Kajjitōk Ko Emakijkij Kajjitōk Kaki

Ijin ilaļ rej jet iaan kajjitōk ko ekkā kajjitōk kaki kōn EnglishConnect. Kajjitōk ko emakijkij kajjitōk kaki n̄an rūkatak ro, rūkaki ro, im ritōl ro rej pād ilo englishconnect.org/help.

Ej ke aikuj wōr aō imminene in katakin bwe in maron̄ erom̧ juon rūkaki in EnglishConnect?

Ewi wāween aō katakin rūkatak ro eļan̄n̄e ijjab jeļā kajin eo aer?

Jemaron̄ ke kōnono kajin eo ad make ilo iien ekōnono eo an kurup?

Ewi wāween aō katakin juon kurup eo elōn̄ļo̧k jān juon kajin ie?

Ewi wāween aō jipan̄ rūkatak ro kamminene kajin Pālle aolep raan?

Ewi wāween aō ejaake juon kurup in EnglishConnect?

Ewi aitokan juon kweilo̧k an kurup in EnglishConnect eo?

Ewi emakijkij an kurup eo aō aikuj in kweilo̧k?

Imaron̄ ke katakin elōn̄ļo̧k jān juon katak ilo juon iien kweilo̧k an kurup?

Ewi wāween aō jeļā ewi wōt ļābōļ in EnglishConnect eo juon rūkatak aikuj kobaļo̧k ie?

Ta in EnglishConnect 3?

Ewi wāween aō jipan̄ juon rūkatak eo ej kobaļo̧k ilo juon kurup eo me em̧ōj an kadede wōnm̧anļo̧k?

Ta eo eļan̄n̄e juon rūkatak ej joļo̧k juon iien kweilo̧k an kurup ak bōjrak an itok?

Ewi wāween aō jipan̄ rūkatak ro me rej ekkatak ilo juon wāween eo erum̧wij jān ro jet ilo kurup eo?

Ewi wāween aō jipan̄ rūkatak ro me rej ekkatak ilo juon wāween eo em̧ōkajļo̧k?

Ewi wāween aō jipan̄ rūkatak ro me eoktak aer maron̄ in ekōnono kajin Pālle?

Ta eo ij kōm̧m̧ane n̄e juon rūkatak ej kajjitōk kajjitōk ko kōn kūram̧a?

Ij aikuj ke kajim̧we ainikien aer ba naan eo?

Ewi wāween aō kadeļo̧n̄ im lale kurup in EnglishConnect eo aō?

Ewi wāween an rūkatak ro bōk peba in kam̧ool ko aer jān EnglishConnect?

Ej ke aikuj wōr aō imminene in katakin bwe in maron̄ erom̧ juon rūkaki in EnglishConnect?

Kwojjab aikuj bwe en wōr am̧ imminene in katakin n̄an erom̧ juon rūkaki in EnglishConnect. Bōlen kwojan̄in kar katakin kajin Pālle m̧okta im kwojjab jeļā ewi wāween am̧ jinoe. Ej em̧m̧an wōt. Katak ko an EnglishConnect rekar ejaaki ilo tiljek im kōļmenļo̧kjeņ ilo kōjerbale pedped in katakin kajin eo im pedped ko an jetōb n̄an jipan̄ eok bwe kwon tōprak. Kwojjab aikuj erom̧ juon eo etijem̧ļo̧k. Kwojjab aikuj in jeļā uwaak ko n̄an aolep kajjitōk. Eddo eo am̧ ej etale em̧m̧anļo̧k eo ilo kajin eo n̄an leļo̧k iien ko rem̧m̧an n̄an kamminene. Kwojjab aikuj in katakin kūram̧a ak meļeļe men otemjej ilo kajin Pālle. Ijjelo̧kin, pedped ioon wōt am̧ ejaake juon mejatoto ijo rukatak ro rej en̄jake bōklōkōt ko rem̧m̧an ilo kōnono kajin Pālle im ekkatak jān bōd ko aer.

Ewi wāween aō katakin rūkatak ro eļan̄n̄e ijjab jeļā kajin eo aer?

Katakin kajin Pālle kōjerbale kajin Pālle wōt ekkā an waļo̧k ipeļaakin laļin. Ilo m̧ool, menin emaron̄ juon kōjeraam̧m̧an kōnke ej kōļapļo̧k oran kajin Pālle eo me rūkatak ro rej ron̄ im kōjerbale. Keememej in kōjerbal naan in Pālle ko repidodo. Kōjerbale pija ko, kōkkaļļe jān pā ko, im m̧akūtkūt in ānbwin n̄an jipan̄ rūkatak ro meļeļe naan ko im jon̄ak ko. Kwomaron̄ kwaļo̧k juon pija, jin̄aik juon pija, ak arin pija eo. Kwomaron̄ kwaļo̧k n̄an rūkatak ro kein ekkatak ko em̧ōj aer ukook ilo EnglishConnect 1 for Learners ak EnglishConnect 2 for Learners, ak kwomaron̄ kōjerbale online dictionary eo. Menin enaaj barāinwōt katakin rūkatak ro wāween kōjerbali kein jipan̄ ko repojak n̄an kappukot uwaak ko. Kajjieon̄ jab kōjerbale kōmeļeļe ko raitok. Ijjelo̧kin, kwaļo̧k n̄an rūkatak ro ta eo n̄an kōm̧m̧ane ilo am̧ kōmeļeļe.

Keememej bwe komij ekkatak ippān doon. Aolep iien karuwaineneiki rūkatak ro n̄an oktakļo̧k n̄an Irooj kōn jipan̄. Āinwōt rūkaki ro aer, kwomaron̄ in erom̧ juon waanjon̄ak kōn tōmak im kijejeto. Kōnono kajin Pālle ippān rūkatak ro ej juon m̧akūtkūt in tōmak. Irooj enaaj kōjeraam̧m̧an eok im rūkatak ro ilo am̧ m̧akūtkūt ilo tōmak n̄an kōnono kajin Pālle.

Jemaron̄ ke kōnono kajin eo ad make ilo iien ekōnono eo an kurup?

Enaaj ļapļo̧k am̧ jipan̄ rūkatak ro n̄e kwoj pedped ioon am̧ kōnono kajin Pālle ilo aolepān iien ekōnono eo an kurup eo. Kwomaron̄ kōm̧m̧ane menin ilo am̧ kōm̧m̧ane juon waanjon̄ak. Kōm̧m̧ane jon̄an eo em̧m̧antata n̄an kōnono wōt kajin Pālle. Kōjerbale naan ko repidodo im jentōj ko rekadu. Kadikdik kōnono im en emakijkij āliji ennaan ko. Je naan ko raorōk im ennaan ko ioon boot eo. Kwomaron̄ kōjerbale juon pija, jin̄aik juon pija, ak arin pija eo. Kajjieon̄ jab kōjerbale kōmeļeļe ko raitok im ukōte aolep men ko kwoj ba. Eļan̄n̄e kwoj aikuj kōjerbal kajin eo am̧, kajjitōk mālim m̧okta im kōjerbale kajin eo am̧ jidik wōt n̄e emaron̄ innām bar ro̧o̧l im kajin Pālle. Rōjan̄ rūkatak ro n̄an kōnono kajin Pālle jon̄an wōt aer maron̄ im jab mijak in kōm̧m̧an bōd. Jipan̄ er en̄jake tōprak, im nōbar aolep kijejeto ko. Eļan̄n̄e rūkatak eo ej aikuj eļapļo̧k jipan̄, kwaļo̧k n̄an er bok in katakin ko an rūkatak ro, ijo remaron̄ in loe kein katak ko ilo kajin eo aer. Ilo am̧ mije wōt rūkatak ro n̄an kōm̧m̧ane, eban kanooj ļap am̧ kōjerbal kajin eo aer.

Ewi wāween aō katakin juon kurup elōn̄ļo̧k jān juon kajin ie?

Katakin juon kurup elōn̄ļo̧k jān juon kajin ie ej juon iien em̧m̧anm̧ōn n̄an rōjan̄ kōnono kajin Pālle kōnke kajin Pālle ej kajin eo ekkā kōjerbale ilo kurup eo. Āinwōt juon rūkaki, kōjerbale kajin Pālle version eo an bok in katakin eo an rūkatak eo. Jipan̄ rūkatak ro kōjerbale bok in katakin eo an rūkatak ro ilo kajin eo aer, eļan̄n̄e ewōr, innām remaron̄ jeraam̧m̧an jān ukook ko ie. Eļan̄n̄e emaron̄, likūti rūkatak ro ilo kurup ko reddik n̄an ekōnono kōn pedped an ekkatak ko ilo kajin eo aer, ak lukkuun lale bwe en ejjeļo̧k ej jenolo̧k im make iaan. Eļan̄n̄e ewōr wōt juon rikōnono an baj juon kajin ilo kurup eo, kōm̧m̧an bwe kurup eo en ekōnono kōn pedped an ekkatak ko ilo kajin Pālle eo epidodo bwe aolep ren koba ie.

Ewi wāween aō jipan̄ rūkatak ro kamminene kajin Pālle aolep raan?

N̄an katak kajin Pālle, rūkatak ro rej aikuj ejaake juon imminene in kamminene aolep iien. Rōjan̄ rūkatak ro n̄an ejaake imminene in n̄an kappukot wāween ko repidodo n̄an kōjerbale kajin Pālle ilo m̧akūtkūt ko aer aolep iien (lale “Daily Practice” jekjōn eo). N̄an waanjon̄ak, rūkatak ro remaron̄ kāālet n̄an alooje kaalwōjwōj ko ak ron̄jake al ilo kajin Pālle. Kwomaron̄ rōjan̄ rūkatak ro n̄an kōjerbale laajrak in meļeļe ko n̄an kōkm̧anm̧anļo̧k ekkatak aolep raan epād ilo tulikin “Personal Study Tracker” ilo kadkad in bok in katakin eo an rūkatak ro. Kōjerbal laajrak in n̄an im̧we rūkatak ro kappukot wāween ko rem̧m̧anļo̧k, im wōr tokjāer n̄an kamminene aolep iien.

Ilo kweilo̧k eo an kurup, karuwaineneik rūkatak ro n̄an katak im kamminene kajin Pālle aolep raan im lale ejet jerbal in kijejeto ko aer. Kwomaron̄ in kajjitōk ippān jejjo rūkatak n̄an kwaļo̧k kajjojo men ko remaron̄ kar kōm̧m̧ani n̄an kamminene eo aer aolep raan. Kwomaron̄ ļōmņak in ejaake juon wāween kweilo̧k ilo online, āinwōt kurup chat, n̄an rūkatak ro ilo kūrup eo. Ko̧o̧njeļ ippān ritōl ro am̧ n̄an pukot wāween ko rekkar n̄an jipan̄ kurup eo kobatok ippān doon ilo kajjojo wiik n̄an leto letak meļeļe an kurup eo ak wāween ko jet. Kwomaron̄ jipan̄ rūkatak ro ilo aer jerbal n̄an kōttōprak kōttōpar ko aer, ak keememej, ej aer make eddo n̄an ekkatak.

Ewi wāween aō ejaake juon kurup in EnglishConnect?

Ko̧o̧njeļ ippān ritōl ro an Kabun̄ in jān bukwon eo kwoj jokwe ie n̄an kōm̧m̧ani kāālet ko n̄an ejaake im kattōre kurup in EnglishConnect ko. Ļōmņak eo in bwe, ruo rūtto ro rej rūkaki em̧ōj jitōn̄ er n̄an kajjojo kurup. Ļōmņak kōn aikuj ko an rūkatak ro im jon̄an maron̄ eo an bukwōn eo kwoj jokwe ie ilo am̧ kōm̧m̧ani jokālet ko kōn jikin, jikejuuļ, im karōk eo.

Ewi aitokan juon kweilo̧k an kurup in EnglishConnect eo?

Katak ko an EnglishConnect remaron̄ in pād ilo dettan in 60 n̄an 90 minit. Ļoor awa ko rej elaajrak n̄an kajjojo m̧akūtkūt. Jab joļo̧k jabdewōt m̧akūtkūt, baj kōjerbal iien ko rekkar elmokwoti n̄an kweilo̧k eo an kurup eo im kōjerbal iien ko kar elmokoti n̄e ekkar.

Kakeememej: Ko̧o̧njeļ ippān ro rej lale būrookraam̧ eo im ļōmņake aikuj ko an rūkatak ro im jon̄an maron̄ eo an bukwōn eo kwoj jokwe ie ilo am̧ kōm̧m̧ani kāālet ko.

Ewi emakijkij in an kurup eo aō aikuj in kweilo̧k?

Ilo aolep iien, kurup ko rej kweilo̧k juon kōttan juon wiik. Eļan̄n̄e kōņaan, kurup ko remaron̄ kweilo̧k emakijkijļo̧k Bwe kweilo̧k ko an kurup ren em̧m̧an, rūkatak ro rej aikuj eļap iien kōtaan kwelo̧k ko n̄an kadedeļo̧k “Personal Study” m̧ōttan eo.

EnglishConnect 1 im 2 kajjojo ewōr 25 katak ie. Eļan̄n̄e kurup ko rej kweilo̧k juon kōttan ilo juon wiik, enaaj bōk jiljino allōn̄ n̄an kadedeļo̧k juon ļābōļ. Eļan̄n̄e kurup ko rej kweilo̧k ruo kōttan juon wiik, enaaj bōk jilu allōn̄. Eļan̄n̄e kokōņaan, kwomaron̄ kajimettani būrookraam̧ ko n̄an jekjōn ko reddikļo̧k, ak module ko. N̄an waanjon̄ak, kwomaron̄ kāālet n̄an jino juon kurup me enaaj kweilo̧k ium̧win wōt jilu allōn̄ ko ilo juon kōttan juon wiik n̄an kadedeļo̧k iunit 1 n̄an 3. Kōjerbal wāween in emaron̄ jipan̄ rūkatak ro dim wōt.

Kakeememej: N̄e kwoj jikejuuļi juon kurup in kweilo̧k eo ejjab jinoe kōn iunit 1, ļōmņak in jinoe katak eo an kūrup eo jikejuuļ kōn katak 1. Menin enaaj jipan̄ jineete rūkatak ro wāween kōjerbale bok in katakin eo. Ko̧o̧njeļ ippān ro rej lale būrookraam̧ eo im ļōmņake aikuj ko an rūkatak ro im jon̄an maron̄ eo an bukwōn eo kwoj jokwe ie ilo am̧ kōm̧m̧ani jokāālet ko.

Imaron̄ ke katakin elōn̄ļo̧k jān juon katak ilo juon iien kweilo̧k an kurup?

Eļan̄n̄e kokōņaan, kurup ko remaron̄ kōbare elōn̄ļo̧k jān juon katak ilo juon kurup in kweilo̧k. N̄an kweilo̧k ko an kurup ko bwe en em̧m̧an, rūkatak ro raikuj eļap iien m̧okta jān kweilo̧k eo an kurup n̄an kadedeļo̧k “Personal Study” jekjōn n̄an kajjojo katak.

Lale “How often should my group meet?” n̄an meļeļe ko reļļapļo̧k kōn jikejuuļ an katak im karōk eo.

Ewi wāween aō jeļā ewi wōt ļābōļ in EnglishConnect eo juon rūkatak aikuj kobaļo̧k ie?

EnglishConnect 1 ej aikuj maron̄ riit im jeje ilo kajin eo an armej eo im maron̄ in riit leta ko ilo kajin Pālle im naan ko repidodo ilo kajin Pālle. EnglishConnect 2 ej n̄an rikatak ro remaron̄ ba jentōj ko repidodo im uwaak n̄an kajjitōk ko repidodo ilo kajin Pālle. N̄an lale eļan̄n̄e juon rūkatak ej kobaļo̧k ilo EnglishConnect 1 ak EnglishConnect 2, kwomaron̄ in kōjerbale intōrpiu in etale eo ilo appendix B.

EnglishConnect 3 ej juon intermediate kooj eo ej jipan̄ rūkatak ro ejaake kapeell in jeļāļo̧kjeņ ilo kajin Pālle. N̄an kobaļo̧k ilo EnglishConnect 3, rūkatak ro rej aikuj kanne im bōk jiko̧o̧r eo ekkar ilo placement exam teej eo. Rūkatak ro remaron̄ in kanne ilo englishconnect.org/join.

Ta in EnglishConnect 3?

EnglishConnect ewōr jejjo ļābōļ ko ie n̄an jipan̄ ro rej bōk koņaer eddōkļo̧k. EnglishConnect 1 im 2 rej jipan̄ rūkatak ro ejaake kapāāl ko repidodo an kajin-Pālle. EnglishConnect 3 ej juon intermediate kooj eo ej jipan̄ rikatak ro ejaake kapāāl in jeļāļo̧kjeņ ilo kajin Pālle. Ej jipan̄ rikatak ro m̧aanjabpopo n̄an BYU–Pathway Worldwide. (Ekkatak eļapļo̧k kōn BYU–Pathway Worldwide ilo byupathway.org.)

EnglishConnect 3 ej juon online kooj eo edik wōņāān, eo im ejaiintok doon n̄an ekōnono ilo online ak ilo juon m̧ōnjar. EnglishConnect 3 ekitbuuj kein jipan̄ ekkatak ko ilo onine ekoba naan in kakobaba an kajjojo ilo ron̄jake, kōnono, riit, im jeje. Rūkatak ro remaron̄ wōnm̧aanļo̧k ilo kooj eo ilo karōk eo aer make. Rūkatak ro remaron̄ āliji EnglishConnect 3 elōn̄ kōttan ekkar n̄an tōprak eo rekōņaan n̄an kōttōpar ko aer. Kadedeļo̧k EnglishConnect 3 ej kōtļo̧k an rūkatak ro eļļāļo̧k jān teej eo ilo kajin Pālle n̄e rej kanne n̄an BYU–Pathway Worldwide.

N̄an pojak n̄an EnglishConnect 3, rūkatak ro rej aikuj kadedeļo̧k EnglishConnect 1 im 2—ekoba m̧akūtkūt ilo workbook eo, eļaptata m̧akūtkūt ko rejelet riit im jeje. Rōjan̄ rūkatak ro ilo EnglishConnect 2 n̄an kanne n̄an EnglishConnect 3 ilo englishconnect.org/join.

EnglishConnect 3 ej elletok in BYU–Pathway Worldwide ilo karōk eo an ritōl ro im mijenede ro rej jerbal an Kabun̄ in. Ritōl ro ewōr aer itok limo remaron̄ in jerbal ippān mānija ro an jikin jipan̄ ko an Kabun̄ in im Un̄n̄are Peid Make ilo eria eo n̄an kōpooje EnglishConnect 3 ilo jikin ko aer.

Ewi wāween aō jipan̄ juon rūkatak eo ej kobaļo̧k ilo juon kurup eo me em̧ōj an kadede jinoe?

Katak ko kar ejaak bwe rūkatak ro rekāāl ren maron̄ kobaļo̧k ilo juon kurup in EnglishConnect jabdewōt iien. Eļan̄n̄e rūkatak ro rekōņaan kobaļo̧k ālkin an kurup ko kar ijjino, karuwaineneik er, leļo̧k n̄an er EnglishConnect 1 for Learners ak EnglishConnect 2 for Learners (ak kwaļo̧k n̄an er ewi wāween aer tōpari bok in katakin ko ilo Gospel Library eo), im jipan̄ er bōk koņaer. Kwe ak rūkatak eo juon emaron̄ jipan̄ rūkatak ro rekāāl koba ippān kurup eo ilo aer kwaļo̧k n̄an er ewi wāween aer pojak n̄an katak eo tok juon. Barāinwōt, rūkatak ro remaron̄ kāālet n̄an āliji juon ļābōļ eļan̄n̄e rej aikuj eļapļo̧k kamminene.

Ta eo eļan̄n̄e juon rūkatak ej joļo̧k juon iien kweilo̧k an kurup ak bōjrak an itok?

Jet iien rūkatak ro ewōr aer apan̄ ko im ekōm̧m̧an an pen aer pād ilo kurup eo, im ekkā aer m̧akoko in bar ro̧o̧lļo̧k kōnke rejook ak mijak. Remaron̄ ļōmņak bwe em̧ōj aer jako jān kūlaaj eļap iien im rejjab maron̄ tōpar jon̄an eo rej aikuj tōpare ippān ro jet. Pukotļo̧k im karuwaineneik rūkatak ro ejako aer itok n̄an katak eo tok juon jekdo̧o̧n jete raan ko rekar jako. Leļo̧k jipan̄ im naan in rōjan̄. Kōmeļeļeik er bwe EnglishConnect ekar ejaak bwe rūkatak ro ren bar kobaļo̧k ie jabdewōt iien. Rūkatak ro remaron̄ bar jinoe ilo aer etal n̄an kurup eo im m̧aanjabpopo n̄an katak eo tok juon. Ļōmņak in karuwaineneik juon ak elōn̄ļo̧k membōr in kurup eo n̄an kepaake rūkatak eo ejako im kwaļo̧k naan in jipan̄.

Kakeememej: Jab kwaļo̧k meļeļe eo an juon armej ilo an ejjeļo̧k an ļeo ak lio mālim ilo jeje.

Ewi wāween aō jipan̄ rūkatak ro me rej ekkatak ilo juon wāween eo erum̧wij jān ro jet ilo kurup eo?

Jet rūkatak rej aikuj eļapļo̧k iien n̄an meļeļe im kōnono juon kajin. Rūkatak rein renaaj jeraam̧m̧an jān aer kadedeļo̧k “Personal Study” jekjōn eo m̧okta jān aer bōk koņaer ilo kajjojo kurup in ekōnono ko. Karuwaineneik er n̄an kamminene naan ko im jon̄ak in ennaan ko m̧okta jān an kurup eo kweilo̧k. Ilo iien katak eo, leiaiaki rūkatak rein ippān rūkatak ro jet ro remaron̄ leļo̧k rōjan̄ im jipan̄. Rōjan̄ aolep rūkatak n̄an kōm̧m̧an jon̄an eo remaron̄e im n̄an errā kōn bōd ko āinwōt rej m̧ōttan wōt jerbal in ekkatak eo. Kwomaron̄ bar kāālet n̄an etale im āliji m̧akūtkūt ko. Kakeememej aolep rūkatak ro n̄an kadedeļo̧k “Personal Study” jekjōn eo m̧okta ilo aer bōk koņaer ilo kurup in ekōnono eo tok juon me eaorōk n̄an eddōkļo̧k eo aer.

Ewi wāween aō jipan̄ rūkatak ro me rej ekkatak ilo juon wāween em̧ōkajļo̧k?

Ilo am̧ bōk koņaam̧ ippān rūkatak ro, kwomaron̄ kile bwe jet em̧m̧an aer meļeļe im rej maron̄ pidodo aer kadedeļo̧k m̧akūtkūt in kamminene ko. Ļōmņak in teeje rūkatak rein n̄an kam̧wilaļļo̧k aer ekkatak ilo aer kobaik eļapļo̧k meļeļe ko ak kōm̧m̧ane ejja m̧akūtkūt eo ilo juon jekjek eoktak. N̄an waanjon̄ak, n̄e rūkatak ro rej kamminene kōnono ippān juon armej, kajjitōk ippāer n̄an kamminene bwebwenato ko roktak āinwōt ioone juon m̧ōttaer eo ekāāl ak juon boss ekāāl. Rūkatak rein remaron̄ barāinwōt kapenļo̧k jeļā eo aer kōn kajin Pālle ilo aer jipan̄ rūkatak ro rej ekkatak ilo wāween eo erum̧wij. Aolep rūkatak ro remaron̄ jeraam̧m̧an jān aer katakin juon m̧ōttāer im jipan̄ ro jet kamminene naan ko im jon̄ak ko ilo kajin Pālle.

Ewi wāween aō jipan̄ rūkatak ro me eoktak aer kōnono kajin Pālle?

Ilo an lōn̄ rūkatak ro eoktak ļābōļ in maron̄ kōnono kajin Pālle eo aer ekkā an waļo̧k im ej juon iien em̧m̧an n̄an aer jipan̄ doon. Jipan̄ doon emaron̄ ejaake jem̧jerā im eddōkļo̧k. Aolep ewōr juon men ippāer n̄an leļo̧k. N̄an waanjon̄ak, jet rūkatak remaron̄ in jipan̄ ro jet bōk lōke kōnke rem̧ōņōņō in kōm̧m̧an bōd. Leiaiaki rūkatak ro ilo wāween ko roktak. Kwomaron̄ in leiaiaki rikatak ro ippān juon eo ej pād ilo ejja ļābōl eo n̄an jipan̄ er kakankanļo̧k maron̄ ko aer ippān doon. Ak kwomaron̄ leiaiaki rūkatak ro ippān juon eo eoktak ļābōļ eo an. Rūkatak ro ilo ļābōļ ko repād ilaļ renaaj jeraam̧m̧an jān naan in kakobaba im jipan̄ ko. Rūkatak ro eutiej ļābōļ ko aer renaaj jeraam̧m̧an jān aer katakin juon m̧ōttāer im kōmeļeļeiki ilo kajin Pālle. Keememej, bwe en wōr juon kurup eo eoktak maron̄ in kōnono ilo kajin Pālle ej āindein im emaron̄ erom̧ juon iien eo ekabwilōn̄lōn̄ n̄an rūkatak ro n̄an jeraam̧m̧an n̄an aer jipan̄ doon.

Ta eo ij kōm̧m̧ane n̄e juon rūkatak ej kajjitōk kajjitōk ko kōn kūram̧a̧?

Ijjelo̧kin leļo̧k kōmeļeļe ko raitok kōn kūram̧a ak joļo̧k eļap iien kōnono kōn kakien, kwaļo̧k n̄an rūkatak ro jon̄ak ko. Rūkatak ro renaaj kajjieon̄ jab kōm̧m̧an bōd ilo aer ļoore jon̄ak ko. Em̧m̧anļo̧k n̄an ekkatak ilo kamminene kajin eo ijjelo̧kin kōnono kōn kajin eo. Jabdewōt kōmeļeļe ko kōn kūram̧a rej aikuj in pidodo, alikkar, im wōr unier. Eļan̄n̄e kwoj katakin juon pedped, leļo̧k waanjon̄ak jentōj ko im karuwaineneik rikatak ro n̄an kamminene kōjerbal katak eo. Rūkatak ro rej jeraam̧m̧an eļap ilo aer ron̄jake im kamminene kajin Pālle.

Ij aikuj ke kajim̧we ainikien aer ba naan eo?

Jab joļo̧k eļap iien n̄an kajim̧we ainikien ba naan ko. Kakeememej rūkatak ro bwe meļeļe eļapļo̧k an aorōk jen ba naan ko ilo jejjetier. Rōjan̄ rūkatak ro n̄an kamminene ba ainikien naan ko ilo iien katak ko aer make bwe ren maron̄ kamminene ilo iien karōk eo aer. Likūt ilo ļōmņak bwe eļan̄n̄e rūkatak ro rej tarjān jon̄an aer inepata kōn ainikien aer ba naan ko, remaron̄ in bōjrak in kamminene ekōnono. Rōjan̄ rūkatak ro n̄an kōjerbal kein katak ko online ilo englishconnect.org/learner/resources.

Ewi wāween aō deļo̧n̄ im lale kurup in EnglishConnect eo aō?

Kōjerbal kein jerbal eo QuickReg (quickreg.englishconnect.org) n̄an deļo̧n̄ im lale kurup in EnglishConnect eo am̧. QuickReg ej juon kurup in kein jerbal ko letok jān Kabun̄ eo an Jisōs Kraist im Armej ro Rekwojarjar ilo Raan Ko Āliktata. Kwomaron̄ kōjerbal QuickReg n̄an:

• Ejaake juon kurup: Kāālet raan eo, iien eo, im jikin eo an kurup eo.

• Lale juon kurup: Lale meļeļe ko an ro rej bōk koņaer im kōkāāl meļeļe ko an kurup eo.

• Karuwaineneik armej n̄an bōk koņaer: Kurup eo am̧ enaaj ellaajrak ilo online ilo englishconnect.org/join. Kwomaron̄ in kwaļo̧ke juon liin̄ n̄an karuwaineneik armej ro n̄an kanne n̄an kurup eo am̧.

• Leto letak peba in kam̧ool ko: Ilo jem̧ļo̧kin kurup eo am̧, kwomaron̄ deļo̧n̄e im būriini peba in kam̧ool ko.

Ewi wāween an rūkatak ro bōk peba in kam̧ool ko aer jān EnglishConnect?

EnglishConnect 1 im 2: Ilo iien ejem̧ļo̧k an kurup eo, rūkatak ro remaron̄ in ebbōk aer peba in kam̧ool jen aer kar bōk koņaer. Ritōl ro, ritijōm̧ļo̧k ro, ak rūkaki ro remaron̄ in leto letak peba in kam̧ool ko. Jet laļ emaron̄ jab mālim aer leto letak peba in kam̧ool ko jen EnglishConnect. Jouj im etale peba ko remenin aikuj an kien ilo bukwōn eo m̧okta jān leļo̧k peba in kam̧ool ko (lale englishconnect.org/leader/approved-locations).

Kakeememej: N̄an tōpari im leto letak peba in kam̧ool ko, kurup eo am̧ ej aikuj in kanne etan ilo QuickReg tool ilo quickreg.englishconnect.org. (Lale “Ewi wāween aō deļo̧n̄ im lale kurup in EnglishConnect eo aō?” ilo jekjōn in an FAQ.)

EnglishConnect 3: Rūkatak ro remaron̄ bōk peba in kam̧ool ko aer dedeļo̧k aer bōk koņaer n̄e rej kadedeļo̧k ļābōļ ko remenin aikuj ilo kooj eo. Kadedeļo̧k EnglishConnect 3 ej kōtļo̧k an rūkatak ro eļļāļo̧k jān teej eo ilo kajin Pālle n̄e rej kanne n̄an BYU–Pathway Worldwide.