Yesus Kristus era ayuwegnem

Psalm 147:3

Yesis Kristus e ir gelngim. Ke mu’ i rrin’ e tin nib tu’uf ni ngan ngom ni ngeyag ni mu thapeg e falfalaen’ ko biney e yafos nge yafos ni dariy bi’id manemus. Fa’an gara mel’eg nge fare gospel Rok’, ma arram ni gabe mel’eg e falfalaen’ ni dariy bi’id manemus.

Bay bochingiyal’ ni gabe gay rogon ni ngam mel’eg e tin nib fel ban’en, machane bay ni rayag ni gara mal’fath. Ma bay ni gara rrin’ bugi ban’en ni gara athapeg ni danum rrin’. Ma buch e biney ko gidii’ ni gubin. Napan nira buch e biney, ma bay nib moem ni ngam thamiy nike mul lanin’um fa bay ni gabe tafney nag ni gur be’ ni dani fel’. Machane ba’aray e mulwol ni rib fel’—ma rib mangil, ma bay e athap riy! Bachan ni gadaed ba t’uf rok’ Got, ke pii’ Fak, ni Yesus Kristus, ni fek nga dakean fapi denen rom ni ngeyag ni mu kalngan’ mag ul’ul’ i mon’og i yean nga mm’on.

Tin nib riyul’ ni dariy bi’id manemus

Yesus Kristus era pi’ gelngim. Rayag ni nge ayuwegnem ngam thilyeg e tin ni gabe ‘ar’arnag, tafney rom, nge rogon ngonglem. Ma ngiyal’ nibe m’agfan’um, fa be yib e murus ngom, fa gabe mo’owar, mrayag ni nge pi’ e gapas ngom. Rayag ni nge ayuwegnem u ga’angin yang e yafos rom.

Kalngan’uy e gathi gechig ni bachan e denen; ya ireray kanawo’en nrayag ni nge ayuwgnem fare Tathapeg nge chuwegnem u fithik’ e denen. Ra ngan kalngan’ e be yipfan ni ngan thilyeg ngongley—ni ngan pi’ keru’uy ko denen min yaen ngak Got. Be yipfan ni ngan mon’og min thapeg e n’agfan ko denen. Tiney e ngongley ni ngan thilyeg e gathi ta’ab biyay mira buch; ya nge buch biyay nge biyay.

Fapi Mulwol

Kalngan’. Mu sap ngak Somoel ko athap ni ngam mon’og. Napan ni bay mu rrin’ ban’en nib kireb, mag yoeg ngak Got, ma, fa’anra btu’uf, mag yoeg ngak fare bisof rom nge cha’en nikam rrin’ e kireb ngak. Mu gay rogon ngam yal’uwnag nge mat’aw rogon.

Falfalaen’um ko fare tawa’ath ni ngam ngongliy nib mangil nge fel’ ko bin th’abi mangil. Demuturug ko fa’anra dani moem fa ra n’uw napan ko rogon ni gaba’adag, ri damu tal i gay rogon. Ul’ul ko gay rogon nge pagaen’ ngak Somoel. Ya Somoel era ayuwegnem ni gubin ngiyal’.

Fapi tawa’ath nikan micheg

Yesus Kristus e rayag ni nge n’agfan rom me gol nigem ko napan ni gara kalngaen’. Ra yoen’ loen e tagan rom ko gapas nge falfalaen’. Ma dabki lemnag fapi denen rom bi’id. Ma u dakean gelngin, mara gel e adag rom ni ngam fol ko fapi motochiyel Rok’.

Mara thiliyeg gumircha’em nge nge yofas rom. Buch’uw buch’uw iyan ngaram, gara mang woed boech Ir. U dakean e tha’ ko m’ag rom ngak era pi’ gelngim ni ngam thapeg fare gelngin.

Fapi duwer me fulweg riy

Uw rogon ni gura nang nike n’agfan Got e kireb rog? Got e ke michmicheg nira n’agfan e denen rok’ e en nira kalngan’. Napan ni gara thamiy fare gapas nike yib ko fare Thothup, mrayag ni ngam nang ni fare gelngin fare bayul rok’ fare Tathapeg e be buch ulan e yafos rom.

Mang e ngiyal’ riy nib tu’uf ni nggu uneg e ayuw ko bisof ko kalngan’ rog? Bisof rom e bay fapi kiy ko priesthood rok nge fapi tawa’ath nib thothup nrayag ni nge ayuwegnem ko kalngan’. Rayag ni ngam ning e ayuw ngak ni demuturug e ngiyal’ riy. Fa’anra kam oloboch ni rib gel, ni woed e kireb nag e motochiyel ko falan e dowef, mangil ni ngam mada’nag fare bisof rom. Dabi gechig nigem. I ir be’ nibe non ni pa’ Yesus Kristus mrayag ni nge ayuwegnem ko rogon e kalngan’ nib polo’ ni ngeyag ni gol nigem fare Tathapeg mag thapeg gelngin.

Gabe gay rogon ni nggu kalngan’, machane kug be ul’ul’ i rrin’ fare oloboch. Mang e bt’uf ni gggu rin’ e chiney? Rib n’uw napan nrayag ni ngan pag e ngongol ni dani fel’, ere dabi mulanin’um riy. Mu sap ngak Kristus. Murnguy rok’ e rib ga’ mab gel. Mu gay rogon bayay. Gathi i go’ gadaed rodaed ni gadaed be athamgil. Yesus Kristus e bay rom ni gubin ngiyal’.

Muguy ko Enos 1:6 (kumus ko tagan mrayag ni ngan chuweg nge chuw); Mosiah 4:3 (u dakean fare Kan ni Thothup, mrayag ni nge yoeg Got ngom e ngiyal’ nikan n’agfan rom); 26:30 (fare Tathapeg e ma n’agfan rodaed ni gubin ngiyal’ ko napan ni bay da kalngan’ gaed); Ether 12:27 (u dakean e murunguy rok’ fare Tathapeg e rayag ni ngan gel nag e tin nib mo’owar); Moroni 6:8 (pi’in nira kalngan’ e yira n’agfan roraed); 10:32 (polo’ nigem u dakean Kristus); Doctrine and Covenants 1:32 (Somoel era n’agfan e kireb rok’ en nira kalngan’); 58:42–43 (kalngan’uy e mu’un e pogfay nag nge pag e denen).

Pi duwer ko temple recommend

Bay e mich rom ni mornga’agen Got, ni Chitamangiy nib Manechubog; Faak, ni Yesus Kristus; nge fare Kan ni Thothup?

Bay e mich rom ni mornga’agen fare Bayul rok Kristus nge murwel Rok’ ni’ir fare Tabiyul rom ma Cha’an nima Tathapegdaed?