“Juļae 12–18. Katak im Bujen Ko 77–80: ‘Inaaj Tōlļo̧k Kom̧,’” Itok, Ļoor Eō—N̄an Jabōt Jikuuļ: Katak im Bujen ko 2021 (2020)
“Juļae 12–18. Katak im Bujen Ko 77–80,” Itok, Ļoor Eō—N̄an Jabōt Jikuuļ: 2021
Going Home, jān Yongsung Kim
Juļae 12–18
Katak im Bujen Ko 77–80
“Inaaj Tōlļo̧k Kom̧”
Keememej bwe m̧akūtkūt ko ilo laajrak in rej elmakot wōt. Ilo am̧ lukkuun jar ilo am̧ ekkatak Katak im Bujen Ko 77–80, Jetōb enaaj tōl eok n̄an jeļā wāween eo em̧m̧an tata n̄an katakin kūlaaj eo am̧.
Je En̄jake ko Rej Im̧we Eok
Kajjitōk bwe ren Kwaļo̧k
Jet iaan membōr ro ilo kūlaaj eo remaron̄ m̧ōņōņō in kwaļo̧k ļōmņak ko aer eļan̄n̄e kwoj kajjitōk ippāer m̧oktaļo̧k. Ļōmņak in kepaak jet iaer jejjo raan m̧oktaļo̧k jān iien kūlaaj n̄an kajjitōk eļan̄n̄e renaaj itok ilo aer pojak n̄an kwaļo̧k juon men me ekar im̧we er jān Katak im Bujen Ko 77–80.
Katakin Katak eo
Anij ej kwaļo̧k men ko An rettino n̄an ro me rej kappukot n̄an jeļā kaki.
-
Ro uwaan kūlaaj eo remaron̄ kwaļo̧k ļōmņak ko aer rej loi kōn kōkaļļe ko ilo bok in Revelesōn ilo iien aer ekkatak jān jekjen 77 ilo wiik in. Kōnono kōn uwaak ko an Josep Smith me ekar bōke emarōn tōl n̄an juon kōmeļeļe kōn wāween an ro uwaan kūlaaj eo kappukot jeļā n̄e rej ekkatak jān jeje ko rekwojarjar. Ta eo jej ekkatak jān kain kajjitōk rōt in me Josep ekar kajjitōk kake? Ro uwaan kūlaaj eo remaron̄ kōņaan kwaļo̧k en̄jake ko aer n̄e kajjitōk ko aer ikkijeen gospel eo ej tōl n̄an jeļā eļap.
Irooj enaaj tōlļo̧k kōj.
-
N̄an jino juon kōmeļeļe kōn Katak im Bujen Ko 78:17–19, komaron̄ kwaļo̧k pija in jejjo uwaan kūlaaj eo āinwōt ajri ro (kajjitōk ippāer m̧okta n̄an boktok pija kein n̄an kūlaaj eo). Kōtļo̧k bwe kūlaaj eo en kajidede wōn eo ilo pija eo. Ro uwaan kūlaaj eo me rekar boktok pija ko remaron̄ kōnono kōn wāween aer kar oktak jān pija ko jet m̧oktaļo̧k. Innem kūlaaj eo emaron̄ riit Katak im Bujen Ko 78:17–19 im kejo̧kļo̧kjeņ kōn kajjitōk ko āinwōt kein: Ewi wāween ad āinwōt ajri jiddik rein n̄an Irooj? Ilo wāween ta eo Ekōņaan bwe jen erom̧ āinwōt ajri ro, (lale Mosaia 3:19), im ilo wāween ta Ekōņaan bwe jen eddōkļo̧k? Ta kapilōk eo Ekar letok n̄an kōj ilo eoon kein n̄an jipan̄ kōj eddōkļo̧k?
N̄an kadepakpakļo̧k jeļā eo an ro uwaan kūlaaj eo kōn wāween an Irooj maron̄ “tōlļo̧k [kōj]” (eoon 18), ļōmņak n̄an kwaļo̧k enaan eo ilo Kein Jipan̄ Ko Jet.
Kūr eo n̄an jerbal n̄an Anij eļapļo̧k an aorōk jān ia eo jej jerbal ie.
-
Emaron̄ lōn̄ armej ilo kūlaaj eo am̧ ro me rej inepata ilo jinoin kōn juon kūr me rekar bōke ilo ward ak branch ak kōn jikin ko kar jitōn̄ er bwe ren jerbal ie āinwōt juon mijinede. Jejjo iaer remaron̄ kōņaan kwaļo̧k en̄jake ko aer. Ewi wāween an kapilōk eo an Irooj ilo Katak im Bujen Ko 80:3 jipan̄ kōj ilo jekjek kein? Ta meļeļein naan in “ejjab aorōk”? Ak naan in “kom̧ jamin bōd”? Ta eo emaron̄ ļapļo̧k an aorōk n̄an Irooj n̄e ej itok n̄an kūr ko ad? Ļōmņak ko an Elder David A. Bednar kōn jekjen 80 ilo an kwaļo̧k “Kūr n̄an Jerbal in” remaron̄ bar lukkuun jipan̄ (Ensign ak Liaona, Māe 2017, 68).
-
Revelesōn ko ilo jekjen 79 im 80 ijo ekar jino kwaļo̧k ie n̄an armej ro kar jino kūr er n̄an kwaļo̧k gospel eo, ak ewōr ie pedped ko me jemaron̄ aolep mour kaki ilo ad jerbal n̄an Irooj. N̄an jipan̄ ro uwaan kūlaaj eo kappukot pedped kein, komaron̄ kajjitōk ippāer n̄an kōtōnn̄e ewōr juon m̧ōttan ej kab kobatok ilo Kabun̄ in im ej kab kein kajuon an wōr an kūr. Kajjitōk ippān ro uwaan kūlaaj eo n̄an je leta in rie im kapilōk n̄an eo m̧ōttāer, im rōjan̄ er n̄an kouti jān jekjen ko 79 im 80 ilo aer kōm̧m̧ane. Innem jejjo ro uwaan kūlaaj eo remaron̄ kwaļo̧k ta eo rekar je.
Irooj ej bun̄ buruōn n̄e jej jerbal n̄an E im ro jet.
Kein Jipan̄ ko jet
Irooj enaaj tōl kōj kōn Jetōb Kwojarjar.
Būreejtōn Henry B. Eyring ekar kwaļo̧k juon an en̄jake ke ekar jar n̄an bōk tōl kōn juon jokālet eo eaorōk im ekar ekkatak n̄an bōk tōl jān Irooj.
“Ikar jar, ak eto āinwōt ejjeļo̧k uwaak. M̧okta jān an jimmarok, juon en̄jake ekar itok ippa. Ekajoorļo̧k jān jabdewōt en̄jake ko ikar en̄jaki jān ke ikar dik. Buruō im aō ļōmņak āinwōt rej eddōkļo̧k ilo an ejjeļo̧k ainikien. Ekar wōr juon aenōm̧m̧an ilo ainikein eo elur ilowa.
“Jon̄an aō ilbōk, ikar jar ippa make, ‘Jemedwōj Ilan̄, ejjab aorōk ta eo ikōņaan. Ijjab kea n̄an jidik ta eo ikōņaan. Ikōņaan wōt bwe En Ankilaam̧. En̄ ņe ej aolep men ko ikōņaan. Jouj im ba n̄an n̄a ta eo in kōm̧m̧ane.
Ilo tōre eo ikar en̄jake āinwōt juon ļur ilowa āinwōt ijjan̄in kar en̄jake. Im enaan eo ekar itok, im ikar lukkuun jeļā ej jān wōn. Ekar allikar ta eo ikar aikuj kōm̧m̧ane. Ekar ejjeļo̧k kallim̧ur ikkijeen ta eo ekar waļo̧k. Ekar juon wōt kein kam̧ool bwe ikar juon ajri ke kar ba n̄an eō iaļ ta eo ej tōl eō n̄an jabdewōt jikin eo Ekar kōņaan bwe in etal ie ļo̧k” (“As a Child,” Ensign ak Liahona, May 2006, 16).
Kōkōm̧anm̧anļo̧k Ad Katakin
Jino kōn eoon ko. M̧okta jān am̧ oktakļo̧k n̄an kein jipan̄ ko, tiljek ilo am̧ ekkatak im kejo̧kļo̧kjeņ kōn eoon ko. Menin enaaj karuwaineneik Jetōb eo n̄an jipan̄ eok mour ekkar n̄an ta eo kokar ekkatak ilo am̧ katakin (lale Teaching in the Savior’s Way, 12).