22. Pagsangkap sa Temporal nga mga Panginahanglan ug Pagpalambo sa Pagbarog pinaagi sa Kinaugalingong Paningkamot
“22. Pagsangkap sa Temporal nga mga Panginahanglan ug Pagpalambo sa Pagbarog pinaagi sa Kinaugalingong Paningkamot,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2020).
“22. Pagsangkap sa Temporal nga mga Panginahanglan ug Pagpalambo sa Pagbarog pinaagi sa Kinaugalingong Paningkamot,” Kinatibuk-ang Tamdanan nga Basahon.
Imahe
lalaki nga nagtrabaho
22.
Pagsangkap sa Temporal nga mga Panginahanglan ug Pagpalambo sa Pagbarog pinaagi sa Kinaugalingong Paningkamot
22.0
Pasiuna
Ang mga miyembro sa Simbahan nakigsaad sa “pagtambayayong sa usag usa nga mga alant[o]son, … pagbang[o]tan uban niadto nga nagbang[o]tan … , ug paghupay niadtong nagkinahanglan sa kahupayan” (Mosiah 18:8–9). Ang pag-atiman niadtong kinsa adunay temporal nga mga panginahanglan kabahin sa buhat sa Dios sa kaluwasan ug kahimayaan (tan-awa sa 1.2). Kini nga responsibilidad alang sa tanang miyembro sa Simbahan samtang sila mangalagad sa usag usa.
Ang mga miyembro sa Simbahan gitambagan usab sa paglig-on sa ilang kaugalingong pagpalambo sa pagbarog pinaagi sa kinaugalingong paningkamot pinaagi sa pagkugi sa pagtrabaho ug uban sa tabang sa Ginoo. Ang pagbarog pinaagi sa kinaugalingong paningkamot mao ang abilidad, pasalig, ug paningkamot sa pagsangkap sa espirituwal ug temporal nga mga kinahanglanon sa kinabuhi alang sa kaugalingon ug sa pamilya. Samtang ang mga miyembro mahimong mas mapaningkamoton sa kaugalingon, sila mas makaserbisyo usab sa uban.
MGA PANINGKAMOT SA INDIBIDWAL UG PAMILYA
22.1
Pagpalambo og Pagbarog pinaagi sa Kinaugalingong Paningkamot
Uban sa tabang sa Ginoo, ang mga miyembro makapalambo sa pagbarog pinaagi sa kinaugalingong paningkamot sa mosunod nga mga paagi:
Pagpalambo og espirituwal, pisikal, ug emosyonal nga kalig-on.
Pagbaton og edukasyon ug trabaho.
Pagpalambo sa temporal nga pagkaandam.
22.1.1
Espirituwal nga Kalig-on
Ang Manluluwas mitudlo nga “ang tanan nga mga butang ngari kanako mga espirituhanon, ug wala mahinabo sa bisan unsa nga panahon nga Ako mihatag nganha kaninyo og balaod nga temporal” (Doktrina ug mga Pakigsaad 29:34). Ang mga miyembro makapalambo og espirituwal nga kalig-on kon sila mobuhat sa mosunod:
Magpakita og hugot nga pagtuo kang Kristo.
Mag-ampo.
Magpuasa.
Magtuon sa mga kasulatan ug sa mga pulong sa buhi nga mga propeta.
Magsunod sa mga sugo.
Motambong sa panagtigom alang sa sakramento ug sa ubang mga miting sa Simbahan.
Moserbisyo sa uban.
Moapil sa sagrado nga mga ordinansa ug maningkamot sa pagtuman sa mga pakigsaad nga nag-uban niini.
Kon buhaton kini sa mga miyembro, sila makadawat og giya gikan sa Balaan nga Espiritu kon unsaon sa pagsulbad sa ilang mga problema ug epektibong mangalagad ngadto sa uban.
22.1.2
Pisikal ug Emosyonal nga Kahimsog
Ang Langitnong Amahan gusto nga ang Iyang mga anak makapalambo og pisikal ug emosyonal nga kalig-on. Kini naglakip sa pagbuhat sa mosunod:
Pagpaningkamot sa pagkaon og masustansiyang pagkaon, pag-ehersisyo kanunay, ug pagkatulog og sakto.
Paglikay sa mga butang ug mga kinaiya nga makadaot o makaadik.
Pagbansay og maayong pagpanglimpyo sa lawas [hygiene] ug pagdawat og tukma nga medikal nga pag-atiman.
Pagpalambo ug pagpalig-on og maayong mga relasyon sa pamilya ug sa uban.
Pagkat-on sa pagkontrol sa stress.
Pagpangayo og tabang alang sa mga hagit sa panghunahuna o emosyonal kon gikinahanglan.
Imahe
magtiayon nga nag-jogging
22.1.3
Edukasyon ug Panarbaho
Ang Manluluwas mitudlo nga “ang himaya sa Dios mao ang salab[o]tan” (Doktrina ug mga Pakigsaad 93:36). Siya mitudlo usab, “Pangitaa ang pagtul[o]n-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118; tan-awa usab sa 130:18). Ang edukasyon o bokasyonal nga pagbansay mosangpot ngadto sa mas maayo nga panarbaho aron ang mga miyembro makasangkap sa mga panginahanglan sa kaugalingon ug sa pamilya.
Ang pagpalambo sa kapasidad sa pagtrabaho makatabang sa mga miyembro nga makatampo ngadto sa ilang mga pamilya, sa Simbahan, ug sa kalibotan. Ang mga miyembro gitambagan nga motrabaho og maayo ug magmatinuoron sa tanan nilang buhaton.
22.1.4
Temporal nga Pagpangandam
Ang mga kasulatan nagtudlo sa kaimportante sa pagkaandam (tan-awa sa Ezequiel 38:7; Doktrina ug mga Pakigsaad 38:30). Ang mga miyembro gitambagan sa pagpangandam aron sila makaatiman sa ilang kaugalingon, sa ilang mga pamilya, ug sa uban sa panahon sa panginahanglan.
Ang mga miyembro makadugang sa ilang pinansyal nga pagpangandam pinaagi sa:
Pagkuha og angay nga edukasyon aron sa pagtabang kanila nga makasangkap sa ilang kaugalingon ug sa ilang mga pamilya (tan-awa sa 22.3.3).
Ang pagpangandam naglakip usab sa pagpalambo og plano kon unsaon sa pag-atiman sa sukaranang mga panginahanglan atol sa emerhensiya. Ang mga miyembro giawhag sa paghimo og pangdinalian ug pangmalungtaron nga suplay sa pagkaon, tubig, ug ubang mga kinahanglanon.
Pagpangalagad Niadtong adunay Temporal ug Emosyonal nga mga Panginahanglan
Ang mga disipulo sa Ginoo gitudloan sa “paghigugma … ug sa pag-alagad sa usag usa” ug “motabang niadto nga nagkinahanglan sa … panabang” (Mosiah 4:15–16). Ang mga miyembro maningkamot nga motan-aw sa uban sama sa pagtan-aw sa Manluluwas kanila, mosabot sa ilang talagsaong mga kalig-on ug mga panginahanglan. Pinaagi sa pagbuhat niini, ang mga miyembro madasig nga makahibalo unsaon sa pagpangalagad niadtong kinsa adunay temporal ug emosyonal nga mga panginahanglan. Kini nga mga panginahanglan mahimong maglakip sa pagkaon, sinina, kapuy-an, edukasyon, panarbaho, pisikal nga kahimsog, ug emosyonal nga kaayohan.
22.2.1
Ang Balay Tipiganan sa Ginoo
Ang Manluluwas mitudlo, “[Pag]hatag sa inyong mga butang ngadto sa kab[o]s, … ug [kini] ihatag diha sa atubangan sa obispo [bishop] … [ug] pagatipigan diha sa akong balay tipiganan, sa pagpangalagad ngadto sa mga kab[o]s ug timawa” (Doktrina ug mga Pakigsaad 42:31, 34). Ang tanang mga kapanguhaan nga anaa sa Simbahan aron sa pagtabang niadtong adunay temporal nga mga panginahanglan gitawag og ang balay tipiganan sa Ginoo (tan-awa sa Doktrina ug mga Pakigsaad 82:18–19). Kini naglakip sa mga halad sa panahon, mga talento, kalooy, mga materyal, ug pinansyal nga mga kapanguhaan sa mga miyembro aron sa pagtabang niadtong nanginahanglan.
Ang balay tipiganan sa Ginoo anaa sa matag ward ug stake. Ang mga lider kasagaran makatabang sa mga indibidwal ug mga pamilya nga makakita og mga kasulbaran sa ilang mga panginahanglan pinaagi sa pagggamit sa kahibalo, mga kahanas, ug serbisyo nga gitanyag sa mga miyembro sa ward ug stake.
Gawas sa mga kapanguhaan sa balay tipiganan sa Ginoo, ang mga miyembro kasagaran mahimong makadawat sa gikinahanglan nga tabang pinaagi sa mga kapanguhaan sa gobyerno ug sa komunidad (tan-awa sa 22.12).
Imahe
babaye nga naghatag og pagkaon ngadto sa usa ka lalaki
22.2.2
Ang Balaod sa Puasa ug mga Halad sa Puasa
Ang Ginoo miestablisar sa balaod sa puasa ug mga halad sa puasa sa pagpanalangin sa Iyang katawhan ug sa paghatag og paagi nga makaserbisyo sila niadtong nanginahanglan. Ang balaod sa puasa mopanalangin sa mga tighatag ug sa mga tigdawat. Ang mga miyembro mas mahiduol ngadto sa Ginoo ug madugangan ang espirituwal nga kalig-on kon sila mosunod sa balaod sa puasa. Sila usab mopalig-on sa ilang kaugalingong pagbarog pinaagi sa kinaugalingong paningkamot ug mopalambo og mas dako nga kalooy. (Tan-awa sa Isaias 58:6–12; Malaquias 3:8–12.)
Ang pagpuasa mahimong himoon bisan unsang orasa. Hinoon, ang mga miyembro sa kasagaran naghimo sa unang Igpapahulay sa bulan isip adlaw sa pagpuasa. Ang usa ka adlaw sa pagpuasa kasagaran naglakip sa mosunod:
Pag-ampo
Dili pagkaon ug pag-inom sulod sa 24 oras (kon pisikal nga makahimo)
Paghatag og madagayaon nga halad sa puasa
Ang halad sa puasa usa ka donasyon aron sa pagtabang niadtong nanginahanglan. Kon ang mga miyembro magpuasa, sila gidapit sa paghatag og halad nga dili moubos sa bili sa duha ka kan-anan nga wala kan-a. Ang mga miyembro giawhag nga magmadagayaon ug mohatag og sobra pa kay sa kantidad sa duha ka kan-anan kon mahimo nila.
Ang mga miyembro mohatag sa ilang halad sa puasa ug sa nakompleto nga porma sa Ikapulo ug Uban nga mga Halad ngadto sa bishop o usa sa iyang mga magtatambag. Sa pipila ka dapit makahimo usab sila sa paghatag sa ilang donasyon diha sa online. Sa pipila ka ward, ang bishop mahimong motugot sa mga tighupot sa Aaronic nga Pagkapari sa pagkolekta sa mga halad sa puasa (tan-awa sa 34.3.2).
22.2.3
Pagserbisyo
Ang mga miyembro nagtinguha sa pagserbisyo sa uban sama sa pagserbisyo sa Manluluwas (tan-awa sa Juan 13:35). Sila naningkamot nga makahibalo sa kalig-on ug mga panginahanglan sa usag usa. Sila mangalagad ngadto sa usag usa uban sa gugma ug pagsabot.
Ang pagserbisyo mahimong sabotan diha sa ward, stake, o komunidad. Kon ang JustServe.org anaa, ang mga miyembro ug ang uban makagamit niini sa pag-ila og mga oportunidad sa pagserbisyo diha sa komunidad. Ang mga miyembro ug ang uban makahatag usab og kahupayan panahon sa katalagman o pagserbisyo sa komunidad pinaagi sa gipasiugdahan sa Simbahan nga mga proyekto.
22.2.4
Makitawhanon nga Tabang
Ang Simbahan mohatag og makitawhanon nga tabang sa tibuok kalibotan. Buhaton kini sa direkta nga paagi ug pinaagi sa pagpakigtambayayong sa ubang mga organisasyon sa kahupayan. Ang tabang ihatag nga dili magsapayan sa kaliwat, relihiyon, o nasyonalidad.
Ang mga miyembro ug ang uban nga gusto nga mosuporta niini nga mga paningkamot mahimong modonar ngadto sa makitawhanong tabang sa Simbahan. Ang mga miyembro mahimong mohatag sa ilang donasyon ug sa nakompleto nga porma sa Ikapulo ug Uban nga mga Halad ngadto sa bishop o usa sa iyang mga magtatambag. Sa pipila ka dapit makahimo usab sila sa paghatag sa ilang donasyon diha sa online.
MGA PANINGKAMOT SA LIDER
22.3
Sundanan alang sa Pagpalambo og Pagbarog pinaagi sa Kinaugalingong Paningkamot ug Pagpangalagad Niadtong Nanginahanglan
Ang ubang mga lider sa Simbahan nagrepresentar sa Manluluwas samtang sila nag-atiman niadtong adunay temporal ug emosyonal nga mga panginahanglan (tan-awa sa 22.3.4). Sa pagbuhat sa ingon, sila maningkamot sa pagtabang sa mga miyembro nga mapalig-on ang ilang pagbarog pinaagi sa kinaugalingong paningkamot.
Ang mga lider magtinguha sa giya sa Espiritu Santo aron sila makatabang uban ang pagkasensitibo ug kalooy. Ang mosunod nga sundanan makatabang sa mga lider nga matubag ang mga panginahanglan sa mga miyembro sa paagi nga mapalambo ang pagbarog pinaagi sa kinaugalingong paningkamot:
Mangita niadtong nanginahanglan.
Motabang kanila sa pagsusi ug pagtubag sa dinalian nga mga panginahanglan.
Motabang kanila nga makapalambo og malungtaron nga pagbarog pinaagi sa kinaugalingong paningkamot.
Pagpangalagad niadtong adunay emosyonal nga mga panginahanglan.
22.3.1
Pagpangita Niadtong Nanginahanglan
Ang bishop adunay sagrado nga responsibilidad sa pagpangita ug pag-atiman alang niadtong nanginahanglan (tan-awa sa Doktrina ug mga Pakigsaad 84:112). Ang uban kinsa adunay importante nga tahas sa pagtabang sa bishop niini nga responsibilidad naglakip sa:
Tigpangalagad nga mga igsoong lalaki ug mga igsoong babaye.
Mga kapangulohan sa Relief Society ug sa korum sa mga elder.
Mga magtatambag sa bishop.
Ubang mga sakop sa konseho sa ward.
Kon gikinahanglan, ang bishopric mahimong motawag og mga espesyalista sa welfare ug sa pagbarog pinaagi sa kinaugalingong paningkamot sa ward aron sa pagsuporta niini nga mga paningkamot (tan-awa sa 22.6.4).
Sa diwa sa gugma ug pagpakabana, ang mga lider sa ward ug niadtong kinsa moserbisyo uban kanila motabang sa pag-ila sa mga miyembro kinsa nagkinahanglan og tabang. Dili igo ang motabang lamang kon gihangyo. Ang mga lider kinahanglang magtinambagay uban sa tigpangalagad nga mga igsoong lalaki ug mga igsoong babaye aron sa pagseguro nga ang mga miyembro nga nanginahanglan makadawat og tukma nga pag-atiman.
22.3.2
Pagtabang sa mga Miyembro sa Pagsusi ug Pagtubag sa Dinalian nga mga Panginahanglan
Ang mga miyembro maningkamot sa pagtubag sa ilang nag-unang mga panginahanglan pinaagi sa kaugalingon nilang mga paningkamot ug tabang gikan sa kaparyentihan. Kon dili pa kini igo, ang mga miyembro mahimong manginahanglan og tabang gikan sa ubang mga tinubdan sama sa:
Mga kapanguhaan sa gobyerno ug komunidad (tan-awa sa 22.12).
Tabang sa Simbahan.
Ang tabang gikan sa Simbahan mahimong maglakip sa dinalian nga mga panginahanglan sama sa pagkaon, panglimpyo sa lawas [hygiene] nga mga butang, sinina, kapuy-an, o ubang mga nag-unang gikinahanglan. Ang mga bishop mahimong mogamit sa mga halad sa puasa sa pagtubag niini nga mga panginahanglan. Kon ang mga bishops’ order anaa, sa kasagaran ang mga bishop mogamit niini aron sa paghatag og pagkaon ug ubang nag-unang mga panginahanglan (tan-awa sa “Bishops’ Orders and Referrals” diha sa Leader and Clerk Resources [LCR]).
Kon mohatag og tabang gikan sa Simbahan, ang mga lider mosunod sa mga baroganan ug mga palisiya nga gilatid sa mga seksiyon 22.4 ug 22.5.
22.3.3
Pagtabang sa mga Miyembro nga Mopalambo og Malungtaron nga Pagbarog pinaagi sa Kinaugalingong Paningkamot
Ang mga miyembro mahimong magkinahanglan og padayon nga suporta sa pagtubag sa mas malungtaron nga mga hagit. Ang edukasyon, bokasyonal nga pagbansay, o ubang mga kapanguhaan makatabang nila sa paghimo og pagbarog pinaagi sa kinaugalingong paningkamot ug makasangkap alang sa ilang mas malungtaron nga mga panginahanglan. Ang mga lider sa Relief Society ug sa korum sa mga elder, tigpangalagad nga mga igsoong lalaki ug mga igsoong babaye, ug ang uban makatabang sa mga miyembro nga makagamit niini nga mga kapanguhaan.
Ang Self-Reliance Plan makatabang sa mga miyembro sa pag-ila sa ilang mga kalig-on ug mga panginahanglan. Makatabang usab kini kanila sa pag-ila sa mapuslanon nga mga kapanguhaan. Kini nga plano kinahanglang gamiton sa matag higayon kon ang tabang gikan sa Simbahan ikonsiderar. Ang bishop mahimong mosangon sa mga lider sa Relief Society ug sa mga lider sa korum sa mga elder, sa tigpangalagad nga mga igsoong lalaki ug mga igsoong babaye, o sa uban aron sa pagtabang sa mga miyembro nga mosulat sa plano.
Isip kabahin sa plano sa pagbarog pinaagi sa kinaugalingong paningkamot, ang mga lider mahimong morekomendar nga ang mga miyembro moapil sa usa ka grupo sa pagbarog pinaagi sa kinaugalingong paningkamot. Kini nga mga grupo motabang kanila nga mopalambo og mga kahanas ug mga kapanguhaan alang sa mas maayo nga edukasyon, panarbaho, o pagdumala sa pinansyal (tan-awa sa 22.13). Ang mga grupo sa kinatibuk-an i-organisar sa mga konseho sa stake o ward (tan-awa sa 22.10.2, 22.7).
Ang bishop, o laing lider nga iyang sangonan, mogamit sa Bishop’s Guide to the Self-Reliance Plan kon mohatag og tabang. Kini nga porma makatabang sa mga lider sa pagsunod sa pag-uswag sa miyembro ngadto sa pagbarog pinaagi sa kinaugalingong paningkamot.
22.3.4
Pagpangalagad Niadtong adunay Emosyonal nga mga Panginahanglan
Daghang mga miyembro makasinati og emosyonal nga mga hagit. Ang tigpangalagad nga mga igsoong lalaki ug mga igsoong babaye ug ang mga lider sa ward mahimong instrumento sa pagtabang sa mga miyembro nga aduna niini nga mga hagit.
Ang pakigbisog sa usa ka tawo sa emosyonal nga mga hagit makaapekto usab sa mga sakop sa iyang pamilya. Ang mga lider sa ward kinahanglang hikutado sa mga panginahanglan sa mga sakop sa pamilya, ilabi na sa mga kapikas. Ang mga lider mohatag og suporta ug pagsabot ngadto kanila.
Ang Simbahan mosangkap og “Counseling Resources” aron sa pagtabang sa mga lider nga mosuporta sa mga miyembro sa daghang mga isyu sa emosyonal ug sosyal. Dugang nga mga kapanguhaan alang sa mga miyembro naglakip sa mosunod:
Ang mga bishop mahimong mokonsulta sa empleyado sa Family Services aron mas makasabot sa emosyonal nga mga hagit sa miyembro ug sa pag-ila sa magamit nga mga kapanguhaan ug mga serbisyo. Ang mga presidente sa stake o misyon mahimong mokonsulta sa Family Services. Isip kabahin niini nga pagkonsulta, ang empleyado sa Family Services mahimong motabang niini nga mga lider sa pagtimbang-timbang kon ang usa ka miyembro nga adunay seryoso nga emosyonal o sosyal nga mga hagit magkinahanglan ba og propesyonal nga tabang. Kini nga mga lider makahangyo og pagpangonsulta pinaagi sa pagkontak sa buhatan sa ilang Family Services o sa tigdumala sa ilang welfare ug self-reliance. Tan-awa sa 31.3.6 alang sa impormasyon sa pagkontak.
Ang mga bishop mahimong moduso sa mga miyembro kinsa nagkinahanglan og tambag ngadto sa propesyonal sa Family Services, kon anaa. Sila mohimo niini pinaagi sa paggamit sa bishop’s order alang sa mga serbisyo (tan-awa sa “Bishops’ Orders and Referrals” sa LCR). Hinoon, ang mga miyembro mahimong mangayo og tabang gikan sa inila nga propesyonal nga mga magtatambag diha sa komunidad.
Usahay ang mga bishop motambag sa mga miyembro kinsa nagkinahanglan og tabang sa paghinulsol sa makasasala nga kinaiya. Kini nga kinaiya mahimong maglakip sa mga sala nga may kalabotan o tungod sa pagkaadik. Niini nga mga sitwasyon, ang mga bishop kinahanglang mogamit sa mga lagda diha sa 32.8.1 ug 32.8.2.
Imahe
magtiayon nga nagtan-aw sa mga papel
22.4
Mga Baroganan alang sa Paghatag og Tabang gikan sa Simbahan
Uban sa tabang sa Ginoo, ang mga miyembro maningkamot sa pagsangkap sa ilang mga kaugalingon ug sa ilang mga pamilya. Ang mga kaparyentihan giawhag sa pagtabang kon gikinahanglan. Kon ang mga miyembro magkinahanglan og dugang nga tabang, mahimo sila nga moadto sa mosunod nga mga tinubdan sama sa:
Mga kapanguhaan sa gobyerno ug komunidad (tan-awa sa 22.12).
Tabang sa Simbahan pinaagi sa mga halad sa puasa o mga bishops’ order alang sa pagkaon ug sa nag-unang mga panginahanglan (tan-awa 22.3.2).
Ang tabang gikan sa Simbahan gitumong aron matabangan ang mga miyembro nga makaugmad og pagsalig sa kaugalingon, dili ang magsalig. Ang bisan unsa nga tabang nga gihatag kinahanglan nga molig-on sa mga miyembro sa ilang mga paningkamot nga mahimong mapaningkamoton sa kaugalingon.
Pag-awhag og Personal ug Pamilya nga Responsibilidad
Ang mga lider motudlo nga ang mga indibidwal ug mga pamilya adunay nag-unang responsibilidad alang sa ilang kaugalingong temporal, emosyonal, ug espirituwal nga kaayohan. Pinaagi sa pagsunod sa baroganan sa pagbarog pinaagi sa kinaugalingong paningkamot, ang mga miyembro mas makahimo sa pagsulbad sa umaabot nga mga panginahanglan sa ilang kaugalingon (tan-awa sa 22.1).
Sa dili pa mohatag og tabang gikan sa Simbahan, ang bishop (o laing lider o miyembro nga iyang gisangonan) morebyo uban sa mga miyembro kon unsang mga kapanguhaan ang ilang gigamit aron sa pagtubag sa ilang mga panginahanglan. Kini nga tawo mahimong mosugyot og ubang mga kapanguhaan nga ikonsiderar sa mga miyembro, lakip sa mga kapanguhaan sa gobyerno ug komunidad (tan-awa sa 22.12).
22.4.2
Pagsangkap og Temporaryo nga Tabang alang sa Importante nga mga Panginahanglan
Ang tumong sa tabang gikan sa Simbahan mao nga temporaryong matubag ang nag-unang mga panginahanglan samtang ang mga miyembro maningkamot nga mahimong mapaningkamoton sa kaugalingon. Ang tabang gikan sa halad sa puasa sa kasagaran gigamit sa pagbayad sa importante nga mga aytem, sama sa pagkaon ug sinina. Hinoon, mahimo usab kining gamiton sa pagbayad alang sa kapuy-an o mga balayronon sa kuryente ug tubig. Mahimo usab kining gamiton sa pagbayad sa personal nga mga pagserbisyo sama sa pagtambag, medikal nga pag-atiman, o mubo og tagal nga pagbansay sa kahanas.
Ang tabang gikan sa Simbahan gitumong sa pagpatunhay og kinabuhi—dili pagmintenar sa estilo sa kinabuhi. Ang mga miyembro mahimong magkinahanglan og suporta ug empatiya samtang sila maningkamot sa pagpakunhod o pagtangtang sa mga galastohan aron mas makasangkap pa sa ilang kaugalingong mga panginahanglan.
Ang mga bishop kinahanglang mohimo og maayong paghukom ug magtinguha og espirituwal nga direksyon kon magkonsiderar og kantidad ug gidugayon sa tabang nga ihatag. Sila kinahanglang magmaloloy-on ug manggihatagon samtang dili himoon nga magsalig na lang ang mga miyembro.
22.4.3
Pagsangkap og mga Kapanguhaan o mga Serbisyo Kay sa Kwarta
Kon mahimo, ang bishop kinahanglang maglikay nga mohatag og kwarta. Imbis niini, siya kinahanglang mogamit sa mga halad sa puasa o sa mga bishops’ order sa paghatag sa mga miyembro og mga grocery o mga serbisyo. Ang mga miyembro makagamit na sa kaugalingon nilang kwarta sa pagbayad sa ubang mga panginahanglan.
Kon kini dili pa igo, ang bishop mahimong motabang pinaagi sa paggamit sa mga halad sa puasa aron temporaryong mabayran ang importante nga mga balayronon (tan-awa sa 22.5.2). Kon mahimo, kini nga mga pagbayad direktang ipadala ngadto sa tighatag sa serbisyo (tan-awa sa 22.5.3).
22.4.4
Pagtanyag og mga Oportunidad sa Pagtrabaho o Pagserbisyo
Ang mga bishop modapit niadtong kinsa modawat og tabang sa pagtrabaho o paghatag og serbisyo kutob sa ilang mahimo. Kini makatabang sa mga miyembro nga padayong mobati og kaligdong. Makapadugang usab kini sa ilang abilidad nga mahimong mapaningkamoton sa kaugalingon. Diin ang JustServe.org anaa, mahimo kining gamiton sa pag-ila og mga oportunidad sa pagserbisyo diha sa komunidad.
Ang pipila ka miyembro nga mga tigulang o may kakulangan mahimong dunay limitasyon sa pagtrabaho o pagserbisyo nga ilang mahatag. Ang mga lider kinahanglang makasabot sa ilang mga sitwasyon ug motanyag og mga opsiyon nga motugot kanila sa pagbuhat unsay ilang mahimo diha sa ilang mga sirkumstansiya.
22.4.5
Pagpabiling Kompidensiyal sa Impormasyon mahitungod sa Tabang gikan sa Simbahan
Ang bishop ug ang ubang mga lider sa ward mopabiling kompidensiyal sa bisan unsa nga impormasyon mahitungod sa mga miyembro kinsa magkinahanglan og tabang gikan sa Simbahan. Kini makapanalipod sa pagkapribado ug kaligdong sa mga miyembro. (Tan-awa sa 31.3.)
Ang mga miyembro nga modawat og tabang kinahanglan nga makahibalo sa sagrado nga matang sa mga halad sa puasa ug sa mga bishops’ order. Kinahanglang tagdon nila ang bisan unsa nga tabang nga ilang madawat nga kompidensiyal ug may pagtahod.
Usahay makatabang alang sa konseho sa ward o sa uban nga makahibalo mahitungod sa mga panginahanglan sa usa ka indibidwal o sa pamilya. Sama pananglit kon ang usa ka miyembro nangita og trabaho. Niini nga mga sitwasyon, ang bishop ug ang ubang mga lider sa kasagaran mangayo og pagtugot sa miyembro nga mopakigbahin sa maong impormasyon.
22.5
Mga Palisiya alang sa Pagsangkap og Tabang gikan sa Simbahan
Ang mga lider sa Simbahan kinahanglang mosunod sa mga lagda nga gilatid niini nga seksiyon kon mohatag og tabang pinaagi sa mga halad sa puasa o sa mga bishops’ order alang sa pagkaon ug sa ubang nag-unang mga kinahanglanon.
22.5.1
Mga Palisiya Kabahin sa mga Gihatagan og Tabang gikan sa Simbahan
22.5.1.1
Tabang ngadto sa mga Miyembro sa Ward
Sa kasagaran, ang mga miyembro kinsa modawat og tabang gikan sa Simbahan kinahanglang nagpuyo sa mga utlanan sa ward ug anaa ang ilang rekord sa pagkamiyembro diha sa ward. Ang tabang mahimong ihatag dili igsapayan kon ang miyembro kanunay motambong sa mga miting sa Simbahan o nagsunod sa mga sumbanan sa Simbahan.
Kon ang usa ka miyembro bag-ong mibalhin nganha sa ward, ang bishop mokontak sa unang bishop aron hisgotan ang sitwasyon sa tawo sa dili pa mohatag og tabang. Ang mga bishop makarebyo usab sa bisan unsang tabang nga gihatag atol sa miaging tulo ka tuig diha sa “Finance” nga seksiyon sa LCR.
22.5.1.2
Tabang ngadto sa mga Bishop ug mga Presidente sa Stake
Usahay ang bishop o mga sakop sa iyang pamilya o kaparyentihan kinsa nagpuyo sa ward mahimong magkinahanglan og tabang gikan sa Simbahan. Kon kini mahitabo, ang bishop morebyo sa mga panginahanglan ug sa gisugyot nga tabang uban sa presidente sa stake. Ang sinulat nga pagtugot sa presidente sa stake gikinahanglan sa dili pa ang usa ka bishop mogamit sa mga halad sa puasa o moaprobar sa bishop’s order alang sa iyang kaugalingon o sa iyang pamilya.
Kon ang mga pundo sa halad sa puasa maoy gamiton, ang presidente sa stake morebyo sa mga bayranan ug sa ubang mga gasto sa dili pa motugot sa pagbayad. Ang bishop dili mahimong moaprobar og pagbayad alang sa iyang kaugalingon o sa iyang pamilya.
Kon ang usa ka presidente sa stake o mga sakop sa iyang pamilya o kaparyentihan kinsa nagpuyo sa iyang ward magkinahanglan og tabang, siya mokontak sa bishop. Ang bishop mosunod sa samang mga baroganan ug mga lagda sa tabang gikan sa Simbahan nga iyang ihatag alang ni bisan kinsa nga laing miyembro. Hinoon, kon ang bishop miaprobar na sa hangyo, ang presidente sa stake kinahanglang mosumiter niini ngadto sa Kapangulohan sa Area. Ang presidente sa stake ug ang bishop maghulat sa sinulat nga pagtugot gikan sa sakop sa Kapangulohan sa Area sa dili pa mopadayon sa pagbayad o pag-order. (Kon ang presidente sa district manginahanglan og tabang, ang pagtugot pangayoon gikan sa presidente sa misyon imbes sa Kapangulohan sa Area.)
22.5.1.3
Tabang ngadto sa mga Tawo Kinsa Dumuduong o Walay Panimalay
Ang mga bishop mahimong motabang sa mga miyembro ug sa uban kinsa dumuduong o walay panimalay. Hinoon, magmabinantayon sila sa pagkonsiderar sa matang ug kantidad sa tabang nga ihatag. Sila giawhag sa pagpakitambag sa bishop sa tawo sa kanhi ward sa dili pa mohatag og tabang.
Ang mga bishop sa kasagaran modapit sa mga miyembro nga dumuduong o walay panimalay kinsa modawat og tabang sa pagdawat og mga oportunidad sa pagtrabaho o serbsiyo. Ang mga bishop mahimong moduso usab niini nga mga miyembro ngadto sa mga kapanguhaan sa komunidad nga andam nga motubag sa ilang mga panginahanglan.
Base sa panginahanglan, ang presidente sa stake mahimong motudlo og usa ka bishop nga modumala sa tanang mga hangyo nga moabot sa stake gikan sa mga tawo nga dumuduong o walay mga panimalay. Sa pipila ka dapit adunay nagdug-ol nga mga stake nga adunay daghang tawo kinsa mga dumuduong o walay mga panimalay. Niadto nga mga sitwasyon, ang Kapangulohan sa Area mahimong motawag og pangserbisyo nga misyonaryo nga modumala sa ilang mga hangyo alang sa tabang. Kining tawhana kinahanglan nga nakaserbisyo isip usa ka bishop.
22.5.1.4
Tabang ngadto sa mga Tawo Kinsa Dili mga Miyembro sa Simbahan
Ang mga tawo nga dili mga miyembro sa Simbahan kasagaran paadtoon sa mga kapanguhaan sa lokal nga komunidad alang sa tabang. Sa talagsa nga mga okasyon, kon gigiyahan sa Espiritu, ang bishop mahimong motabang kanila sa mga halad sa puasa o sa bishops’ order. Pananglitan, ang bishop mahimong mokonsiderar sa tabang alang sa mga ginikanan o mga tig-atiman kinsa dili mga miyembro sa Simbahan apan adunay usa o daghang anak nga mga miyembro.
22.5.2
Mga Palisiya sa Paggamit sa mga Halad sa Puasa
22.5.2.1
Medikal o Ubang Pag-atiman sa Kahimsog
Ang matag dapit sa Simbahan nakaestablisar og mga limitasyon sa pagtugot alang sa paggamit sa mga halad sa puasa sa pagbayad sa mga medikal, dental, o mental nga mga galastohan. Kini nga mga limitasyon girekomendar sa Kapangulohan sa Area. Kini giaprobahan sa Komitiba sa Ehekutibo sa Welfare ug Pagbarog pinaagi sa Kinaugalingong Paningkamot sa Simbahan. Ang mga limitasyon mahimong managlahi sumala sa rehiyon o nasod sa usa ka dapit.
Kon ang mga bishop mogamit sa mga halad sa puasa alang sa medikal, dental, o mental nga pag-atiman sa kahimsog, kini kinahanglan nga dili molapas sa mga limitasyon nga walay tukma nga pagtugot. Alang sa pagtugot sa mga kantidad ug mga lagda, tan-awa sa “Paggamit sa mga Halad sa Puasa alang sa Medikal nga mga Galastohan.”
22.5.2.2
Utang sa Konsumidor ug Pakyas nga mga Negosyo o mga Pamuhonan
Ang mga halad sa puasa dili mahimong gamiton sa pagbayad sa utang sa konsumidor, sama sa mga credit card o personal nga mga utang. Ni gamiton ang mga halad sa puasa sa pagbayad sa nautang nga kwarta isip resulta sa pakyas nga negosyo o pamuhonan.
22.5.2.3
Pagbayad og balik sa mga Halad sa Puasa
Ang mga miyembro dili mobayad og balik sa tabang gikan sa halad sa puasa nga ilang nadawat gikan sa Simbahan.
22.5.2.4
Mga Kantidad sa Galastohan sa Halad sa Puasa sa Ward
Wala kinahanglana nga ang mga bishop mobutang og limitasyon sa tabang sa halad sa puasa alang sa mga miyembro sa ward ngadto sa kantidad sa mga donasyon nga nakolekta diha sa ward.
22.5.3
Mga Palisiya sa Pagbayad
Kon mahimo, ang mga pagbayad kinahanglang ihatag direkta ngadto sa mga negosyo nga mihatag sa mga pagkaon ug mga serbisyo. Ang mga pagbayad sa kasagaran dili ihatag ngadto sa tawo nga gitabangan.
Ang mga sakop sa bishopric ug ang mga klerk mosunod sa pinansyal nga mga proseso nga gilatid diha sa 34.5.7 kon:
Mag-andam og tseke.
Mag-andam sa pagbayad pinaagi sa elektronik.
Mag-withdraw og kwarta alang sa pagbayad sa halad sa puasa.
22.5.4
Mga Palisiya sa mga Pagbayad Nga Makabenepisyo sa usa ka Bishop o Presidente sa Stake
Kon mohatag og tabang sa mga miyembro gikan sa halad sa puasa, ang bishop mahimong dili mogamit sa mga pundo sa pagbayad sa mga pagkaon o mga serbisyo sa paagi nga personal nga makabenepisyo kaniya. Ang bisan unsa nga eksepsiyon magkinahanglan og pagtugot gikan sa presidente sa stake. Pananglitan, kon ang bishop nanag-iya og kabtangan nga paabangan diin magpuyo ang usa ka miyembro, siya dili mogamit sa mga halad sa puasa sa pagbayad sa abang sa miyembro gawas kon ang presidente sa stake mohatag una sa iyang pagtugot. Ang samang palisiya magamit kon ang mga halad sa puasa gamiton sa pagbayad og pagkaon alang sa miyembro gikan sa tindahan sa grocery nga gipanag-iya sa bishop.
Kon ang pagbayad gikan sa halad sa puasa alang sa usa ka miyembro makabenepisyo sa presidente sa stake o sa negosyo nga iyang gipanag-iya, ang pagtugot sa Kapangulohan sa Area gikinahanglan. Kon ang bishop motugot sa gisugyot nga pagbayad, ang presidente sa stake mosumiter sa hangyo ngadto sa Kapangulohan sa Area. Ang presidente sa stake ug ang bishop maghulat sa sinulat nga pagtugot gikan sa usa ka sakop sa Kapangulohan sa Area sa dili pa mopadayon sa pagbayad.
22.5.5
Pagpanalipod batok sa Dili Sakto nga Paggamit sa mga Pundo
Ang mga bishop ug mga klerk kinahanglang manalipod sa mga pundo sa mga halad sa puasa gikan sa dili sakto nga paggamit. Alang sa mga pangutana o sa pag-report sa abuso sa tabang gikan sa Simbahan o panglimbong, ang mga sakop sa mga bishopric o mga klerk sa Estados Unidos ug Canada makatawag sa help line sa 1-800-453-3860, ekstensiyon 2-7887. Ang mga sakop sa mga bishopric o mga klerk sa gawas sa Estados Unidos ug Canada kinahanglang motawag sa ilang buhatan sa area.
22.6
Mga Tahas sa mga Lider sa Ward
22.6.1
Bishop ug ang Iyang mga Magtatambag
Ang bishop adunay usa ka balaanong sugo sa pagpangita ug sa pag-atiman niadtong adunay temporal nga mga panginahanglan (tan-awa sa Doktrina ug mga Pakigsaad 84:112). Siya motugyan sa kadaghanan niini nga buhat ngadto sa mga kapangulohan sa Relief Society ug sa korum sa mga elder. Hinoon, adunay pipila ka katungdanan nga pagahimoon lamang sa bishop. Pananglitan, ang bishop:
Motino sa matang, kantidad, ug sa gidugayon sa bisan unsa nga temporal nga tabang nga ihatag.
Moaprobar sa tabang sa halad sa puasa (tan-awa sa 22.4 ug 22.5) ug sa mga bishops’ order alang sa pagkaon ug sa nag-unang mga panginahanglan (tan-awa sa 22.13).
Personal nga morebyo sa mga plano sa mga miyembro alang sa pagbarog pinaagi sa kinaugalingong paningkamot. Siya mosangon sa ubang mga lider sa ward sa pagsunod niadtong mga plano kon gikinahanglan. (Tan-awa sa Self-Reliance Plan ug Bishop’s Guide to the Self-Reliance Plan.)
Ang bishop ug ang iyang mga magtatambag aduna sa mosunod nga mga responsibilidad:
Motudlo sa mga baroganan ug mga panalangin kalabot sa (1) pag-atiman alang niadtong kinsa adunay temporal ug emosyonal nga mga panginahanglan ug (2) pagpalambo sa pagbarog pinaagi sa kinaugalingong paningkamot (tan-awa sa 22.1). Kini naglakip sa personal ug pamilya nga pagpangandam.
Motudlo sa balaod sa puasa ug moawhag sa mga miyembro nga mohatag og madagayaon nga halad sa puasa (tan-awa sa 22.2.2).
Modumala sa pagkolekta ug pagkwenta sa mga halad sa puasa (tan-awa sa 34.3.2).
Isip ang kapangulohan sa Aaronic nga Pagkapari, ang bishopric mogiya usab sa mga paningkamot sa mga korum sa Aaronic nga Pagkapari ug sa mga klase sa Young Women aron moserbisyo niadtong adunay temporal nga mga panginahanglan diha sa ward ug komunidad (tan-awa sa 10.2.2 ug 11.2.2). Kini nga mga paningkamot gisabotan diha sa mga miting sa konseho sa kabatan-onan sa ward (tan-awa sa 22.8) ug diha sa mga miting sa kapangulohan sa korum ug klase (tan-awa sa 10.4.3 ug 11.3.4.3).
22.6.2
Mga Kapangulohan sa Relief Society ug sa Korum sa mga Elder
Ubos sa direksyon sa bishop, ang mga kapangulohan sa Relief Society ug sa elders quorum adunay importante nga tahas sa pag-atiman niadtong nanginahanglan diha sa ward (tan-awa sa 8.2.2 ug 9.2.2). Kini nga mga lider motudlo sa mga miyembro sa ward sa:
Pagpangalagad niadtong nanginahanglan.
Pagsunod sa balaod sa puasa.
Pagpalambo sa pagbarog pinaagi sa kinaugalingong paningkamot.
Pagdugang sa personal ug pamilya nga pagpangandam.
Ang mga kapangulohan sa Relief Society ug sa korum sa mga elder mogamit sa sundanan nga gihulagway sa 22.3 samtang sila motabang sa pag-atiman alang niadtong nanginahanglan.
Sa pipila ka dapit, ang mga bishop adunay opsiyon sa paghatag sa mga miyembro nga nanginahanglan og bishop’s order alang sa pagkaon ug ubang nag-unang mga panginahanglan (tan-awa sa 22.13). Ang bishop kasagaran mosangon sa presidente sa Relief Society nga makigkita sa mga miyembro ug mosulat sa porma sa pag-order (tan-awa sa 9.2.2.2). Hinoon, siya usab mahimong mosangon sa presidente sa korum sa mga elder (tan-awa sa 8.2.2.2). Ang usa ka magtatambag sa Relief Society o kapangulohan sa korum sa mga elder mahimong sangonan kon ang presidente dili makahimo. Ang gisangonan nga lider mosumiter sa nakompleto nga porma ngadto sa bishop alang sa iyang pagtugot.
22.6.3
Tigpangalagad nga mga Igsoong Lalaki o mga Igsoong Babaye
Ang tabang sa espirituwal ug temporal nga mga panginahanglan sa kasagaran magsugod uban sa tigpangalagad nga mga igsoong lalaki ug mga igsoong babaye (tan-awa sa 21.1). Sila moreport sa mga panginahanglan niadtong ilang gialagaran ngadto sa ilang mga kapangulohan sa korum sa mga elder ug sa Relief Society diha sa mga interbiyo sa pagpangalagad ug sa ubang mga panahon. Sila mahimong mopaambit sa mga panginahanglan nga kompidensiyal direkta ngadto sa bishop.
Mga Espesyalista sa Ward alang sa Welfare ug Pagbarog pinaagi sa Kinaugalingong Paningkamot
Ang mga bishopric mahimong motawag og mga indibidwal o mga magtiayon isip mga espesyalista sa welfare ug pagbarog pinaagi sa kinaugalingong paningkamot diha sa ward. Kini nga mga espesyalista mosuporta sa mga lider sa ward sa ilang mga paningkamot sa pag-atiman alang sa uban ug sa pagtabang kanila nga mahimong mas mapaningkamoton sa kaugalingon.
Ang mga espesyalista mahimong sangonan ngadto sa piho nga mga bahin nga angayng tutokan. Mahimong maglakip kini sa mosunod:
Panarbaho
Edukasyon
Pagpangandam
Emosyonal nga kahimsog
Personal nga panalapi
Lokal nga mga kapanguhaan sa gobyerno ug komunidad nga moserbisyo niadtong nanginahanglan (tan-awa sa 22.12)
Ang mosunod nga talaan nagtingob sa mga calling ug mga tahas nga gihisgotan sa 22.6.
Calling
Mobisita ug Mosusi sa mga Panginahanglan
Motudlo sa mga Baroganan sa Pagbarog pinaagi sa Kinaugalingong Paningkamot
Motabang sa mga Miyembro sa Plano sa Pagbarog pinaagi sa Kinaugalingong Paningkamot
Moaprobar sa Tabang sa Halad sa Puasa o sa mga Bishops’ Order
Calling
Bishop
Mobisita ug Mosusi sa mga Panginahanglan
Mahimo, apan sa kasagaran motugyan
Motudlo sa mga Baroganan sa Pagbarog pinaagi sa Kinaugalingong Paningkamot
Oo
Motabang sa mga Miyembro sa Plano sa Pagbarog pinaagi sa Kinaugalingong Paningkamot
Mahimo, apan sa kasagaran motugyan
Moaprobar sa Tabang sa Halad sa Puasa o sa mga Bishops’ Order
Oo
Calling
Mga kapangulohan sa Relief Society ug sa korum sa mga elder
Mobisita ug Mosusi sa mga Panginahanglan
Oo
Motudlo sa mga Baroganan sa Pagbarog pinaagi sa Kinaugalingong Paningkamot
Oo
Motabang sa mga Miyembro sa Plano sa Pagbarog pinaagi sa Kinaugalingong Paningkamot
Kon gisangonan
Moaprobar sa Tabang sa Halad sa Puasa o sa mga Bishops’ Order
Dili
Calling
Tigpangalagad nga mga igsoong lalaki ug mga igsoong babaye
Mobisita ug Mosusi sa mga Panginahanglan
Oo
Motudlo sa mga Baroganan sa Pagbarog pinaagi sa Kinaugalingong Paningkamot
Oo
Motabang sa mga Miyembro sa Plano sa Pagbarog pinaagi sa Kinaugalingong Paningkamot
Kon gisangonan
Moaprobar sa Tabang sa Halad sa Puasa o sa mga Bishops’ Order
Dili
Calling
Mga espesyalista sa welfare ug sa pagbarog pinaagi sa kinaugalingong paningkamot (kon gitawag)
Mobisita ug Mosusi sa mga Panginahanglan
Kon gisangonan
Motudlo sa mga Baroganan sa Pagbarog pinaagi sa Kinaugalingong Paningkamot
Kon gisangonan
Motabang sa mga Miyembro sa Plano sa Pagbarog pinaagi sa Kinaugalingong Paningkamot
Kon gisangonan
Moaprobar sa Tabang sa Halad sa Puasa o sa mga Bishops’ Order
Dili
22.7
Tahas sa Konseho sa Ward
Usa ka importante nga tahas sa konseho sa ward mao ang pagplano unsaon sa pag-atiman niadtong nanginahanglan ug sa pagtabang kanila nga mahimong mapaningkamoton sa kaugalingon (tan-awa sa 4.4). Ang mga sakop sa konseho mobase niini nga mga plano sa impormasyon gikan sa mga interbiyo sa pagpangalagad ug gikan sa ilang kaugalingong personal nga pagkontak niadtong nanginahanglan. Sa paghisgot sa mga panginahanglan sa mga miyembro, ang konseho motahod sa mga tinguha ni bisan kinsa nga naghangyo nga himoon kini nga kompidensiyal.
Samtang ang mga konseho sa ward maghunahuna unsaon sa pag-atiman kadtong adunay temporal ug emosyonal nga mga panginahanglan, sila mohimo sa mosunod:
Magplano og mga paagi sa pagtudlo sa mga miyembro sa ward unsaon sa paggamit sa mga baroganan sa pagbarog pinaagi sa kinaugalingong paningkamot (tan-awa sa 22.1). Kini nga mga baroganan naglakip sa personal ug pamilya nga pagpangandam.
Magplano og mga paagi sa pagtabang niadtong kinsa adunay dinalian nga mga panginahanglan, sama sa pagkawalay trabaho, ug kadtong kinsa adunay mas malungtaron nga mga panginahanglan; sama sa mga problema sa kahimsog o mga kakulangan.
Moila sa mga miyembro sa ward kansang mga kahanas mahimong makatabang sa pagtubag sa diha-diha dayon ug malungtaron nga mga panginahanglan.
Moila sa posible nga trabaho o mga buluhaton sa pagserbisyo alang niadtong modawat og tabang gikan sa Simbahan.
Moila sa ubang mga kapanguhaan sa gobyerno, komunidad, o sa Simbahan nga makahatag og benepisyo sa mga miyembro (tan-awa sa 22.12 ug 22.13).
Magplano og mga paagi sa pagserbisyo diha sa komunidad. Kon diin ang JustServe.org anaa, mahimo kining gamiton sa pag-ila sa maong mga oportunidad sa pagserbisyo.
Ang mga konseho sa ward moandam usab og yanong gisulat nga plano alang sa ward sa pagtubag sa mga emerhensiya. Kini nga plano kinahanglan nga makoordinar sa emerhensiya nga plano sa stake (tan-awa sa “Pagkaandam sa Stake ug sa Ward”; tan-awa usab sa 22.9.1.3 niini nga tamdanan nga basahon).
Ang mga espesyalista sa welfare ug pagbarog pinaagi sa kinaugalingong paningkamot diha sa ward mahimong dapiton ngadto sa mga miting sa konseho sa ward kon gikinahanglan.
22.8
Tahas sa Konseho sa Kabatan-onan sa Ward
Usa sa katuyoan sa konseho sa kabatan-onan sa ward mao ang pagtabang sa kabatan-onan nga mahimong mahalaron nga mga sumusunod ni Jesukristo (tan-awa sa 29.2.6). Ang pagserbisyo niadtong kinsa adunay temporal nga mga panginahanglan importante sa pagkab-ot niini nga katuyoan. Dugang niini, ang mga tawo kinsa adunay temporal nga mga panginahanglan mahimong maglakip niadtong kinsa mga tigulang, masakiton, o adunay mga kakulangan.
Ubos sa giya bishopric, ang konseho sa kabatan-onan sa ward magplano og mga paagi sa pagserbisyo niadtong nanginahanglan diha sa ilang ward ug komunidad. Ang piho nga mga kalihokan sa pagserbisyo mahimong planohon atol sa mga miting sa kapangulohan sa korum ug klase. Diin ang JustServe.org anaa, mahimo kining gamiton sa pag-ila og mga oportunidad sa pagserbisyo diha sa komunidad.
22.9
Mga Tahas sa mga Lider sa Stake
22.9.1
Presidente sa Stake ug ang Iyang mga Magtatambag
Ang presidente sa stake ug ang iyang mga magtatambag mangulo sa mga paningkamot sa pagpangalagad niadtong adunay temporal ug emosyonal nga mga panginahanglan ug sa pagpalambo sa pagbarog pinaagi sa kinaugalingong paningkamot. Ang kapangulohan sa Relief Society sa stake, mga high councilor, ug ubang mga miyembro sa konseho sa stake motabang kanila.
Ang presidente sa stake ug ang iyang mga magtatambag aduna sa mosunod nga mga responsibilidad:
Motudlo sa mga baroganan ug mga panalangin kalabot sa (1) pag-atiman alang niadtong kinsa adunay temporal ug emosyonal nga mga panginahanglan ug (2) pagpalambo sa pagbarog pinaagi sa kinaugalingong paningkamot (tan-awa sa 22.1). Kini naglakip sa personal ug pamilya nga pagpangandam.
Motudlo sa balaod sa puasa ug moawhag sa mga miyembro nga mohatag og madagayaon nga halad sa puasa (tan-awa sa 22.2.2).
Motudlo sa mga bishop unsaon sa paghatag og tabang gikan sa Simbahan sa saktong paagi ngadto niadtong kinsa adunay temporal nga mga panginahanglan (tan-awa sa 22.9.1.1).
Moseguro nga ang mga presidente sa korum sa mga elder ug ang mga presidente sa Relief Society sa ward gitudloan mahitungod sa ilang mga tahas sa pag-atiman alang niadtong nanginahanglan. Ang mga high councilor ug ang mga kapangulohan sa Relief Society sa stake motabang sa pagtudlo niini nga mga lider sa ward sa ilang mga responsibilidad (tan-awa sa 22.9.2 ug 22.9.3).
Modumala sa mga paningkamot sa stake sa pagpangandam ug pagtubag sa mga emerhensiya (tan-awa sa 22.9.1.3).
Ang presidente sa stake aduna sa mosunod nga mga responsibilidad:
Morebyo sa mga hangyo alang sa halad sa puasa alang sa medikal nga mga galastohan nga molapas sa limitasyon sa pagtugot sa bishop. Ang presidente sa stake mahimong moaprobar sa mga hangyo hangtod ngadto sa iyang limitasyon sa pagtugot. Siya mosumiter sa mga hangyo nga molapas sa iyang limitasyon sa pagtugot ngadto sa Kapangulohan sa Area alang sa konsiderasyon (tan-awa sa 22.5.2.1).
Morebyo sa bisan unsa nga mga hangyo alang sa tabang gikan sa Simbahan alang sa mga bishop (tan-awa sa 22.5.1.2).
Moserbisyo isip ang tinugyanan nga presidente sa stake alang sa mga operasyon sa welfare ug sa pagbarog pinaagi sa kinaugalingong paningkamot kon gisangonan (tan-awa sa 22.9.1.2).
Ang kapangulohan sa stake mahimong mosangon og usa o daghang high councilor sa pagtabang sa pagdumala sa mga paningkamot sa pag-atiman niadtong adunay temporal nga mga panginahanglan diha sa stake (tan-awa sa 22.9.2). Ang kapangulohan sa stake mahimo usab nga motawag og mga espesyalista sa welfare ug sa pagbarog pinaagi sa kinaugalingong paningkamot sa stake sa pagsuporta niini nga mga paningkamot (tan-awa sa 22.9.4).
22.9.1.1
Motudlo sa mga Bishop sa mga Baroganan sa Paghatag og Tabang gikan sa Simbahan
Ang presidente sa stake moseguro nga ang mga bishop nag-atiman niadtong adunay temporal nga mga panginahanglan diha sa ilang mga ward. Siya motudlo sa mga bishop sa mga baroganan ug mga palisiya alang sa paghatag og tabang gikan sa Simbahan (tan-awa sa 22.4 ug 22.5). Sa pagtudlo, siya mogamit sa tinuod ug praktikal nga mga ehemplo.
Sa iyang mga interbiyo sa mga bishop, ang presidente sa stake morebyo sa mga pagbayad gamit ang halad sa puasa gikan sa binulan nga pamahayag sa panalapi sa ward. Siya usab mohisgot uban sa matag bishop sa mga baroganan nga iyang gigamit sa pagtabang sa mga miyembro. Siya motambag sa bishop mahitungod sa bisan unsa nga mga pagbayad o mga sundanan diha sa pamahayag nga nagpakita og sayop nga pagsabot sa eksakto nga mga baroganan.
Ang mga baroganan ug mga buluhaton alang sa paghatag og tabang gikan sa Simbahan hisgotan usab sa konseho sa mga bishop sa stake (tan-awa sa 22.11).
Ang presidente sa stake moseguro nga ang matag bishop morebyo sa pagbansay nga anaa sa video nga “Sacred Funds, Sacred Responsibilities” dili mominos kausa sa usa ka tuig.
22.9.1.2
Moserbisyo isip Tinugyanan nga Presidente sa Stake alang sa mga Operasyon sa Welfare ug sa Pagbarog pinaagi sa Kinaugalingong Paningkamot
Kon mahimo, ang Kapangulohan sa Area mosangon og usa ka tinugyanan nga presidente sa stake ngadto sa matag kalihokan sa welfare ug pagbarog pinaagi sa kinaugalingong paningkamot sa ilang dapit. Mga ehemplo niini nga mga operasyon maglakip sa mosunod:
Ang gisangonan nga presidente sa stake motabang sa pagpangita og mga boluntaryo aron sa pagsuporta sa mga panginahanglan sa operasyon. Ang mga boluntaryo mahimong magagikan sa tinugyanan nga stake ug gikan sa ubang mga stake nga giserbisyohan sa operasyon.
Ang tinugyanan nga presidente sa stake moorganisar og komitiba sa operasyon sa tinugyanan nga stake aron sa pagdumala sa operasyon. Ang mga miyembro sa komitiba maglakip sa mosunod:
Ang presidente sa stake o usa ka gisangonan nga magtatambag
Usa ka high councilor
Usa ka sakop sa kapangulohan sa Relief Society sa stake
Ang tigdumala sa operasyon
Mga espesyalista sa welfare ug sa pagbarog pinaagi sa kinaugalingong paningkamot kon gikinahanglan
22.9.1.3
Pagtubag sa mga Emerhensiya
Ang presidente sa stake modumala sa pagtubag sa Simbahan sa emerhensiya ug sa mga komunikasyon diha sa iyang stake. Sa mga katalagman nga moigo sa sobra sa usa ka stake, ang Kapangulohan sa Area o ang gisangonan nga Area Seventy mahimong modumala sa pagtubag. Ang mga tigdumala sa welfare ug sa pagbarog pinaagi sa kinaugalingong paningkamot mosuporta sa mga lider sa area ug sa stake niini nga mga paningkamot.
Ang mga presidente sa stake mahimong motawag og mga espesyalista sa welfare ug sa pagbarog pinaagi sa kinaugalingong paningkamot sa pagdumala sa sentro sa mga operasyon sa emerhensiya, o pagdumala sa mga problema sa seguridad. Kon gikinahanglan, ang Kapangulohan sa Area o usa ka Area Seventy mahimong motudlo usab sa maong mga espesyalista sa lebel sa area o sa lebel sa coordinating council.
Ang tigpangalagad nga mga igsoong lalaki ug mga igsoong babaye moreport sa mga kondisyon ug mga panginahanglan sa mga miyembro ngadto sa mga lider sa korum ug Relief Society. Kini nga mga lider moreport ngadto sa bishop, kinsa moreport ngadto sa kapangulohan sa stake.
Ang kapangulohan sa stake moreport sa impomasyon ngadto sa (1) Kapangulohan sa Area o sa gisangonan nga Area Seventy ug sa (2) tigdumala sa welfare ug sa pagbarog pinaagi sa kinaugalingong paningkamot. Kini nga report naglakip sa kahimtang sa mga miyembro, mga misyonaryo, mga pasilidad sa Simbahan, ug sa komunidad. Kon ang mga miyembro sa Simbahan naapektahan sa katalagman, ang mga bishop mahimong mogamit sa mga halad sa puasa sa pagtabang nga matubag ang nag-unang mga panginahanglan. Ang bishop mosunod sa mga baroganan diha sa 22.4.
Ang presidente sa stake moaprobar sa impormasyon sa publiko nga ihatag sa Simbahan sa lokal nga paagi. Siya makigsabot niini sa direktor sa komunikasyon sa stake kon adunay natawag (tan-awa sa 6.2.1.7). Siya moseguro nga ang impormasyon eksakto ug tukma sa panahon. Siya mahimong magsilbi nga tigpama-ba alang sa Simbahan aron sa pagtubag sa mga pangutana gikan sa media. Siya usab mahimong mosangon sa direktor sa komunikasyon sa stake o laing tigpama-ba sa pagbuhat niini. Sa mga katalagman nga moigo og labaw sa usa ka stake, ang Kapangulohan sa Area o ang gisangonan nga Area Seventy mahimong modumala sa pampubliko nga mga komunikasyon.
Ang mga lider sa Simbahan mahimong mopagamit sa mga kapanguhaan sa Simbahan ngadto sa sibil nga mga awtoridad atol sa usa ka emerhensiya. Pinaagi sa pagtugot sa Kapangulohan sa Area, ang mga gambalay sa Simbahan (gawas sa mga templo) mahimong gamiton isip mga kapuy-an, mga istasyon sa first-aid, mga lokasyon alang sa pagpakaon. Ang maong paggamit sa gambalay sa Simbahan kinahanglan i-koordinar sa gisangonan nga tigdumala sa mga pasilidad. Kon ang laing organisasyon sa kalooy o sa komunidad gitugotan nga mogamit sa gambalay, ang usa ka kasabotan sa paggamit kinahanglang pirmahan. Tan-awa sa “Paggamit sa mga Gambalay sa Simbahan atol sa Katalagman” alang sa dugang nga impormasyon.
Dugang nga impormasyon anaa sa “Emergency Response Procedures.”
22.9.2
Mga High Councilor
Ang high councilor nga gisangonan ngadto sa matag korum sa mga elder nagsuporta sa kapangulohan sa korum sa ilang responsibilidad sa pag-atiman niadtong nanginahanglan ug sa pagtabang kanila nga mopalambo og pagbarog pinaagi sa kinaugalingong paningkamot (tan-awa sa 22.6.2).
Ang kapangulohan sa stake mahimo usab nga mosangon og usa o daghang high councilor sa pagbuhat sa mosunod:
Motabang sa pagtudlo sa mga espesyalista sa ilang tahas sa welfare ug sa pagbarog pinaagi sa kinaugalingong paningkamot, kon adunay natawag nga mga espesyalista (tan-awa sa 22.9.4 ug 22.6.4).
Makigsabot sa mga boluntaryong paningkamot alang sa mga operasyon sa welfare ug pagbarog pinaagi sa kinaugalingong paningkamot.
Moserbisyo sa linain nga mga grupo nga nagtrabaho nga makigsabot sa mga kapanguhaan nga may kalabotan sa pagbarog pinaagi sa kinaugalingong paningkamot o pagserbisyo sa komunidad (tan-awa sa 22.10.2).
Sa mga stake nga nagsuporta sa operasyon sa welfare ug sa pagbarog pinaagi sa kinaugalingong paningkamot, ang usa ka high councilor mahimong hangyoon nga moserbisyo sa komitiba sa operasyon sa tinugyanan nga stake (tan-awa sa 22.9.1.2).
22.9.3
Kapangulohan sa Relief Society sa Stake
Ang kapangulohan sa Relief Society sa stake mosuporta sa mga kapangulohan sa Relief Society sa ward sa ilang mga responsibilidad sa pag-atiman niadtong nanginahanglan ug sa pagtabang kanila nga mopalambo og pagbarog pinaagi sa kinaugalingong paningkamot (tan-awa sa 22.6.2).
Ang mga sakop sa kapangulohan sa Relief Society sa stake mahimong hangyoon sa pagserbisyo diha sa linain nga mga grupo nga nagtrabaho nga makigsabot sa mga kapanguhaan nga may kalabotan sa pagbarog pinaagi sa kinaugalingong paningkamot o pagserbisyo sa komunidad (tan-awa sa 22.10.2). Sa mga stake nga nagsuporta sa operasyon sa welfare ug sa pagbarog pinaagi sa kinaugalingong paningkamot, ang usa ka sakop sa kapangulohan mahimong hangyoon nga moserbisyo sa operasyon sa komitiba sa tinugyanan nga stake (tan-awa sa 22.9.1.2).
Mga Espesyalista sa Stake alang sa Welfare ug Pagbarog pinaagi sa Kinaugalingong Paningkamot
Kon gikinahanglan, ang kapangulohan sa stake mahimong motawag og mga indibidwal o mga magtiayon isip mga espesyalista sa welfare ug sa pagbarog pinaagi sa kinaugalingong paningkamot. Sila mosuporta sa mga lider sa stake sa ilang mga paningkamot sa pag-atiman sa uban ug pagtabang kanila nga mahimong mapaningkamoton sa kaugalingon.
Ang mga espesyalista mahimong sangonan ngadto sa piho nga bahin nga tutokan. Pananglitan, sila mahimong hangyoon sa:
Paghatag og mga ideya ug mga kapanguhaan sa pagtabang sa mga miyembro sa stake nga madugangan ang ilang temporal nga pagkaandam (tan-awa sa 22.1.4).
Pagtabang sa pagpangandam o pagtubag sa mga emerhensiya (tan-awa sa 22.9.1.3).
Pagpaambit og impormasyon sa mga miyembro mahitungod sa magamit nga mga kapanguhaan sa gobyerno, komunidad, ug sa Simbahan (tan-awa sa 22.12 ug 22.13).
Ang mga espesyalista sa stake makigsabot sa mga paningkamot uban sa mga espesyalista sa welfare ug sa pagbarog pinaagi sa kinaugalingong paningkamot kinsa gitawag diha sa mga ward.
22.10
Tahas sa Konseho sa Stake
Ang mga sakop sa konseho sa stake mohisgot sa mga panginahanglan sa mga miyembro sa stake ug moplano unsaon sa pagtabang ang mga miyembro nga mahimong mapaningkamoton sa kaugalingon (tan-awa sa 29.3.8). Sila moila sa mga kapanguhaan diha sa komunidad ug stake nga makatabang sa mga lider sa ward sa pag-atiman alang sa temporal ug emosyonal nga mga panginahanglan sa ilang mga miyembro (tan-awa sa 22.12 ug 22.13). Sila maghimo ug magmentinar og usa ka yanong sinulat nga plano aron makatubag ang stake sa mga emerhensiya (tan-awa sa “Pagkaandam sa Stake ug Ward”). Ang mga konseho sa stake mahimo usab nga magplano og mga paagi sa paghatag og serbisyo diha sa komunidad.
Base kon anaa sa lokal, ang konseho sa stake mahimong mogamit o moimplementar sa bisan hain sa mosunod nga opsiyonal nga mga kapanguhaan. Kini nga mga kapanguhaan makatabang sa mga miyembro sa stake pagpalambo sa pagbarog pinaagi sa kinaugalingong paningkamot o pag-apil diha sa pagserbisyo sa komunidad:
Usa ka direktoryo [directory] sa lokal nga mga kapanguhaan sa gobyerno ug komunidad nga nagserbisyo niadtong nanginahanglan (tan-awa sa 22.12 alang sa mga ehemplo)
Aron sa pagtabang pag-organisar ug pagdumala sa opsiyonal nga mga kapanguhaan nga gilatid diha sa 22.10.1, ang kapangulohan sa stake mahimong motudlo og linain nga mga grupo nga nagtrabaho sama sa JustServe nga mga grupo nga nagtrabaho. Kini nga mga grupo mahimong maglangkob sa pinili nga mga miyembro sa konseho sa stake o sa komitiba sa mga nangulo sa mga hamtong sa stake (tan-awa sa 29.3.9). Mahimong ilakip usab kanila ang mga espesyalista sama sa mosunod:
Mga espesyalista sa welfare ug sa pagbarog pinaagi sa kinaugalingong paningkamot (tan-awa sa 22.9.4)
Mga direktor sa komunikasyon o sa mga espesyalista sa JustServe (tan-awa sa JustServe Community Service Guidebook)
Uban pa kon gikinahanglan
22.11
Tahas sa Konseho sa mga Bishop sa Stake
Ang konseho sa mga bishop ipahigayon aron magtinambagay mahitungod sa mga responsibilidad kalabot ngadto sa mga bishop. Kini naglakip sa regular nga panaghisgot sa mga baroganan sa (1) pag-atiman niadtong kinsa adunay temporal ug emosyonal nga mga panginahanglan ug sa (2) pagpalambo sa pagbarog pinaagi sa kinaugalingong paningkamot. (Tan-awa sa 29.3.11.)
Ang mga miyembro sa konseho giawhag sa:
Pagbinayloay og mga ideya, mga kasinatian, ug mga kapanguhaan alang sa pagtubag sa temporal ug emosyonal nga mga panginahanglan. Kini naglakip sa mga kapanguhaan diha sa komunidad. Kini naglakip usab sa mga ideya alang sa pagtrabaho o mga oportunidad sa pagserbisyo alang sa mga miyembro kinsa modawat og tabang gikan sa Simbahan.
Mohisgot og mga paagi sa pag-awhag sa mga miyembro nga modawat og mga panalangin sa pagsunod sa balaod sa puasa ug pagdonar og mga halad sa puasa.
MGA KAPANGUHAAN SA GOBYERNO, KOMUNIDAD, UG SIMBAHAN
22.12
Mga Kapanguhaan sa Gobyerno ug Komunidad
Sa daghang mga dapit, ang mga miyembro makagamit sa mga kapanguhaan sa gobyerno o sa komunidad nga makatabang sa nag-unang mga panginahanglan. Ang maong mga kapanguhaan mahimong maglakip sa:
Tabang alang sa pag-atiman sa kahimsog.
Tabang alang sa pagkaon.
Pagbansay sa trabaho ug mga serbisyo sa pagpahimutang og trabaho.
Mga serbisyo alang sa kahimsog sa pangisip.
Mga programa sa edukasyon.
Mga programa sa tabang alang sa mga senior.
Tabang alang sa kapuy-an.
Ang mga miyembro giawhag sa pagsuhid niini nga mga kapanguhaan, agi og dugang ngadto sa mga kapanguhaan nga ihatag sa Simbahan (tan-awa sa 22.13).
Imahe
mga prutas ug mga utanon
22.13
Mga Kapanguhaan sa Simbahan
Ang mosunod nga talaan naglista sa mga kapanguhaan sa Simbahan nga makasuporta sa mga paningkamot sa mga miyembro sa pagsangkap sa ilang temporal ug emosyonal nga mga panginahanglan ug pagpalambo sa pagbarog pinaagi sa kinaugalingong paningkamot. Ang balay tipiganan sa Ginoo (tan-awa sa 22.2.1) ug mga halad sa puasa (tan-awa sa 22.2.2) magamit sa mga bishop sa matag ward. Ang ubang mga kapanguhaan nga gilista mga opsiyonal ug magkalahi sumala sa lugar.
Kategoriya
Mga Kapanguhaan
Kategoriya
Diha-diha dayon nga mga panginahanglan
Mga Kapanguhaan
Ang balay tipiganan sa Ginoo (mga halad sa mga miyembro sa panahon, mga talento, kalooy, mga materyal, ug pinansyal nga mga kapanguhaan)
Mga halad sa puasa
Ang mga bishops’ order alang sa pagkaon ug sa ubang nag-unang mga panginahanglan pinaagi sa balay tipiganan sa bishop o sa tindahan.*
Ang mga bishops’ order alang sa sinina o mga aytem sa panimalay pinaagi sa tindahan sa Deseret Industries.*