“Trutok bae i mekem yu yu fri,” Blong Ol Yut Oli Kam Strong: Wan Gaed blong Stap Mekem Ol Joes (2022)
“Trutok bae i mekem yu yu kam fri,” Blong Ol Yut Oli Kam Strong
Trutok bae i mekem yu yu kam fri
Jon 8:32
Papa blong yu long Heven i wan God blong trutok. Hem i save evri samting. Evri trutok i kam long Hem mo oli lidim i go long Hem. Yu soem se yu valiu trutok taem yu lukaotem blong stap lanem, laef wetem klin fasin mo stanap strong long wanem yu save se i tru—iven sapos yu stanap yuwan.
Ol trutok we i no save finis
Papa long Heven i wantem ol pikinini gel mo boe blong Hem blong oltaem stap lanem samting. Yu gat tugeta risen long saed blong bodi mo spirit blong lukaotem mo lavem blong stap lanem. Edukesen i no abaot winim mane nomo. Hem i pat blong gol blong yu we i no save finis blong kam moa olsem Papa long Heven.
Laef wetem klin fasin i minim se yu lavem trutok wetem ful hat blong yu—i moa long hem ia yu lavem kamfot blong yuwan, fasin blong plante man i save yu o winim tingting blong man. I minim blong stap mekem wanem we i stret nomo from se i stret.
Yu gat wan samting we i naes tumas blong serem. Gospel blong Jisas Kraes i gat ansa long ol kwestin blong laef. Hem i rod blong pis mo hapines. Maet yu no save evri samting be yu save inaf blong helpem ol narawan blong andastanem mo valiu tru, ol prinsipol we i no save finis.
Ol Invitesen
Oltaem stap lan. Lukaotem ol janis blong mekem maen mo ol skil blong yu i kam antap. Ol janis ia i save tekem tu stret edukesen long skul o vokesenol trening semmak olsem ol isi sos we yu trastem blong stap lan aot long hem. Mekem Lod i pat long ol efot blong yu mo bae Hem i gaedem yu. Taem yu lanem abaot wol we i stap raon long yu, lanem tu abaot Sevya we i krietem wol ia. Lanem abaot laef mo ol tijing blong Hem. Mekem seminari, institiut mo stadi blong yuwan blong gospel i pat blong laef blong yu blong stap lan.
Lavem trutok blong mekem se yu no wantem blong stil, giaman, o foldaon long sin long eni wei —long skul, long wok, onlaen, evri ples. Stap semmak fetful man blong folem Jisas Kraes long pablik mo long praevet.
Stap wan laet long ol narafala man, Letem ol toktok mo ol aksen blong yu i soem. wetem fet blong yu long Jisas Kraes Stap rere nao ia long ol fiuja janis blong serem naesfala gospel blong Hem olsem wan misinari mo truaot long laef. Mo stap rere blong talem long eni wan we i askem yu abaot hop mo hapines we yu filim.
Ol promes blesing
Edukesen i mekem se paoa blong yu blong mekem samting i kam antap blong givim seves long Lod. I givim paoa long yu blong blesem ol nara man speseli ol famli blong yu. Moa yu lanem samting, moa yu save help blong bildim kingdom blong God mo mekem wol blong gud.
Fasin blong stap ones i givim pis mo respek long yuwan. Taem ol toktok mo aksen blong yu i go stret wetem trutok, yu soem se oli save trastem yu—ol nara man mo Lod.
Taem yu stanap from ol tijing blong Jisas Kraes, Hem i stanap wetem yu. Ol narawan maet bae oli no agri wetem yu be fasin blong yu blong gat strong tingting mo fasin blong stap tru bae oli luksave. Maet o no ol nara man i folem eksampol blong yu, testemoni blong yu, fasin blong gat strong tingting mo fet long Kraes bae i kam gro.
Ol kwestin mo ol ansa
?hem i rong blong gat kwestin abaot Jos? ?Olsem wanem nao bae mi save faenem ol ansa? Blong gat ol kwestin i no wan saen blong no gat inaf save o fet we i no strong. From hem ia, stap askem ol kwestin i save help bildimap fet. Restoresen blong gospel i stat taem 14-yia Josef Smit i askem ol kwestin wetem fet. Lukaotem ol ansa long ol skripja, insaed long ol toktok blong ol profet, blong ol lida blong yu mo ol fetful papa mo mama, mo long God Hemwan. Sapos ol ansa oli no kam kwik, trastem se bae yu lanem tijing folem tijing. Gohed blong stap laef folem wanem yu save finis mo gohed blong lukaotem trutok.
? Olsem wanem mi save stanap from wanem i raet mo no mekem ol nara wan we oli gat defren bilif oli harem nogud? Stat blong mekem sua se ol toktok mo aksen blong yu i ol insperesen tru long lav blong God mo ol pikinini blong Hem. Blong stap serem gospel i no mas hapen long wan spirit blong raorao be wetem klin fasin, tingting we i stap daon mo fasin blong stap kaen. Yu save gat lav long ol nara man iven sapos yu no agri wetem ol tingting blong olgeta.
Luk long Matiu 5:14–16 (letem laet blong yu i saen); Jon 14:6 (Jisas i trutok); 1 Pita 3:15 (stap rere oltaem blong serem hop blong yu long Kraes); Doktrin mo Ol Kavenan 88:77–80 (ol samting we Lod i wantem yumi blong lanem); 93:36 (glori blong God i waes); 124:15 (fasin blong gat klin fasin i minim stap lavem wanem we i stret); 130:18 (save blong yumi bae yumi girap wetem long taem blong laef bakegen).
Ol kwestin blong tempol rekomen
?Yu yu stap traehad blong stap ones long evri samting we yu stap mekem?