“Abril 27–Mayo 3. Mosiah 7–10: ‘Babaen ti Bileg ti Apo,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Abril 27–Mayo 3. Mosiah 7–10,” Umaykayo, Sumurot Kaniak—Para iti Sunday School: 2020
Minerva Teichert (1888-1976), Ni Ammon iti sanguanan ni Ari Limhi, 1949-1951, lana iti masonite, 35 15/16 x 48 pulgada. Museu ti Arte iti Brigham Young University , 1969.
Abril 27–Mayo 3
Mosiah 7–10
“Babaen ti Bileg ti Apo”
Mabalin a napateg a resource daytoy a balabala, ngem nasken a mangsuplemento daytoy, saan a mangsukat, iti pammaregta a maawatmo bayat ti panagadalmo iti Mosiah 7–10.
Isuratmo Dagiti Impresionmo
Yawis ti Panagbibinninglay
Masansan a mabalin a makatulong a paglilinnawagan a kas maysa a klase dagiti bendision nga aw-awaten dagiti miembro ti klase bayat ti panangikarigatanda a mangaramid kadagiti pagtaenganda a maysa a sentro a pagsursuruan iti ebanghelio. Ania dagiti bersikulo manipud iti Mosiah 7–10 nga inutob wenno inlawlawag dagiti miembro ti klase iti pagtaenganda kabayatan ti lawas? Kasano nga inaringan daytoy ti biagda?
Isuro ti Doktrina
No umasidegtayo iti Apo, agtalek Kenkuana, ken agserbi Kenkuana, isalakannatayonto.
-
No inadal dagiti miembro ti klase ti Mosiah 7:14–33, mabalin a pinaregta ida ti padpadas dagiti tao ni Limhi tapno tapno agbabawi ken umasidegda iti Apo para iti pannakaisalakan. Tapno maparegta ti panaglilinnawag, mabalinmo nga awisen ti maysa a miembro ti klase nga umay a nakasagana a manggupgop iti no kasano a natnag dagiti tao ni Limhi iti pannakaadipen. Mabalin nga ibinglay ti sumagmamano a dadduma pay iti no ania ti nasursuroda manipud ken ni Limhi maipapan iti kaadda ti pammati ken namnama iti Mangisalakan. Ania ti masursurotayo manipud kadagiti palagip ni Limhi iti no kasano nga insalakan ti Dios dagiti taona? (kitaen kadagiti bersikulo 19–20). Mabalinmo nga idawat kadagiti miembro ti klase a mangibinglay kadagiti pakaammuan iti nasantuan a kasuratan wenno bukod a padas a nangparegta kadakuada nga agtalek iti Dios.
-
Addaan dagiti miembro ti klasem iti gundaway a mangparegta iti dadduma nga umasideg iti Dios no addada iti pannakaadipen ti basol wenno panagsagaba manipud iti dadduma pay a rigrigat. Nalabit a makatulong kadakuada a mangadal iti no kasano a pinaregta ni Limhi dagiti taona. Mabalin nga umuna basaenda ti panangiladawan iti Mosiah 7:20–25 maipapan iti pannakaadipen dagiti tao ni Limhi ken mangpanunot iti maysa a tao nga am-ammoda a maipaspasango iti pannakaadipen iti basol. Kalpasanna, mabalinda nga ilasin dagiti kinapudno nga insuro ni Limhi iti Mosiah 7:18–20, 33 a makatulong kadagiti taona. Kasano a masurottayo ti pagwadan ni Limhi bayat ti panangparegtatayo kadagiti ipatpategtayo nga agtalek iti Dios?
-
Tapno matulongan dagiti miembro ti klase a makaawat a nasaysayaat iti tulong nga ited ti Dios kadatayo iti panawen ti rigat, mabalinyo a kantaen ken paglilinnawagan ti himno a “Mannubbot ti Israel” (Dagiti Himno, blng. 6) wenno sabali pay a kanta a mangiladawan no kasano nga isalakannatayo ti Mangisalakan. Ania ti inayon ti Mosiah 7:17–20; Ether 12:27; ken 2 Taga Corinto 12:7–10 iti pannakaawattayo? Nalabit a mabalin nga ibinglay dagiti miembro ti klase dagiti padas a nakaisalakanan kadakuada ti Apo, uray pay iti bassit a wagas, gapu ta nangipakita kadakuada iti pammati Kenkuana.
Naparsua ti tao iti ladawan ti Dios.
-
Kadagitoy a bersikulo, inlawlawag ni Limhi ti sumagmamano kadagiti kinapudno nga insuro ni Abinadi a narigat nga awaten dagiti tao. Ania dagiti kinapudno a mailasin dagiti miembro ti klase kadagitoy a bersikulo? Kasano nga aringan dagitoy a kinapudno ti wagas a pakakitaantayo iti Dios ken ti bagbagitayo?
Mangted ti Apo kadagiti propeta, mammadto, ken mammaltiing a pagsayaatan ti sangkataw-an.
-
Naaddaan iti gundaway ni Ammon a mangilawlawag ken ni Limhi iti akem ti mammadto ken mangipaneknek maipapan iti kinapateg dagiti propeta, mammadto ken mammaltiing. Mabalin a kayatmo nga ilawlawag nga iti aldawtayo, nakanunongan ti Umuna a Panguluen ken Korum dagiti Sangapulo-ket-dua nga Apostol kas propeta, mammadto, ken mammaltiing. Kasano a situturedtayo, kas ken ni Ammon, nga agsarita maipapan iti panagkasapulan kadagiti propeta, mammadto, ken mammaltiing? (kitaen iti Mosiah 8:13–18). Nalabit a mabalin nga agplano dagiti miembro ti klase iti paskil iti social media a makatulong a maipaawat kadagiti dadduma iti akem ti maysa a propeta, mammadto, ken mammaltiing iti aldawtayo. Ania ti nangngegantayo iti kallabes unay a sapasap a komperensia a mabalintayo nga ibinglay kadagiti gagayyem, miembro ti pamilia, ken kaarrubatayo tapno maisuro kadakuada maipapan iti panagkasapulan kadagiti propeta?
-
Kas resulta ti panangbasa iti Mosiah 8:12–19, mabalin a kayatmo wenno dagiti dadduma pay a miembro ti klase a mangyebkas iti pammaneknekmo maipapan kadagiti propeta, kas iti inaramid ni Ammon, wenno ti panagyamanmo para iti paltiing babaen kadagiti propeta, kas iti inaramid ni Limhi (kitaen iti Mosiah 8:19).
-
Ni Propeta Joseph Smith ti mammadto nga agtakder iti ulo daytoy a dispensasion (kitaen iti D&K 21:1). Mabalin a kayatmo nga idawat kadagiti miembro ti klase a mangibinglay no ania ti masursuroda manipud iti panangiladawan ni Ammon iti maysa a mammadto (kitaen iti Mosiah 8:13–18 Kalpasanna mabalinda a paglilinnawagan dagiti wagas a nakapagbalinan a mammadto ni Joseph Smith. (D&C 135:3 and Moses 6:36 mabalin a makatulong iti daytoy a panaglilinnawag.)
Mabalintayo a sanguen dagiti karittayo “babaen ti bileg ti Apo.”
-
Makita ti ragup ti balikas a “babaen ti bileg ti Apo” iti mamindua iti kasuratan ni Zeniff maipapan kadagiti taona ken dagiti pannakirangetda kadagiti Lamanite—iti Mosiah 9:14–19 ken 10:6–10. Nalabit a mabalin a makapagsukisok dagiti miembro ti klase kadagitoy a bersikulo ken ibinglay no ania ti riknada a kayat a sawen daytoy a ragup ti balikas. Kasano a magun-odtayo “ti bileg ti Apo”? Allukoyem dagiti miembro ti klase a mangibinglay kadagiti padas a sibaballigi a nakaipasanguanda kadagiti pannubok babaen ti bileg ti Apo.
Mabalin a makaimpluensia dagiti pilitayo kadagiti kaputotan.
-
Mabalinmo nga awisen dagiti miembro ti klase a siuulimek a mangbasa iti Mosiah 10:11–17 ken mangsapul kadagiti wagas a nakaaringan dagiti Lamanite kadagiti pili ken pammati dagiti kapuonanda. Ania ti isingasing daytoy maipapan kadagiti epekto dagiti pilitayo a mabalin nga adda kadagiti dadduma? Kasano ti kayattayo a panangiladawan iti bagbagitayo ken dagiti pamiliatayo iti maysa wenno dua a kaputotan? Nalabit a mabalin nga isurat dagiti miembro ti klase ti sumagmamano kadagiti banag a kayatda a mairaman iti kasta a panangiladawan.
-
Ti maysa a simple nga adalen a banag [object lesson]—kas maysa a linia dagiti domino—ket makatulong a mangiladawan kadagiti mabalin nga epekto dagiti pili dagiti tao nga adda iti an-annaboda [posterity]. Kalpasanna, mabalinmo nga awisen dagiti miembro ti klase a mangbasa iti Mosiah 10:11–17 ken paglilinnawagan no kasano a dagiti pammati ken ugali dagiti Lamanite ket nalaus nga inapektuan dagiti pili nga inaramid dagiti kapuonanda kadagiti immun-una a siglo. Imbinglay ni Elder Donald L. Hallstrom, a masarakan iti “Dagiti Nainayon a Resources,” ket sabali pay a pagarigan a mabalinmo nga ibinglay. Nalabit a mabalin a panunoten dagiti miembro ti klase maipapan kadagiti estoria manipud iti biagda wenno pakasaritaan ti pamiliada maipapan iti maysa a nalinteg a tao a mangim-impluensia kadagiti kaputotan para iti pagsayaatan.
Yallukoy ti Panagsursuro iti Pagtaengan
Daytoy a lawas, nasursuro dagiti miembro ti klase maipapan iti negatibo nga epekto dagiti pili dagiti Lamanite kadagiti annakda. Ipakaammom kadagiti miembro ti klase nga iti Mosiah 11–17 basaendanto ti maipapan iti maysa a tao a ti kinalintegna ket namagbalbaliw iti biag ti adu.
Dagiti Mainayon a Resources
Makaapekto dagiti pangngeddengtayo kadagiti kaputotan.
Imbinglay ni Elder Donald L. Hallstrom no kasano a binendisionan ti kinapudno dagiti lelang ken lelongna dagiti masakbayan a kaputotan:
“Addaan iti dua nga annak da lelang ken lelongko, maysa nga anak a lalaki (ti amak) ken maysa nga anak a babai. … Nagkallaysa ti [anakda a babai] idi 1946 ken kalpasan ti uppat a tawen ninamnamada ti maysa nga ubing. Adda maysa a banag a naisangsangayan para kadagiti nagannak tapno mangnamnama iti maysa nga anak a babai (iti daytoy a pagarigan ti kakaisuna nga anak a babai) nga agpasngay iti umuna a gundaway. Awan ti makaammo nga agdadagsen isuna iti singin. Daksanggasat, ta natay isuna ken dagiti singin kabayatan ti panagpasngayna.
“Nagladingit da lelang ken lelongko. Nupay kasta, ti panagleddaangda, ket dagus a nangyasideg kadakuada iti Apo ken iti Pannubbotna. Saanda a pinanunot no apay a napasamak daytoy, ken no asino ti mabalin a mapabasol, impamaysada ti nagbiag a nalinteg. Awanan iti kinabaknang da lelang ken lelongko; iti kaano man saanda a naibilang kadagiti napili a tattao iti kagimongan; iti kaano man dida pay nagiggem iti nangato a saad iti Simbaan—gagangay laeng a napasnekda a Santo iti Ud-udina nga Aldaw. …
“Ti kinapudno da Lelong Art ken Lelang Lou, nangnangruna no maipasangoda iti rigat, ket inimpluensiaanna ti uppat a kaputotan a simmaruno. Direkta ken napalaus, a daytoy ti nangapekto iti anakda a lalaki (ti amak), ken ti inak idi natay ti bukod nga anak a babai dagiti nagannak kaniak, ti inaudi nga anakda, gapu kadagiti komplikasion a gapuanan ti panagpasngay. Iti 34 a tawenna, pimmusay isuna 10 nga aldaw kalpasan ti panagpasngay, a pinanawanna ti 4 nga annak, 10 nga aldaw agingga iti 8 ti tawenna. Babaen ti pagwadan a naimatanganda iti napalabas a kaputotan, dagiti nagannak kaniak—awanan iti panagkedked—immasidegda iti Apo para iti pannakalinglingay” (“Turn to the Lord,” Ensign wenno Liahona, Mayo 2010, 78–79).
Panangpadur-as iti Panangisurotayo
Dumngeg. “Ti panagdengngeg ket maysa nga aramid ti ayat. … Dawatem iti Nailangitan nga Ama a tulongannaka tapno maawatam no ania ti isao dagiti miembro ti klasem. Kabayatan ti panangikasom a nasayaat kadagiti nayebkas ken saan a nayebkas a mensaheda, ad-adda a maawatamto dagiti kasapulanda, pakaseknanda, ken tarigagayda.” (Panangisuro iti Wagas ti Mangisalakan, 34).