“Oktubre 17–23. Jeremias 30–33; 36; Mga Pagbangotan 1; 3: ‘Himoon Nako nga Kalipay ang Ilang Pagsubo,’” Dali, Sunod Kanako—Alang sa Primary: Daang Tugon 2022 (2021)
“Oktubre 17–23. Jeremias 30–33; 36; Mga Pagbangotan 1; 3,” Dali, Sunod Kanako—Alang sa Primary: Daang Tugon 2022
The Cry of Jeremiah the Prophet [Ang Paghilak ni Jeremias ang Propeta], gikan sa usa ka kinulit sa Nazarene School
Oktubre 17–23
Jeremias 30–33; 36; Mga Pagbangotan 1; 3
“Himoon Nako nga Kalipay ang Ilang Pagsubo”
Ang mga basahon sa Jeremias ug Mga Pagbangotan mahimong lisod nga sabton sa mga bata, apan ang imong klase makakat-on gihapon og mga leksiyon gikan sa mga baroganan nga gitudlo niini nga mga basahon. Unsa ang nadasig nimong ipaambit?
Irekord ang Imong mga Impresyon
Dapita ang Pagpaambit
Ipapasa-pasa ang usa ka kopya sa Biblia. Samtang ang mga bata mogunit sa basahon, hangyoa sila sa pagpaambit og usa ka butang nga ilang ganahan mahitungod sa Daang Tugon—tingali usa ka baroganan o usa ka paborito nga istorya nga ilang nakat-onan gikan niini sa balay o sa simbahan.
Itudlo ang Doktrina: Mas Gagmay nga mga Bata
Ang Langitnong Amahan ug si Jesus nahigugma kanako.
Ang pagbati sa “gugma nga walay kataposan” sa Langitnong Amahan ug ni Jesukristo makatabang sa mga bata nga imong gitudloan nga mas magpaduol ngadto Kanila.
Posible nga mga Kalihokan
-
Ipakita sa mga bata ang pipila ka butang (o mga hulagway sa mga butang) nga molungtad og dugay ug pipila nga dili, sama sa usa ka sensilyo ug usa ka piraso nga prutas. Pangutan-a ang mga bata kon hain ang molungtad og mas dugay, ug hisgoti kon ngano nga ang uban nga mga butang mas molungtad og dugay kay sa uban. Basaha ang Jeremias 31:3, ug tabangi ang mga bata nga makasabot nga ang gugma nga anaa sa Langitnong Amahan ug ni Jesukristo alang kanila kay “walay kataposan.”
-
Hangyoa ang mga bata sa pagpaambit kon sa unsang paagi nga ang Langitnong Amahan ug si Jesukristo nagpakita sa Ilang “gugma [nga] walay paglubad” alang kanila (Jeremias 31:3). Aron mahatagan og mga ideya ang mga bata, kantaha ang usa ka awit mahitungod sa gugma Nila alang kanato, sama sa “Gibati Ko ang Gugma sa Akong Manluluwas” o “Gihigugma Ako sa Langitnong Amahan” (Songbook sa mga Bata, 42–43, 16–17). Kon posible, ipakita ang mga hulagway sa mga butang nga gihisgotan sa awit. Unsa ang atong bation kon maghunahuna kita sa gugma sa Langitnong Amahan ug ni Jesukristo?
Ang mga kasulatan makadasig kanato nga maghinulsol ug moduol ngadto sa Ginoo.
Ang mga kasulatan mao ang pulong sa Dios.
Ang Ginoo miingon kang Jeremias sa pagsulat sa Iyang mga pulong, ug ang mga sinulat ni Jeremias natipigan alang kanato diha sa basahon ni Jeremias. Tabangi ang mga bata nga mapalambo ang ilang gugma alang sa mga kasulatan, diin makita nato ang pulong sa Dios.
Posible nga mga Kalihokan
-
Dapita ang usa ka bata nga magpakaaron-ingnon nga si Jeremias, ug dapita ang ubang mga bata nga mahimong si Baruc. Tabangi ang bata nga nagpakaaron-ingnon nga si Jeremias nga mosulti og pipila ka pulong gikan sa Jeremias 36:3 samtang ang ubang mga bata magpakaaron-ingnon sa pagsulat niini, sama sa gibuhat ni Baruc. Pagpamatuod nga ang mga kasulatan karon mao ang “mga pulong sa Ginoo” (Jeremias 36:4) nga Iyang gisugo nga isulat sa mga propeta.
-
Ipakita ang usa ka libro sa mga bata ug usa ka kopya sa mga kasulatan, ug hangyoa ang mga bata nga maghisgot mahitungod sa mga kalainan nga ilang namatikdan tali sa mga libro. Unsay nakapahimong espesyal sa mga kasulatan? Tabangi ang mga bata nga makasabot nga ang mga kasulatan mao ang pulong sa Dios nga sinulat sa mga propeta, sama lang sa basahon ni Jeremias nga maoy gisulti sa Dios nga isulat ni Jeremias.
Ako makapaambit sa unsay akong nakat-onan gikan sa mga kasulatan.
Ang mga bata mahimong adunay dako nga impluwensiya niadtong naglibot kanila. Sama ni Baruc, sila makapaambit sa unsay ilang nakat-onan sa mga kasulatan ngadto sa uban.
Posible nga mga Kalihokan
-
Dapita ang mga bata sa pagbuhat og mga aksiyon nga mobagay sa mga pulong samtang ikaw magbasa (o magminubo) sa Jeremias 36:4–10, sama sa pagpakaaron-ingnon nga magsulat sa usa ka libro (tan-awa sa bersikulo 4), paggunit sa mga rehas sa bilanggoan (tan-awa sa bersikulo 5), ug pagbasa sa mga kasulatan ngadto sa katawhan (tan-awa sa mga bersikulo 8, 10). Ipasabot pag-ayo nga si Baruc adunay kaisog sa pagbasa sa mga pulong ni Jeremias ngadto sa katawhan bisan og ang mga lider sa Jerusalem dili gusto nga buhaton niya. Tabangi ang mga bata sa paghinumdom og usa ka butang nga ilang nakat-onan gikan sa Daang Tugon ug sa paghunahuna og mga paagi nga mapaambit nila kini ngadto sa uban.
-
Kantaha ang usa ka awit mahitungod sa mga kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66). Ipaambit ang imong pagpamatuod mahitungod sa mga kasulatan, ug dapita ang mga bata sa pagpaambit usab sa ilang mga pagpamatuod.
Itudlo ang Doktrina: Mas Dagko nga mga Bata
Ako makatuman sa akong mga pakigsaad sa Dios.
Ang mga pagtulun-an ni Jeremias mahitungod sa bag-o ug walay kataposan nga pakigsaad sa Dios makatabang sa mga bata nga imong gitudloan nga mapalig-on ang ilang tinguha sa pagtuman sa ilang mga pakigsaad.
Posible nga mga Kalihokan
-
Pagdrowing og kasingkasing sa pisara, ug dapita ang katunga sa mga bata sa pagbasa sa Jeremias 31:31–34 ug ang pikas katunga sa pagbasa sa Jeremias 32:38–41. Dapita ang mga grupo sa pagsulat sulod sa kasingkasing sa mga butang nga ilang nakat-onan gikan sa ilang mga bersikulo mahitungod sa atong mga pakigsaad sa Dios. Sa unsang paagi nga lahi ang pagbaton sa balaod sa Dios nga nakasulat sa atong kasingkasing (tan-awa sa Jeremias 31:33) kay sa pagbasa lamang niini sa mga kasulatan? Nganong gusto kita nga mohimo og mga pakigsaad sa Ginoo? Nganong gusto Siya nga mohimo og mga pakigsaad kanato?
-
Aron sa pagrebyo sa mga pakigsaad nga atong himoon kon kita bunyagan, dapita ang mga bata sa paghimo og duha ka kolum nga tsart sa usa ka piraso nga papel nga adunay mga ulohan nga Mga Saad Nako ug Mga Saad sa Dios. Hangyoa sila nga sulatan ang tsart pinaagi sa paggamit sa Mosiah 18:10,13 ug Doktrina ug mga Pakigsaad 20:37. Dapita ang mga bata sa pagplastada sa papel diha sa panimalay aron sa pagtabang kanila nga makahinumdom sa pagtuman sa ilang mga pakigsaad.
Ang mga kasulatan mao ang pulong sa Dios.
Ang asoy sa Jeremias 36 makatabang sa mga bata nga makat-on gikan sa mga ehemplo sa mga tawo kinsa midawat sa pulong sa Ginoo diha sa mga kasulatan.
Posible nga mga Kalihokan
-
Isulat kini nga mga pangutana diha sa pisara: Ngano? Kinsa ang mihatag og bili sa mga kasulatan? Kinsa ang wala? Basaha og dungan ang Jeremias 36:1–3, ug pangutan-a ang mga bata kon nganong gusto sa Ginoo nga isulat ni Jeremias ang Iyang mga pulong. Dayon hangyoa ang mga bata nga magpares nga magtinabangay sa pagbasa sa Jeremias 36:5–8, 20–25 ug sa pagtino kon kinsa ang nagpakita nga ilang gihatagan og bili ang mga kasulatan ug kon kinsa ang wala. Hisgoti kon nganong gihatagan nimo og bili ang mga kasulatan. Pagpaambit og tudling sa kasulatan o istorya nga labing makahuloganon alang kanimo. Dapita ang mga bata sa pagpaambit usab.
-
Dapita ang mga bata sa paggamit sa pahina sa kalihokan karong semanaha aron sa pagbansay og pagpaambit sa usag usa sa asoy sa Jeremias 36. Dapita sila sa pagpaambit sa ilang mga pagpamatuod bahin sa mga kasulatan.
Mga Pagbangotan 1:1–2,16; 3:22–26
Ang Manluluwas mihimo niini nga posible alang kanako nga mapasaylo sa akong mga sala.
Sama sa gihulagway sa basahon sa Mga Pagbangotan sa balaknon nga paagi, kasagaran mobati kita nga masulub-on kon kita makasala. Kini nga mga pagbati makadasig kanato nga mag-usab ug mangayo og kapasayloan sa Langitnong Amahan.
Posible nga mga Kalihokan
-
Ipasabot sa mga bata nga tungod ang mga Israelihanon wala maghinulsol, ang Jerusalem ug ang templo didto nalaglag. Hangyoa ang mga bata nga maghisgot kon unsa kaha ang ilang bation kon nagpuyo sila sa Jerusalem niadtong panahona. Basaha og dungan ang Mga Pagbangotan 1:1–2, 16. Unsa nga mga pulong ug mga pulongan niini nga mga bersikulo ang makatabang kanato nga makasabot kon unsa kaha ang gibati sa mga Israelihanon? Sa unsang paagi kaha ang mensahe sa Mga Pagbangotan 3:22–26 nakahatag kanila og paglaom?
-
Hangyoa ang mga bata sa paghunahuna mahitungod sa usa ka panahon sa dihang mibati sila nga masulub-on tungod sa usa ka dili maayo nga pagpili nga ilang nahimo. Unsa ang ilang makit-an sa Mga Pagbangotan 3:22–26 nga makatabang kanila nga masayod nga ang Ginoo andam sa pagpasaylo kanila?
Awhaga ang Pagkat-on diha sa Panimalay
Dapita ang mga bata sa paghangyo sa mga sakop sa ilang mga pamilya sa pagpaambit og mga kasinatian nga may kalabotan sa mga baroganan nga inyong gitun-an sa klase. Sama pananglit, kon naghisgot kamo bahin sa mga kasulatan, ang mga bata mahimong mohangyo og usa ka sakop sa pamilya sa pagpaambit kon giunsa niya pagkahibalo nga tinuod ang mga kasulatan.
Pagpalambo sa Atong Pagtudlo
Ipabilin ang atensiyon sa mga bata. Kinahanglan nimong maghunahuna og mamugnaon nga mga paagi aron mapaapil ang mas gagmayng mga bata. Sama pananglit, gamit og mga hulagway, mga awit, mga dula, ug uban nga mga kalihokan.