Ni Pablo iti pagbaludan

Hulio 29–Agosto 4

Dagiti Aramid 22–28

“Maysa a Ministro ken Saksi”

Basaem ti Dagiti Aramid 22–28 nga addaan iti kararag iti pusom tapno paregtaennakanto ti Espiritu Santo nga ammuen no ania ti ipamaysam wenno ipokus a mangtulongto kadagiti miembro ti klasem. Isuratmo dagiti ania man a kapanunotan nga umay iti panunotmo; dagitoy ket mabalin a rugi ti planom iti panangisuro.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Kiddawem kadagiti miembro ti klase a mangisurat kadagiti reperensia ti nasantuan a kasuratan manipud iti Dagiti Aramid 22–28 a nakaawisan ti riknada iti daytoy a lawas. Ummongem dagiti sungbatda ken basaem ti sumagmamano kadagiti bersikulo. Awisem ti sumagmamano kadagiti miembro ti klase nga ibinglayda no apay a napateg kadakuada dagitoy a bersikulo.

icon iti panangisuro

Isuro ti Doktrina

Dagiti Aramid 22:1–21; 26:1–29

Ti pammaneknek ket maysa a palawag iti kinapudno a maibatay iti bukod a pannakaammo wenno pammati.

• Ti pammaneknek ni Pablo kada Festo ken Ari Agrippa ket mabalin a maysa a gundaway tapno paglilinnawagan no ania ti kaipapanan ti mangiburay iti pammaneknek. Mabalinmo nga irugi babaen ti panagkiddaw kadagiti miembro ti klase a mangrebyu iti Dagiti Aramid 22:1–21 ken 26:1–29. Ania ti masursurotayo manipud iti pagwadan ni Pablo maipapan iti panangiburay iti pammaneknek? Ania dagiti mainayon a pagbatayan maipapan iti panangiburay iti pammaneknek a masursurotayo manipud iti palawag ni Elder M. Russell Ballard iti “Dagiti Nainayon a Resources”?

• Mabalin a nakagun-od dagiti miembro ti klase kadagiti bukod a nauneg a pannakaammo ken pannakaawat bayat ti panagadalda iti pammaneknek ni Pablo kada Festo ken Ari Agrippa. Awisem ida a mangibinglay. Ania dagiti ballaag iti sungbat ni Ari Agrippa iti pammaneknek ni Pablo a mabalin nga adda kadatayo iti agdama? (kitaen iti Dagiti Aramid 26:28). Mabalin a kabaelan pay dagiti miembro ti klase a panunotenda dagiti dadduma pay a pammaneknek manipud kadagiti nasantuan a kasuratan a nangparegta kadakuada. (Ti sumagmamano a pagarigan ket mangiraman iti Job 19:25–27; 2 Nephi 33:10–15; Alma 5:45–48; ken DkK 76: 22–24.) Wenno nalabit a mabalin a mangiburayda kadagiti padas idi inimpluensiaan ida ti pammaneknek ti maysa a tao.

• Indilig ni Propeta Joseph Smith dagiti padasna iti panangipaneknek maipapan ti Umuna a Parmata iti padas ni Pablo iti sanguanan ni Ari Agrippa (kitaen iti Joseph Smith—Pakasaritaan 1:24–25). Nalabit a makapagtitinnulong dagiti miembro ti klase a sagsangaparisda a mangaramid iti listaan dagiti pagpapadaan dagitoy dua a katulongan ti Dios. Kasano a makatulong daytoy nga aktibidad a mangipaawat kadatayo no kasano ti mangibinglay iti pammaneknektayo uray no narigat nga aramiden daytoy?

• Nupay saan a nagkalkalikagum a magun-od ni Pablo ti naespirituan a panagsaksi nga inawatna iti dalan nga agturong iti Damasco, binusbosna ti nabati pay a biagna a nagtrabtrabaho a mangpatalinaed ken mangsalaknib iti pammaneknekna (kitaen iti Dagiti Aramid 22:10, 14–16; 26:19). Makatulong ti pagwadan ni Pablo a mangipaawat iti klasem nga agkasapulan ti maysa a pammaneknek iti aramid ken sakripisio. Tapno mangirugi iti panaglilinnawag maipapan iti daytoy, nalabit a mabalin nga iladawan ti maysa a miembro ti klase ti panagkagumaanna nga agbalin a nalaing a musikero, artista wenno atleta. Kasano a ti panangpadur-as iti kasta a paglaingan ket maipada iti pananggun-od ken panangpapigsa iti maysa a pammaneknek? Ania dagiti panagkagumaan a nasken nga aramidentayo a manggun-od ken mangpapigsa iti maysa a pammaneknek? (kitaen met iti Alma 5:46).

Dagiti Aramid 26:9–23

Addaantayo iti pagrebbengan nga agserbi kadagiti dadduma.

• Inawagan ti Apo ni Pablo nga agbalin a “maysa a ministro” (Dagiti Aramid 26:16), ngem ania ti kayat a sawen daytoy a balikas? Tapno matulongan dagiti miembro ti klase nga agsukisok no kasano a makapagministroda kadagiti dadduma, mabalinmo nga isurat iti pisarra ti maysa a saludsod kas iti Ania ti kayat a sawen ti agministro? Awisem dagiti miembro ti klase a magsarak kadagiti sungbat kadagiti sumaganad a resources: Mateo 20:25–28; Dagiti Aramid 26:16–18; 3 Nephi 18:29–32; Pangiwanwan iti Nasantuan a Kasuratan, “Ministro” scriptures.lds.org. Bayat ti panangibinglayda iti no ania ti nasarakanda, allukoyen ida a paglilinnawagan dagiti wagas a mabalintayo a pakapagserbi kadagiti dadduma, agraman kadagiti takemtayo iti Simbaan.

• Ania dagiti dadduma pay a pagarigan a maibinglay dagiti miembro ti klase? Ikkam iti gundaway dagiti miembro ti klase a panunotenda ti maysa a tao a mabalin a pagserbianda itoy a lawas ken no kasano nga aramidendanto daytoy.

Dagiti Aramid 27

No dumgegtayo kadagiti propeta ti Apo, tarabayendatayo ket salaknibandatayonto manipud iti dakes.

• Mabalin nga addaan iti padpadas dagiti miembro ti klase idi sinurotda ti panangiturong dagiti propeta uray no maiduma daytoy iti balakad dagiti nainlubongan nga eksperto wenno dagiti kapanunotan ti tattao iti aglawlawda. Awisem ti sumagmamano kadagiti miembro ti klase nga umay a nakasagana a mangibinglay kadagiti kasta a padas. Kalpasanna awisem dagiti miembro ti klase a mangibinglay iti no kasano a nagresponde dagiti tao iti bapor idi impadto ni Pablo nga agsagabanto ti bapor iti “rigrigat ken adu a pagdaksan” (Dagiti Aramid 27:10). Kasano a maipada dagiti sungbat ti sumagmamano a tattao iti balakad ti propeta iti panawentayo?

• Ania ti masursurotayo manipud iti Dagiti Aramid 27 maipapan iti panangsurot kadagiti propeta ti Apo? Ti adaw ni Elder Ronald A. Rasband iti “Dagiti Nainayon a Resources” ket naglaon kadagiti saludsod a mautob ken maysa a listaan dagiti peggad nga imballaag kadatayo dagiti kabaruanan a propeta. Kasano a naparaburantayo babaen ti panangsurot iti balakad dagiti sibibiag a propeta?

icon iti panagsursuro

Yallukoy ti Panagsursuro iti Pagtaengan

Tapno makatulong a maparegta dagiti miembro ti klase a rugianda ti panangbasa kadagiti surat ni Pablo, kiddawem kadakuada nga ipapanda a nagsurat ti maysa a miembro ti Korum dagiti Sangapulo-ket-dua iti wardyo. Kasano koma ti riknatayo maipapan iti dayta a surat? Ania koma ti mabalin nga isaona kadatayo? Awisem dagiti miembro ti klase a manglaglagip kadagitoy bayat ti panangbasada iti surat ni Pablo kadagiti Santo iti Roma.

resources icon

Dagiti Nainayon a Resources

Dagiti Aramid 22–28

Panangiburay iti pammaneknek.

Nagsarita ni Elder M. Russell Ballard maipapan iti pammaneknek ni Pablo iti sango ni Ari Agrippa ken insurona no ania ti kayat a sawen kadatayo ti mangiburay iti pammaneknek:

“Dagiti mitingtayo iti panagpaneknek ket masapul nga ad-adda a naisentro iti Mangisalakan, kadagiti doktrina ti ebanghelio, kadagiti bendision ti Pannakaisubli, ken kadagiti pannursuro dagiti nasantuan a kasuratan. Nasken a sukatatayo dagiti estoria, padas iti panangbiahe, ken panangisuro iti natarnaw a pammaneknek. Dagitay napagtalkan nga agsarita ken mangisuro kadagiti mitingtayo ket kasapulan nga aramidenda daytoy iti nadoktrinaan a bileg nga agpadanto a mangngeg ken marikna, a mangitagtag-ay kadagiti espiritu ken mangpadpadur-as kadagiti tao. …

“… Idinto a kanayon a nasayaat ti mangyebkas iti ayat ken panagyaman, saan a mangparnuay iti kasta a panangipeksa iti kita ti pammaneknek a mangparegtanto iti pammati iti biag dagiti dadduma. Ti mangiburay iti pammaneknek ket “mamaneknek babaen ti bileg ti Espiritu Santo; mangaramid iti napasnek a palawag iti kinapudno a maibatay iti bukod a pannakaammo wenno pammati’ [Pangiwanwan iti Nasantuan a Kasuratan, “Paneknekan,” scriptures.lds.org]. Ti nalawag a palawag iti kinapudno ket mangaramid iti pagdumaan kadagiti biag dagiti tao. Dayta ti mangbalbaliw iti puspuso. Dayta ti maipatalged ti Espiritu Santo iti puspuso dagiti annak ti Dios” (“Pure Testimony,” Ensign wenno Liahona, Nob. 2004, 41).

Makipagtakder kadagiti lider iti Simbaan.

Insuro ni Elder Ronald A. Rasband:

“[Dagiti lidertayo], babaen ti nadiosan a pammaregta, ket naawagan a mangisuro ken mangtarabay kadatayo ken … mangipakpakaammo kadatayo nga agannad kadagiti peggad a sangsanguentayo iti tunggal aldaw—manipud iti gagangay a panagtungpal iti aldaw ti Sabbath, inggana kadagiti pammutbuteng iti pamilia, panangdarup iti wayawaya iti relihion, ken uray pay iti panagsupiat iti paltiing iti ud-udina nga aldaw. Kakabsat a lallaki ken babbai, dumdumngegtayo kadi iti balakadda? …

“Bayat ti panagtultuloytayo, ti panangpili a mangsurot iti balakad ken ballaag dagiti lidertayo, pilientayo ti sumurot iti Apo bayat ti ipapan ti lubong iti sabali a direksion. Pilientayo ti kumpet a naimbag iti landok a pagkaptan, tapno agbalintayo a Santo iti Ud-udina nga Aldaw, nga adda iti panangibaon ti Apo, ken mapno ‘iti aglaplapusanan a rag-o’ [1 Nephi 8:12].

“Nalawag ti dumakdakkel a saludsod kadagitoy nga aldaw: makipagtakderkayo kadi kadagiti lider iti simbaan iti dumangdangkesen a lubong tapno maisaknapyo ti Silaw ni Cristo?” (“Standing with the Leaders of the Church,” Ensign wenno Liahona, Mayo 2016, 47–48).

Panangpadur-as iti Panangisurotayo

Agsagana iti nasapsapa Kabayatan ti panangutobmo no kasano a bendisionanto dagiti pagbatayan ti ebanghelio nga isursurom dagiti miembro ti klasem, umayto dagiti ideya ken impresion iti unos ti inaldaw a panagbiagmo—kabayatan ti panagbiahem a mapan iti trabahom, panangaramidmo kadagiti trabaho iti balay, wenno pannakipulapolmo iti kapamilia wenno gagayyem. Saanmo a panunoten ti naespirituan a panagsagana a kas maysa a banag a pagbubosam iti oras no di ketdi kas maysa a banag a kanayonmo nga ar-aramiden” (Panangisuro iti Wagas ti Mangisalakan, 12).