Jesus naggiya sa karnero

Dali, Sunod Kanako, ni Scott Sumner

Oktubre 24–30

Ezequiel 1–3; 33–34; 36–37; 47

“Usa ka Bag-ong Espiritu Igabutang Ko sa Sulod Ninyo”

Gidapit si Ezequiel sa “pagkaon” sa simbolikanhong paagi sa pulong sa Dios––aron sa pagbusog sa iyang kaugalingon niini (tan-awa sa Ezequiel 2:9–3:3,10). Unsaon nimo pagbusog ang imong kaugalingon sa pulong sa Dios niini nga semana?

Irekord ang Imong mga Impresyon

Si Exequiel usa ka propeta nga gipugos sa pagpalayas ngadto sa layong dapit. Kauban sa ubang mga Israelita, nadakpan siya ug gipadala ngadto sa Babelonia pipila ka mga tuig sa wala pa ang Jerusalem sa kataposan gilaglag. Didto sa Jerusalem, si Ezequiel usa unta ka pari nga nag-alagad sa templo. Didto sa Babelonia, siya usa “kanila nga mga binihag,”ug siya “milingkod didto sa ilang taliwala” (Ezequiel 3:15), gatosan ka kilometro gikan sa templo ug may gamay nga paglaom nga makabalik ngadto sa gimahal nga balay sa Dios. Dayon usa ka adlaw niana si Ezequiel dihay usa ka panan-awon. Nakita niya “ang himaya sa Ginoo” (Ezequiel 1:28)––dili balik didto sa templo sa Jerusalem apan didto sa Babelonia taliwala sa mga gipugos sa pagpalayas ngadto sa layong dapit. Ang pagkadaotan sa Jerusalem, iyang nahibaloan, nahimong grabe nga ang presensya sa Dios wala na didto (tan-awa sa Ezequiel 8–11; 33:21).

Usa sa mga buluhaton ni Ezequiel mao ang pagpahimangno sa mga Israelita mahitungod sa mga sangpotanan sa ilang pagsukol––usa ka pahimangno nga sa kadaghanan wala paminawa. Apan diha pay daghang kahulogan sa mensahe ni Ezequiel: iyang gipanagna nga bisan unsa ka ngil-ad nahimo ang mga butang, aduna pay paagi nga makabalik. Kon ang mga katawhan sa Dios modawat sa pagdapit nga “pamati sa mga pulong sa Ginoo” (Ezequiel 37:4), unsa ang kaniadto patay mahimong buhion pag-usab. Ang usa ka “batoon nga kasingkasing” mahimong ilisan og “usa ka bag-o nga kasingkasing” (Ezequiel 36:26). “Pasudlon [ko] kaninyo ang akong espiritu,” misulti ang Ginoo kanila, “ug kamo mangabuhi” (Ezequiel 37:14). Ug sa kataposang mga adlaw, ang Ginoo motukod og bag-ong templo ug bag-ong Jerusalem, “og ang ngalan sa siyudad gikan niadtong adlawa mao, Ang Ginoo anaa diha” (Ezequiel 48:35).

icon sa personal nga pagtuon

Mga Ideya alang sa Personal nga Pagtuon sa Kasulatan

Ezequiel 1–3

“Ikaw magasulti kanila sa akong mga pulong.”

Ang pagbasa mahitungod sa tawag ni Ezequiel ngadto sa pangalagad diha sa Ezequiel 1–3 tingali mag-aghat kanimo sa paghunahuna mahitungod sa mga oportunidad nga gihatag sa Dios kanimo nga “makigsulti sa [Iyang] mga pulong” ngadto sa uban (Ezequiel 3:4). Sa Ezequiel 2–3, tan-awa ang Iyang mga pulong sa pag-awhag ug panudlo ngadto ni Ezequiel. Bisan tuod og ang mga katawhan nga imong gialagaran tingali dili sama ka sukol ingon sa mga katawhan ni Ezequiel, hunahunaa kon giunsa sa mga pulong sa Dios ngadto ni Ezequiel pag-apekto sa paagi nga imong gitan-aw ang imong serbisyo diha sa Simbahan, sa panimalay, ug sa diin pa.

Tan-awa usab sa Ezequiel 33:1–9; D.Todd Christofferson, “Ang Tingog sa Pagpasidaan,” Liahona, Mayo 2017, 108–11.

Ezequiel 33:10–19

Ang Ginoo gusto nga mopasaylo.

“Kon ang atong … mga sala ania kanato,” ang bihag nga mga Israelita natingala, “unsaon ta man pagpangabuhi?” (Ezequiel 33:10). Agi og tubag, mitudlo ang Ginoo kanila og importanting mga kamatuoran mahitungod sa paghinusol ug pagpasaylo. Kini nga mga pangutana mahimong motabang kanimo sa pagpamalandong niadto nga mga kamatuoran:

• Unsa kaha ang gipasabot sa “mosalig sa [imong] kaugalingong pagkamatar[o]ng”? (tan-awa sa Ezequiel 33:12–13).

• Unsa ang imong isulti ngadto sa usa ka tawo kinsa mibati nga ang matarong nga tawo ug ang daotan nga tawo nga gihulagway sa Ezequiel 33:12–19 wala tagda og sama? (tan-awa usab sa Mateo 21:28–31; Lucas 18:9–14).

• Unsa nga mga hugpong sa mga pulong ang imong makita niini nga mga bersikulo nga nagtabang kanimo sa pagsabot kon unsa ang gipasabot sa paghinulsol? Unsang dugang nga mga panabot ang imong nakaplagan sa Ezequiel 36:26–27 ug Alma 7:14–16?

Ezequiel 34

Ang Ginoo nagdapit kanako sa pagpakaon sa Iyang karnero.

Sa Ezequiel 34, ang Ginoo nagpasabot ngadto sa mga lider sa iyang mga katawhan isip “mga magbalantay sa karnero.” Samtang ikaw magbasa, hunahunaa kon unsa ang gisugyot niini nga ulohan nganha kanimo mahitungod sa unsay gipasabot nga mahimong usa ka lider. Kinsa ang mga “karnero” nga gusto sa Ginoo nga imong pasibsibon? Unsaon nimo pagsunod sa ehemplo nga gipakita sa Manluluwas isip atong magbalantay sa karnero? (tan-awa sa mga bersikulo 11–31).

Tan-awa usab sa Juan 21:15–17.

kamad-an ug Patay nga Dagat

Nakita ni Ezequiel sa panan-awon ang usa ka suba nga nag-awas gikan sa templo ug nag-ayo sa Patay nga Dagat.

Ezequiel 37

Ang Ginoo nagpundok sa Iyang mga katawhan ug naghatag kanila og bag-ong kinabuhi.

Ang pagpundok sa Israel gihulagway sa Ezequiel 37 pinaagi sa duha ka mga simbolo. Samtang imong basahon ang mahitungod sa usa nga nag-una––patay nga mga bukog nga nangabuhi (tan-awa sa mga bersikulo 1–14)––palandonga kon unsa ang imong nakat-onan mahitungod sa pagpundok sa Israel sa luyog-luyo sa tabil (tan-awa usab sa Ezequiel 36:24–30).

Ang ikaduhang simbolo (tan-awa sa mga bersikulo 15–28) naglakip og duha ka sungkod, nga daghang mga iskolar naghubad isip kahoy nga papan nga sulatanan gidugtong pinaagi sa usa ka bisagra. Ang sungkod ni Juda makarepresentar sa Biblia (gumikan nga daghan sa Biblia gisulat sa mga kaliwat ni Juda), ug ang sungkod ni Jose makarepresentar sa Basahon ni Mormon (gumikan nga ang pamilya ni Lehi mga kaliwat ni Jose sa Ehipto). Tungod niana, unsay gitudlo niini nga mga bersikulo kanimo mahitungod sa tahas sa mga kasulatan diha sa pagpundok sa Israel? Unsa ang gidugang sa 2 Nephi 3:11–13 (usa ka panagna mahitungod ni Joseph Smith ug sa Basahon ni Mormon) nganha sa imong pagsabot?

Tan-awa usab sa; “The Book of Mormon Gathers Scattered Israel” (video, ChurchofJesusChrist.org).

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Ezequiel 33:1–5.Sa paghulagway niini nga mga bersikulo, usa ka sakop sa pamilya makapaaron-ingnon nga usa ka “magbalantay” pinaagi sa pagtan-aw sa gawas sa bintana ug sa pagsulti sa nahibilin sa pamilya kon unsa ang nagpanghitabo sa gawas. Sa unsa nga paagi ang atong buhing propeta sama sa usa ka magbalantay alang kanato?

Ezequiel 33:15–16.Unsa ang gitudlo niini nga mga bersikulo kanato mahitungod sa pagpasaylo nga kita makadawat pinaagi ni Jesukristo?

Ezequiel 36:26–27.Pakit-a ang imong pamilya og pipila ka mga bato samtang ikaw maghisgot kon unsa ang gipasabot sa pagbaton og “batoon nga kasingkasing.” Himoa nga sila mosugyot og mga pulong nga naghulagway sa “batoon nga kasingkasing” ug “usa ka bag-o nga espiritu” nga gihatag sa Manluluwas kanato (tan-awa sa Mosiah 3:19; 5:2).

Ezequiel 37:15–28.Ang mga sakop sa pamilya makapangita og duha ka mga sungkod ug isulat sa usa Alang ni Juda (Biblia) ug ang usa Alang ni Joseph (Basahon ni Mormon) (tan-awa sa mga bersikulo 16–19). Makapakigbahin dayon sila sa mga istorya o mga kasulatan gikan sa Biblia ug sa Basahon ni Mormon nga nagtabang nga sila mobati nga mas duol ngadto sa Manluluwas ug nahimong “[Iyang] mga katawhan” (bersikulo 23).

Ezequiel 47:1–12.Kini nga mga bersikulo naghulagway sa panan-awon ni Ezequiel sa tubig nga nag-awas gikan sa templo og nag-ayo sa Patay nga Dagat––usa ka dagat nga hilabihang ka parat nga ang mga isda ug mga tanom dili mabuhi niini. Ang mga bata mahimong malingaw sa pagdrowing og usa ka larawan niini nga panan-awon. Unsa kaha ang gisimbolo sa tubig nga nag-awas gikan sa templo? Sa unsa nga paagi ang templo nagtabang kanato nga mamaayo? (tan-awa sa Ezequiel 47:8–9,11).

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Ang Dios ang Akong Magbalantay,” Mga Himno, nu. 61.

Pagpalambo sa Atong Pagtudlo

Ayaw paninguha nga hutdon pagtudlo ang tanan. Mahimong dili nimo masuhid ang matag kamatuoran diha sa Ezequiel uban sa imong pamilya. Pangayo og espiritwal nga giya sa pagtino kon unsa ang hatagan og bug-at nga pagtagad. (Tan-awa sa Pagtudlo sumala sa Pamaagi sa Manluluwas, 7.)

paghulagway sa mga suba nga nag-awas gikan sa templo

“Ania karon, ang mga tubig minggula gikan sa ilalum sa bakanan sa balay.… Mabuhi ang tanang butang diin makadangat ang suba ” (Ezequiel 47:1,9). Ang imahe gigamit pinaagi sa lisensya gikan sa shutterstock.com.