“Apendiks,” Blong Ol Yut Oli Kam Strong: Wan Gaed blong Stap Mekem Ol Joes (2022)
“Apendiks,” Blong Ol Yut Oli Kam Strong
Apendiks
Wan wei blong skelem progres blong yu long rod blong kavenan i blong tingting hevi long ol kwestin andanit ia. Oli ol kwestin we oli bin askem yu taem yu bin intaviu blong kasem wan tempol rekomen be no wet long wan intaviu. Mekem jekap blong yuwan long saed blong spirit. Stamba Toktok blong Ol Yang Woman mo Stamba Toktok blong Ol Kworom blong Aronik Prishud mo tu Ol Ten Komanmen i save kam ol tul blong help long evaluesen blong yuwan.
Ol kwestin blong tempol rekomen blong ol yut
?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?
?Yu yu gat wan testemoni abaot Atonmen blong Jisas Kraes mo wok blong Hem olsem Sevya mo Ridima?
?Yu yu gat wan testemoni long saed blong Kambak blong gospel blong Jisas Kraes?
?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki? ?Yu yu sastenem ol memba blong Fas Presidensi mo Kworom blong Olgeta Twelef Aposol olsem ol profet, sia, mo reveleta? ?Yu yu sastenem ol nara Jeneral Atoriti mo ol lokol lida blong Jos?
Lod i bin talem se evri samting, oli mas mekem “long klin fasin” long fored blong Hem (Doktrin mo Ol Kavenan 42:41). ?Yu yu traehad blong stap laef long klin fasin long ol tingting mo long ol aksen blong yu? ?Yu yu stap obei long loa blong jastiti?
?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?
?Yu yu stap sapotem o promotem eni tijing, praktis, o doktrin we i agensem hem ia blong Jos Ia blong Jisas Kraes blong Ol Lata-dei Sent?
?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?
?Yu yu stap traehad blong stap ones long evri samting we yu stap mekem?
?Yu yu stap pem ful taeting?
?Yu yu andastanem mo stap obei long Tok blong Waes?
?I gat eni series sin, o nogud fasin insaed long laef blong yu we yu nidim blong stretem wetem ol prishud atoriti olsem pat blong yu blong sakem sin?
?Yu yu ting se yu yu klin inaf blong go insaed long haos blong Lod mo tekempat long ol odinens blong tempol?
Stamba Toktok blong Ol Yang Woman
Mi mi wan gel blong papa mo mama long heven, we Tufala i lavem mi tumas, mo mi gat wan tabu fasin mo wan ples we i no save finis.
Olsem wan disaepol blong Jisas Kraes, mi traehad blong kam olsem Hem. Mi lukaot mo tekem aksen folem revelesen we mi kasem blong miwan, mo givhan long ol narawan long tabu nem blong Hem.
Bae mi stanap olsem wan witnes blong God long evri taem, mo long evri samting, mo long evri ples.
Taem mi stap traehad blong kwalifae blong kam olsem wan god, bae mi holemtaet strong presen ia we i fasin blong sakem sin, mo bae mi kam gud moa evri dei. Wetem fet, bae mi mekem hom mo famli blong mi i kam strong moa, bae mi mekem mo kipim ol tabu kavenan, mo kasem ol odinens mo ol blesing blong tabu tempol.
Stamba Toktok blong Aronik Prishud Kworom
Mi mi pikinini boe blong God we Hem i lavem, mo Hem i gat wan wok blong mi mekem.
Wetem ful hat, ful paoa blong tingting, ful maen mo ful paoa, bae Mi lavem God, kipim ol kavenan, mo yusum prishud blong Hem blong givim seves long ol narawan, statem long hom blong miwan.
Taem mi stap traehad blong givim seves, praktisim fet, sakem sin, mo kam antap evri dei, bae Mi kwalifae blong kasem ol blesing blong tempol mo blong kasem glad we i stap oltaem long gospel.
Bae Mi rere blong kam wan misinari we i wok had oltaem wetem strong tingting, stap wan fetful hasban, mo wan gudfala papa taem mi stap olsem wan tru disaepol blong Jisas Kraes.
Bae Mi help blong mekem wol i rere long taem we Sevya bae i kambak taem mi stap invaetem evriwan blong kam long Kraes mo kasem ol blesing blong Atonmen blong Hem.
Ol Ten Komanmen
Bambae yu i no mas mekem wosip long narafala god.
Bambae yu i no mas mekem pikja blong ol samting … blong wosip long hem.
Bambae yu i no mas yusum nem blong mi long fasin we yu i no ona long mi.
Oltaem bambae yu i mas tinghevi long sabat dei blong holem i tabu.
Oltaem bambae yu i mas ona long papa mo mama blong yu.
Bambae yu i no mas kilim man i ded.
Bambae yu we i mared i no mas go slip wetem narafala man o woman.
Bambae yu i no mas stil.
Bambae yu i no mas giaman blong mekem poen agens long narafala man.
Bambae yu i no mas letem tingting blong yu i stap long ol samting blong narafala man blong tekem i blong yu.
Luk long Eksodas 20:3–17