“Wokbaot long laet blong God,” Blong Ol Yut Oli Kam Strong: Wan Gaed blong Stap Mekem Ol Joes (2022)
“Wokbaot long Laet blong God,” Blong Ol Yut Oli Kam Strong
Wokbaot long laet blong God
Galesia 5:25
Yu mekem ol moa gud joes taem yu save luk samting i klia. From hem ia laet i impoten tumas: laet i mekem i isi blong luk stret rod. Papa long Heven i givim yu akses long laet blong heven—presen blong tabu spirit—blong helpem yu lukluk klia wanem i gud mo nogud, stret mo no stret.
Ol trutok we i no save finis
Long baptaes yu mekem wan hapi kavenan rilesensip wetem Papa long Heven mo Jisas Kraes. Insaed long tempol, bae yu mekem sam moa kavenan we i save mekem rilesensip ia i strong. Evri wik long ol taem blong sakramen, yu mekem ol kavenan blong yu i kam niu bakegen. Yu soem se yu wiling blong kipim ol komanmen mo Lod i blesem yu wetem janis blong oltaem gat kampani blong tabu spirit. hem i wan long ol bigfala presen blong Hem long yu.
Stap mekem ol gudfala joes i mekem paoa blong yu blong mekem samting i kam moa gud blong filim spirit. I gat fulap gudfala mo helti samting long wol ia. Olsem bodi blong yu wanem yu kakae mo drink i afektem bodi blong yu, wanem yu ridim, wajem mo lesin long hem i save afektem maen mo spirit blong yu.
Ol Invitesen
Mekem taem blong Lod evri dei. Lanem abaot Hem Tingbaot Hem oltaem. Prea long Papa blong yu long Heven. Stadi ol tabu skripja mo ol toktok blong ol profet we oli stap laef. Mo afta traehad blong laef folem wanem yu lanem.
Lukaotem wanem we i leftemap tingting, givim insperesen, mo i invaetem spirit. Taem yu mekem ol joes abaot wanem blong wajem, ridim, lisin long o tekpat long hem, tingbaot hao nao bae oli mekem yu filim. Oli invaetem ol gudfala tingting? Stap long we long eni samting we i jikim ol tabu samting o we oli nogud. No tekpat long eni samting we bae i mekem jajmen blong yu i go daon o i no go wetem Spirit olsem vaelens, alkohol, mo ol drag we oli save spolem yu. Gat strong tingting blong ofem wan vidio o gem, wokbaot aot long wan muvi o wan danis, jenisim miusik blong yu, o tanem yu go we long eni samting we i no go stret wetem Spirit.
Yusum sosol media blong leftemap tingting. Sosol media i save kam wan paoaful tul blong komunikesen. Sapos yu yusum, lukluk nomo long laet, fet mo trutok. No komperem laef blong yu long wanem ol nara man i stap eksperiensem. Tingbaot se valiu blong yu i kam long fasin blong stap wan pikinini blong papa mo mama long heven. be i no long sosol media
Lukaotem ol tru mo gudfala eksperiens mo rilesensip we i no save finis. Lukaot gud se fasin blong yu blong yusum teknoloji mo sosol media bae i no tekem ples blong stap go luk mo spendem taem wetem famli mo fren blong yu. Sosol media mo ol nara teknoloji i save tekem plante taem blong yu be no givim bak plante valiu. Spel smol long wol blong onlaen mo konek wetem ol pipol long ril laef.
Ol promes blesing.
Yu save gat spirit wetem yu oltaem. Tabu Spirit bae i talem witnes long yu abaot Papa long Heven mo Jisas Kraes. Bambae Hem i kamfotem, soem, mo mekem yu tabu. Bambae Hem i helpem yu luksave ol trutok mo luk ol gud long wol ia.
Ol kwestin mo ol ansa
?Olsem wanem mi save save sapos mi stap filim Tabu Spirit? Stap lanem blong luksave Spirit i tekem taem, praktis mo fasin blong save wet long taem. Hem i toktok long defdefren man long ol defren wei. No ting nating long ol simpol samting—filing blong pis we yu kasem taem yu harem testemoni blong wan man o filing we no stret afta we yu mekem wan joes we i no stret. Lukaotem long skripja ol defren wei we Spirit i toktok , prea from, mo gohed blong lukaotem ol janis blong filim Spirit.
?Wanem i ponografi? ?From wanem mi no mas wajem? Ponografi i wan representesen, long ol pikja o toktok we oli mekem blong gat ol filing ia blong wantem seks. Ponografi i kam long plante wei, olsem ol vidio, pikja, buk mo miusik. I save kam long ol mesej tu o ol pikja we i sendem long medel blong ol fren Ponografi i spolem ol samting we oli tabu—bodi blong mit mo bun blong yumi mo ol filing blong seks—wetem nogat respek. Yu save kam pasem ponografi long ol taem we yu no minim. Be taem yu kam pasem ponografi we yu save o no save, tanem yu go we kwik taem. Maet yu wantem toktok tu wetem wan papa mo mama o ol nara adalt we yu trastem. Stap wajem ponografi hem i wan sin mo i spolem paoa blong save filim Spirit. I mekem paoa blong save kontrolem yuwan i go daon mo jenisim wei we yu lukluk yuwan mo ol narawan. Jisas Kraes i gat paoa blong helpem yu ova kam ponografi mo sakem sin. Lukluk long Hem; mo tanem yu go we aot long tudak Bisop blong yu i save helpem yu kasem paoa mo fogivnes tru long Sevya.
Luk long Amos 5:14 (lukaotem gud); Galesia 5:22–23 (frut blong Spirit); Moronae 7:18–19 (laet blong Kraes); Ol Doktrin mo Kavenan 6:23 (Lod i talem pis); 20:77, 79 (ol sakramen prea).
Ol kwestin blong tempol rekomen
Lod i bin talem se evri samting, oli mas mekem “long klin fasin” long fored blong Hem (Doktrin mo Ol Kavenan 42:41). ?Yu yu traehad blong stap laef long klin fasin long ol tingting mo long ol aksen blong yu? ?Yu yu stap obei long loa blong jastiti?
?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?