“Agosto 5–11. Taga Roma 1–6: ‘Ti Pannakabalin ti Dios a Maipaay iti Pannakaisalakan’” Umaykayo, Sumurot Kaniak—Para iti Sunday School: Baro a 2019 (2019)
“Agosto 5–11. Taga Roma 1–6,” Umaykayo, Sumurot Kaniak—Para iti Sunday School: 2019
Agosto 5–11
Taga Roma 1–6
“Ti Pannakabalin ti Dios a Maipaay iti Pannakaisalakan”
Nainkararagan a basaen ti Taga Roma 1–6 a pampanunotem dagiti miembro ti klasem. Daytoy ti mangtulongto kenka nga agbalin a managrikna kadagiti parikna ti Espiritu bayat ti panagsaganam a mangisuro.
Isuratmo Dagiti Impresionmo
Yawis ti Panagbibinninglay
Ibilangmo ti panangted kadagiti miembro ti klase iti sumagmamano a minuto a mangsukisok iti Taga Roma 1–6 iti maysa a bersikulo a nangnangruna a magustuanda. Kalpasanna mabalinda nga ibinglay ti bersikulo a pinilida iti maysa a tao nga agtugtugaw iti asideg.
Isuro ti Doktrina
“Diak ibain ti ebanghelio ni Cristo.”
-
Naipasango kadin dagiti miembro ti klasem iti panangumsi gapu iti pammatida? Awisem ida a mangbasa iti Taga Roma 1:16–17 ket panunotem dagiti gundaway manipud iti libro ti Dagiti Aramid a nangipakitaan ni Pablo a saanna nga imbain ti ebanghelio. Ania dagiti sumagmamano a banag a mangaramid kadatayo a saan a mabain nga agbalin a miembro ti Ti Simbaan ni Jesucristo dagiti Santo iti Ud-udina nga Aldaw? Mangawis kadagiti miembro ti klase a mangibinglay kadagiti padas a nangipakitaanda wenno dagiti dadduma a saanda nga imbain ti ebanghelio ni Jesucristo.
Taga Roma 1:16–17; 2:28–29; 6:1–11
Ti pudno a kinadisipulo ket masarakan iti akin-uneg a panagkumittayo, saan laeng a kadagiti tignaytayo.
-
Kasano ti panangamiristayo iti bukodtayo a kinadisipulo? Ti balakad ni Pablo kadagiti taga Roma ket makatulong kadatayo a saan a mangipokus iti panangileppas iti listaan dagiti aramiden no di ketdi iti “puso [ken] ti espiritu” (Taga Roma 2:29). Tapno matulongan a maawatan ti klasem ti balakad ni Pablo, mabalinmo nga isurat ti teksto manipud iti Taga Roma 2:28–29 iti pisarra. Sukatam iti balikas a Judio iti Santo iti Ud-udina nga Aldaw ken ti balikas a pannakakugit iti ti katulagan. Ania ti inayon daytoy a pannakabalbaliw iti pannakaawattayo kadagiti pannursuro ni Pablo? Mabalinmo pay nga ilawlawag dagiti pagarigan dagiti banag nga aramidentayo kas miembro ti Simbaan a napatpateg ken nabilbileg no naaramid “ti puso, iti espiritu” (Taga Roma 2:29).
“No immadu ti basol, ti parabur immad-adu pay iti kasta unay.”
-
Mabalin nga adda dagiti tao iti klasem nga agkasapulan iti tulong a pannakaawat kadagiti pannursuro ni Pablo kadagitoy a kapitulo maipapan iti pammati, aramid, ken parabur (kitaen met iti balabala itoy a lawas iti Umaykayo, Sumurot Kaniak—para kadagiti Indibidual ken Pamilia ken iti Patarus ni Joseph Smith iti Pangiwanwan iti Nasantuan a Kasuratan). Kasano a matulongam ida a makasursuro manipud iti tunggal maysa? Ibilangmo ti panangidatag iti sumaganad a dua a senario a mangtulong a mangipaawat kadagiti miembro ti klase a nasken a ditayo ibilang dagiti nasayaat nga aramidtayo kas maysa a wagas a mangipaneknek iti pannakaikaritayo, wenno nasken a ditayo ibilang ti parabur ni Cristo kas maysa a rason tapno pagbalinen a pambar kadagiti biddut ken basbasoltayo. Mangawis kadagiti miembro ti klase a mangsukisok kadagiti kinapudno iti Taga Roma 3:20–31; 5:1–2; 6:1–2, 21–23 a makatulong kada Gloria ket Justin. Ania dagiti dadduma pay a kinapudno iti doktrina iti “Dagiti Nainayon a Resources” a makatulong a mangipaawat kadakuada iti kinapateg ti agpada a panangaramid kadagiti nalinteg nga aramid ken panagtalek iti parabur ni Cristo? Mabalinmo nga idawat kadagiti miembro ti klase nga ibinglayda ti no ania ti nasarakanda wenno yakemda ti maysa a panagsasarita.
Senario 1
Addaanka iti maysa a gayyem nga agnagan iti Gloria a makarikna a natalipupos kadagiti panagkagumaanna nga agbalin a napudno a disipulo. Nagtrabaho a napasnek a mangaramid iti amin a banag a mariknana a nasken nga aramidenna, ngem masansan a madanagan amangan ta saan nga umdas dagiti panagkagumaanna. “Umdas kadin ti kinasingpetko?” insiddaawna. “Awatennakto ngata ti Apo?”
Senario 2
Addaanka iti maysa a gayyem nga agnagan iti Justin a saan a madanagan unay maipapan iti panangaramid kadagiti nalinteg a pili. Mamati isuna ken ni Jesucristo, dar-ayanna dagiti mitingna iti simbaan, ken managayat isuna nga ama ken nasayaat a kaarruba. Nupay kasta, pinilina ti saan nga agbiag kadagiti pagrukodan a mangpaikari kenkuana para iti maysa a rekomenda iti templo. Idi padasen ti pamilia ken gagayyem nga allukoyen isuna nga agsagana para iti templo, insungbatna, “Maysaak a nasayaat a tao. Addaanak iti pammati ken ni Cristo. Nagsagaban isuna para iti basbasolko, ket panagkunak pastrekennakto iti celestial a pagarian iti kasta a babassit a banag.”
Yallukoy ti Panagsursuro iti Pagtaengan
Tapno maallukoy dagiti miembro ti klase a mangbasa iti Taga Roma 7–16, mabalinmo nga isarita kadakuada nga inladawan ni Pablo ti gubat iti unegna— ken amin kadatayo. Iti Taga Roma 7–16 maammuantayo no ania dayta a gubat ken no kasano nga agballigitayo iti daytoy.
Dagiti Nainayon a Resources
Pammati, parabur, ken dagiti aramid.
Idinto a nasken nga ikarigatantayo a suroten dagiti bilin, ti panagtungpal laeng kadagiti linteg ti Dios ket saanto a mangisalakan kadatayo (kitaen iti Taga Roma 3:27–31). Uray kadagiti kasayaatan a panagkagumaantayo, datayo “amin nagbasol, ket agkurangtayo iti dayag ti Dios” (Taga Roma 3:23). Gapu iti dayta, kasapulantayo amin ni Jesucristo, a ti paraburna ket mangpalugod kadatayo a mapakawan kadagiti basoltayo ken mangpabalin kadatayo tapno agtultuloy nga agaramid kadagiti nasayaat nga aramid. Kas iti insuro ni Pablo, “No immadu ti basol, ti parabur immad-adu pay iti kasta unay” (Taga Roma 5:20).
Imbinglay ni Presidente David O. McKay ti analohia maipapan iti maysa a barito a dumanin malmes bayat ti panaglangoyna a kaduana dagiti gagayyemna: “Nagasat, ta adda maysa a kalmado ken alisto a nagtignay, nanggutad iti maysa nga atiddog a kayo manipud iti alad a willow ket siiiggem iti maysa nga ungtona nga inyasideg iti malmalmesen nga ubing [a]dagus a nangpetpet iti nairut iti daytoy ket naisalakan.
“Imbaga ti amin nga ubbing a lallaki nga utang ti mannakigasanggasat a barito ti biagna iti ubing a lalaki a nangipamuspusan iti pannakaispalna.
“Awan duadua a daytoy ti kinapudno; ket iti baet ti pamuspusan nga impaayna kenkuana, no saan a ginundawayan daytoy ti barito, no saanna nga inaramid ti amin a kabaelanna segun iti bilinna, mabalin a nalmes koma isuna, iti baet ti nabanuaran a tignay ti kapadana a barito” (David O. McKay, “The Gospel of Work,” Instructor, Ene. 1955, 1).
No maipapan iti saludsod no maisalakantayo man babaen ti pammati wenno aramid, insurat ti awtor a Kristiano a ni C. S. Lewis: “Daytoy para kaniak ket [kasla] panagsaludsod no ania a tadem iti maysa a paris ti getteng ti kapatgan” (Mere Christianity, 148).
Senario 1
“Ti pannakaisalakan ket saan a magatang iti kuarta ti panagtungpal; magatang daytoy babaen iti dara ti Anak ti Dios [kitaen iti Dagiti Aramid 20:28]. …
“Ti parabur ket maysa a sagut ti Dios, ken ti tarigagaytayo nga agbalin a managtungpal iti tunggal maysa kadagiti bilin ti Dios ket panangtulong ti mortal nga imatayo nga umawat iti daytoy sagrado a sagut manipud iti Nailangitan nga Amatayo” (Dieter F. Uchtdorf, The Gift of Grace,” Ensign wenno Liahona, Mayo 2015, 109–10).
Senario 2
“No sagut ti Dios ti parabur, apay ngarud a napateg unay ti panagtungpal kadagiti bilin ti Dios? Apay a masingatayo kadagiti bilin ti Dios—wenno panagbabawi, para iti dayta a banag? …
“Ngarud, ti panagtungpaltayo kadagiti bilin ti Dios ket agbalin a kadawyan a bunga ti awan patinggana nga ayat ken panagyamantayo iti kinasayaat ti Dios. Daytoy a kita ti napudno nga ayat ken panagyaman ket namilagruan a mangikaduanto kadagiti aramidtayo iti parabur ti Dios” (Dieter F. Uchtdorf, “The Gift of Grace,” Ensign wenno Liahona, Mayo 2015, 109).
Ti agtultuloy a panagkasapulantayo iti parabur.
“Kas nayon iti panagkasapulan a parabur para iti kangrunaan a pannakaisalakanyo, kasapulanyo daytoy pangpabael a bileg iti inaldaw a panagbiagyo. Bayat ti yaasidegmo iti Nailangitan nga Amam iti kinapasnek, kinapakumbaba, ken kinaemma, itag-aynaka ken papigsaennakanto babaen ti paraburna (kitaen iti Dagiti Proverbio 3:34; 1 Pedro 5:5; DkK 88:78; 106:7–8). Ti panagpannuray iti paraburna ket mangpabael kenka a rumang-ay ken dumur-as iti kinalinteg” (Napudno iti Pammati, 78).
Panangpadur-as iti Panangisurotayo
Naparegta ti awagmo. Kas maysa a mannursuro, inawagannaka ti Apo a mangbendision kadagiti annakna. Kayat ti Apo nga agballigika, tapno iti kasta no agbiagka a maikari iti tulongna, itednanto kenka ti paltiing a kalikagumam a gun-oden. (Kitaen iti Panangisuro iti Wagas ti Mangisalakan, .)