“11. Ol Yang Woman,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2020).
“11. Ol Yang Woman,” Jeneral Hanbuk.
Pikja
sam yang woman oli stap aotsaed
11.
Ol Yang Woman
11.1
Stamba Tingting mo Oganaesesen
Oganaesesen blong Ol Yang Woman i helpem ol pikinini blong God blong rere blong gobak stap wetem Hem, long ples blong Hem. Taem oli traehad blong kipim ol kavenan blong olgeta we oli bin mekem wetem God, ol yang woman oli “blokem olgeta wetem stret mo gud fasin mo paoa blong God long bigfala glori” (1 Nifae 14:14).
11.1.1
Stamba Tingting
Oganaesesen blong Ol Yang Woman i blong helpem ol yang woman blong oli mekem mo oli kipim ol tabu kavenan, mo tu, blong oli mekem ol dip jenis long laef blong olgeta i go long Jisas Kraes mo gospel blong Hem.
Stamba tingting blong gat wan klas blong Ol Yang Woman hem i blong helpem ol yang woman blong wok tugeta blong tekpat long wok blong God blong fasin blong sevem man mo fasin blong kam olsem wan god, i hapen. Insaed long ol klas blong olgeta, ol yang woman oli givim seves long ol narawan, oli mekem ol kavenan responsabiliti blong olgeta, oli bildimap yuniti, mo oli lan mo laef folem doktrin.
11.1.2
Stamba Toktok blong Ol Yang Woman
Stamba toktok blong Ol Yang Woman i save helpem wanwan yang woman blong hem i andastanem tabu aedentiti blong olgeta mo blong oli kam blong jenisim laef blong olgeta i kam long Jisas Kraes. Ol yang woman mo ol lida blong olgeta, oli ripitim stamba toktok ia long stat blong ol miting long Sandei, mo long ol nara kam tugeta blong Ol Yang Woman. Stamba toktok ia i rid olsem:
“Mi mi wan gel blong Papa mo Mama long Heven, we Tufala i laekem mi tumas, mo mi gat wan tabu fasin mo wan ples we i no save finis.
“Olsem wan disaepol blong Jisas Kraes, mi traehad blong kam olsem Hem. Mi lukaot mo tekem aksen folem revelesen we mi kasem blong miwan, mo givhan long ol narawan long tabu nem blong Hem.
“Bae mi stanap olsem wan witnes blong God long evri taem, mo long evri samting, mo long evri ples.
“Taem mi stap traehad blong kwalifae blong kam olsem wan god, bae mi holemtaet strong presen ia we i fasin blong sakem sin, mo bae mi kam gud moa evri dei. Wetem fet, bae mi mekem hom mo famli blong mi i kam strong moa, bae mi mekem mo kipim ol tabu kavenan, mo kasem ol odinens mo ol blesing blong tabu tempol.”
Ol yang woman oli kam ol memba blong wan klas blong Ol Yang Woman stat long Jenuware blong yia we oli kasem 12 yia.
Ol klas blong ol yang woman, oli oganaesem olgeta i folem yia grup. Wan yia grup i evri yang woman ia we bae oli kasem semfala yia long wan kalenda yia. Insaed long wan klas, i save gat moa bitim wan yia grup. Ol yang woman oli progres i go long wan niu klas long Jenuware blong yia ia we oli kasem yia blong ol yang woman insaed long niufala klas ia.
Ol bisoprik mo ol adalt lida blong Ol Yang Woman oli prea mo disaed olsem wanem blong oganaesem ol klas i folem yia blong olgeta. Oli tingting blong givim ol janis blong lidasip long ol yang woman. Insaed long wanwan klas, i nomata se klas i smol o i bigwan, i mas gat wan presiden mo, taem i posibol, i gat wan o tu kaonsela mo wan sekretari. Long ol yunit we i gat inaf yang woman insaed long hem, ol klas oli mas bigwan inaf blong mekem se ol klas presidensi oli gat ol memba blong klas blong givim seves long olgeta.
Pikja
ol yang woman oli stap long klas
Ol klas ia, bae oli singaotem evri klas ia tru long wan sem nem, “Yang Woman.” Sapos wan wod i gat moa bitim wan klas, oli yusum ol yia grup blong seperetem ol klas.
11.2
Stap Tekpat long Wok blong God blong Fasin blong Sevem Man mo Fasin blong Kam Olsem Wan God
God i stap invaetem evriwan blong i go long Kraes mo help long wok ia blong Hem taem oli:
Stap laef folem gospel blong Jisas Kraes.
Yumi stap kea long olgeta we oli stap long nid.
Yumi stap invaetem evriwan blong akseptem gospel.
Yumi stap joenem ol famli blong taem we i no save finis.
Ol klas presiden, we ol adalt lida oli sapotem, oli kaonsel tugeta abaot olsem wanem blong mekem wok ia i kamtru. Blong gat moa infomesen abaot wok blong God blong fasin blong sevem man mo fasin blong kam olsem wan god, stadi long japta 1.
11.2.1
Stap Laef Folem Gospel blong Jisas Kraes
11.2.1.1
Rol blong Ol Papa mo Mama mo Ol Lida
Papa mo mama, tufala i responsibol blong stap tijim ol pikinini blong tufala abaot gospel mo blong stap helpem olgeta blong laef folem gospel ia (luk long Doktrin mo Ol Kavenan 68:25–28). Bisoprik, ol lida blong Ol Yang Woman, mo ol klas presidensi oli sapotem ol papa mo mama long saed blong responsabiliti ia long wei ia:
Oli leftemap tingting blong i mas gat komunikesen bitwin ol yang woman mo ol famli blong olgeta.
Oli meksua se ol yut aktiviti oli sapotem mo blesem ol famli.
Oli helpem ol papa mo mama blong mekem ol gel blong olgeta oli rere blong kasem tempol endaomen, go long wan fultaem misinari seves (sapos ol yang woman oli wantem), kasem mared long tempol, mo kam wan mama.
Ol lida oli mas lisin mo luklukgud long ol yut we oli no stap kasem famli sapot blong stap laef folem gospel.
Ol papa mo mama, mo ol lida oli traehad blong stap ol gudfala eksampol long ol yut. Oli tijim tingting blong ol yut blong olgeta taem oli stap hadwok blong oli kam moa olsem Jisas Kraes. Program ia blong Ol Pikinini mo Ol Yut i save help long ol traehad wok ia (luk long ChildrenandYouth.ChurchofJesusChrist.org).
11.2.1.2
Stap Lanem Gospel
Ol lida blong Ol Yang Woman mo ol klas presidensi oli leftemap tingting blong ol yang woman mo famli blong olgeta blong oli lanem gospel insaed long hom. Ol lida oli stadi long gospel mo oli serem wanem we oli lanem wetem ol yang woman. Oli stap invaetem ol memba blong klas blong oli serem, insaed long Jos, wanem we oli stap lanem long hom.
Ol klas blong Ol Yang Woman oli stap mit long ol Sandei blong mekem fet i kam strong moa, blong bildimap yuniti, blong mekem ol famli mo ol hom oli kam strong moa, mo blong mekem ol plan blong tekpat long wok blong God blong fasin blong sevem man mo fasin blong kam olsem wan god, oli hapen. Ol klas presidensi, we ol adalt lida oli sapotem, oli mekem plan blong ol Sandei miting.
Ol klas miting, oli holem olgeta long nambatu mo nambafo Sandei blong wanwan manis. Oli blong 50 minit. Ol miting oli mas stat wetem wan prea. Wan memba blong klas presidensi i lidim. Hem i lidim klas blong talem baehat stamba toktok, mo blong stap toktok raon long ol asaenmen, mo ol nara mata.
Wan memba blong klas, o wan adalt lida, i lidim gospel instraksen. Ol presidensi blong klas oli kaonsel wetem ol adalt lida abaot huia bae i tij. Ol aotlaen blong ol miting, oli save faenem insaed long Kam Folem Mi—Blong Ol Kworom blong Aronik Prishud mo Ol Yang Woman Klas (luk long ComeFollowMe.ChurchofJesusChrist.org). Ol miting oli mas en wetem wan prea.
Sapos wan wod i gat moa long wan klas blong Ol Yang Woman, oli save mit seperet. Be, oli save mit tugeta taem i gat wan spesel nid. Wanwan taem, ol yang woman mo ol yang man oli mit tugeta blong holem wan Sandei lesen, olsem we bisoprik mo presidensi blong Ol Yang Woman i kodinetem.
Oli leftemap tingting blong ol yang woman blong oli tekpat long seminari (luk long 15.1).
11.2.1.3
Seves mo Ol Aktiviti
Ol presidensi blong klas, we ol adalt lida oli sapotem, oli mekem plan blong holem ol seves mo ol aktiviti. Ol seves mo ol aktiviti ia oli sapos blong help blong mekem wok blong God blong fasin blong sevem man mo fasin blong kam olsem wan god, i hapen. Ol seves mo ol aktiviti ia, oli mas bildimap ol testemoni, mekem ol famli oli kam strong moa, pusum yuniti insaed long ol klas, mo i givim ol janis blong blesem ol narawan. Oli mas gat balens long ol fofala eria blong groap yumiwan: long saed blong spirit, long saed blong sosol laef, long saed blong bodi, mo long saed blong waes.
Plante long ol yut aktiviti ia, plante taem oli holem long wan dei we i no Sandei, o, i no Mandei. Plante taem oli holem evri wik. Long samfala eria, ol samting olsem ples we i longwe, sefti, o ol nara samting i save mekem se i no posibol blong holem ol aktiviti ia evri wik. Long ol eria ia, bae i oraet sapos oli no holem ol aktiviti ia evri wik, be oli mas holem aktiviti wan taem long wan manis. Ol aktiviti ia, oli save mekem plan blong ol taem oli yusum Eksampol blong Seves mo Aktiviti Plan, we i stap long ChurchofJesusChrist.org.
Samfala seves mo aktiviti, insaed i mas gat tugeta, ol yang man mo ol yang woman, speseli ol yut we oli bigwan.
Ol yut bae oli kasem fulap samting taem oli gat wan sosol laef insaed long ol bigfala grup. Ol yut, we oli stap long tu o moa long tu wod, wanwan taem oli save mit tugeta blong gat seves mo ol aktiviti. Ol stek mo ol distrik, wanwan taem oli save mekem plan blong holem seves mo ol aktiviti blong ol yut (luk long 20.3.2).
Ol adalt lida oli help blong meksua se ol aktiviti ia oli sef (luk long safety.ChurchofJesusChrist.org; luk tu long 20.7 insaed long hanbuk ia). Meksua se i gat tu (2) adalt lida we oli gat responsibol fasin blong mas stap long evri aktiviti (luk long 11.6.1
Blong kasem moa infomesen, luk long YoungWomen.ChurchofJesusChrist.org. Luk tu long JustServe.org long ol ples we i gat hemia i stap. Olgeta risos ia oli givim seves mo ol aedia blong aktiviti.
Ol Yia Aktiviti. Antap long ol yut aktiviti we i hapen oltaem, ol yang woman oli save tekpat tu, evri yia, long:
Wan miting blong ol yut mo papa mo mama blong olgeta kolosap long stat blong yia. Oli save holem miting ia blong ol yang man mo ol yang woman i seperet, o i tugeta. Oli save holem long level blong wod, o, long level blong stek. Ol asisten blong bisop nao oli mekem plan blong miting ia insaed long pris kworom blong olgeta mo wetem presidensi blong klas blong ol yang woman we yia blong olgeta i moa bigwan. Ol yang woman we bae oli kasem 12 yia tru aot long yia ia, oli save kasem ol aedentiti simbol blong olgeta long taem blong miting ia (luk long 11.6.3). Blong kasem moa infomesen, luk long ChildrenandYouth.ChurchofJesusChrist.org.
Wan Yang Woman kamp, (luk long Young Women Camp Guide). Ol yang woman oli save tekpat long sam moa ovanaet kamp, samting we bae i hapen, mo ol aktiviti truaot long yia, taem we i posibol.
Wan wod o stek yut konfrens, o wan konfrens blong For the Strengh of Youth (FSY). Blong kasem moa infomesen abaot ol FSY konfrens, luk long FSY.ChurchofJesusChrist.org. Blong gat moa infomesen abaot ol koling mo ol responsabiliti blong wod mo stek FSY, luk long FSYLeader.ChurchofJesusChrist.org (blong Y.S. A mo Kanada) o long FSY Planning Guide (blong evri nara eria).
I mas gat wan aktiviti we i tokbaot bigwan ol standet we oli stap insaed long Blong Ol Yut Oli Kam Strong. Long taem ia, ol yang man mo ol yang woman oli save mit tugeta. Oli save invaetem tu ol papa mo mama.
Ol Samting we I Mas Gat Folem Yia blong Wanwan. Wetem raet blong papa mo mama blong olgeta, ol yang woman oli save go long wan ovanaet Ol Yang Woman kamp; hemia stat long Jenuware blong yia ia we oli kasem 12 yia. Oli save go long ol danis, ol yut konfrens, mo ol BYKS konfrens, hemia stat long manis Jenuware blong yia ia we oli kasem 14 yia.
Mane blong Mekem Ol Aktiviti. Ol aktiviti, wetem ol saplae blong holem aktiviti, oli pem wetem bajet blong wod. Ol travel mo mane we oli spendem, oli no mas sas tumas.
Olsem wan eksepsen, sapos bajet blong wod i no gat inaf mane blong pem ol maltidei aktiviti, olsem ol kamp, ol lida oli save askem wanwan we i tekpat blong i help blong oli pem olgeta samting ia. Be, oli no mas stopem wan yang woman blong kam long aktiviti ia sapos hem i no save pem blong help. Sapos oli nidim moa mane, bisop i save givim raet blong oli holem wan fanresing nomo long wanwan yia (luk 20.6.5).
Bisoprik i meksua se bajet mo ol aktiviti blong ol yang woman mo ol yang man, oli inaf mo oli serem i ikwol. Bajet blong ol yang woman i folem namba blong ol yang woman insaed long wod. Ol bajet blong ol kworom blong Aronik Prishud, i folem namba blong ol yang man we oli stap insaed long wod.
Pikja
ol yang woman oli plei long wota faet
Luk long FSY.ChurchofJesusChrist.org blong kasem moa infomesen abaot fasin blong kasem mane blong pem samting blong ol BYKS konfrens.
11.2.1.4
Divelopmen blong Yuwan
Long ol hadwok blong olgeta blong oli kam moa olsem Sevya, oli stap invaetem ol yut blong setem ol gol blong groap long saed blong spirit, sosol laef, bodi mo waes (luk long Luk 2:52). Ol yut oli lukaotem insperesen blong faenemaot wanem we oli nid blong wok long hem. Wetem help blong ol papa mo mama, oli mekem ol plan, oli mekem samting i folem plan blong olgeta, mo oli soemaot wanem we oli lanem. Ol lida oli givim sapot tu olsem we i nid blong mekem. Be, oli no sapos blong folemap ol gol o progres blong ol yang woman. Ol mama mo papa, mo ol lida oli save givim tingting blong samfala gol, be oli letem ol yut blong lukaotem insperesen we i kam long olgeta abaot ol gol we oli mas kasem mo mekem i hapen.
Oli leftemap tingting blong ol yut blong flatem tu gol long wanwan long ol fo eria ia evri yia. Oli save yusum Divelopmen blong Yuwan: Gaedbuk blong Ol Yut o ap blong Laef Folem Gospel blong setemap mo rekodem ol gol blong olgeta.
Ol yang woman oli mas gat ol taem we i tekem ples oltaem blong oli givim seves long ol narawan, mo tu, ol taem blong givim seves long famli blong olgeta, long taem blong ol yut aktiviti, mo tu, long taem blong olgetawan nomo. Ol aedia blong wei blong givim seves oli stap long ChildrenandYouth.ChurchofJesusChrist.org Long weaples i gat, JustServe.org i givim sam janis blong mekem komuniti seves.
11.2.2.1
Wok blong Givhan
Wok blong givhan i blong stap kea long ol narafala man olsem we Sevya bae i mekem. Ol yang woman, oli kasem ol givhan wok we oli givimaot long olgeta stat long manis Jenuware blong yia ia we oli kasem 14 yia. Blong kasem moa infomesen, luk long japta 21.
11.2.3
Stap Invaetem Evriwan blong Akseptem Gospel
Ol yang woman oli stap invaetem evriwan blong akseptem gospel taem we oli “stanap olsem ol witnes blong God long evri taem mo long evri samting, mo long evri ples” (Mosaea 18:9). Sam wei blong oli save mekem olsem, oli stap andanit ia:
Stap olsem wan gud eksampol blong stap wan disaepol blong Jisas Kraes.
Serem ol testemoni blong olgeta wetem ol fren mo ol memba blong famli.
Givhan long olgeta, insaed long klas blong olgeta, we oli lesaktiv.
Invaetem ol fren blong kam long jos o long wan yut aktiviti.
Invaetem ol fren blong oli tekpat long program blong Ol Pikinini mo Ol Yut. Ol lida oli mas wok kolosap moa wetem ol mama mo papa blong ol yut ia blong helpem olgeta oli andastanem program ia mo blong luksave olsem wanem nao olgeta mo ol pikinini blong olgeta oli wantem pat long program ia.
Invaetem ol fren blong ol misinari oli tijim olgeta.
Ol papa mo mama, mo ol lida, oli leftemap tingting blong ol yang woman blong rere blong serem gospel truaot long laef blong olgeta. Sam wei blong oli save mekem olsem, oli stap andanit ia:
Leftemap tingting blong ol yang woman blong kasem wan testemoni blong olgetawan abaot plan blong hapines blong Papa long Heven, Atonmen blong Jisas Kraes, mo restoresen blong gospel blong Hem.
Givim ol janis long olgeta blong oli givim seves insaed long Jos.
Givim ol janis blong tijim gospel long ol klas miting, mo long ol nara ples.
Sapos ol yang woman oli wantem givim seves long ol fultaem misin, papa mo mama blong olgeta, wetem ol lida blong olgeta oli helpem olgeta blong oli rere. Hemia i minim tu blong tijim olgeta abaot ol blesing mo wanem oli stap wet long hem long taem blong fultaem misinari wok.
Missionary.ChurchofJesusChrist.org i givim sam moa risos we i save helpem ol yang woman we oli wantem stap rere blong givim seves long wan misin. Luk long ol japta 23 mo 24 blong kasem moa infomesen.
11.2.4
Stap Joenem Ol Famli blong Taem we I No Save Finis
Ol yang woman oli save help blong yunaetem ol famli blong taem we i no save finis long plante wei. Sam wei blong help, oli stap andanit ia:
Givim ona long papa mo mama blong olgeta mo stap olsem wan eksampol blong fasin blong stap laef insaed long hom blong olgeta, we i olsem fasin blong Kraes.
Rere blong gat stret famli blong olgeta we i no save finis.
Gat wan tempol rekomen we i laef i stap.
Stap rere blong kasem ol odinens blong tempol, wetem hemia blong mared we i no save finis.
Givim seves olsem ol tempol mo famli histri konsalten, olsem we bisoprik i singaotem olgeta (luk long 25.2.4).
11.3
Wod Lidasip blong Ol Yang Woman
11.3.1
Bisoprik
Fasfala mo moa impoten responsabiliti blong bisop, hem i blong kea long ol yang woman mo ol yang man insaed long wod blong hem. Hem, wetem ol kaonsela blong hem, oli lanem nem blong olgeta mo oli andastanem hom situesen blong olgeta. Oli mitim wanwan yang woman tu (2) taem long wan yia (luk long 31.3.1).
Bisop i gat responsabiliti blong lukluk ova long ol wod oganaesesen blong Ol Yang Woman. Hem i mit oltaem wetem presiden blong Ol Yang Woman. Hem i givim ripot abaot ol mata blong Ol Yang Woman long taem blong bisoprik miting.
Bisop mo ol kaonsela blong hem, oli tekpat oltaem long ol Yang Woman miting, seves mo aktiviti. Sapos i gat plante klas blong Ol Yang Woman, bisop i save givim wok long hemwan mo ol kaonsela blong hem blong oli wok wetem ol spesifik klas.
11.3.2
Adalt Yang Woman Presidensi
Bisop i singaotem mo i setem apat wan adalt woman blong i givim seves olsem wod presiden blong Ol Yang Woman. Sapos wan yunit i bigwan inaf, presiden blong Praemeri i givim nem blong wan o tu adalt woman, blong bisop i singaotem olsem ol kaonsela blong hem (luk long japta 30). Bisoprik i save tingting long ol nem ia, mo oli save givimaot ol koling.
Long wan smol yunit, presiden blong Ol Yang Woman, maet bae i wan adalt lida ia nomo insaed long oganaesesen blong Ol Yang Woman. Long kes olsem, hem i wok wetem papa mo mama blong oganaesem instraksen mo ol aktiviti blong ol yang woman. Hem i meksua se i mas gat tu adalt wetem responsibol fasin we tufala i stap oltaem long evri miting mo long evri aktiviti. Taem we i posibol, oli mas singaotem ol kaonsela mo wan sekretari.
Sapos wan branj i no gat wan presiden blong Yang Woman, Rilif Sosaeti presiden i save oganaesem instraksen blong ol yang woman kasem taem we oli singaotem presiden blong Ol Yang Woman.
Pikja
wan woman mo wan yang gel tufala i stap storian
Yang Woman presiden i gat olgeta responsabiliti ia: Ol kaonsela blong hem oli stap helpem hem.
I stap olsem wan memba blong wod kaonsel. Hem i givim seves olsem (1) wan memba blong wod kaonsel we i stap help blong lukluk long ol nid insaed long wod, mo blong faenem ol ansa, mo (2) olsem wan ripresentativ blong Ol Yang Woman (luk long 29.2.5).
Hem i stap olsem wan memba blong wod yut kaonsel (luk long 29.2.6).
Givhan long wanwan yang woman.
I givim nem blong sam sista i go long bisoprik blong oli holem wok insaed long Ol Yang Woman.
I tijim ol nara Yang Woman lida mo klas presidensi long saed blong responsabiliti blong olgeta.
I kaonsel, o toktok wetem ol yang woman abaot ol jalenj we oli no nidim bisop, o i no gat abius insaed long hem (luk long 32.3, 31.3.1, mo 38.6.2).
I tijim tingting blong ol klas presidensi long saed blong ol lidasip responsabiliti blong olgeta. Wanwan klas, bae i gat wan spesifik memba blong presidensi blong Ol Yang Woman i help mo i lukluk ova long hem.
I sapotem ol yang woman we oli stap olsem ol kompanion blong ol adalt sista long saed blong wok blong givhan (luk long 21.2.2).
Oltaem hem i holem ol presidensi miting blong Ol Yang Woman mo hem i mit tu wetem bisop.
Hem i lukluk ova ol rekod, ol ripot, bajet, mo ol faenens blong oganaesesen blong Ol Yang Woman.
Sapos yunit i bigwan inaf, presiden blong Ol Yang Woman i save givim nem blong wan adalt sista i go long bisop blong hem i stap olsem sekretari blong Ol Yang Woman. Hem i save gat olgeta responsabiliti ia:
Hem i helpem presidensi blong Ol Yang Woman blong rere long ol ajenda blong ol presidensi miting. Hem i go long ol miting ia, i tekem not, mo i kipim rekod blong ol wok we oli givimaot.
Hem i givim instraksen long ol sekretari blong klas, mo i helpem olgeta blong kipim ol atendens rekod.
Wetem RLK, yusum blong wok wetem sekretari blong Rilif Sosaeti blong kipim ol atendens rekod blong ol adalt sista we oli stap givim seves long Ol Yang Woman.
I helpem presidensi blong Ol Yang Woman blong rere long wan bajet, mo kipim rekod blong ol mane we oli spendem.
11.3.4
Klas Presidensi mo Sekretari
11.3.4.1
Stap Singaotem, Sastenem, mo Setem Apat Ol Yang Woman
Wanwan klas blong Ol Yang Woman i sapos blong gat wan klas presidensi. Presidensi blong Ol Yang Woman i save givim nem blong ol yang woman we bae oli holem wok olsem ol klas presiden. Ol memba blong bisoprik, oli prea, mo oli kaonsel tugeta blong faenemaot huia blong singaotem.
Wan memba blong bisoprik i singaotem wan yang woman blong wok olsem wan klas presiden. Taem we i gat inaf yang woman blong givim seves, klas presiden ia, i tingting long ol memba blong klas, mo i prea blong save wijwan nem blong givim blong oli stap olsem ol kaonsela mo sekretari blong hem. Bisoprik i save tingting long ol nem ia, mo oli save givimaot ol koling.
Bifo oli askem wan yang woman blong givim seves long eni long ol koling ia, bisoprik memba i askem raet blong papa mo mama blong yang woman ia.
Afta we oli givimaot ol koling ia, wan memba blong bisoprik i presentem ol yang woman ia long ol klas blong olgeta blong oli sastenem. Afta nao, bisop, o wan kaonsela we hem i givim wok ia long hem, i setem apat ol yang woman ia.
Wan memba blong bisoprik i mekem anaonsmen blong olgeta koling ia long taem blong sakramen miting. Hem i no nid blong presentem olgeta blong oli sastenem olgeta.
Ol klas presiden oli givim seves insaed long wod yut kaonsel (luk long 11.3.4.4). Ol presidensi blong klas oli gat olgeta responsabiliti ia:
Oli lidim ol hadwok blong ol klas blong tekpat long wok blong God blong fasin blong sevem man mo hemia blong kam olsem wan god (luk long japta 1).
Kam blong save mo givim seves long wanwan yang woman, wetem olgeta we oli no stap go long ol klas miting. Kam blong save ol nid mo ol situesen blong olgeta.
Tekpat long ol wok blong wok blong stap serem gospel mo mekem ol memba we oli niu mo olgeta we oli kambak, oli kam strong moa. Wan memba blong presidensi blong yia grup blong klas blong Ol Yang Woman we oli moa olfala i go atendem kodinesen miting (luk long 23.5.7).
Tekpat long ol wok insaed long wod, long saed blong tempol mo famli histri. Wan memba blong presidensi blong yia grup blong klas blong Ol Yang Woman we oli moa olfala i go atendem kodinesen miting (luk long 25.2.7).
Mekem plan mo lidim ol Sandei klas miting ia (luk long 11.2.1.2).
Mekem plan, mo kareaot ol seves mo aktiviti blong ol klas (luk long 11.2.1.3
Holem ol klas presidensi miting oltaem (luk long 11.3.4.3).
Taem oli singaotem ol sekretari blong ol klas, oli mekem rere ol ajenda blong holem ol miting; oli tekem ol not mo oli raetemdaon atendens.
Ol memba blong presidensi blong Ol Yang Woman oli tijim ol klas presidensi abaot responsabiliti blong olgeta (luk long 11.3.2). Ol klas advaesa mo ol klas speselis, oli mas strong mo aktiv blong save help (luk long 11.3.5 mo 11.3.6).
11.3.4.3
Klas Presidensi Miting
Ol klas presidensi blong klas blong Ol Yang Woman oli mit oltaem. Klas presiden i lidim miting ia. Ol adalt Yang Woman lida oli kasem wok ia blong sapotem klas presidensi tu blong oli mas kam. Long taem blong ol miting ia, ol lida oli kaonsel tugeta mo oli lukaotem blong kasem revelesen abaot tingting blong Lod long saed blong ol klas blong olgeta. Insaed long ajenda, i gat ol toktok raon long olgeta wok ia:
Help blong mekem wok blong God blong fasin blong sevem man mo fasin blong kam olsem wan god
Stap givim seves long ol memba blong klas, mo spesel lukluk blong stap sapotem ol niu memba mo stap go lukaotem mo helpem ol lesaktiv memba.
Go aot long olgeta we oli blong defren jos o fet, mo no gat ol sem bilif
Mekem plan blong ol miting, ol seves, mo ol aktiviti blong ol klas.
Lidasip instraksen we i kam long ol lida blong Ol Yang Woman o wan memba blong klas presidensi.
Stamba tingting blong gat wod yut kaonsel hem i blong helpem ol yut blong oli tekem ol narawan oli kam long Jisas Kraes, mo blong help blong mekem wok blong God blong fasin blong sevem man mo fasin blong kam olsem wan god.
Bisop i prisaed ova long wod yut kaonsel. Ol memba blong kaonsel ia, insaed i gat:
Bisoprik.
Wan long ol asisten blong bisop insaed long kworom blong ol pris mo presiden blong kworom blong ol tija mo presiden blong kworom blong ol dikon.
Ol presiden blong Ol Klas blong Ol Yang Woman (o ful klas presidensi sapos wod i gat wan Yang Woman klas nomo).
Presiden blong Ol Yang Woman.
Ol memba blong wod yut kaonsel oli toktok raon long ol wei blong helpem wanwan man mo woman blong oli bildimap testemoni blong olgeta, blong oli kasem ol odinens we i sevem man, blong oli kipim ol kavenan, mo blong oli kam ol man mo ol woman we oli givim evri samting blong stap folem Jisas Kraes (luk long Moronae 6:4–5 Oli kaonsel tugeta abaot ol nid blong ol yang woman mo ol yang man insaed long wod. Oli save toktok raon long ol aktiviti blong lukluk long ol nid ia. Be, ol ditel plan blong ol aktiviti, i mas hapen insaed long ol kworom o ol klas presidensi miting.
Presidensi blong Ol Yang Woman i save givim sam nem i go long bisoprik blong oli singaotem olsem ol advaesa blong Ol Yang Woman. Wanwan advaesa i wok wetem wan spesifik yia grup blong ol yang woman.
Ol advaesa oli gat olgeta responsabiliti ia:
Oli helpem presidensi blong Ol Yang Woman long saed blong ol responsabiliti blong olgeta.
Oli sapotem mo lidim ol presidensi blong ol klas taem we oli lanem mo kareaot ol responsabiliti ia blong olgeta.
Tijim ol Sandei lesen taem we i nid. Helpem ol yang woman we oli bin invaetem olgeta blong oli tijim wan lesen blong oli mas rere gud mo tij.
Oli go long ol klas aktiviti.
Oli go long Ol Yang Woman presidensi miting sapos oli invaetem olgeta.
I mas gat tu (2) adalt woman we oli gat responsibol fasin blong mas stap long wanwan miting blong ol klas o aktiviti. Ol advaesa oli mas komplitim trening we i stap long ProtectingChildren.ChurchofJesusChrist.org (luk long 11.6.1).
Taem we i nid, presidensi blong Ol Yang Woman i save givim nem long bisoprik blong oli singaotem ol speselis blong oli help wetem wan spesel taem, olsem wan kampl, wan yut konfrens, o wan spot taem.
Evri speselis ia, oli wok anda long daereksen blong presidensi blong Ol Yang Woman long wod.
Stap Helpem Ol Yang Woman blong Stap Rere blong Joenem Rilif Sosaeti
Wan yang woman i kam wan memba blong Rilif Sosaeti taem hem i kasem 18 yia. Taem hem i kasem 19 yia, wanwan yang woman i mas tekpat fulwan long Rilif Sosaeti. Long sam kes, wan yang woman i save kam long Rilif Sosaeti bifo long namba 18 betdei blong hem. Wanwan yang woman i kaonsel wetem papa mo mama blong hem, mo wetem bisop, blong save disaed wanem i bes blong helpem hem blong mekem fet blong hem long Jisas Kraes i kam strong moa.
Ol papa mo mama, ol lida blong Ol Yang Woman mo ol lida blong Rilif Sosaeti, oli wok tugeta blong helpem wanwan yang woman blong gat sakses blong progres i kam long Rilif Sosaeti. Ol lida ia oli givim ol janis oltaem blong ol yang woman mo ol sista blong Rilif Sosaeti oli mekem koneksen mo stap developem ol rilesensip.
Wan memba blong stek presidensi i singaotem wan adalt woman blong wok olsem wan stek Yang Woman Presiden. Sapos wan stek i bigwan inaf, presiden blong Ol Yang Woman i givim nem blong wan o tu adalt woman, blong oli singaotem olsem ol kaonsela blong hem, mo wan narawan blong i stap olsem sekretari. Ol woman ia, oli singaotem olgeta mo oli setem apat olgeta tru long wan memba blong stek presidensi o wan hae kaonsela we i kasem wok ia. Blong kasem infomesen abaot ol responsabiliti blong stek Yang Woman presidensi mo sekretari, luk long 6.7.1, 6.7.1.2, mo 6.7.3.
Wan kaonsela, insaed long stek presidensi, i gat responsabiliti blong lukaotem oganaesesen blong Ol Yang Woman insaed long stek. Hem i gat responsabiliti tu blong lukluk long wok ia blong stek Yang Woman Presidensi. Hem i givim instraksen tu long ol bisop long saed blong ol responsabiliti blong olgeta ova long ol yang woman.
Stek presidensi i givim wok long wan hae kaonsela blong hem i wok wetem stek Yang Woman Presidensi (luk long 6.5).
Stek Yang Woman presidensi mo sekretari oli wok mo givim seves insaed long stek yut lidasip komiti (luk long 29.3.10).
Pikja
ol yang woman oli stap long klas
11.6
Sam Moa Gaedlaen mo Polisi
11.6.1
Kipim Ol Yut Oli Sef Oltaem
Long ol ples long Jos, taem i gat ol adalt we oli stap tijim ol pikinini o ol yut, i mas gat tu responsibol adalt tu, we oli mas stap. Maet bae i nid blong kombaenem ol klas blong mekem hemia i posibol.
Evri adalt we oli wok wetem ol yut oli mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org). Oli ripitim trening ia evri tri yia afta long hemia.
Blong kasem moa infomesen long wei we ol gaedlaen ia oli blong ol givhan kompanion, luk long 21.2.2.
11.6.2
Ol Yang Woman we Oli Gat Disabiliti
Ol klas presidensi oli givim spesel kea long ol yang woman we oli gat ol disabiliti. Blong kasem moa infomesen abaot olsem wanem blong stap helpem ol yang woman ia, luk long disability.ChurchofJesusChrist.org; luk tu long 38.8.27 insaed long hanbuk ia.
11.6.3
Ol Simbol blong Ol Pikinini mo Ol Yut
Ol yang woman oli kasem ol simbol olsem pat blong program blong Ol Pikinini mo Ol Yut. Evri yang woman oli mas kasem wan aedentiti simbol we i kam long klas presidensi taem hem i kam wan memba blong Ol Yang Woman. Mo tu, hem i kasem wan kopi blong smol buk ia Divelopmen blong Yuwan: Gaedbuk blong Ol Yut. Hemia oli save mekem taem ol klas presidensi mo ol adalt Yang Woman lida oli mit wetem hem blong welkamem hem i kam insaed Ol Yang Woman. Oli save mekem tu long wan yia miting blong ol yut mo papa mo mama blong olgeta (luk long 11.2.1.3).
Long Jenuware blong yia ia we wan yang woman i kasem 18 yia, hem i kasem wan moa aedentiti simbol.
Ol yang woman oli save winim wan medol blong ajivmen taem oli traehad blong kam moa olsem Sevya.