25. Ngāue Fakatemipale mo e Hisitōlia Fakafāmili ʻi he Uōtí mo e Siteikí
“25. Ngāue Fakatemipalé mo e Hisitōlia Fakafāmili ʻi he Uōtí mo e Siteikí,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (2020).
“25. Ngāue Fakatemipalé mo e Hisitōlia Fakafāmili ʻi he Uōtí mo e Siteikí,” Tohi Tuʻutuʻuni Fakakātoá.
ʻĪmisi
temipale
25.
Ngaue Fakatemipalé mo e Hisitōlia Fakafāmilí ʻi he Uōtí mo e Siteikí
25.0
Talateú
Ko hono fakatahaʻi ʻo e ngaahi fāmilí ki he taʻengatá ko ha konga ia ʻo e ngāue ʻa e ʻOtuá ki he fakamoʻuí mo e hakeakiʻí (vakai, 1.2). Ko e ngāue fakatemipalé mo e hisitōlia fakafāmilí ko e ongo founga ia ki hono fakatahaʻi mo silaʻi ʻo e ngaahi fāmilí ki he taʻengatá (vakai, Mātiu 16:19). ‘Oku kau ʻi he ngāué ni ʻa e:
Ko e temipalé ko e fale ia ʻo e ʻEikí. ‘Oku tāpuekina ‘e he ngaahi ouau mo e ngaahi fuakava ʻo e temipalé ‘a e fānau ʻa e Tamai Hevani. ‘Oku fakaafeʻi ‘e he Tamai Hēvaní ʻa e kotoa ʻo ʻEne fānaú ke nau fakafeʻungaʻi kinautolu pea mo maʻu e ngaahi ouau ʻo e temipalé.
ʻOku fakahinohino ʻe he vahé ni ʻa e kau taki mo e kāingalotu ʻo e Siasí ʻi he ngāue fakatemipalé mo e hisitōlia fakafāmilí. ʻOku maʻu ha fakamatala lahi ange ʻi he “Ngaahi Temipalé” mo e “Hisitōlia Fakafāmilí” (Ngaahi Tefito ʻo e Ongoongoleleí, topics.ChurchofJesusChrist.org).
25.1
Ko e Kau ʻa e Mēmipá mo e Takí ʻi he Ngāue Fakatemipalé mo e Hisitōlia Fakafāmilí
‘Oku maʻu ‘e he kāingalotu ‘o e Siasí ʻa e faingamālie mo e fatongia ke tokoni ke fakatahataha‘i honau ngaahi familí ki he taʻengatá. Te nau teuteuʻi kinautolu ke fakahoko e ngaahi fuakavá ʻi heʻenau maʻu e ngaahi ouau fakatemipalé, mo nau feinga ke tauhi e ngaahi fuakava ko iá. Te nau toe tokoniʻi foki e kau mēmipa ʻo e fāmilí ke mahino, maʻu, pea mo tauhi e ngaahi fuakava ʻo e temipalé. ʻOku ʻa e ngaahi mātuʻá ʻa e tefitoʻi fatongia ke tokoniʻi ʻenau fānaú ke nau aʻusia ʻa e ngaahi tāpuaki ʻo e temipalé mo e hisitōlia fakafāmilí maʻá e kau mēmipa ʻo e fāmilí kuo pekiá.
ʻOku poupouʻi ʻa e kāingalotu ʻo e Siasí ke nau kumi honau kāinga kuo pekiá ʻa ia naʻe teʻeki ke nau maʻu ʻa e ngaahi ouau ʻo e temipalé. ʻE fakahoko leva ʻe he kāingalotú ʻa e ngaahi ouaú ʻo fakafofongaʻi honau kāingá (vakai, Tokāteline mo e Ngaahi Fuakava 128:18). ʻE lava ke fili ʻa e niʻihi fakafoʻituitui kuo pekiá, ʻi he maama tataliʻanga ʻo e ngaahi laumālié, ke tali pe fakasītuʻaʻi ʻa e ngaahi ouau kuo fakahoko maʻanautolú.
ʻE fakaafeʻi foki ʻe he kāingalotú ʻa e fāmilí mo e kaungāmeʻá ke nau ako ki heʻenau ngaahi kuí pea mo ʻilo honau ngaahi talanoá.
ʻE poupouʻi ʻe he kau taki ʻo e Siasí ʻa e kāingalotú ʻi he ngaahi founga ko ʻení:
Ako‘i ʻa hono mahuʻinga ke fakahoko mo feinga ke tauhi e ngaahi fuakava ʻo e temipalé.
Poupou‘i ʻa e kāingalotú ke nau ako kau ki heʻenau ngaahi kuí, ‘ilo honau ngaahi talanoá, pea fakahoko e ngaahi ouau fakatemipalé ʻo fakafofongaʻi kinautolu.
Poupou‘i ʻa e mātuʻá ʻi hono tokoniʻi ʻenau fānaú ke nau kau ʻi he ngāue fakatemipalé mo e hisitōlia fakafāmilí.
Poupou‘i ʻa e kāingalotu kuo ʻosi maʻu ʻenitaumení ke maʻu ha lekomeni temipale ʻoku kei ʻaongá pea moihū ʻi he temipalé ʻi he lahi taha ʻe ala lavá, ʻo fakatatau mo honau tūkungá.
Poupou‘i ʻa e to‘u tupú, kau mēmipa foʻoú, mo ha kakai lalahi te‘eki maʻu ‘enitaumeni kehe ke ʻi ai haʻanau lekomeni temipale ki he papitaiso mo e hilifakinima fakafofongá pea mo nau ō ki he temipalé ke papitaiso mo hilifakinima maʻá e pekiá.
Vakai ki he vahe 26 ki he fakamatala fekauʻaki mo e ngaahi lekomeni temipalé.
25.1.1
Fatongia Fakafo‘ituitui ke ʻAlu ki he Temipalé
ʻE fakakaukauʻi ʻe he kāingalotú ʻa e taimi mo e tuʻo lahi te nau moihū ai he temipalé. He ʻikai fokotuʻu ʻe he kau takí ha fika pau pe ko ha founga lipooti ʻo e ō ki he temipalé.
25.1.2
ʻAlu ʻa e Uōtí mo e Siteikí ki he Temipalé
ʻOku vahe ʻa e ʻiuniti kotoa pē ʻi he Siasí ki ha vāhenga fakatemipale. ʻOku ʻikai poupouʻi ke fokotuʻutuʻu ha ʻaʻahi fakauooti pe fakasiteiki ki ha ngaahi temipale ʻoku mavahe mei honau vāhenga fakatemipalé.
ʻE lava ke ʻalu fakafoʻituitui ʻa e kāingalotú mo e ngaahi fāmilí ki ha faʻahinga temipale pē ʻoku nau fie ō ki ai.
25.2
Ko hono Fokotu‘utuʻu ‘o e Ngāue Fakatemipalé mo e Hisitōlia Fakafāmilí ʻi he Uōtí
25.2.1
Kau Pīsopelikí
ʻE fakafekauʻaki ʻe he kau pīsopelikí mo e kau palesitenisī ʻo e kōlomu ʻo e kaumātuʻá pea mo e kau palesitenisī ʻo e Fineʻofá ʻi heʻenau taki e ngāue fakatemipale mo e hisitōlia fakafāmili ʻa e uōtí. ʻE fealēleaʻaki fakataha maʻu pē ʻa e kau taki ko ʻení.
ʻOku ʻa e kau pīsopelikí foki ʻa e ngaahi fatongia ko ʻení ki he ngāue fakatemipale mo e hisitōlia fakafāmili ʻi he uōtí:
Poupou‘i e fakafo‘ituituí mo e ngaahi fāmilí ke nau ako ʻa e tokāteline mo e ngaahi tāpuaki ‘o e ngāue fakatemipalé mo e hisitōlia fakafāmilí.
Fakapapauʻi ʻoku akoʻi ʻi he lotú ʻa e tokāteline mo e ngaahi tāpuaki ʻo e ngāue fakatemipalé mo e hisitōlia fakafāmilí.
Fakapapau‘i ʻoku fakafekauʻaki e ngāue fakatemipalé mo e hisitōlia fakafāmilí ʻi he fakataha alēlea fakauōtí mo e ngaahi fakataha alēlea fakauooti ʻa e toʻu tupú.
Toe vakaiʻi mo fakangofua ʻa e palani temipale mo e hisitōlia fakafāmili ʻa e uōtí (vakai, 25.2.6).
Tokangaʻi hono fokotuʻutuʻu ʻo e ngaahi kalasi teuteu ki he temipalé (vakai, 25.2.8).
Foaki ʻo e ngaahi lekomeni temipalé (vakai, vahe 26).
ʻE feongoongoi ʻa e kau pīsopelikí mo e palesiteni fakasiteikí ke fakafuofuaʻi pe ʻe ui ha taki fakauooti ki he temipalé mo e hisitōlia fakafāmilí (vakai, 25.2.3 ki ha fakamatala lahi ange).
25.2.2
Kau Palesitenisī ʻo e Kōlomu ʻo e Kaumātuʻá mo e Fineʻofá
ʻE taki ʻe he kau palesitenisī ʻo e kōlomu e kaumātuʻá mo e kau palesitenī ʻo e Fineʻofá ʻa e ngaahi ngāue fakaʻaho ki he temipalé mo e hisitōlia fakafāmilí ʻi he uōtí (vakai, 8.2.4 mo e 9.2.4). ʻE tataki ʻe he kau palesitenisī ʻo e kōlomu kaumātuʻá ʻa e ngaahi ngāue ko ʻení maʻá e kau mēmipa ʻo e kōlomu kaumātuʻá. ʻE tataki ʻe he kau palesitenisī ʻo e Fineʻofá ʻa e ngaahi ngāue maʻá e kau mēmipa ʻo e Fineʻofá. Te nau ngāue fakataha ke tataki ʻa e ngāue ko ʻení mo e fakataha alēlea fakauōtí, ʻi he malumalu hono fakafekauʻaki ʻe he pīsopé.
ʻOku ʻa e kau taki ko ʻení ʻa e ngaahi fatongia ko ʻení:
Kole ki ha faifaleʻi fakauooti ki he temipalé mo e hisitōlia fakafāmilí ke tokoni ki he kāingalotu ʻo e uōtí ne toki maʻu honau uiuiʻi fakafaifekaú ke kumi mo teuteuʻi ʻa e ngaahi hingoa ʻo e ngaahi kui kuo pekiá ki he ngaahi ouau fakatemipalé.
Poupouʻi ʻa e fakafoʻituituí mo e ngaahi fāmilí ke nau ako ʻa e tokāteline mo e ngaahi tāpuaki ʻo e ngāue fakatemipalé mo e hisitōlia fakafāmilí.
Fakapapauʻi ʻoku akoʻi ʻi he lotú ʻa e tokāteline mo e ngaahi tāpuaki ʻo e ngāue fakatemipalé mo e hisitōlia fakafāmilí.
Tokoni‘i ʻa e kāingalotú ke nau teuteu ke maʻu e ngaahi ouau fakatemipalé mo fakahoko e ngaahi fuakava fakatemipalé.
Poupouʻi ʻa e kāingalotú ke nau moihū ʻi he temipalé ki he lahi taha ʻe lavá, ʻo fakatatau mo honau tūkungá.
Poupou‘i ʻa e kāingalotú ke nau ako ki heʻenau ngaahi kuí mo fakahoko e ngaahi ouau fakatemipalé maʻanautolu.
Tokoni‘i e fakataha alēlea fakauōtí ke nau faʻu mo fakahoko e palani ʻa e uōtí ki he temipalé mo e hisitōlia fakafāmilí (vakai, 25.2.6).
Fakapapau‘i ʻoku palani mo lipooti e ngāue fakatemipalé mo e hisitōlia fakafāmilí, ʻi he ngaahi fakataha alēlea fakauōtí mo e fakataha fakafekauʻaki ʻa e uōtí ki he temipalé mo e hisitōlia fakafāmilí.
Tataki e ngāue ʻa e taki fakauooti ki he temipalé mo e hisitōlia fakafāmilí. Kapau ʻoku ʻikai uiuiʻi ha taki peheni, ʻe fakahoko leva ʻe ha mēmipa ʻo e kau palesitenisī ʻo e kōlomu ʻo e kaumātuʻá ʻa e fatongia ko ʻení (vakai, 25.2.3).
ʻE takitaha vahe ʻe he palesiteni e kōlomu ʻo e kaumātuʻá mo e palesiteni ʻo e Fineʻofá ha mēmipa ʻo e kau palesitenisií ke tokoni ʻi hono taki e ngāue fakatemipalé mo e hisitōlia fakafāmilí ʻi he uōtí. ʻE ngāue fakataha ʻa e kau mēmipa ʻo e ongo palesitenisī ko ʻení. Te na kau ki he ngaahi fakataha fakafekauʻaki ʻa e temipalé mo e hisitōlia fakafāmilí ʻi he uōtí (vakai, 25.2.7).
Taki Fakauooti ki he Temipalé mo e Hisitōlia Fakafāmilí
‘E feongoongoi ʻa e kau pīsopelikí mo e palesiteni fakasiteikí ke fakafuofuaʻi pe ʻe ui ha taki fakauooti ki he temipalé mo e hisitōlia fakafāmilí. Kapau te nau pehē ke fakahoko e uiuiʻi ko ʻení, ʻe feongoongoi ʻa e kau pīsopelikí mo e palesiteni e kōlomu ʻo e kaumātuʻá mo e palesiteni Fineʻofá ke fakakaukauʻi ʻa e taha ke uí. Ko e tokotahá ni ʻoku totonu ko ha taha maʻu Lakanga Taulaʻeiki Faka-Melekisēteki ia. Kapau ‘oku ʻikai ui ha taki peheni, ʻe fua ʻe ha mēmipa ʻo e kau palesitenisī ʻo e kōlomu kaumātuʻá ʻa e fatongia ko ʻení.
Ko e taki fakauooti ki he temipalé mo e hisitōlia fakafāmilí te ne poupouʻi ʻa e kau palesitenisī ʻo e kōlomu e kaumātuʻá mo e kau palesitenisī ʻo e Fineʻofá ʻi honau ngaahi fatongia ki he temipalé mo e hisitōlia fakafāmilí. ʻOkú ne toe maʻu foki mo e ngaahi fatongia ko ʻení:
Fakafekau‘aki ʻa e ngaahi ngāue fakatemipalé mo e hisitōlia fakafāmilí mo e kau taki ʻo e ngaahi houalotu ʻi he uōtí, kau ai mo e kau palesitenisī fakakōlomu mo fakakalasi ʻa e toʻu tupú.
Taki e ngaahi fakataha fakafekauʻaki ʻa e temipalé mo e hisitōlia fakafāmilí ʻi he uōtí (vakai, 25.2.7).
Kau ki he ngaahi fakataha alēlea fakauōtí ʻo ka fakaafeʻi.
Tokoni‘i e fakataha alēlea fakauōtí ke nau faʻu mo fakahoko e palani ʻa e uōtí ki he temipalé mo e hisitōlia fakafāmilí (vakai, 25.2.6).
Fakahinohinoʻi ʻa e kau faifaleʻi fakauooti ki he temipalé mo e hisitōlia fakafāmilí. Fakafekau‘aki ʻenau ngaahi ngāue ke tokoniʻi e kāingalotú ʻi he ngāue fakatemipalé mo e hisitōlia fakafāmilí.
Ngāue mo e taki ngāue fakafaifekau fakauōtí pea mo e kau faifekaú ke tokoniʻi ʻa kinautolu ʻoku nau ako e ongoongoleleí, kāingalotu foʻoú, mo e kāingalotu foki maí ke nau kau ʻi he ngāue fakatemipalé mo e hisitōlia fakafāmilí.
‘I he feituʻu ʻe lava aí, vahe ha kau faifaleʻi fakauooti ki he temipalé mo e hisitōlia fakafāmilí ke nau ngāue ʻi he senitā FamilySearch (vakai, 25.3.6).
25.2.4
Kau Faifaleʻi Fakauooti ki he Temipalé mo e Hisitōlia Fakafāmilí
ʻE ngāue ʻa e kau faifaleʻi fakauooti ʻo e temipalé mo e hisitōlia fakafāmilí ʻi he malumalu ʻo e fakahinohino ʻa e taki fakauooti ki he temipalé mo e hisitōlia fakafāmilí pe ko ha mēmipa ʻo e kau palesitenisī ʻo e kōlomu e kaumātuʻá ʻokú ne fakahoko e fatongia ko ʻení. ʻE ui ʻe he kau pīsopelikí ʻa e kāingalotu ko ʻení ke nau ngāue. ʻE lava ke uiuiʻi ha kakai lalahi mo ha toʻu tupu. ʻE lava ke fokotuʻu atu ʻe he kau palesiteni ʻo e kōlomu ʻo e kaumātuʻá, Fineʻofá, mo e Kau Finemuí pe ko hai ʻe lava ʻo ngāué.
ʻOku ʻa e kau faifaleʻí ʻa e ngaahi fatongia ko ʻení:
Tokoni ke aʻusia ʻe he kāingalotú ʻa e ngaahi tāpuaki ʻo hono ʻilo ʻenau ngaahi kuí mo hono fakahoko ʻo e ngaahi ouau fakatemipalé maʻanautolú. ʻOku tautautefito e mahuʻinga ʻo e ngaahi aʻusia ko ʻení kiate kinautolu ʻoku nau ako ʻa e ongoongoleleí, kāingalotu foʻoú mo e foki maí, pea mo kinautolu ʻoku teuteu ke maʻu ha lekomeni ki he papitaiso mo e hilifakinima fakafofongá.
Tokoni ki he kāingalotú ke nau teuteu ke maʻu e ngaahi ouau ʻo e temipalé mo fakahoko e ngaahi fuakava fakatemipalé.
Kau ʻi he ngaahi fakataha fakafekauʻaki ʻo e temipalé mo e hisitōlia fakafāmilí (vakai, 25.2.7).
Ngāue ʻi ha senitā FamilySearch fakalotofonua ʻi hano vahe atu (vakai, 25.3.6).
25.2.5
Fakataha Alēlea Fakauōtí
ʻE faʻu pea mo fakahoko ʻe he kau mēmipa ʻo e fakataha alēlea fakauōtí ʻi he faʻa lotu, ʻa e palani fakauooti ki he temipalé mo e hisitōlia fakafāmilí. Ko e fakamatala fekauʻaki mo e palaní, vakai ki he 25.2.6.
ʻE lava ke fakaafeʻi ʻe he pīsopé ʻa e taki fakauooti ki he temipalé mo e hisitōlia fakafāmilí ke kau mai ki he ngaahi fakataha alēlea ʻa e uōtí.
25.2.6
Palani ʻa e Uōtí ki he Temipalé mo e Hisitōlia Fakafāmilí
ʻOku totonu ke ʻi ai ha palani faingofua ʻa e uooti takitaha ki he temipalé mo e hisitōlia fakafāmilí. ʻE tokoni ʻa e palani ko ʻení ki he kāingalotu ʻo e uōtí, kau ai e fānaú mo e toʻu tupú, ke nau kau ʻi he ngāue fakatemipalé mo e hisitōlia fakafāmilí mo mateuteu ke moihū ʻi he temipalé ʻi he lahi taha ʻe ala lavá, ʻo fakatatau mo e tūkungá.
ʻE tokoni ʻa e ongo palesiteni ʻo e kōlomu kaumātuʻá mo e Fineʻofá ke faʻu ʻe he fakataha alēlea fakauōtí ʻa e palaní. ʻE toe tokoni foki ki ai ʻa e taki fakauooti ki he temipalé mo e hisitōlia fakafāmilí. ʻI hono faʻu ʻo e palaní, te nau:
Fakakaukauʻi e ngaahi fiemaʻú mo e ngaahi maʻuʻanga tokoni ʻe ala maʻú.
Fakapapauʻi e ngaahi ngāue ke fai he lolotonga ʻo e taʻú.
Fakapapau‘i ʻa e founga ke fakahoko ai e palaní mo vahe ʻa e ngāue ke faí ʻo fakatatau ki ai.
ʻOku lisi atu ʻi lalo ha sīpinga ʻo e ngaahi meʻa ʻe lava ʻo fakakau ʻi he palaní:
Fakakau ‘a e kau mēmipa foʻoú mo e kāingalotu foki maí, toʻu tupú, mo e fānaú ʻi he ngāue hisitōlia fakafāmilí.
Tokoni ki ha kau mēmipa pau ke nau teuteu ke maʻu e ngaahi ouau ʻo e temipalé.
Ko e pīsopé te ne vakaiʻi mo fakaʻatā ʻa e palaní. ʻE takimuʻa ʻa e kau mēmipa ʻo e fakataha alēlea fakauōtí ʻi hono fakahoko iá. Te nau lipooti e fakalakalaká ʻi he ngaahi fakataha alēlea fakauōtí. Te nau fakatonutonu foki ʻa e palaní ʻi hano fie maʻu.
25.2.7
Ngaahi Fakataha Fakafekauʻaki ʻa e Temipalé mo e Hisitōlia Fakafāmilí ʻi he Uōtí
ʻE faʻa fakahoko maʻu pē ha ngaahi fakataha nounou ke fakafekauʻaki ʻa e temipalé mo e hisitōlia fakafāmilí ʻi he uōtí. Kapau kuo ui ha taki fakauooti ki he temipalé mo e hisitōlia fakafāmilí, te ne tataki ʻa e ngaahi fakataha ko ʻení. Ka ʻikai, pea ʻe tataki leva ʻe ha mēmipa ʻo e kau palesitenisí ʻo e kōlomu ʻo e kaumātuʻá, ʻa ia ʻokú ne fakahoko e fatongia ko ʻení.
ʻOku kau ʻi he niʻihi kehe ʻoku fakaafeʻí ʻa e:
Kau mēmipa ʻo e kau palesitenisī ʻo e Fineʻofá mo e kōlomu kaumātuʻá naʻe vahe ki aí.
Ko ha ʻasisiteni ʻi he kōlomu ʻo e kau taulaʻeikí.
Ko ha mēmipa ʻo e kau palesitenisī ʻo e kalasi lalahi taha ʻo e Kau Finemuí.
Kau faifaleʻi ʻi he temipalé mo e hisitōlia fakafāmilí.
Ko kinautolu kotoa ʻoku kau ki aí, kau ai ʻa e toʻu tupú, te nau fealēleaʻaki fakataha ko ha niʻihi tuʻunga tatau.
Ko e taumuʻa ‘o e ngaahi fakatahá ni ke:
Fakafekauʻaki e ngaahi ngāue ke fakahoko e palani fakauooti ki he temipalé mo e hisitōlia fakafāmilí (vakai, 25.2.6).
Palani ʻa e founga ke tokoniʻi ai ha kāingalotu pau ʻo e uōtí ʻi heʻenau ngāue fakatemipalé mo e hisitōlia fakafāmilí, ʻo ka kole ange.
ʻE lava ke fakahoko fakahangatonu ʻa e ngaahi fakataha ko ʻení pe ʻi he ʻinitanetí. ʻE lava foki ke hoko ʻa e fakafekauʻakí ʻi ha ngaahi founga kehe, kau ai ʻa e tā-telefoní, pōpoaki telefoní, mo e ʻīmeilí.
25.2.8
Kalasi Teuteu ki he Temipalé
ʻI he malumalu ʻo e fakahinohino ʻa e pīsopé, ʻe lava ke fokotuʻu ha kalasi teuteu ki he temipalé ke tokoni ki he kāingalotú ke nau teuteu ke fakahoko e ngaahi fuakavá ʻi heʻenau maʻu ʻa e ngaahi ouau fakatemipalé. ʻOku fakahoko ʻa e ngaahi kalasi ko ʻení mavahe mei he ngaahi fakatahaʻanga angamaheni ʻo e Sāpaté, ʻi ha taimi ʻe lelei ki he kāingalotú. ʻE lava ke fakahoko ia ʻi ha ʻapisiasi pe ko ha ʻapi nofoʻanga.
ʻE fili ʻe he kau mēmipa ʻo e fakataha alēlea fakauōtí, ʻi he faʻa lotu, ha kāingalotu ʻe fakaafeʻi ke nau kau ʻi he kalasi takitaha. ʻE mātuʻaki ʻaonga ʻa e ngaahi kalasi ko ʻení ki he kakai ko ʻení:
Kāingalotu foʻoú
Kāingalotu ʻoku teuteu ke maʻu honau ʻenitaumení pe teuteu ke silá
Kāingalotu ‘oku foki mai ʻo mālohi ‘i he Siasí
Kāingalotu kuo ʻosi maʻu ʻenitaumeni ka kuo fuʻu fuoloa hano ʻikai fakafoʻou ʻenau lekomeni temipalé
ʻE ui ʻe he kau pīsopelikí ha taha faifakahinohino ʻe toko taha pe tokolahi ange, ki he kalasi teuteu ki he temipalé. Ko e ngaahi lēsoni mo e ngaahi fakahinohino ki hono fokotuʻutuʻu ʻo e kalasí ʻoku maʻu ia ʻi he Fakakoloaʻi mei ʻOlungá: Tohi Lēsoni ʻa e Faiako ʻi he Seminā Teuteu ki he Temipalé. ‘E tufa ki he niʻihi ʻoku kau ki aí ha ngaahi tatau ʻo e Ko e Teuteu ke Hū ki he Temipale Māʻoniʻoní. Ko e ngaahi maʻuʻanga tokoni ki he ako fakafoʻituituí mo e lēsoní, vakai ki he temples.ChurchofJesusChrist.org.
25.3
Ko Hono Fokotuʻutuʻu ʻo e Ngāue Fakatemipalé mo e Hisitōlia Fakafāmilí ʻi he Siteikí
ʻE poupouʻi ʻe he kau taki fakasiteikí ʻa e kau taki mo e kāingalotu ʻi he uōtí ʻi heʻenau ngaahi ngāue fakatemipalé mo e hisitōlia fakafāmilí.
25.3.1
Kau Palesitenisī Fakasiteikí
ʻOku maʻu ʻe he palesiteni fakasiteikí ʻa e ngaahi kī ki he ngāue ʻa e ʻOtuá ki he fakamoʻuí mo e hakeakiʻí ʻi he siteikí. ʻOkú ne maʻu mo hono ongo tokoní ʻa e ngaahi fatongia ko ʻení ʻi he tafaʻaki ki he temipalé mo e hisitōlia fakafāmili ʻo e ngāue ko iá:
Fakapapauʻi ʻoku akoʻi maʻu pē ʻa e tokāteline mo e ngaahi tāpuaki ʻo e temipalé mo e hisitōlia fakafāmilí, ʻi he ngaahi fakataha fakasiteikí.
Tokoni‘i ʻa e kāingalotú ke nau teuteu ke fakahoko e ngaahi fuakava toputapú, ʻi heʻenau maʻu e ngaahi ouau fakatemipalé.
Poupou‘i ʻa e kāingalotú ke nau ako ki heʻenau ngaahi kuí mo fakahoko e ngaahi ouau fakatemipalé maʻanautolu.
Poupouʻi e kāingalotú ke nau moihū ʻi he temipalé ki he tuʻo lahi taha ʻoku malava ʻi honau tūkungá.
Fakahoko e ngaahi ‘initaviu lekomeni temipalé (vakai, vahe 26).
ʻI heʻene fakataha angamaheni mo e palesiteni takitaha ʻo e kōlomu kaumātuʻá, ʻe aleaʻi ai ʻe ha mēmipa ʻo e kau palesitenisī fakasiteikí ʻa e ngāue fakatemipale mo e hisitōlia fakafāmili ʻi he uōtí (vakai, 8.3.1.). ʻE lava ke kau ʻi he fakatahá ʻa e ongo tokoni ʻi he kau palesitenisī ʻo e kōlomú ʻo e kaumātuʻá mo e aleaʻanga māʻolunga naʻe vahe ki he kōlomú.
25.3.2
Kōmiti Fakasiteiki ʻa e Kau Taki Kakai Lalahí
ʻOku kau ʻi he kōmiti fakasiteiki ʻa e kau taki kakai lalahí ʻa e:
Kau palesitenisī fakasiteikí.
Kau palesitenisī Fineʻofa he siteikí.
Kau aleaʻanga māʻolunga ne vahe ke ngāue mo e ngaahi kōlomu ʻo e kaumātuʻá.
ʻE fakahinohinoʻi mo poupouʻi ʻe he kau taki ko ʻení ʻa e kau palesitenisī ʻo e kōlomu ʻo e kaumātuʻá mo e Fineʻofá ʻi honau ngaahi fatongia ki he ngāue fakatemipalé mo e hisitōlia fakafāmilí (vakai, 25.2.2). ʻE lava ke fakahoko e fakahinohinó ʻi ha kulupu pe fakafoʻituitui. ʻE lava ke fakaafeʻi ʻa e kau taki fakauooti ki he temipalé mo e hisitōlia fakafāmilí ke nau maʻu e fakahinohino ko ʻení.
Ki ha fakamatala lahi ange fekau‘aki mo e ngaahi fakataha ʻa e kōmiti ko ‘ení, vakai ki he 29.3.9.
25.3.3
Kau Aleaʻanga Māʻolungá
ʻE lava ke vahe ʻe he kau palesitenisī fakasiteikí ha kau aleaʻanga māʻolunga ke nau fakahinohinoʻi mo poupouʻi ʻa e kakai ko ʻení ʻi honau ngaahi fatongia ki he ngāue fakatemipalé mo e hisitōlia fakafāmilí:
Kau palesitenisī ʻo e kōlomu ʻo e kaumātuʻá
Kau taki fakauooti ʻi he temipalé mo e hisitōlia fakafāmilí
Kau faifaleʻi ʻo e temipalé mo e hisitōlia fakafāmilí he siteikí
ʻE lava ke vahe ha aleaʻanga māʻolunga ʻe toko taha pe tokolahi ange ke nau taki e ngaahi ngāue ko ʻení. Ka neongo ia, ʻoku maʻu ʻe he kau aleaʻanga māʻolunga kotoa pē ʻa e ngaahi fatongia ko ʻení ki he ngaahi uooti mo e ngaahi kōlomu ʻoku vahe kinautolu ki aí.
ʻE lava ke tokoni ʻa e kau aleaʻanga māʻolungá ki he kau taki fakauooti ʻi he temipalé mo e hisitōlia fakafāmilí ke fakahinohinoʻi e kau faifaleʻi fakauooti he temipalé mo e hisitōlia fakafāmilí. ʻE lava ke tokoniʻi e kau aleaʻanga māʻolungá ʻe he kau faifaleʻi fakasiteiki ʻi he temipalé mo e hisitōlia fakafāmilí.
ʻE lava ke vahe ʻe he kau palesitenisī fakasiteikí ha aleaʻanga māʻolunga ke ne fakafekauʻaki e ngaahi ngāue ʻa e siteikí ʻi he fakahokohoko fakamotuʻaleá (vakai, 25.4.3). ʻE lava ke vahe ki ai pe ko ha aleaʻanga māʻolunga kehe ke ne tokangaʻi ʻa e ngāue ʻi he ngaahi senitā FamilySearch (vakai, 25.3.6).
25.3.4
Kau Palesitenisī ʻo e Fineʻofá he Siteikí
Fakatatau mo e fakahinohino ‘a e palesiteni fakasiteikí, ʻe fakahinohino‘i mo poupouʻi ʻe he kau palesitenisī ʻo e Fineʻofá he siteikí ʻa e kau palesitenisī Fineʻofa he uōtí ʻi honau ngaahi fatongia ki he ngāue fakatemipalé mo e hisitōlia fakafāmilí.
Kau Faifaleʻi Fakasiteiki ʻi he Temipalé mo e Hisitōlia Fakafāmilí
ʻE poupouʻi ʻe he kau faifaleʻi fakasiteiki ʻi he temipalé mo e hisitōlia fakafāmilí ʻa e ngāue fakatemipale mo e hisitōlia fakafāmili kotoa ʻi he siteikí. ʻOku nau ngāue ʻi he malumalu ʻo e fakahinohino ʻa e kau palesitenisī fakasiteikí pea mo ha aleaʻanga māʻolunga ʻe toko taha pe tokolahi ange ne vahe ki he ngāue fakatemipalé mo e hisitōlia fakafāmilí.
ʻE poupouʻi ʻe he kau faifaleʻi ko ʻení ʻa e kau aleaʻanga māʻolungá mo e kau palesitenisī Fineʻofa ʻi he siteikí ʻi heʻenau feinga ke fakahinohinoʻi ha niʻihi kehe ʻi he ngāue fakatemipalé mo e hisitōlia fakafāmilí (vakai, 25.3.3 mo e 25.3.4). ʻE toe lava foki ke vahe ange kiate kinautolu ʻa e ngaahi ngāue ko ʻení:
Tokoni ke akoʻi mo poupouʻi e kāingalotú ʻi he ngaahi uiuiʻi fakauooti ki he temipalé mo e hisitōlia fakafāmilí.
Tokoni ke fakafekauʻaki ʻa e ngaahi ngāue ʻa e siteikí ki he fakahokohoko fakamotu‘aleá (25.4.3).
Ngāue ‘i he ngaahi senitā FamilySearch (vakai, 25.3.6).
Kapau ‘oku maʻu ha ngaahi maʻuʻanga tokoni, ʻe lava ke fokotuʻu ʻe he siteikí ha senitā FamilySearch ʻe taha pe toe lahi ange. Ko e ngaahi senitā ko ʻení ke tokoni ki he kau ʻaʻahí ke nau ʻilo, tānaki ha fakamatala, mo fakatahaʻi ʻa e kau mēmipa ʻo e fāmilí ʻoku kei moʻuí mo e kāinga kuo pekiá. ʻOku talitali lelei ha taha pē ke ne fakaʻaongaʻi ʻa e ngaahi senitā ko ʻení.
ʻE vahe ʻe he palesiteni fakasiteikí ha faifaleʻi fakasiteiki ʻe toko taha ki he temipalé mo e hisitōlia fakafāmilí ke ne tokangaʻi ʻa e ngaahi ngāue ʻi he senitā FamilySearch takitaha. Ko e senitā takitaha ʻoku meimei ke ngāue ai ʻa e kau faifaleʻi fakasiteiki mo fakauooti ʻo e temipalé mo e hisitōlia fakafāmilí. ‘Oku totonu ke fakaava ʻa e ngaahi senitā FamilySearch ʻi he ngaahi taimi ʻoku faingamālié.
Ko e fakaʻatā makehé pē, ʻoku ʻi ai ha ngaahi senitā FamilySearch lalahi ʻoku tokangaʻi ʻe he Kau Palesitenisī Fakaʻēliá.
25.3.7
Kau ʻEtivaisa Fakaʻēlia ki he Temipalé mo e Hisitōlia Fakafāmilí
ʻE lava ke uiuiʻi ʻe he Kau Palesitenisī Fakaʻēliá ha kau ʻetivaisa fakaʻēlia ki he temipalé mo e hisitōlia fakafāmilí. Kapau ʻe fakaʻatā ʻe he ngaahi tūkungá, pea ʻe lava ke ui ha toko taha pe ko ha ongomeʻa mali ki he fakataha alēlea fakafekauʻaki takitaha. ʻOku meimei ke ngāue ʻa e kau ʻetivaisá ʻi ha taʻu ʻe tolu ki he nima.
ʻE lava ke vahe ʻe he Kau Palesitenisī Fakaʻēliá ha Kau Fitungofulu Fakaʻēlia ke nau fakafekauʻaki ʻa e ngāue ʻa e kau ʻetivaisa ko ʻení ʻi he ngaahi fakataha alēlea fakafekauʻakí. ʻOku totonu ke fenāpasi e ngāue ʻa e kau ʻetivaisá mo e meʻa ʻoku tokanga ki ai ʻa e ʻēliá.
ʻE tokoni ʻa e kau ʻetivaisá ki he kau palesiteni fakasiteikí ke fakahoko honau fatongia ki he ngāue fakatemipalé mo e hisitōlia fakafāmilí, ʻo fakatatau mo e fakahinohino ʻa e Kau Palesitenisī Fakaʻēliá mo e Kau Fitungofulu Fakaʻēliá. ʻE tokoni ʻa e kau ʻetivaisá ki he kau palesiteni fakasiteikí ʻi heʻenau feinga ke akoʻi ʻa e kau aleaʻanga māʻolungá, kau palesitenisī fakasiteiki ʻo e Fineʻofá, ngaahi kōmiti takimuʻa fakasiteiki ʻo e kakai lalahi, pea mo e kau faifaleʻi fakasiteiki ʻo e temipalé mo e hisitōlia fakafāmilí ʻi honau ngaahi fatongiá.
ʻE lava ke vahe ha kau ʻetivaisa ke nau tokoni ki he kau palesitenisī fakasiteikí ke teuteuʻi e kāingalotú ke nau moihū ʻi he ngaahi temipale foʻou ne toki fanongonongo ʻi he ʻēliá. ʻE lava ke kau ʻi he ngaahi fatongia kehé hono fakahinohinoʻi e kau taki fakasiteikí ʻi he ngaahi tefitoʻi moʻoni mo e ngaahi founga ngāue ʻo e ngāue fakatemipalé mo e hisitōlia fakafāmilí. ʻOku kau heni ʻa e:
Founga hono fokotuʻutuʻu ʻo e ngāue fakatemipalé mo e hisitōlia fakafāmilí ʻi he siteikí mo e ngaahi uōtí (vakai, 25.3 mo e 25.2).
Founga ke poupouʻi ai e kau palesitenisī ʻo e kōlomu e kaumātuʻá mo e Fineʻofá ʻi honau ngaahi fatongiá (vakai, 25.2.2).
Founga ʻe lava ke faitāpuekina ai ʻe he ngāue fakatemipalé mo e hisitōlia fakafāmilí ʻa e fānaú mo e toʻu tupú (vakai, 10.2.4, 11.2.4, mo e 12.2.4).
Founga ke fakahoko ai ha ngaahi fakataha fakafekauʻaki lelei ʻi he temipalé mo e hisitōlia fakafāmilí (vakai, 25.2.7).
Founga ke tokoni ai ki he kau taki fakauōtí ʻi hono palani mo fokotuʻu ha ngaahi taumuʻá (vakai, 25.2.6).
Founga ke tokoniʻi ai e kāingalotú ke nau teuteu ke ō ki he temipalé (vakai, 25.2.8).
Founga ke tokoniʻi ai e kāingalotú ʻi heʻenau fuofua aʻusia ʻi he papitaiso fakafofonga ʻi he temipalé (vakai, 23.2).
Ngaahi Maʻuʻanga Tokoni ki he Hisitōlia Fakafāmilí
25.4.1
Ko Hoku Fāmilí: Ngaahi Talanoa ʻOkú Ne Fakatahatahaʻi Kimautolú
ʻOku tokoni ʻa e Ko Hoku Fāmilí: Ngaahi Talanoa ʻOkú Ne Fakatahatahaʻi Kimautolú ke ʻilo ʻe he kakaí honau kāingá mo ʻenau ngaahi kuí pea mo tānaki honau ngaahi talanoá. ʻE lava foki ʻa e kiʻi tohí ni ʻo tokoniʻi ʻa e kāingalotú ke nau kamata teuteu ʻa e ngaahi hingoa fakafāmilí ki he ngaahi ouau fakatemipalé.
FamilySearch.org mo e Ngaahi Polokalama FamilySearch
FamilySearch.org ko e uepisaiti ia ʻa e Siasí ki he ngāue fakatemipalé mo e hisitōlia fakafāmilí. ʻE lava ke ne tokoniʻi ʻa e kakai ʻoku nau fakaʻaongaʻí ke:
Fakatupulaki e ngaahi fehokotaki mo e ngaahi fetuʻutaki ʻi he fuʻu ʻakau fakafāmilí.
‘Ilo ‘a e ngaahi kuí mo honau ngaahi talanoá.
Fakamatalaʻi mo fakatolonga ʻa e ngaahi talanoa, ʻū tā, mo e ngaahi hisitōlia ʻo e fāmilí.
Teuteu ʻa e ngaahi hingoa fakafāmilí ki he ngaahi ouau fakatemipalé.
Ko e fakahokohoko fakamotu‘aleá ko e founga ia hono fakahū ʻo e fakamatalá mei ha lekooti fakahisitōlia naʻe hiki tohinima, ki ha tānakiʻanga fakamatala fakakomipiuta ʻe lava ke fai ai ha fekumi ʻi he FamilySearch.org. ʻOku ʻai ʻe kinautolu ʻoku fakahokohoko fakamotuʻaleá ke faingofua ange hono ʻilo ʻe he niʻihi kehé ʻa ʻenau ngaahi kuí pea fakahoko e ngaahi ouau fakatemipalé maʻanautolu.
‘E lava ha faʻahinga taha pē ke kau ʻi he fakahokohoko fakamotuʻaleá. ‘E lava ke hoko ʻeni ko ha aʻusia fakafiemālie maʻá e niʻihi ko ʻení:
Toʻu Tupú
Kakai lalahi kei talavoú
Kāingalotu ʻoku ʻikai ke nau lava ʻo maʻulotu maʻu pē ʻi he ngaahi houalotu ʻa e Siasí
Kāingalotu foʻoú
Kakaí fakalūkufua
ʻE lava ke vahe ʻe he kau palesitenisī fakasiteikí ki ha faifaleʻi ʻi he temipalé mo e hisitōlia fakafāmilí pe ko ha aleaʻanga māʻolunga ke ne fakafekauʻaki ʻa e ngāue ko ʻení.
Ki ha fakamatala lahi ange, vakai ki he “Indexing Overview” ʻi he FamilySearch.org.
25.5
Ko Hono Fakaongoongoleleiʻi mo Uiuiʻi ʻo e Kau Ngāue Temipalé
25.5.1
Ko Hono Fakaongoongoleleiʻi ʻo e Kau Ngāue Temipalé
ʻOku ʻilo ʻa e niʻihi ʻe lava ʻo hoko ko ha kau ngāue temipalé ʻi he ngaahi founga ko ʻení:
Kāingalotu ʻe ʻilo ʻe he pīsopé pe ʻe ha takimuʻa kehe pē ʻi he uōtí
Kāingalotu ʻoku nau omi ki he pīsopé ke nau ngāue
Kāingalotu ne fakaongoongoleleiʻi ʻe he palesiteni temipalé, metuloní, pe ko ha takimuʻa kehe mei he temipalé
Kāingalotu ʻoku lolotonga teuteu ke ngāue pe toki foki mai mei he ngāue fakafaifekaú (vakai, vahe 24)
‘Oku fakahū ʻa e ngaahi hingoa ʻo e kakai ʻe ala ngāue temipalé ʻo fakaʻaongaʻi e Recommend Temple Worker tool. ‘Oku ʻatā ʻa e polokalamá ni ki he kau pīsopé, kau palesiteni fakasiteikí, mo e kau palesitenisī ʻo e temipalé. ʻOku fakamatalaʻi atu ʻi lalo ʻa e founga ki hono fakahū mai ʻo e ngaahi hingoá.
Ko e taimi ʻe ʻilo ai ʻe ha pīsope ha taha ʻe lava ʻo hoko ko ha taha ngāue temipale pe maʻu ha fakaongoongolelei mei ha palesiteni temipale, te ne talanoa mo e mēmipá fekauʻaki mo e faingamālie ke ngāué. Te ne toe vakai‘i e ngaahi fiemaʻu ki he kau ngāue ouau ‘o e temipalé (vakai, 25.5.2) pe kau ngāue tokoni ʻo e temipalé (vakai, 25.5.3). Kapau ʻe fakatou ongoʻi ʻe he pīsopé mo e mēmipá ʻoku taau ʻa e faingamālié, ʻe fakafonu leva ʻe he pīsopé mo fakahū ʻa e fakaongoongoleleí ʻo fakaʻaongaʻi ʻa e meʻangāue Fakaongoongolelei ʻo e Taha Ngāue Temipalé. ‘Oku totonu ke mahino ki he mēmipá ʻoku ʻikai fakapapauʻi ʻe ha fakaongoongolelei kuo fakahū, ʻe ui pe ʻe vahe ia ko ha taha ngāue temipale.
ʻOku toe vakaiʻi hoko leva ʻa e fakaongoongoleleí ʻe he palesiteni fakasiteikí ki he kāingalotu ʻoku nofo ʻi ha siteikí. Ko e kāingalotu ʻoku nofo ʻi ha vahefonuá, ʻe toe vakaiʻi ia ʻe he palesiteni fakamisioná. Kapau ʻe fakangofua ʻe he palesiteni fakasiteikí pe fakamisioná ʻa e fakaongoongoleleí, te ne fakahū ia ki he palesiteni temipalé ke toe vakaiʻi ʻo fakaʻaongaʻi ʻa e meʻangāue ki he Fakaongoongoleleiʻi ʻo e Taha Ngāue Temipalé.
Ko e kāingalotu ‘oku uiuiʻi pe vahe ko e kau ngāue temipalé, ʻoku angamaheni ʻaki ke nau tukupā ki ha taimi pau ke nau ngāue ai ʻi he temipalé ʻi he uike takitaha. ‘Oku totonu ke fakaʻehiʻehi ʻa e kau takí mei hano ʻoange ha toe ngaahi uiuiʻi kehe te ne uesia e malava ʻa e kāingalotú ke ngāue ʻi he temipalé.
ʻOku toe fakahā foki ʻe he meʻangāue Fakaongoongoleleiʻi ʻo ha Taha Ngāue Temipalé ki he kau pīsopé mo e kau palesiteni fakasiteikí ha lisi ʻo e kāingalotu kotoa mei honau ngaahi uōtí pe siteikí ʻoku lolotonga ngāue ʻi he temipalé.
25.5.2
Ngaahi Tuʻutuʻuni ki he Kau Ngāue Ouau Fakatemipalé
ʻE tokoni ʻa e kau ngāue ouau fakatemipalé ke fakahoko ʻa e ngaahi ouau ʻi he temipalé. Ke fakaongoongoleleiʻi ko ha taha ngāue ouau, kuo pau ke aʻusia ʻe ha mēmipa ʻa e ngaahi fiemaʻu ko ʻení:
Nofo ʻi he vāhenga fakatemipale ʻo e temipale ʻe ngāue aí.
ʻOsi maʻu ʻenitaumeni, tauhi e ngaahi fuakava fakatemipalé, pea mo ʻi ai haʻane lekomeni temipale ʻoku kei ʻaonga.
Maʻu ha fakamoʻoni mālohi ki he ongoongolelei ʻo Sīsū Kalaisi kuo fakafoki maí.
Ke malava fakatuʻasino ke fakahoko e ngaahi ouaú ʻo ʻikai toe tokoniʻi.
Moʻui taau mo fakaʻapaʻapaʻi ʻi he Siasí pea mo e tukui koló.
Fengāueʻaki lelei mo e kakai kehé.
Falalaʻanga mo moʻui lelei.
ʻIkai ke lolotonga ʻi ai ha kiʻi fakamatala makehe ʻi hono lekooti mēmipasipí.
ʻIkai ngata ai, ʻe fakapapauʻi ʻe he pīsopé ʻa e ngaahi meʻa ko ʻení:
Kapau naʻe tuʻutuʻuni ke fakangatangata ha mēmipasipi ʻo ha taha, ʻe lava ke fakaongoongoleleiʻi ia ko ha tokotaha ngāue ouau ʻo ʻikai toe vave ange ʻi he taʻu ʻe nimá, hili hono toʻo ʻo e ngaahi fakangatangatá. (Vakai, 32.11.3 mo e 32.16.1.)
Kapau naʻe toʻo ʻa e mēmipasipi ʻo ha taha naʻe teʻeki maʻu ʻenitaumeni, pe naʻe kole ʻe he tokotahá ke toʻo hono mēmipasipí, ʻe lava ke fakaongoongoleleiʻi ia ko ha tokotaha ngāue ouau ʻo ʻikai toe vave ange ʻi he taʻu ʻe nima hili hono fakafoki mai ia ki he Siasí. (Vakai, 32.11.4, 32.14.9, 32.16.1, mo e 32.16.2.)
Kapau naʻe toʻo ʻa e mēmipasipi ʻo ha taha ne ʻosi maʻu ʻenitaumeni, pe kapau naʻe kole ʻe he tokotahá ke toʻo hono mēmipasipí, ʻe lava ke fakaongoongoleleiʻi ia ko ha taha ngāue ouau ʻo ʻikai toe vave ange ʻi he taʻu ʻe nima hili hono fakafoki hono ngaahi tāpuakí. (Vakai , 32.11.4, 32.14.9, mo e 32.17.2.)
Kapau kuo teʻeki ʻosi ha taʻu ʻe nima talu mei he meʻa ʻoku fakahā ʻi ʻolungá, ʻe lava ke fakaongoongoleleiʻi ʻa e mēmipá ko ha tokotaha ngāue tokoni ʻi he temipalé kapau ʻokú ne fakakakato ʻa e ngaahi fiemaʻu ki he ngāue ko iá.
25.5.3
Ngaahi Tuʻutuʻuni ki he Kau Ngāue Taʻetotongi ʻo e Temipalé
ʻE tokoni ʻa e kau ngāue taʻetotongi ʻo e temipalé ʻi ha ngaahi ngāue fakataki ʻi he temipalé, hangē ko e ngāue he ʻōfisí pe falefoó. Ke fakaongoongoleleiʻi ha taha ke ngāue taʻetotongi ʻi he temipalé, kuo pau ke fakakakato ʻe he mēmipá ʻa e ngaahi fiemaʻu ko ʻení:
Nofo ʻi he vāhenga fakatemipale ‘o e temipale ‘e ngāue aí.
ʻOsi maʻu ʻenitaumeni, tauhi e ngaahi fuakava fakatemipalé, pea maʻu mo haʻane lekomeni temipale ʻoku kei ʻaonga.
Fengāueʻaki lelei mo e kakai kehé.
Falalaʻanga mo moʻui lelei.
ʻIkai ke lolotonga ʻi ai ha kiʻi fakamatala makehe ʻi hono lekooti mēmipasipí.
Ko e fakaʻatā makehe pē ki he ngaahi fiemaʻu ko ʻení, ko e kāingalotu ʻoku fie ngāue taʻetotongi ʻi tuʻa he temipalé he ʻikai fie maʻu ia ke nau ʻosi maʻu ʻenitaumeni. Ko e sīpingá, ko ha mēmipa ʻoku ngāue ʻi he ngoue ʻo e temipalé.
25.5.4
Ko Hono Uiuiʻi mo Vaheʻi ʻo e Kau Ngāue Ouaú
Ka hili hano maʻu ʻe he palesiteni temipalé ha fakaongoongolelei ʻo ha taha ke ngāue ko ha taha faiouau, ʻe ʻinitaviu ʻe ha mēmipa ʻo e kau palesitenisī ʻo e temipalé pe ko ha taha naʻá ne vahe ki ai, ʻa e tokotahá. ʻE hanga ʻe he tokotaha te ne fakahoko ʻa e ʻinitaviú ʻo ui ʻa e niʻihi ʻe lava ke hoko ko e kau ngāue ouaú pea vaheʻi kinautolu.
25.5.5
Ko Hono Vahe e Ngāué ki he Kau Ngāue Taʻetotongí
ʻE lava ke ʻinitaviu mo vahe ha ngāue ki he kau ngāue taʻetotongi ʻo e temipalé ʻe ha mēmipa ʻo e kau palesitenisī ʻo e temipalé pe ko ha taha naʻá ne vahe ki ai. Ko e kau ngāue taʻetotongí ʻoku vahe kia kinautolu ʻa e ngāué kae ʻikai ke uiuiʻi. ʻOku ʻikai fie maʻu ke vaheʻi kinautolu.
