“15. Semineli mo e ʻInisititiuti Fakalotú,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (2024).
“15. Seminelí mo e ʻInisititiuti Fakalotú,” Tohi Tuʻutuʻuni Fakakātoá.
ʻĪmisi
finemui ʻoku hikinima he kalasí
15.
Seminelí mo e ʻInisititiuti Fakalotú
15.0
Talateu
ʻOku tokoni ʻa e Seminelí mo e ʻInisititiuti Fakalotú (S&I) ki he ngaahi mātuʻá mo e kau taki ʻo e Siasí ʻi hono faitokonia ʻo e toʻu tupú mo e kakai lalahi kei talavoú ke fakatupulaki ʻenau ului kia Sīsū Kalaisí mo ʻEne ongoongolelei kuo fakafoki maí. ʻOku fakahoko ʻeni ʻaki hano poupouʻi e fakatefito ʻi ʻapi ʻa e ako ʻo e ngaahi folofolá mo e ngaahi lea ʻa e kau palōfita moʻuí mo e kau taki kehe ʻo e Siasí.
ʻOku puleʻi ʻa e ongo polokalama seminelí mo e ʻinisititiutí ʻe he ngaahi tuʻutuʻuni kuo fokotuʻu ʻe he Poate Ako ʻa e Siasí. Ko e poate ko ʻení ʻoku tataki ia ʻe he Palesiteni ʻo e Siasí. ʻOku fakahoko ʻe he kau palesitenisī ʻo e siteikí ʻa e ongo polokalamá ni ʻi he siteikí mo e ngaahi uōtí. ʻE toutou vakaiʻi maʻu pē ʻe he kau taki fakasiteikí mo fakauōtí ʻa e kau mai ʻenau toʻu tupú ki he polokalama seminelí mo e ʻinisititiutí.
ʻE vahe ha fakafofonga S&I ki he siteiki takitaha ke tokoni ʻi hono fakahoko ʻo e polokalama S&I.
15.1
Seminelí
Ko e seminelí ko ha polokalama taʻu ʻe fā ʻoku ako ai ʻe he toʻu tupú ʻa e ongoongolelei ʻo Sīsū Kalaisí ʻo hangē ko ia ʻoku hā ʻi he ngaahi folofolá mo e ngaahi akonaki ʻa e kau palōfita ʻo e ngaahi ʻaho kimui ní. Ko e fānau ako seminelí ʻoku meimei ke nau taʻu 14–18.
ʻOku fakahoko ʻa e ngaahi kalasí ʻi he lolotonga ʻo e uiké ʻi he taimi ʻoku lele ai ʻa e akó. ʻE lava ke fulihi e lahi ʻo e ʻaho ʻoku fakahoko ai ʻa e kalasi seminelí he uike takitaha ʻo fakatatau mo e ngaahi tūkunga fakalotofonuá. (Vakai, Ngaahi Meʻa ke Fili ʻi he Kalasi Seminelí ki ha fakamatala lahi ange.) Ko e ngaahi kalasí pe ko e ngaahi ngāue ʻoku ʻoatu he ʻinitanetí ʻoku totonu ke fakafuofua ki ha houa pē ʻe fā ʻi he uike.
ʻE poupouʻi ʻe he kau pīsopelikí, kau taki toʻu tupú mo e kau palesitenisī fakakōlomú mo fakakalasí ʻa e toʻu tupu kotoa ke nau kau kakato ʻi he seminelí. ʻE poupouʻi ʻe he kau pīsopelikí ʻa e ngaahi mātuʻá ke lesisita ʻenau fānaú ʻi he taʻu kotoa kimuʻa pea toki kamata e ngaahi kalasi seminelí. Ke maʻu ha fakamatala lahi ange, vakai ki he Lesisita ki he Seminelí ʻi he ChurchofJesusChrist.org.
ʻE lava ke fokotuʻu ha poate ako fakafeituʻu ʻi he feituʻu ʻoku ʻi ai ha ngaahi siteiki lahi ʻoku vāvāofi ʻa e ngaahi kalasi seminelí (kau ai ʻa e ngaahi kalasi semineli ako pē ʻi apí) pea ʻoku faitatau ʻa e ngaahi meʻa ʻoku nau hohaʻa ki aí mo e ngaahi palopalemá. Vakai, seminary.ChurchofJesusChrist.org.
15.1.1
Kau Faiakó
ʻOku totonu ko e kau faiako seminelí ko ha kāingalotu ʻo e Siasí ʻoku tui kia Sīsū Kalaisi mo ʻi ai haʻanau fakamoʻoni ki Heʻene ongoongolelei kuo fakafoki maí. ʻOku totonu ke nau moʻui ʻaki e ngaahi tefitoʻi moʻoni ʻoku nau akoʻí pea fengāueʻaki lelei mo e toʻu tupú. ʻOku totonu ke maʻu ʻe he kau faiakó ha lekomeni temipale ʻoku kei ʻaonga, ʻi he taimi ʻe lava aí.
ʻE talanoa ha mēmipa ʻo e kau palesitenisī fakasiteikí mo e pīsopé, supavaisa fakasiteikí mo e fakafofonga S&I fekauʻaki mo ha niʻihi ʻe malava ke nau faiako ʻi he seminelí. ʻE ui, vaheʻi, pea mo tukuange ʻe ha mēmipa ʻo e kau palesitenisī fakasiteikí pe ko ha aleaʻanga māʻolunga ne vahe ki ai, ʻa e kau faiako semineli he siteikí mo e kau supavaisa fakasiteikí. Ka hili hono ui mo vaheʻi ʻa e tokotahá, ʻe hanga leva ʻe he fakafofonga S&I ʻo akoʻi mo tokoniʻi ia.
Ke maluʻi ʻa e kau faiakó mo e fānau akó, ʻoku totonu ke ʻi ai ha kakai lalahi ʻe toko ua ʻi he fale pe ʻapi ʻoku akoʻi ai ha kalasi semineli. ʻE lava ke ui ha faiako kehe, pe ha taha lahi ʻoku fakapotopoto ke ʻi ai. Ko e tokotaha lahi hono uá ʻe lava pē ko e mali ʻo e faiakó pe ko ha mātuʻa ʻa ha mēmipa ʻo e kalasí. ʻOku totonu ko ha tokotaha ia ʻoku tuʻunga tangata pe fefine tatau pē mo e faiakó, tukukehe kapau ko e tokotaha ko iá ko ha mēmipa matuʻotuʻa ia ʻi he fāmili ʻa e faiakó. ʻOku ʻikai totonu ke teitei nofo toko taha ha faiako mo ha tokotaha ako, tukukehe kapau ko e tokotaha akó ko ha fānau ia ʻa e faiakó. ʻOku ʻuhinga ʻeni ki ha faʻahinga feituʻu pē, hangē ko ha loki ako, fale, fakataha ʻi he ʻinitanetí, pe meʻalele.
15.1.2
Falé, Meʻangāué, mo e Naunaú
ʻE fakapapauʻi ʻe he kau taki ʻo e siteikí mo e ngaahi uōtí ʻoku ʻatā e ngaahi feituʻu hangē ko e ʻū ʻapisiasí pe tukui ʻapi ʻa e kāingalotú, ki he ngaahi kalasi seminelí. ʻOku ʻikai totonu ke nō totongi ha ʻū fale pe ʻū loki ki he ngaahi kalasi seminelí. Kapau ʻoku fai e ngaahi kalasí ʻi ha ʻapisiasi, ʻoku totonu ke lava ʻa e kau faiakó ʻo fakaʻaongaʻi e meʻangāue ʻi he senitā maʻuʻanga tokoní.
ʻE ʻomi ʻe he fakafofonga S&I ʻa e naunau maʻá e kau faiakó mo e fānau akó ki he kalasi takitaha. ʻOku totonu ke omi e fānau akó mo ʻenau takitaha folofola, ko ha tohi folofola kuo paaki pe fakaʻilekitulōnika.
15.1.3
Kau ʻŌfisa Fakakalasí mo e Ngaahi ʻEikitivitií
ʻE lava ke fili ʻe ha faiako semineli ha kau ʻōfisa fakakalasi, hangē ko ha palesiteni, ongo tokoni palesiteni, pea mo ha sekelitali. ʻE ʻuluaki fetuʻutaki ʻa e faiakó ki he ongomātuʻa pea mo e pīsope ʻa e fānau ako takitaha ke maʻu ha fakangofua. ʻOku ʻikai hikinimaʻi pe vaheʻi ʻa e kau ʻōfisa fakakalasí. Te nau lava ʻo tokoni ki he faiakó ʻi he ngaahi fatongia angamaheni ʻi he loki akó pea poupouʻi ʻa e toenga ʻo e fānau akó ke nau maʻuako mo kau mai.
ʻOku ʻikai totonu ke fakahoko ʻe he kau faiako seminelí ha ngaahi ʻekitivitī mavahe mei he ngaahi taimi kalasi angamahení pe mavahe mei he loki akó. Ko e ngaahi fakaʻatā makehé, ʻe fie maʻu ai ha fakangofua mei he kau taki lakanga fakataulaʻeiki fakalotofonuá.
15.1.4
Maaka mo e Fakaʻosi Ako
ʻE lava ke ako lelei ange ʻa e fānau ako seminelí pea loloto ange ʻenau uluí ʻo kapau te nau maʻuako, kau mai, pea ako maʻu pē e folofolá ʻi tuʻa mei he taimi kalasí. ʻI heʻenau fai ʻení, te nau maʻu foki ai ha ngaahi maaka he seminelí ʻi he taʻu takitaha pea ʻe lava ke nau ʻosi mei he seminelí.
ʻOku ʻi ai ha fānau ako ʻe niʻihi ʻe faingataʻa ke nau maʻu ha maaka he seminelí koeʻuhí ko ha palopalema fakalaukonga pe ko ha toe ngaahi ʻuhinga kehe. ʻE lava ke fakafeʻungaʻi ʻe he faiakó ʻa e ngaahi tuʻutuʻuní ki he ngaahi fiemaʻu ʻa e fānau ako ko ʻení. ʻE lava ke kole ʻe he fakafofonga S&I ha ngaahi liliu ki ha polokalama kakato. Ko e ngaahi liliu ko ʻení ʻe fiemaʻu ai ha fakangofua mei he kau pule S&I.
Kuo pau ke maʻu ʻe ha tokotaha ako ha maaka taʻu ʻe fā mo ha tohi fakaongoongolelei fakalotu mei ha mēmipa ʻo e kau pīsopelikí, kae lava ke ne ʻosi mei he seminelí. ʻOku fakapapauʻi ʻe he tohi fakaongoongoleleí ni ʻoku moʻui taau mo līʻoa ʻa e tokotaha akó ki hono moʻui ʻaki e ngaahi tuʻunga ʻulungaanga ʻo e ongoongoleleí.
ʻE fakahoko ʻe he siteikí ʻi he taʻu takitaha ha polokalama ʻosi mei he seminelí. ʻOku palani ʻa e meʻa ko ʻení ʻe ha mēmipa ʻo e kau palesitenisī fakasiteikí pe ʻe ha aleaʻanga māʻolunga. ʻE lava ke tokoni ki ai ʻa e fakafofonga S&I. Ke maʻu ha fakamatala lahi ange, vakai ki he Ko ha Fakahinohino ki he Polokalama Fakaʻosi Ako ʻa e Seminelí mo e ʻInisititiutí.
ʻI ha ngaahi feituʻu ʻe niʻihi ʻi he ʻIunaiteti Siteití mo Kānata, ʻoku fakangofua ai ʻe he lao fakalotofonuá ʻa e fānau akó ke nau mavahe mei he akó ʻo ʻalu ki he seminelí he lolotonga e taimi akó. ʻOku fakangofua ʻe he Poate Ako ʻa e Siasí ʻa e feituʻu ʻoku fakaʻaongaʻi ai ʻa e faʻahinga semineli ko ʻení. Ki ha fakamatala lahi ange, vakai, Semineli Lolotonga e Akó ʻi he ChurchofJesusChrist.org.
ʻOku fakahoko ʻe he ʻinisititiutí ha ngaahi kalasi ako ʻo e ongoongoleleí he lolotonga ʻo e ngaahi ʻaho ʻo e uiké, ʻa ia ʻokú ne fakamālohia ai e tui mo e fakamoʻoni kia Sīsū Kalaisí mo ʻEne ongoongolelei kuo fakafoki maí. ʻE fakapapauʻi ʻe he kau taki fakasiteikí ʻoku ʻatā ʻa e ʻinisititiutí maʻá e kau taautaha kei talavou kotoa pē ʻi he taʻu 18–30.
ʻOku poupouʻi atu ʻa e kau taautaha kei talavou kotoa pē ke nau kau ʻi he ngaahi kalasi ʻinisititiutí, tatau ai pē pe ʻoku nau ako pe ʻikai. Te nau lava ʻo kau ʻi he ngaahi kalasi ʻinisititiuti ʻi he ʻapiakó (kapau ʻoku ʻi ai). Te nau toe lava foki ke kau ʻi he ngaahi kalasi ʻinisititiuti he ʻinitanetí pe ngaahi kalasi he siteikí.
ʻE ala fiemaʻu ʻe he kau palesitenisī fakasiteikí ke fakahoko ha ngaahi kalasi fakalotu maʻá e kakai lalahi taʻu 31 mo motuʻa angé. Ko e ngaahi kalasi ko ʻení ʻoku ʻikai ko ha ngāue ia ʻa e S&I pea ʻoku ʻikai ui ia ko ha ngaahi kalasi ʻinisititiuti. Neongo ia, ka ʻe lava pē ke fakaʻaongaʻi ʻa e ʻū naunau fakalēsoni ʻa e ʻinisititiutí kiate kinautolu.
Ngaahi Akoʻanga ʻa e Siasí mo e Potungāue Ako ʻa e Siasí
Ki he fakamatala ki he ngaahi lautohi siʻi mo e ako māʻolunga ʻa e Siasí, BYU–Pathway Worldwide, mo e ngaahi akoʻanga māʻolunga angé, vakai ki he CES. ChurchofJesusChrist.org. ʻOku toe ʻoatu foki ai mo e fakamatala ki hono fakakakato ʻa e fakaongoongolelei mei he taki fakalotú ki he kau akó ke nau hū ki he ngaahi akoʻanga ko ʻení.
ʻIkai ngata ai, ko e fakamatala fekauʻaki mo e ngaahi fakaʻatā mei he taki fakalotú ki he ngāueʻangá ʻo fakafou ʻi he CES Ecclesiastical Clearance Office (ʻOfisi Fakangofua ʻa e Taki Fakalotú he CES), ʻe lava ke maʻu ia ʻi he help.ChurchofJesusChrist.org.