Kapitulo 8
Mga Panalangin sa Priesthood alang sa Tanan
Ang Dili Mahimong Bulagon nga Koneksyon sa Priesthood
Pinaagi ni Propeta Joseph Smith, ang priesthood sa Dios gipahiuli dinhi sa yuta sa kinatibuk-an niini. Ang priesthood mao ang mahangturon nga gahum ug awtoridad sa Dios diin Siya mopanalangin, motubos, ug mohimaya sa Iyang mga anak, sa pagpahinabo “sa pagka-imortal ug kinabuhing dayon sa tawo.”1
Ang takus nga anak nga mga lalaki sa Langitnong Amahan i-orden ngadto sa mga office sa priesthood ug i-assign ngadto sa piho nga mga katungdanan ug responsibilidad. Gihatagan sila sa katungod sa paglihok sa Iyang ngalan sa pagbantay sa Iyang mga anak ug sa pagtabang kanila nga makadawat sa mga ordinansa ug mohimo ug motahud sa mga pakigsaad. Ang tanang mga anak sa Langitnong Amahan managsama nga panalanginan samtang sila mosalig sa gahum sa priesthood.
Sa usa ka kinatibuk-ang komperensya, si Elder Dallin H. Oaks sa Korum sa Napulog Duha ka mga Apostoles mitudlo: “Samtang kita usahay mag-refer ngadto sa mga naghupot sa priesthood isip ‘mao ang priesthood,’ kinahanglang dili nato hikalimtan nga wala kini panag-iyaha o pormaha sa naghupot niini. Gihuptan kini pinaagi sa sagradong pagsalig nga gamiton alang sa kaayohan sa mga lalaki, mga babaye, ug sa mga bata usab.”2 Si Elder Oaks dayon mikutlo kang Elder John A. Widtsoe, kinsa miserbisyo usab isip sakop sa Korum sa Napulog Duha ka mga Apostoles: “Ang mga lalaki dili makaangkon og labaw kay sa mga babaye sa mga panalangin nga gikan sa pagkapari [priesthood] ug nag-uban sa iyang pagpanag-iya.”3
“Mga Mag-aambit sa Hingpit sa Espirituhanong mga Panalangin sa Priesthood”
Daghang mga Santos sa Ulahing mga Adlaw nga mga babaye misaksi sa mga panalangin sa priesthood sa ilang kinabuhi. Si Sister Elaine L. Jack, ikadose nga kinatibuk-ang presidente sa Relief Society, mipahayag sa mga pagbati sa ubang mga sister sa Relief Society. “Ako adunay lig-ong pagpamatuod sa gahum sa priesthood sa kinabuhi sa tanang miyembro sa Simbahan,” miingon siya. “Sa Doktrina ug mga Pakigsaad kita … gisultihan nga ang Melchizedek Priesthood naggunit sa ‘mga yawe sa tanan nga espirituhanon nga mga panalangin sa simbahan’ (D&P 107:18). Nasayud ako nga kini gahum ug awtoridad sa Dios dinhi sa yuta sa pagpanalangin sa atong kinabuhi ug pagtabang nga masumpay ang atong yutan-ong mga kasinatian ngadto sa kahangturan. Kon atong madawat ang mga panalangin sa priesthood, atong giangkon ang gahum ug grasya sa Dios.” Si Sister Jack mipadayon:
“Makahuluganon alang kanako nga ang mga babaye giorganisar ubos sa awtoridad sa priesthood. Among gisuportahan ang priesthood ug gisuportahan kami sa gahum niini. Ang mga sister sa Simbahan … mibahandi sa among oportunidad nga mahimong mag-aambit sa hingpit sa espirituhanong mga panalangin sa priesthood.
“Ang matag usa kanato matudloan ug mapanalanginan sa atong mahangturon nga pag-uswag pinaagi sa pagdawat niini nga mga panalangin. Ang mga ordinansa, pakigsaad, mga sealing, ug gasa sa Espiritu Santo mahinungdanon alang sa kahimayaan. Ingon man adunay daghang indibidwal nga mga panalangin sa priesthood. Ang mga panalangin sa Priesthood naghatag kanato og direksyon; nagbayaw sa atong mga panan-aw, kini nag-awhag ug nagdasig kanato; kini nagpahinumdom sa atong pasalig. Tanan kita mahimong mag-aambit niini nga espirituhanong mga panalangin.”4
Si Sister Sheri L. Dew, kinsa miserbisyo isip magtatambag sa kinatibuk-ang kapangulohan sa Relief Society, mipalanog niini nga mga pagtulun-an: “Mga Sister, ang uban maningkamot sa pag-agni kaninyo nga tungod kay kamo wala i-orden ngadto sa priesthood, kamo giilad. Sila sayop kaayo, ug sila wala makasabut sa ebanghelyo ni Jesukristo. Ang mga panalangin sa priesthood madawat sa tanang matarung nga mga lalaki ug mga babaye. Kitang tanan mahimong makadawat sa Espiritu Santo, makadawat og personal nga pagpadayag, ug makadawat sa endowment sulod sa templo, diin kita mogula nga ‘sinangkapan’ og gahum. Ang gahum sa priesthood moayo, manalipod, ug molaban sa tanang matarung batok sa mga gahum sa kangitngit. Labing mahinungdanon, ang kahingpitan sa priesthood nga nalakip diha sa pinakataas nga mga ordinansa sa balay sa Ginoo madawat lamang nga kauban ang lalaki ug babaye.”5
Mga Ordinansa, Pakigsaad, ug mga Panalangin
Dihang giorganisar ni Joseph Smith ang Relief Society sa Nauvoo, Illinois, sa tingpamulak niadtong 1842, ang mga miyembro niini mao ang mga babaye kinsa napanalanginan na sa pipila ka mga ordinansa sa priesthood ug mga pakigsaad. Nabunyagan na sila alang sa kapasayloan sa mga sala. Nakadawat na sila sa gasa sa Espiritu Santo, naghatag kanila sa katungod sa padayong pakig-uban sa Espiritu ug sa katakus nga magiyahan pinaagi sa personal nga pagpadayag. Nakaambit na sila sa sakrament agi og paghinumdom kang Jesukristo ug sa ilang mga pakigsaad. Nadawat na nila ang mga gasa sa Espiritu Santo. Ang pipila nakadawat na og patriyarkal nga mga panalangin, nagkat-on sa ilang tinagsa nga gasa ug mga potensyal ug sa ilang pagkasakop sa balay sa Israel. Ang Ginoo miayo na kanila, mihupay kanila, ug mitudlo kanila sumala sa ilang gikinahanglan, ilang hugot nga pagtuo, ug sa Iyang kabubut-on.
Elizabeth Ann Whitney
Si Sister Elizabeth Ann Whitney, kinsa mitambong sa pinakaunang miting sa Relief Society, nakakat-on mahitungod sa gipahiuli nga ebanghelyo 12 ka tuig nang milabay, niadtong 1830. “Sa diha nga akong nadungog ang Ebanghelyo sigon sa gisangyaw sa mga Elder,” sa ulahi miingon siya, “nahibalo ako nga tingog kini sa Maayong Tigbalantay.” Siya “nabunyagan dayon,” ug ang iyang bana, si Newel K. Whitney, nabunyagan pipila ka adlaw ang milabay.6 Sa paghinumdom niini nga kasinatian, misulti siya sa mga panalangin nga iyang nadawat pinaagi sa mga ordinansa sa priesthood sa pagbunyag ug pagkumpirma:
“Kon aduna may mga baruganan nga nakahatag kanako og kalig-on, ug nga pinaagi niini nakakat-on ako nga magkinabuhi sa tinuoray nga usa ka mapuslanong kinabuhi, ako makapanghinaut sa pagpaambit niini nga kamaya ug kalig-on ngadto sa uban; sa pagpahibalo kanila kon unsa ang ebanghelyo ngari kanako, sukad nga ako mihangop niini ug nagkat-on sa pagsunod sa mga balaod niini. Usa ka bag-o nga pagpadayag sa Espiritu matag adlaw, usa ka pagbukas sa mga misteryo nga wala makita kaniadto, lawom, wala mapasabut ug wala matugkad; usa ka tiunay nga pagtuo sa balaang gahum, sa walay kinutuban nga kamatuoran nga gikan sa Dios nga Amahan.”7
Mga Gasa sa Espiritu Santo
Niadtong Abril 28, 1842, si Joseph Smith namulong sa miting sa Female Relief Society sa Nauvoo. Ang usa ka bahin sa iyang pakigpulong gibase sa mga pagtulun-an ni Apostol Pablo sa 1 Mga Taga-Corinto 12–13 mahitungod sa mga gasa sa Espiritu. Si Joseph Smith mipasabut nga “kini nga mga timailhan, sama sa pag-ayo sa masakiton, pag-abug sa mga dautan ug uban pa kinahanglang mosunod ngadto sa tanan nga motuo.”8
Tungod kay ang mga Babaye nga Santos sa Ulahing Adlaw nakadawat man sa Espiritu Santo, makapangita sila ug mapanalanginan pinaagi sa espirituhanong mga gasa sama sa “gasa sa mga pinulongan, pagpanagna, pagpadayag, mga panan-awon, pagpang-ayo, pagpanghubad sa mga pinulongan, ug uban pa.”9 Sa tibuok kasaysayan sa Simbahan, ang mga Babaye nga Santos sa Ulahing Adlaw nakadawat og mga gasa sa Espiritu ug migamit niini sa pagpanalangin sa ilang mga pamilya ug sa uban.
Si Amanda Barnes Smith mitambong niadtong Abril 28, 1842, dihang gitudlo ni Joseph Smith sa Relief Society ang mahitungod sa mga gasa sa Espiritu. Nasayud siya sa kamatuoran sa iyang mga pagtulun-an, kay siya napanalanginan og gasa sa pagpadayag mga upat ka tuig na ang milabay dihang siya nagkinahanglan og tabang sa Ginoo sa pagluwas sa iyang anak.
Sa ulahing bahin sa Oktubre niadtong 1838, si Amanda ug ang iyang bana, si Warren, uban sa ilang mga anak ug ubang mga miyembro sa Simbahan, nagpadulong ngadto sa Far West, Missouri. Mihunong sila sa usa ka galingan aron mag-ayo sa ilang karwahe. Samtang didto sila, usa ka panon sa mangugubot misulong sa mga Santos sa Ulahing mga Adlaw kinsa nagtrabaho didto sa galingan, mipatay og 17 ka mga lalaki ug mga batang lalaki ug misamad og 15. Si Amanda, kinsa nakatago atol sa pag-atake, mibalik sa pagpangita kang Warren ug sa ilang anak nga si Sardius sagol sa mga patay. Lain pang anak nga lalaki, si Alma, dunay grabe nga samad. Nabungkag ang iyang bat-ang tungod sa pagpusil. Si Amanda sa ulahi miasoy kabahin sa personal nga pagpadayag nga iyang nadawat aron mamaayo ang iyang anak:
“[Didto] ako, sa tibuok panahon, nianang makahahadlok nga gabii, uban sa akong mga patay ug sa akong mga samaran, ug walay lain kondili ang Dios ra ang among magtatambal ug tabang.
“O akong Langitnong Amahan, misinggit ako, unsay akong buhaton? Imong nakita ang akong makalolooy nga batang samaran ug nasayud sa akong kawalay kasinatian. O Langitnong Amahan tudloi ako unsay buhaton!
“Ug ako gitudloan ingon nga may tingog nga namulong kanako.”
Si Amanda gisugo sa paghimo og usa ka lehiya, o solusyon nga panghugas, gikan sa mga abo aron ilimpyo sa samad. Dayon gitudloan siya sa paghimo og hampol gikan sa panapton ug dangog nga dahon nga ibutang sa samad. Sa pagkasunod adlaw nakakita siya og lana ug gibu-bu kini ngadto sa samad aron paghupay sa sakit sa samad ni Alma.
“‘Alma, anak,’ miingon ko, ‘ikaw ba mituo nga ang Ginoo mihimo sa imong bat-ang?’
“‘Oo, ma.’
“‘Nan, ang Ginoo makahimo og mga butang alang diha sa imong bat-ang, di ba mituo ka nga makahimo siya, Alma?’
“‘Sa imong hunahuna makahimo kaha ang Ginoo, ma?’ nangutana ang bata, sa ingon niana ka yano .
“‘Oo, anak,’ mitubag ako, ‘iya kanang gipakita kanako pinaagi sa panan-awon.’
“Dayon siya gitarung nako sa pagpayaob, ug miingon: ‘Karon higda lang nga ingon niana, ug ayaw paglihok, ug ang Ginoo mohimo kanimo og laing bat-ang.’
“Mao nga si Alma naghigda nga nagkulob sulod sa lima ka semana, hangtud nga hingpit siyang naayo—usa ka mapiko-piko nga gahing ugat ang mitubo puli sa nawala nga mga lutahan, … katingalahan alang sa mga doktor.
“Sa adlaw nga siya nakalakaw pag-usab didto ako sa gawas sa balay naghakot og binalding tubig, dihang nakadungog ko og hugyaw sa mga bata. Nagdagan pauli, sa kakulba, misulod ko, ug didto si Alma sa salog, nagsigi og sayaw, ug ang mga bata naninggit sa katingala ug kalipay.”10
Pinaagi sa espirituhanong gasa sa pagpadayag, ang Ginoo mitudlo kang Sister Smith unsaon sa pag-atiman ang iyang anak. Siya, sama ni Elizabeth Ann Whitney ug sa daghan pang uban, nakadawat og “kalipay ug kalig-on” ug “bag-o nga pagpadayag sa Espiritu”11 tungod sa iyang kamatinud-anon.
Mga Panalangin sa Templo
Usa sa mga katuyoan sa Ginoo sa pag-organisar sa Relief Society mao ang pag-andam sa Iyang anak nga mga babaye alang sa mas dagko pang panalangin sa priesthood nga anaa sa mga ordinansa ug mga pakigsaad sa templo. Ang unang mga sister sa Nauvoo nagpaabut sa pagkahuman sa templo uban ang tumang kahinam, kay sila nasayud, sigon sa gisaad ni Propeta Joseph Smith kang Mercy Fielding Thompson, nga ang endowment modala kanila “paggawas sa kangitngit ngadto sa hilabihang kahayag.”12
Pinaagi ni Propeta Joseph Smith, ang Ginoo mipadayag sa mosunod ngadto sa mga Santos sa Ulahing Adlaw sa Kirtland, Ohio: “Ako mohatag nganha kaninyo og sugo nga kamo kinahanglang motukod og usa ka balay, diin ang mao nga balay Ako molaraw aron sa pagtuga niadto kinsa Ako mipili uban sa gahum gikan sa kahitas-an.”13 Misaad siya nga mohatag sa matinud-anong mga Santos og “pinilo-pilo nga mga panalangin,”14 ug Siya mipahayag nga ang templo mamahimo nga “usa ka dapit sa pagpasalamat alang sa tanan nga mga santos, ug … usa ka dapit alang sa pagpanudlo niadtong tanan kinsa gitawag ngadto sa buluhaton sa pangalagad diha sa ilang tanang daghan nga mga balaan nga tawag ug mga katungdanan; aron sila mahimo nga hingpit diha sa pagsabut sa ilang pagpangalagad, sa teyoriya, sa baruganan, ug sa doktrina, sa tanan nga mga butang mahitungod sa gingharian sa Dios dinhi sa yuta.”15
Didto sa Nauvoo, ang Ginoo misugo na usab sa mga Santos sa pagtukod og templo, nag-ingon nga Siya mopahiuli sa “kahingpitan sa pagkapari [priesthood]” ug “mopadayag sa [Iyang] mga ordinansa” didto.16
Ang mga sister sa Relief Society mitabang sa matag usa sa pagpangandam alang niini nga mga ordinansa ug sa nag-uban niini nga mga pakigsaad. Mitabang sila sa pagtukod sa templo, nagkat-on gikan sa Propeta ug gikan sa usag usa sa mga miting sa Relief Society, manggiloy-ong miserbisyo sa usag usa, ug nagtinguha sa pagpakabuhi nga mas balaan.
Sa hapit na mahuman ang templo, 36 ka mga babaye ang gitawag sa pagserbisyo sa templo isip mga ordinance worker. Si Elizabeth Ann Whitney, usa sa nag-una nga mga ordinance worker, nahinumdom: “Akong gitugyan ang akong kaugalingon, akong panahon ug atensyon niana nga misyon. Mitrabaho ako matag adlaw sa Templo nga walay hunong hangtud sa pagsarado niini.”17
Sa mga ordinansa sa mas taas nga priesthood nga nadawat sa mga Santos didto sa Templo sa Nauvoo, “ang gahum sa pagkadiosnon [na] pakita.”18 Samtang gihuptan sa mga Santos ang ilang mga pakigsaad, kini nga gahum mipalig-on ug misuporta kanila lahus sa ilang mga pagsulay sa mga adlaw ug katuigan nga moabut (tan-awa sa kapitulo 3).
Joseph Fielding Smith
Sa Simbahan karon, ang matinud-anong mga babaye ug mga lalaki sa tibuok kalibutan padayong nagserbisyo sa templo ug nakakaplag og kalig-on sa mga panalangin nga madawat lamang pinaagi sa mga ordinansa sa templo. Sigon sa gipahayag ni Presidente Joseph Fielding Smith, ang ikanapulo nga Presidente sa Simbahan, “Anaa ra sulod sa pribilehiyo sa mga sister niini nga Simbahan ang pagdawat og kahimayaan sa gingharian sa Dios ug makadawat og awtoridad ug gahum isip mga rayna ug kapariang mga babaye.”19
Priesthood sa Panimalay
Ang Relief Society motabang sa mga sister sa paglig-on sa mga panimalay ug mga pamilya, sa ingon nagtabang sa pagtuman sa usa sa mahinungdanong mga katuyoan sa priesthood. “Ang awtoridad sa priesthood gipahiuli na,” miingon si Elder Russell M. Nelson sa Korum sa Napulog Duha ka mga Apostoles, “aron ang mga pamilya mabugkos sa kahangturan.”20 Si Elder Richard G. Scott, usab sa Korum sa Napulog Duha ka mga Apostoles, mitudlo: “Ang pamilya ug ang panimalay mao ang pundasyon sa matarung nga kinabuhi. Ang priesthood mao ang gahum ug ang liderato sa priesthood mao ang paagi nga gihatag sa Ginoo aron pagsuporta sa pamilya.”21 Ang Relief Society moabag niini nga buhat pinaagi sa pagtabang sa mga babaye ug sa ilang mga pamilya nga magsunod sa ebanghelyo sa paagi nga sila makadawat sa gisaad nga mga panalangin sa priesthood.
Bana ug Asawa
Si Elder Dallin H. Oaks sa Korum sa Napulog Duha ka mga Apostoles miingon: “Ang katapusan ug kinatas-ang pagpahayag kabahin sa pagkababaye ug pagkalalaki mao ang bag-o ug walay katapusang pakigsaad sa kaminyoon tali sa lalaki ug sa babaye. Kini lamang nga relasyon ang makaabut ngadto sa kahimayaan. Sumala sa gitudlo ni Apostol Pablo, ‘Wala ang lalaki kon wala ang babaye, wala usab ang babaye kon wala ang lalaki, diha sa Ginoo.’”22 Ang karaang mga kasulatan nagpamatuod niini sa mga asoy kabahin sa mga pakigsaad sa kaminyoon tali ni Abraham ug ni Sara, Isaac ug ni Rebecca, ug ni Jacob ug ni Raquel. Ang mga ordinansa sa pagbugkos nagbugkos sa bana ug asawa sa usag usa, sa ilang mga anak, ug sa ilang Amahan sa Langit. “Sa ingon,” mipadayon si Elder Oaks, “ang komon nga katuyoan … sa atong mga korum sa priesthood ug … sa atong mga Relief Society mao ang pagdala sa mga lalaki ug mga babaye ngadto sa sagradong kaminyoon ug mga relasyon sa pamilya nga naggiya padulong sa kinabuhing dayon, ‘ang mahinungdanon sa tanan nga mga gasa sa Dios.’”23
Kon ang bana ug asawa mapanalanginan og mga oportunidad nga mahimong mga ginikanan, ilang giambitan ang sagradong responsibilidad sa pagtabang sa ilang mga anak aron makasabut ug makadawat sa mga ordinansa ug mga pakigsaad sa priesthood.24 Ang una natong mga ginikanan, si Adan ug si Eva, mipakita og ehemplo sa usa ka nagkasinaligay ug nagkahiusa nga relasyon dihang gitudloan nila ang ilang mga anak. Si Elder Bruce R. McConkie (1915–85) sa Korum sa Napulog Duha ka mga Apostoles mitudlo:
“Dili lamang si Adan, ang may labut niining mga butanga. …
“Si Eva usa ka aktibo nga partisipante. Iyang nadungog ang tanang gisulti ni Adan. Namulong siya kabahin sa ‘atong mga kalapasan,’ kabahin ‘sa kalipay sa atong katubsanan,’ sa ‘binhi’ nga ilang mabatunan, ug sa ‘kinabuhing dayon’ nga dili moabut kon sila mag-inusara, apan kanunay nga gigahin alang sa magkauban nga lalaki ug babaye.
“Siya ug si Adan nag-ampo; silang duha napanalanginan sa pangalan sa Ginoo; sila mitudlo sa ilang mga anak; sila nakadawat og pagpadayag; ug ang Ginoo misugo nilang duha sa pagsimba ug pagserbiyso sa pangalan ni Jesukristo hangtud sa hangtud.”s25
Ang mga propeta ug mga apostoles sa Ulahing mga Adlaw miawhag sa mga bana ug mga asawa sa pagsunod niini nga sumbanan nganha sa ilang mga panimalay: “Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarung ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya. Ang unang mga kapangakohan sa mga inahan mao ang pag-alima sa ilang mga anak. Niining sagrado nga mga kapangakohan o responsibilidad, ang mga amahan ug mga inahan adunay katungdanan sa pagtabang sa usag usa ingon nga magkauban. Kakulangan, kamatayon, o laing mga kahimtang mahimong manginahanglan sa indibidwal nga pagsagop niini. Ang uban nga mga kapamilya kinahanglan nga motabang kon gikinahanglan.”26
Ang mga Santos sa Ulahing mga Adlaw sa tibuok kalibutan misunod niini nga tambag sa yano apan puno sa gahum nga mga paagi. Ang mga bana ug asawa mopundok sa ilang mga anak aron sa pag-ampo ug pagbasa sa mga kasulatan. Sa daghang mga panimalay, ang mga ginikanan moestablisar og usa ka espesyal nga dapit—tingali usa ka yano nga butanganan og libro—nga adto ibutang ang ilang mga kasulatan ug ubang mga kapanguhaan sa Simbahan. Magtudlo sila sa ebanghelyo pinaagi sa ilang mga pulong ug sa ilang mga ehemplo. Tabangan nila ang ilang mga anak nga maandam sa pagdawat sa mga panalangin sa templo, pagserbisyo og full-time nga misyon, pagtukod og kaugalingong panimalay, ug padayon nga magserbisyo sa Simbahan. Sama nila ni Adan ug ni Eva, ilang giambitan ang mga responsibilidad sa pagtudlo, pag-ampo, pagserbisyo, ug pagsimba sa Ginoo.
Sa pipila ka sitwasyon, ang bana o asawa mobati nga nag-inusara niini nga mga responsibilidad tungod kay ang ilang kaparis wala makahimo og mga pakigsaad o nahisalaag gikan sa mga pakigsaad nga gihimo. Bisan pa niini nga mga kahimtang, ang matinud-anong mga miyembro dili angay nga mobati nga nag-inusara. Napanalanginan sila ug nalig-on pinaagi sa mga ordinansa sa priesthood nga ilang nadawat ug sa mga pakigsaad nga ilang gihuptan. Makatawag usab sila og suporta gikan sa ubang mga kapamilya ug sa ubang mga Santos sa Ulahing mga Adlaw.
Single nga mga Sister ug ang Priesthood
Daghang mga Santos sa Ulahing mga Adlaw wala gayud maminyo. Ang uban mga single tungod sa pagkamatay sa kaparis, pagbiya, o diborsyo. Sama sa tanang miyembro sa Simbahan, kini nga mga miyembro mapanalanginan kon magpabilin silang matinud-anon sa ilang mga pakigsaad ug mohimo sa tanan sa pagpaninguha alang sa maayo nga pagpakabuhi sa usa ka mahangturon nga pamilya. Matagamtam nila ang mga panalangin, kalig-on, ug impluwensya sa priesthood diha sa ilang kinabuhi ug mga panimalay pinaagi sa mga ordinansa nga ilang nadawat ug sa pakigsaad nga ilang gihuptan.
Si Elder Dallin H. Oaks naghisgot sa kamatinud-anon sa iyang inahan, kinsa nabiyuda sa bata pa nga pangidaron. Tungod kay nabugkos siya sa iyang bana sulod sa templo, wala niya isipa ang iyang kaugalingon nga single; bisan pa, kinahanglan niyang alimahan ang tulo ka anak nga siya ra. Nahinumdom si Elder Oaks:
“Namatay ang akong papa sa pito pa ang akong edad. Ako ang kinamagulangan sa tulo ka gagmayng bata nga gipanlimbasugan nga buhion sa nabiyuda namong inahan. Sa dihang gi-orden ako nga deacon, miingon siya nga nalipay kaayo siya nga adunay naghupot sa priesthood diha sa panimalay. Apan si mama padayong nagtudlo sa pamilya, lakip ang pagtawag kon kinsa kanamo ang mag-ampo kon kami mangluhod na sa matag buntag. …
“Sa pagkamatay ni papa, ang akong mama ang nangulo sa among pamilya. Wala siyay office sa priesthood, apan isip naglahutay nga ginikanan sa iyang kaminyoon nahimo siya nga tigdumalang opisyal sa iyang pamilya. Sa samang higayon, kanunay ang iyang hingpit nga pagtahud sa awtoridad sa priesthood sa among bishop ug sa ubang mga lider. Nangulo siya sa iyang pamilya, apan sila nangulo sa Simbahan. …
“Ang matinud-anong biyuda nga inahan kinsa nagpadako kanamo wala malibug sa kamahangturon sa pamilya. Kanunay gayud gitahud niya ang gibarugan sa among namatay nga amahan. Gihimoan niya siya og dapit sa among panimalay. Naghisgut siya mahitungod sa mahangturong kalungtaran sa ilang kaminyoon sa templo. Kanunay siyang nagpahinumdom kanamo sa unsay gusto sa among amahan nga buhaton namo aron matinuod ang saad sa Manluluwas nga mahimo kaming usa ka pamilya hangtud sa hangtud.”27
Laing tawo naghisgot sa iyang inahan nga nangulo sa panimalay: “Samtang ako nangandam sa pagserbisyo og full-time nga misyon, ang akong papa mibiya sa among pamilya ug sa Simbahan. Ubos niini nga mga kahimtang, lisud kanako ang pagbiya sa balay sulod sa duha ka tuig, apan miadto ako. Ug samtang nagserbisyo ako sa Ginoo sa layo nga yuta, akong nahibaloan ang kalig-on sa akong mama didto sa panimalay. Iyang gikinahanglan ug gipasalamatan ang espesyal nga pagtagad nga iyang nadawat gikan sa mga lalaki nga naghupot sa priesthood—sa iyang amahan ug mga igsoong lalaki, sa iyang mga home teacher, ug sa ubang mga lalaki sa ward. Hinoon, ang pinakadako niya nga kusog naggikan sa Ginoo mismo. Dili siya kinahanglan nga maghulat nga bisitahan aron panalanginan sa priesthood ang iyang panimalay, ug kon mobiya na ang mga bisita, kadto nga mga panalangin wala mokuyog sa ilang pagbiya. Tungod kay siya matinud-anon man sa mga pakigsaad nga iyang gihimo sa mga tubig sa pagbunyag ug sa templo, kanunay nga anaa kaniya ang mga panalangin sa priesthood sa iyang kinabuhi. Ang Ginoo mihatag kaniya og inspirasyon ug kalig-on lapas sa kaugalingon niyang kapasidad, ug nagpadako siya og mga anak kinsa karon naghupot sa sama nga mga pakigsaad nga nakasuporta kaniya.”28
Kini nga mga babaye nakasabut nga nadawat nila ang dugang nga kalig-on ug tabang pinaagi sa mga pakigsaad nga ilang gihimo ug gihuptan.
Pagserbisyo diha sa Simbahan
Ang tanan kinsa nagserbisyo sa opisyal nga kapasidad sa Ang Simbahan ni Jesukristo sa mga Santos sa Ulahing mga Adlaw mihimo niini ubos sa pagdumala ug awtoridad niadtong nanaghupot sa mga yawe sa priesthood, sama sa mga bishop ug presidente sa stake. Sa Relief Society, kini nga sumbanan giestablisar atol sa pinakaunang miting sa Relief Society. Sumala sa gitudlo ni Propeta Joseph Smith, si Elder John Taylor sa Korum sa Napulog Duha ka mga Apostoles mipatong sa iyang mga kamot sa mga ulo nila ni Sister Emma Smith ug sa iyang mga magtatambag, si Sister Sarah M. Cleveland ug Elizabeth Ann Whitney, sa tinagsa. Siya mipanalangin kanila aron magiyahan sa ilang pagserbisyo. Sukad niadto, ang mga sister nga nakaserbisyo og mga calling sa Relief Society, sa uban pang tanan nga mga calling sa Simbahan, ug isip mga visiting teacher miserbisyo ubos sa awtoridad niadtong nanaghupot sa mga yawe sa priesthood.
Si Presidente Boyd K. Packer sa Korum sa Napulog Duha ka mga Apostoles namahayag:
“Ang Relief Society naglihok ubos sa pagdumala sa Melchizedek Priesthood, kay ang ‘ang tanan nga lain nga mga kagamhanan o mga buhatan diha sa simbahan mao ang mga sumpay niini nga pagkapari.’ Giorganisar kini ‘subay sa sumbanan sa priesthood.’ …
“Ang mga Kaigsoonan nahibalo nga sila nahisakop sa korum sa priesthood. Daghan kaayong mga sister, bisan pa, nagtuo nga ang Relief Society usa lamang ka klase nga pagatambungan. Ang susama nga pagbati nga nahisakop sa Relief Society kay sa pagtambong lamang og klase kinahanglan nga mapasiugdahan diha sa mga kasingkasing sa matag babaye.”29
Ang mga korum sa priesthood naorganisar sa mga lalaki nga usa ka panag-igsoonay sa paghatag og serbisyo, sa pagkat-on ug sa pagtuman sa ilang mga katungdanan, ug sa pagtuon sa mga doktrina sa ebanghelyo. Ang Relief Society nakapatuman niining sama nga mga katuyoan alang sa mga babaye sa Simbahan. Ang tanang babaye sa Simbahan sakop sa Relief Society, bisan og sila dunay laing mga responsibilidad nga naghimong lisud kanila sa pagtambong sa tanang miting sa Relief Society. Padayon sila nga gibantayan ug gitudloan pinaagi sa panag-igsoonay sa Relief Society.
Panaghiusa: “Kinahanglan Gayud nga Maghiusa ang Tanan nga Molihok”
Sa Ang Simbahan ni Jesukristo sa mga Santos sa Ulahing mga Adlaw, ang mga lalaki ug mga babaye kinahanglan nga maglig-on ug moabag sa usag usa ug magtinabangay diha sa panaghiusa. Ang Ginoo miingon, “Paghiusa; ug kon kamo dili magkahiusa kamo dili ako.” 30
Si Propeta Joseph Smith mitudlo, “Kinahanglan gayud nga maghiusa ang tanan nga molihok, o walay butang nga mahimo.”31 Ug mipakita siya og ehemplo sa pagtrabaho nga nakighiusa sa uban. Si Sister Eliza R. Snow nahinumdom ug gipangga kini nga ehemplo sa tibuok niyang kinabuhi. Gipakigbahin niya kini ngadto sa lokal nga mga lider sa Simbahan dihang ang Relief Society giestablisar og usab didto sa Utah. Gitudlo niya nga ang mga bishop kinahanglan nga “may sama nga relasyon” ngadto sa mga Relief Society sa ward sama sa gibuhat ni Joseph Smith sa Relief Society sa Nauvoo. Gitudlo usab niya nga “ang matag kapunongan … dili makapadayon kon walay pagtambag [sa bishop].”32
Dihang si Sister Bathsheba W. Smith miserbisyo isip ikaupat nga kinatibuk-ang presidente sa Relief Society, iyang nahinumduman ang mga pagtulun-an ug ehemplo ni Joseph Smith. Iyang gitudloan ang mga sister sa Relief Society nga makigtambayayong sa mga lider sa priesthood. Miingon siya: “Mapaubsanon kaming nagtinguha sa pagbuhat sa among mga calling nga gihatag sa Ginoo kanamo, ug aron mahimo kini, among gikinahanglan ang hugot nga pagtuo ug suporta sa Unang Kapangulohan sa Simbahan, sa mga Apostoles, sa mga presidente sa Stake ug mga Bishop, kinsa kanunay namong gisuportahan, ug kinsa among tinguha nga ikatambayayong.”33
Kini nga sumbanan milahutay hangtud sa mga dekada. Si Presidente Henry B. Eyring, magtatambag sa Unang Kapangulohan, miingon, “Usa ka talagsaon nga bahin sa panulundon sa Relief Society tataw diha sa pamaagi diin ang priesthood kanunay nga nagpakita og pagtahud ug midawat niini gikan sa Relief Society.”34
Dihang si Sister Barbara W. Winder nagsugod sa iyang pagserbisyo isip ikaonse nga kinatibuk-ang presidente sa Relief Society, si Presidente Gordon B. Hinckley, nga kaniadto nagserbisyo isip magtatambag sa Unang Kapangulohan, mihangyo kaniya sa paghiusa sa mga sister nga nagserbisyo sa Relief Society, Young Women, ug sa Primary ubos sa priesthood. Nahibaloan ni Sister Winder nga ang panaghiusa diay “dili lang kay basta ang mga sister magtinabangay, apan kita mga kasangga sa mga kaigsoonan sa priesthood. Managkauban kita sa buhat.”35
Miingon si Sister Winder nga wala madugay human sa iyang pagkatawag nga moserbisyo isip kinatibuk-ang presidente, si Elder Dallin H. Oaks mihangyo nga makigkita kaniya. Gihangyo siya sa pag-andam og pahayag alang sa Simbahan sa usa ka importante nga isyu, ug iyang gibati nga kinahanglan siyang makakuha og ideya gikan sa mga babaye nga lider sa Simbahan. Gipakita niya ang pagtahud ug pasalamat sa kahibalo ni Sister Winder, mga opinyon, ug inspirasyon pinaagi sa pagpangutana ug paggamit sa iyang tabang.
Gitudlo ni Sister Winder sa wala madugay nga ang mga lalaki ug mga babaye sa Simbahan nagkinahanglan sa usag usa diha sa buluhaton. “Akong nakat-unan nga kon dapiton man kamo og usa ka miting, ” mipasabut siya, “wala kamo dapita sa pag-adto ug moreklamo mahitungod sa inyong mga problema, apan gidapit kamo sa pag-adto dala ang mga solusyon. Dayon hisgutan ang mga ideya sa pagsusi unsa ang maayong buhaton. Ang priesthood nga mga kaigsoonan naglaum ug nagkinahanglan sa panglantaw sa mga babaye sa Simbahan. Kinahanglan nga andam ug moabag kita kanila.”36
Kini nga kahiusahan sa katuyoan makita diha sa mga miting sa council sa Simbahan. Samtang ang mga lalaki ug babaye niini nga mga council maminaw sa usag usa, magtinguha sa giya sa Espiritu, ug maghiusa, makadawat sila og inspirasyon aron mahibalo unsaon sa pagkab-ot ang mga panginahanglan sa mga indibidwal ug mga pamilya. Ang Ginoo miingon, “Diin duha o tulo nagpundok nga naghiusa diha sa akong ngalan, nga naghisgot sa usa ka butang, tan-awa, Ako anaa diha sa taliwala kanila.”37
Si Presidente Thomas S. Monson, ang ikadise-sais nga Presidente sa Simbahan, mipakigbahin og usa ka ehemplo kon unsay mahitabo kon ang mga sister sa Relief Society ug ang priesthood nga mga igsoon magtinabangay sa pagserbisyo sa Ginoo:
“Niadtong Agosto 24, [1992,] ang Bagyo nga Andrew mikuso-kuso didto sa baybay sa Florida sa habagatan sa Miami. Ang gikusgon sa hangin molabaw pa sa duha ka gatus ka milya matag oras. … Otsenta y siyete ka libo nga mga balay ang nangaguba, nagbiya og 150,000 nga wala nay kapuy-an. …
“Ang lokal nga mga lider sa priesthood ug sa Relief Society dali kaayong nakaorganisar aron sa pagtabang sa mga nasamdan ug nangaguba ug sa pagtabang sa pagpanglimpyo. Tulo ka dagkong hut-ong sa mga boluntaryo nga mga miyembro, mikabat og kapin sa lima ka libo, mitabang sa naapektuhan nga mga residente, mitabang og ayo sa tulo ka libo nga mga balay, usa ka sinagoga sa Judeo, usa ka simbahan sa Pentecostal, ug duha ka eskwelahan.”38
“Nakigtambayayong sa mga Priesthood”: Dinasig nga mga Tambag gikan sa mga Propeta sa Ulahing Adlaw
Ang mga propeta nga Santos sa Ulahing Adlaw namulong kabahin sa mga panalangin nga moabut sa Simbahan ug sa mga pamilya kon ang matinud-anong mga priesthood nga mga igsoon ug matinud-anong mga sister sa Relief Society magtinabangay.
Si Presidente Spencer W. Kimball, ikadose nga Presidente sa Simbahan, miingon, “Adunay gahum niini nga organisasyon [sa Relief Society] nga wala pa magamit sa hingpit sa paglig-on sa mga panimalay sa Zion ug pagtukod sa Gingharian sa Dios—gani kini dili magamit sa hingpit hangtud ang mga sister ug ang priesthood makakuha sa panan-awon sa Relief Society.”39
Gi-summarize ni Presidente Joseph Fielding Smith ang relasyon tali sa Relief Society ug sa mga korum sa priesthood:
“Sila [ang mga sister] dunay kaugalingon nga mga miting, sama sa Relief Society, diin sila gihatagan og gahum ug awtoridad sa paghimo og daghang dagkong mga butang. …
“Ang Ginoo pinaagi sa iyang kaalam mitawag sa mga sister nga mahimong mga abag sa Priesthood. Tungod sa ilang maloloy-ong pagbati, kalumo sa kasingkasing, ug kamabination, ang Ginoo nagtan-aw kanila ug mihatag kanila sa mga katungdanan ug responsibilidad nga mahimong mga tigpangalagad sa mga nanginahanglan ug sa masakiton. Gitudlo niya ang dalan nga angay nilang subayon, ug siya mihatag kanila niining talagsaon nga organisasyon diin sila adunay awtoridad sa pagserbisyo ubos sa pagdumala sa mga bishop sa ward ug sa pakig-alayon sa mga bishop sa ward, nga maglantaw sa espirituhanon ug temporal nga kinahanglanon sa atong mga tawo.”40
Dihang si Presidente Gordon B. Hinckley nagserbisyo isip ikakinse nga Presidente sa Simbahan, gipakigbahin niya ang mosunod ngadto sa mga sister sa Relief Society:
“Moingon ako kaninyo mga sister nga dili ikaduhang dapit ang inyong gihuptan diha sa plano sa Amahan alang sa mahangturong kalipay ug kaayohan sa Iyang mga anak. Kamo mga mahinungdanon gayud nga bahin niana nga plano.
“Kon wala kamo ang plano dili makalihok. Kon wala kamo ang tibuok programa mapakyas. …
“Matag usa kaninyo anak nga babaye sa Dios, gitugahan sa balaang katungod sa pagkatawo. Wala kamo manginahanglan og depensa niana nga baruganan. …
“… Anaa ang kalig-on ug dakong kapasidad sa mga babaye niini nga Simbahan. Anaa ang pagpangulo ug direksyon, piho nga diwa sa pagka-independente, ug gani ang dakong katagbawan nga mahimong bahin niini, sa gingharian sa Ginoo, ug sa pakigtambayayong sa priesthood aron magpadayon kini.”41
Si Amanda nag-ampo alang sa tabang sa pag-atiman sa iyang anak.
Templo sa Nauvoo Illinois
Mga ordinance worker sa Templo sa hagdanan sa Templo sa Salt Lake, 1917
Si Adan ug si Eva adunay hiniusa nga relasyon sa pakigsaad.
Samtang ang mga Santos sa Ulahing mga Adlaw mohimo ug maghupot sa mga pakigsaad, ang Ginoo molig-on kanila sa pagserbisyo sa Iyang gingharian.
Ang Relief Society nagsuporta sa mga babaye samtang ilang gialimahan ang ilang mga anak.
Ang pagbati nga nahisakop sa Relief Society “kinahanglan nga mapasiugdahan diha sa kasingkasing sa matag babaye” (Boyd K. Packer).
Sa Simbahan, ang mga lalaki ug mga babaye nagkahiusa sa paglihok.
“Anaa ang kalig-on ug dakong kapasidad sa mga babaye niini nga Simbahan ” (Gordon B. Hinckley).