“Pebrero 3–9. 2 Nephi 1–5: ‘Nagbiagkami iti Wagas a Naragsak,’” Umaykayo, Sumurot Kaniak—Para iti Sunday School: Libro ni Mormon 2020 (2020)
“Pebrero 3–9. 2 Nephi 1–5,” Umaykayo, Sumurot Kaniak—Para iti Sunday School: 2020
Da Adan ken Eva, ni Douglas Fryer
Pebrero 3–9
2 Nephi 1–5
“Nagbiagkami iti Wagas a Naragsak”
Rugiam ti naespirituan a panagsaganam babaen ti panangbasam iti 2 Nephi 1–5 ken panangisuratmo kadagiti impresionmo. Ad-adu pay dagiti pagbatayan kadagitoy a kapitulo ngem iti kaadda ti orasmo a mangilawlawag iti maysa a klase, isu a surotem ti Espiritu iti panagsaganam ken ikasom dagiti nauneg a pannakaammo ken pannakaawat [insights] nga imbinglay dagiti miembro ti klase a makatulong kenka a mangikeddeng no ania dagiti pagbatayan nga ipamaysa ken no kasano nga iwanwan ti panagsasarita.
Isuratmo Dagiti Impresionmo
Yawis ti Panagbibinninglay
Nalabit a namarkaan wenno nailistan dagiti miembro ti klasem ti uray maysa laeng a bersikulo iti 2 Nephi 1–5. Tapno marugian ti klase, mabalinmo nga awisen dagiti miembro ti klase a mangibinglay kadagiti bersikulo a napateg kadakuada. Awisem ti klase a manggupgop iti pagbatayan iti doktrina a masursuroda manipud kadagiti bersikulo a naibinglay.
Isuro ti Doktrina
Nawayatayo nga agtignay para iti bagbagitayo.
-
Masansan unay, nga usaren dagiti tao ti kinawaya a panangpilida tapno mangigapu iti nakaro a panagsagaba dagiti dadduma. Isu nga apay a napateg unay ti kinawaya a panagpili iti Nailangitan nga Ama? Nalabit a mabalinmo nga isurat daytoy a saludsod iti pisarra, ket mabalin dagiti miembro ti klase ti agsapul kadagiti sungbat iti 2 Nephi 2:11–30 ket isurat dagiti sungbatda iti pisarra. Kasano a padpadasen ti kabusor ti mangpakapsut iti kinawaya a panagpilitayo? Kasano a tulongannatayo ti Mangisalakan nga “agpili iti wayawaya ken biag nga agnanayon”? (2 Nephi 2:27). Ibilang ti aggigiddan a panangkanta iti maysa a himno maipapan iti kinawaya a panagpili, kas iti “Know This, That Every Soul Is Free” (Hymns, no. 240), ken panangawis kadagiti miembro ti klase a manginayon iti listaanda ti dadduma pay a nauneg a pannakaammo ken pannakaawat [insights] a magun-odda manipud iti himno.
-
Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangilasin iti uppat a kasapulan a kasasaad a mangaramid a posible ti kinawaya a panagpili. Daytoy ti maysa a wagas a pakapagdur-asam no ania ti mabalin a nasursuro dagiti miembro ti klase iti pagtaengan: Isurat ti uppat a kasasaad iti pisarra. Kalpasanna awisem dagiti miembro ti klase a mangibinglay kadagiti palawag manipud iti 2 Nephi 2 a mangisuro no apay a kasapulan dagitoy a kasasaad iti panangragpat iti nadiosan a potensialtayo.
Ti Pannakatnag ken ti Pannubbot ni Jesucristo ket napateg a paset ti plano ti Nailangitan nga Ama.
-
Mamati ti adu a Kristiano a ti Pannakatnag ket maysa a trahedia ken nagaramid ni Eva iti nakaro a biddut. Dagitoy a bersikulo iti 2 Nephi 2 ti manglawlawag kadagiti kinapudno maipapan iti Pannakatnag da Adan ken Eva, ken dagitoy ti mangpaneknek a sinubbotnatayo ni Jesucristo manipud iti Pannakatnag. Maysa a wagas a pakailawlawagan dagitoy a kapanunotan ket mangawis kadagiti miembro ti klase a mangsukisok iti 2 Nephi 2:15–25 ken mangilista kadagiti kinapudno a masursuroda maipapan no ania ti napasamak iti Minuyongan ti Eden. Ania dagiti dadduma pay a nauneg a pannakaammo ken pannakaawat [insights] a masarakanda iti adaw manipud ken ni Presidente Dallin H. Oaks iti “Dagiti Nainayon a Resources”? Kasano a sinubbotnatayo ni Jesucristo manipud iti Pannakatnag? (kitaen iti 2 Nephi 2:6–8, 26–29).
-
Kalpasan ti panangaramid iti maysa nga aktibidad kas iti maysa nga imun-una, mabalinmo ti mangi-display iti sumagmamano a saludsod kas iti sumaganad ket awisem dagiti miembro ti klase a mangibinglay kadagiti nauneg a pannakaammo ken pannakaawat [insights]:
-
Kasano a mangatur dagiti pannursuro ni Lehi kadagitoy a bersikulo iti sumagmamano a gagangay a saan a panagkikinnaawatan maipapan iti Pannakatnag?
-
Iti ania a wagwagas a maysa a bendision ti Pannakatnag?
-
Kasano a makatulong kadatayo ti siuumno a pannakaawattayo iti Pannakatnag tapno nasaysayaat a maawatantayo ti panagkasapulantayo ken ni Jesucristo ken ti Pannubbotna?
-
Ania ti maysa a gapu a pagyamanam iti pili da Adan ken Eva iti Minuyongan ti Eden?
-
Kasano a maipada ti pilim nga umay iti daga iti pili da Adan ken Eva a makiranud iti bunga ti kayo ti pannakaammo ti naimbag ken dakes?
-
Ania ti panggep ti biag? Apay a kasapulan ti Pannakatnag tapno magun-od daytoy a panggep?
-
Mayasidegtayo iti Dios ti pagkapsutantayo.
-
Makaisangbay kadatayo dagiti sinurat ni Nephi iti 2 Nephi 4:15–35 iti namnama ken liwliwa no mariknatayo ti pannakatalipupos gapu kadagiti panagkarigatan ken pagkapsutantayo. Nalabit a mabalin nga irebyu dagiti miembro ti klase dagitoy a bersikulo iti sagsangaparis ken mangsapul kadagiti binatog a mabalinda nga usaren a mangliwliwa iti maysa a tao a makarikna iti dagensen gapu kadagiti ringrigatna. Kalpasanna mabalin nga ibinglay ti tunggal paris dagitoy a binatog iti klase. Nalabit a mabalin nga ibinglay ti maysa a tao iti klase ti maysa a padas a nakasarakanna iti liwliwa babaen ti yaasideg iti Dios, kas iti inaramid ni Nephi.
-
Sabali pay a wagas a panagrebyu iti 2 Nephi 4 ket mabalin a panangawis a nasapsapa iti sumagmamano a miembro ti klase nga umay a nakasagana a mangibinglay kadagiti bersikulo ken ragup dagiti balikas manipud iti daytoy a kapitulo a napateg kadakuada. Idawatmo kadakuada a mangibinglay no ania ti aramidenda no mariknada ti pannakatalipupos gapu kadagiti pagkapsutanda. Ti maysa a himno maipapan iti liwliwa ken namnama, kas iti “Where Can I Turn for Peace?” (Hymns, no. 129), ket mabalin a mangnayon iti daytoy a panangilawlawag. Kas pagarigan, mabalin nga ibinglay dagiti miembro ti klase no kasano a mapatibker ti himno ti pagwadan ni Nephi iti panagtalek iti Apo kadagiti panawen ti pannakaupay.
Masarakan ti ragsak iti panagbiag iti ebanghelio.
-
Iti baet dagiti karit a nakaipasanguan ni Nephi ken dagiti taona, kinabaelanda ti nangbangon iti maysa a gimong [society] a maibatay kadagiti pagbatayan a mangiturong iti ragsak. Ania dagiti pagbatayan a nasarakan dagiti miembro ti klase iti panagadalda iti 2 Nephi 5 a nangipaay iti ragsak a napadasan dagiti Nephite? Mabalinmo ti mangted iti papel kadagiti miembro ti klase ket awisem ida a mangsukisok iti 2 Nephi 5 kadagiti pagbatayan a mangiturong iti ragsak ken mangisurat kadagitoy. Kasano a maigidiat dagiti wagas a panagsapsapul ti lubong iti ragsak manipud iti no ania ti sapsapulentayo iti 2 Nephi 5? Ania dagiti panggep a tun-oyen a mabalin nga ituding dagiti miembro ti klase a mayaplikar iti maysa kadagitoy a pagbatayan?
Yallukoy ti Panagsursuro iti Pagtaengan
Isaritam kadagiti miembro ti klase nga addaan ti 2 Nephi 6–10 iti maysa kadagiti kasayaatan a sermon maipapan iti Pannubbot ni Jesucristo iti amin a nasantuan a kasuratan. Mabalinmo pay nga ibinglay ti maysa a bersikulo a masarakam kadagitoy a kapitulo a mangpagagar kenka a magbasa iti daytoy.
Dagiti Nainayon a Resources
Paset ti plano ti Dios ti Pannakatnag.
Insuro ni Presidente Dallin H. Oaks:
“Idi inawat da Adan ken Eva ti umuna a bilin, addada iti kasasaad a panagbaliw, awandan iti lubong dagiti espiritu ngem addaandan iti pisikal a bagi a saan pay a makapadas iti ipapatay ken awananda pay iti kabaelan nga agparsua iti biag [procreation]. Saanda a makaipatungpal iti umuna a bilin ti Ama nga awan ti pananglabsing iti tubeng ti ragsak iti Minuyongan ti Eden ken dagiti nakaro a pannubok ken napipintas a gundaway ti mortal a biag. …
“… Inlawlawag ni Propeta Lehi a ‘no saan a naglabsing ni Adan, saan koma a natnag’ (2 Ne. 2:22), ngem nagtalinaed koma isuna iti isu met la a kasasaad a nakaparsuaanna.
“… Naplano ti Pannakatnag, inggibus ni Lehi, gapu ta ‘amin a banag a naaramid iti sirib ti isu a makaammo iti amin a banag’ (2 Ne. 2:24).
“Isu ni Eva nga immuna a naglabsing kadagiti naited a pagpatinggaan ti Eden tapno mangirugi kadagiti kasasaad [condition] ti mortalidad. Ti aramidna, ania man iti nakaisigudan daytoy, ket pormal a panaglabsing ngem agnanayon a nagloriaan a kasapulan tapno manglukat iti dalan nga agturong iti agnanayon a biag. Impakita ni Adan ti siribna babaen ti panangaramid iti kasta met laeng. Ket iti kasta da Eva ken ‘Adan natnag tapno adda tao’ (2 Ne. 2:25).
“Sumagmamano a Kristiano ti mangbabalaw ken Eva iti inaramidna, a mangikedkeddeng nga isu ken dagiti annakna a babbai no kaskasano ket mapilawda gapu iti daytoy. Saan kadagiti Santo iti Ud-udina nga Aldaw! Naipakaammo babaen ti paltiing, rambakantayo ti inaramid ni Eva ket dayawentayo ti sirib ken turedna iti naindaklan a pasamak a maawagan iti Pannakatnag. …
“Ipakita ti kabaruanan a paltiing a naawatan dagiti immuna a nagannak kadatayo ti panagkasapulan iti Pannakatnag. Impakdaar ni Adan, ‘Nagasat ti nagan ti Dios, ta gapu iti panaglabsingko nalukatan dagiti matak, ken maaddaanak iti rag-o iti daytoy a biag, ket manen iti lasag makitakto ti Dios’ (Moises 5:10)” (“The Great Plan of Happiness,” Ensign, Nob. 1993, 72–73).
Panangpadur-as iti Panangisurotayo
Tulongam dagiti saan a dumardar-ay iti klase. Ti panangisuro ket ad-adda pay ngem iti panangiturong iti maysa a panaglilinnawag iti Domingo; iramanna ti panangserbi [ministering] nga addaan iti ayat ken parabur kadagiti dadduma babaen ti ebanghelio. Nalabit a mabalinmo a panunoten ti maysa a tao a saan a dumardar-ay ket mangtedka kenkuana iti masinunuo nga awis a makiraman iti umay nga adalen. (Kitaen iti Panangisuro iti Wagas ti Mangisalakan, 8–9.)