“Oktubre 24–30. Ezequiel 1–3; 33–34; 36–37; 47: ‘Ibutang Nako sa Sulod Ninyo ang Usa ka Bag-ong Espiritu,’” Dali, Sunod Kanako—Alang sa Primary: Daang Tugon 2022 (2021)
“Oktubre 24–30. Ezequiel 1–3; 33–34; 36–37; 47,” Dali, Sunod Kanako—Alang sa Primary: 2022
Dali, Sunod Kanako, ni Scott Sumner
Oktubre 24–30
Ezequiel 1–3; 33–34; 36–37; 47
“Ibutang Nako sa Sulod Ninyo ang Usa ka Bag-ong Espiritu”
Wala kay panahon sa pagtudlo sa matag baroganan sa Ezequiel. Pagtinguha og espirituhanon nga giya mahitungod kon unsa ang tutokan, ug awhaga ang mga bata sa pagpadayon sa pagkat-on diha sa panimalay.
Irekord ang Imong mga Impresyon
Dapita ang Pagpaambit
Papuli-puliha ang mga bata sa pagdrowing og mga hulagway sa usa ka butang nga ilang nakat-onan bag-ohay lang gikan sa mga kasulatanan. Ang uban nga mga bata mahimong motagna kon unsa ang gidrowing sa matag bata.
Itudlo ang Doktrina: Mas Gagmay nga mga Bata
Ang mga propeta sama sa mga tigbantay nga mopasidaan kanato sa peligro.
Si Ezequiel sama sa usa ka tigbantay, nga nagpasidaan sa mga Israelihanon sa mga peligro nga dili nila makita. Tabangi ang mga bata nga makakita kon sa unsang paagi ang atong mga propeta karon sama sa mga tigbantay.
Posible nga mga Kalihokan
-
Basaha ngadto sa mga bata kon unsay gisulti sa Ginoo kang Ezequiel sa Ezequiel 3:17. Dapita sila sa pagbuhat og mga aksiyon nga mobagay sa mga pulong, sama sa pagpunting sa ilang mata, mga dalunggan, ug baba kon basahon nimo ang mga pulong nga “tigbantay,” “makadungog,” ug “baba.”
-
Pangunahi ang mga bata nga magbaktas palibot sa lawak. Pasidan-i sila kabahin sa pakaaron-ingnon nga mga peligro sa dalan, sama sa mga suba nga luksoan, mga sanga nga hup-an, o mga hayop nga likayan. Papuli-puliha ang mga bata nga mahimong lider. Paghisgot mahitungod kon sa unsang paagi ang atong propeta nagpasidaan kanato sa mga peligro nga dili nato makita.
-
Ipakita ang usa ka hulagway sa kasamtangan nga propeta samtang inyong kantahon og dungan ang usa ka awit mahitungod sa mga propeta, sama sa kataposang bersikulo sa “Sunda ang Propeta” (Songbook sa mga Bata, 58–59). Sultihi ang mga bata kon sa unsang paagi ang propeta sama sa usa ka tigbantay alang kanimo.
Ang mga kasulatan nagtudlo kanako mahitungod ni Jesukristo.
Gitandi ni Ezequiel ang balay sa Israel ngadto sa duha ka lipak nga nahimong usa. Kini nga mga lipak nagtimaan usab sa Biblia ug sa Basahon ni Mormon, nga nagkahiusang nagpamatuod kang Kristo.
Posible nga mga Kalihokan
-
Hatagi ang pipila ka bata og mga kopya sa Basahon ni Mormon; hatagi ang uban og mga kopya sa Biblia. Iminubo ang Ezequiel 37:15–19 pinaagi sa pagpasabot nga ang Ginoo misulti kang Ezequiel sa pagsulat sa duha ka lipak nga nagrepresentar sa Biblia ug sa Basahon ni Mormon. Basaha ang bersikulo 17, ug dapita ang matag bata sa pagpangita og usa ka tawo nga adunay basahon sa kasulatan nga lahi sa ilaha ug “usaha sila” pagbugkos aron sila “mausa [sa ilang mga kamot].” Paghisgot mahitungod kon sa unsang paagi ang Biblia ug ang Basahon ni Mormon makatabang kanato sa pagpalig-on sa atong hugot nga pagtuo sa Langitnong Amahan ug ni Jesukristo.
-
Gamit ang mga hulagway gikan sa Libro sa mga Hulagway sa Ebanghelyo o gikan sa mga libro sa Dali, Sunod Kanako sa nangaging katuigan, tabangi ang mga bata sa pagpaambit og mga istorya mahitungod ni Jesus gikan sa Biblia ug sa Basahon ni Mormon. Hangyoa sila sa pagpaambit kon nganong mapasalamaton sila nga makabaton niining duha ka basahon sa kasulatan.
Nakakita si Ezequiel og panan-awon sa usa ka suba nga midagayday gikan sa templo ug mialim sa Patay nga Dagat.
Talagsaon nga mga panalangin ang nagagikan sa templo.
Ang panan-awon ni Ezequiel sa usa ka makapaalim nga suba nga midagayday gikan sa templo makatabang sa mga bata nga makakat-on nga ang mga templo magdala og mga panalangin sa atong mga kinabuhi.
Posible nga mga Kalihokan
-
Pakit-a ang mga bata og baso sa tubig. Sa unsang paagi ang tubig makapanalangin kanato? Sultihi ang mga bata mahitungod sa panan-awon ni Ezekiel bahin sa tubig nga nagdagayday gikan sa templo (tan-awa sa Ezequiel 47:1–12). Ipakita ang hulagway diha sa latid niining semanaha sa Dali, Sunod Kanako—Alang sa mga Indibidwal ug mga Pamilya. Sultihi ang mga bata mahitungod sa mga panalangin nga inyong madawat nga, sama sa suba sa panan-awon ni Ezequiel, modagayday gikan sa templo.
-
Dapita ang mga bata sa pagdrowing og hulagway sa ilang kaugalingon nga miadto sa templo. Kantaha og dungan ang usa ka awit nga naghulagway sa mga panalangin sa templo, sama sa “Mga Pamilya Mahimong Manag-uban sa Hangt[o]d” (Songbook sa mga Bata, 98). Unsay gitudlo niini nga awit mahitungod kon sa unsang paagi ang mga templo makapanalangin kanato?
Itudlo ang Doktrina: Mas Dagko nga mga Bata
Si Jesukristo makatabang kanako nga mausab ang akong kasingkasing.
Si Ezequiel migamit og mga pulongan sama sa “bag-ong kasingkasing” ug “bag-ong espiritu” sa pagtudlo kabahin sa matang sa kausaban nga madala sa Manluluwas sa atong mga kinabuhi.
Posible nga mga Kalihokan
-
Hangyoa ang mga bata sa pagsiksik sa Ezequiel 2:3–4; 3:7 alang sa mga pulong nga naghulagway sa mga Israelihanon. Dayon dapita sila sa pagbasa sa Ezequiel 36:26–27 aron makat-on kon sa unsang paagi ang Manluluwas mitanyag sa pagtabang kanila nga mag-usab. Unsa nga mga pulong ang mahimong makahulagway sa “bag-ong kasingkasing” ug “bag-ong espiritu” nga Siya mohatag kanato? (tan-awa, sama pananglit sa, Mosiah 3:19; 5:2).
-
Hangyoa ang mga bata sa paghunahuna og mga butang nga tingali buhaton sa “gahig ulo” o “tig-ag kasingkasing” nga mga tawo (Ezequiel 2:4; 3:7). Sama pananglit, unsa kaha ang ilang reaksiyon sa tambag gikan sa usa ka ginikanan o sa propeta? Unsa kaha ang ilang buhaton kon makakita sila og usa ka tawo nga nanginahanglan? Unsa man ang kalainan sa atong panglihok kon gipahumok sa Manluluwas ang atong mga kasingkasing?
Ang Biblia ug ang Basahon ni Mormon motabang sa “[pag]tigom” kanato ngadto ni Jesukristo.
Ang kang Ezequiel nga “lipak nga nagsimbolo sa Juda” (ang Biblia) ug ang “lipak nga nagsimbolo sa Israel” (ang Basahon ni Mormon) magtinabangay aron tigomon ang Israel ngadto sa Manluluwas (tan-awa sa Ezequiel 37:19).
Posible nga mga Kalihokan
-
Ipataas ang usa ka kopya sa Biblia ug sa Basahon ni Mormon, ug pangutan-a ang mga bata kon nganong pamati nila nga maayo man nga makabaton niining duha ka basahon. Basaha ngadto kanila ang Ezequiel 37:19, ug ipasabot nga ang “lipak nga nagsimbolo sa Israel” nagpasabot sa Basahon ni Mormon, nga gisulat sa mga kaliwat ni Jose sa Ehipto, ug ang “lipak nga nagsimbolo sa Juda” nagpasabot sa Biblia, nga ang kadaghanan gisulat sa mga Judeo. Dayon basaha og dungan ang mga bersikulo 21–23 ug ang 2 Nephi 3:12, ug ilista ang mga panalangin nga naggikan sa pagbaton niining duha ka basahon.
-
Pagbutang og hulagway ni Jesus sa tunga-tunga sa lawak, ug dapita ang mga bata sa pag-irog sa ilang mga lingkoranan ngadto sa lain-lain nga mga dapit subay sa mga bongbong sa lawak. Dayon hangyoa sila sa paggamit sa Giya ngadto sa mga Kasulatan aron makapangita og mga kasulatan diha sa Biblia ug sa Basahon ni Mormon nga nagtudlo kabahin ni Jesukristo (kon gikinahanglan, ipakita kanila kon unsaon sa pagbuhat niini). Human ang matag bata mopaambit og kasulatan, dapita ang tanang bata sa pag-irog sa ilang mga lingkoranan nga mas duol ngadto sa hulagway ni Jesus. Padayon hangtod ang tanan “natigom” na balik ngadto Kaniya.
Ang mga panalangin sa templo makaayo sa atong mga kasingkasing ug mga pamilya.
Ang tubig nga nagdagayday gikan sa templo sa panan-awon ni Ezequiel midala og kinabuhi sa tanang butang nga naabtan niini. Sa samang paagi, ang mga panalangin nga modagayday gikan sa templo makaayo kanato sa espirituhanon nga paagi ug magdala kanato og kinabuhing dayon.
Posible nga mga Kalihokan
-
Ilista sa pisara ang pipila ka importanteng mga pulong ug mga pulongan nga may kalabotan sa Ezequiel 47:1–12, sama sa templo, suba, kayutaan, Patay nga Dagat, daghan kaayong isda, ug mabungahon nga kahoy. Dapita ang matag bata sa pagpili og usa niini nga mga butang nga drowingon. Dayon basaha og dungan ang mga bersikulo, ug dapita ang mga bata sa pagpaambit sa ilang mga drowing kon mahisgotan ang ilang mga elemento. Unsa nga mga panalangin ang naggikan sa suba niini nga panan-awon? (tan-awa sa mga bersikulo 8–9, 12). Tabangi ang mga bata nga makakita kon sa unsang paagi kini nga mga panalangin sama sa mga panalangin nga gitanyag sa Langitnong Amahan ug sa Manluluwas niadtong kinsa motuman sa mga pakigsaad sa templo.
-
Basaha og dungan ang unsay gitudlo ni Elder Dale G. Renlund mahitungod sa panan-awon ni Ezequiel sa, “Buhat sa Family History ug sa Templo: Pagsilyo ug Pagkaayo” (Liahona, Mayo 2018, 47–48). Sultihi ang mga bata kon sa unsang paagi ang buhat sa family history ug ang templo midala kanimo sa pagkaayo sa Manluluwas. Dapita ang mga bata sa pagpaambit sa ilang mga pagbati mahitungod sa templo.
Awhaga ang Pagkat-on diha sa Panimalay
Dapita ang mga bata sa pagpaambit ngadto sa ilang mga pamilya og usa ka butang nga ilang nakat-onan karon ug usa ka butang nga ganahan nilang makat-onan pa og dugang.
Pagpalambo sa Atong Pagtudlo
Suportahi ang pagkat-on diha sa panimalay. “Kinahanglang usa sa imong mga tumong isip usa ka magtutudlo mao ang pag-awhag sa imong mga gitudloan nga makabaton og ilang kaugalingong mga kasinatian diha sa mga kasulatan—sa tinagsa ug uban sa ilang mga pamilya” (Pagtudlo sumala sa Pamaagi sa Manluluwas, 36).