« ថ្ងៃទី ៣–៩ ខែ តុលា ។ អេសាយ ៥៨–៦៦ ៖ ‹ អ្នកដ៏ជួយប្រោសលោះមកឯក្រុងស៊ីយ៉ូន › » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )
« ថ្ងៃទី ៣–៩ ខែ តុលា ។ អេសាយ ៥៨–៦៦ » ចូរមកតាមខ្ញុំ—សម្រាប់ សាលាថ្ងៃអាទិត្យ ៖ ឆ្នាំ ២០២២
ព្រះយេស៊ូវនៅក្នុងសាលាប្រជុំនៅណាសារ៉ែត ដោយ ហ្គ្រេក ខេ អូលសិន
ថ្ងៃទី ៣–៩ ខែ តុលា
អេសាយ ៥៨–៦៦
« អ្នកដ៏ជួយប្រោសលោះមកឯក្រុងស៊ីយ៉ូន »
នៅពេលបងប្អូនសិក្សាគោលលទ្ធិដ៏ល្អនៅក្នុងជំពូកទាំងនេះ សូមយាងព្រះវិញ្ញាណឲ្យដឹកនាំបងប្អូនទៅកាន់សារលិខិត ដែលនឹងមានអត្ថន័យខ្លាំងបំផុតចំពោះសមាជិកក្នុងថ្នាក់ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
បងប្អូនអាចអញ្ជើញសមាជិកក្នុងថ្នាក់ឲ្យសរសេរនៅលើក្ដារខៀននូវសេចក្ដីយោងខគម្ពីរ ដែលបានបំផុសគំនិតដល់ពួកគេ អំឡុងការសិក្សាព្រះគម្ពីររបស់ពួកគេនៅសប្ដាហ៍នេះ ។ រួចហើយ បងប្អូនអាចរកមើលខគម្ពីរទាំងនោះជាមួយគ្នាក្នុងថ្នាក់ ហើយនិយាយអំពីសេចក្ដីពិតដែលមាននៅត្រង់នោះ ។ ការយល់ដឹងទាំងនេះអាចដឹកនាំទៅរកការពិភាក្សាដ៏ស៊ីជម្រៅមួយ អំពីគោលការណ៍ខាងក្រោមនេះមួយ ឬច្រើន ។
បង្រៀនគោលលទ្ធិ
ការតមអាហារនាំមកនូវពរជ័យ ។
-
ដើម្បីជួយសមាជិកក្នុងថ្នាក់ឲ្យពិភាក្សាពីមូលហេតុ និងរបៀបដែលព្រះអម្ចាស់បានបង្គាប់ឲ្យយើងតមអាហារ បងប្អូនអាចគូរជួរឈរពីរនៅលើក្ដារខៀន ហើយដាក់ចំណងជើងថា « ការដែលឯងតមអត់នោះ គឺមិនមែនមានប្រយោជន៍ឡើយ » និង « ការតមអត់យ៉ាងនេះវិញ ដែលយើងពេញចិត្ត » ។ បន្ទាប់មក សមាជិកក្នុងថ្នាក់អាចអាន អេសាយ ៥៨:៣–៧ ហើយបំពេញក្នុងជួរឈរទីមួយ ដោយការពិពណ៌នាអំពីរបៀបដែលពួកសាសន៍អ៊ីស្រាអែលបានតមអាហារ និងជួរឈរទីពីរដោយការពិពណ៌នាអំពីការតមអាហារ ដែលព្រះអម្ចាស់សព្វព្រះទ័យឲ្យធ្វើ ។ តើការពិពណ៌នាទាំងនេះមានឥទ្ធិពលលើរបៀបដែលយើងមើលទៅការតមអាហារយ៉ាងដូចម្ដេច ? ចេញពីបទពិសោធន៍របស់ពួកគេ សមាជិកក្នុងថ្នាក់ក៏អាចចែកចាយអំពីរបៀបដែលការតមអាហារនាំទៅរកពរជ័យ ដែលព្រះអម្ចាស់បានសន្យានៅក្នុង ខទី ៨–១២ ផងដែរ ។
-
សមាជិកក្នុងថ្នាក់មួយចំនួនអាចមានបទពិសោធន៍ក្នុងការពន្យល់ដល់មនុស្សដទៃ ពីមូលហេតុដែលយើងតមអាហារ ។ សូមអញ្ជើញពួកគេឲ្យចែកចាយនូវអ្វីដែលពួកគេបាននិយាយ ។ បងប្អូនក៏អាចអញ្ជើញសមាជិកមួយរូបនៃគណៈប៊ីស្សព ឲ្យមកថ្លែងអំពីរបៀបដែលដង្វាយតមអាហារត្រូវបានប្រើប្រាស់ផងដែរ ។ ឬបងប្អូនអាចចែកចាយឧទាហរណ៍មួយមកពីសារលិខិតរបស់ប្រធាន ហិនរី ប៊ី អាវរិង « Is Not This the Fast That I Have Chosen? » ( Ensign ឬ Liahona ខែ ឧសភា ឆ្នាំ ២០១៥ ទំព័រ ២២–២៥ ) ។ តើការតមអាហារ និងការបង់ដង្វាយតមអាហារជួយ « ឲ្យស្រាយចំណងដែលឯងបានចង » ដល់ខ្លួនយើង និងមនុស្សដទៃដោយរបៀបណា ? ( អេសាយ ៥៨:៦ ) ។
ព្រះយេស៊ូវគ្រីស្ទគឺជាព្រះអង្គសង្គ្រោះ និងព្រះប្រោសលោះរបស់យើង ។
-
នៅពេលព្រះយេស៊ូវគ្រីស្ទបានប្រកាសដល់ប្រជាជននៅណាសារ៉ែតថា ទ្រង់គឺជាព្រះមែស៊ី នោះទ្រង់បានដកស្រង់ចេញពី អេសាយ ៦១:១–៣ ( សូមមើល លូកា ៤:១៦–២១; សូមមើលផងដែរ វីដេអូ « Jesus Declares He Is the Messiah » នៅលើគេហទំព័រ ChurchofJesusChrist.org ) ។ ប្រហែលជាសមាជិកក្នុងថ្នាក់អាចអាន អេសាយ ៦១:១–៣ ហើយជជែកគ្នាអំពីមូលហេតុដែលខគម្ពីរទាំងនេះ គឺជាការពិពណ៌នាដ៏ល្អមួយអំពីបេសកកម្មរបស់ព្រះអង្គសង្គ្រោះ ។ បងប្អូនអាចសរសេរនៅលើក្ដារខៀននូវចំណុចនីមួយៗ ដែលព្រះអង្គសង្គ្រោះត្រូវបានតែងតាំងឲ្យធ្វើ និងពិភាក្សាពីអត្ថន័យនៃចំណុចនីមួយៗនោះ ។ តើព្រះអង្គសង្គ្រោះបានបំពេញផ្នែកទាំងនេះនៃបេសកកម្មរបស់ទ្រង់ អំឡុងជីវិតរមែងស្លាប់របស់ទ្រង់ដោយរបៀបណា ? តើទ្រង់បានបំពេញផ្នែកទាំងនោះនៅក្នុងជីវិតរបស់យើងដោយរបៀបណា ?
-
សមាជិកក្នុងថ្នាក់ក៏អាចអាន អេសាយ ៦៣:៧–៩ ផងដែរ ហើយចែកចាយពីរបៀបដែលព្រះយេស៊ូវគ្រីស្ទបានប្រទានពរដល់ពួកគេតាមរបៀបទាំងនេះ ។
-
អេសាយ ៦១:១–៣ ប្រើភាសាកំណាព្យដ៏ពិរោះរណ្ដំ ដើម្បីពិពណ៌នាពីព្រះចេស្ដារបស់ព្រះយេស៊ូវគ្រីស្ទ ក្នុងការប្រោសលោះអ្វីដែលហាក់ដូចជាបានហិនហោចហើយ ។ ដើម្បីជួយបង្ហាញពីខគម្ពីរទាំងនេះ សូមពិចារណាចែកចាយដំណើររឿងមួយអំពីអ្វីមួយ ដែលគិតថាបានបាត់បង់ ឬហិនហោចហើយ ប៉ុន្ដែបែរជាក្លាយជាអ្វីមួយ ដែលកាន់តែស្រស់បំព្រងជាងមុនទៅវិញ ។ ឧទាហរណ៍ សូមមើលវីដេអូ « Provo City Center Temple » ( នៅលើគេហទំព័រ ChurchofJesusChrist.org; សូមមើលផងដែរ « ធនធានបន្ថែមទាំងឡាយ » ) ឬដំណើររឿងនៅដើមដំបូងនៃសារលិខិតរបស់ប្រធាន ឌៀថើរ អេហ្វ អុជដូហ្វ « He Will Place You on His Shoulders and Carry You Home » ( Ensign ឬ Liahona ខែ ឧសភា ឆ្នាំ ២០១៦ ទំព័រ ១០១–៤ ) ។ សមាជិកក្នុងថ្នាក់អាចនិយាយអំពីរបៀប ដែលពួកគេបានឃើញព្រះអម្ចាស់ប្រទានអ្វីមួយដ៏ស្រស់ស្អាតដល់មនុស្ស នៅពេលពួកគេបានគិតថា ជីវិតរបស់ពួកគេបានហិនហោចទៅហើយនោះ ។
នៅឯការយាងមកជាលើកទីពីររបស់ទ្រង់ ព្រះអម្ចាស់នឹង « បង្កើតផ្ទៃមេឃថ្មី ហើយនឹងផែនដីថ្មី » ។
-
អេសាយ ៦៥:១៧–២៥ រៀបរាប់ពីស្ថានភាពនៅលើផែនដីនេះ បន្ទាប់ពីការយាងមកជាលើកទីពីររបស់ព្រះអង្គសង្គ្រោះ ។ បងប្អូនអាចអញ្ជើញសមាជិកក្នុងថ្នាក់ឲ្យពិនិត្យមើលខគម្ពីរទាំងនេះឡើងវិញ ដោយស្រាវជ្រាវរកចម្លើយចំពោះសំណួរដូចនេះ ៖ តើជីវិតនៅលើ « ផែនដីថ្មី » នឹងខុសគ្នាយ៉ាងណាទៅ ពីជីវិតនៅលើផែនដីនាពេលបច្ចុប្បន្ននេះ ? តើបងប្អូនរកឃើញអ្វីខ្លះនៅក្នុងខគម្ពីរទាំងនេះ ដែលបណ្ដាលឲ្យបងប្អូនមានសេចក្ដីអររីករាយនោះ ?
ធនធានបន្ថែមទាំងឡាយ
ព្រះអម្ចាស់ « ពុំទុកយើងឲ្យនៅក្នុងផេះផង់ទេ » ។
ក្រោយពីតំណាលជាថ្មីអំពីរបៀបដែលភ្លើងស្ទើរតែបំផ្លាញរោងឧបោសថប្រូវ៉ូ ហើយអនុញ្ញាតឲ្យវាកសាងជាថ្មីនៅពេលក្រោយមក ទៅជាព្រះវិហារបរិសុទ្ធ ប្រូវ៉ូ ស៊ីធី សេនធើរ នោះស៊ីស្ទើរ លីនដា អេស រីវស៍ បានពោលថា « ព្រះអម្ចាស់អនុញ្ញាតឲ្យយើងទទួលការសាកល្បង ពេលខ្លះដល់កម្រិតអតិបរិមានៃសមត្ថភាពរបស់យើង ។ យើងបានឃើញជីវិតរបស់មនុស្សជាទីស្រឡាញ់—ប្រហែលជារបស់យើងផ្ទាល់—ត្រូវបានដុតឆេះរាបដល់ដី ហើយបានងឿងឆ្ងល់ថា ហេតុអ្វីព្រះបិតាជាទីស្រឡាញ់ និងមានព្រះទ័យខ្វល់ខ្វាយ ទុកឲ្យរឿងដូច្នោះកើតឡើងបាន ។ ប៉ុន្តែទ្រង់ពុំទុកយើងឲ្យនៅក្នុងផេះផង់ទេ ទ្រង់គង់លាតព្រះហស្តអញ្ជើញយើងឲ្យមករកទ្រង់ ។ ទ្រង់កំពុងស្ថាបនាជីវិតយើងឲ្យក្លាយជាព្រះវិហារបរិសុទ្ធដ៏រុងរឿង ជាកន្លែងដែលព្រះវិញ្ញាណទ្រង់អាចគង់នៅដ៏អស់កល្ប » ( « Claim the Blessings of Your Covenants » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ១១៩ ) ។
ការកែលម្អការបង្រៀនរបស់យើង
ស្គាល់អស់អ្នកដែលបងប្អូនបង្រៀន ។ បុគ្គលម្នាក់ៗដែលបងប្អូនបង្រៀនមានបទពិសោធន៍ ទស្សនវិស័យ និងទេពកោសល្យពិសេសខុសៗគ្នា ។ សូមពិចារណាពីភាពខុសគ្នាទាំងនេះ កាលបងប្អូនព្យាយាមជួយមនុស្សទាំងអស់ឲ្យរៀនតាមរបៀបដ៏មានអត្ថន័យ និងគួរឲ្យចងចាំ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។