santil ochoch re São Paulo Brasil

2–8 mayo

Exodo 35–40; Levitico 1; 16; 19

“Santilal re li Qaawa’ ”

Naq taatzol li loq’laj hu rik’in tijok chiru li xamaan a’in, k’oxlaheb’ li kok’al nakatzoleb’. Li Santil Musiq’ej naru nakatxtenq’a chixnawb’al k’a’ru li na’leb’ te’raj ru xtzolb’al ut chan ru naq taak’ut.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’e lix k’ab’a’eb’ li junjunq chi kok’al sa’ jun li sek’. Patz’ re jun ch’ina al naq tixsik’ ru jun reheb’ li k’ab’a’ej, ut patz’ re li ch’ina al li x’el xk’ab’a’ naq tixwotz junaq na’leb’ xtzol toje’ sa’ li Najter Chaq’rab’. Aatinan rik’ineb’ li kok’al chirix chan ru naq neke’nach’ob’resiik rik’in li Jesukristo xb’aan li na’leb’ neke’xtzol. B’aanu a’an toj reetal naq te’nume’q chixjunil.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Exodo 36:1

Naru nintenq’an sa’ lix k’anjel li Qaawa’.

Eb’ li kok’al toj kok’eb’ wankeb’ xseeb’al li naru neke’roksi re tenq’ank sa’ lix k’anjel li Qaawa’ sa’ li ruchich’och’. Chan ru taatenq’aheb’ li kok’al chixwotzb’al li k’a’ru xk’ehom li Qaawa’ reheb’?

Kok’ k’anjel naru chi b’aanumank

• Yaab’asi Exodo 36:1 reheb’ li kok’al, ut patz’ reheb’ naq te’rab’i k’a’ru kixk’e li Qaawa’ re laj Besalel ut laj Oholiab re xtenq’ankileb’ chixyiib’ankil li “santil na’ajej” (li loq’laj muheb’aal). Ye reheb’ li junjunq chi kok’al k’a’ru lix maataneb’ (maare taapatz’ a’an reheb’ lix na’ xyuwa’). Ch’olob’ xyaalal naq li Dios xk’ehom maatan reheb’ chixjunil li ralal xk’ajol.

• Ye reheb’ li kok’al k’a’ut naq nakawaj tenq’ank sa’ lix k’anjel li Qaawa’. Tenq’aheb’ chixk’oxlankil chan ru naru neke’tz’aqon a’an (maare rik’in tzolok chirix junaq xxe’ xtooneb’, raatinankil junaq kristiaan chirix li Jesus, malaj xtenq’ankil junaq komon sa’ li junkab’al). Tz’iib’a lix k’a’uxleb’ chiru kok’ hu, k’eheb’ sa’ junaq li sek’, ut patz’ reheb’ li kok’al naq te’xchap jun ut te’xk’utb’esi li naxye li ch’ina hu.

Exodo 40:17–34

Naru naweek’a xwankil li Dios sa’eb’ li santil na’ajej.

Li Qaawa’ kixpatz’ reheb’ li ralal xk’ajol laj Israel naq te’xyiib’ li loq’laj muheb’aal re naq a’an “taahilanq sa’ xyanqeb’ ” (Exodo 25:8). Naru nakatenq’aheb’ li kok’al chi tzolok chirixeb’ li santil na’ajej naxk’e qe li Dios re naq taqeek’a lix wankilal.

Kok’ k’anjel naru chi b’aanumank

• K’ut jun xjalam-uuch li loq’laj muheb’aal (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Patz’ reheb’ li kok’al naq te’xk’e reetaleb’ lix cha’al li loq’laj muheb’aal, maare li kandeel malaj li artal, ut ch’olob’ naq eb’ li k’a’aq re ru a’an neke’k’anjelak re xtenq’ankileb’ laj Israelita chixk’oxlankil li Qaawa’ (re xtawb’al xkomon li na’leb’ chirix li loq’laj muheb’aal, chi’ilmanq Exodo 40:17–34). B’ar wankeb’ li santil na’ajej li nokohe’xtenq’a chixk’oxlankil li Qaawa’ sa’ li kutankil a’in?

• K’ut xjalam-uuch jun santil ochoch ut yaab’aasi Exodo 25:8 reheb’ li kok’al. Ch’olob’ naq sa’ li qakutankil, li Dios naxk’eheb’ li santil na’ajej qe re naq nach’ toowanq rik’in a’an. Tenq’aheb’ li kok’al chixyeeb’al b’ar wankeb’ li na’ajej a’an. Patz’ reheb’ li kok’al k’a’ru neke’reek’a naq neke’xk’oxlaheb’ li loq’laj na’ajej a’an. Ye reheb’ naq naqeek’a ajwi’ naq nach’ wan li Dios naq nokotijok, maak’a’ naxye b’ar wanko.

• Tz’aqob’resi ru li perel re kok’ k’anjel rik’ineb’ li kok’al. Naq nekeb’aanu a’an, b’ichahomaq sa’ komonil jun li b’ich chirix li santil ochoch, jo’ “Saʼ li santil ochoch” (B’ichleb’aal choq’ reheb’ li Kok’al, 99).

  li santil ochoch re Roma, Italia

  Jo’ ajwi’ li najter loq’laj muheb’aal, li santil ochoch nokoxjayali rik’in li Kolonel.

reetalil li k‘utuk

Xk’utb’al li tzol’leb’: Kok’al ak ninqeb’

Exodo 35:20–29; 36:1

Li Dios xk’ehom chaq inmaatan re tintenq’anq sa’ lix k’anjel.

Chixjunileb’ li ralal xk’ajol li qaChoxahil Yuwa’ naru neke’tenq’an sa’ lix k’anjel. Eb’ li kok’al maare te’raj xtenq’ankil re xk’eeb’al reetal chan ru naru te’roksi lix maatan re tenq’ank sa’ lix k’anjel li Dios.

Kok’ k’anjel naru chi b’aanumank

• K’ut xjalam-uuch li loq’laj muheb’aal (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Patz’ reheb’ li kok’al k’a’ru neke’xk’oxla naq ki’oksiman re xyiib’ankil li loq’laj muheb’aal. Il ru rik’ineb’ li kok’al Exodo 35:20–29, ut patz’ reheb’ naq te’xsik’ chan ru naq kitawman li k’anjeleb’aal ki’ajman ru. Ch’olob’ xyaalal naq chixjunileb’ li kok’al naru neke’tenq’an sa’ lix k’anjel li Qaawa’.

• Patz’ reheb’ li kok’al naq te’ril Exodo 36:1 re te’xsik’ k’a’ru kixk’e li Qaawa’ reheb’ li ke’b’oqe’ chixyiib’ankil li loq’laj muheb’aal. Patz’ reheb’ li kok’al naq te’xwotz k’a’ru neke’xk’oxla naq naxk’e li Qaawa’ reheb’ re xtenq’ankileb’ chixwaklesinkil li rawa’b’ejihom (ye junjunq reheb’ wi na’ajman ru) Chan ru naru neke’qoksi re rosob’tesinkileb’ li qas qiitz’in?

Exodo 40:17–33

Naru ninwulak jo’ li Jesukristo ut li qaChoxahil Yuwa’.

Li loq’laj muheb’aal moko ka’ajwi’ ta kixtenq’aheb’ li ralal xk’ajol laj Israel chireek’ankil xwankil li Dios, kixk’ut aj b’an wi’ chiruheb’ li k’a’ru naru neke’xb’aanu re wulak jo’ li Dios.

Kok’ k’anjel naru chi b’aanumank

• Patz’ reheb’ li kok’al naq te’roksi Exodo 40:17–33 re naq te’xsik’ li k’a’aq re ru yiib’anb’il wi’ li loq’laj muheb’aal, ut te’xtaw junjunq reheb’ a’an sa’ xjalam-uuch li najter loq’laj muheb’aal (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Patz’ reheb’ li kok’al naq te’xyiib’ xjalam-uuch li loq’laj muheb’aal. Wotz chan ru naq eb’ lix cha’al li loq’laj muheb’aal naru neke’aatinak chirix li Kolonel malaj li qaChoxahil Yuwa’. Li arca re li xnawom ch’oolej naru naxjultika qe lix taqlahom li Dios, li altar naru naxjultika qe lix mayej li Jesukristo, li xna’aj li kandeel naru naxjultika qe naq li Kolonel a’an xsaqen li ruchich’och’, ut chi jo’kan.

• Patz’ reheb’ li kok’al naq te’ril Exodo 25:8 re te’xnaw k’a’ut naq li Qaawa’ kiraj naq eb’ li ralal xk’ajol laj Israel te’xyiib’ li “santil na’ajej” (malaj li loq’laj muheb’aal). Tenq’aheb’ li kok’al chixtz’iib’ankileb’ xk’ab’a’ li na’ajej ut hoonal b’ar wi’ naru naqeek’a xwankil li Qaawa’. Chan ru naq eb’ li na’ajej a’an nokohe’xtenq’a chi wulak chi wank jo’ li qaChoxahil Yuwa’ ut li Jesukristo?

Levitico 1:1–4

Sa’ xk’ab’a’ lix tojb’al rix li maak xb’aan li Jesukristo, naru nakuye’ inmaak.

Lix mayejankileb’ li xul li kib’aanuman sa’ li Najter Chaq’rab’, a’an re xk’utb’al chiruheb’ li ralal xk’ajol laj Israel naq lix kuyb’al qamaak nachal sa’ xk’ab’a’ lix tojb’al rix li maak xb’aan li Jesukristo.

Kok’ k’anjel naru chi b’aanumank

• K’ut xjalam-uuch li Jesukristo sa’ Getsemani ut chiru li krus (chi’ilmanq Hu reheb’ li Jalam-uuch re li Evangelio, 56, 57). Ch’olob’ naq li Qaawa’ kixtaqlaheb’ li ralal xk’ajol laj Israel chi mayejak re naq te’xtzol naq naru nakuye’ xmaakeb’ rik’in lix tojb’al rix li maak xb’aan li Jesukristo. Ilomaq Levitico 1:1–4 ut patz’ reheb’ li kok’al naq te’xsik’ aatin malaj ch’ol aatin li tixjultika reheb’ lix mayej li Jesukristo.

• K’ut junaq xjalam-uuch li Jesukristo naq kirula’aniheb’ li kristiaan sa’ America (maare Hu reheb’ li Jalam-uuch re li Evangelio, 82). Ch’olob’ naq chirix naq li Jesukristo kik’ehe’ chiru li krus ut kiwakli chi yo’yo, kixk’ut chiruheb’ li kristiaan sa’ America k’a’ut naq ink’a’ chik te’xmayejaheb’ li xul. Ilomaq sa’ komonil 3 Nefi 9:19–20, ut patz’ reheb’ li kok’al k’a’ru nokotaqlaak chixmayejankil sa’ xna’aj li xul. K’a’ru naraj naxye li mayej re jun yot’b’il ch’oolej ut tuulanil musiq’ej? Patz’ reheb’ naq te’xsik’ “Yot’b’il ch’oolej” sa’ li K’utul Raqal reheb’ li Loq’laj Hu re xtenq’ankileb’ chixsumenkil li patz’om. Patz’ reheb’ naq te’xtz’il rix chan ru naq te’xk’e jun yot’b’il ch’oolej ut jun tuulanil musiq’ej re li Qaawa’.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xpatz’ re li qaChoxahil Yuwa’ chiru li xamaan a’in chan raj ru naraj a’an naq lix junkab’al te’tenq’anq sa’ lix k’anjel.

Xkawresinkil qib’ jo’ aj k’utunel

Jayaliheb’ li kok’al rik’in li qaChoxahil Yuwa’ ut li Jesukristo. Li tz’aqal aak’anjel, a’an xtenq’ankileb’ li kok’al chixkawob’resinkil xpaab’aaleb’ chirix li qaChoxahil Yuwa’ ut li Jesukristo. K’a’ru taab’aanu re xtenq’ankileb’ chixtawb’al ru chan ru te’tenq’aaq xb’aan xyu’aminkileb’ li na’leb’ re li evangelio chi wulak jo’ li Yuwa’b’ej ut li Alalb’ej?

perel re kok’ k’anjel: Naru naweek’a xwankil li Dios sa’eb’ li santil na’ajej