“18. Pagpahigayon og mga Ordinansa ug mga Panalangin sa Pagkapari,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2024).
“18. Pagpahigayon og mga Ordinansa ug mga Panalangin sa Pagkapari,” Kinatibuk-ang Tamdanan nga Basahon.
18.
Pagpahigayon og mga Ordinansa ug mga Panalangin sa Pagkapari
18.0
Pasiuna
Ang mga ordinansa ug mga panalangin mao ang sagrado nga mga buhat nga ipahigayon sa awtoridad sa pagkapari ug pinaagi sa ngalan ni Jesukristo. Samtang ang mga naghupot sa pagkapari mopahigayon sa mga ordinansa ug mga panalangin, sila mosunod sa ehemplo sa Manluluwas sa pagpanalangin sa uban. Ang mga ordinansa ug mga panalangin sa pagkapari makahatag og paagi nga magamit ang gahom sa Dios (tan-awa sa Doktrina ug mga Pakigsaad 84:20).
Ang mga ordinansa ug mga panalangin kinahanglang ipahigayon uban sa hugot nga pagtuo diha sa Langitnong Amahan ug ni Jesukristo ug sumala sa giya sa Espiritu Santo. Ang mga lider moseguro nga kini ipahigayon uban sa tukma nga pagtugot (diin gikinahanglan), uban sa gikinahanglan nga awtoridad sa pagkapari, sa tukma nga paagi, ug pinaagi sa takos nga mga partisipante (tan-awa sa 18.3).
Alang sa mga lagda sa mga ordinansa ug mga panalangin sa pagkapari, tan-awa sa 38.2.
18.1
Mga Ordinansa sa Kaluwasan ug Kahimayaan
Ang pagkapari naglakip sa awtoridad sa pagpangalagad sa mga ordinansa sa ebanghelyo nga gikinahanglan alang sa kaluwasan ug kahimayaan. Ang mga tawo mohimo og sagrado nga mga pakigsaad uban sa Dios samtang sila modawat niini nga mga ordinansa. Ang mga ordinansa sa kaluwasan ug kahimayaan gilista sa ubos:
-
Bunyag
-
Kompirmasyon ug gasa sa Espiritu Santo
-
Pagtugyan sa Melchizedek nga Pagkapari ug pag-orden ngadto sa usa ka katungdanan (alang sa mga lalaki)
-
Pagtuga diha sa templo
-
Pagselyo diha sa templo
Alang sa impormasyon mahitungod sa pagpahigayon niining mga ordinansa alang niadtong adunay intelektuwal nga mga kakulangan, tan-awa ang mosunod:
-
Alang sa bunyag ug kompirmasyon (38.2.8.1)
-
Alang sa pag-orden ngadto sa katungdanan diha sa Melchizedek nga Pagkapari (38.2.9.7)
-
Alang sa tuga ug pagselyo diha sa templo (27.2.1.3 ug 27.3.1.2)
Kon ang usa ka bata natawo diha sa pakigsaad namatay sa wala ang edad nga 8, walay mga ordinansa ang gikinahanglan o ipahigayon. Kon ang bata wala matawo diha sa pakigsaad, ang bugtong ordinansa nga iyang gikinahanglan mao ang pagpaselyo ngadto sa mga ginikanan. Tungod sa Pag-ula sa Manluluwas, ang tanang mga bata nga namatay sa wala pa ang edad nga 8 “maluwas diha sa celestial nga gingharian sa langit” (Doktrina ug mga Pakigsaad 137:10; tan-awa usab sa Moroni 8:8–12).
18.2
Ubang mga Ordinansa ug mga Panalangin
Ang ubang mga ordinansa ug mga panalangin nakahimo nga posible alang sa mga anak sa Dios sa pagdawat sa Iyang gahom, pag-ayo, kahupayan, ug giya. Kini nga mga ordinansa ug mga panalangin gilista sa ubos:
-
Paghatag og ngalan ug panalangin sa mga bata
-
Ang sakramento
-
Pagtugyan sa Aaronic nga Pagkapari ug pag-orden ngadto sa usa ka katungdanan (alang sa mga batan-on ug hingkod nga lalaki)
-
Pag-set apart sa mga miyembro nga moserbisyo sa mga calling
-
Pagbalaan sa lana
-
Pagpangalagad ngadto sa masakiton
-
Mga panalangin sa kahupayan ug tambag, lakip sa mga panalangin sa amahan
-
Pagpahinungod og mga panimalay
-
Pagpahinungod sa mga lubnganan
-
Patriyarkal nga panalangin nga ihatag pinaagi sa gi-orden nga mga patriyarka
18.3
Pag-apil sa usa ka Ordinansa o Panalangin
Kadtong kinsa mopahigayon o moapil sa usa ka ordinansa o panalangin kinahanglan gayod nga aduna sa gikinahanglan nga awtoridad sa pagkapari ug takos. Sa kasagaran, ang sumbanan sa katakos may kalabotan sa paghupot og rekomend sa templo. Hinoon, kon gigiyahan sa Espiritu ug sa mga instruksiyon niini nga kapitulo, ang mga bishop ug ang mga presidente sa stake mahimong motugot sa mga amahan ug mga bana nga naghupot sa gikinahanglan nga katungdanan sa pagkapari sa pagpahigayon o pag-apil sa pipila ka mga ordinansa ug mga panalangin bisan kon sila dili hingpit nga takos sa templo. Ang naghupot sa pagkapari kinsa adunay wala masulbad nga seryoso nga mga sala kinahanglang dili moapil.
Sa kasagaran, ang mga lider sa pagkapari lamang ug ubang mga naghupot sa pagkapari kinsa suod nga sakop sa pamilya ug mga higala ang moapil sa usa ka ordinansa o panalangin.
Ang tawo nga nagdawat sa ordinansa, mga sakop sa pamilya, ug mga lider sa pagkapari magtinambagay aron sa pagtino kinsa ug pila ka buok ang moapil. Kini nga desisyon kinahanglan himoon og tarong sa dili pa ipahigayon ang ordinansa.
Kon usa o duha lang ka mga naghupot sa pagkapari ang moapil, ang matag usa nila gaan nga mopandong sa ilang duha ka kamot diha sa ulo sa tawo. Kon daghan ang moapil, sila mobarog nga magsirkulo libot sa tawo nga nagdawat sa ordinansa o panalangin. Ang matag usa gaan nga mopandong sa iyang tuo nga kamot sa ulo sa tawo (o ilawom sa masuso) ug ang iyang wala nga kamot ibutang sa abaga sa igsoong lalaki sa iyang wala. Usa ka tawo maoy tingog sa pagpahigayon sa ordinansa o paghatag sa panalangin.
Ang pagpahigayon o pagdawat sa pipila ka mga ordinansa ug mga panalangin nagkinahanglan og pagtugot gikan sa tigdumalang lider nga naghupot sa gikinahanglan nga mga yawe sa pagkapari (tan-awa sa 3.4.1). Kon gikinahanglan, ang pagtugot mahimong ihatag sa usa ka magtatambag nga iyang gitugotan. Tan-awa ang mosunod nga mga tsart. Kon maghisgot og mga presidente sa stake nagpasabot usab kini sa mga presidente sa misyon. Ang mga pulong nga mga bishop nagpasabot usab sa mga presidente sa branch.
Kinsa nga mga Lider ang Naghupot sa mga Yawe nga Mohatag og Pagtugot sa Pagpahigayon o Pagdawat sa mga Ordinansa sa Kaluwasan ug Kahimayaan?
|
Ordinansa |
Kinsa ang Naghupot sa mga Yawe |
|---|---|
Ordinansa Bunyag | Kinsa ang Naghupot sa mga Yawe Bishop (alang sa 8 anyos nga mga bata ug alang sa mga miyembro nga anaa na sa rekord nga nag-edad og 9 ug pataas kansang bunyag nalangan tungod sa mga intelektuwal nga mga kakulangan) Presidente sa misyon (alang sa mga kinabig) |
Ordinansa Kompirmasyon ug gasa sa Espiritu Santo | Kinsa ang Naghupot sa mga Yawe Bishop (alang sa 8 anyos nga mga bata ug alang sa mga miyembro nga anaa na sa rekord nga nag-edad og 9 ug pataas kansang bunyag nalangan tungod sa mga intelektuwal nga mga kakulangan) Presidente sa misyon (alang sa mga kinabig) |
Ordinansa Pagtugyan sa Melchizedek nga Pagkapari ug pag-orden ngadto sa usa ka katungdanan (alang sa mga lalaki) | Kinsa ang Naghupot sa mga Yawe Presidente sa stake |
Ordinansa Pagtuga diha sa templo | Kinsa ang Naghupot sa mga Yawe Bishop ug presidente sa stake |
Ordinansa Pagselyo diha sa templo | Kinsa ang Naghupot sa mga Yawe Bishop ug presidente sa stake |
Kinsa nga mga Lider ang Naghupot sa mga Yawe nga Mohatag og Pagtugot sa Pagpahigayon o Pagdawat og Ubang mga Ordinansa ug mga Panalangin?
|
Ordinansa o Panalangin |
Kinsa ang Naghupot sa mga Yawe |
|---|---|
Ordinansa o Panalangin Paghatag og ngalan ug panalangin sa mga bata | Kinsa ang Naghupot sa mga Yawe Bishop |
Ordinansa o Panalangin Ang sakramento | Kinsa ang Naghupot sa mga Yawe Bishop |
Ordinansa o Panalangin Pagtugyan sa Aaronic nga Pagkapari ug pag-orden ngadto sa usa ka katungdanan (alang sa mga batan-on ug hingkod nga lalaki) | Kinsa ang Naghupot sa mga Yawe Bishop |
Ordinansa o Panalangin Pag-set apart sa mga miyembro nga moserbisyo sa mga calling | Kinsa ang Naghupot sa mga Yawe Tan-awa sa 30.8 |
Ordinansa o Panalangin Pagbalaan sa lana | Kinsa ang Naghupot sa mga Yawe Pagtugot wala kinahanglana |
Ordinansa o Panalangin Pagpangalagad ngadto sa masakiton | Kinsa ang Naghupot sa mga Yawe Pagtugot wala kinahanglana |
Ordinansa o Panalangin Mga panalangin sa kahupayan ug tambag, lakip sa mga panalangin sa amahan | Kinsa ang Naghupot sa mga Yawe Pagtugot wala kinahanglana |
Ordinansa o Panalangin Pagpahinungod og mga panimalay | Kinsa ang Naghupot sa mga Yawe Pagtugot wala kinahanglana |
Ordinansa o Panalangin Pagpahinungod sa mga lubnganan | Kinsa ang Naghupot sa mga Yawe Ang lider sa pagkapari nga nagdumala sa tulumanon |
Ordinansa o Panalangin Patriyarkal nga mga panalangin | Kinsa ang Naghupot sa mga Yawe Bishop |
18.4
Mga Ordinansa alang sa Menor de Edad nga mga Bata
Mga lagda alang sa pagkuha og pagtugot gikan sa mga ginikanan o mga tigbantay alang sa usa ka menor nga bata aron makadawat sa mosunod nga mga ordinansa ug mga panalangin gihatag niini nga mga seksiyon nga gilista sa ubos:
-
Alang sa paghatag og ngalan ug panalangin: 38.2.7.2 ug 38.2.7.3
-
Alang sa bunyag ug kompirmasyon: 38.2.8.2
-
Alang sa ordinasyon ngadto sa katungdanan sa pagkapari 38.2.9.2
Alang sa mga pangutana mahitungod sa legal nga mga katungod sa mga ginikanan o mga tigbantay, ang bishop o ang presidente sa stake mangayo og legal nga tambag gikan sa Buhatan sa Kinatibuk-ang Legal nga Magtatambag sa Simbahan o gikan sa buhatan sa area (tan-awa sa 38.8.23).
18.5
Mga Ordinansa nga Ipahigayon alang ug pinaagi sa mga Tawo Kinsa Adunay mga Kakulangan
18.6
Paghatag og Ngalan ug Panalangin sa mga Bata
“Matag sakop sa simbahan ni Kristo nga adunay mga anak modala kanila ngadto sa mga anciano sa simbahan, kinsa mopandong sa ilang mga kamot diha kanila sa ngalan ni Jesukristo, ug mopanalangin kanila pinaagi sa iyang ngalan” (Doktrina ug mga Pakigsaad 20:70).
Ang mga bata sa kasagaran hatagan og ngalan ug panalanginan atol sa miting sa pagpuasa ug pagpamatuod diha sa ward diin magpuyo ang ilang mga ginikanan. Kini tinuod dili igsapayan kon ang mga ginikanan sa bata minyo. Kon ang mga ginikanan wala maghiusa sa pagpuyo, ang ordinansa sa kasagaran ipahigayon sa ward diin ang bata kasagaran nga didto nagpuyo.
Ang mga eksepsiyon sa kasagaran nga higayon ug dapit sa panalangin sa bata kinahanglang aprobahan sa bishop. Posible nga mga eksepsiyon maglakip sa mga pagpanalangin nga dili sa Dominggo sa puasa, ilabi na sa mga ward nga adunay daghang bag-ong mga masuso, ug mga panalangin diha sa laing ward diin nagpuyo ang mga apohan sa bata o daghang mga sakop sa pamilya. Ang bishop mahimo usab mohatag og katungod sa mga naghupot sa Melchizedek nga Pagkapari sa pagpanalangin sa bata diha sa panimalay. Usa ka sakop sa bishopric ang mopahigayon.
Alang sa impormasyon mahitungod sa paghatag og ngalan ug panalangin sa mga bata diha sa espesyal nga sirkumstansiya, tan-awa sa 38.2.7.
18.6.1
Kinsa ang Mohatag sa Panalangin
Ang ordinansa sa paghatag og ngalan ug panalangin sa usa ka bata ipahigayon sa naghupot sa Melchizedek nga Pagkapari, nga nahiuyon sa Doktrina ug mga Pakigsaad 20:70. Ang mga lider sa pagkapari mopahibalo sa mga miyembro niini sa dili pa ang ilang mga anak hatagan og ngalan ug panalangin. Ang mga lider kinahanglang mohimo sa tanang paningkamot nga malikayan ang pagkaulaw o pagkasilo sa mga indibidwal o mga pamilya.
Ang tawo o pamilya kinsa nagtinguha nga ang bata makadawat og ngalan ug panalangin makigsabot sa bishop kabahin sa ordinansa. Siya naghupot sa mga yawe sa pagkapari alang sa paghatag og ngalan ug panalangin sa mga bata sa ward.
Ang bishop mahimong motugot sa usa ka amahan nga naghupot sa Melchizedek nga Pagkapari sa paghatag og ngalan ug pagpanalangin sa iyang anak bisan kon ang amahan dili hingpit nga takos sa templo (tan-awa sa 18.3). Ang mga bishop moawhag sa mga amahan nga andamon ang kaugalingon sa pagpanalangin sa ilang kaugalingong mga anak.
Aron maoy tingog sa pagpanalangin sa usa ka bata, ang tawo nga anaa sa gawas sa iyang kaugalingong ward kinahanglang mopakita og balido nga rekomend sa templo ngadto sa tigdumalang lider. O siya mahimong mopakita sa Recommend to Perform an Ordinance nga gipirmahan sa sakop sa iyang bishopric.
18.6.2
Mga Instruksiyon
Ubos sa direksyon sa bishopric, ang naghupot sa Melchizedek nga Pagkapari magpundok diha sa sirkulo sa paghatag og ngalan ug pagpanalangin sa usa ka bata. Sila mobutang sa ilang mga kamot ilawom sa masuso, o gaan nga mobutang sa ilang mga kamot diha sa ulo sa mas dako nga bata. Dayon ang tawo nga maoy tingog:
-
Motawag sa Langitnong Amahan sama sa pag-ampo.
-
Mosulti nga ang panalangin gipahigayon pinaagi sa awtoridad sa Melchizedek nga Pagkapari.
-
Mohatag sa bata og ngalan.
-
Motawag sa bata.
-
Mohatag og panalangin sa bata sumala sa giya sa Espiritu.
-
Motapos pinaagi sa ngalan ni Jesukristo.
18.6.3
Porma sa Rekord sa Bata ug Sertipiko sa Panalangin
Sa dili pa panalanginan ang bata, ang klerk mogamit sa Leader and Clerk Resources (LCR) aron andamon ang Child Record Form. Human sa panalangin, siya mohimo sa rekord sa pagkamiyembro niana nga sistema ug moandam sa Sertipiko sa Panalangin. Kini nga sertipiko pirmahan sa bishop ug ihatag ngadto sa mga ginikanan o mga magbalantay sa bata.
Ang ngalan nga anaa sa rekord sa pagkamiyembro ug sa sertipiko kinahanglan magkatukma sa sertipiko sa pagkatawo, sa civil birth registry, o sa kasamtangan nga legal nga ngalan.
18.7
Bunyag
Ang bunyag pinaagi sa pagpaunlod diha sa tubig pinaagi sa usa ka tawo nga adunay awtoridad gikinahanglan aron ang usa ka tawo mahimong miyembro sa Simbahan ug modawat sa Espiritu Santo. Ang tanan nga nagtinguha og kahimayaan kinahanglan mosunod sa ehemplo sa Manluluwas pinaagi sa pagdawat niini nga mga ordinansa. (Tan-awa sa Mateo 3:13–17; Juan 3:3–7; Mga Buhat 2:37–38; 2 Nephi 31:5–21.)
Alang sa impormasyon mahitungod sa bunyag sa espesyal nga sirkumstansiya, tan-awa sa 38.2.8.
18.7.1
Pagtugot alang sa usa ka Tawo nga Bunyagan ug Kompirmahan
18.7.1.1
Mga Bata Kinsa mga Miyembro nga Anaa na sa Rekord [Member of Record]
Ang bishop naghupot sa mga yawe sa pagkapari alang sa pagbunyag sa 8 anyos nga mga miyembro nga anaa sa rekord sa ward. Kini nga mga bata kinahanglang bunyagan ug kompirmahan o human dayon sa ilang ika-8 nga adlawng natawhan kon resonable (tan-awa sa Doktrina ug mga Pakigsaad 68:27). Kini mao ang mga bata kansang mga rekord sa pagkamiyembro sa Simbahan anaa na (tan-awa sa 33.6.2). Kon sila moabot na og 8 anyos, ang bishop moseguro nga sila aduna sa tanang oportunidad nga modawat sa ebanghelyo ug mabunyagan ug makompirmahan.
Alang sa impormasyon mahitungod sa pagbunyag ug pagkompirma sa usa ka tawo kinsa adunay intelektuwal nga kakulangan, tan-awa sa 38.2.4 ug 38.2.8.1.
Ang bishop o ang gisangonan nga magtatambag mointerbiyo sa mga bata nga anaa sa rekord alang sa bunyag ug kumpirmasyon. Ang mga instruksiyon gihatag diha sa 31.2.3.1.
Alang sa impormasyon mahitungod sa pagsulat sa Rekord sa Bunyag ug Kompirmasyon, tan-awa sa 18.8.3.
Ang mga bishop mohatag og espesyal nga pagtagad sa 7 anyos nga mga bata sa ward, moseguro nga ang ilang mga ginikanan, mga lider ug mga magtutudlo sa Primary, ug kadtong nangalagad sa ilang mga pamilya motabang nila sa pagpangandam alang sa bunyag ug kompirmasyon. Ang mga lider sa korum sa mga elder ug Relief Society moawhag usab sa mga ginikanan sa pag-andam sa ilang mga anak alang niining mga ordinansa.
18.7.1.2
Mga Kinabig
Ang presidente sa misyon naghupot sa mga yawe sa pagkapari alang sa pagbunyag sa mga kinabig diha sa misyon. Tungod niini nga rason, ang full-time nga mga misyonaryo mointerbiyo sa mga kinabig alang sa bunyag ug kumpirmasyon. Ang mga instruksiyon gihatag diha sa 31.2.3.2.
Alang sa impormasyon mahitungod sa pagsulat sa Rekord sa Bunyag ug Kompirmasyon, tan-awa sa 18.8.3
18.7.1.3
Mga Anak Kansang mga Ginikanan Wala Maminyo (Lakip sa Nadeborsiyo)
Alang sa mga lagda sa pagbunyag ug pagkumpirma sa menor de edad nga mga bata, tan-awa sa 38.2.8.2
18.7.2
Mga Tulumanon sa Bunyag
Ang tulumanon sa bunyag kinahanglan nga yano, mubo, ug espirituwal nga makabayaw. Kini mahimong maglakip sa mosunod:
-
Prelude nga musika
-
Mubo nga pag-abi-abi sa lider sa pagkapari kinsa nagpahigayon sa tulumanon
-
Pangbukas nga himno ug pag-ampo
-
Usa o duha ka mubo nga mga mensahe sa mga hilisgutan sa ebanghelyo, sama sa bunyag ug Espritu Santo
-
Usa ka pinili nga musika
-
Ang bunyag
-
Usa ka panahon sa balaang pagtahod samtang kadtong miapil sa bunyag makailis og uga nga mga sinina (mga himno o mga kanta sa Primary mahimong patukaron o kantahon niining higayona)
-
Ang kompirmasyon sa 8 anyos nga mga miyembro nga anaa na sa rekord; ang kompirmasyon sa mga kinabig (tan-awa sa 18.8)
-
Paghatag og mga pagpamatuod sa bag-ong mga kinabig, kon gitinguha
-
Usa ka panapos nga himno ug pag-ampo
-
Postlude nga musika
Kon ang usa ka bata nga anaa na sa rekord nangandam aron mabunyagan, ang usa ka sakop sa bishopric ug ang kapangulohan sa Primary makigtambag sa pamilya aron magplano ug mag-eskedyul sa tulumanon sa bunyag. Usa ka sakop sa bishopric ang mopahigayon sa tulumanon. Kon sobra pa sa usa ka bata ang bunyagan sa sama nga bulan, mahimo sila nga dunganon diha sa tulumanon sa bunyag.
Diha sa mga stake nga adunay daghang bata nga anaa na sa rekord, ang mga bata gikan sa daghang ward mahimong dunganon diha sa tulumanon sa bunyag. Niana nga sitwasyon, ang usa ka sakop sa kapangulohan sa stake o kapangulohan sa Primary sa stake o usa ka high councilor makigtambag sa mga pamilya sa mga bata nga bunyaganan aron magplano ug mag-eskedyul sa tulumanon sa bunyag. Usa ka sakop sa kapangulohan sa stake o usa ka gisangonan nga high councilor ang mopahigayon sa tulumanon. Ang mga ward o mga pamilya mahimong magbulag sa pagtigom sa usa ka bahin sa tulumanon aron ang matag bata tagsa-tagsa nga mapasidunggan. Pananglitan, kini mahimong atol sa ordinansa sa bunyag, sa kompirmasyon, o sa usa ka pakigpulong sa usa ka sakop sa ward o pamilya. Usa ka sakop sa bishopric ang mopahigayon niana nga bahin sa tulumanon.
Ang mga tulumanon sa bunyag alang sa mga kinabig kinahanglang i-iskedyul dayon kon sila nakatagbaw sa mga kwalipikasyon nga anaa diha sa 31.2.3.2. Ang bunyag sa usa ka sakop sa pamilya kinahanglan nga dili ilangay hangtod ang amahan makadawat sa pagkapari ug mopahigayon mismo sa bunyag.
Ubos sa direksyon sa bishopric, ang lider sa misyon sa ward (kon adunay usa nga natawag) o ang sakop sa kapangulohan sa korum sa mga elder kinsa nangulo sa misyonaryo nga buhat diha sa ward mao ang moplano ug mopahigayon sa mga tulumanon sa bunyag alang sa mga kinabig. Siya usab ang magplano sa kompirmasyon sa mga kinabig gawas kon kompirmahan sila diha sa panagtigom alang sa sakramento. Siya makigsabot sa full-time nga mga misyonaryo.
18.7.3
Kinsa ang Mopahigayon sa Ordinansa
Ang ordinansa sa bunyag ipahigayon sa usa ka priest o naghupot sa Melchizedek nga Pagkapari. Ang tawo kinsa mopahigayon sa bunyag kinahanglan nga aprobahan sa bishop (o sa presidente sa misyon kon ang full-time nga misyonaryo ang mopahigayon sa bunyag).
Ang bishop motugot sa usa ka amahan kinsa usa ka priest o naghupot sa Melchizedek nga Pagkapari sa pagbunyag sa iyang anak bisan kon ang amahan dili hingpit nga takos sa templo (tan-awa sa 18.3). Ang mga bishop moawhag sa mga amahan sa pag-andam sa ilang kaugalingon sa pagbunyag sa ilang kaugalingong mga anak.
Sa pagpahigayon og bunyag, ang usa ka tawo nga anaa sa gawas sa iyang kaugalingong ward kinahanglang mopakita og balido nga rekomend sa templo ngadto sa tigdumalang lider. O siya mahimong mopakita sa Recommend to Perform an Ordinance nga gipirmahan sa sakop sa iyang bishopric.
18.7.4
Asa Ipahigayon ang Ordinansa
Ang mga bunyag kinahanglang ipahigayon sa usa ka bunyaganan kon aduna. Kon walay bunyaganan, ang luwas nga daghan og tubig nga dapit mahimong gamiton. Kinahanglan nga kini may igong gidak-on nga katindugan sa tawo nga mopahigayon sa ordinansa ug sa tawo nga bunyagan. Ang tubig dili ipahinungod alang sa mga bunyag.
Kon ang usa ka bunyaganan maoy gamiton, kini i-eskedyul pinaagi sa gisangonan nga miyembro sa ward sa tinugyanan nga bishop.
Alang sa kasegurohan, usa ka responsable nga hamtong kinahanglang anaa samtang ang bunyaganan gipaagasan ug magpabilin hangtod nga kini mahubsan, malimpyohan, ug luwas. Ang bunyaganan kinahanglan nga pahubsan ug limpyohan dayon human sa matag tulumanon sa bunyag. Ang mga pultahan sa bunyaganan kinahanglang sirad-an kon kini wala gamita.
18.7.5
Sinina
Ang tawo kinsa nagpahigayon og bunyag ug ang tawo kinsa gibunyagan magsul-ob og puti nga sinina nga dili sihag kon mabasa. Ang usa ka gitugahan nga tawo magsul-ob sa garment sa templo ilawom niini nga sinina samtang mopahigayon og bunyag. Ang lokal nga mga yunit mopalit sa sinina sa bunyag gamit ang mga pundo sa badyet ug kinahanglan nga dili magpabayad sa paggamit niini.
18.7.6
Mga Saksi
Duha ka saksi, nga giaprobahan sa tigdumalang lider, mo-obserbar sa matag bunyag aron sa pagseguro nga kini gipahigayon sa saktong paagi. Ang nabunyagan nga mga miyembro sa Simbahan, lakip sa kabataan ug kabatan-onan, mahimong moserbisyo isip mga saksi.
Ang bunyag kinahanglan nga usbon kon ang mga pulong wala masulti sa sakto sumala sa gihatag sa Doktrina ug mga Pakigsaad 20:73. Kinahanglan usab nga usbon kini kon usa ka bahin sa lawas, buhok, o sinina wala maunlod sa hingpit.
18.7.7
Mga Instruksiyon
Sa pagpahigayon sa ordinansa sa bunyag, ang usa ka priest o ang naghupot sa Melchizedek nga Pagkapari:
-
Motindog diha sa tubig uban sa tawo nga pagabunyagan.
-
Mogunit sa tuo nga pulso sa tawo sa iyang walang kamot (alang sa kasayon ug kasegurohan). Ang tawo nga bunyagan mogunit sa walang pulso sa naghupot sa pagkapari sa iyang walang kamot.
-
Mopataas sa iyang tuo nga bukton nga pinaeskwala.
-
Mosulti sa tibuok nga ngalan sa tawo ug moingon, “Ingon nga sinugo ni Jesukristo, ako magbunyag kanimo sa ngalan sa Amahan, ug sa Anak, ug sa Espiritu Santo. Amen” (Doktrina ug mga Pakigsaad 20:73).
-
Mopagunit sa tawo sa iyang ilong sa iyang tuong kamot (alang sa kasayon); dayon mobutang sa iyang tuong kamot diha sa likod sa tawo ug mopaunlod sa hingpit sa tawo, lakip ang sinina. Ang pagpaunlod mas sayon kon ang tawo mopiko sa iyang mga tuhod.
-
Motabang sa tawo sa pagkawas gikan sa tubig.
18.7.8
Rekord sa Bunyag
Alang sa impormasyon mahitungod sa paghimo og rekord sa bunyag, tan-awa sa 18.8.3.
18.8
Kompirmasyon ug Gasa sa Espiritu Santo
Human ang usa ka tawo gibunyagan, siya gikumpirmar nga usa ka miyembro sa Simbahan ug modawat sa Espiritu Santo pinaagi sa pagpandong sa mga kamot (tan-awa sa Doktrina ug mga Pakigsaad 20:41; Mga Buhat 19:1–6). Ang tawo mahimong usa ka miyembro sa Simbahan human makompleto kining duha ka ordinansa ug narekord sa saktong paagi (tan-awa sa Juan 3:5; Doktrina ug mga Pakigsaad 33:11; 3 Nephi 27:20).
Alang sa impormasyon mahitungod sa kumpirmasyon sa espesyal nga mga sirkumstansiya, tan-awa sa 38.2.8.
Ang bishop naghupot sa mga yawe sa pagkapari alang sa pagkumpirma sa 8 anyos nga mga miyembro nga anaa na sa rekord diha iyang sa ward. Ang presidente sa misyon naghupot sa mga yawe alang sa pagkumpirma sa mga kinabig (alang sa unsay ipasabot sa usa ka bunyag sa kinabig, tan-awa sa 31.2.3.2).
Ang bishop modumala sa mga kompirmasyon sa 8 anyos nga mga bata nga anaa na sa rekord. Kini nga mga bata sa kasagaran kompirmahan sa adlaw nga sila bunyagan.
Ang full-time nga mga misyonaryo makigsabot sa mga lider sa ward sa pagplano sa kompirmasyon sa mga kinabig sama sa gipahibalo diha sa 18.7.2. Ang mga kinabig mahimong kompirmahan diha sa tulumanon sa bunyag o diha sa panagtigom alang sa sakramento sa ward diin sila nagpuyo sa labing dali nga panahon human sa ilang bunyag.
Ang bag-ong mga miyembro ipailaila ug abiabihon isip bag-ong miyembro sa ward diha sa panagtigom alang sa sakramento human sa ilang kompirmasyon (tan-awa sa 29.2.1.1).
18.8.1
Kinsa ang Mopahigayon sa Ordinansa
Ang ordinansa sa pagkompirma ipahigayon sa mga naghupot sa Melchizedek nga Pagkapari. Ang usa nga maoy tingog kinahanglang giaprobahan sa bishop (o sa presidente sa misyon kon ang full-time nga misyonaryo ang nagpahigayon sa kompirmasyon).
Ang naghupot lamang sa Melchizedek nga Pagkapari kinsa takos sa templo ang mahimong tingog alang sa kompirmasyon. Hinoon, ang bishop mahimong motugot sa usa ka amahan nga naghupot sa Melchizedek nga Pagkapari sa pagbarog diha sa sirkulo alang sa kompirmasyon sa iyang anak bisan kon ang amahan dili hingpit nga takos sa templo (tan-awa sa 18.3).
Dili mominos usa ka sakop sa bishopric moapil niini nga ordinansa. Kon ang mga elder nga misyonaryo nagtudlo og usa ka kinabig, ang bishop mahimo nga modapit kanila sa pag-apil.
Aron maoy tingog niini nga ordinansa, ang usa ka tawo kinsa anaa sa gawas sa iyang kaugalingong ward kinahanglang mopakita og balido nga rekomend sa templo ngadto sa tigdumalang lider. O siya mahimong mopakita sa Recommend to Perform an Ordinance nga gipirmahan sa sakop sa iyang bishopric.
18.8.2
Mga Instruksiyon
Ubos sa direksyon sa bishopric, usa o daghan pa nga mga naghupot sa Melchizedek nga Pagkapari mahimong moapil sa kompirmasyon. Sila gaan nga mopandong sa ilang mga kamot sa ulo sa tawo. Dayon ang tawo nga maoy tingog:
-
Motawag sa tawo sa iyang tibuok nga ngalan.
-
Mosulti nga ang ordinansa gipahigayon pinaagi sa awtoridad sa Melchizedek nga Pagkapari.
-
Mokompirma sa tawo nga usa ka miyembro sa Ang Simbahan ni Jesukristo sa mga Santos sa Ulahing mga Adlaw.
-
Mogamit sa mga pulong “dawata ang Espiritu Santo” (dili “dawata ang gasa sa Espiritu Santo”).
-
Mohatag og mga pulong sa panalangin sumala sa giya sa Espiritu.
-
Motapos pinaagi sa ngalan ni Jesukristo.
18.8.3
Rekord ug Sertipiko sa Bunyag ug Kompirmasyon
Sa dili pa ang usa ka bata kinsa usa ka miyembro nga anaa na sa rekord interbiyohon alang sa bunyag, ang klerk mogamit sa LCR aron andamon ang usa ka Baptism and Confirmation Form. Ang bishop o ang gisangonan nga magtatambag mopahigayon sa interbiyo ug mopirma sa porma. Human sa bunyag ug kompirmasyon, ang klerk mogamit niini nga porma sa pagbag-o sa rekord sa pagkamiyembro sa bata diha sa LCR.
Kon ang full-time nga misyonaryo mointerbiyo sa usa ka kinabig alang sa bunyag, sulatan niya ang Rekord sa Bunyag ug Kompirmasyon gamit ang Isangyaw ang Akong Ebanghelyo nga app. Human sa bunyag ug kompirmasyon, ang mga misyonaryo morekord sa impormasyon diha sa app ug mosumiter niini ngadto sa klerk sa ward sa electronik nga paagi. Ang klerk sa ward moribyo sa impormasyon diha sa LCR ug mohimo sa rekord sa pagkamiyembro.
Human mahimo ang rekord sa pagkamiyembro, ang klerk moandam sa Sertipiko sa Bunyag ug Kompirmasyon. Kini nga sertipiko pirmahan sa bishop ug ihatag ngadto sa tawo.
Ang ngalan nga anaa sa rekord sa pagkamiyembro ug sa sertipiko kinahanglan magkatukma sa sertipiko sa pagkatawo, sa civil birth registry, o sa kasamtangan nga legal nga ngalan.
18.9
Ang Sakramento
Ang mga miyembro sa Simbahan magkita sa adlaw nga Igpapahulay aron sa pagsimba sa Dios ug pag-ambit sa sakramento (tan-awa sa Doktrina ug mga Pakigsaad 20:75; 59:9; Moroni 6:5–6). Atol niini nga ordinansa, sila moambit sa pan ug tubig agi og paghinumdom sa sakripisyo sa Manluluwas sa Iyang unod ug dugo ug sa pagbag-o sa ilang balaan nga mga pakigsaad (tan-awa sa Mateo 26:26–28; Hubad ni Joseph Smith, Marcos 14:20–25; Lucas 22:15–20; 3 Nephi 18; Moroni 6:6). Ang tanan kinahanglan nga mopakita og balaan nga pagtahud atol sa pagpanalangin ug pagpaambit sa sakramento.
18.9.1
Pagtugot sa Pagpangalagad sa Sakramento
Ang bishop naghupot sa mga yawe sa pagkapari alang sa pagpangalagad sa sakramento diha sa ward. Ang tanan nga moapil sa pag-andam, sa pagpanalangin, ug sa pagpaambit sa sakramento kinahanglang nakadawat og pagtugot gikan kaniya o sa usa ka tawo ubos sa iyang direksyon.
Kon ang mga miyembro sa iyang ward dili makahimo sa pag-ambit sa sakramento tungod kay sila natanggong diha sa panimalay, sentro sa pag-atiman, o ospital, ang bishop mahimong motugot sa mga naghupot sa pagkapari sa pagpangalagad sa sakramento ngadto kanila. Siya mahimong motugot niini bisan kon sila temporaryong anaa sa gawas sa mga utlanan sa iyang ward. Hinoon, siya dili motugot nga ang sakramento ihatag ngadto sa mga miyembro nga anaa sa gawas sa mga utlanan sa iyang ward sa ubang mga sirkumstansiya.
Sa panagsa nga mga sirkumstansiya, ang panagtigom alang sa sakramento dili himoon nga mosaylo sa oras. Niini nga mga sitwasyon, ang bishop mahimong motugot sa takos nga mga naghupot sa pagkapari sa iyang ward sa pag-andam ug pagpangalagad sa sakramento sa ilang mga panimalay matag Igpapahulay. Ang mga bishop mahimong motugot usab kanila sa pag-andam ug pagpangalagad sa sakramento ngadto sa mga miyembro sa ward nga walay mga naghupot sa pagkapari sa ilang mga panimalay.
Kon ang bishop motugot nga ang sakramento andamon ug ipangalagad sa gawas sa sumbanan nga mga tulumanon sa Simbahan, ang mga instruksiyon sa 18.9.2 mahitungod kon kinsa ang mopahigayon sa ordinansa magamit gihapon.
18.9.2
Kinsa ang Mopahigayon sa Ordinansa
-
Ang mga teacher, mga priest, ug ang mga naghupot sa Melchizedek nga Pagkapari mahimong moandam sa sakramento.
-
Ang mga priest ug ang mga naghupot sa Melchizedek nga Pagkapari mahimong mopanalangin sa sakramento.
-
Ang mga deacon, mga teacher, mga priest, ug ang mga naghupot sa Melchizedek nga Pagkapari mahimong mopaambit sa sakramento.
Kon adunay igong mga naghupot sa Aaronic nga Pagkapari, sila sa kasagaran mopahigayon niini nga mga katungdanan. Kon walay igong mga deacon nga mopaambit sa sakramento, ang presidente sa korum sa mga deacon magpakitambag sa bishop mahitungod kon kinsa ang dapiton sa pagtabang. Sa kasagaran, siya mohangyo sa mga teacher ug mga priest sa pagtabang sa dili pa mohangyo sa mga elder ug sa mga high priest.
18.9.3
Mga Lagda alang sa Sakramento
Tungod sa sagrado nga matang sa sakramento, ang mga lider sa pagkapari kinahanglang magmabinantayong moandam aron nga kini husay ug may balaang pagtahod. Ang mga mantel sa sakramento kinahanglan nga puti, limpyo, ug inutaw. Ang mga sudlanan [tray] sa sakramento kinahanglan nga limpyo. Ang mga sudlanan ug mga kopa sa sakramento kinahanglang i-order og sayo kaayo.
Kadtong kinsa mangalagad sa sakramento kinahanglang mobuhat sa ingon sa ligdong nga paagi, maghunahuna nga sila nagrepresentar sa Ginoo. Ang bishopric moawhag kanila sa pagpamalandong sa Pag-ula sa Manluluwas samtang sila mag-andam, manalangin, ug mopaambit sa sakramento.
Kadtong kinsa mangalagad sa sakramento kinahanglan nga tarong nga nagsinina ug limpyo. Kinahanglan nga sila dili magsul-ob og sinina o alahas nga makabalda sa pagsimba ug paghimo og pakigsaad nga mao ang katuyoan sa sakramento. Kon ang bishop kinahanglang motambag sa naghupot sa pagkapari mahitungod sa maong mga butang, siya mohimo niini pinaagi sa gugma. Siya usab mohunahuna sa kahingkod sa tawo diha sa Simbahan.
Ang pagpaambit sa sakramento kinahanglan nga natural ug dili sobra ra ka pormal. Pananglitan, ang piho nga mga aksiyon (sama sa pagbutang sa walang kamot sa likod) o mga panagway (sama sa pagsinina og pareha) wala kinahanglana.
Ang kongregasyon mokanta sa himno sa sakramento samtang ang pan gipikas-pikas. Ang mga vocal solo o instrumental nga musika dili mopuli niini nga himno. Walay musika nga patukaron sa panahon sa pagpaambit sa sakramento o pagkahuman dayon niini.
Kon ang mga miyembro adunay mga allergy sa pagkaon o luten intolerance [wala makauyon sa gluten nga naa sa pan], sila mohisgot niini uban sa usa ka sakop sa bishopric kon unsa nga pagpahiangay ang himoon alang sa sakramento. Kon gikinahanglan, ang bishopric mahimong mousab sa pamaagi sa pagpangalagad sa sakramento ngadto kanila.
Sa kinatibuk-an, ang pan pikas-pikason isip kabahin sa ordinansa sa sakramento. Hinuon, aron sa pagseguro sa kahimsog ug ka luwas sa usa ka piho nga miyembro, kana nga miyembro mahimong mohatag og pan nga dili maka-allergy o laing gipikas-pikas nga pan nga ikapuli sulod sa usa ka giselyohan nga plastik nga bag o kopa. Sila mohatag niini ngadto sa naghupot sa pagkapari aron ipahimutang sa lain nga sudlanan. Ang bishopric motabang niadtong mopaambit sa sakramento nga makaila kinsa nga mga miyembro ang hatagan sa pan nga dili makaalerdyik.
Tan-awa sa disability.ChurchofJesusChrist.org alang sa mga lagda mahitungod nga mga maka-allergy nga pagkaon.
Bisan og ang sakramento alang sa mga miyembro sa Simbahan, kinahanglang walay himoon sa pagpugong sa uban nga moambit niini.
18.9.4
Mga Instruksiyon
-
Kadtong kinsa moandam, mopanalangin, o mopaambit sa sakramento kinahanglang manghugas pag-una sa ilang mga kamot gamit ang sabon o ubang mga iglilimpyo.
-
Ang mga teacher, mga priest, o ang mga naghupot sa Melchizedek nga Pagkapari moseguro nga ang mga sudlanan sa wala pa mapikas-pikas nga pan, mga sudlanan sa tubig nga adunay mga kopa sa limpyo nga tubig, ug limpyo nga mga mantel nakapahimutang na sa wala pa ang miting.
-
Samtang ang mga miyembro sa ward manganta sa himno sa sakramento, kadtong kinsa mopanalangin sa sakramento balaanong mobarog, mokuha sa panapton nga nagtabon sa mga sudlanan sa pan, ug mopikas-pikas sa pan sa ginagmay nga mga piraso.
-
Human sa himno, ang tawo nga manalangin sa pan moluhod ug mosulti sa pag-ampo sa sakramento alang sa pan (tan-awa sa Doktrina ug mga Pakigsaad 20:77).
-
Ang bishop moseguro nga ang mga pag-ampo sa sakramento gisulti sa klaro, saktong paagi, uban ang kaligdong. Kon ang usa ka tawo makahimo og sayop sa pulong ug mokorihir sa iyang kaugalingon, walay dugang nga koreksyon ang gikinahanglan. Kon ang tawo dili mokorihir sa iyang sayop, ang bishop mabinationg mohangyo kaniya sa pagsubli sa pag-ampo. Ang bishop mogamit og kabuot kon mohangyo nga sublion ang pag-ampo. Siya moseguro nga ang pagbuhat sa ingon dili makahimo og kaulawan o makabalda sa ordinansa. Lain nga tawo diha sa talad sa sakramento makatabang kon gikinahanglan.
-
Human sa pag-ampo, ang mga naghupot sa pagkapari balaanong mopaambit sa pan ngadto sa mga miyembro. Ang tigdumalang lider modawat niini pag-una, pagkahuman wala nay gitakda nga han-ay. Kon ang sudlanan gitunol na ngadto sa mga miyembro, sila mahimong mopasa niini ngadto sa lain.
-
Ang mga miyembro moambit gamit ang ilang tuong kamot kon posible.
-
Kon ang pan napasa na ngadto sa tanang miyembro, kadtong nagpasa sa sakramento mobalik sa mga sudlanan ngadto sa talad sa sakramento. Kadtong nanalangin sa sakramento mobutang sa panapton ibabaw sa mga sudlanan sa pan ug mokuha sa tabon sa mga sudlanan sa tubig.
-
Ang tawo nga mopanalangin sa tubig moluhod ug mosulti sa pag-ampo sa sakramento alang sa tubig (tan-awa sa Doktrina ug mga Pakigsaad 20:79). Siya mogamit sa pulong nga tubig imbes nga bino.
-
Human sa pag-ampo, ang mga naghupot sa pagkapari balaanong mopasa sa tubig ngadto sa mga miyembro. Ang tigdumalang lider modawat niini pag-una, pagkahuman wala nay gitakda nga han-ay.
-
Kon ang tubig napasa na ngadto sa tanang miyembro, kadtong nagpasa sa sakramento mobalik sa mga sudlanan ngadto sa talad sa sakramento. Kadtong kinsa mipanalangin sa sakramento motabon sa panapton ibabaw sa mga sudlanan, ug kadtong kinsa mipanalangin ug mipasa sa sakramento balaanong molingkod sa ilang lingkuranan.
-
Human sa miting, kadtong kinsa nag-andam sa sakramento molimpyo, mopilo sa mga mantel, ug mokuha sa wala magamit nga pan.
18.10
Pagtugyan sa Pagkapari ug Pag-orden ngadto sa usa ka Katungdanan
Adunay duha ka pagkabahin sa pagkapari: ang Aaronic ug Melchizedek (tan-awa sa 3.3; Doktrina ug mga Pakigsaad 107:1, 6). Kon ang pagkapari gitugyan ngadto sa usa ka tawo, siya i-orden usab ngadto sa usa ka katungdanan niana nga pagkapari. Human matugyan sa bisan hain niini nga mga pagkapari, ang tawo kinahanglan lamang nga i-orden ngadto sa ubang mga katungdanan niana nga pagkapari.
Alang sa impormasyon mahitungod sa pag-orden sa pagkapari diha sa espesyal nga mga sirkumstansiya, tan-awa sa 38.2.9.
18.10.1
Melchizedek nga Pagkapari
Ang presidente sa stake naghupot sa mga yawe sa pagkapari alang sa pagtugyan sa Melchizedek nga Pagkapari ug sa pag-orden ngadto sa mga katungdanan sa elder ug high priest. Hinoon, ang bishop sa kasagaran mohatag og mga rekomendasyon niini nga mga ordinasyon.
18.10.1.1
Mga Elder
Ang takos nga kalalakin-an mahimong modawat sa Melchizedek nga Pagkapari ug i-orden nga mga elder kon sila nag-edad na og 18 anyos o pataas. Base sa indibidwal nga mga sirkumstansiya, ang bishop motino kon ang usa ka batan-ong lalaki angay nga irekomendar nga maorden nga usa ka elder sa dili madugay human sa iyang ika-18 nga adlawng natawhan o magpabilin og mas dugay diha sa korum sa mga priest. Kini nga mga sirkumstansiya sa batan-ong lalaki maglakip sa:
-
Pagpamatuod ug pagkahingkod.
-
Paggradwar sa eskwelahan.
-
Tinguha sa pagpadayon uban sa mga kaedad.
-
Pagtambong sa kolehiyo.
Sa paghimo niining desisyon, ang bishop mokonsulta una sa batan-ong lalaki ug sa iyang mga ginikanan o mga tigbantay. Ang takos nga kalalakin-an kinahanglan maorden nga mga elder sa edad nga 19 o sa dili pa sila mobiya sa panimlay aron mosulod sa kolehiyo, moserbisyo og full-time nga misyon, moserbisyo sa militar, o modawat og full-time nga trabaho.
Ang bag-ong gibunyagan nga mga kalalakin-an nga nag-edad og 18 ug pataas giorden nga mga elder human sila:
-
Nakadawat sa Aaronic nga Pagkapari ug miserbisyo isip mga priest.
-
Nakaugmad og igong salabotan sa ebanghelyo.
-
Mipakita sa ilang katakos.
Walay piho nga panahon isip usa ka miyembro sa Simbahan ang gikinahanglan.
18.10.1.2
Mga High Priest
Ang kalalakin-an gi-orden nga mga high priest sa dihang sila gitawag ngadto sa kapangulohan sa stake, high council, o sa bishopric. Sila usab giorden sa uban nga mga panahon sama sa gitino sa presidente sa stake pinaagi sa mainampoon nga konsiderasyon ug pagdasig.
18.10.1.3
Pag-interbiyo ug Pagpaluyo
Uban sa pagtugot sa kapangulohan sa stake, ang bishop mointerbiyo sa igsoong lalaki sumala sa gitudlo diha sa Rekord sa Ordinasyon sa Melchizedek nga Pagkapari. Dayon ang usa ka sakop sa kapangulohan sa stake mointerbiyo usab kaniya. Gamit ang pagtugot gikan sa presidente sa misyon, ang presidente sa district mahimong mointerbiyo sa usa ka igsoong lalaki aron maorden nga usa ka elder (tan-awa sa 6.3). Alang sa mga instruksiyon mahitungod niini nga mga interbiyo, tan-awa sa 31.2.6.
Human sa interbiyo, ang kapangulohan sa stake mohangyo sa high council sa pagpaluyo sa desisyon nga i-orden ang igsoong lalaki. Ang sakop sa kapangulohan sa stake mopresentar kaniya alang sa pagpaluyo diha sa kinatibuk-ang sesyon sa komperensiya sa stake (tan-awa sa 18.10.3). Gamit ang pagtugot gikan sa presidente sa misyon, ang presidente sa district mahimong mopresentar sa usa ka igsoong lalaki alang sa pagpaluyo aron maorden nga usa ka elder (tan-awa sa 6.3).
18.10.2
Aaronic nga Pagkapari
Ang bishop naghupot sa mga yawe sa pagkapari alang sa pagtugyan sa Aaronic nga Pagkapari ug sa pag-orden ngadto sa mga katungdanan sa deacon, teacher, ug priest. Ang takos nga kalalakin-an sa kasagaran i-orden ngadto niini nga mga katungdanan sa mosunod nga mga edad, apan dili mas sayo:
-
Ang deacon sa sinugdanan sa tuig nga sila mag-edad og 12
-
Ang teacher sa sinugdanan sa tuig nga sila mag-edad og 14
-
Ang priest sa sinugdanan sa tuig nga sila mag-edad og 16
Ang bishop o usa ka gisangonan nga magtatambag mointerbiyo niadtong kinsa i-orden nga mga deacon o mga teacher aron sa pagtino kon sila sa espirituhanong paagi andam na. Ang bishop mointerbiyo sa kalalakin-an nga ordinahan nga mga priest.
Sa dili pa mointerbyo og batan-ong lalaki alang sa ordinasyon sa pagkapari, ang bishop mangayo og berbal nga pagtugot gikan sa mga ginikanan o mga tigbantay. Ang pagtugot wala gikinahanglan gikan sa usa ka ginikanan o tigbantay nga walay legal nga basihanan alang sa pagsupak sa aksiyon.
Kon ang igsoong lalaki masuta nga takos sa usa ka interbiyo, usa ka sakop sa bishopric mopresentar kaniya aron paluyohan diha sa panagtigom alang sa sakramento (tan-awa sa 18.10.3).
Alang sa impormasyon mahitungod sa pag-orden sa bag-ong nabunyagan nga mga igsoong lalaki, tan-awa sa 38.2.9.1.
18.10.3
Pagpresentar og usa ka Miyembro Aron Mapaluyohan sa dili pa Siya Maorden
Human ang usa ka igsoong lalaki mainterbiyo ug masuta nga takos nga maorden ngadto sa usa ka katungdanan sa pagkapari, siya ipresentar aron paluyohan (tan-awa sa Doktrina ug mga Pakigsaad 20:65, 67). Ang kaigsoonang mga lalaki nga ordinahan nga mga elder o mga high priest ipresentar sa sakop sa kapangulohan sa stake diha sa kinatibuk-an nga sesyon sa komperensiya sa stake (tan-awa sa 6.3 alang sa mgainstruksiyon alang sa mga presidente sa district). Ang mga igsoong lalaki nga i-orden nga mga deacon, mga teacher, o mga priest i-presentar sa usa ka sakop sa bishopric diha sa panagtigom alang sa sakramento.
Ang tawo nga mopahigayon sa pagpaluyo mohangyo sa igsoong lalaki sa pagbarog. Siya mopahibalo sa sugyot sa pagtugyan sa Aaronic o Melchizedek nga Pagkapari (kon gikinahanglan) ug sa pag-orden sa igsoong lalaki ngadto sa katungdanan sa pagkapari. Siya dayon modapit sa mga miyembro nga mopaluyo sa sugyot. Sama pananglit, sa pagpresentar og usa ka igsoong lalaki nga maorden nga usa ka elder, siya makagamit sa mga pulong sama niini:
“Kami mosugyot nga si [ngalan] modawat sa Melchizedek nga Pagkapari ug i-orden nga elder. Kadtong uyon mahimong mopakita niini pinaagi sa pagpataas sa kamot. [Hunong og kadiyot.] Kadtong supak, kon aduna, mahimong mopakita niini. [Hunong og kadiyot.]”
Ang tawo nga gipresentar kinahanglang moapil sa pagpaluyo. Kon sobra sa usa ka tawo ang gipresentar, sila mahimong pagapaluyohan isip usa ka grupo.
Kon ang usa ka miyembro nga maayo og dungog mosupak sa ordinasyon, ang tigdumala nga lider o lain nga gisangonan nga lider sa pagkapari makigkita kaniya sa pribado human sa miting. Ang lider magtinguha nga makasabot ngano nga ang miyembro misupak. Siya mangutana kon ang miyembro aduna bay nahibaloan nga binuhatan nga makadiskwalipikar sa tawo sa pagka-orden ngadto sa katungdanan sa pagkapari.
Ang mga miyembro lamang nga maayo og dungog ang makaapil sa pagpaluyo. Hinoon, kon ang usa ka miyembro dili maayo og dungog o usa ka tawo kinsa dili usa ka miyembro mosupak sa aksiyon, ang bishop o presidente sa stake mahimong maminaw sa iyang kabalaka sa pribado sa gawas sa miting.
Sa uban nga sitwasyon, ang usa ka igsoong lalaki mahimong gikinahanglan nga ma-orden nga usa ka elder o high priest sa dili pa siya mapresentar diha sa komperensiya sa stake. Kon mahitabo kini, ipresentar siya sa panagtigom alang sa sakramento sa iyang ward aron paluyohan. Siya ipresentar dayon sa sunod nga komperensiya sa stake aron mapamatud-an ang ordinasyon (pagpahiangay sa proseso alang sa pagpaluyo, nga gihulagway sa ibabaw). Kini naglakip sa paghatag sa mga sakop sa stake og usa ka oportunidad sa pagpaluyo o pagsupak sa aksiyon.
18.10.4
Kinsa ang Mopahigayon sa Ordinansa
Ang presidente sa stake o usa ka naghupot sa Melchizedek nga Pagkapari ubos sa iyang direksyon mahimong mo-orden og tawo ngadto sa katungdanan sa elder. Gamit ang pagtugot gikan sa presidente sa misyon, ang presidente sa district o usa ka tawo ubos sa iyang direksiyon mahimong mopahigayon sa ordinasyon (tan-awa sa 6.3). Ang mga naghupot lamang sa Melchizedek nga Pagkapari ang mahimong mobarog diha sa sirkulo.
Ang presidente sa stake o usa ka high priest ubos sa iyang direksyon mahimong mo-orden sa usa ka tawo ngadto sa katungdanan sa high priest. Ang mga high priest lamang ang mobarog diha sa sirkulo.
Ang tawo kinsa mo-orden og tawo ngadto sa usa ka katungdanan sa Melchizedek nga Pagkapari kinahanglang takos sa templo. Ang presidente sa stake o ang tawo nga iyang gitudlo kinahanglan nga anaa.
Ang priest o ang naghupot sa Melchizedek nga Pagkapari mahimong mo-orden og igsoong lalaki ngadto sa katungdanan sa deacon, teacher, o priest. Siya kinahanglang tugotan sa bishop. Ang bishop o ang tawo nga iyang gitudlo kinahanglan nga anaa.
Aron makaapil sa usa ka ordinasyon sa Aaronic nga Pagkapari, ang usa ka tawo kinahanglan nga usa ka priest o naghupot sa Melchizedek nga Pagkapari.
Ang bishop mahimong motugot sa usa ka amahan kinsa usa ka priest o usa ka naghupot sa Melchizedek nga Pagkapari sa pag-orden sa iyang anak ngadto sa katungdanan sa deacon, teacher, o priest bisan kon ang amahan dili hingpit nga takos sa templo (tan-awa sa 18.3). Ang mga bishop moawhag sa mga amahan sa pag-andam sa ilang kaugalingon sa pag-orden sa ilang kaugalingong mga anak nga lalaki.
Aron maoy tingog niini nga ordinansa, ang usa ka tawo kinsa anaa sa gawas sa iyang kaugalingong ward kinahanglang mopakita og balido nga rekomend sa templo ngadto sa tigdumalang lider. O siya mahimong mopakita sa Recommend to Perform an Ordinance nga gipirmahan sa sakop sa iyang bishopric.
18.10.5
Mga Instruksiyon
Sa pagtugyan sa pagkapari ug pag-orden sa usa ka tawo ngadto sa usa ka katungdanan sa pagkapari, ang usa o mas daghan nga gitugotan nga mga naghupot sa pagkapari gaan nga mopandong sa ilang mga kamot sa ulo sa tawo. Dayon ang tawo nga maoy tingog:
-
Motawag sa tawo sa iyang tibuok nga ngalan.
-
Mosulti sa awtoridad nga personal niyang gihuptan sa pagpahigayon sa ordinansa (Aaronic o Melchizedek nga Pagkapari).
-
Motugyan sa Aaronic o Melchizedek nga Pagkapari, gawas kon kini natugyan na.
-
Mo-orden sa tawo ngadto sa usa ka katungdanan diha sa Aaronic o Melchizedek nga Pagkapari ug mohatag sa mga katungod, mga gahom, ug awtoridad niana nga buhatan. (Ang mga yawe sa pagkapari dili ihatag kon magtugyan sa pagkapari o mag-orden ngadto sa usa ka katungdanan, gawas kon mag-orden og usa ka bishop.)
-
Mohatag og mga pulong sa panalangin sumala sa giya sa Espiritu.
-
Motapos pinaagi sa ngalan ni Jesukristo.
Sa pag-orden og usa ka tawo ngadto sa usa ka katungdanan sa pagkapari human siya natugyanan na sa tukmang pagkapari, ang tawo nga mopahigayon sa ordinasyon mosaylo sa lakang 3.
Ang usa ka pag-orden maoy usa ka oportunidad sa paghatag og panalangin. Ang detalyado nga tambag ug panudlo mahitungod sa mga katungdanan sa tawo ihatag sa dili pa ug human sa ordinasyon. Kinahanglan nga dili kini mao ang gitutokan sa panalangin. Dili kinahanglan nga adunay mga pag-ampo, mga pagpamatuod, o panudlo kon adunay tawo nga ordinahan.
18.10.6
Rekord ug Sertipiko sa Ordinasyon
Sa dili pa ang usa ka tawo interbiyohon aron ordinahan ngadto sa usa ka katungdanan sa Melchizedek nga Pagkapari, ang klerk mogamit sa LCR aron maandam ang Melchizedek Priesthood Ordination Record. Ang presidente sa stake o ang gisangonan nga magtatambag mopahigayon sa interbiyo ug mopirma sa porma kon ang tanang mga kondisyon sa katakos natuman.
Human sa ordinasyon, ang presidente sa stake o ang iyang gisangonan nga representante mokompleto sa porma ug mohatag niini og balik ngadto sa klerk. Siya morekord sa ordinasyon diha sa LCR ug moandam sa sertipiko sa ordinasyon. Kini nga sertipiko pirmahan sa presidente sa stake ug ihatag ngadto sa tawo.
Sa dili pa ang usa ka igsoong lalaki interbiyohon aron ordinahan ngadto sa usa ka katungdanan sa Aaronic nga Pagkapari, ang klerk mogamit sa LCR aron andamon ang Aaronic Priesthood Ordination Record. Ang bishop o ang gisangonan nga magtatambag mopahigayon sa interbiyo ug mopirma sa porma kon ang tanang mga kondisyon sa katakos natuman.
Human sa ordinasyon, ang bishop o ang gisangonan nga magtatambag mokompleto sa porma ug mohatag niini ngadto sa klerk. Siya morekord sa ordinasyon diha sa LCR ug moandam sa sertipiko sa ordinasyon.
Ang kasamtangan nga legal nga ngalan sa tawo kinahanglan gamiton sa rekord ug sertipiko sa ordinasyon.
18.11
Pag-set Apart sa mga Miyembro nga Moserbisyo sa mga Calling
Ang mga miyembro nga gitawag ug gipaluyohan ngadto sa kadaghanan nga mga katungdanan sa Simbahan kinahanglang i-set apart nga moserbisyo niana nga katungdanan (tan-awa sa Juan 15:16; Doktrina ug mga Pakigsaad 42:11; tan-awa usab sa 3.4.3.1 dinhi niini nga tamdanan nga basahon). Atol sa pag-set apart, ang tawo hatagan sa (1) awtoridad sa paglihok diha sa calling ug (2) mga pulong sa panalangin sumala sa giya sa Espiritu.
Ang mga presidente sa stake, mga bishop, ug mga presidente sa korum makadawat og mga yawe sa kapangulohan kon sila i-set apart (tan-awa sa 3.4.1.1). Hinoon, ang pulong mga yawe kinahanglang dili gamiton kon mag-set apart og mga miyembro nga moserbisyo sa ubang mga calling, lakip sa mga magtatambag diha sa mga kapangulohan.
Alang sa impormasyon mahitungod sa pagtawag, pag-orden, ug pag-set apart og mga bishop, tan-awa sa 30.7.
18.11.1
Kinsa ang Mopahigayon sa Pag-set Apart
Ang pag-set apart ipahigayon sa usa ka naghupot sa Melchizedek nga Pagkapari. Siya kinahanglang makadawat og pagtugot gikan sa lider nga naghupot sa angay nga mga yawe sa pagkapari. Kadtong kinsa gitugotan nga mopahigayon sa pag-set apart gitudlo diha sa 30.8. Ang usa ka elder kinahanglan nga dili modala sa tingog o mobarog diha sa sirkulo kon ang usa ka kalaki i-set apart ngadto sa usa ka calling nga nagkinahanglan sa tawo nga usa ka high priest.
Ubos sa direksyon sa tigdumalang lider, usa o daghan pa nga mga naghupot sa Melchizedek nga Pagkapari mahimong moapil sa pag-set apart. Ang mga presidente i-set apart sa dili pa ang ilang mga magtatambag.
Ang tigdumalang lider mahimong motugot sa usa ka bana o amahan nga naghupot sa Melchizedek nga Pagkapari sa pagbarog diha sa sirkulo alang sa pag-set apart sa iyang asawa o mga anak bisan kon siya dili hingpit nga takos sa templo (tan-awa sa 18.3).
18.11.2
Mga Instruksiyon
Usa o daghan pang gitugutan nga mga naghupot sa Melchizedek nga Pagkapari gaan nga mopandong sa ilang mga kamot sa ulo sa tawo. Dayon ang tawo nga maoy tingog:
-
Motawag sa tawo sa iyang tibuok nga ngalan.
-
Mosulti nga siya naglihok pinaagi sa awtoridad sa Melchizedek nga Pagkapari.
-
Mo-set apart sa tawo ngadto sa calling sa stake, ward, korum, o klase.
-
Motugyan sa mga yawe kon ang tawo angayan nga modawat niini.
-
Mohatag og mga pulong sa panalangin sumala sa giya sa Espiritu.
-
Motapos pinaagi sa ngalan ni Jesukristo.
Ang pag-set apart dili usa ka pormal nga miting nga adunay mga pag-ampo o mga pagpamatuod. Ni kini usa ka panahon sa paghatag og detalyado nga mga instruksyon. Kadto ihatag panahon sa pagbansay, dili kabahin sa panalangin.
18.12
Pagbalaan sa Lana
Ang mga naghupot sa Melchizedek nga Pagkapari kinahanglang mobalaan sa lana sa oliba sa dili pa kini gamiton sa pagdihog sa masakiton o may balatian (tan-awa sa Santiago 5:14). Walay laing lana ang mahimong gamiton.
Ang mga miyembro kinahanglan dili moinom sa gibalaan nga lana o mopahid niini sa bahin sa lawas nga may balatian.
18.12.1
Kinsa ang Mopahigayon sa Ordinansa
Usa o daghang mga naghupot sa Melchizedek nga Pagkapari ang mahimong mobalaan sa lana. Dili kinahanglan nga sila mangayo og pagtugot gikan sa usa ka lider sa pagkapari.
18.12.2
Mga Instruksiyon
Sa pagbalaan sa lana, ang usa ka naghupot sa Melchizedek nga Pagkapari:
-
Mogunit sa abli nga sudlanan sa lana sa oliba.
-
Motawag sa Langitnong Amahan sama sa pag-ampo.
-
Mosulti nga siya naglihok pinaagi sa awtoridad sa Melchizedek nga Pagkapari.
-
Mobalaan sa lana (dili ang sudlanan) ug mogahin niini alang sa pagdihog ug sa pagpanalangin sa masakiton ug may balatian.
-
Motapos pinaagi sa ngalan ni Jesukristo.
18.13
Pagpangalagad ngadto sa Masakiton
Sa kasagaran, ang pagpangalagad ngadto sa masakiton kinahanglang himoon sa hangyo sa tawo nga modawat sa panalangin o sa hangyo sa uban nga nagpakabana aron ang panalangin mahisubay sa ilang hugot nga pagtuo (tan-awa sa Santiago 5:14; Doktrina ug mga Pakigsaad 24:13–14; 42:43–44, 48–52).
Ang pagpangalagad ngadto sa masakiton “pinaagi sa pagpandong sa mga kamot” adunay duha ka bahin: pagdihog sa lana ug pagselyo sa pagdihog uban sa panalangin. Kon walay gibalaan nga lana, usa ka panalangin mahimong ihatag pinaagi sa awtoridad sa Melchizedek nga Pagkapari nga walay pagdihog.
Kon ang usa ka tawo mohangyo og labaw sa usa nga panalangin alang sa samang sakit, ang laing pagdihog wala na kinahanglana. Ang naghupot sa pagkapari makahatag og laing panalangin pinaagi sa pagpandong sa mga kamot ug sa awtoridad sa Melchizedek nga Pagkapari. Hinoon, ang laing pagdihog mahimo usab nga himoon.
Ang mga naghupot sa pagkapari nga mobisita og mga ospital kinahanglang dili mangita og mga oportunidad sa pagpangalagad ngadto sa masakiton.
18.13.1
Kinsa ang Mohatag sa Panalangin
Ang takos nga mga naghupot sa Melchizedek nga Pagkapari mao lamang ang mangalagad ngadto sa masakiton o may balatian. Dili kinahanglan nga sila mangayo og pagtugot gikan sa usa ka lider sa pagkapari. Kon posible, ang amahan nga naghupot sa Melchizedek nga Pagkapari mangalagad sa masakiton nga mga sakop sa iyang pamilya.
Sa kasagaran, duha o daghan nga mga naghupot sa Melchizedek nga Pagkapari mangalagad ngadto sa masakiton. Hinoon, ang usa ka tawo mahimong mopahigayon sa pagdihog ug pagselyo.
18.13.2
Mga Instruksiyon
Ang pagpangalagad ngadto sa masakiton adunay duha ka bahin: pagdihog sa lana ug pagselyo sa pagdihog.
Ang pagdihog sa lana himoon sa usa ka naghupot sa Melchizedek nga Pagkapari. Siya:
-
Mobutang og usa ka tulo sa gibalaan nga lana nganha sa ulo sa tawo.
-
Gaan nga mopandong sa iyang mga kamot sa ulo sa tawo ug motawag sa tibuok ngalan sa tawo.
-
Mosulti nga siya naglihok pinaagi sa awtoridad sa Melchizedek nga Pagkapari.
-
Mosulti nga siya nagdihog gamit ang lana nga gibalaan alang sa pagdihog ug pagpanalangin sa masakiton ug may balatian.
-
Motapos pinaagi sa ngalan ni Jesukristo.
Sa pagselyo sa pagdihog, ang usa o daghang mga naghupot sa Melchizedek nga Pagkapari gaan nga mopandong sa ilang mga kamot sa ulo sa tawo. Ang tawo nga moselyo sa pagdihog:
-
Motawag sa tawo sa iyang tibuok nga ngalan.
-
Mosulti nga siya nagselyo sa pagdihog pinaagi sa awtoridad sa Melchizedek nga Pagkapari.
-
Mohatag og mga pulong sa panalangin sumala sa giya sa Espiritu.
-
Motapos pinaagi sa ngalan ni Jesukristo.
18.14
Mga Panalangin sa Kahupayan ug Tambag, Lakip sa mga Panalangin sa Amahan
18.14.1
Kinsa ang Mohatag sa Panalangin
Ang mga naghupot sa Melchizedek nga Pagkapari mahimong mohatag og mga panalangin sa kahupayan ug tambag ngadto sa mga sakop sa pamilya ug ngadto sa uban kinsa mangayo niini. Kini nga mga panalangin sa kasagaran ihatag pinaagi sa mga sakop sa pamilya, tigpangalagad nga mga igsoong lalaki, o mga lider sa pagkapari.
Ang usa ka amahan kinsa naghupot sa Melchizedek nga Pagkapari mahimong mohatag og mga panalangin sa amahan ngadto sa iyang mga anak. Kini nga mga panalangin makatabang ilabi na kon ang mga anak moeskwela, magmisyon, magminyo, mosulod sa serbisyo sa militar, o mag-atubang og espesyal nga mga hagit. Ang mga ginikanan moawhag sa ilang mga anak sa pagpangayo og mga panalangin sa amahan sa mga panahon sa panginahanglan. Ang mga panalangin sa amahan mahimong irekord alang sa personal nga gamit.
Ang naghupot sa Melchizedek nga Pagkapari dili kinahanglan nga mangayo og pagtugot gikan sa usa ka lider sa pagkapari sa paghatag og panalangin sa kahupayan ug tambag o panalangin sa amahan.
18.14.2
Mga Instruksiyon
Sa paghatag og panalangin sa kahupayan ug tambag o panalangin sa amahan, usa o daghan nga mga naghupot sa Melchizedek nga Pagkapari gaan nga mopandong sa ilang mga kamot sa ulo sa tawo. Dayon ang tawo nga maoy tingog:
-
Motawag sa tawo sa iyang tibuok nga ngalan.
-
Mosulti nga ang panalangin gipahigayon pinaagi sa awtoridad sa Melchizedek nga Pagkapari.
-
Mohatag og mga pulong sa panalangin, kahupayan, ug tambag sumala sa giya sa Espiritu.
-
Motapos pinaagi sa ngalan ni Jesukristo.
18.15
Pagpahinungod og mga Panimalay
Ang mga miyembro sa Simbahan mahimong mopahinungod sa ilang mga panimalay pinaagi sa awtoridad sa Melchizedek nga Pagkapari. Wala kinahanglana nga gipanag-iya ang panimalay o wala nay utang aron mapahinungod. Dili parehas sa mga gambalay sa Simbahan, ang mga panimalay dili ipahinungod ngadto sa Ginoo.
18.15.1
Kinsa ang Mopahigayon sa Pagpahinungod
Ang usa ka panimalay ipahinungod sa usa ka naghupot sa Melchizedek nga Pagkapari. Kon walay usa ka naghupot sa Melchizedek nga Pagkapari diha sa panimalay:
-
Ang pamilya mahimong modapit og suod nga higala, kabanay, o tigpangalagad nga igsoong lalaki nga naghupot sa Melchizedek nga Pagkapari sa pagpahinungod sa panimalay. Ang tawo dili na kinahanglan nga mangayo og pagtugot gikan sa usa ka lider sa pagkapari.
-
Ang pamilya mahimong magpundok ug mohalad og pag-ampo sumala sa giya sa Espiritu. Ang pag-ampo maglakip sa mga elemento nga gihisgutan sa 18.15.2, numero 3.
18.15.2
Mga Instruksiyon
Sa pagpahinungod og usa ka panimalay, ang naghupot sa Melchizedek nga Pagkapari:
-
Motawag sa Langitnong Amahan sama sa pag-ampo.
-
Mosulti nga siya naglihok pinaagi sa awtoridad sa Melchizedek nga Pagkapari.
-
Mopahinungod sa panimalay isip sagrado nga dapit diin ang Balaan nga Espiritu makapuyo ug mohatag og ubang mga pulong sumala sa giya sa Espiritu. Pananglitan, siya mopanalangin sa panimalay nga mahimong usa ka dapit diin ang mga sakop sa pamilya makasimba, makakaplag og kasegurohan gikan sa kalibotan, makalambo sa espirituwal nga paagi, ug makaandam alang sa mahangturong mga relasyon sa pamilya.
-
Motapos pinaagi sa ngalan ni Jesukristo.
18.16
Pagpahinungod sa mga Lubnganan
18.16.1
Kinsa ang Mopahinungod sa Lubnganan
Ang tawo nga mopahinungod sa lubnganan kinahanglan nga naghupot sa Melchizedek nga Pagkapari ug gitugotan sa lider sa pagkapari nga nagdumala sa tulumanon.
Kon gusto sa pamilya, ang usa ka pag-ampo sa daplin sa lubnganan kay sa pag-ampo sa pagpahinungod ang mahimong ihalad. Kini mahimong ihalad ni bisan kinsa nga gipili sa pamilya.
Aron maoy mopahinungod sa lubnganan, ang tawo nga taga-laing ward kinahanglan nga mopakita og balido nga rekomend sa templo ngadto sa lider sa pagkapari nga nagdumala sa tulumanon. O siya mahimong mopakita sa Recommend to Perform an Ordinance nga gipirmahan sa sakop sa iyang bishopric.
18.16.2
Mga Instruksiyon
Sa pagpahinungod og lubnganan, ang naghupot sa Melchizedek nga Pagkapari:
-
Motawag sa Langitnong Amahan sama sa pag-ampo.
-
Mosulti nga siya naglihok pinaagi sa awtoridad sa Melchizedek nga Pagkapari.
-
Mopahinungod ug mobalaan sa dapit nga lubngan isip pahulayan nga dapit alang sa lawas sa namatay.
-
Mag-ampo nga ang dapit pagabalaanon ug panalipdan hangtod sa Pagkabanhaw (kon angay).
-
Mohangyo sa Ginoo sa paghupay sa pamilya ug mosulti og uban pang mga hunahuna sumala sa giya sa Espiritu.
-
Motapos pinaagi sa ngalan ni Jesukristo.
Kon ang lawas sa miyembro sa Simbahan sunugon, ang tigdumalang lider sa pagkapari mogamit sa iyang paghukom sa pagtino kon ipahinungod ba ang dapit nga hipusan sa mga abo. Siya mosusi sa mga tinguha sa pamilya ug sa lokal nga mga kustombre ug mga balaod. Ang tawo kinsa maoy tingog mopahiangay sa mga instruksyon sa pagpahinungod og lubnganan.
18.17
Patriyarkal nga mga Panalangin
Ang matag takos, nga miyembro nga nabunyagan angayan nga modawat og patriyarkal nga panalangin, diin naghatag og dinasig nga direksiyon gikan sa Langitnong Amahan (tan-awa sa Genesis 48:14–16; 49; 2 Nephi 4:3–11). Ang mga ginikanan ug mga lider sa Simbahan moawhag sa mga miyembro nga mangandam sa espirituwal nga paagi aron makaangkon sa ilang patriyarkal nga mga panalangin.
Ang bishop o ang gisangonan nga magtatambag mo-interbiyo sa mga miyembro kinsa gusto nga modawat og patriyarkal nga mga panalangin. Kon ang usa ka miyembro takos, ang nag-interbiyo mo-isyu ug mopirma sa Rekomend sa Patriyarkal nga Panalangin. Siya mosumiter niini pinaagi sa Patriarchal Blessing System sa ChurchofJesusChrist.org.
Ang tawo nga moisyu og Rekomend sa Patriyarkal nga Panalangin moseguro nga ang miyembro igo na ang kahingkod aron masabtan ang kahulugan ug sagradong matang sa panalangin. Mas nindot nga ang miyembro kinahanglang igo ang kabatan-on nga daghan pang importante nga mga desisyon sa kinabuhi ang umaabot pa. Hinoon, ang mas magulang nga mga hamtong giawhag usab sa pagdawat sa ilang patriyarkal nga mga panalangin. Ang mga lider sa pagkapari kinahanglang dili moestablisar og minimum nga pangidaron sa pagdawat og patriyarkal nga panalangin.
Ang bag-ong kinabig kinahanglang makasabot sa sukaranang doktrina sa ebanghelyo sa dili pa modawat og patriyarkal nga panalangin.
Alang sa impormasyon mahitungod sa patriyarkal nga mga panalangin sa espesyal nga mga sirkumstansiya, tan-awa sa 38.2.10.
18.17.1
Pagdawat og Patriyarkal nga Panalangin
Human makadawat og rekomend, ang miyembro mokontak sa patriyarka aron makigsabot og adlaw sa pagdawat og patriyarkal nga panalangin. Sa adlaw sa sabot, ang miyembro kinahanglang moadto sa patriyarka uban sa usa ka mainampoong kinaiya ug magsul-ob og sinina nga pang-Dominggo. Ang mga miyembro mahimong magpuasa, apan ang pagpuasa wala kinahanglana.
Ang matag patriyarkal nga panalangin sagrado, kompidensyal, ug personal. Busa, pribado kining ihatag gawas sa limitado nga gidaghanon sa mga sakop sa pamilya nga motambong.
Ang tawo nga modawat og patriyarkal nga panalangin kinahanglang mohatag og bili sa mga pulong, mamalandong niini, ug magpuyo nga takos nga modawat sa gisaad nga mga panalangin niini nga kinabuhi ug sa kahangtoran.
Ang mga miyembro sa simbahan dili angayang motandi sa mga panalangin ug kinahanglan dili kini ipakigbahin gawas lang sa mga suod nga sakop sa pamilya. Ang patriyarkal nga mga panalangin kinahanglan nga dili basahon sa mga miting sa Simbahan o sa ubang publikong panagpundok.
Kon ang patriyarkal nga panalangin wala maglakip sa deklarasyon sa kaliwat, ang patriyarka mahimong mohatag unya og addendum sa pagdeklarar sa kaliwat.
18.17.2
Pagkuha og mga Kopya sa Patriyarkal nga mga Panalangin
Ang tawo nga nakadawat og patriyarkal nga panalangin kinahanglan nga moamping og maayo sa kopya nga iyang madawat. Hinoon, kon mawala man kini o magisi, ang tawo mahimong mangayo og bag-o. Siya makahimo niini nga hangyo diha sa Patriarchal Blessings sa ChurchofJesusChrist.org. Kon kini dili posible, ang tawo mokontak sa iyang bishop alang sa tabang.
18.17.3
Dugang nga Impormasyon
Alang sa dugang nga impormasyon mahitungod sa patriyarkal nga mga panalangin, tan-awa sa 38.2.10 ug “Patriyarkal nga mga Panalangin.”
18.18
Pagtuga ug Pagselyo diha sa Templo
Alang sa impormasyon sa mga ordinansa sa pagtuga ug pagselyo diha sa templo, tan-awa sa kapitulo 27.
18.19
Tsart sa mga Ordinasyon
|
Katungdanan |
Irekomendar sa |
Aprobahan sa |
Paluyohan sa |
Giinterbiyo ug gi-orden pinaagi ni |
|---|---|---|---|---|
Katungdanan Patriyarka | Irekomendar sa Kapangulohan sa stake | Aprobahan sa Korum sa Napulog Duha ka Apostoles | Paluyohan sa Mga miyembro diha sa komperensiya sa stake | Giinterbiyo ug gi-orden pinaagi ni Presidente sa stake human makadawat og pagtugot gikan sa Korum sa Napulog Duha ka Apostoles; o sa usa ka sakop sa Unang Kapangulohan o Korum sa Napulog Duha ka Apostoles |
Katungdanan High priest | Irekomendar sa Bishop ug kapangulohan sa stake | Aprobahan sa Kapangulohan sa stake ug high council | Paluyohan sa Mga miyembro diha sa komperensiya sa stake | Giinterbiyo ug gi-orden pinaagi ni Interbiyohon sa bishop ug sa presidente sa stake o sa usa ka gisangonan nga magtatambag; ordinahan ubos sa direksyon sa presidente sa stake |
Katungdanan Elder | Irekomendar sa Bishop | Aprobahan sa Kapangulohan sa stake ug high council | Paluyohan sa Mga miyembro sa komperensiya sa stake o komperensiya sa district | Giinterbiyo ug gi-orden pinaagi ni Giinterbiyo sa bishop ug sa presidente sa stake o sa usa ka gisangonan nga magtatambag (sa usa ka district, giinterbiyo sa usa ka sakop sa kapangulohan sa misyon o sa presidente sa district kon gisangonan; tan-awa sa 6.3) Giorden ubos sa direksiyon sa presidente sa stake (diha sa usa ka district, giorden ubos sa direksiyon sa presidente sa misyon o sa presidente sa district kon gisangonan) |
Katungdanan Bishop | Irekomendar sa Kapangulohan sa stake, naggamit sa LCR | Aprobahan sa Unang Kapangulohan ug Korum sa Napulog Duha ka Apostoles | Paluyohan sa Mga miyembro sa panagtigom alang sa sakramento | Giinterbiyo ug gi-orden pinaagi ni Ang presidente sa stake human makadawat og pagtugot gikan sa Unang Kapangulohan (tan-awa sa 30.7) |
Katungdanan Priest | Irekomendar sa Bishop | Aprobahan sa Bishopric | Paluyohan sa Mga miyembro sa panagtigom alang sa sakramento | Giinterbiyo ug gi-orden pinaagi ni Interbiyohon sa bishop; ordinahan ubos sa direksyon sa bishop |
Katungdanan Teacher o deacon | Irekomendar sa Bishop | Aprobahan sa Bishopric | Paluyohan sa Mga miyembro sa panagtigom alang sa sakramento | Giinterbiyo ug gi-orden pinaagi ni Interbiyohon sa bishop o usa ka gisangonan nga magtatambag; ordinahan ubos sa direksyon sa bishop |