Tin nib riyul’ ban’en e dabi kalbus nigem

John 8:32

Chitamangiy nu Tharmiy e ir e Got ko tin nib riyul’ ban’en. Gubin ban’en ma mamang. Gubin ban’en nib riyul’ e ma yib rok’ ma kuma sul Ngak. U dakean e yul’yul’ rom ko tin nib riyul’ ban’en era m’ug ko rogon e tin ni gabe fil, rogon e par rom nib yul’yul’, nge ngongol rom ko tin nib mat’aw ban’en—ni biney e bay ni bochingiyal’ ma gabe thamiy ni yigo gur rom.

Tin nib riyul’ ni dariy bi’id manemus

Chitamangiy nu Tharmiy e ba’adag ni nga’i par fapi bpin nge pagal ni fak ni yaed be fil boech bugi ban’en. Bay fan ngom ko tin nib thothup ban’en nge tin nu fayleng ni ngam fil rogon. Fil sukul e gathi kemus ni bachan e ngeyag ngom e salpiy. Ya biney e fan ngom ni ngam boed e Chitamangiy nu Tharmiy.

Par u fithik’ e yul’yul’ e be yipfan ni gaba’adag e tin nib riyul’ ban’en u fithi’ gum’ircha’em—nib gel ko tin ba’aray ban’en nib moem ngom, fa gab chag riy. Be yipfan ni gabe rrin’ e tin nib fel’ ni bachan e tiney e bugi ban’en nib mat’aw.

Ma bay ban’en ni rib fel’ nrayag ni ngam pi’ boech ko gidii’. Fare gospel rok Yesus Kristus e bay urngin e fulweg riy ko urngin e duwer ko yafos. I ir e kanwo’en ko gapas nge falfalaen’. Bay ni danum nang gubin ban’en, machane ba gaman e llowaen’ rom ko rogon i ayuweg e gidii’ ni ngar nanged e tin nib riyul’, nge yalen nib manechubog.

Fapi mulwol

Gubin ngiyal’ ma nga um fil bugi ban’en. Mu gay rogon kanawo’en nrayag ni ngam ga’nag mag gelnag e tin ni gab salap riy. Kanawo’en e tiney e rayag ni woed rogon e fil ban’en u sukul fa reb e training fa reb kanawo’en e fil ban’en nib pagaen’um ko mornga’agen. Mu uneg Somoel ko tin ni gabe gay rogon, mara powi’iyem. “Nanap ni gara fil mornga’agen fare fayleng nib yilegnem, ma kagra fil mornga’agen fare Tathapeg, ni’ir e sunmiy e fayleng. Mu fil mornga’agen e yafos rok’ nge pin’en ni machib nag. Mu un ko seminary, institute, nge fil mornga’agen e gospel ni nge mang bang ko rogon ni gabe sukul.

Mu adag e tin nib yul’yul’ ban’en ni rib gel ni gara dubuy ni ngam mororo’, ban, salap, fa sbanban ni demtrug rogon—u sukul, tomurwel, online, fa gubin yang. Mpar ni gur reb gachalpen Yesus Kristus ni gab yul’yul’ ko gin nib sug e gidii’ riy fa kemus ni yigo gur rom.

Mang e tamilang ngak boech e gidii’. Mpag e thin rom nge ngongol rom ni nge dag e mich rom ngak Yesus Kristus. Fal’ag rogom e chiney ni ngeyag ni mu weliy mornga’agen fare gospel Rok’ ni rib fel’, ni woed ni ngam mang reb e tamachib ni n’umngin napan e yafos rom. Mag fal’ag rogom ni ngam fulweg e duwer ko gidii’ ko mornga’agen fare athap nge falfalaen’ ni gabe thamiy.

Fapi tawa’ath nikan micheg

Yean nga sukul era gelnag rogon e pigpig rom ngak Somoel. Ra pi’ gelngim ko tawa’ath nag e gidii’, nrib ga’ ni tabinaew rom. Urngin ban’en ni gara fil, e arram gelngin ngrayag ni ngam uned i toey tofen gul’ilngun Got ma aram ni gabe ayuweg e fayleng ni nge fel.

Yul’yul’ era pi’ e gapas nge fam ni yira tayfan. Napan nra ta’areb e thin rom ko rogon e ngongol rom ko tin nib riyul’ ban’en, ma aram nibe m’ug ni rayag ni nge pagaen’—e gidii’ ngom nge Somoel.

Napan ni gara ayuweg mornga’agen fapi machib rok’ Yesus Kristus, mara un nge ayuweg nem. Bay e gidii’ nra dabu’ e n’en ni gabe yoeg, machane yaedra guy rogon e athamgil rom nge yul’yul’ rom. Demutrug ko ra yib e gidii’ nge un ngom, machane mich rom, nge pagaen’ rom ngom, nge mich rom ngak Kristus era gel.

Fapi duwer nge fulweg riy

Ba kireb ni bay e pi duwer ni mornga’agen e Galasia? Uw rogon nrayag ni nggu pir’eg e fulweg ko fapi duwer? Fith e duwer e dar dag ni gab mo’owar fa dariy e mich rom. Ya, fith e duwer e rayag ni nge ayuwegnem me gel nag e mich rom. Fare Sulyarmen ko fare gospel e tabab ku Joseph Smith ni 14 e duw rok’ ko napan ni fith ba duwer u fithik’ e mich. Mu gay e fulweg riy ulan fapi chep nib thothup, nge thin rok’ fapi profet rok’ Got, nge fapi tiyugang’ nge galibithir rom nib yul’yul’, nge Got. Fa’anra dabin fulweg taban ko ngiyal’ nem, pagaen’um ngay ni gara fil fare bugithin ni bayilʼ nga dakean bayilʼ. Mu ul’ul’ i rrin’ e tin nikam mu’ i nag ban’en, mag ul’ul’ i gay mornga’agen e tin nib riyul’.

Uw rogon nrayag ni nggu sak’iy ngalang ko tin nib mat’aw ban’en ni dabgu kireb nag e gidii’ nib thil rogon e mich rok nggog? Mu tabab ko biney ko rogon e thin rom nge ngonglem nibe thogthog nag Got nifan ngak pifak. Weliy mornga’agen e gospel e susun ni dabin rrin’ u fithik’ e maeluqeg thin machane susun ni ngan rrin’ u fithik’ e tomilang, gumaen’, nge tu’ufeg. Rayag ni ngam dag e tu’ufeg ngak e gidii’ nib thil rogon e tafney romew ko mornga’agen ban’en.

Muguy ko Matthew 5:14–16 (mpag e tomilang rom nge m’ug rama’en); John 14:6 (Yesus e ir e riyul’); 1 Peter 3:15 (fal’ag rogon ni gubin ngiyal’ ni ngam weliy mornga’agen fare athap rom u dakean Kristus); Doctrine and Covenants 88:77–80 (pin’en ni ba’adag Somoel ni ngad filed mornga’agen); 93:36 (fla’ab rok’ Got e rib fel’); 124:15 (yul’yul’ e be yipfan ni ngan adag e tin nib mat’aw ban’en); 130:18 (ra un e llowaen’ rodaed ngodaed ko napan ni bayda fos gaed ko yam’).

Fapi duwer ko temple recommend

Gama gay rogon ngam par ni gab yul’yul’ ko gubin e pi n’en ni gama rrin’?