Maen u kanawo’en e tomilang rok’ Got

Galatians 5:25

Moen ni ngam me’eleg e tin nib fel’ ni fa’anra rayag ni ngam guy ban’en nib tomilang rogon. Aram fan ni rib ga’fan e tomilang: tomilang era moem nag i guy e bin mat’aw e kanawo’. Chitamangiy nu Tharmiy e ke bing wo’en e tomilang ngom nu tharmiy—fare tawa’ath ko fare Kan ni Thothup—ni ngeyag ni ngam guy e bin nib mangil nge bin nib tagan, bin mat’aw nge bin nib kireb ban’en.

Tin nib riyul’ ni dariy bi’id manemus

Ko tawfe makam un ngareb e tha’ ko m’ag u thalinmew e Chitamangiy nu Tharmiy nge Yesus Kristus. Ulan e temple, ma kagra un ngam ngongliy boech e m’ag nrayag ni nge fel nag ere tha’ nem. Ma gubin e wik ko napan e sakrament, ma gabe be’ech nag e m’ag rom. Gabe dag ni gaba’adag ni ngam fol ko fapi motochiyel, ma Somoel era tawa’ath nigem ko fare Kan ni Thothup nira par rom ni gubin ngiyal’. I ir reb e tawa’ath Rok’ ni rib ga’ nifan ngom.

Me’eleg e tin nib mat’aw e rayag ni nge mon’og nag rogon i thamiy fare Thothup. Bo’or bugi ban’en nib mangil fa bfel’ ulan e fayleng. Ku woed rogon e tin ni gara k’ay fa mu n’um era kireb nag e dogur rom, ku aram rogon ni woed e pi n’en ni gabe be’eg mornga’gen, fa mu yaliy ya’an, fa mu motoyil ngay.

Fapi Mulwol

Fal’eg e ngiyal’ ni fan ngak Somoel ni gubin e rran. Filed kanawo’en. Gubin ngiyal’ min tay Somoel u wun’uy. Meybil ngak e Chitamangim nu Tharmiy. Fil mornga’agen fapi chep nib thothup nge fapi thin rok’ e profet nib fos. Mag gay rogon ngam rrin’ e pin’en nikam fil mronga’agen.

Mu gay e tin nra mon’og nigem, thogthog nigem, mara pining fare Thtohup. Napan ni bay mu me’eleg e n’en ni ngam yaliy ya’an, fa ngam be’eg, fa ngam motoyil ngay, fa ngam un ngay, mu tafney nag rogon ni gara thamiy ko biney. Biney e be pii’ e tafney nib fel’? Mu palog nigem ko tin nra mak’rang nag e tin nib thothup ban’en fa tin ni dani fel’ e ngongol. Damu un nga ban’en nira war nag e pufthin rom fa tafney rom ko fare Thothup, ni woed e cham, alkuul, nge drog ni dani fel’. Mu gel nigem ngam taleg e video fa gosgos, fa mu chuwegnem ko movie fa churu’, thilyeg e musik rom, fa mu pi’ kir’um ko tin nibe chuweg fare Thothup nibe par rom ni gubin ngiyal’.

Mu yus nag e social media ni nge pii’ e ayuw ko tin nib fel’ ban’en. Social media e reb kanawo’en ni rib gel ni rayag ni ngan non riy. Fa’anra ngam yus nag, ma thingar mu sap ko tomilang, mich, nge tin nib riyul’ ban’en. Dam mu ta’areb nag e yafos rom ko tin ni gabe guy ni be rrin’ boech e gidii’. Mu tay u wun’um ni thawingim e be yib ni gur reb e bitir ko galibithir nu tharmiy, ni gathi be yib ko social media.

Mu gay rogon ngam rrin’ e tin nib fel’ mab riyul’ mara fal’ag rogon e tha’ rom ni nge par nib n’uw napan. Tay u wun’um ni yus nag e technology nge media e dabi yoen’ loen e gidii’ ni woed e tabineaw nge pi tafagar. Social media nge boech e technology e rayag ni nge fek e taym rom ni ri bo’or machane dariy fel’ngin nira pi’ ngom. Mu tofan ko gubin ban’en u online, mag gay rogon ngam non ngak be’ ni reb e gidii’.

Fapi tawa’ath nikam micheg

Rogon ni nge par fare Kan ni Thothup rom ni gubin ngiyal’. Fare Kan ni Thothup era micheg nag ngom nib riyul’ e Chitamangiy nu Tharmiy nge Yesus Kristus. Ra pi’ e gapas ngom, para powi’iyem, me thothup nigem. Ra ayuwgnem ngam guy e tin nib riyul’ nge tin nib fel’ u fayleng.

Fapi duwer nge fulweg riy

Uw rogon ni gura nang ni gube thamiy fare Kan ni Thothup? Fil rogon i nang rogon fare Thothup e dabi pos me buch, biney e ba tu’uf ni ngan gay rogon, u fithik’ e gumaen’. Ma non ngak e gidii’ nib thilthil mab thilthil rogon. Damu fekyathin e tin niba achig ban’en—woed fare gapas ni gara thamiy ko napan ni bay mu rung’ag be’ ni weliy e mich rok fa fare thamtham ni yib ngom ni bachan e kam me’eleg ban’en ni dani fel’. Mu gay mornga’agen rogon nima non fare Thothup nib thilthil rogon, mag meybil ni mornga’agen, mag sap nag rogon nrayag ni ngam thamiy fare Thothup.

Mang e pornography? Mangfan nib tu’uf ni nggu palog nigeg ko biney? Pornography e ya’an bugi ban’en, ni woed e sassing fa thin, nikan ngongliy rogon ni nge karang lamen e galong. Bo’or mit e pornography, ni boech e mu’un e video ngay, sassing, babyor, fa musik. Ma krayag ni woed e mulwol nibe yib ko tafagar nibe thilthil u thiliy. Pornography e ma fek e tin nib thothup ban’en—ni woed e dogur rodaed nge thamtham rodaed ko galong—nge dariyfan nag. Bay ni rayag nikam guy e pornography machane danum lemnag ni ngam rrin’ e biney. Demturug rogon ko kam guy e pornography nikam tafney nag fa danga’, mu pi’ kir’um ngay. Ma krayag ni ngam non ngak reb e galibthir fa reb e pil’aal nib pagan’un ngak. Mel’eg ni ngam guy e pornography e ba denen mara kireb nag wo’en ni ngam thamiy fare Kan Thothup. Ra war nag gelngim nge gathay rogon ni gabe sap ngom nge ngak boech e gidii’. Yesus Kristus e bay gelngin nrayag ni nge ayuweg nem ngam siyeg e pornography mag kalngan’. Mu sap Ngak ko ayuw; mag pi’ kir’um ko lumor. Bisof rom e rayag ni nge ayuwegnem ngam thapeg gelngim nge n’agfan u dakean fare Tathapeg.

Muguy ko Amos 5:14 (gay e tin nib mangil ban’en); Galatians 5:22–23 (fapi murwel ko Thothup); Moroni 7:18–19 (tomilang rok’ Kristust); Doctrine and Covenants 6:23 (SomoelSomoel e ma pi’ e gapas); 20:77, 79 (meybil ko sakrament).

Fapi duwer ko temple recommend

Somol e ga’ar gubin ban’en mra buch ni woed “nra buch u fthik e be’ech” u powchen (Doctrine nge Covenants 42:41). Gama gay rogon ni ngam par ni gab be’ech ko pi laem rom nge pi ngonglem? Gama fol ko fare falan e dowef?

Gama gay rogon ngam tay ni fare Madnom ab rran nib thothup, u tabinaew nge u galasia; un ko fapi mu’ulung; fal’eg rogoy min fek fare sacrament; ma par e yafos rom nibe fol ko fapi motochiyel ko gospel?

N’en ni ngam rrin’ ko ngiyal’ nem

Napan ni gara nang nibe yib e lumel ngom ni ngam yus nag e media fa technology ko tin ni dani fel’ ngom—demtrug ko be palog nag fare Thothup fa gabe dariyfan nag e taym rom—mu gay rogon e tin ba’aray ban’en:

1. Mu tuurguy fithingan. Moeg ere n’en nibe yib e lumel riy ngon ni ngam rrin’. Rayag ni ngam moeg fithingan nib ga’ lamam—ni woed e, “Biney e sassing e ya’an e pornography,” “Biney e dani mat’aw,” fa “Biney e rayag ni nge amith nag e thamtham rok’ be’.”

2. Mu yoen’ nga luwan e n’en ni gabe rrin’ ngaloen reb e me’eleg nib fel’. Mpalog nigem riy; man ngareb e singgil fa man nga wean. Mu fek e tafney rom nge lemnag ban’en nib fel’.

3. Mu rrin’ ban’en ni gaba’adag fa ban’en ni gama tayfan—woed ni ngam non ngak be’ ko tabinaew rom, reb e tafagar nib mangil, fa be’eg e thin nib thothup ni ga’abadag. Ma bin th’abi ga’fan, e mu non ngak e Chitamangim nu Tharmiy, mag meybil ni ngan pi’ gelngim.

Fa’anra btu’uf boech e ayuw, muguy ko “Media Safety” ulan fare Gospel Library.