« ថ្ងៃទី ១៩–២៥ ខែ ធ្នូ ។ បុណ្យគ្រីស្ទម៉ាស់ ៖ ‹ យើងបានរង់ចាំទ្រង់ ហើយទ្រង់នឹងជួយសង្គ្រោះយើង › » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ១៩–២៥ ខែ ធ្នូ ។ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ឆ្នាំ ២០២២
ដ្បិតមានបុត្រមួយកើតដល់យើង ដោយ ស៊ីម៉ូន ឌូវី
ថ្ងៃទី ១៩–២៥ ខែ ធ្នូ
បុណ្យគ្រីស្ទម៉ាស់
« យើងបានរង់ចាំទ្រង់ ហើយទ្រង់នឹងជួយសង្គ្រោះយើង »
អំឡុងការសិក្សាផ្ទាល់ខ្លួន និងការរៀបចំខ្លួនបង្រៀនរបស់បងប្អូន សូមពិចារណាពីរបៀបដែលបងប្អូនអាចជួយសមាជិកក្នុងថ្នាក់ ឲ្យមានអារម្មណ៍អំណរដ៏អស្ចារ្យនៃការប្រសូតរបស់ព្រះអង្គសង្គ្រោះ ។ សូមយាងព្រះវិញ្ញាណឲ្យថ្លែងទីបន្ទាល់ដល់ពួកគេ អំពីសេចក្ដីស្រឡាញ់ដ៏ប្រោសលោះរបស់ព្រះយេស៊ូវគ្រីស្ទ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
រដូវបុណ្យគ្រីស្ទម៉ាស់អាចជាឱកាសដ៏ល្អមួយ ដើម្បីអញ្ជើញសមាជិកក្នុងថ្នាក់ឲ្យចែកចាយពីរបៀបដែលការសិក្សាព្រះគម្ពីរសញ្ញាចាស់ បានពង្រឹងសេចក្ដីជំនឿរបស់ពួកគេលើព្រះយេស៊ូវគ្រីស្ទ ។
បង្រៀនគោលលទ្ធិ
យើងអររីករាយក្នុងព្រះប្រោសលោះរបស់យើង ។
-
ទោះបីជាបុណ្យគ្រីស្ទម៉ាស់ត្រូវបានគេស្គាល់ថាជារដូវកាលនៃអំណរក្ដី ក៏មានមនុស្សជាច្រើនដែលមានកាលៈទេសៈខ្លះ ធ្វើឲ្យវាពិបាកនឹងរកឃើញអំណរដែរ ទោះបីដល់ពេលនេះហើយក្ដី ។ សារលិខិតដ៏សំខាន់នៃបុណ្យគ្រីស្ទម៉ាស់គឺថា ព្រះអង្គសង្គ្រោះអាចសម្រាលបន្ទុករបស់យើងបាន ហើយជួយយើងឲ្យរកឃើញសេចក្ដីសុខសាន្ដ ព្រមទាំងអំណរផងដែរ ។ ដើម្បីចែកចាយសារលិខិតនេះ បងប្អូនអាចសរសេរសេចក្ដីយោងបទគម្ពីរដូចតទៅនេះដាក់លើក្ដារខៀន ៖ ទំនុកដំកើង ៣៥:៩; អេសាយ ២៥:៨–៩; ៤៤:២១–២៤; ៥១:១១; សេផានា ៣:១៤–២០; ម៉ូសេ ៥:៥–១១ ។ បន្ទាប់មក បងប្អូនអាចសរសេរសំណួរនេះនៅលើក្ដារខៀន ដើម្បីឲ្យសមាជិកក្នុងថ្នាក់ធ្វើការពិចារណា កាលពួកគេអានវគ្គបទគម្ពីរទាំងឡាយ តើវគ្គបទគម្ពីរទាំងនេះផ្ដល់មូលហេតុអ្វីខ្លះដើម្បីមានអំណរ ? សូមឲ្យពួកគេចែកចាយអ្វីដែលពួកគេរកឃើញ ។ ប្រហែលជាបងប្អូនអាចផ្តល់ពេលវេលាឲ្យសមាជិកក្នុងថ្នាក់ សរសេរពីអំណររបស់ពួកគេផ្ទាល់នៅក្នុងព្រះអង្គសង្គ្រោះ ។ ពួកគេអាចទទួលបានការយល់ដឹងបន្ថែមទៀតមកពីសារលិខិតរបស់ប្រធាន រ័សុល អិម ណិលសុន នៅក្នុង « ធនធានបន្ថែមទាំងឡាយ » ។
-
បុណ្យគ្រីស្ទម៉ាស់ផ្ដល់ឱកាសឲ្យចែកចាយអំណរនៃព្រះគ្រីស្ទតាមរយៈការបម្រើដល់មនុស្សដទៃ ។ ពីមុនមកកាន់ថ្នាក់រៀន បងប្អូនអាចអញ្ជើញសមាជិកក្នុងថ្នាក់ម្នាក់ឲ្យរំឭកសារលិខិតរបស់អែលឌើរ អូលីសេស សូរ៉េស « A Modern Angelic Host » ( ការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយ នៅថ្ងៃទី ៨ ខែ ធ្នូ ឆ្នាំ ២០១៩ នៅលើគេហទំព័រ broadcasts.ChurchofJesusChrist.org ) ហើយមករៀនដោយត្រៀមខ្លួនចែកចាយពីរបៀបដែលទង្វើនៃការបម្រើនោះបានជួយអែលឌើរ សូរ៉េស និងគ្រួសាររបស់លោកឲ្យមានអំណរនៃបុណ្យគ្រីស្ទម៉ាស់ ។ បងប្អូនក៏អាចចែកចាយផ្នែកខ្លះនៃសារលិខិតរបស់លោកក្នុងថ្នាក់ផងដែរ ។ សមាជិកក្នុងថ្នាក់អាចចែកចាយបទពិសោធន៍ផ្ទាល់ខ្លួនរបស់ពួកគេក្នុងការផ្ដល់ ឬការទទួលបានទង្វើនៃការបម្រើនៅរដូវបុណ្យគ្រីស្ទម៉ាស់ ។ តើយើងអាចអនុវត្តតាមការអញ្ជើញរបស់អែលឌើរ សូរ៉េស ឲ្យធ្វើតាម « គំរូដ៏ឥតខ្ចោះនៃសេចក្ដីស្រឡាញ់ និងចិត្តល្អចំពោះមនុស្ស » របស់ព្រះអង្គសង្គ្រោះដោយរបៀបណា ?
និមិត្តសញ្ញានានាអាចជួយយើងឲ្យចងចាំព្រះយេស៊ូវគ្រីស្ទ ។
-
គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ មាននូវបញ្ជីនិមិត្តសញ្ញាមួយចំនួនក្នុងព្រះគម្ពីរសញ្ញាចាស់ ដែលបង្រៀនអំពីព្រះយេស៊ូវគ្រីស្ទ ។ សមាជិកក្នុងថ្នាក់អាចចែកចាយអ្វីដែលពួកគេបានរៀនអំពីព្រះអង្គសង្គ្រោះ ចេញពីនិមិត្តសញ្ញាទាំងនេះ និងនិមិត្តសញ្ញាផ្សេងទៀតដែលពួកគេបានរកឃើញនៅក្នុងការសិក្សារបស់ពួកគេ ។ តើយើងបានរៀនអ្វីខ្លះអំពីការរកឃើញព្រះអង្គសង្គ្រោះនៅក្នុងបទគម្ពីរទាំងនេះ ? តើមានបទពិសោធន៍អ្វីខ្លះដែលបានបង្រៀនយើងថា « គ្រប់អ្វីទាំងអស់ត្រូវបានបង្កើត ហើយធ្វើឡើងមក ដើម្បីធ្វើទីបន្ទាល់អំពី [ ទ្រង់ ] » ? ( ម៉ូសេ ៦:៦៣ ) ។
ព្រះបានប្រទានដល់ពួកយើងនូវអំណោយជាព្រះរាជបុត្រារបស់ទ្រង់ ។
-
ការជូនអំណោយគឺជាប្រពៃណីមួយនៃបុណ្យគ្រីស្ទម៉ាស់នៅក្នុងវប្បធម៌ភាគច្រើន ។ បងប្អូនអាចដឹកនាំការពិភាក្សាជាមួយនឹងសមាជិកក្នុងថ្នាក់ អំពីអំណោយដែលព្រះបានប្រទានដល់យើង ជាពិសេសអំណោយជាព្រះរាជបុត្រារបស់ទ្រង់គឺព្រះយេស៊ូវគ្រីស្ទ ។ ដើម្បីធ្វើកិច្ចការនេះ បងប្អូនអាចចែកចាយវីដេអូ « He Is the Gift » ( នៅលើគេហទំព័រ ChurchofJesusChrist.org ) ហើយអញ្ជើញសមាជិកក្នុងថ្នាក់ឲ្យចែកចាយអ្វី ដែលអំណោយជាព្រះអង្គសង្គ្រោះមានអត្ថន័យចំពោះពួកគេ ។ តើយើងអាចបង្ហាញការដឹងគុណរបស់យើងដល់ព្រះវរបិតាសួគ៌ចំពោះអំណោយនេះដោយរបៀបណា ?
« គេនឹងហៅព្រះនាមទ្រង់ថាព្រះដ៏ជួយគំនិតយ៉ាងអស្ចារ្យ » ។
-
ព្យាការីអេសាយបានប្រើព្រះនាម និងព្រះបរមងារជាច្រើនដើម្បីរៀបរាប់ពីព្រះមែស៊ី ដែលនឹងប្រសូតមកនៅភូមិបេថ្លេហិម ( ឧទាហរណ៍ សូមមើល អេសាយ ៧:១៤; ៩:៦ ) ។ ប្រហែលសមាជិកក្នុងថ្នាក់នឹងរីករាយដើម្បីរៀនបន្ថែមទៀតអំពីព្រះអង្គសង្គ្រោះ និងបេសកកម្មរបស់ទ្រង់តាមរយៈការរៀនអំពីព្រះបរមងារទាំងនេះ ។ ពួកគេអាចរើសយកព្រះបរមងារមួយ ហើយរកមើលវគ្គបទគម្ពីរផ្សេងទៀត ដែលជួយពួកគេឲ្យយល់ពីអត្ថន័យនៃព្រះបរមងារនោះ ។ ឧទាហរណ៍ ពួកគេអាចរៀនបន្ថែមទៀតអំពីព្រះបរមងារ « ម្ចាស់នៃមេត្រីភាព » ( អេសាយ ៩:៦ ) តាមរយៈការអានក្នុង ទំនុកដំកើង ៨៥:៨; អេសាយ ៥២:៧; លូកា ២:១៤ ឬ យ៉ូហាន ១៦:៣៣ ។ ដើម្បីជួយសមាជិកក្នុងថ្នាក់ឲ្យរកឃើញបទគម្ពីរផ្សេងទៀត សូមផ្ដល់យោបល់ឲ្យពួកគេរកមើលក្នុង សេចក្ដីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) ។ តើព្រះបរមងារទាំងនេះផ្ដល់យោបល់អ្វីខ្លះអំពីព្រះអង្គសង្គ្រោះ និងអ្វីដែលទ្រង់បានធ្វើសម្រាប់យើង ?
ធនធានបន្ថែមទាំងឡាយ
ព្រះយេស៊ូវគ្រីស្ទប្រទានសេចក្ដីសុខសាន្ដ និងអំណរ ។
ប្រធាន រ័សុល អិម ណិលសុន បានបង្រៀន ៖
« ពេលយើងផ្ដោតជីវិតរបស់យើងលើផែនការនៃសេចក្ដីសង្គ្រោះរបស់ព្រះ … និងព្រះយេស៊ូវគ្រីស្ទ ព្រមទាំងដំណឹងល្អរបស់ទ្រង់ យើងអាចមាននូវអំណរ ទោះជាមានអ្វីកំពុងកើតឡើង—ឬមិនកើតឡើង—នៅក្នុងជីវិតយើងក៏ដោយ ។ អំណរកើតមានឡើង ហើយដោយសារតែទ្រង់ ។ ទ្រង់គឺជាប្រភពនៃអំណរទាំងអស់ ។ យើងទទួលអារម្មណ៍នេះនៅរដូវបុណ្យគ្រីស្ទម៉ាស់ កាលយើងច្រៀងបទ ‹ អំណរដល់លោក ព្រះបុត្រកើតហើយ › [ ទំនុកតម្កើង ល.រ. ១២៤ ] ។ ហើយយើងអាចមានអារម្មណ៍នោះពេញមួយឆ្នាំ ។ សម្រាប់ពួកបរិសុទ្ធថ្ងៃចុងក្រោយ ព្រះយេស៊ូវគ្រីស្ទគឺជាអំណរ !…
ដូចជាព្រះអង្គសង្គ្រោះប្រទានភាពសុខសាន្តដែល ‹ ហួសលើសពីអស់ទាំងគំនិត › [ ភីលីព ៤:៧ ] ដែរ នោះទ្រង់ក៏ប្រទានអំណរដ៏ខ្លាំងក្លា ជ្រាលជ្រៅ និងច្រើនអនេក ដែលផ្ទុយពីហេតុផល ឬការយល់ដឹងរបស់មនុស្ស » ( « Joy and Spiritual Survival » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ៨២ ) ។
ការកែលម្អការបង្រៀនរបស់យើង
រៀបចំខ្លួនដោយគិតអំពីមនុស្ស ។ « ចូរឲ្យការយល់អំពីមនុស្សរបស់អ្នកដែលអ្នកបង្រៀន ដឹកនាំផែនការរបស់អ្នក ។ … គ្រូបង្រៀនដែលមានលក្ខណៈដូចជាព្រះគ្រីស្ទ គឺពុំតាំងចិត្តទៅលើរបៀប ឬវិធីសាស្ត្របង្រៀនជាក់លាក់មួយនោះទេ ពួកគេតាំងចិត្តដើម្បីជួយមនុស្សឲ្យស្ថាបនាសេចក្ដីជំនឿទៅលើព្រះយេស៊ូវគ្រីស្ទ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។