Dogur rom e ba thothup

1 Korinths 6:18–20

Dogur rom e ir reb e tawa’ath ni rib fel’ nike yib rok’ e Chitamangim nu Tharmiy. Ke pi’ ngom ni ngey ayuwegnem ni ngam boed Ir. Thapeg e dogur era gelnag gelngim ko gay rogon i mel’eg e tin ni gaba’adag ban’en. Fare gospel rok’ Yesus Kristus e rayag ni nge ayuwegnem ngam guy rogon nibe guy Got e dogur rom. Ma biney e rayag ni nge thyilyeg rogon i mel’eg ko mit i mang e gara rrin’ nifan e dowef rom nge rogon ni gara ayuweg.

Tin nib riyul’ ni dariy bi’id manemus

Dogur rom e woed ya’an Got—ni’ir e th’abi fel, th’abi Ga’ ko gubin e universe. Fapi chep nib thothup e ma yeog ni dogur rodaed e woed e temple nib thothup, ni bang nrayag ni ngabi par fare Thothup ngay. Riyul’, ya dogur rom e dani polo’ e chiney. Machane pin’en ni gabe rrin’ ko dogur rom e rayag ni nge fal’ag rogom ni nge borran me polo’ e dogur rom, nra foskoyam’, min thothup nag.

Dogur rom e bay fare ya’el nge dowef riy. Ni bachan e biney, arram fan ni dowef nge tin nib thothup ko dowef e bay nib peth nga ta’abang. Fare Tathapeg e ke pi’ fare Thin ko Gonop ni nge fil ngodaed rogon ni ngad ayuweged e dogur rodaed—ni ngeyag ni ngan thapeg fapi tawa’ath ko dowef nge tawa’ath nib thothup.

Thamtham ko galong e rib ga’fan ko wo’en e tonom rok’ Got ni biney e fan ni nge pi’ e falfalaen’ ko mabgol nge tabinaew ni dariy bi’id manemus. Tiney e thamtham e dani denen—ya bugi ban’en ni rib thothup. Bachan e thamtham ko galong e rib gel gelngin ma rib thothup, arram fan nike pi’ Got ngom e motochiyel ko falan e dowef ni nge fal’ag rogom ni ngam fanay e tiney e thamtham ko tin nike duugliy rogon. Fare motochiyel ko falan e dowef e ke pi’ Got mat’won nrayag ni ngan rrin’ nikemus u thilin e pumo’on nge bpin nike mabgol. Oren e gidii’ u fayleng e yaed be fekyathin e biney ma yaed be makrang nag e motochiyel ku Got, machane Somoel e be pinningdaed ni ngad manged pi gachalpen ni ngad pired nib tolang rogon e par rodaed ko rogon e par u fayleng.

Fapi Mulwol

Mu tayfan—e dogur rom—nge dogur ko gidii’. Napan ni bay mu duugliy e maad ni ngam chungay, fa rogon piy lolligem, nge ya’am, mu fith ngom, “Gube tayfan e dogur rog ni’ir e reb e tawa’ath ni rib thothup nike yib rok’ Got?” Chitamangiy nu Tharmiy e ba’adag ni ngad fal’aged rogdaed ko rogon ya’adaed: biney e gathi kemus ko rogon ya’an e dowef rodaed machane woed ni gadaed e bitir rok’ ni gadaed btu’uf rok’ nibay fal’ngindaed nib thothup. Mu gay rogon ngam pag e style nira fek owchen e gidii’ ngom nga ya’an e dogur rom nib momaw’ ni ngan guyem ni gur reb e bitir rok’ Got nibay fal’ngim ko tin nga mm’on ban’en. Mu pagem ko tin nib be’ech ban’en nge fare tu’ufeg rok’ Got ni ir e nge powi’iyem ko tin ni ngam mel’eg ban’en. Mu ning e ayuw ko fanow ngak e galibthir rom.

Mu rrin’ e tin nira gelnag e dogur rom—ban’en ni dabi gathay fa kireb nag. Me falfalaen’um ko gubin ban’en nike pi’ Got ni rib fel’. Mag tay u wun’um ni alkuul, fa tamagow, fa koffee, fa tea, fa boech ban’en ni woed e drog e dani fel’ ko dogur rom nge ya’el rom. Ni kumus ko boech e falay, ni ke pi’ e togta’, e rayag nira kirebnag e dogur rom ni fa’anra dan nang rogon i fanay nib fel’ rogon.

Mu ayuweg mag tayfan e thamtham ko galong ni ban’en ni rib thothup. Tiney e gathi bugi ban’en nifan e makrang fa fan e gosgos. Fa’anra dawri mabgol be’ ni pumo’on fa bpin, ma dani fel’ ni ngan math nga downgin facha’, ya giney e bang nib thothup rok’ facha’ ni dabin math ngay ni kumus ni fa’anra bay e maad u dakean. Ko tin ni gabe mel’eg ni ngam rrin’, fa mu sap ngay, fa mu motoyil ngay, fa mu tafney nag, fa mu post nag mornga’agen, fa mu text nag, thingar mu gay rogon ni dabi pug lamen e thamtham ko galong ngom fa ngak be’. Biney e mu’un e pornography ngay ni demuturug rogon. Fa’an gara pir’eg ni gin ni gabay riy fa gosgos ni gabe un ngay e bay e tiney e lumel riy nib gel, ma thingar mu gay rogon ngam palog nigem riy. Gamanang mornga’agen e tiney e ban’en fa tiney e gosgos. Ma fa’anra danum nang, fare Thothup, fa galibthir rom, fa tiyugang’ rom e rayag ni nge ayuwegnem ngam nang. Mu dag ngak e Chitamangim nu Tharmiy ni gabe tayfan fare sunmiy e yafos nib thothup gelngin.

Fapi tawa’ath nikan micheg

Tayfam nge fan e gidii’ era gel nag gelngim ko ngiyal’ ni gabe gay rogon ni ngam tayfan e dogur rom ko rogon e pi ngongol rom, nge rogon ya’am, nge rogon e maad rom.

Somoel e ke michmicheg e tawa’ath ko llowaen’ ngak e pi’in nira fol ko fapi motochiyel ko Thin ko Gonop. Dogur nib fel’, ni dariy e ‘ar’ar riy ko kireb, e rayag ni nge mon’og nag rogon i thapeg e thogthog nibe yib u tharmiy, nra tomilang nag e man’aey, mrayag e pigpig ngak Somoel.

Fol ko motochiyel ko falan e dowef era pi’ Got mat’won nge gelngin nib thothup. Napan ni gara mabgol, ma biney e motochiyel era bing wo’en e tu’ufeg, pagaen’, nge ulung nga taba’abg ulan e mabgol rom. Fol ko biney e motochiyel ere bing wo’en ngom e mon’og ni dariy bi’id manemus mrayag ni ngam boed e Chitamangim nu Tharmiy. Ra mon’og e tafney rom ko napan ni gabe gay rogon ni ngam par ni woed fapi gachalpen Yesus Kristus

Fapi duwer nge fulweg riy

Mang e motochiyel rok’ Somoel ko rogon e maad, rogon ya’ay, tattoo, nge rogon e talbuch? Rogon e motochiyel rok’ Somoel e ba’adag ni ngam tayfan e dogur rom, ni biney e bay nibe yipfan ni ngam par ni gab thil ko rogon e fayleng. Mpag e tin nib riyul’ nge fare Thothup ni’ir e nge gagiyeg nigem ko tin ni ngam duugliy ban’en—nrib baga’ ni tin ni gara duugliy nra par ya’an ko dogur rom. Mu gonop nigem mag par ni gab yul’yul’, mag thapeg e ayuw ko fanow nibe yib ko galibthir rom nge fapi tiyugang’ rom.

Uw rogon nrayag ni nggu pag e lumel nge ngongol ni dani fel’? Chitamangiy nu Tharmiy nge Yesus Kristus e bay gelngin row nrayag ni ngar ayuwegew gur. Mu suguy e yafos rom ko tin nira fek e biney e gelngin ngalan e yafos rom, ni woed e meybil, be’eg fapi chep nib thothup, nge pigpig ngak e gidii’. Mu sap ngak Yesus Kristus nge fare gospel Rok’ ma gara pir’eg ni tin nib momaw’ ngom era mang gelngim nib gel. Mu ning e ayuw ngak e galibthir rom, fapi tiyugang’, nge counselor nib professional. Ngak e pi’in nibe gafgow ni bachan e ‘ar’ar ni dani fel’, bay e program ko Galasia nrayag ni nge pi’ e ayuw ko biney. Tiney e bugi tawa’ath ko fare Galasia rok’ fare Tathapeg nibe pi’ e ayuw ngom ni ngeyag ni mu gel mag fek gelngin e yafos rom. Ba n’uw napan e biney, ere bt’uf ni ngamu gamaen’ nigem, ma dabi mus lanin’um riy.

Gu ba’adag e gidii’ ni ta’ab rogon ngog. Uw rogon e tiney e motochiyel nifan nggog? Thamtham ni gaba’adag be’ ni woed rogon ngom e gathi denen. Fa’anra yib ngom e tiney e thamtham machane damu laek wo’en fa mu rrin’, ma arram ni gabe fol ko fare motochiyel nib thothup ko falan e dowef rok’ e Chitamangiy nu Tharmiy. I gur e fak Got nri gab tu’uf rok’ nge reb gachelpen Yesus Kristus. Tay u wun’un ni fare Tathapeg e manang urngin ban’en nibe buchbuch rom. U dakean fapi m’ag rom nibe chagliyem Ngak, e rayag ni ngam pir’eg gelngim ni ngam fol ko fapi motochiyel rok’ Got mag thapeg fapi tawa’ath nike micheg nag. Pagan’um Ngak nge fare gospel Rok’.

Ni gafgow nigeg, ma gube thamiy e tamra’. I gag e ku denen nib kireb? Fa’anra gur be’ nikan gafgow nag fa kan cham ngom ma dariy e denen rom nib kireb. Wenig damu thamiy e tagan fa tamra’. Ri gab tu’uf rok’ Somoel. Ba’adag ni nge ayuwegnem, gol nigem, me pi’ e gapas ngom. Fapi counselor nib professional, nge gidii’en e tabinaew rom, nge fapi tiyugang’ rom e rayag ni ngar pi’ed e ayuw ngom.

Muguy ko Genesis 1:27 (kan sunmiy daed ni woed ya’an Got); John 14:18 (fare Tathapeg e ke michmicheg nira pi’ e gapas); Filippi 4:7 (gapas rok’ Got e manang fan gubin ban’en); Doctrine and Covenants 88:15 (fare thothup nge fare dogur e irreram fare ya’el); 89 (tfare Thin ko Gonop); 121:45 (tafney nib mat’aw era gel nag e gonop rom).

Fapi duwer ko temple recommend

Somol e ga’ar gubin ban’en mra buch ni woed “nra buch u fthik e be’ech” u powchen (Doctrine nge Covenants 42:41). Gama gay rogon ni ngam par ni gab be’ech ko pi laem rom nge pi ngonglem? Gama fol ko fare falan e dowef?

Gabe nangfan ma gabe fol ko fare Thin ko Gonop?

Ayuweg e dogur rom e mu’un fare ayuweg e man’ay rom nge thamtham rom ngay.

Ba mangil ni ngan thamiy e kirbaen’ fa rus ko bochingiyal’. Fa’anra taw nga bangyal riy ni pi thamtham ney e ba momaw’ rogon ni ngan gol riy, ma bay ni biney e woed e pow riy nibe yib e m’ar ngom ko tafney nge thamtham ni biney e ba tu’uf ni ngam ning e ayuw riy ko galibthir rom, fa togta, fa counselor nib professional. Biney ni yira pi’ e ayuw riy e reb e tawa’ath nibe yib ko Chitamangim nu Tharmiy. Fa’anra be yib e leam ngom ni ngam l’em fa ngam thang e pogofan rom, ma thingar mu gay e ayuw ni kachingiyal’ nem. Mu tay u wun’un, ni gur be’ ni gab tu’uf, bay fam, ma gab tu’uf ko tin ni ngan rrin’. Demuturug rogon e thamtham fa gafgow ko tafney rom, mu gay e gapas nibe yib u dakean Yesus Kristus nge fare gospel Rok’.