“Mayo 11–17. Mosiah 18–24: ‘Simrektayon iti Maysa a Katulagan Kenkuana,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Mayo 11–17. Mosiah 18–24,” Umaykayo, Sumurot Kaniak—Para iti Sunday School: 2020
Minerva K. Teichert (1888-1976), Panaglibas ni Ari Limhi ken dagiti Taona, 1949-1951, lana iti masonite, 35 7/8 x 48 pulgada. Museu ti Arte iti Brigham Young University , 1969
Mayo 11–17
Mosiah 18–24
Simrektayon iti Maysa a Katulagan Kenkuana
Bayat ti panangbasam iti Mosiah 18–24, panunotem dagiti tao a sursuruam. Ania ti ammom maipapan kadakuada? Maparegta ti Espiritu Santo dagiti kapanunotam ken tulongannaka a mangilasin kadagiti kinapudno ti ebanghelio nga agbalinto a kapatgan kadakuada.
Isuratmo Dagiti Impresionmo
Yawis ti Panagbibinninglay
Awisem dagiti miembro ti klase a mangisingasing iti sumagmamano a pagbatayan, wenno dagiti palawag maipapan iti kinapudno, a nasarakanda kabayatan ti panagadalda iti Mosiah 18–24. (Nailista ti sumagmamano a pagbatayan iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia.) Allukoyem ida a mangibinglay kadagiti bersikulo manipud iti Mosiah 18–24 a mangisuro kadagitoy a pagbatayan. Ania dagiti padas a napasaranda babaen kadagitoy a kinapudno?
Isuro ti Doktrina
Iraman ti panagbuniag ti katulagan nga agserbi iti Dios ket agtakder kas maysa a saksi Kenkuana.
-
Bayat ti panangbasam iti Mosiah 18 ken agsagana a mangisuro, mabalin a mariknam a naparegtaka a mangtulong kadagiti miembro ti klasem a mangrebyu ken mangutob iti katulagan ti panagbuniagda. Daytoy ti maysa a wagas a mabalinmo nga aramiden daytoy: Awisem dagiti miembro ti klase nga agtitinnulongda mangilista iti pisarra iti adu a ragup ti balikas a malagipda a mainaig iti panangiladawan ni Alma iti katulagan iti panagbuniag. No nalpasdan, mabalin a basaen dagiti miembro ti klase ti Mosiah 18:8–10 ken mangnayon iti ania man a banag iti listaan a mabalin nga awan ditoy. (Mabalinda pay nga inayon ti ragup dagiti balikas manipud iti D&K 20:37, 77, ken 79.) Mabalin a makatulong a saludsodem kadakuada no ania ti kaipapanan ti tunggal ragup ti balikas ken no ania ti maaramidda tapno agtungpal iti dayta a paset ti katulagan iti panagbuniag. Kasano a bendisionannatayo ti Apo bayat ti panagkagumaantayo nga agtungpal iti pasettayo iti katulagan?
-
Bayat ti panagsagana dagiti pasurot ni Alma a mabuniagan, insuro ni Alma kadakuada nga iti yaay “iti salinong ti Dios” ket agkasapulan iti panagaramid iti katulagan a mangsurot iti Dios ken mangaywan kadagiti annakna (kitaen iti Mosiah 18:8–9). Mabalin dagiti miembro ti klase ti mangiburay kadagiti padas, wenno maysa a tao nga am-ammo ti pinapigsa ti maysa a tao a mangipatpatungpal iti katulagan iti panagbuniag a nailadawan iti Mosiah 18:8–10. Kas pagarigan, kaano a nangliwliwa kadakuada ti maysa a tao wenno nakatulong kadakuada a mangibaklay kadagiti dagensenda? Kasano a nangparegta kadatayo nga agtungpal iti katulagantayo dagitoy a padas? Mabalinmo pay nga ipalagip kadagiti miembro ti klase maipapan ti no kasano a nangitakder ni Abinadi “kas [maysa a saksi] ti Dios iti amin a kanito ken iti amin a banag, ken iti amin a lugar” (bersikulo 9). Ania ti masursurotayo manipud iti pagwadanna bayat ti panagkalikagumtayo a mangipatungpal iti daytoy a paset ti katulagantayo iti panagbuniag?
No mabuniagantayo, makitulagtayo nga agserbi iti Dios ken kadagiti dadduma.
Nagkaykaysa dagiti tao ti Dios.
-
TiMosiah 18:17–31 ket mangiladawan kadagiti bilin nga inted ni Alma kadagiti taona tapno matulongan ida nga agbalin a sangsangkamaysa a kas miembro ti Simbaan ni Cristo. Tapno matulongan dagiti miembro ti klase a mangpanunot maipapan iti no kasano a mayaplikar dagitoy a bilin kadakuada, mabalinmo nga idawat kadakuada a mangsukisok kadagitoy a bersikulo iti babassit a grupo ket mangaramid iti listaan dagiti bilin a masarakanda. Kasano a ti panangsurot kadagitoy a bilin ket makatulong kadagiti miembro ti ward a makarikna nga ad-adda a nakaykaysada? Adda kadi ania man a panggep a tun-oyen a maaramid dagiti miembro ti klasem tunggal maysa wenno kas maysa a grupo a sumurot iti pagwadan dagiti tao ni Alma?
-
Adda dagiti tao a masdaaw, apay a kasapulantayo ti simbaan? Tapno makatulong kadagiti miembro ti klase a mangsungbat iti daytoy a saludsod, mabalinmo nga idrowing iti pisarra ti maysa a balabala ti pasdek ti maysa a Simbaan ken isurat daytoy a saludsod iti babana. Kalpasanna mabalin a sukisoken dagiti miembro ti klase ti Mosiah 18:17–31 ket isuratda iti pisarra dagiti mabalin a sungbat kadagitoy a bersikulo. Mabalinda pay a saraken dagiti sungbat kadagiti adaw manipud iti mensahe ni Elder Christofferson iti “Dagiti Nainayon a Resources.” Nalabit a mabalinmo a payakem iti sumagmamano a miembro ti klase no kasano a sungbatanda ti maysa a gayyem a saan a mamati a kasapulan ti maysa a nabukel a simbaan. Apay nga agyamantayo iti panagkamengtayo iti Simbaan?
-
Idinto a kayattayo a panunoten a marikna ti tunggal maysa ti nabara a pannakapasangbay iti simbaan, daksanggasat, ta saan nga ar-aramiden ti tunggal maysa. Ania ti masursurotayo manipud kadagiti tao ni Alma iti Mosiah 18:17–31 a makatulong kadatayo a mangparnuay iti maysa a lugar a pakariknaan ti amin a maibilangda ditoy?
Maaramid ti Apo a nalag-an dagiti dagensentayo.
-
Dagiti dagensen nga ibaklay dagiti miembro ti klasem ket maigidiat kadagiti dagensen a sinagaba dagiti tao ni Limhi wenno dagiti tao ni Alma bayat ti kaaddada iti pagbaludan. Ngem mayaplikar dagiti mensahe dagitoy a pakaammuan iti asino man a makarikna iti napalaus a rigat wenno narikut a kasasaad. Awisem dagiti miembro ti klase a mangibinglay no ania ti masursuroda manipud iti Mosiah 21–24 maipapan iti no kasano a matulongannatayo ti Dios iti baet dagiti pannuboktayo. (Para iti ababa a pakagupgopan dagitoy a pakaammuan, kitaen iti L. Tom Perry, “The Power of Deliverance,” Ensign wenno Liahona, Mayo 2012, 94–97.) Mabalin pay nga ibinglay dagiti miembro ti klase dagiti panawen idi, kas kadagiti tao ni Alma, nakapadasda iti pannakaipatungpal ti kari ti Dios a palag-anenna dagiti dagensenda ken sarungkaranna ida kadagiti rigrigatda (kitaen iti Mosiah 24:14).
-
Mabalin a napateg kadagiti miembro ti klase a mangbubos iti sumagmamano a minuto iti panangisurat iti bukodda a karit a nakaipasanguanda ken panangutobda kadagiti wagas a nangtulongan ti Apo kadakuada a nangibaklay kadagiti dagensenda. Adda kadi dagiti bersikulo manipud iti Mosiah 21–24 a mangparegta kadakuada nga umasideg iti Apo kabayatan ti panagrigat? Kasano a mainaig ti kari ti Apo kadagiti tao ni Alma iti Mosiah 24:14 iti katulagan nga aramidentayo iti Apo iti panagbuniag? (kitaen iti Mosiah 18:8–10).
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti Mosiah 25–28, idawat kadakuada a mangpanunot maipapan iti maysa a tao nga am-ammoda a kimmayakayen iti ebanghelio. Ibagam kadakuada a bayat ti panagbasada kadagitoy a kapitulo, mabalin a masarakanda dagiti nauneg a pannakaammo ken pannakaawat [insights] no kasano a matulonganda dayta a tao nga agsubli.
Dagiti Mainayon a Resources
Apay a kasapulantayo ti Simbaan?
Kinuna ni Elder D. Todd Christofferson: “Maamirisko nga adda dagitay mangibilang iti bagbagida a relihioso wenno naespirituan ngem dida met kayat ti makimisa wenno ti dumar-ay iti simbaan wenno uray pay ti panagkasapulan para iti kasta nga institusion. Para kadakuada ti aramid a mainaig iti relihion ket kabukbukodan laeng. Ngem ti Simbaan ket pinarsuana a nakaisentruan ti espiritualidadtayo—ni Jesucristo. Napateg ti panangisardeng nga ibilang no apay a pinilina nga usaren ti maysa a simbaan, ti Simbaanna, Ti Simbaan ni Jesucristo dagiti Santo iti Ud-udina nga Aldaw, a mangipatungpal iti aramidna ken ti aramid ti Amana.”
Kalpasanna imbinglay ni Elder Christofferson dagiti gapu no apay a binukel ti Apo ti maysa a Simbaan (kitaen iti “Why the Church,” Ensign wenno Liahona, Nob. 2015, 108–11):
-
“Tapno mangikasaba kadagiti naimbag a damag ti ebanghelio ni Jesucristo ken mangannong kadagiti ordinansa ti pannakaisalakan—iti sabali a pannao, mangisangbay kadagiti tao ken ni Cristo.”
-
“Tapno mangaramid iti maysa a komunidad dagiti Santo a mangkanunongto iti tunggal maysa iti ‘nailet ken akikid a dalan nga agturong iti biag nga agnanayon’ [2 Nephi 31:18]. … Kimmappengtayo a sipapammati, isuro ken itandudotayo ti tunggal maysa ken ikagumaanantayo ti agbiag kadagiti kangatuan a pagrukodan ti kinadisipulo.”
-
Tapno “mangidaton iti linawas a panaguummong iti panaginana ken pannakapabaro, maysa a kanito ken lugar a panangiwalin kadagiti nailubongan a pakaseknan ken aramiden—ti Aldaw a Panaginana.”
-
“Tapno manggun-od kadagiti kasapulan a banag a saan a kabaelan nga ipatungpal ti tunggal tao wenno babassit a grupo [a pakaibilangan] dagiti agsagsagaba gapu iti kinakurapay, a mangisangbay] iti ebanghelio iti sangalubongan … [iti pannakaipasdek ken pannakausar] dagiti templo, dagiti balay ti Apo, a mabalin a pakaannongan dagiti napapateg nga ordinansa ken katulagan.”
-
Tapno maaramid a sidadaan a magun-od dagiti tulbek ti priesthood, a babaen daytoy ket “taginayonen dagiti opisial iti priesthood iti Simbaan ti kinatarnaw ti doktrina ti Mangisalakan ken ti integridad dagiti pangisalakan nga ordinansana, … mangtulong a mangisagana kadagiti agtarigagay a mangawat kadakuada, mangukom kadagiti kualipikasion ken pannakaikari dagiti mangyaplikar, ket kalpasanna mangannong kadagitoy … [ken] mangilasin iti agpada a kinapudno ken kinapalso.”