22. Stap Lukluk long Ol Nid blong Laef long Wol Ia mo Stap Bildim Fasin blong Stap Dipen long Yuwan
“22. Stap Lukluk long Ol Nid blong Laef long Wol Ia mo Stap Bildim Fasin blong Stap Dipen long Yuwan,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“22. Stap Lukluk long Ol Nid blong Laef long Wol Ia mo Stap Bildim Fasin blong Stap Dipen long Yuwan” Jeneral Hanbuk.
Pikja
man i stap wok
22.
Stap Lukluk long Ol Nid blong Laef long Wol Ia mo Stap Bildim Fasin blong Stap Dipen long Yuwan
22.0
Fas Toktok
Ol memba blong Jos oli bin mekem kavenan “blong karem ol hevi samting blong wanwan long yufala, blong mekem se oli nomo hevi …, mo leftemap tingting blong olgeta we oli nidim fasin blong leftemap tingting” (Mosaea 18:8–9). Blong stap kea long olgeta we oli stap long nid blong laef long wol ia, i pat blong wok blong God blong fasin blong sevem man mo fasin blong kam olsem wan god (luk long 1.2). Responsabiliti ia, i blong evri memba blong Jos taem oli stap givgivhan long wanwan long olgeta.
Ol memba blong Jos oli kasem kaonsel tu blong oli kam strong moa blong stap dipen long olgetawan tru long fasin blong wok strong wetem strong tingting, mo wetem help blong Lod. Indipenden laef, o fasin blong dipen long yuwan, hem i paoa, komitmen, hadwok blong lukluk long ol samting long saed blong wol mo long saed blong spirit we yumiwan mo famli i nidim long laef. Taem ol memba oli kam moa blong dipen long olgetawan, bae oli stap long wan ples we oli save helpem moa ol narawan.
OL HADWOK BLONG WANWAN MAN, WOMAN MO FAMLI
22.1
Stap Bildim Wan Indipenden Laef
Wetem help blong Lod, ol memba oli stap bildimap wan indipenden laef long olgeta wei ia:
Stap developem paoa long saed blong spirit, bodi, mo filing.
Kasem wan edukesen mo wan wok.
Kam antap long fasin blong stap rere from laef ia long wol.
22.1.1
Paoa long Saed blong Spirit
Lod i bin talem se: “long mi, evri samting oli long saed blong spirit, mo i no gat wan taem we mi givim wan loa long yufala we i blong laef ia nomo” (Doktrin mo Ol Kavenan 29:34). Ol memba oli developem paoa long saed blong spirit taem oli stap mekem ol samting ia:
Praktisim fet long Kraes.
Prea.
Livim kakae.
Stadi long ol skripja mo ol toktok blong ol profet we oli stap laef.
Obei long olgeta komanmen.
Stap long sakramen miting mo ol nara miting blong Jos.
Givim seves long ol narawan.
Tekpat long ol tabu odinens mo traehad blong kipim ol kavenan we oli go wetem.
Taem we ol memba oli stap mekem olgeta samting ia, Tabu Spirit i soem rod long olgeta long wei blong folem blong stretem ol problem blong olgeta, mo givhan long ol narawan long ol wei we i wok.
22.1.2
Helt blong Bodi mo blong Filing
Papa long Heven i wantem ol pikinini blong Hem blong oli kam antap blong developem paoa long saed blong bodi mo long saed blong spirit. Hemia i tekem tu blong mekem olgeta samting ia:
Traehad blong kakae ol gudfala kaekae, mekem spot o eksasaes evri taem, mo yu mas slip inaf.
Stap longwe long ol samting mo ol fasin we oli save spolem yu, o mekem se yu yu nomo save lego olgeta.
Praktisim fasin blong kipim bodi i klin, mo kasem stret kea blong helt.
Developem mo gat ol rilesensip we oli strong moa wetem ol famli mo ol narawan.
Lanem blong lukaotem fasin blong gat tingting i fasfas.
Lukaotem help taem i gat jalenj long tingting mo filing, olsem we i nid blong mekem.
Pikja
wan kapol i stap ronron
22.1.3
Edukesen mo Wok
Sevya i bin tijim se “glori blong God, hem i waes” (Doktrin mo Ol Kavenan 93:36). Mo tu, Hem i tijim se: “lukaotem blong lanem samting, tru long stadi, mo tu, tru long fet” (Doktrin mo Ol Kavenan 88:118; luk tu long 130:18). Trening long saed blong edukesen mo blong wok, i save lidim ol memba blong kasem wan wok we i gud moa, blong mekem se oli save lukluk long ol nid blong olgetawan mo blong famli blong olgeta.
Blong stap developem paoa blong wok bambae i helpem ol memba blong givim samting long famli blong olgeta, long Jos, mo long wol. Ol memba oli kasem kaonsel blong oli wokhad, mo blong oli ones long evri samting we oli mekem.
22.1.4
Rere from Laef long Wol Ia
Ol skripja oli tijim hamas i impoten blong stap rere (luk long Esikel 38:7; Doktrin mo Ol Kavenan 38:30). Oli givim kaonsel long ol memba blong oli kam blong mas rere blong oli save lukaotgud long olgetawan, ol famli blong olgeta, mo long ol narawan long ol taem blong nid.
Ol memba oli rere moa long saed blong faenens taem oli:
Stap katemaot mo stap longwe long kaon, kasem hamas we i posibol.
Stap rere mo stap laef insaed long wan bajet.
Sevem mane blong wan fiuja taem.
Kasem wan edukesen we i inaf mo i stret blong helpem olgeta blong lukaot long olgetawan, mo lukaot long ol famli blong olgeta (luk long 22.3.3).
Blong stap rere, i tekem tu blong mekem wan plan long wei blong lukluk long ol besik nid long taem blong wan imejensi. Oli leftemap tingting blong ol memba blong oli bildim wan saplae blong kaekae, wota, mo ol nara samting we i nid, we bae i inaf blong stap blong wan sot taem, mo tu, blong wan longtaem.
Givhan long Olgeta wetem Ol Nid blong Laef long Wol Ia mo Ol Nid long Filing
Lod i tijim ol disaepol blong Hem blong oli “lavem wanwan long olgeta, mo blong wok blong wanwan long olgeta,” mo blong “helpem olgeta we oli nidim help” (Mosaea 4:15–16). Ol memba oli traehad blong luk ol narawan olsem we Sevya i stap luk olgeta, blong oli andastanem ol paoa mo ol nid we i blong olgeta nomo. Taem oli mekem olsem, ol memba bae oli kasem insperesen blong save olsem wanem blong givhan long olgeta we oli gat ol nid long saed blong laef long wol ia, mo long saed blong filing blong olgeta. Ol nid ia, i save gat, kaekae, klos, haos, edukesen, wok, helt blong bodi, mo stap gud long filing.
22.2.1
Stoahaos blong Lod
Sevya i tijim: “givim sam samting blong yufala long olgeta we oli pua, … bae yufala i putum olgeta samting ia i stap long fored blong bisop blong jos blong mi, … bae jos i mas putum i stap insaed long stoahaos blong mi, blong oli givim i go long olgeta we oli pua mo olgeta we oli stap long nid” (Doktrin mo Ol Kavenan 42:31, 34). Evri risos we oli stap long Jos blong helpem olgeta we oli gat ol nid long saed blong laef long wol ia, oli singaotem stoahaos blong Lod (luk long Doktrin mo Ol Kavenan 82:18–19). Hemia i tekem ol ofring blong ol memba we oli givim taem, talen, lav mo sore, ol samting, mo ol mane blong helpem olgeta we oli stap long nid.
Stoahaos blong Lod i stap long wanwan wod mo stek. Plante taem, ol lida oli save helpem wanwan man, woman mo famli blong oli faenem wan ansa long ol nid blong olgeta taem oli yusum bigwan, save, skil, mo seves we ol memba blong wod, mo stek, oli gat blong givim.
Aotsaed long ol risos we oli stap insaed long stoahaos blong Lod, ol memba oli save kasem help we oli nidim tru long gavman mo ol risos blong komuniti (luk long 22.12).
Pikja
woman we i kasem kaekae i go long wan man
22.2.2
Loa blong Livim Kakae mo Ol Fast Ofring
Lod i putum loa blong livim kakae wetem fast ofring blong blesem ol pipol blong Hem mo blong givim wan wei long olgeta blong givim seves long olgeta we oli nidim help. Loa blong livim kakae, i blesem tugeta, olgeta we oli givim, mo olgeta we oli kasem. Ol memba oli kam kolosap moa long Lod, mo oli kam antap moa long paoa long saed blong spirit taem oli stap laef folem loa blong livim kakae. Oli mekem tu se oli kam blong kam moa indipenden, mo oli developem moa bigfala lav mo sore long ol man. (Luk long Aesea 58:6–12; Malakae 3:8–12.)
Fasin blong livim kakae, bae oli save mekem long eni taem. Be, plante taem ol memba oli stap tekem se, fasfala Sabat blong manis, hem i dei blong livim kakae. Long wan dei blong livim kakae, i gat olgeta samting ia:
Fasin blong stap prea
Fasin blong no kakae mo dring blong 24 aoa taem (sapos wan i strong long bodi blong mekem)
Givim wan fast ofring we i bigwan
Wan fast ofring, i wan donesen we oli givim blong helpem olgeta we oli stap long nid. Taem we ol memba oli livim kakae, oli stap invaetem olgeta blong givim wan ofring we, plante taem, i semmak long mane we wan bae i spendem long ol kaekae we hem i no bin kaekae. Oli leftemap tingting blong ol memba blong oli gat bigfala hat mo blong oli givim moa bitim amaon blong mane blong tufala kaekae ia, sapos oli save mekem.
Ol memba oli givim fast ofring blong olgeta wetem wan fom blong Taeting mo Ol Narafala Ofring, i go long bisop o wan long ol kaonsela blong hem. Long samfala ples, oli save mekem tu onlaen donesen. Long samfala wod, bisop i save givim raet blong olgeta we oli holem Aronik Prishud blong oli kolektem ol fast ofring (luk long 34.3.2).
22.2.3
Seves
Ol memba oli lukaot blong givim seves long ol narawan semmak olsem we Sevya i bin mekem (luk long Jon 13:35). Oli traehad blong oli kam blong savegud ol paoa mo ol nid blong wanwan long olgeta. Oli givhan long wanwan long olgeta wetem lav mo andastaning.
Wod, stek, o komuniti i save kodinetem ol seves ia. Long ol ples we i gat JustServe.org long hem, ol memba mo ol narawan oli save yusum blong faenemaot ol janis blong givim seves long komuniti. Ol memba mo ol narawan oli save givim tu sam disasta help o komuniti seves tru long ol projek we Jos i sponsarem.
22.2.4
Yumaniterian Help
Jos i givim yumaniterian help raon long wol. Jos i mekem hemia long wan daerek wei, mo taem oli wok wetem ol nara oganaesesen blong help. Oli givim help ia i nomata long kala blong skin, relijin o sitisensip.
Ol memba mo ol narawan we oli wantem givim sapot oli save givim donesen long Jos Yumaniterian help. Ol memba oli save givim donesen blong olgeta mo wan Taeting mo Ol Nara Ofring fom i go long bisop, o wan long ol kaonsela blong hem. Long samfala ples, oli save mekem tu onlaen donesen.
OL HADWOK BLONG OL LIDA
22.3
Paten blong Stap Bildim Wan Indipenden Laef mo Givhan long Olgeta we Oli Stap long Nid
Ol lida blong Jos oli ripresentem Sevya taem oli stap kea long olgeta we oli gat nid long saed blong laef long wol ia mo long saed blong ol filing (luk long 22.3.4). Taem oli mekem olsem, oli traehad blong helpem ol memba blong mekem se oli kam strong moa blong gat wan indipenden laef.
Ol lida oli lukaotem blong Tabu Spirit i lidim olgeta blong oli save help wetem fasin blong lukaotgud mo wetem lav mo sore. Paten ia nao bae i helpem ol lida blong lukluk long ol nid blong ol memba long wan wei we i bildimap wan indipenden laef.
Lukaotem olgeta we oli stap long nid.
Helpem olgeta blong skelem mo lukluk long ol kwik nid.
Helpem olgeta blong bildim wan indipenden laef.
Givhan long olgeta we oli gat nid long saed blong filing.
22.3.1
Lukaotem Olgeta we Oli Stap long Nid
Bisop i gat wan tabu responsabiliti blong lukaotem mo kea long olgeta we oli stap long nid (luk long Doktrin mo Ol Kavenan 84:112). Ol narawan we oli plei wan impoten rol blong stap helpem bisop wetem responsabiliti ia, i gat:
Ol givhan brata mo sista.
Presidensi blong Rilif Sosaeti mo hemia blong kworom blong ol elda.
Ol kaonsela blong bisop.
Ol nara memba blong wod kaonsel.
Olsem we i nid, bisoprik i save singaotem ol speselis long wod long saed blong welfea mo indipenden laef, blong oli sapotem ol hadwok ia (luk long 22.6.4).
Long wan spirit blong lav mo wari, ol lida blong wod mo olgeta we oli givim seves, oli faenemaot huia ol memba we oli nidim help. I no inaf blong stap help nomo taem man i askem. Ol lida oli mas kaonsel wetem ol givhan brata mo sista blong meksua se ol memba we oli stap long nid oli kasem wan kea we i stret.
22.3.2
Helpem Ol Memba blong Oli Skelem mo Lukluk long Ol Nid we Oli blong Sot Taem
Ol memba oli traehad blong lukluk long ol besik nid blong olgeta tru long ol hadwok blong olgetawan mo help we i kam long ol famli. Taem hemia i no inaf, ol memba oli maet nidim help long ol nara ples olsem:
Gavman mo ol risos blong komuniti (luk long 22.12).
Help blong Jos
Help blong Jos i save tekem help blong ol nid we oli blong sot taem, olsem kaekae, ol samting blong kipim bodi i klin, klos, haos, mo ol nara besik samting. Ol bisop oli save yusum ol fast ofring blong lukluk long ol nid ia. Long sam ples we bisop i save yusum wan fom blong oda, plante taem bisop i yusum hemia blong givim kaekae mo ol besik samting (luk long “Fom blong Bisop i Putum Oda o Givim Nem” insaed long Risos blong Ol Lida mo Klak [RLK]).
Taem oli stap givim help blong Jos, ol lida oli folem ol prinsipol mo ol polisi we oli putum long ol seksen 22.4 mo 22.5.
22.3.3
Helpem Ol Memba blong Bildimap Wan Indipenden Laef blong Wan Longfala Taem
Maet ol memba oli nidim sapot we i gogohed blong lukluk long ol jalenj we bae i tekem longtaem blong stretem. Edukesen, vokesenol trening, o ol nara risos oli save helpem olgeta blong bildim wan indipenden laef, mo lukluk long ol nid blong olgeta we i save stap longtaem. Ol lida blong Rilif Sosaeti mo kworom blong ol elda, ol givhan brata mo sista, mo ol narawan oli save helpem ol memba blong save yusum olgeta risos ia.
Indipenden Laef Plan i helpem ol memba blong oli faenemaot wanem we oli gat paoa blong mekem mo ol nid blong olgeta. Hem i help tu blong faenemaot ol risos we oli save mekyus long olgeta. Plan ia, oli sapos blong yusum evri taem we i gat lukluk blong yusum help blong Jos. Bisop i save givim wok long ol lida blong Rilif Sosaeti, ol lida blong kworom blong ol elda, ol givhan brata mo sista, o ol narawan blong helpem ol memba blong fulumap plan ia.
Olsem pat blong plan blong dipen long olgetawan, ol lida oli save talem blong ol memba oli tekempat long wan indipenden laef grup. Olgeta grup ia, oli helpem olgeta blong developem ol skil mo risos blong oli save gat wan edukesen we i moa gud, wan wok we i moa gud, mo fasin blong lukaotem mane we i moa gud (luk long 22.13). Ol grup, plante taem ol stek mo wod kaonsel nao oli oganaesem olgeta (luk long 22.10.2, 22.7).
Bisop, o wan nara lida we hem i givim wok ia long hem, i yusum Gaed blong Bisop long saed blong Plan blong Indipenden Laef taem hem i stap givim help. Fom ia, hem i helpem ol lida blong folemap progres blong ol memba long saed blong wok blong olgeta blong gat wan indipenden laef.
22.3.4
Givhan long Olgeta we Oli Gat Nid long Saed blong Filing
Plante long ol memba oli gotru ol jalenj long saed blong filing. Ol givhan brata mo sista mo ol lida blong wod oli save stap olsem wan ki blong stap helpem ol memba wetem ol jalenj ia.
Wan we i gat hadtaem wetem ol jalenj long saed blong filing i save spolem tu ol memba blong famli blong hem. Ol lida blong wod oli mas lisingud long ol nid blong ol memba blong famli, speseli ol waef o ol hasban. Ol lida oli givim sapot, mo oli andastanem olgeta.
Jos i givim “Ol Kaonseling Risos” blong helpem ol lida blong oli sapotem ol memba long saed blong plante problem long saed blong filing, mo long saed blong sosol laef. I gat sam moa risos we ol memba oli save yusum, mo sam oli olgeta ia:
Ol bisop oli save toktok long ol wokman blong Famli Seves blong oli andastanem moa ol jalenj blong filing we wan memba i save gat, mo i faenemaot ol risos mo seves we oli rere i stap blong stap yusum olgeta. Ol stek o misin presiden oli save toktok wetem Famli Seves. Folem storian ia, ol wokman blong Famli Seves oli save helpem ol lida blong skelem se wan memba we i gat bigfala jalenj long saed blong tingting mo long saed blong sosol laef blong hem, i nidim blong kasem profesonol kaonseling o nogat. Ol lida ia oli save askem blong save storian taem oli kontaktem Famli Seves ofis, o welfea mo indipenden laef maneja blong olgeta. Luk long 31.3.6 blong kasem kontak infomesen.
Ol bisop oli save sendem ol memba we oli nidim kaonseling i go long wan profesonol blong Famli Seves, long ol ples we i gat i stap. Blong mekem olsem, oli yusum wan oda fom blong bisop blong yusum ol seves ia (luk long “Fom blong Bisop i Putum Oda o Givim Nem” insaed long RLK). Olsem we i nid, ol memba oli save askem help blong ol gudfala profesonol kaonsela insaed long komuniti.
Samtaem, ol bisop oli givim advaes long ol memba we oli nidim help blong sakem wan fasin o aksen we i wan sin. Aksen o fasin ia, i tekem tu ol sin we oli joen i go wetem ol adiksen, o ol fasin we oli kamaot long adiksen. Long ol situesen ia, ol bisop oli mas lukluk i go long ol gaedlaen ia long 32.8.1 mo 32.8.2.
Pikja
wan kapol i stap lukluk long sam pepa
22.4
Ol Prinsipol blong Givim Help blong Jos
Wetem help blong Lod, ol memba oli lukaot blong lukluk long olgetawan nomo, mo lukaot long ol famli blong olgeta. Oli leftemap tingting blong ol famli blong help olsem we i nidim. Taem ol memba oli nidim moa help, oli save go long ol nara ples olsem:
Gavman mo ol risos blong komuniti (luk long 22.12).
Help blong Jos tru long ol fast ofring o oda blong bisop long saed blong kaekae mo ol nara besik samting (luk long 22.3. 2).
Tingting biaen long fasin blong Jos i helpem ol memba, hem i blong developem fasin blong stap indipenden, be i no blong stap dipen. Eni help we oli givim, i blong helpem ol memba blong wok strong moa blong hadwok blong kam blong dipen long olgetawan.
Taem oli stap givim help we i kam long Jos, ol lida oli stap folem ol prinsipol we oli stap long ol seksen 22.4.1 i go kasem 22.4.5. Oli leftemap tingting blong ol bisop mo ol klak blong luklukbak long vidio we i stap long “Ol Tabu Mane, Ol Tabu Responsabiliti.”
22.4.1
Leftemap Tingting blong Wan i Tekem Responsabiliti blong Hemwan mo Responsabiliti blong Famli blong Hem
Ol lida oli tijim se wanwan man, woman, mo famli oli gat fasfala responsabiliti ia blong lukluk long gudlaef blong olgetawan long saed blong laef long wol ia, long saed blong tingting, mo long saed blong spirit. Taem oli stap laef folem ol prinsipol blong indipenden laef, ol memba bae oli stap long wan moa gud ples blong stretem ol nid blong olgeta, olgetawan bakegen (luk long 22.1).
Bifo hem i givim help blong Jos, bisop, (o wan nara lida o memba we hem i givim wok ia long hem) i luklukbak wetem ol memba, long wanem risos oli stap yusum blong lukluk long stret nid blong olgeta. Man o woman ia i save givim tingting blong gat ol nara risos blong ol memba oli tingting long hem, mo i save tekem tu ol risos insaed long gavman o komuniti (luk long 22.12).
22.4.2
Givim Help blong Sot Taem blong Lukluk long saed blong Ol Nid we i Nid
Gol blong Jos i help, i blong lukluk, blong sot taem, long ol besik nid long semtaem we ol memba oli traehad blong oli kam blong dipen long olgetawan. Ol help blong fas ofring, plante taem oli yusum blong pem ol samting we i nid, olsem kaekae mo klos. Be, oli save yusum tu blong pem blong putum ruf antap long hed, o blong pem ol bil blong lektrisiti mo wota. Oli save yusum tu blong pem sam seves, olsem kaonseling, medikol kea, mo skil trening we i blong sot taem.
Ol help blong Jos i blong help blong sapotem laef—i no blong holemtaet wan kaen laefstael. Maet ol memba oli nid blong sapotem mo gat andastaning taem oli wok blong daonem o katemaot ol mane we oli stap spendem blong save lukluk moa long ol stret nid blong olgeta.
Ol bisop oli mas gat gudfala jajmen, o oli skelem gud ol samting, mo oli lukaotem daereksen long saed blong spirit taem oli stap lukluk long hamas help bae oli givim, mo kasem wetaem bae oli help. Oli mas gat lav mo sore, mo oli mas gat open hat; mo long semtaem, oli no mas mekem memba i stap dipen.
22.4.3
Givim Risos o Seves be I No Kas Mane
Sapos i posibol, bisop i no givim eni kas mane. Be, hem i mas yusum ol fas ofring o oda blong bisop blong givim ol kaekae mo lektrisiti, gas mo wota long ol memba. Ol memba oli save yusum mane blong olgeta blong pem ol nara samting we oli nidim.
Taem we hemia i no inaf, bisop i save help taem hem i yusum fas ofring blong pem ol mein bil we i nid blong pem, blong wan sot taem (luk long 22.5.2). Sapos i posibol, oli sendem ol peimen ia i go stret long kampani o man we i givim seves ia (luk long 22.5.3).
22.4.4
Givim Janis blong Wok o Givim Seves
Ol bisop oli invaetem olgeta we oli kasem help blong mekem wok o seves folem paoa blong olgeta from ol samting ia we oli stap kasem. Hemia i helpem ol memba blong oli gat gud tingting abaot olgetawan. Mo tu, i mekem se oli gat moa paoa blong oli save dipen long olgetawan. Long ol ples we i gat JustServe.org long hem, oli save yusum blong faenemaot ol janis blong givim seves long komuniti.
Sam memba, we oli olfala o oli gat disabiliti, i gat sam wok o seves we oli no save mekem. Ol lida oli mas andastanem situesen blong olgeta, mo oli givim sam nara rod blong letem olgeta blong mekem wanem oli save mekem folem situesen blong olgeta.
22.4.5
Kipim Ol Infomesen Abaot Ol Help blong Jos Oli Konfidensiol
Bisop mo ol nara lida blong wod oli kipim eni infomesen oli konfidensiol i stap abaot ol memba we oli nidim Jos help. Hemia i help blong protektem laef blong ol memba i praevet mo blong helpem ol memba blong gat gud tingting abaot olgetawan. (Luk long 31.3.)
Ol memba we oli kasem help, oli mas luksave se ol fas ofring mo oda blong bisop, i wan tabu samting. Oli mas tekem se eni help we oli kasem, i mas stap konfidensiol mo gat respek.
Samtaem, bae i save helpem wod kaonsel o ol narawan blong oli save abaot ol nid blong wanwan man, woman, o famli. Wan eksampol i taem wan memba i stap lukaotem wan wok. Long ol kes olsem, bisop mo ol nara lida, plante taem oli askem raet blong memba blong serem infomesen olsem.
22.5
Ol Polisi blong Givim Help blong Jos
Ol lida blong Jos oli mas save ol polisi abaot seksen ia taem oli stap givim help tru long ol fas ofring o tru long ol oda blong bisop long saed blong kaekae mo ol nara besik kaekae.
22.5.1
Ol Polisi long saed blong Olgeta we Oli Kasem Help blong Jos
22.5.1.1
Help i Go long Ol Memba blong Wod
Plante taem, ol memba we oli kasem ol help blong Jos oli mas laef insaed long ol baondri blong wod, mo oli mas gat membasip rekod blong olgeta insaed long wod. Oli save givim help i nomata se memba ia i go long ol miting blong Jos oltaem, o sapos oli stap folem o no folem ol standet blong Jos.
Sapos wan memba i jes muv i kam insaed long wod, bisop i kontaktem bisop blong las wod we memba i bin stap long hem, mo i toktok raon long situesen blong man o woman ia bifo hem i givim help. Mo tu, ol bisop oli save luklukbak long eni help we Jos i bin givim long ol las tri yia insaed long “Faenens” seksen blong RLK.
22.5.1.2
Ol Help we Oli Go long Ol Bisop mo Ol Stek Presiden
Wanwan taem, wan bisop, o wan memba blong stret famli blong hem, we i stap long sem wod i save nidim help blong Jos. Taem we hemia i hapen, bisop i luklukbak long ol nid, mo help we bae hem i nidim, mo i tokbaot wetem stek presiden. I nid blong gat apruvol long raeting, we i kam long stek presiden, bifo wan bisop i save yusum fas ofring, o bifo hem i apruvum wan oda blong bisop we i stap long nem blong hemwan o famli blong hem.
Sapos oli stap yusum ol mane blong fas ofring, stek presiden i luklukbak long ol bil mo ol nara mane we oli spendem bifo oli mekem peimen. Bisop i no save apruvum wan peimen we i blong hemwan o blong famli blong hem.
Bisop i no save apruvum wan peimen we i blong hemwan o blong famli blong hem. Bisop i folem ol semfala prinsipol mo gaedlaen blong help we i kam long Jos, olsem we bae hem i mekem blong eni nara memba. Be, taem bisop i apruvum rikwes ia, stek presiden i mas sendem i go long Eria Presidensi. Stek presiden mo bisop i wet se wan memba blong Eria Presidensi i apruvum long raeting bifo peimen o oda i gohed. (Sapos wan distrik presiden i nidim help, i moa gud blong misin presiden i apruvum bitim blong Eria Presidensi i apruvum.)
22.5.1.3
Help blong Ol Memba we Oli Stap blong Sot Taem o Oli No Gat Hom
Ol bisop oli save helpem ol memba we oli stap blong sot taem, o oli no gat hom. Be, oli luklukgud long wanem kaen help mo hamas help oli stap givim. Oli leftemap tingting blong olgeta blong oli toktok wetem bisop blong wod we man o woman ia i bin stap long hem, bifo oli givim help.
Plante taem, ol bisop oli stap invaetem ol memba we oli stap blong sot taem, o oli no gat hom, mo oli kasem help blong Jos, blong oli akseptem ol janis blong mekem wok o givim seves. Ol bisop oli save sendem olgeta memba ia i go long ol komuniti risos we oli gat evri samting blong lukluk long ol nid blong olgeta.
Folem nid we i stap, wan stek presiden i save jusum wan bisop blong handelem evri rikwes insaed long wan stek, we oli kam long ol pipol we oli stap blong sot taem, o oli no gat haos. Long samfala eria we i gat fulap stek wetem bigfala namba blong ol pipol we oli stap pas blong sot taem o oli no gat hom mo stap askem help. Long ol situesen olsem, Eria Presidensi i save singaotem wan Jos Seves Misinari blong handelem ol kaen rikwes olsem. Man ia, hem i mas stap olsem wan bisop bifo.
22.5.1.4
Help blong Ol Memba we Oli No Memba blong Jos
Olgeta man mo woman we oli no memba blong Jos, plante taem oli sendem olgeta i go long ol risos blong lokol komuniti, sapos oli nidim help. Bae wanwan taem nomo, olsem we Spirit i talem long hem, bisop i save helpem olgeta wetem fas ofring, o wan oda blong bisop. Eksampol: bisop i save tingting blong helpem ol papa mo mama, o sam keateka, we oli no memba, be oli gat wan, o moa long wan pikinini we oli memba.
22.5.2
Ol Polisi blong Stap Yusum Ol Fast Ofring
22.5.2.1
Ol Medikol mo Ol Nara Helt Kea
Wanwan eria blong Jos i gat ol limit amaon, we oli apruvum, blong yusum fas ofring blong pem spending long saed blong medikol, tut, o mentol helt. Ol limit ia, Eria Presidensi nao i rekomendem. Welfea blong Jos mo Eksekutiv Komiti blong Indipenden Laef, oli apruvum olgeta. Ol limit ia, oli defdefren folem ol rijin o kantri insaed long wan eria.
Taem we ol bisop oli yusum fast ofring blong help blong pem eni kea long saed blong medikol, tut, o mentol helt, oli no mas ova long ol limit ia sapos i no gat stret apruvol fastaem. Long saed blong ol amaon mo gaedlaen blong apruvum, luk long “Yus blong Fas Ofring blong Pem Medikol Bil.”
22.5.2.2
Kaon long Stoa mo Kaon blong Bisnis o Invesmen we I Brokdaon
Oli no save yusum fast ofring blong pem ol kaon long stoa blong pem samting, olsem kaon blong kredit kad, o lon blong olgetawan. Mo tu, oli no save yusum fast ofring blong pem mane we wan i gat kaon long hem from bisnis o invesmen i brokdaon.
22.5.2.3
Pembak Ol Fast Ofring
Ol memba oli no nid blong pembak eni help we oli kasem aot long help blong fast ofring we oli kasem long Jos.
22.5.2.4
Wod Fast Ofring -Amaon blong Mane blong Spendem
Ol bisop oli no mas limitim help blong fast ofring i go long ol memba blong wod folem amaon blong donesen we wod i stap kasem.
22.5.3
Ol Polisi long Saed blong Mekem Ol Peimen
Sapos i posibol, oli mekem ol peimen i go stret long ol bisnis we oli givim ol samting o ol seves. Plante taem, oli no stap mekem peimen i go long man o woman we i kasem help.
Ol memba mo klak blong bisoprik oli folem ol faenens fasin blong wok we oli stap long 34.5.7 taem we:
Oli stap rere long wan jek.
Oli stap rere long wan peimen onlaen.
Oli stap widro (karemaot) kas mane blong mekem wan fast ofring peimen.
22.5.4
Ol Polisi long saed blong Ol Peimen we bae I Go long Bisop o Stek Presiden
Taem we hem i stap givim help wetem fast ofring i go long ol memba, wan bisop i no save yusum mane ia blong pem sam samting o seves long wan wei we bae i helpem hemwan bakegen. Eni eksepsen, bae i nidim apruvol blong stek presiden. Eksampol: sapos bisop i gat wan haos blong rentemaot, mo memba ia i stap long haos ia, hem i no save yusum fast ofring blong pemaot rent ia blong memba; be stek presiden i mas givim apruvol faswan. Bae oli folem semfala polisi sapos oli yusum fast ofring blong pem kaekae blong wan memba long wan stoa we bisop nao i ona long hem.
Sapos wan fast ofring peimen blong wan memba bae i benefitim stek presiden, o wan bisnis we hem nao i ona, bae Eria Presidensi bae i mas apruvum fastaem. Taem we bisop i apruvum peimen ia, stek presiden i sendem rikwes i go long Eria Presidensi. Stek presiden mo bisop i wet long apruvol long raeting we bae i kam long wan memba blong Eria Presidensi bifo hem i mekem peimen ia.
22.5.5
Stap Protektem Man Agensem Rong Fasin blong Yusum Mane
Ol bisoprik mo ol klak oli mas protektem fasin blong no yusum gud mane blong fas ofring. Long saed blong ol kwestin mo ol ripot blong abius blong help blong Jos, o giaman fasin blong yusum mane, ol memba blong bisoprik o ol klak long Yunaeted Stet mo Kanada oli save ringim help laen long 1-800-453-3860, ekstensen 2-7887. Ol memba blong bisoprik o klak aotsaed long Yunaeted Stet mo Kanada, oli kontaktem eria ofis.
22.6
Rol blong Ol Lida blong Wod
22.6.1
Bisop mo Ol Kaonsela blong Hem
Bisop i gat tabu wok ia blong lukaotem mo kea long olgeta we oli gat nid long laef ia (luk long Doktrin mo Ol Kavenan 84:112). Hem i givimaot plante long wok ia i go long presidensi blong Rilif Sosaeti mo hemia blong kworom blong ol elda. Be, samfala diuti, bisop nomo i save mekem. Eksampol. Bisop:
I talemaot wanem kaen help, amaon blong help, mo kasem wetaem bae hem i givim help.
I apruvum ol help blong fast ofring (luk long 22.4 mo 22.5) mo oda blong bisop long saed blong kaekae mo ol nara besik samting (luk long 22.13).
Bisop mo ol kaonsela blong hem, oli gat olgeta responsabiliti ia:
Oli tijim ol prinsipol mo ol blesing we oli go wetem wok blong (1) stap kea long olgeta blong oli gat ol nid long saed blong laef ia mo ol nid long saed blong tingting, mo (2) oli bildimap fasin blong gat indipenden laef (luk long 22.1). Hemia i tekem tu fasin blong wan i stap rere long hemwan, mo mekem famli i rere.
Oli tijim ol memba mo oli leftemap tingting blong ol memba blong save long saed blong loa blong livim kakae, mo pem wan gudfala amaon blong mane i go long fast ofring (luk long 22.2.2).
Lukluk long wok blong putum tugeta mo kaontem ol fast ofring (luk long 34.3.2).
Olsem presidensi blong Aronik Prishud, bisoprik i lukluk ova ol hadwok ia blong kworom blong Aronik Prishud, mo ol klas blong Ol Yang Woman blong oli givim seves long olgeta we oli gat nid long laef ia, we oli stap insaed long wod mo komuniti 10.2.2 mo 11.2.2). Ol hadwok ia, oli stap kodinetem olgeta insaed long ol wod yut kaonsel miting (luk long 22.8) mo insaed long ol kworom mo klas presidensi miting (luk long 10.4.3 mo 11.3.4.3).
22.6.2
Presidensi blong Rilif Sosaeti mo Presidensi blong Kworom blong Ol Elda
Anda long daereksen blong bisop, presidensi blong Rilif Sosaeti mo hemia blong kworom oli gat wan ki rol blong stap kea long olgeta we oli stap long nid insaed long wod (luk long 8.2.2 mo 9.2.2). Ol lida ia, oli stap tijim ol memba blong wod blong:
Givhan long olgeta we oli gat nid.
Stap laef folem loa blong livim kaekae.
Stap bildimap wan indipenden laef.
Kam antap blong wan i stap rere long hemwan, mo mekem famli i rere.
Ol presidensi blong Rilif Sosaeti mo kworom blong ol elda oli yusum paten ia we oli tokbaot long 22.3 taem oli stap help blong kea long olgeta we oli stap long nid.
Long sam ples, ol bisop oli gat joes ia blong givim, long ol memba we oli gat nid, wan oda fom blong bisop, blong oli save go karem kaekae mo ol nara besik samting (luk long 22.13). Plante taem, bisop i givim wok long presiden blong Rilif Sosaeti, blong hem i mas mit wetem ol memba mo fulumap wan oda fom (luk long 9.2.2.2). Be, hem i lukluk tu blong givim wok long presiden blong kworom blong ol elda (luk long 8.2.2.2). Oli save givim wok long wan kaonsela insaed long Rilif Sosaeti, mo insaed long presidensi blong kworom blong ol elda, sapos presiden i no stap. Lida we i kasem wok ia, i sendem fom we oli komplitim i go long bisop blong hem i apruvum.
22.6.3
Ol Givhan Brata o Sista
Ol help long saed blong nid long saed blong spirit mo long saed blong laef long wol, plante taem, i stat wetem ol givhan brata mo sista (luk long 21.1). Oli givim ripot blong ol nid blong olgeta we oli givim seves long olgeta i go long presidensi blong kworom blong ol elda mo Rilif Sosaeti. Oli save serem ol nid we oli konfidensiol i go stret long bisop.
Ol bisoprik oli save singaotem wanwan man o woman, o ol kapol blong stap olsem ol wod welfea mo indipenden laef speselis. Ol speselis ia oli sapotem ol lida blong wod long ol hadwok blong olgeta blong kea long ol narawan mo blong oli helpem olgeta blong dipen moa long olgetawan.
Oli save givim wok long ol speselis blong oli wok long ol spesifik eria blong fokas. Sam long ol eria ia, oli go olsem:
Wok
Edukesen
Fasin blong rere
Helt long saed blong tingting
Faenens blong wanwan man o woman
Lokol Gavman mo komuniti risos we oli givhan long olgeta we oli stap long nid (luk long 22.12)
Ol bisoprik oli save askem tu ol speselis blong help blong kodinetem o lidim ol indipenden laef grup. Olgeta grup ia, plante taem, ol stek mo ol wod kaonsel nao oli oganaesem olgeta.
22.6.5
Sot Lis blong Ol Koling mo Ol Rol
Tebol ia we i kam afta i tokbaot smol ol koling mo ol rol we oli tokbaot insaed long 22.6.
Koling
Visit mo Skelem Nid
Tijim Ol Prinsipol blong Indipenden Laef
Helpem Ol Memba wetem Indipenden Laef Plan
Apruvum Help blong Fast Ofring mo Oda blong Bisop
Koling
Bisop
Visit mo Skelem Nid
I save mekem, be i save givimaot wok ia
Tijim Ol Prinsipol blong Indipenden Laef
Yes
Helpem Ol Memba wetem Indipenden Laef Plan
I save mekem, be i save givimaot wok ia
Apruvum Help blong Fast Ofring mo Oda blong Bisop
Yes
Koling
Presidensi blong Rilif Sosaeti mo hemia blong kworom blong ol elda
Visit mo Skelem Nid
Yes
Tijim Ol Prinsipol blong Indipenden Laef
Yes
Helpem Ol Memba wetem Indipenden Laef Plan
Sapos oli givim wok ia
Apruvum Help blong Fast Ofring mo Oda blong Bisop
No
Koling
Ol Givhan Brata mo Sista
Visit mo Skelem Nid
Yes
Tijim Ol Prinsipol blong Indipenden Laef
Yes
Helpem Ol Memba wetem Indipenden Laef Plan
Sapos oli givim wok ia
Apruvum Help blong Fast Ofring mo Oda blong Bisop
No
Koling
Wod Welfea mo Indipenden Laef Speselis (sapos oli singaotem wan)
Visit mo Skelem Nid
Sapos oli givim wok ia
Tijim Ol Prinsipol blong Indipenden Laef
Sapos oli givim wok ia
Helpem Ol Memba wetem Indipenden Laef Plan
Sapos oli givim wok ia
Apruvum Help blong Fast Ofring mo Oda blong Bisop
No
22.7
Rol ia blong Wod Kaonsel
Wan impoten rol blong wod kaonsel i blong mekem plan blong wei blong kea long olgeta we oli stap long nid mo blong helpem olgeta blong kam blong dipen long olgetawan (luk long 4.4). Ol memba blong kaonsel oli mekem ol plan blong olgeta folem infomesen we i kam long ol givhan intaviu, mo infomesen we i kam long kontak blong olgeta wetem olgeta we oli stap long nid. Taem oli stap toktok raon long ol nid blong ol memba, kaonsel ia i respektem tingting blong eniwan we i wantem se infomesen ia i stap konfidensiol.
Taem we ol wod kaonsel oli stap lukluk long wei blong kea long olgeta we oli gat nid long laef ia mo long saed blong tingting, oli mekem olgeta samting ia:
Mekem plan blong ol wei blong tijim ol memba blong wod long wei blong yusum olgeta prinsipol ia blong indipenden laef (luk long 22.1). Olgeta prinsipol ia, i tekem hemia blong wanwan i rere long hemwan mo i mekem famli i rere.
Mekem plan blong ol wei blong helpem olgeta we oli gat ol kwik nid blong lukluk long olgeta, olsem wan i lusum wok, mo olgeta we oli gat ol nid we bae i tekem longtaem blong lukluk long olgeta, olsem ol problem blong helt, o ol disabiliti.
Faenemaot ol memba blong wod we oli gat skil, we oli save help blong lukluk long ol kwik nid, mo ol longtaem nid.
Faenemaot ol wok we oli open i stap, o ol seves blong olgeta we oli kasem help blong Jos.
Faenemaot ol memba we bae oli lanem samting mo bae i helpem olgeta sapos oli tekpat long wan indipenden laef grup. Olgeta grup ia, plante taem, ol stek mo ol wod kaonsel nao oli oganaesem olgeta.
Faenemaot ol nara risen long gavman, komuniti, o Jos we i save helpem ol memba (luk long 22.12 mo 22.13).
Planem ol wei blong givim seves long komuniti. Long ol ples we JustServe.org i gat long hem, oli save yusum blong faenemaot ol janis blong givim seves long komuniti.
Wod kaonsel i developem mo mekem wan simpol plan we oli raetemdaon blong wod i yusum long taem blong ol imejensi. Plan ia, oli mas kodinetem wetem imejensi plan blong stek (luk long “Wei we Stek mo Wod i Rere”; luk tu long 22.9.1.3 insaed long hanbuk ia).
Wod Welfea mo Indipenden Laef Speselis oli save invaetem olgeta long ol wod kaonsel miting olsem we i nid.
22.8
Rol ia blong Wod Yut Kaonsel
Wan stamba tingting blong wod yut kaonsel i blong helpem ol yut blong oli kam ol pipol we oli givim evri samting, olsem ol man mo woman we oli stap folem Jisas Kraes (luk long 29.2.6). Blong stap kea long olgeta we oli stap long nid long laef long wol ia, i impoten long wok ia blong fasin blong sevem man mo fasin blong kam olsem wan god. Long medel blong ol nara man, olgeta we oli gat ol nid long laef ia, i gat olgeta we oli olfala mo olgeta we oli gat disabiliti.
Folem rod we bisoprik i soem, wod yut kaonsel i plan blong givim seves mo blesem ol mo komuniti blong wod. Ol spesifik seves aktiviti, oli mekem plan blong olgeta long taem blong ol kworom o ol klas presidensi miting. Long ol ples we i gat JustServe.org long hem, oli save yusum blong faenemaot ol janis blong givim seves long komuniti.
22.9
Rol blong Ol Lida blong Stek
22.9.1
Stek Presiden mo Ol Kaonsela blong Hem
Stek presiden mo ol kaonsela blong hem oli lidim ol hadwok ia blong givhan long olgeta we oli gat ol nid long laef ia mo long saed blong tingting, mo blong bildimap wan indipenden laef. Presidensi blong stek Rilif Sosaeti, ol hae kaonsela, mo ol nara memba blong stek kaonsel oli helpem olgeta.
Stek presiden mo ol kaonsela blong hem oli gat olgeta responsabiliti ia:
Oli tijim ol prinsipol mo ol blesing we oli go wetem wok blong (1) stap kea long olgeta blong oli gat ol nid long saed blong laef ia mo ol nid long saed blong tingting, mo (2) oli bildimap fasin blong gat indipenden laef (luk long 22.1). Hemia i tekem tu fasin blong wan i stap rere long hemwan, mo mekem famli i rere.
Oli tijim ol memba mo oli leftemap tingting blong ol memba blong save long saed blong loa blong livim kakae, mo pem wan gudfala amaon blong mane i go long fast ofring (luk long 22.2.2).
Oli tijim ol bisop wanem i stret wei blong givim help blong Jos long olgeta we oli gat ol nid long laef ia (luk long 22.9.1.1).
Oli meksua se oli tijim ol presiden blong kworom blong ol elda, mo ol presiden blong Rilif Sosaeti long saed blong rol blong olgeta blong stap kea long olgeta we oli stap long nid. Ol presidensi blong Rilif Sosaeti long stek, mo ol hae kaonsela long stek, oli help blong givim instraksen long ol wod lida ia long saed blong ol responsabiliti blong olgeta (luk long 22.9.2 mo 22.9.3).
I lidim ol wok blong stek blong rere from ol imejensi, mo mekem samting afta long imejensi (luk long 22.9.1.3).
Stek presiden i gat olgeta responsabiliti ia:
I luklukbak long ol rikwes blong fast ofring long saed blong ol medikol help we i ova long limit we bisop i save yusum. Stek presiden i save apruvum ol rikwes ia sapos i kasem apruvol limit blong hem. Hem i sendem ol rikwes we i ova long limit blong hem i go long Eria Presidensi blong oli lukluk long hem (luk long 22.5.2.1).
Luklukbak long eni rikwes blong help blong Jos i go long ol bisop (luk long 22.5.1.2).
Stap olsem ejen stek presiden blong welfea mo indipenden laef operesen sapos hem i kasem wok ia blong mekem (luk long 22.9.1.2).
Stek presidensi i save givim wok long wan o moa long wan long ol hae kaonsela blong hem blong help blong lukluk ova long ol hadwok blong stap kea long olgeta wetem ol nid long laef ia insaed long stek (luk long 22.9.2). Stek presidensi i save singaotem ol speselis long stek long saed blong welfea mo indipenden laef, blong oli sapotem ol hadwok ia (luk long 22.9.4).
22.9.1.1
Tijim Ol Bisop long saed blong Ol Prinsipol blong Givim Help blong Jos
Stek presiden i meksua se olgeta we oli stap kea long olgeta wetem ol nid long laef ia, we oli stap insaed long wod blong olgeta. Hem i tijim ol bisop long saed blong ol prinsipol mo ol polisi blong save givim help long Jos (luk long 22.4 mo 22.5). Taem hem i stap tij, hem i yusum ol eksampol we oli ril, mo i go stret wetem wanem hem i stap tijim.
Long ol intaviu blong hem wetem ol bisop, stek presiden i luklukbak long ol peimen blong fast ofring, aot long faenens stetmen blong manis we i kamaot long wod. Mo tu, hem i toktok raon, wetem wanwan bisop, ol prinsipol we hem i stap yusum blong helpem ol memba. Hem i stap kaonsel wetem bisop abaot eni peimen o paten insaed long stetmen ia we i save soem se i gat sam prinsipol we oli no andastanem gud.
Ol prinsipol mo ol praktis blong stap givim help blong Jos, oli stap toktok raon long hem tu long stek kaonsel blong ol bisop (luk long 22.11).
Stek presidensi i meksua se wanwan bisop, i luklukbak long trening we i stap long vidio ia, “Sacred Funds, Sacred Responsibilities” wan taem o moa long wan yia.
22.9.1.2
Stap Olsem Ejen Stek Presiden blong Ol Jos Welfea Operesen
Taem i gat, Eria Presidensi i jusum wan ejen stek presiden blong welfea mo indipenden laef operesen long eria blong olgeta. Eksampol blong ol jenis ia oli go olsem:
Stek presiden we i kasem wok ia, i help blong faenem ol volontia blong sapotem ol nid blong operesen ia. Ol volontia ia, oli kamaot long ejen stek mo oli kamaot long ol nara stek we operesen ia i lukluk long olgeta.
Ejen stek presiden i save oganaesem wan ejen stek wok komiti blong lukluk ova long operesen ia. Ol memba blong komiti, insaed i gat:
Stek Presiden o wan kaonsela we oli givim wok ia long hem
Wan hae kaonsela
Wan memba blong presidensi blong stek Rilif Sosaeti Presidensi
Maneja blong operesen
Welfea mo Indipenden Laef Speselis olsem we i nid
22.9.1.3
Mekem Wok long Taem blong Ol Imejensi
Stek presiden i lukluk ova long wok afta Imejensi mo komunikesen insaed long stek blong hem. Long ol disasta we oli kavremap moa bitim wan stek, Eria Presidensi o wan Eria Seventi we i kasem wok ia, i save lidim wok afta long disasta. Ol maneja blong welfea mo indipenden laef oli sapotem ol lida long eria mo long stek long ol wok ia.
Ol stek presiden oli save singaot ol speselis blong welfea mo indipenden laef blong oli lukluk ova long ol imejensi operesen senta, manejem komunikesen, o handelem ol wari long saed blong sefti. Sapos i nid, Eria Presidensi o wan Eria Seventi i save jusum wan speselis long level blong eria, o wan kodineting kaonsel.
Ol givhan brata mo sista oli givim ripot blong ol kondisen mo ol nid blong ol memba i go long ol lida blong kworom mo Rilif Sosaeti. Afta, ol lida ia oli givim ripot i go long bisop, we i givim ripot i go long stek presidensi.
Stek presidensi i ripotem infomesen i go long (1) Eria Presidensi o wan Eria Seventi we i kasem wok ia, mo (2) i go long welfea mo indipenden laef maneja. Ripot ia, i talem situesen blong ol memba, ol misinari, ol bilding blong Jos, mo komuniti. Sapos disasta i spolem ol memba blong Jos, ol bisop oli save yusum fast ofring blong lukluk long ol besik nid. Ol bisop oli folem ol prinsipol we oli putum long 22.4.
Stek presiden i apruvum pablik infomesen we i go aot, we Jos i givimaot. Hem i kodinetem hemia wetem stek komunikesen daerekta sapos hem i bin singaotem wan (luk long 6.2.1.7). Hem i meksua tu se infomesen ia i stret gud mo i gat long stret taem. Hem i save stap tu olsem lokol man we i toktok long bihaf blong Jos, o hem i save jusum wan blong ansarem ol kwestin we i kam long media. Hem i save givim wok ia tu long stek komunikesen daerekta o wan narawan we i gat wok blong mekem hemia. Long ol disasta we i kasem moa long wan stek, Eria Presidensi o wan Eria Seventi we i kasem wok ia, i lukaotem ol pablik komunikesen.
Ol lida blong Jos oli save mekem ol risos ia blong Jos i stap blong ol lokol atoriti blong gavman oli save yusum long taem blong wan imejensi. Wetem raet we i kam long Eria Presidensi, ol bilding blong Jos (be i no ol tempol) bae oli save yusum olsem ol selta, ol stesen blong kasem fas help, ol ples blong fidim ol man. Ol kaen yus ia blong ol bilding blong Jos, bae oli mas kodinetem olgeta wetem maneja we i lukaot long ol bilding. Sapos i gat wan nara jareti oganaesesen o komuniti oganaesesen we i kasem raet blong yusum bilding ia, bae oli mas saenem wan agrimen blong yusum bilding. Luk long “Use of Church Buildings in a Disaster” blong gat moa infomesen.
Bae yu faenem moa infomesen long “Fasin blong Wok long Taem blong Imejensi.”
22.9.2
Ol Hae Kaonsela
Hae kaonsela ia we i gat wok blong lukluk long wanwan kworom blong ol elda i sapotem kworom presidensi long responsabiliti blong olgeta blong stap kea long olgeta we oli stap long nid mo i helpem olgeta blong bildimap wan indipenden laef (luk long 22.6.2).
Stek presidensi i save givim wok long wan o moa long wan hae kaonsela blong mekem olgeta samting ia:
Help blong tijim ol stek mo wod speselis blong welfea mo indipenden laef long rol blong olgeta, sapos i gat ol speselis we oli bin singaotem olgeta (luk long 22.9.4 mo 22.6.4).
Kodinetem ol volontia wok blong ol operesen blong welfea mo indipenden laef operesen.
Givim seves long ol spesel wok grup we oli stap blong kodinetem ol risos blong ol seves blong indipenden laef mo komuniti (luk long 22.10.2).
Long ol stek we oli sapotem wan welfea mo indipenden laef operesen, i gat wan hae kaonsela we oli save askem hem blong i givim seves long ejen stek wok komiti (luk long 22.9.1.2).
22.9.3
Stek Rilif Sosaeti Presidensi
Stek Rilif Sosaeti presidensi i sapotem ol presidensi blong Rilif Sosaeti long responsabiliti blong olgeta blong kea long olgeta we oli stap long nid mo helpem olgeta blong bildimap wan indipenden laef (luk long 22.6.2).
Ol memba blong stek Rilif Sosaeti presidensi, oli save askem olgeta blong wok long ol spesel wok grup we oli kodinetem ol risos long saed blong indipenden laef o komuniti seves (luk long 22.10.2). Long ol stek we oli sapotem wan welfea mo indipenden laef operesen, i gat wan hae kaonsela we oli save askem hem blong i givim seves long ejen stek wok komiti (luk long 22.9.1.2).
Olsem we i nid, stek presidensi oli save singaotem wanwan man o woman, o ol kapol blong stap olsem ol stek welfea mo indipenden laef speselis. Ol speselis ia oli sapotem ol lida blong wod long ol hadwok blong olgeta blong kea long ol narawan mo blong oli helpem olgeta blong dipen moa long olgetawan.
Oli save givim wok long ol speselis blong oli wok long ol spesifik eria blong fokas. Eksampol. Oli save askem olgeta blong:
Givim ol aedia mo ol risos blong help blong mekem ol memba blong stek oli kam antap long fasin blong oli rere olgetawan (luk long 22.1.4).
help blong rere from ol imejensi, mo mekem samting afta long imejensi (luk long 22.9.1.3).
Serem infomesen long ol memba abaot ol risos we oli stap long gavman, komuniti, mo Jos (luk long 22.12 mo 22.13).
Ol stek speselis oli kodinetem ol hadwok wetem ol speselis blong welfea mo indipenden laef we oli bin singaotem olgeta insaed long ol wod ia.
22.10
Rol ia blong Stek Kaonsel
Ol memba blong stek kaonsel oli toktok raon long ol nid blong ol memba blong stek, mo oli mekem plan long wei blong helpem ol memba blong oli kam blong dipen long olgetawan (luk long 29.3.8). Oli faenemaot ol risos, insaed long komuniti mo stek we i save helpem ol lida blong wod blong kea long ol nid long saed blong laef ia mo long saed blong tingting, blong ol memba (luk long 22.12 mo 22.13). Oli developem mo mekem wan simpol plan we oli raetemdaon blong stek i yusum long taem blong ol imejensi (luk long “Mekem Stek mo Wod I Rere”). Ol stek kaonsel oli mekem ol plan tu blong faenem ol wei blong givim seves long komuniti.
Folem hamas wan i stap long homples, stek kaonsel i save yusum eniwan long olgeta risos ia: Ol risos ia oli save helpem ol memba blong stek blong oli bildimap wan indipenden laef o blong oli tekpat long komuniti seves.
Blong help blong oganaesem mo manejem ol risos ia we oli putum long 22.10.1, stek presidensi i save jusum o singaotem ol spesel wok grup, olsem JustServe wok grup. Insaed long ol grup ia i save gat ol memba blong stek kaonsel o stek adalt lidasip komiti (luk long 29.3.9). I gat tu ol speselis olsem olgeta ia:
Welfea mo indipenden laef speselis (luk long 22.9.4)
Stek komunikesen daerekta, o JustServe speselis (luk long JustServe Community Service Guidebook)
Ol narawan olsem we i nid
22.11
Rol ia blong Ol Stek Kaonsel blong Ol Bisop
Stek kaonsel blong ol bisop, oli holem blong kaonsel abaot ol responsabiliti long saed blong ol bisop. Oli toktok raon oltaem long saed blong ol prinsipol blong (1) stap kea long olgeta we oli gat nid long laef blong wol ia i mo long saed blong filing, mo (2) bildimap wan indipenden laef. (Luk long 29.3.11.)
Oli leftemap tingting blong ol memba blong kaonsel blong:
Serem ol aedia, ol eksperiens, mo ol risos blong lukluk long ol nid blong ol memba long saed blong laef ia mo long saed blong ol filing. Hemia i tekem ol risos insaed long komuniti. I tekem tu ol aedia blong wok o ol janis blong givim seves blong ol memba blong oli kasem help blong Jos.
Toktok raon long ol wei blong leftemap tingting blong ol memba blong kasem ol blesing blong stap laef folem loa blong livim kaekae, mo blong stap donetem mane long fast ofring.
GAVMAN, KOMUNITI, mo JOS RISOS
22.12
Gavman mo Komuniti Risos
Long plante ples, ol memba oli save yusum ol risos blong gavman mo komuniti we oli help wetem ol besik nid. Ol kaen risos ia, i gat:
Helt kea help.
Help long saed blong kaekae.
Wok trening mo ol seves we i putum man long wok.
Ol seves blong helt blong tingting.
Ol edukesen program.
Program blong helpem ol olfala.
Help long saed blong haos.
Oli leftemap tingting blong ol memba blong luklukgud long ol risos ia, antap long ol risos we Jos i stap givim, o putum i stap (luk long 22.13).
Pikja
frut mo vejetebol
22.13
Ol Risos blong Jos
Ol tebol lis ia i putum ol risos blong Jos we oli save sapotem ol hadwok blong ol memba blong lukluk long ol nid blong olgeta long laef ia mo long saed blong ol filing blong olgeta, mo bildimap wan indipenden laef. Stoahaos blong Lod (luk long 22.2.1) mo ol fast ofring (luk long 22.2.2) oli stap wetem ol bisop long evri wod. Ol nara risos we oli stap long lis ia, sam i gat, mo sam i no gat, hemia folem ples we wan i stap long hem.
Kategori
Ol Risos
Kategori
Ol Kwik Nid
Ol Risos
Stoahaos blong Lod (ol ofring blong ol memba, olsem taem, talen, lav mo sore, ol buk, mo ol faenens)
Ol Fast Ofring
Oda blong bisop long saed blong kaekae, mo ol nara besik samting tru long stoahaos blong bisop o stoa.
Oda blong bisop long saed blong kaekae, mo ol nara besik samting tru long Deseret Industries o stoa.