23.

Pagbabahagi ng Ebanghelyo at Pagpapalakas ng mga Bago at Nagbabalik na Miyembro

23.0

Pambungad

Ang pag-anyaya sa lahat na tanggapin ang ebanghelyo ay bahagi ng gawain ng kaligtasan at kadakilaan ng Diyos (tingnan sa 1.2 ng hanbuk na ito; Mateo 28:19–20). Kabilang dito ang:

• Pakikibahagi sa gawaing misyonero at paglilingkod bilang missionary.

• Pagtulong sa mga bago at nagbabalik na miyembro na umunlad sa landas ng tipan.

23.1

Ibahagi ang Ebanghelyo

Mahal tayo ni Jesucristo. Ibinahagi Niya ang Kanyang ebanghelyo sa atin, at inaanyayahan Niya ang lahat na lumapit sa Kanya. Magagawa rin natin iyan.

23.1.1

Pagmamahal

Tayong lahat ay mga anak ng Ama sa Langit na lubos ang pagmamahal sa Kanyang mga anak. Binibigyan Niya ang lahat ng pagkakataong mapuspos ng Kanyang pagmamahal sa pamamagitan ni Jesucristo at ng Kanyang ebanghelyo (tingnan sa Juan 3:16; 2 Nephi 26:24–28; Alma 26:37; Mga Saligan ng Pananampalataya 1:3).

Ang isang paraan na maipakikita natin ang ating pagmamahal sa Diyos ay sa pamamagitan ng pagmamahal at paglilingkod sa Kanyang mga anak na tulad ng ginawa ni Jesucristo (tingnan sa Mateo 22:36–39; 25:40). Ang pagmamahal na ito ay naghihikayat sa atin na kilalanin ang mga nasa paligid natin at tulungan ang mga tao anuman ang kanilang pinagmulan, lahi, at kultura (tingnan sa Mga Gawa 10:34; 2 Nephi 26:33; Jacob 2:17). Tayo ay nananalangin para sa at naghahanap ng mga pagkakataong maibahagi ang ebanghelyo sa iba (tingnan sa Alma 6:6; 8:10).

23.1.2

Pagbabahagi

Dahil mahal natin ang Diyos at ang Kanyang mga anak, natural nating gugustuhing ibahagi ang mga pagpapalang ibinigay Niya sa atin (tingnan sa Juan 13:34–35) at tumulong na tipunin ang Israel. Hinahangad nating tulungan ang mga tao na madama ang kagalakang nadarama natin (tingnan sa Alma 36:24). Bilang mga disipulo ni Jesucristo, dapat nating itaas ang Kanyang liwanag (tingnan sa 3 Nephi 18:24–25). Hayagan tayong nagsasalita tungkol sa Tagapagligtas at sa Kanyang impluwensya sa ating buhay (tingnan sa Doktrina at mga Tipan 60:2).

Nagbabahagi tayo ng pagmamahal, mga katotohanan ng ebanghelyo, oras, mga karanasan, at mga programa ng Simbahan para mapagpala ang mga anak ng Diyos at tulungan silang mapalapit sa Tagapagligtas. Ibinabahagi natin ang mga bagay na ito sa normal at natural na mga paraan bilang bahagi ng ating mga pakikipag-ugnayan sa personal, online, at sa iba pang mga pagkakataon.

Ang mga ward at stake ay maaaring lumikha ng natural na mga oportunidad upang makapagbahagi ang mga miyembro sa ibang tao. Ang isang paraan para magawa ito ay sa pamamagitan ng pagdaraos ng mga kaganapan at aktibidad. Para sa karagdagang impormasyon, tingnan ang “Share Ward Activities” sa Gospel Library.

Nagsasanggunian din ang mga lider ng ward at stake upang matukoy ang (1) mga pangangailangan sa lokal na komunidad at (2) mga resource ng Simbahan na maibabahagi para makatulong na matugunan ang mga pangangailangang iyon. Para sa karagdagang impormasyon, tingnan ang “Share Church Resources” sa Gospel Library.

23.1.3

Pag-aanyaya

Inaanyayahan ng Tagapagligtas ang lahat na tanggapin ang Kanyang ebanghelyo at maghanda para sa buhay na walang hanggan (tingnan sa Alma 5:33–34). Bilang Kanyang mga disipulo, tinutularan natin ang Kanyang halimbawa, inaanyayahan ang lahat na “lumapit kay Cristo, at maging ganap sa kanya” (Moroni 10:32).

Ipinagdarasal natin na bigyan tayo ng inspirasyon at patnubay kung paano aanyayahan ang iba na:

• Pumarito at tingnan ang mga pagpapalang matatamo sa pamamagitan ni Jesucristo, ng Kanyang ebanghelyo, at ng Kanyang Simbahan (tingnan sa Juan 1:37–39, 45–46).

• Pumarito at maglingkod sa mga taong nangangailangan.

• Pumarito at mamalagi sa ipinanumbalik na Simbahan ni Jesucristo.

Kadalasan, ang ibig sabihin ng pag-anyaya ay ang pagsali sa ating mga kapamilya, kaibigan, at kapitbahay sa mga bagay na ginagawa na natin. Halimbawa, isiping anyayahan ang mga tao batay sa kanilang mga pangangailangan at interes sa:

• Mga sacrament meeting at iba pang mga miting sa araw ng Linggo. Isa sa pinakamahalagang karanasang maibibigay natin sa iba ay ang samahan sila sa pagdalo sa sacrament meeting at tulungan sila na maramdaman na sila ay malugod na tinatanggap at magkaroon ng espirituwal na karanasan (tingnan sa 3 Nephi 18:22–23).

• Espesyal na mga kaganapan sa Simbahan, tulad ng pagbabasbas sa mga sanggol at mga binyag.

• Mga aktibidad ng ward at stake, kabilang na ang mga aktibidad ng Primary at kabataan (tingnan ang “Share Ward Activities” sa Gospel Library).

• Mga aktibidad sa ating tahanan.

• Mga programa ng Simbahan, tulad ng seminary, institute, family history, mga klase sa self-reliance, at mga proyekto sa JustServe.org (kung saan mayroon).

• Mga lesson ng mga missionary.

Para sa iba pang mga ideya at sanggunian, tingnan ang:

• share.ChurchofJesusChrist.org.

• Pagbabahagi ng Ebanghelyo sa Gospel Library.

• Ang bahaging “Makiisa sa mga Miyembro” kabanata 9 ng Mangaral ng Aking Ebanghelyo: Gabay sa Pagbabahagi ng Ebanghelyo ni Jesucristo.

Kapag tayo ay nagmahal, nagbahagi, at nag-anyaya na tulad ni Cristo, maglalagay ang Diyos ng mga pagkakataon sa ating landas (tingnan sa Doktrina at mga Tipan 11:3–5, 8). Ang anumang pagsisikap na ipamuhay ang mga alituntunin ng pagmamahal, pagbabahagi, at pag-aanyaya ay makabuluhan, nakipagkita man sa mga missionary o sumapi man sa Simbahan ang isang tao o hindi.

Ang mga alituntunin ng pagmamahal, pagbabahagi, at pag-aanyaya ay angkop din sa pagpapalakas ng mga bago at nagbabalik na miyembro.

23.2

Palakasin ang mga Bagong Miyembro

Ang pagsapi sa Simbahan ay kapwa napakaganda at mahirap para sa marami. Nagdadala ito ng malalaking pagpapala, ngunit kailangan din dito ang pagtanggap at pakikibagay sa mga bagong paniniwala, mga bagong gawi, at mga bagong ugnayan (tingnan sa 1 Tesalonica 1:6).

Ang bawat bagong miyembro ay nangangailangan ng kaibigan, mga pagkakataong maglingkod, at espirituwal na pangangalaga. Bilang mga miyembro ng Simbahan, ibinibigay natin ang ating pagmamahal at suporta sa mga bagong miyembro (tingnan sa Mosias 18:8–10). Tinutulungan natin silang madama na kabilang sila sa Simbahan. Tinutulungan natin silang umunlad sa landas ng tipan (tingnan sa 23.4.1) at maging mas “nagbalik-loob sa Panginoon” (Alma 23:6). Tinutulungan natin silang “mapangalagaan ng mabuting salita ng Diyos, upang mapanatili sila sa tamang daan, … umaasa lamang sa mga gantimpala ni Cristo” (Moroni 6:4).

Matutulungan din natin ang mga bagong miyembro na:

• Malaman at maranasan ang kagalakang nagmumula sa pagiging disipulo ni Jesucristo.

• Malaman kung paano makikilala ang mga pahiwatig mula sa Espiritu.

• Makaugalian ang pagdarasal at pag-aaral ng mga banal na kasulatan nang personal at kasama ang pamilya.

• Ibahagi ang ebanghelyo sa kanilang mga kapamilya at mga kaibigan.

• Hanapin ang mga pangalan ng mga ninuno at maghandang tanggapin ang mga ordenansa sa templo para sa kanila (tingnan sa 25.4).

• Umunlad sa pamamagitan ng pagtupad sa mga takdang-gawain sa Simbahan at pakikibahagi sa maraming iba pang mga oportunidad na ibinibigay ng Simbahan.

23.3

Palakasin ang mga Nagbabalik na Miyembro

Pinipili ng ilang miyembro na tumigil sa pakikibahagi sa Simbahan. “Sa mga yaon,” sinabi ng Tagapagligtas, “kayo ay patuloy na maglilingkod; sapagkat hindi ninyo alam kung sila ay magbabalik at magsisisi, at lalapit sa akin nang may buong layunin ng puso, at pagagalingin ko sila; at kayo ang magiging daan ng pagdadala ng kaligtasan sa kanila” (3 Nephi 18:32). Ang mga salitang ito ay angkop sa lahat na nangangailangan ng patuloy na pagmiminister, anuman ang dahilan.

Ang mga miyembrong hindi lubos na nakikibahagi ay mas malamang na bumalik kung mayroon silang matibay na ugnayan sa mga miyembro ng Simbahan. Ang ating pagmamahal at suporta ay makatutulong sa kanila na madaig ang mga hamon. Tulad ng mga bagong miyembro, kailangan nila ng kaibigan, mga pagkakataong maglingkod, at espirituwal na pangangalaga. Ang pag-unawa sa kanilang mga kalagayan at mga hamon ay makatutulong sa atin na magminister sa kanila nang may pagiging sensitibo at pagmamahal.

23.4

Magdaos ng mga Lingguhang Missionary Coordination Meeting

Bawat linggo, nagdaraos ng maikli at hindi pormal na mga miting upang pag-ugnayin ang mga pagsisikap na ibahagi ang ebanghelyo. Ang layunin ng mga miting na ito ay tulungan ang mga taong tinuturuan, mga bagong miyembro, at mga nagbabalik na miyembro na gumawa at tumupad ng mga tipan. Kung may tinawag na ward mission leader, siya ang nangangasiwa sa mga miting na ito. Kung walang tinawag na ward mission leader, ang miyembro ng elders quorum presidency na gumaganap sa tungkulin ng ward mission leader ang mangangasiwa sa miting.

Kabilang sa iba pang inaanyayahang dumalo ang:

• Mga inatasang miyembro ng Relief Society presidency, elders quorum presidency, at Primary presidency.

• Mga ward missionary.

• Isang assistant sa priests quorum (o ang teachers o deacons quorum president kung walang mga priest sa ward).

• Isang miyembro ng presidency ng pinakamatandang Young Women class.

• Mga full-time missionary.

Ang mga lingguhang missionary coordination meeting ay nakatuon sa mga pangangailangan ng mga indibiduwal. Karaniwang kabilang sa agenda o mga pag-uusapan ang mga sumusunod:

• Paano tulungan ang mga tinuturuan ng mga missionary

• Paano tutulungan ang mga bagong binyag

• Paano tulungan ang mga miyembro na hindi miyembro ang buong pamilya at mga nagbabalik na miyembro

• Paano makahanap ng mas maraming taong tuturuan

Ang report ng Pag-unlad sa Landas ng Tipan, mga mungkahi sa bahaging “Mga Lingguhang Coordination Meeting” sa kabanata 13 ng Mangaral ng Aking Ebanghelyo, at ang mga tanong sa ibaba ay makatutulong sa paggabay sa mga lingguhang plano.

• Paano natin matutulungan ang mga indibiduwal na magsimba, magkaroon ng nakasisiglang karanasan, at magkaroon ng mga kaibigan?

• Paano natin masusuportahan ang plano ng ward sa pagbabahagi ng ebanghelyo?

• Paano makatutulong ang ward council, at sino ang makikipag-ugnayan sa kanila?

Ang mga miting na ito ay maaaring idaos nang personal o online. Ang pakikipag-ugnayan ay maaari ding gawin sa iba pang paraan, tulad ng pagtawag sa telepono o group text.

Sikaping sundin ang mga alituntunin ng pagkilos at pananagutan sa 4.4.5. Maaaring atasan ang isang tao sa meeting na itala at ipaalala sa grupo ang mga nakaplanong gagawin.

Maaaring piliin ng maliliit na branch na gawin ang kanilang lingguhang coordination sa branch council.

Tingnan ang halimbawa ng isang meeting agenda at iba pang mga halimbawa ng coordination sa “Ideas for Weekly Missionary Coordination” sa Gospel Library.

23.4.1

Ang Aking Landas ng Tipan at Report ng Pag-unlad sa Landas ng Tipan

Ang sumusunod na mga resource ay makatutulong sa paggabay sa mga talakayan sa lingguhang missionary coordination meeting:

• Ang Aking Landas ng Tipan. Ang sanggunian na ito ay tumutulong sa mga bago at nagbabalik na miyembro na umunlad sa landas ng tipan sa unang 12 hanggang 24 na buwan matapos ang binyag o pagkatapos bumalik sa pakikibahagi sa ebanghelyo. Ang Ang Aking Landas ng Tipan ay makukuha sa Gospel Library.

• Report ng Pag-unlad sa Landas ng Tipan. Ginagamit ng mga lider ng ward ang resource na ito upang itala at makita ang progreso ng mga bago at nagbabalik na miyembro at ng mga taong tinuturuan ng mga missionary. Ang Pag-unlad sa Landas ng Tipan ay makikita at maaring i-update ng mga lider ng ward sa Member Tools app at sa Leader and Clerk Resources (LCR). Ang Pag-unlad sa Landas ng Tipan ay maaaring ma-access at i-update ng mga full-time missionary sa pamamagitan ng Preach My Gospel app.

23.5

Mga Lider ng Stake

23.5.1

Stake Presidency

Taglay ng stake president ang mga susi sa stake para sa pagbabahagi ng ebanghelyo at pagpapalakas sa mga bago at nagbabalik na miyembro. Siya at ang kanyang mga counselor ang namamahala sa mga pagsisikap na ito sa pangkalahatan. Sinisiguro niya na ang gawaing ito ay regular na tinatalakay sa mga miting ng stake.

Ang stake president ay nakikipagpulong sa mission president, karaniwang isang beses bawat buwan, upang pag-ugnayin ang mga pagsisikap ng mga lider ng stake at ward at ng mga full-time missionary. Kabilang sa iba pang maaaring dumalo ay ang:

• Mga counselor sa stake presidency at mission presidency.

• Mga inatasang high councilor.

• Ang stake Relief Society president.

• Mga missionary na inatasan ng mission president.

23.5.2

Stake Adult Leadership Committee

Kabilang sa stake adult leadership committee ang:

• Stake presidency.

• Stake Relief Society presidency.

• Mga high councilor na inatasang makipagtulungan sa mga elders quorum.

Tinuturuan at sinusuportahan ng mga lider na ito ang mga elders quorum presidency at mga ward Relief Society presidency sa kanilang mga pagsisikap na ibahagi ang ebanghelyo at palakasin ang mga bago at nagbabalik na miyembro (tingnan sa 23.6.2). Ang pagtuturo na ito ay maaaring gawin bilang grupo o nang personal. Maaaring anyayahan ang mga ward mission leader para maturuan din sila.

Para sa karagdagang impormasyon tungkol sa mga miting ng komiteng ito, tingnan ang 29.3.8.

23.5.3

Mga High Councilor

Maaaring atasan ng stake presidency ang mga high councilor na turuan at suportahan ang mga elders quorum presidency at mga ward mission leader. Maaaring mag-atas ng isa o higit pang mga high councilor para pamunuan ang mga pagsisikap na ito. Gayunman, lahat ng mga high councilor ay mayroong ganitong mga responsibilidad para sa mga ward at korum na nakaatas sa kanila.

23.5.4

Stake Relief Society Presidency

Sa ilalim ng pamamahala ng stake president, tinuturuan at sinusuportahan ng stake Relief Society presidency ang mga ward Relief Society presidency sa kanilang mga responsibilidad sa pagbabahagi ng ebanghelyo at pagpapalakas ng mga bago at nagbabalik na miyembro.

23.6

Mga Lider ng Ward

23.6.1

Bishopric

Ang bishopric ay nakikipagtulungan sa elders quorum presidency at Relief Society presidency sa pamumuno sa mga pagsisikap ng ward sa pagbabahagi ng ebanghelyo at pagpapalakas ng mga bago at nagbabalik na miyembro. Regular na nagsasanggunian ang mga lider na ito.

Sinisiguro ng bishopric na ang mga pagsisikap na ito ay tinatalakay at pinag-uugnay sa mga ward council meeting at ward youth council meeting. Nirerebyu at inaaprubahan din ng bishopric ang plano ng ward para sa pagbabahagi ng ebanghelyo at pagpapalakas ng mga bago at nagbabalik na miyembro (tingnan sa 23.6.6).

Ang bishopric ay sumasangguni sa stake president upang matukoy kung tatawag ba ng isang ward mission leader (tingnan ang 23.6.3 para sa karagdagang impormasyon).

Iniinterbyu ng bishop ang mga bagong miyembro na angkop ang edad para makatanggap ng temple recommend para magsagawa ng mga proxy na binyag at kumpirmasyon (tingnan sa 26.5.1). Iniinterbyu rin niya ang mga lalaki na angkop ang edad upang tanggapin ng Aaronic Priesthood (tingnan sa 38.2.9.1). Maaari niyang gawin ang dalawang ito sa iisang interbyu. Karaniwang isinasagawa niya ang interbyu na ito sa loob ng isang linggo pagkatapos ng kumpirmasyon ng miyembro. Maaaring atasan ng bishop o branch president ang isa sa kanyang mga counselor para isagawa ang interbyu na ito. Pagkatapos ay maaaring ialok ng bishop na gamitin ang Family Name Assist para matulungan ang bagong miyembro na mai-print ang pangalan ng isang yumaong kapamilya na maaari niyang gawan ng mga ordenansa sa templo (tingnan sa “Family Name Assist” sa 25.4.1).

Nakikipag-ugnayan ang bishopric sa iba pang mga lider upang matiyak na ang mga bago at nagbabalik na miyembro ay may mga pagkakataong maglingkod. Ang gayong mga oportunidad ay makatutulong sa mga miyembrong ito na umunlad sa espirituwal at madama ang kapangyarihan ng Panginoon sa kanilang buhay. Ang paglilingkod ay makatutulong din sa mga miyembro na makadama ng kagalakan at makabuo ng malapit na mga ugnayan sa iba sa ward.

Ang mga oportunidad sa paglilingkod ay dapat batay sa mga pangangailangan at kakayahan ng miyembro. Sa ilang pagkakataon, angkop ang isang calling. Sa iba naman, mas mainam ang hindi gaanong pormal na takdang-gawain.

23.6.2

Elders Quorum Presidency at Relief Society Presidency

Ang mga elders quorum presidency at Relief Society presidency ang namumuno sa pang-araw-araw na mga pagsisikap ng ward na ibahagi ang ebanghelyo at palakasin ang mga bago at nagbabalik na miyembro (tingnan sa 8.2.3 at 9.2.3). Pinamumunuan ng elders quorum presidency ang mga pagsisikap na ito para sa mga miyembro ng elders quorum. Pinamumunuan ng Relief Society presidency ang mga pagsisikap ng mga miyembro ng Relief Society. Sila ay nagtutulungan na pamunuan ang mga pagsisikap na ito kasama ang ward council, sa pakikipagtulungan sa bishop.

Ang mga lider na ito ay may sumusunod na mga responsibilidad:

• Tumulong na mahikayat ang mga miyembro na mahalin ang mga anak ng Diyos, ibahagi ang ebanghelyo, at anyayahan ang iba na tanggapin ang mga pagpapala ng Tagapagligtas (tingnan sa 23.1).

• Sumangguni sa mga miyembro ng korum o Relief Society kung paano ibabahagi ang ebanghelyo. Talakayin kung paano maghahanap ng mga taong matuturuan ng mga missionary at kung paano susuportahan ang mga taong tinuturuan. Magsanggunian tungkol sa mga pangangailangan ng mga bago at nagbabalik na miyembro at kung paano magbibigay ng suporta.

• Magbigay ng mga ministering brother at mga ministering sister sa mga bago at nagbabalik na miyembro (tingnan sa 21.2.1). Maaari ding bigyan ng mga ministering brother at mga ministering sister ang mga taong tinuturuan ng mga missionary (ginagawa ito nang may pakikipag-ugnayan sa mga missionary). Kung maaari, inaatasan ng mga lider ang mga miyembro na mayroon o maaaring makabuo ng malapit na pakikipagkaibigan sa mga taong ito. Hinihikayat ng mga lider ang mga ministering brother at mga ministering sister na magbigay ng pagmamahal at suportang tulad ng kay Cristo.

• Bigyan ang mga bago at nagbabalik na miyembro ng mga pagkakataong maglingkod bilang mga ministering sister o mga ministering brother. Para sa karagdagang impormasyon tungkol sa ministering, tingnan ang kabanata 21.

• Tulungan ang ward council na bumuo ng isang plano para sa pagbabahagi ng ebanghelyo at pagpapalakas ng mga bago at nagbabalik na miyembro (tingnan sa 23.6.6).

• Pamunuan ang gawain ng ward mission leader. Kung walang tinawag na ward mission leader, isang miyembro ng elders quorum presidency ang gaganap sa tungkuling ito (tingnan sa 23.6.3).

Ang elders quorum president at Relief Society president ay inaatasan ang isang miyembro ng kanilang presidency na tumulong sa pamumuno sa mga pagsisikap na ito. Nagtutulungan ang dalawang miyembrong ito ng presidency. Dumadalo sila sa mga lingguhang coordination meeting (tingnan sa 23.4).

23.6.3

Ward Mission Leader

Ang bishopric ay sumasangguni sa stake president upang matukoy kung tatawag ba ng isang ward mission leader. Kung napagpasiyahan nila na tumawag ng ward mission leader, sasangguni ang bishop sa elders quorum president at Relief Society president para matukoy kung sino ang tatawagin.

Ang ward mission leader ay dapat mayhawak ng Melchizedek Priesthood. Kung walang tinawag na ward mission leader, isang miyembro ng elders quorum presidency ang gaganap sa tungkuling ito.

Sinusuportahan ng ward mission leader ang elders quorum presidency at Relief Society presidency sa kanilang mga responsibilidad sa gawaing misyonero. Responsibilidad din niya ang mga sumusunod:

• Pag-ugnayin ang gawain ng mga miyembro at lider ng ward, mga ward missionary, at mga full-time missionary. Maaaring kabilang dito ang pag-oorganisa ng mga pagsisikap sa pagtuturo, serbisyo sa binyag, at pagsisikap na palakasin ang mga bagong miyembro. Maaari ding kabilang dito ang pagpaplano ng mga paraan para matulungan ang mga miyembro ng ward na ibahagi ang ebanghelyo.

• Pamunuan ang mga lingguhang coordination meeting (tingnan sa 23.4).

• Dumalo sa mga ward council meeting kapag inanyayahan.

• Tulungan ang ward council sa pagbuo at pagpapatupad ng plano ng ward para sa pagbabahagi ng ebanghelyo at pagpapalakas ng mga bago at nagbabalik na miyembro (tingnan sa 23.6.6).

• Maghanap ng mga pagkakataong tulungan ang mga full-time missionary na maisakatuparan ang kanilang layunin sa pamamagitan ng pagbabahagi ng ebanghelyo at pagbuo ng mga ugnayan sa mga miyembro. Kung saan inaprubahan, maaaring kabilang dito ang pagkain kasama ang mga miyembro (mas maganda kung sa mga miyembro na hindi miyembro ang buong pamilya at mga bago at nagbabalik na miyembro hangga’t maaari; tingnan sa 24.6.2.3).

• Makipagtulungan sa ward temple and family history leader at mga ward temple and family history consultant para matulungan ang mga nag-aaral ng ebanghelyo, mga bagong miyembro, at mga nagbabalik na miyembro na makibahagi sa mga pagsisikap sa templo at family history.

23.6.4

Mga Ward Missionary

Tinutulungan ng mga ward missionary ang mga miyembro ng ward na maranasan ang kagalakan na nagmumula sa pagbabahagi ng ebanghelyo ayon sa inilarawan sa 23.1. Sila ay naglilingkod sa ilalim ng pamamahala ng ward mission leader o ng miyembro ng elders quorum presidency na gumaganap sa tungkuling ito. Maaaring magmungkahi ang mga elders quorum president at Relief Society president ng mga miyembrong maaaring maglingkod.

Ang mga ward missionary ay nagtuturo sa salita at halimbawa kung paano mahalin ang iba, ibahagi ang kanilang pananampalataya, at anyayahan ang iba na tanggapin ang mga pagpapala ng ebanghelyo. Tinutulungan din nila ang mga miyembro ng ward na magminister sa mga bago at nagbabalik na miyembro.

Ang mga ward missionary ay nakikibahagi sa mga lingguhang coordination meeting (tingnan sa 23.4).

23.6.5

Ward Council at Ward Youth Council

Ang pagbabahagi ng ebanghelyo at pagpapalakas ng mga bago at nagbabalik na miyembro ay dapat talakayin nang regular sa mga ward council meeting. Maaaring atasan ng bishop ang ward mission leader (o ang miyembro ng elders quorum presidency na gumaganap sa tungkuling ito), elders quorum president, o Relief Society president na pamunuan ang mga talakayang ito. (Tingnan sa 23.4.)

Maaaring talakayin ng council ang plano ng ward para sa pagbabahagi ng ebanghelyo at pagpapalakas ng mga bago at nagbabalik na miyembro. Pinag-uugnay nila ang mga takdang-gawain ng iba’t ibang organisasyon.

Ang mga resource na tulad ng Ang Aking Landas ng Tipan at ang Report ng Pag-unlad sa Landas ng Tipan ay makatutulong sa mga talakayang ito (tingnan sa 23.4.1).

Para sa karagdagang impormasyon tungkol sa ward council, tingnan ang 29.2.5.

Binibigyan ng ward youth council ng espesyal na pansin ang mga kabataan na:

• Bago at nagbabalik na miyembro.

• Hindi miyembro ang buong pamilya.

• Tinuturuan ng mga missionary.

• Mga kaibigan na iba ang pananampalataya o paniniwala.

23.6.6

Plano ng Ward para sa Pagbabahagi ng Ebanghelyo at Pagpapalakas ng mga Bago at Nagbabalik na Miyembro

Ang bawat ward ay dapat magkaroon ng isang simpleng plano sa pagbabahagi ng ebanghelyo at pagpapalakas ng mga bago at nagbabalik na miyembro. Makatutulong ang planong ito na magkaroon ng direksyon ang mga miting, mga paglilingkod, at mga aktibidad. Maaaring kabilang dito ang mga plano at ideya para sa:

• Pagtulong sa lahat na madama na tanggap sila sa mga pulong at aktibidad ng ward.

• Pagtulong sa mga miyembro na maranasan ang kagalakan na nagmumula sa pagbabahagi ng ebanghelyo.

• Pagsuporta sa mga taong tinuturuan ng mga missionary.

• Pagtulong sa mga bago at nagbabalik na miyembro na umunlad sa espirituwal.

Tinutulungan ng elders quorum president at Relief Society president ang ward council na buuin ang plano. Tumutulong din ang ward mission leader. Nirerebyu at inaaprubahan ito ng bishop.

Pinangungunahan ng mga miyembro ng ward council ang pagpapatupad sa planong ito. Inirereport nila sa mga ward council meeting ang mga nagawa nila. Ina-update din nila ang plano kung kinakailangan.