Refuge, jān Shaelynn Abel

Juļae 5–11

Katak im Bujen Ko 76

“Eļap Naaj Men Eo Wōņāer im Indeeo Naaj Aer Aiboojoj”

Āinwōt elōn̄ visōn ko kar rekooti ilo jeje ko rekwojarjar, visōn eo ilo jekjen 76 ekar itok ke Josep Smith im Sidney Rigdon rekar “koļmānļo̧kjeņ” kake eoon eo (eoon 19). Komaron̄ barāinwōt bōk revelesōn—ekoba tōl eo kōn wāween n̄an katakin—ilo am̧ kejo̧kļo̧kjeņ kōn Katak im Bujen Ko 76.

Je En̄jake ko Rej Im̧we Eok

Kajjitōk bwe ren Kwaļo̧k

N̄an jipan̄ ro uwaan kūlaaj eo kōnono kōn ta eo rekar riit ilo Katak im Bujen Ko 76, komaron̄ kajjitōk ippāer n̄an antooņeļo̧k juon eo m̧ōttāer jān bar juon kabun̄ ej kajjitōk ta eo jej tōmak kake kōn mour eo ālkin mej. Ta eoon ko jān jekjen 76 remaron̄ kwaļo̧k n̄an ro m̧ōttāer? Ro uwaan kūlaaj eo remaron̄ kwaļo̧k juon men jān “Voices of the Restoration: Testimonies of ‘the Vision’” me ekar im̧we er.

Katakin Katak eo

Katak im Bujen Ko 76

Lo̧mo̧o̧r ej itok kōn Jisōs Kraist, eo Nejin Anij.

• Elōn̄ armej, n̄e rej ļōmņak kōn jekjen 76, ļōmņak kōn karōk in lo̧mo̧o̧r im aiboojoj ko jilu an kingdom ko. Ewi wāween am̧ maron̄ jipan̄ ro uwaan kūlaaj eo lo bwe unleplep in revelesōn in ej Rilo̧mo̧o̧r Jisōs Kraist? Komaron̄ kajjitōk ippān ro uwaan kūlaaj eo n̄an kwaļo̧k juon eoon me rej lo ilo jekjen 76 me ekar kōkajoorļo̧k tōmak eo aer ilo Jisōs Kraist. Eļan̄n̄e rej aikuj jipan̄, komaron̄ kwaļo̧ki eoon ko āinwōt 1–5, 20–24, 39–43, 69, 107–8.

• N̄an jipan̄ ro uwaan kūlaaj eo kappukot oktak ko ikōtaan ro me rej pād ilo ļal ko jilu reaiboojoj, je ioon bo̧o̧t eo Celestial, eoon ko 50–70, 92–96; Terrestrial, eoon ko 71–79, 97; im Telestial, eoon ko 81–90, 98–106, 109–12. Ro uwaan kūlaaj eo remaron̄ kālet juon iaan eoon kein im kappukot naan ko me rej kōmeļeļeik jem̧jerā eo ikōtaan Jisōs Kraist im armej ro me renaaj pād ilo kingdom eo ekkar. Ta eo naan kein rej katakin kōj kōn ad jet rikaļoor an Jisōs Kraist? Ewi wāween ad maron̄ kōkajoorļo̧k jem̧jerā eo ad Ippān im ippān Jemed? Ewi wāween Aer jipan̄ kōj? Ta meļeļein n̄an “kajoor ilo naan in kam̧ool kōn Jisōs”? (eoon 79).

  

  Josep Smith ekar lo visōn kōn aiboojoj an laļ ko ilo juon ruum āinwōt in.

Katak im Bujen Ko 76:5–10, 113–18

Ittino ko an Anij remaron̄ wōt “meļeļe kōn kajoor eo an Jetōb Kwojarjar.”

• Emaron̄ kaitoktoklimo n̄an ro uwaan kūlaaj eo am̧ n̄an jeļā bwe ejjab aolep membōr ro an Kabun̄ in epidodo aer errā kōn revelesōn eo ilo jekjen 76. N̄an waanjon̄ak, Brigham Young ekar ba: “Iminene eo aō rekar rōt in, ke Visōn eo ekar jino itok n̄an n̄a, ekar kajju itok ilo an jab ekkeijel im ekar oktak jān jeļā eo aō m̧okta. Ikar ba, Kōttar jidik. Ikar jab makoko kake; ak ikar jab meļeļe kake.” Ekar kōmeļeļeik bwe ekar aikuj “ļōmņak im jar, n̄an riit im ļōmņak, m̧ae ikar lukkuun meļeļe kake kōn n̄a make” (ilo “The Vision,” Revelations in Context, 150). Ta eo jej ekkatak jān en̄jake in an me emaron̄ jipan̄ kōj n̄e Anij ej kwaļo̧k men ko me reokatak jān lukkuun jeļā eo ad? Ta eo Katak im Bujen Ko 76:5–10, 113–18 ej katakin kōj kōn wāween ad maron̄ bōk “ittino ko an ankilaan [Anij]”? (eoon 10).

Katak im Bujen Ko 76:50–70, 92–95

Anij ekōņaan bwe aolep ajri ro Nejin ren m̧ōņōņō kōn aiboojoj eo an celestial Ippān.

• N̄an jet, emaron̄ kam̧ōjņo̧ņo̧ ak ļap n̄an ļōmņak kōn aolep men me emenin aikuj n̄an kōj n̄an karbōb n̄an celestial kingdom. Ļōmņak kōn wāween am̧ maron̄ jipan̄ ro uwaan kūlaaj eo pukot kōjatdikdik “kōn Jisōs rijojomar eo” (eoon 69). N̄an waanjon̄ak, komaron̄ kajjitōk ippāer n̄an riiti eoon ko 50–70 im 92–95. Kajjitōk ippāer n̄an kwaļo̧k wāween aer maron̄ jelm̧ae juon eo ej ba, “Mour kōn gospel eo ilo laļ in rainin elukkun pen; Ijjab jeļā n̄e eļap tokjen” ak “Ijjab lukkun em̧m̧an n̄an celestial kingdom.” Ta eo jemaron̄ ba n̄an im̧we ak rōjan̄ armej in?

Kōkōm̧anm̧anļo̧k Ad Katakin

Mije wōt Rilo̧mo̧o̧r im katak ko An. “Wōnm̧aanļo̧k kajjitōk ippam̧ make, ‘Ewi wāween an ta eo ij katakin naaj jipan̄ ro uwaan kūlaaj eo aō kalōk tōmak ilo Kraist, ukweļo̧k, kōm̧m̧an im kōjparok bujen ko ippān Anij, im bōk Jetōb Kwojarjar eo?’” (Teaching in the Savior’s Way, 20).