“Faaopoopoga,” Mo le Malosi o le Autalavou: O Se Taiala i le Faia o Filifiliga (2022)
“Faaopoopoga” Mo Le Malosi o le Autalavou
Faaopoopoga
O se tasi auala e iloilo ai lou alualu i luma i luga o le ala o feagaiga o le mafaufau loloto lea i fesili o loo i lalo. O fesili ia e fesiligia ai oe pe a faatalanoaina oe ia maua se pepa faataga o le malumalu, ae aua le faatali mo se faatalanoaga. Fai sau oe lava siaki faaleagaga. O le Autu a Tamaitai Talavou, o le Autu a le Korama o le Perisitua Arona, ma Poloaiga e Sefulu e mafai foi ona avea ma meafaigaluega aoga i lau iloiloga faaletagata lava ia.
Fesili o pepa faataga o le malumalu mo le autalavou
E i ai sou faatuatua ma sau molimau i le Atua, le Tama Faavavau; o Lona Alo; o Iesu Keriso; ma le Agaga Paia?
E i ai sau molimau i le Togiola a Iesu Keriso ma Lana matafaioi i le avea ai ma ou Faaola ma Togiola?
E i ai sau molimau i le Toefuataiga o le talalelei a Iesu Keriso?
E te lagolagoina le Peresitene o Le Ekalesia a Iesu Keriso o le Au Paia o Aso e Gata Ai o le perofeta, tagatavaai, ma tali faaaliga ma ua na o ia lava le tagata i le lalolagi ua faatagaina e faaaogaina ki uma o le perisitua? E te lagolagoina ia uso o le Au Peresitene Sili ma le Korama a Aposetolo e Toasefululua o ni perofeta, tagatavaai, ma tali faaaliga? E te lagolagoina isi Au Pulega Aoao ma taitai o le Ekalesia i le lotoifale?
Ua fetalai mai le Alii o mea uma e ao ona “faia i le mamā” i Ona luma (Mataupu Faavae ma Feagaiga 42:41). O e tauivi mo le mamā atoa i ou mafaufauga ma amioga? O e usiusitai i le tulafono o le ola mamā?
O e mulimuli i aoaoga a le Ekalesia a Iesu Keriso i au amioga faalilolilo ma amioga i nofoaga faitele i tagata o lou aiga ma isi?
O e lagolagoina pe faalauiloa atu soo se aoaoga, o faiga masani, po o aoaoga faavae e feteenai ma aoaoga a Le Ekalesia a Iesu Keriso o le Au Paia o Aso e Gata Ai?
O e tauivi ia tausia le paia o le aso Sapati, i le aiga ma i le lotu; auai i au sauniga; saunia ma agavaa e taumafa i le faamanatuga; ma soifua i lou olaga ia ogatusa ma tulafono ma poloaiga o le talalelei?
O e tauivi ina ia faamaoni i mea uma e te faia?
Pe o oe o se tagata e totogi atoa le sefuluai?
O e malamalama ma usiusitai i le Upu o le Poto?
O i ai ni agasala ogaoga i lou olaga o manaomia ona foiaina ma taitai perisitua o se vaega o lou salamo?
Pe e te manatu ua e agavaa e te ulu atu i le maota o le Alii ma auai i sauniga o le malumalu?
Autu a Tamaitai Talavou
O a’u o se afafine faapelepele a ni matua faalelagi e i ai se natura paia ma se taunuuga e faavavau.
I le avea ai ma se so’o o Iesu Keriso, ou te tauivi ina ia avea e faapei o Ia. Ou te saili atu ma faatino e tusa ma faaaliga faaletagata lava ia ma auauna atu i isi i Lona suafa paia.
O le a ou tu e avea ma se molimau a le Atua i taimi uma ma i mea uma ma i nofoaga uma.
A o ou tauivi e agavaa mo le faaeaga, ou te faatauaina le meaalofa o le salamo ma saili ia lelei atili i aso taitasi. I le faatuatua, o le a ou faamalosia ai lo’u aiga ma le auaiga, osia ma tausia feagaiga paia, ma maua ia sauniga ma faamanuiaga o le malumalu paia.
Autu o le Korama a le Perisitua Arona
O a’u o se atalii faapelepele o le Atua, ma ua i ai ia te Ia se galuega mo a’u e fai.
Faatasi ai ma lo’u loto atoa, manatu, mafaufau, ma le malosi atoa, o le a ou alofa i le Atua, tausi a’u feagaiga, ma faaaoga Lana perisitua e auauna atu ai i isi, e amata i lo’u lava aiga.
A o ou tauivi e auauna atu, faatino le faatuatua, salamo, ma faaleleia i aso taitasi, o le a ou agavaa ia maua faamanuiaga o le malumalu ma le olioli tumau o le talalelei.
O le a ou saunia ia avea ma se faifeautalai filiga, se tane faamaoni, ma se tamā alofa e ala i le avea ai ma se soo moni o Iesu Keriso.
O le a ou fesoasoani e saunia le lalolagi mo le toe afio mai o le Faaola e ala i le valaauliaina o tagata uma ia o mai ia Keriso ma maua faamanuiaga o Lana Togiola.
O Tulafono e Sefulu
Aua ne’i e fai mo oe ni atua ese i o’u luma.
Aua e te fai mo oe se tupua ua ta.
Aua e te taʼu fua le suafa o le Alii lou Atua.
Manatua le aso sapati, e te faapaiaina.
Ia e ava i lou tama ma lou tina.
Aua e te fasioti tagata.
Aua e te mulilua.
Aua e te gaoi.
Aua e te molimau pepelo.
Aua e te manao.
Tagai Esoto 20:3–17.