut, mekemsua se wan papa o mama o wan nara adalt i stap. Hem i save joen long miting ia o wet aotsaed long rum, hemia i dipen long wanem memba ia we yu stap mit wetem, i wantem.
Sapos memba ia i no filim gud blong mit long mitinghaos, disaed tugeta long wan defren ples blong mit. Faenem wan ples we Tabu Spirit i save stap mo yutufala i save toktok blong yutufala nomo. Tingting long sefti blong yuwan mo sefti blong memba. Blong moa infomesen blong stap mit wetem ol memba onlaen, luk long 31.4.
Wan narafala impoten pat blong stap helpem ol memba blong filim sef i blong kipim ol samting i konfidensiol. Talem bakegen long memba ia se storian blong yutufala bae hem i konfidensiol.
No serem konfidensiol infomesen wetem eni man—hemia i tekem tu hasban o waef blong yu, o ol nara lida blong Jos—be nomo, sapos memba ia i givim raet. Gohed blong kipim ol samting i konfidensiol iven afta we oli rilisim yu. Blong stap brekem tras ia blong kipim ol samting i konfidensiol, i save spolem fet, tras mo testemoni blong wan memba. Plante taem bae ol memba oli lukaotem help long ol lida blong Jos sapos oli save se wanem we bae oli serem, bae oli kipim i konfidensiol i stap.
Blong moa infomesen long saed blong kipim ol samting i konfidensiol, we i tekem tu ol infomesen long saed blong loa, luk long 32.4.4.
31.1.5
Askem Ol Kwestin We I Kam Tru long Insperesen mo Lisin Gud
Taem yu stap mit wetem wan memba, askem ol kwestin we i save helpem yu blong andastanem situesen blong hem. Givim ol janis long memba ia blong i fri blong serem ol tingting mo filing blong hem.
Taem memba i stap toktok, lisin gud mo lukluk gud. Traem blong andastanem hem fulwan bifo yu stat blong ansa. Sapos i nid, askem ol kwestin we i go tugeta blong mekemsua se yu andastanem hem. Be yu no askem ol kwestin we i no nid.
Blong stap lisin i help blong bildimap tras. Hem i helpem ol narawan blong filim se oli andastanem olgeta, luksave olgeta, mo lavem olgeta. Plante taem, ol pipol oli nidim wan we oli trastem blong i lisin long olgeta taem oli stap wok tru long ol jalenj. Blong stap lisin i save help tu blong openem hat blong yu long ol toktok we i kam long Tabu Spirit.
31.1.6
Leftemap Tingting blong Stap Dipen long Yuwan
From lav blong yu long ol memba, maet yu wantem blong givim ol ansa long ol problem long olgeta kwiktaem. Be, bae yu blesem olgeta moa taem yu stap helpem olgeta blong faenem ol ansa blong olgetawan mo mekem ol desisen blong olgetawan (luk long Doktrin mo Ol Kavenan 9:8).
Helpem olgeta blong andastanem gud ol problem o kwestin blong olgeta long wei blong gospel blong Jisas Kraes mo plan blong sevem man. Tijim olgeta olsem wanem blong lukaotem Lod blong i lidim olgeta tru long ol skripja, ol toktok blong ol profet we oli stap laef, mo revelesen blong olgetawan. Long wei ia, yu helpem ol memba blong rere blong go tru ol nara jalenj long fiuja. Bae olgeta tu bae oli moa gud blong helpem ol narawan we i tekem ol famli blong olgeta tu.
31.1.7
Sapotem Ol Traehad blong Sakem Sin
Samtaem wan memba i save lukaot help blong stap sakem sin. I gat fulap samting yu save mekem blong givim insperesen blong gat fet long Jisas Kraes mo leftemap tingting blong memba ia blong lukaotem fogivnes.
Bisop nomo o stek presiden i save helpem wan man blong stretem ol sin we oli series. Sam long olgeta ia i stap insaed long 32.6. Sapos memba ia i mekem eni long ol sin ia, hem i mas mit wetem bisop o stek presiden kwiktaem.
Wanwan bisop mo stek presiden i wan “jaj long Isrel” (Doktrin mo Ol Kavenan 107:72). Tru long raet ia, oli helpem ol memba blong sakem sin mo kam long Kraes, we i fogivim ol sin (luk long 32.1 mo 32.3).
Long ol responsabiliti ia, ol lida ia oli ripresentem Lod. Oli traehad blong folem “jajmen we bae [Hem i] givim long [olgeta]” (3 Nifae 27:27). Hem i tijim se fasin blong sakem sin i minim tu blong praktisim fet long Jisas Kraes, blong gat wan spirit we i wantem blong sakem sin, blong stap lego sin fogud, askem fogivnes, putumbak o stretembak ol samting, mo soem wan niu komitmen blong stap obei long ol komanmen.
Ol bisop mo ol stek presiden oli gat blesing blong presen ia we i blong save jajem gud samting long saed blong spirit, we i helpem olgeta blong mekem wok blong olgeta. Presen ia i helpem olgeta blong luksave trutok, andastanem hat blong wan memba, mo luksave ol nid blong hem (luk long 1 King 3:6–12; Doktrin mo Ol kavenan 46:27–28).
Nomata we konfesen i hapen wetem wan “jaj blong Isrel,” wetem raet blong memba, ol nara lida oli save givim sapot long ol traehad blong hem blong sakem sin. Hemia i help fulap taem wok blong sakem sin bae i tekem wan longfala taem. Luk long las pat blong 32.8.1 blong ol gaedlaen.
31.1.8
Fesem Abius long Stret Wei
Abius, oli no save akseptem eni kaen wei blong abius. Tekem ol ripot blong abius i series. Sapos yu kam blong save abaot wan man we oli bin abiusum hem, ripotem abius ia long ol gavman atoriti mo kaonsel wetem bisop. Ol gaedlaen blong mekem ripot mo fesem abius oli stap long 38.6.2.
Blong kasem sam infomesen abaot wanem ol bisop mo ol stek presiden oli mas mekem taem oli kam blong save abaot eni kaen blong abius, luk long 38.6.2.1.
Blong kasem sam infomesen abaot olsem wanem blong sap helpem ol viktim blong abius, luk long “Abuse (Help for the Victim)” insaed long Counseling Resources. Yu save givim tingting tu long ol memba blong helpem olgeta long resources about abuse insaed long Life Help.
Blong kasem infomesen blong helpem ol viktim blong rep o ol nara kil long saed blong seks, luk long 38.6.18.2.
31.2
Ol Intaviu
31.2.1
Ol Stamba Tingting blong Ol Intaviu
Plante taem, ol Jos lida oli intaviu long ol memba blong luk sapos oli:
-
Rere blong kasem o tekpat long wan odinens.
-
Sapos blong singaotem olgeta long wan posisen insaed long Jos.
Plante long ol intaviu ia, wan memba blong bisoprik o stek presidensi nao i kondaktem. Oli no save givim wok ia long wan nara lida blong wod. Be, wan stek presiden i save givim sam long ol intaviu long ol hae kaonsela olsem we oli putum insaed long aotlaen blong Jat blong Ol Koling (luk long 30.8).
31.2.2
Ol Defren Kaen Intaviu
Oli singaotem bisop olsem “wan jeneral jaj” insaed long wod blong hem (Doktrin mo Ol Kavenan 107:74; luk tu long 7.1.3). Stek presiden i wok tu olsem wan jeneral jaj (luk long 6.2.3). Ol lida ia oli holem ol prishud ki blong givim raet long ol odinens. From ol risen ia, i gat sam intaviu we olgeta nomo i save kondaktem. Oli save givimaot ol nara intaviu long ol kaonsela. Tebol we i kam afta i soem lis blong huia i save kondaktem wanwan intaviu.
|
Huia i save kondaktem intaviu ia |
Stamba tingting blong intaviu |
|---|---|
Huia i save kondaktem intaviu ia Bisop nomo | Stamba tingting blong intaviu
|
Huia i save kondaktem intaviu ia Bisop o wan kaonsela we hem i asaenem | Stamba tingting blong intaviu
|
Huia i save kondaktem intaviu ia Stek presiden nomo | Stamba tingting blong intaviu
|
Huia i save kondaktem intaviu ia Stek presiden o wan kaonsela we hem i asaenem | Stamba tingting blong intaviu
|
Ol fultaem misinari oli mekem intaviu blong ol konvet blong oli kasem baptaes mo konfemesen (luk long 31.2.3.2).
Ol memba blong kworom blong ol elda mo ol Rilif Sosaeti presidensi oli lidim ol intaviu blong givhan (luk long 21.3).
31.2.3
Ol Intaviu blong Baptaes mo Konfemesen
31.2.3.1
Ol Pikinini we Oli Ol Memba blong Rekod
Bisop nao i holem ol ki blong prishud blong baptaesem ol memba blong rekod we oli gat 8 yia, insaed long wod blong hem. From hemia, hem o wan kaonsela we hem i givim wok long hem i intaviu ol man ia blong kasem baptaes:
-
Ol pikinini we oli gat 8 yia we oli ol memba blong rekod.
-
Ol pikinini we oli gat 8 yia we oli no ol memba blong rekod be oli gat papa o mama, o wan we i stap lukaot long olgeta we i wan memba.
-
Ol memba blong rekod we oli gat 9 yia i go antap, we oli seftem baptaes blong olgeta from oli gat disabiliti long saed blong tingting.
Long taem blong intaviu, memba blong bisoprik i mekemsua se pikinini i andastanem ol stamba tingting blong baptaes (luk long 2 Nifae 31:5–20). Hem i mekemsua tu se pikinini i andastanem kavenan blong baptaes, mo hem i glad blong mekem komitmen blong laef folem kavenan ia (luk long Mosaea 18:8–10). Hem i no nidim blong yusum wan lis blong ol kwestin. Hemia i no wan intaviu blong luk sapos wan i klin inaf, from se “ol smol pikinini, oli no nid blong sakem sin” (Moronae 8:11).
I nid blong kasem raet blong ol papa mo mama, o olgeta we oli lukaot long ol pikinini, bifo wan pikinini andanit long 18 yia i kasem baptaes (luk long 38.2.8.2).
31.2.3.2
Ol Konvet
Misin presiden i holem ol prishud ki blong baptaesem ol konvet. From hemia, wan fultaem misinari i intaviu long:
-
Olgeta we oli gat 9 yia i go antap, we oli neva bin baptaes o kasem konfemesen bifo. Luk long 18.7.1.1 long saed blong ol eksepsen blong olgeta we oli gat disabiliti long saed blong tingting.
-
Ol pikinini we oli gat 8 yia i go antap we papa mo mama oli no memba blong Jos.
-
Ol pikinini we oli gat 8 yia i go antap, we papa o mama tu bae i kasem baptaes mo konfemesen.
Misinari distrik lida o eria lida i lidim intaviu ia. Blong kasem infomesen abaot ol situesen we i nidim spesel raet, luk long 38.2.8.6.
Wanwan fiuja konvet i mas mit tu wetem bisop bifo long baptaes mo konfemesen. Be, bisop i no intaviu hem blong kasem baptaes. Hem i no intaviu tu blong luk sapos man i klin inaf. Stamba tingting biaen long miting ia, i blong bildim wan rilesensip wetem man ia.
Long intaviu ia, misinari i folem daereksen blong Spirit blong luk sapos man we hem i intaviu long hem i kwalifae long ol kwaliti we oli tokbaot insaed long Doktrin mo Ol Kavenan 20:37 (luk tu long Mosaea 18:8–10; Moronae 6:1–4). Misinari i yusum ol kwestin ia. Hem i jenisim olgeta folem yia blong man, hamas oli bigwan long saed blong tingting mo situesen blong olgeta.
-
?Yu yu biliv se God i Papa blong yumi we I No Save Finis? ?Yu yu biliv se Jisas Kraes i Pikinini blong God mo Hem i Sevya mo i Ridima blong wol ia?
-
?Yu yu biliv se Jos mo gospel blong Jisas Kraes i bin kambak tru long Profet Josef Smit? ?Yu yu biliv se [nem blong Presiden blong Jos we i laef i stap naoia] hem i wan profet blong God? ?Hemia i minim wanem long yu?
-
?Long yu, hem i minim wanem blong sakem sin? ?Yu yu filim se yu sakem ol sin blong yu blong bifo?
-
Oli bin tijim yu se blong kam memba insaed long Jos Ia blong Jisas Kraes blong Ol Lata-dei Sent i minim blong stap laef folem ol standet blong gospel. ?Wanem tingting blong yu abaot fasin blong stap laef folem ol standet? ?Yu yu glad mo wantem blong stap obei long olgeta standet ia?”
-
Loa blong jastiti, o loa blong fasin blong stap klin long saed blong seks, i blokem eni rilesen long saed blong seks aotsaed long mared we i folem loa, bitwin wan man mo wan woman
-
Loa blong taeting
-
Tok blong Waes
-
Kipim Sabat dei i tabu; we i minim tu blong tekem mo kakae sakramen evri wik mo stap givim seves long ol narafala man
-
-
?Yu yu bin mekem wan bigfala kraem bifo? Sapos yes, ?Yu yu stap folem sam probesen blong loa o yu aot long kalabus folem kondisen we Kot i putum yu long hem?
-
?Yu yu bin tekpat o gat wan abosen finis? (luk long 38.6.1).
-
Taem yu baptaes, yu mekem kavenan wetem God, se yu yu rere mo wantem tekem, long yuwan, nem blong Kraes, givim seves long ol narafala man, stanap olsem wan witnes blong God evri taem, mo obei long ol komanmen blong Hem truaot long laef blong yu. ?Yu yu rere blong mekem kavenan ia mo blong yu traehad blong stap fetful long kavenan ia?
Sapos man o woman ia i ansa, yes, long kwestin namba 5 o 6, luk ol instraksen long 38.2.8.6. Luk tu long 38.2.8.7.
Sapos man o woman ia i rere blong kasem baptaes, man we i intaviu i fulumap Baptaes mo Konfemesen Rekod (luk long 18.8.3).
31.2.4
Ol Intaviu blong Odinesen long wan Ofis blong Aronik Prishud
Bisop nao i holem ol prishud ki blong pasem Aronik Prishud. Hem i holem tu ol ki blong odinesen long ol ofis blong dikon, tija mo pris. Bisop o wan kaonsela we i kasem wok ia, i intaviu long ol brata we oli mas odenem olgeta oli kam dikon, o tija, blong faenemaot sapos oli rere long saed blong spirit. Bisop i intaviu long ol brata we bae oli odenem olgeta oli kam pris.
Blong kasem moa infomesen, luk long 18.10.2.
31.2.5
Ol Intaviu blong Tempol Rekomen
Tempol hem i haos blong Lod. Blong stap go insaed long tempol mo stap tekpat long ol odinens insaed long hem, i wan tabu spesel janis. Janis ia i blong olgeta nomo we oli rere long saed blong spirit mo stap traehad blong laef folem ol standet blong Lod, olsem we ol prishud lida we oli gat atoriti oli talem.
Blong luksave hemia, ol prishud lida oli intaviu long memba mo yusum ol kwestin insaed long LKR (luk tu long ol gaedlaen insaed long 26.3). Ol lida oli no mas ademap o karemaot eni samting we i nidim blong gat we i stap. Be, oli save jenisim kwestin folem yia mo ol situesen blong memba.
31.2.6
Ol Intaviu blong Odinesen long wan Ofis blong Melkesedek Prishud
Stek presiden nao i holem ol prishud ki blong pasem Melkesedek Prishud. Hem i holem tu ol ki blong odinesen long ol ofis blong elda mo hae pris.
Wetem raet blong stek presidensi, bisop i intaviu memba mo yusum ol kwestin we i stap andanit ia. Bifo hem i mekem hemia, hem i mekemsua se membasip rekod blong man ia, i no gat wan toktok o not i hang i stap, se i no gat wan toktok we i blokem wan odinens, o i talem se i gat wan strong kondisen long Jos membasip blong hem.
Sapos, afta long intaviu, bisop i filim se memba i rere blong kasem odinesen, hem i fulumap mo givimbak Odinesen Rekod blong Melkesedek Prishud. Afta wan memba blong stek presidensi i intaviu long memba ia, mo i yusum tu ol kwestin andanit ia.
Wan man we i kasem Melkesedek Prishud i stap mekem wan strong promes mo kavenan blong prishud. Hemia oli tokbaot gud insaed long Doktrin mo Ol Kavenan 84: 33–44. Long taem blong ol intaviu ia, bisop mo memba blong stek presidensi i mekemsua se memba ia i andastanem strong promes mo kavenan ia mo i agri blong laef folem. Afta lida i askem ol kwestin ia:
-
?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?
-
?Yu yu gat wan testemoni abaot Atonmen blong Kraes mo wok blong Hem olsem Sevya mo Ridima?
-
?Yu yu gat wan testemoni long saed blong Kambak blong gospel blong Jisas Kraes?
-
?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki?
?Yu yu sastenem ol memba blong Fas Presidensi mo Kworom blong Olgeta Twelef Aposol olsem ol profet, sia, mo reveleta?
?Yu yu sastenem ol nara Jeneral Atoriti mo ol lokol lida blong Jos?
-
Lod i bin talem se, evri samting, oli mas “mekem long klin fasin” long fored blong Hem ((Doktrin mo Ol Kavenan 42:41).
?Yu yu traehad blong stap laef long klin fasin long ol tingting mo long ol aksen blong yu?
?Yu yu stap obei long loa blong jastiti?
-
?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?
-
?Yu yu stap sapotem o promotem eni tijing, praktis, o doktrin we i agensem hemia blong Jos Ia blong Jisas Kraes blong Ol Lata-dei Sent?
-
?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?
-
?Yu yu stap traehad blong stap ones long evri samting we yu stap mekem?
-
?Yu yu stap pem ful taeting?
-
?Yu yu andastanem mo stap obei long Tok blong Waes?
-
Yu yu gat sam mane o sam narafala samting we yu mas pem i go long hasban/waef blong yu blong fastaem, o yu yu gat eni mane blong pem long saed blong ol pikinini blong yu?
Sapos yes, yu yu stap pem gud ol mane ia, o yu yu stap mekem ol samting we yu mas mekem long olgeta?
-
?I gat eni series sin, o nogud fasin insaed long laef blong yu we yu nidim blong stretem wetem ol prishud atoriti olsem pat blong yu blong sakem sin?
-
? Yu yu ting se yu klin inaf blong oli odenem yu i go long wan ofis insaed long Melkesedek Prishud?
31.3
Ol Nara Janis blong Ol Lida blong Mit wetem Ol Memba
Ol lida oli gat fulap janis blong mit wanwan wetem ol memba. Eksampol:
-
Maet ol memba oli save askem blong mit wetem wan Jos lida taem oli nidim blong oli lidim olgeta long saed blong spirit, o sapos oli gat ol problem blong olgetawan we oli harem i hevi tumas. Long sam kes, maet bae lida i filim Tabu Spirit i toktok blong oli arenjem wan miting wetem wan memba. Oli no leftemap tingting blong ol memba blong kontaktem Ol Jeneral Atoriti from ol problem blong olgetawan (luk long 38.8.25).
Bisop i save givimaot sam long ol miting ia long ol nara lida long wod blong mekem se hem i save spendem moa taem wetem ol yut. Ol memba blong ol presidensi blong Rilif Sosaeti, kworom blong ol elda, mo Yang Woman oli save help bigwan. Be, bisop i no save givimaot ol wok we i nidim responsabiliti blong hem olsem wan jeneral jaj, olsem fasin blong sakem sin long ol series sin.
-
Bisop o wan we hem i givim wok long hem, i mit wetem ol memba we oli gat ol nid long saed blong laef long wol ia (luk long 31.3.4 mo 22.6).
-
Presiden blong kworom blong ol elda i mit wetem wanwan memba blong kworom, wan taem long evri yia. Oli tokbaot gudlaef blong memba ia mo famli blong hem. Oli tokbaot tu ol prishud responsabiliti blong hem. (Luk long 8.3.3.2.)
-
Presiden blong Rilif Sosaeti i mit wetem wanwan memba blong Rilif Sosaeti, wan taem long evri yia. Oli toktok raon long gudlaef blong sista ia mo famli blong hem. (Luk long 9.3.2.2.)
-
Wan memba blong bisoprik i mit wetem wanwan pikinini we i gat 11 yia, taem hem i stap muvaot long Praemeri i go long kworom blong ol dikon o wan Yang Woman klas. Long miting ia, memba blong bisoprik i intaviu tu long ol yang man we bae oli kasem Aronik Prishud (luk long 18.10.2).
-
Wan memba blong bisoprik i mit wetem ol memba we oli stap joenem militeri seves (luk long 38.9.2).
-
Wan memba blong bisoprik i mit wetem wanwan yut tu taem long wan yia (luk long 31.3.1).
-
Wan memba blong bisoprik i mit wetem wanwan yang singgel adalt wan o moa taem evri yia (luk long 31.3.2).
-
Ol memba blong stek presidensi, bisoprik, mo ol nara lida oli mit fulap taem wetem ol lida we oli stap givim seves tru long lidasip blong olgeta (luk long 31.3.3).
Taem ol lida oli mit wetem ol memba, oli folem ol prinsipol insaed long 31.1.
Blong gat moa infomesen we i save help abaot sam topik we i save kam antap taem yu stap mit wetem ol memba, luk long Counseling Resources insaed long Gospel Laebri. Ol lida oli save givim tingting tu long ol memba blong karem infomesen insaed long Laef Help.
31.3.1
Miting wetem Ol Yut
Fasfala mo moa impoten responsabiliti blong bisop, hem i blong helpem jeneresen ia we i stap kam antap insaed long wod blong hem blong progres long saed blong spirit. Wan impoten wei we hem i save mekem hemia hem i taem hem i stap mit wetem wanwan long ol yut (o wetem wan nara adalt we i stap; luk long 31.1.4). Bisop o wan long ol kaonsela blong hem i stap mit wetem wanwan yut tu taem long wan yia. Bisop i mas stap long wan long ol miting ia evri yia. Long stat blong yia we wan yut bae i kasem 16 yia blong hem, bisop nao i mas mekem tugeta miting blong yia ia sapos i posibol.
Antap long ol miting ia, ol yut oli mas filim fri blong kaonsel wetem bisop eni taem we oli nidim blong bisop i lidim olgeta mo sapotem olgeta. Bisop i traehad blong bildim ol rilesensip we i strong mo gat tras wetem ol yut blong mekem se oli filim gud blong stap kaonsel wetem hem.
Presiden blong Ol Yang Woman tu i gat wan responsabiliti blong givhan long wanwan yang woman. Hem i save mekem hemia taem hem i mit wetem wanwan long ol yang woman (o wetem wan nara adalt we i stap; luk long 31.1.4).
Taem oli mit wetem ol yut, ol lida oli folem ol prinsipol insaed long 31.1. Plante long ol prinsipol ia oli impoten taem yu stap mit wetem ol yut.
31.3.1.1
Stap Toktok wetem Ol Papa mo Mama
Ol lida oli wok kolosap wetem ol papa mo mama long ol traehad blong olgeta blong mekem ol yut oli kam strong. Oli lukaot blong sapotem ol papa mo mama long responsabiliti blong olgeta blong stap tijim ol pikinini blong olgeta abaot gospel blong Jisas Kraes.
Ol lida oli serem ol infomesen ia wetem ol yut mo papa mo mama blong olgeta bifo long fas miting blong olgeta.
-
Papa mo mama, tufala i gat fas wok ia blong tijim mo fidim ol pikinini blong tufala.
-
Bisop o wan long ol kaonsela blong hem i stap mit wetem wanwan yut tu taem o moa long wan yia. Presiden blong Ol Yang Woman i save mit wanwan taem wetem wanwan yang woman. Long ol miting ia, ol lida oli save ansarem ol kwestin, givim sapot, givim ol wok, mo tokbaot ol topik we oli mekem lis blong hem insaed long 31.3.1.2.
-
Blong helpem ol yut blong rere long saed blong spirit, i nidim blong gat ol intaviu blong lukluk long ol tabu samting olsem ol tempol rekomen, ol prishud odinesen, mo ol misin koling. Ol lida oli wok wetem papa mo mama blong helpem ol yut blong rere from ol intaviu ia.
-
Ol papa mo mama, tufala i leftemap tingting blong pikinini blong tufala blong oli kaonsel wetem bisop o wan nara lida blong Jos taem oli nidim help blong lidim olgeta long saed blong spirit, o blong oli sakem sin.
-
Taem wan yut i mit wetem wan lida blong Jos, wan papa o mama o wan nara adalt i mas stap wetem hem. Yut i save invaetem wan adalt blong joenem miting o wet aotsaed long rum.
31.3.1.2
Ol Topik blong Tokbaot
Stamba tingting blong ol miting wetem ol yut i blong bildim fet long Papa long Heven mo Jisas Kraes mo helpem yut blong folem Tufala. Ol miting ia oli sapos blong leftemap tingting long ol eksperiens long saed blong spirit. Ol lida oli traehad blong helpem wanwan yut blong filim se oli lavem hem, leftemap tingting, mo kasem insperesen blong kam moa olsem Sevya.
Yut mo lida i save tokbaot:
-
Ol eksperiens long saed blong spirit we i stap bildimap testemoni blong yut abaot Papa long Heven, Jisas Kraes, mo gospel we i kambak.
-
Olsem wanem yut ia i stap kipim ol baptaes kavenan blong hem.
-
Fasin blong yut blong stap rere blong mekem mo kipim ol kavenan blong tempol.
-
Ol gol blong yut blong kam moa olsem Sevya long evri eria blong laef (luk long “Ol Pikinini mo Ol Yut”).
-
Hamas hem i impoten blong stap mekem prea mo skripja stadi blong yuwan mo wetem famli.
-
Olsem wanem blong mekem ol rilesensip wetem papa mo mama mo ol nara memba blong famli i kam moa strong.
-
Ol prinsipol mo standet insaed long buk blong Blong Ol Yut Oli Kam Strong.
-
Ol wei we yut i save tekpat long wok ia blong God blong fasin blong sevem man, mo fasin blong kam olsem wan god (luk long 1.2).
-
Wetem wan yang man, ol eksperiens blong hem blong stap mekem ol prishud wok blong hem mo fasin blong stap rere blong oli odenem hem long nekis ofis blong prishud.
-
Ol blesing blong stap tekpat long seminari.
-
Fasin blong stap rere blong givim seves olsem wan ful-taem misinari (luk long 24.0 mo 24.3). Lod i askem evri yang man we i klin inaf mo i save mekem, blong hem i mas rere from mo givim seves long wan misin. Long ol Lata-dei Sent yang man, misinari seves i wan prishud responsabiliti (luk long Doktrin mo Ol Kavenan 36:1, 4–7). Lod i welkamem tu evri yang woman we i klin inaf mo i save mekem, blong givim seves long wan misin sapos hem i wantem. Long yufala, ol yang woman, wan misin i wan janis we i gat paoa, be, i no wan mas. Blong stap rere from wan misin bae i blesem wan yang woman nomata se hem i disaed blong kam wan misinari o no.
Ol lida oli mas kea long ol tingting mo filing blong olgeta we oli no save givim seves olsem ol fultaem misinari (luk long 24.4.4).
Blong moa infomesen abaot ol seves misin, luk long 24.2.2.
Taem oli tokbaot fasin blong stap obei long olgeta komanmen, ol lida oli save yusum ol intaviu kwestin blong tempol rekomen, mo buk blong Blong Ol Yut Oli Kam Strong. Oli mekemsua se ol storian ia long saed blong stap klin long saed blong seks, oli no mekem se bae yangfala i wantem save moa long saed blong topik ia, o bae i wantem go traem.
31.3.2
Stap Mit wetem Ol Yang Singgel Adalt
Bisop i mekem progres long saed blong spirit blong ol yang singgel adalt long wod blong hem i kam i kam wan nambawan praeoriti. Hem o wan kaonsela we hem i givim wok long hem, i mit wetem wanwan yang singgel adalt wan taem o moa evri yia.
Memba blong bisoprik mo yang singgel adalt wod i save tokbaot ol samting we i nidim blong tokbaot long 31.3.1.2. Oli save tokbaot tu ol narafala samting we i impoten long ol yang adalt, olsem stap developem fasin blong dipen long yuwan.
31.3.3
Stap Mit Wetem Ol Memba blong Tokbaot Ol Koling mo Responsabiliti blong Olgeta
Ol stek presidensi, ol bisoprik mo ol nara lida oli mit wetem wanwan memba we oli ripot i gobak long olgeta abaot ol koling blong olgeta. Eksampol:
-
Stek presiden i mit oltaem wetem wanwan bisop blong stek (luk long 6.2.1.2).
-
Wan memba blong stek presidensi i mit oltaem wetem wanwan presiden blong kworom blong ol elda insaed long stek (luk long 8.3.1).
-
Bisop i mit wetem Rilif Sosaeti presiden evri manis (luk long 9.3.1). Bisop i mit tu, oltaem, wetem presiden blong kworom blong ol elda mo presiden blong Ol Yang Woman (luk long 8.3.1 mo 11.3.1).
-
Wan memba blong bisoprik i mit oltaem wetem presiden blong Praemeri mo Sandei Skul presiden (luk long 12.3.1 mo 13.2.1).
-
Ol memba blong presidensi blong kworom blong ol elda mo Rilif Sosaeti presidensi i mit wetem ol givhan brata mo ol givhan sista (luk long 21.3).
Long ol miting ia, ol lida oli givim insperesen mo givim instraksen long memba we i stap long responsabiliti blong hem. Lida ia i soemaot tangkyu blong hem from seves blong memba mo i leftemap tingting. Memba i ripot long progres mo gudlaef blong ol pipol we hem i stap givim seves long olgeta. Tugeta, oli tokbaot ol gol, ol jalenj mo ol janis. Olsem we i nidim, oli luklukbak tu long ol bajet mo ol samting we oli spendem mane long hem.
31.3.4
Stap Mit Wetem Ol Memba blong Tokbaot Ol Nid blong Laef long Wol Ia mo Fasin blong Stap Dipen long Yuwan
Blong stap kea long olgeta we oli stap long nid i pat blong wok ia blong fasin blong sevem man mo fasin blong kam olsem wan god (luk long 1.2). Taem ol lida oli mit wetem ol memba we oli gat ol nid blong laef long wol ia, oli stap helpem olgeta blong mitim ol nid blong olgeta blong naoia mo bildim fasin blong stap dipen long olgetawan blong wan longfala taem (luk long 22.3).
Bisop i save givim wok long ol narawan long wod, olsem ol presidensi blong Rilif Sosaeti mo kworom blong ol elda, blong mit wetem ol memba we oli gat ol nid blong laef long wol ia. Be, bisop nomo i save apruvum blong oli yusum mane blong fas ofring (luk long 22.6.1).
Oli tokbaot gud sam moa prinsipol mo polisi blong stap helpem olgeta wetem ol nid blong laef blong wol ia insaed long japta 22.
31.3.5
Stap Mit Wetem Ol Memba abaot Mared mo Divos
Ol Jos lida i no mas givim advaes long wan abaot huia blong save maredem. Mo tu, hem i no sapos blong givim kaonsel long wan blong hem i divosem o no divosem hasban o waef blong hem. Nomata we divos i wan stret desisen blong mekem long sam situesen, ol desisen olsem i blong wanwan man o woman.
Folem wanem we Spirit i lidim, ol Jos lida oli mit wetem ol kapol mo wanwan man o woman we oli stap seperet o stap divos. Ol lida oli save lukaot tu blong helpem wan kapol blong mekem mared blong tufala i kam moa strong. Oli tijim olgeta abaot paoa mo hiling we i kam taem oli kipim ol kavenan we oli bin mekem wetem Lod mo stap laef folem ol tijing blong Hem. Ol tijing ia i tekem tu fet, fasin blong sakem sin, fogivnes, lav mo prea.
Wan memba we i seperet long hasban o waef blong hem, o i stap gotru long wan divos, oli no mas deit kasem taem we oda blong divos i kamaot mo i las jajmen folem loa.
31.3.6
Profesonol Kaonseling mo Tritmen
Oli no singaotem ol Jos lida blong kam olsem ol profesonol kaonsela o blong stap givim tritmen. Help we oli givim i long saed blong spirit, we i lukluk fulap blong givim paoa, kamfot, mo paoa blong Jisas Kraes we i pemaot man. Antap long help ia we i impoten mo i kam tru long insperesen, sam memba oli save go kasem sam profesonol kaonseling long ol ples we i gat hemia i stap. Ol kaonseling ia, o tritmen ia, i save helpem ol memba blong oli andastanem, mo blong fesem ol jalenj blong laef long sam wei we i helti.
Blong mit wetem wan profesonol kaonsela blong kasem sam niu tingting mo skil we i givhan blong kontrolem ol tingting mo filing, hem i no wan saen blong wiknes. Be, hem i wan saen blong stap strong, mo blong gat tingting i stap daon.
Ol memba oli mas lukaotgud blong respektem nem blong ol profesonol kaonsela we oli gat ol laesens blong mekem wok ia. Ol kaonsela oli mas respektem fridom blong mekem joes, ol valiu, mo ol bilif blong olgeta we oli stap lukaotem help. Blong tekem ol valiu ia i kam insaed long wok blong olgeta, i wan stret fasin blong wok long profesonol kaonseling.
Taem ol memba oli stap wantem ol kaonsel abaot fasin blong gat seks bitwin hasban mo waef, ol bisop i save lidim olgeta i go long ol profesonol we i wok blong olgeta blong givim kaonsel mo ol bilif mo praktis blong olgeta i semmak wetem doktrin blong Jos.
Jos i agensem eni tritmen, wetem ol tritmen, o ol tritmen we i hapen oltaem long saed blong jenisim tingting blong wan long saed blong seks, o jenda aedentiti, we i mekem se wan i stap folem ol abius praktis. (Luk long “Filing long Wan we I Sem Seks” mo “Ol Man o Woman we oli Transjenda” insaed long Laef Help.)
Long Yunaeted Stet mo Kanada, ol bisop mo ol stek presiden oli save kontaktem Famli Seves blong faenemaot ol risos we oli stap blong givim kaen kaonseling ia we i go wetem ol prinsipol blong gospel. Ol kontak infomesen ia, oli givim olgeta andanit ia.
1-801-240-1711
1-800-453-3860, ekstensen 2-1711
FamilyServices.ChurchofJesusChrist.org
Long sam nara eria, ol lida oli save kontaktem ol wokman blong Famli Seves, o maneja blong welfea mo indipenden laef; hemia oli mekem tru long eria ofis blong olgeta.
Sapos ol memba oli no save pem profesonol kaonseling olgetawan, o tru long insurens, ol bisop oli save yusum fas ofring blong help long saed ia (luk long 22.4).
31.4
Stap Mit wetem Ol Memba Onlaen
Plante taem, ol lida oli stap mit fes tu fes wetem ol memba blong intaviu mo givim help long saed blong spirit mo givhan. Be, olsem wan eksepsen, oli save mit onlaen taem hem i no stret blong mit fes tu fes. Eksampol, wan memba i save mit onlaen wetem wan lida taem memba ia i:
-
Stap laef long wan ples we i longwe, o oli no gat janis blong kasem transpot o travel.
-
Gat ol jalenj blong helt long bodi, tingting, o filing.
-
Stap lukaot long wan man we mas stap long haos nomo mo i no save stap hemwan.
Ol intaviu bitwin ol misin presiden mo ol fultaem misinari tu, oli save mekem onlaen taem oli apruvum.
Oli no mas rekodem ol intaviu mo ol narafala miting bitwin ol lida mo memba.
Olsem ol fes tu fes intaviu mo miting, memba i save invaetem wan nara man blong i stap long taem blong onlaen intaviu o miting.
Taem oli mekem wan intaviu blong wan tempol rekomen onlaen, oli save sendem niu tempol rekomen i go long memba afta we ol prishud lida i saenem. Be, stek klak i no mas aktivetem rekomen ia kasem taem hem i jekem bakegen se memba ia i bin kasem.