Mu tu’ufeg Got, nge buguliyoror rom

Matthew 22:37–40

Ke pi’ Got e motochiyel, ni ngeyag ni pi’ e ayuw ko me’eleg e tin nib mat’aw ban’en. Ke rrin’ e biney ni bachan e ri gab tu’uf rok’. Ma bin th’abi fel’ ko fan ni ngam fol ko fapi motochiyel rok’ Got e bachan e btu’uf rom. Tu’ufeg e ribay u lukngun fapi motochiyel rok’ Got.

Tin nib riyul’ ni dariy bi’id manemus

Gab t’uf rok’ Got. I Ir e Chitamangim. Tu’ufeg rok’ ni rib polo’ e rayag ni nge thogthog nag ngom ni ngam tu’ufeg. Napan nira par ni tu’ufeg rom ngak e Chitamangiy nu Tharmiy e ir e th’abi ga’fan ulan e yafos rom, mara moem ngom rogon i duugliy bugi ban’en.

Fare l’agruwi motochiyel nth’abi ga’ ko gubin e motochiyel, ni machib nag Yesus, e thingar mu tu’ufeg Got nge cha’an ni buguliyoror rom. Mini’ e buguliyoror rom? Gubin e gidii’! Gubin ban’en nikan machib nag nibay ulan fapi chep nib thothup maki yib rok’ fapi profet e bay rogon ko gali motochiyel ney.

Gubin e gidii’ ma walagem ni pumo’on nge bpin—ni biney, e mu’un, e gidii’ ngay nib thil rogon ngom fa dabun e n’en ni gabe yoeg. Chitamangiy nu Tharmiy e ba’adag pifak ni ngar tu’ufeg raed. Napan ni gara pigpig ngak reb i pifak, ma arram ni gabe pigpig Ngak.

Fapi Mulwol

Mu dag e tu’ufeg rom ngak Got u dakean fapi motochiyel rok’ ni gabe ayuweg. Woed e, tayfan fare rran ko Madnom nib thothup, nib mu’un e fal’ag rogoy ngay nifan fare fek e sakrament, ni aram rogon ni gabe dag ngak Got ni gaba’adag ni ngam tay reb e rran ulan fare wik nifan Ngak. Napan ni gara balaynag e abich rom mag pi’ e tithing rom nge maligach rom, ma arram ni gabe dag ngak Got ni baga’ fan ngom ko tin nu fayleng ban’en. Ma napan ni gara fanay fithingan Got nge Kristus u fithik’ e liyoer, ni damur fanay ko yabaq fa dariyfan nag, ma aram ni gabe dag Ngorow e magar ko gubin ban’en nikar rrin’ew nifan ngom.

Mu rrin’ ngak e gidii’ ni yaed e bitir rok Got. I gur reb e gachalpen Yesus Kristus, e rayag ni ngam dag ko gidii’ ni demutrug e gin nikar bad riy nge tiliw roraed rogon e tu’ufeg, tayfan, mag uneg raed—nrib ga’ ni ngan uneg e pi’in nikan rrin’ e kireb ngoraed ko thin fa ngongol. Mu noen ngak e pi’in ni yaed be thamiy ni yigo yaed roraed, fa yaed palog nga orel, fa dariy be’ nibe pi’ e ayuw ngoraed. Mu ayuwegraed ngar thamiyed e Tu’ufeg rok Chitimangiy nu Tharmiy.

Mu tin’um ngay ni thin rom e be dag e tu’ufeg rom ngak Got nge ngak e gidii’—demturug ko gamew be non be’ fa gamew be non be’ u online. Moeg e thin nib mangil—gathi tin nibe pining e cham, kiribaen’, puwan’, fa thin ni mak’rang. Thin rom e bagel gelngin bugwan. Mpag e thin rom nib gel bugwan nifan e tin nib fel’ ban’en.

Tu’ufeg urngin pifak Got e ma tabab ulan e tabinaew. Mu rrin’ e birom e muruwel ni ngam tay ni tabinaew rom e bang ni gubin e gidii’ riy mrayag ni nge thamiy fare tu’ufeg rok’ fare Tathapeg.

Fapi tawa’ath nikam micheg

Tha’ rom ngak Got era gel ko napan ni gara dag ni gaba’adag ni ngam fol ko fapi motochiyel rok’ mag ngongliy fapi m’ag Ngak.

Tha’ rom ngak e gidii’ era gel ko napan ni gara dag ni gaba’adag ni ngam pigpig ni woed rogon ni rrin’ Kristus. Gara pir’eg e falfalaen’ ni gabe ayuweg fare fayleng ni sug ko tu’ufeg.

Fapi duwer nge fulweg riy

Uw rogon ni rayog ni nggu thamiy e tu’ufeg rok’ Got? Tu’ufeg rok’ e Chitamangiy nu Tharmiy e gubin ngiyal’ ma bay? Mu non ngak u dakean e meybil. Moeg ngak e tin ni gabe thamiy, mag motoyil ko pin’en ni bayi thogthog nag ngom. Mu bi’eg mornga’agen e thin rok’ nibay ulan fapi chep nib thothup. Mu lemnag urngin ban’en nike m’ugliy nifan ngom. Mpar ko yuyangi n’en fa mu un ko activities ko gin nibay fare Kan ni Thothup rok’ riy.

Ba’adag Somoel ni nggu tu’ufeg e gidii’ ni gubin, nib mu’un e pi’in nibe rrin’ e kireb ngog? Somoel e ba’adag ni ngam tu’ufeg e to’ogor rom mag meybil nifan ngoraed. Machane, biney e dar yipfan ni ngam par ko ginem nibe karang ngom e amith u gum’ircha’ey, fa amith ko dogur, fa be kireb nag e thothup rom. Mu ngongliy rogon ni ngeyag ni mu ayuwegnem. Fa’anra yibe gafgow nigem fa yibe rrin’ e kireb ngom—fa gamanang be’ nibe buch e biney rok’—mu non ngak reb e il’aal nib pagan’um ngak.

Wi’in fa uw rogon nrayag ni nggu non ngak be’ ni nge mang e fagar rog? Bin kanawo’en ntha’bi fel’ ni ngan rrin’ e biney e ngan rrin’ u dakean e tha’ ko tafagar nib mangil. Napan ni kagab bitir, mu ngongliy e tha’ rom ko tafafar ngak e gidii’ ni bo’or. Bay boech e yalen, ni fal’yangren e rayag ni nge tabab ko tafagar ulan e ulung ko activities. Bachan e biney e fan ngom ko tin nib thothup ngom mrayag ni nge ayuwegnem, biney ni yigo gur nge be’ ni nge fel’ e thin romew e susun ni dabi buch nge mada’ ko ngiyal’ nike il’aal e tafney rom—finra gaman 16 e duw rom e rayag e biney. Ning e ayuw ngak e galibithir rom nge tiygang’ ko galasia. Damu gur nag e tha’ ko tafagar ko bpin nge pumo’on nge mada’ ko ngiyal’ nikam il’aal boech. Mpar rok’ e pi’in nibe ayuwegnem ko michmicheg rom ngak Yesus Kristus.

Mang e ba tu’uf ni gura rrin’ ni fa’anra tabinaew rog e dariy e tu’uf riy? Fare Tathapeg e manang salpem, ma ri gab Tu’uf Rok’. Mu athamgil u fithik’ e gamaen’, mag ul’ul’ ngam fok ko fapi motochiyel rok’ Got, mag dag e wo’ nib fel’ ngak e tabinaew rom. Mu fal’eg e tha’ rom ngak fapi tabinaew nibay ko ward rom. Mag fal’eg rogom e chiney nifan e tabinaew u dakean fapi machib rok’ Yesus Kristus.

Muguy ko Isaiah 58:3–11 (fan e fast); 58:13–14 (fapi tawa’ath ko tayfan e Madnom); Malachi 3:8–10 (tawa’ath ko pi’ pilwon e tithing); Luke 6:27–28 (tu’ufeg e to’ogor rom); 10:25–37 (mini’ e buguliyoror rog); John 3:16–17 (ri gadaed btu’uf rok’ Got, ere pi’ Fak ni Migrag Rok’); 14:15 (gadaed ma ayuweg fapi motochiyel ni bachan e btu’uf Got rodaed); 1 John 4:19 (Btu’uf Got rodaed ni bachan e gadaed btu’uf rok’); Mosiah 2:17 (napan ni gadaedra pigpig ngak e gidii’ ma arram ni gadaed be pigpig ngak Got).

Fapi duwer ko temple recommend

Gama fol ko fapi machib ko fare Galasia rok Yesus Kristus nap’an ni yigogur rom nge nap’an ni gabay u fthik e gidii’ gidii’en e galasia fa chongin e tabinaew rom?

Gama gay rogon ngam tay ni fare Madnom ab rran nib thothup, u tabinaew nge u galasia; un ko fapi mu’ulung; fal’eg rogoy min fek fare sacrament; ma par e yafos rom nibe fol ko fapi motochiyel ko gospel?

Gama pi’ e miligach rom ni ga’ngin yang?