“21. Auaunaga,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2020).

“21. Auaunaga,” Tusitaulima Aoao.

Ata

o ni alii o loo si’ia se maa

21.

Auaunaga

21.0

Faatomuaga

O le auaunaga o lona uiga o le auauna atu i isi e faapei ona sa faia e le Faaola (tagai i le Mataio 20:26–28). Sa Ia alofa atu, a’oa’o atu, tatalo mo [isi], faamafanafana atu, ma faamanuia i latou sa vagaia o Ia (tagai i le Galuega 10:38). I le avea ai o ni soo o Iesu Keriso, tatou te saili e auauna atu i fanau a le Atua.

E finagalo le Alii i tagata uma o Lana Ekalesia ia maua lena tausiga. Ona o lea mafuaaga, ua tofia ai i latou e umia le perisitua o ni uso o auaunaga mo aiga o tagata taitasi o le au paia. E tofia tuafafine o auaunaga i tuafafine matutua taitasi. E fesoasoani nei tofitofiga e faamautinoa ai e manatua ia tagata o le Ekalesia ma tausia (tagai i le Moronae 6:4).

O le auaunaga o se ala taua tatou te tausia ai poloaiga ia alofa i le Atua ma ia alofa i o tatou tuaoi (tagai i le Mataio 22:36–40). O se ala taua foi lea e fesoasoani ai e faataunuu le galuega a le Atua mo le faaolataga ma le faaeaga.

E fesoasoani au peresitene o korama a Toeaina ma Aualofa i uso ma tuafafine o auaunaga e a’oa’o pe faapefea ona auauna atu i isi. Latou te tuuina atu foi uunaiga, taitaiga, ma le lagolago. E mafai ona latou faia lenei mea i faatalanoaga o auaunaga (tagai i le 21.3), i fonotaga i Aso Sa, ma i talatalanoaga patino. Latou te sailia musumusuga mai tusitusiga paia, le mataupu lenei, ma le ministering.ChurchofJesusChrist.org.

21.1

O Tiutetauave o Tuafafine ma Uso o Auaunaga

O tuafafine ma uso o auaunaga o sui o le Alii. Latou te fesoasoani foi i tagata o le au paia ia lagonaina le alofa ma le lagolago a le epikopo ma taitai o le Aualofa po o le korama. E tatau ona latou “leoleo i luga” o le Ekalesia ma “faatasi ma faamalolosi i latou” (Mataupu Faavae ma Feagaiga 20:53).

O tuafafine ma uso o auaunaga ua i ai tiutetauave nei mo tagata taitoatasi ma aiga e tofi atu ia i latou:

Fesoasoani ia i latou ia faamalolosia lo latou faatuatua i le Tama Faalelagi ma Iesu Keriso.
Fesoasoani e saunia i latou e osia ma tausia feagaiga paia ma le Atua a o latou mauaina nei sauniga. Pe a manaomia, fesoasoani i matua e saunia a latou fanau ia maua sauniga ma tausia feagaiga.
Ia iloatino mea e manaomia ma tuuina atu le alofa, tausiga, ma le auaunaga FaaKeriso. Ofo atu le fesoasoani ma le faamafanafanaga i taimi o manaoga faaleagaga ma le faaletino. Talanoaina manaoga i le taimi o faatalanoaga o auaunaga ma i isi taimi.
Fesoasoani ia latou ola-tutoatasi faaleagaga ma faaletino.

Mo nisi faamatalaga e uiga i tiutetauave o tuafafine ma uso o auaunaga, tagai i le Iakopo 1:27, Mosaea 23:18, ma le Mataupu Faavae ma Feagaiga 20:47, 59.

E saili ma le agaga tatalo e tuafafine ma uso o auaunaga le taitaiga a le Agaga. Latou te fefautuaai foi ma ē latou te auauna atu i ai ina ia malamalama ai pe o le a le auala e sili ona lelei e fesoasoani atu ai ia taulima o latou manaoga.

E fetuunai e tuafafine ma uso o auaunaga a latou taumafaiga e tusa ma manaoga ma tulaga o ē latou te auauna i ai. E fautuaina asiasiga patino, ae ia iloiloina tulaga taua e pei o le saogalemu, mamao, ma tulaga talafeagai faaleaganuu. E mafai foi ona aapa atu ia tuafafine ma uso o auaunaga i isi auala. O nei auala e aofia ai le vili i le telefoni, vitio, tesi, imeli, tusi, fesootaiga faaagafesootai, faafesootai i le lotu, ma faatinoga o ni auaunaga.

Atonu e i ai manaoga e le mafai e tuafafine ma uso o auaunaga ona taulimaina na o i latou. O tulaga faapea, latou te fefautuaai ai ma se tasi o le au peresitene o le Aualofa po o le korama a toeaina.

21.2

Faatulagaina o Auaunaga

Na tuuina atu e le Faaola i Ona soo ni tofitofiga anoa (tagai i le Luka 10:1–17; tagai foi i le 4.2.6 i le tusitaulima lenei). O le mulimuli i lenei mamanu, tatou te maua ai tofitofiga e auauna atu ai i ni tagata patino ma aiga. O se faiga faatulagaina lelei i le auaunaga e fesoasoani e avatu ai i tagata taitasi ia avanoa e lagonaina ai le alofa o le Faaola.

21.2.1

O Le Faia o Tofitofiga

E fuafua ma le agaga tatalo e au peresitene o le korama a toeaina ma le Aualofa ia tofitofiga mo uso ma tuafafine o auaunaga. Latou te faitaulia ia malosiaga ma manaoga o tagata o le au paia. Latou te iloiloina foi ia manaoga o tamaiti i le aiga. E masani ona latou tofia ni uso se toalua po o ni tuafafine se toalua o ni soa. Latou te sailia le faamaoniga a le epikopo mo soa ma tofitofiga mo le auaunaga.

Pe a faia nei faai’uga, e iloilo e taitai mea nei:

O uso ma tuafafine tuuto o auaunaga, e tatau ona tofi i tagata o le au paia e aupito tetele manaoga o i ai. E ono aofia ai tagata fou i le ekalesia, matua nonofo taitoatasi, tina ua oti a latou tane, tama ua oti a latou avā, ma tagata o le au paia e le o toaaga mai.
E mafai ona avea talavou ma soa a le au matutua e tusa ai ma taiala o i le 21.2.2.
E mafai ona tofi se ulugalii ua faaipoipo e auauna atu faatasi i se tagata po o se aiga.
O au peresitene o siteki ma au epikopo e vaaia tagata uma o le siteki po o le uarota. Ona o lena mea, e masani lava ona le tofia i latou o ni uso o auaunaga. E fuafua e le peresitene o le siteki pe tofia ia fautua maualuga ma peteriaka o loo galulue.

A uma ona tuuina atu e le epikopo le faamaoniga, o se tasi o le au peresitene o le korama a toeaina e tuuina atu tofitofiga i uso o auaunaga, e aofia ai ma alii talavou. O se tasi o le au peresitene o le Aualofa e tuuina atua tofitofiga i tuafafine o auaunaga, e aofia ai ma tamaitai talavou.

E fefautuaai nei taitai ma uso po o tuafafine o auaunaga e uiga i malosiaga, manaoga, ma luitau o i latou o le a latou auauna atu i ai. E fautuaina e taitai ia uso po o tuafafine o auaunaga ia malamalama i manaoga o i latou ua tofia i ai, ona latou sailia lea o musumusuga pe o le a le ala sili e auauna atu ai.

O uso ma tuafafine o auaunaga e le valaauina, lagolagoina, pe vaetofiaina. O la latou auaunaga o se vaega o le feagaiga na latou osia i le papatisoga (tagai i le Mosaea 18:8–11).

21.2.2

Tofitofiga Faaleauaunaga mo le Autalavou

Tusa lava foi pe latou te le’i mauaina ni tofitofiga faaleauaunaga, e auauna atu lava le autalavou i isi e ala i le auauna atu ia i latou i ala FaaKeriso. O le auauna atu o se talavou i le avea ai o se tuafafine po o se uso o auaunaga, e mafai ona avea o se vaega iloga o le faataunuuina o le galuega a le Atua mo le faaolataga ma le faaeaga.

E mafai e se tamaitai talavou ona avea ma soa o auaunaga i se tuafafine o le Aualofa pe a naunau le tamaitai talavou ma gafatia. E mafai ona amata auauna atu o ia i le tausaga e atoa ai lona 14. E fefautuaai le au peresitene o le Aualofa ma le tamaitai talavou, o ona matua ma le au peresitene o Tamaitai Talavou a o latou fuafuaina ia tofitofiga o auaunaga.

E tele ina avea o se faamanuiaga i se tuafafine le i ai o se tamaitai talavou e auauna pe asiasi atu ia te ia. E mafai foi ona avea o se faamanuiaga i le tamaitai talavou.

O se alii talavou e avea ma soa mo auaunaga i se e umia le Perisitua Mekisateko, pe a ua faauuina o ia i le tofi o le a’oa’o po o le ositaulaga. E fuafua e le epikopo pe ua agavaa le alii talavou ma ua saunia e faauuina. (Tagai i le 10.1.3.2.) E fefautuaai le au peresitene o le korama a toeaina ma le alii talavou, o ona matua, ma le au epikopo a o latou fuafuaina ia tofitofiga o auaunaga.

I nisi tulaga, atonu e tofia le autalavou o se uso lona tolu o se soa mo auaunaga. E mafai e taitai ona tofia le autalavou e fesoasoani e auauna atu i nisi po o tagata taitasi uma ma aiga e tofi atu i le soa.

E le tofia ni uso po o tuafafine o auaunaga i le autalavou. Latou te maua le tausiga faaleauaunaga mai uso o auaunaga a lo latou aiga. E auauna atu foi ia i latou ia o latou au peresitene o le vasega po o le korama ma taitai matutua. Afai e le auai o latou matua i le Ekalesia ae talia le auaunaga, e mafai e le au peresitene o le korama a toeaina ona tofi i ai uso o auaunaga i le aiga. E faapena foi, ona mafai e le au peresitene o le Aualofa ona tofi ni tuafafine o auaunaga i le tina.

O le taiala a le Ekalesia faapea ia toalua ni tagata matutua lelei ia i ai faatasi ma se talavou e le faaaogaina i le tofitofiga o soa o auaunaga. Peitai, e faaaoga e taitai le faautautaga ma sailia musumusuga pe a tofi le autalavou o ni soa i tagata matutua. Latou te sailia foi le taitaiga mai le epikopo. Pe a tofia se talavou i se soa e le o se tasi o ona matua, ia faamaonia e taitai e le o tetee matua i le tofiga.

E tatau i soa matutua ona aloese mai tulaga e ono malamalama sese i ai. Latou te faaeteete i tulaga e tuua ai na o le tagata matua ma le talavou. Latou te fesoasoani i le autalavou ia maua se aafiaga saogalemu ma tauia i le auaunaga.

Ata

talavou o loo galue i se togalaau

21.2.3

Faifeautalai Faamisiona

Afai e faamaonia mai e le peresitene o le misiona, e mafai e faifeautalai faamisiona ona fesoasoani i auaunaga. E mafai e taitai o uarota ona sailia lana faamaoniga e ala atu i le peresitene o le siteki. E masani ona tofia ia faifeautalai faamisiona e auauna atu i tagata fou o le ekalesia, o aiga e le lolotu uma, ma tagata ua le toaaga mai.

21.3

Faatalanoaga o Auaunaga

Na i ai se faatalanoaga faigofie ae maoae a le Faaola ma Peteru e uiga i le fafagaina o Ana mamoe (tagai i le Ioane 21:15–17). E mafai ona faapena foi se avanoa o faatalanoaga o auaunaga. E mafai ai foi e taitai ona faatu se faataitaiga o le auaunaga.

O le peresitene o le korama a toeaina ma ona fesoasoani e faatalanoaina ia uso o auaunaga. O le peresitene o le Aualofa ma ona fesoasoani e faatalanoaina ia tuafafine o auaunaga. O se ulugalii ua faaipoipo e tofi e auauna atu faatasi e mafai ona fono ma taitai o le korama a toeaina po o le Aualofa po o taitai uma e lua.

O nei faatalanoaga e faia e le itiiti ifo ma le faa-tasi i kuata taitasi. E mafai ona faia i soo se taimi i le aluga o le kuata. E sili ai, ona faia faatalanoaga taitoatasi, ma fai foi ma tagata e toalua o le soa. E ao ona faaaofia ai ma talavou e i ai tofitofiga mo auaunaga pe a mafai.

E le manaomia ona faauumi faatalanoaga o auaunaga ina ia lelei ai. O faamoemoega o faatalanoaga ia:

Fefautuaai e uiga i malosiaga, manaoga, ma luitau o tagata taitasi ma aiga na tofi i ai.
Talanoaina ni auala e fesoasoani ai i tagata ia saunia ia maua ia sauniga pe a manaomia.
Mafaufau pe ono mafai faapefea ona fesoasoani le korama a toeaina, Aualofa, aufono a le uarota ma isi.
A’oa’o atu ma faamalosiau i uso ma tuafafine o auaunaga.

I le va o faatalanoaga, e fesootai ia uso ma tuafafine o auaunaga ma taitai pe a manaomia. E mafai ona latou faasoa sa’o atu faamatalaga e le faalauaiteleina i le epikopo.

E faaaoga e taitai le polokalama o Punaoa mo Taitai ma Failautusi e lipoti atu ai faatalanoaga o auaunaga.

21.4

Faamaopoopoina o Taumafaiga o Auaunaga

E tausoa e le Aualofa ma le korama a toeaina le galuega o auaunaga. Latou te faia lenei galuega i le lotogatasi.

E fono faatasi ia au peresitene o le Aualofa ma le korama a toeaina a itiiti e faalekuata. Latou te iloiloina mea sa latou a’oa’oina mai i faatalanoaga o auaunaga (tagai i le 21.3). Latou te faamaopoopoina foi ia tofitofiga mo auaunaga. E tausoa e peresitene e toalua le tiutetauave o le faatulagaina ma le taitaiina o le fonotaga.

I iunite e toalaiti tagata e toaaga, e mafai e au peresitene o le Aualofa ma le korama a toeaina ona fai se faaiuga e aua nei tofia ni tuafafine o auaunaga ma uso o auaunaga i nisi o tagata o le au paia. E fai faatasi e taitai lenei faai’uga ma saili atu mo le faamaoniga a le epikopo. Afai e tofia ni tuafafine o auaunaga ae le o uso o auaunaga [e asi] se tuafafine, ia faamautinoa e taitai e i ai se tasi e mafai ona talosaga i ai [lea tuafafine] mo se faamanuiaga faaleperisitua.

E le itiiti ifo i le faalekuata ona fono faatasi le peresitene o le Aualofa ma le peresitene o le korama a toeaina ma le epikopo. Latou te talanoaina ia manaoga o tagata o le uarota. Latou te talanoa foi i ni suiga e tatau ai i tofitofiga faaleauaunaga.

Pe a manaomia, e talanoaina e peresitene o le Aualofa ma le korama a toeaina faatasi ma le aufono a le uarota ia faamatalaga na faasoa mai e tuafafine ma uso o auaunaga. A o latou faia, latou te faaaloalogia ia talosaga a tagata mo le le faalauaiteleina. Pe a faatulagaina e le epikopo, e faia e le aufono a le uarota ia fuafuaga e auauna atu ma faamanuia ai tagata o le uarota. E talanoaina foi e le aufono a le autalavou o le uarota ia auaunaga (tagai i le 29.2.6).