“Marso 14–20. Genesis 42–50: ‘Ang Tuyo sa Dios alang sa Kaayohan,’” Dali, Sunod Kanako—Alang sa Primary: Daang Tugon 2022 (2021)
“Marso 14–20. Genesis 42–50,” Dali, Sunod Kanako—Alang sa Primary: 2022
Paghulagway kang Jose sa Ehipto, ni Robert T. Barrett
Marso 14–20
Genesis 42–50
“Ang Tuyo sa Dios alang sa Kaayohan”
Importante ang mahibalo sa mga kasulatan nga imong gipangtudlo, apan importante usab nga mailhan ang mga bata nga imong gitudloan. Gahini og panahon ang pagpamalandong ug pag-ampo mahitungod niining duha.
Irekord ang Imong mga Impresyon
Dapita ang Pagpaambit
Tungod kay ang istorya diha sa Genesis 42–50 usa ka sumpay sa istorya sa milabayng semana nga leksyon, gikan sa Genesis 37–41, gahini og panahon sa sinugdanan sa klase nga ang mga bata mopaambit unsay ilang nahinumduman mahitungod ni Jose, lakip sa unsay ilang nakat-unan sa Primary ug diha sa panimalay.
Itudlo ang Doktrina: Mas Gagmay nga mga Bata
Makapakita ako og gugma sa akong pamilya.
Alang sa mas gagmay nga mga bata, mahimo nimong ipasabut pag-ayo ang mga bahin niini nga istorya diin si Jose mipakita og gugma sa iyang pamilya.
Posible nga mga Kalihokan
-
Gamit ang “Mga Igsoon ni Joseph sa Ehipto” (sa Mga Istorya sa Daang Tugon) o mga litrato diha sa Dali, Sunod Kanako—Alang sa mga Indibidwal ug mga Pamilya, sultihi ang mga bata mahitungod sa panaghangop ni Jose ug sa iyang mga igsoon nga lalaki. Ipasabut pag-ayo kon giunsa ni Jose sa pagpakita og gugma sa iyang mga igsoon.
-
Basaha ang hugpong sa mga pulong gikan sa Genesis 45:4–15 nga naghulagway sa mga butang nga gihimo ni Jose sa pagpakita nga gihigugma niya ang iyang pamilya. Dapita ang mga bata nga magpakaaron-ingnon sila nga naghimo sa unsay gisulti diha sa mga bersikulo. Sama pananglit, pwede silang magpakaaron ingnon nga mihangyo sa usa ka sakop sa pamilya sa “pagduol” (bersikulo 4) o mohatag og pagkaon sa usa ka sakop sa pamilya (tan-awa sa bersikulo 11).
-
Kantaha ang usa ka awit mahitungod sa gugma, sama sa “Maghigugmaay” (Songbook sa mga Bata, 74). Tabangi ang mga bata sa pagdrowing o pagpalakra sa ilang mga kamot [outline] ug isulat diha sa gipalakra nga kamot ang butang nga ilang mahimo sa pagpakita og gugma sa ilang pamilya.
Ang mga panalangin sa pagkapari makatabang kanako.
Si Jacob mipanalangin sa iyang mga anak nga lalaki ug mga apo nga lalaki (tan-awa sa Genesis 48–49). Karon makadawat kita og mga panalangin sa pagkapari nga makahatag kanato og kahupayan, pagkaayo, giya, ug espiritwal nga kalig-on.
Makadawat kita og mga panalangin gikan niadtong naghupot sa pagkapari.
Posible nga mga Kalihokan
-
Ipakita sa mga bata ang usa ka litrato ni Jacob nga nanalangin sa iyang mga anak nga lalaki o ubang mga litrato bahin sa mga pagpanalangin sa pagkapari (tan-awa ang mga litrato dinhi niini nga outline; tan-awa usab diha sa Libro sa mga Hulagway sa Ebanghelyo, nu. 12). Ipahulagway sa mga bata unsay panghitabo diha sa mga litrato.
-
Basaha ngadto sa mga bata ang Genesis 48:8–9. Ipasabut nga ang Israel, nga gitawag usab og Jacob, mao ang amahan ni Jose nga siya gustong mohatag sa mga anak ni Jose og panalangin sa pagkapari. Kon duna man sa mga bata ang nakadawat og panalangin sa pagkapari, dapita sila sa pagsulti mahitungod sa ilang kasinatian. O sa pagpaambit og kaugalingon nimong kasinatian.
-
Tabangi ang mga bata sa paghunahuna og mga rason ngano kaha nga mangayo sila og panalangin sa pagkapari. Usab tabangi sila sa pagngalan og mga tawo nga naghupot sa pagkapari nga mahimo nilang hangyoon, sama sa usa ka amahan, apohang lalaki, o tigpangalagad nga brother.
Makapasaylo ako.
Unsay makat-unan sa mga bata mahitungod sa pagpasaylo gikan sa ehemplo ni Jose nga nagpasaylo sa iyang mga igsoong lalaki?
Posible nga mga Kalihokan
-
Gamita kini nga pahina sa kalihokan karong semanaha sa pagtabang sa mga bata nga mahinumdom sa unsang paagi ang mga igsoong lalaki ni Jose wala magmabination kaniya. Basaha ngadto sa mga bata ang Genesis 50:17, nga magpasabut og maayo nga ang mga igsoong lalaki nagbasol sa ilang mga nahimo ug gusto nga si Jose mopasaylo kanila. Basaha ang bersikulo 21 sa pagpakita nga si Jose mipasaylo sa iyang mga igsoong lalaki—wala na siya masuko kanila.
-
Kantaha og dungan ang “Tabangi Ko, Mahal nga Amahan” (Songbook sa mga Bata, 52). Kon magkanta kamo mahitungod sa pagpasaylo, dapita ang mga bata nga itudlo si Jose diha sa pahina sa kalihokan. Kon magkanta kamo mahitungod sa paghinulsol, dapita sila nga itudlo ang iyang mga igsoong lalaki.
-
Tabangi ang mga bata sa paghunahuna og mga sitwasyon diin sila tingali magkinahanglan nga mopasaylo og tawo. Dapita ang mga bata sa pagbansay unsay ilang isulti o buhaton aron makapakita og pasaylo niana nga tawo.
Itudlo ang Doktrina: Mas Dagko nga mga Bata
Ang pagpasaylo magdala og kalinaw.
Ang mga igsoong lalaki ni Jose nakahimo og dili maayong mga butang kaniya. Sa gihapon si Jose mipasaylo kanila ug midala og kalinaw sa iyang pamilya.
Posible nga mga Kalihokan
-
Tabangi ang mga bata sa pagdrama-drama sa mga eksena gikan sa Genesis 42–44. Samtang maghimo sila, pangutan-a sila unsa kahay gibati ni Jose nga makita ang iyang mga igsoong lalaki pag-usab o unsa kahay gibati sa iyang mga igsoong lalaki dihang sa katapusan ilang nailhan si Jose.
-
Pangutan-a ang mga bata kon unsay ipasabut sa pagpasaylo og tawo. Tabangi sila nga makasabut nga ang pagpasaylo og tawo naglakip sa pagtratar kaniya pinaagi sa Kristohanong gugma. Pangutan-a ang mga bata unsay ilang nahibaloan mahitungod sa istorya ni Jose nga nagpasaylo sa iyang mga igsoong lalaki, o basaha dungan sa mga bata ang mga bersikulo gikan sa Genesis 45:1–15. Unsay gihimo ni Jose o gisulti aron mahibalo ang iyang mga igsoong lalaki nga siya mipasaylo na kanila? Unsay atong ikasulti og buhaton kon ang uban mohangyo nga sila atong pasayloon?
-
Hangyoa sila sa paghunahuna og panahon sa dihang mipasaylo sila og tawo o dihang ang usa ka tawo mipasaylo kanila. Aron mahatagan sila og panahon sa paghunahuna, pagpaambit og imong kaugalingong kasinatian , ug ipamatuod ang mga panalangin nga miabut gumikan sa pagpasaylo. Dapita ang mga bata sa pagpaambit og ilang mga kasinatian, kon ganahan sila. Unsay ilang gibati? Unsay atong nakat-unan mahitungod sa pagpasaylo gikan sa ehemplo sa Manluluwas? (tan-awa sa Lucas 23:33–34).
Ang Langitnong Amahan mipadala ni Jesukristo sa pagluwas kanako.
Ang istorya bahin ni Jose nga nagluwas sa iyang pamilya gikan sa gutom makatudlo kanato mahitungod ni Jesukristo, kinsa miluwas kanato gikan sa sala ug kamatayon.
Posible nga mga Kalihokan
-
Isulat diha sa pisara ang Jose ug Jesukristo. Tabangi ang mga bata sa pagsiksik sa mosunod nga magka-pares nga mga kasulatan ug isulat diha sa pisara ang mga butang nga komon nila ni Jose ug ni Jesus: Genesis 37:3 ug Mateo 3:17; Genesis 37:26–28 ug Mateo 26:14–16; Genesis 45:5–7 ug Lucas 4:18; ug Genesis 47:12 ug Juan 6:35.
-
Pangutan-a ang mga bata kon unsay ipasabut sa pagluwas o pagsalbar og tawo. Kon duna diha nila ang may kasinatian nga naluwas o nasalbar gikan sa peligro, dapita sila sa pagpaambit. Giunsa ni Jose sa pagluwas ang iyang mga igsoong lalaki? (tan-awa sa Genesis 42:1–3; 45:5–7). Pagpakita og usa ka litrato sa Manluluwas. Giunsa ni Jesus sa pagluwas kanato?
Hubad ni Joseph Smith, Genesis 50:27–33 (sa Ang Giya sa mga Kasulatan)
Ang Langitnong Amahan miandam ni Joseph Smith nga mahimong propeta sa atong panahon.
Liboan ka tuig sa wala pa kana, si Jose sa Ehipto nakakita nga ang Ginoo motawag ni Joseph Smith sa paghimo og talagsaong buhat sa katapusang mga adlaw. Tudloi ang mga bata kon sa unsang paagi ang Ginoo mipanalangin kanato pinaagi sa Propeta nga si Joseph Smith.
Posible nga mga Kalihokan
-
Hatagi ang mga bata og mga timailhan nga maghulagway mahitungod ni Joseph Smith, ug dapita sila sa pagtag-an kinsa ang imong gihulagway. Ilakip ang mga timailhan gikan sa Hubad ni Joseph Smith, Genesis 50:27–33 (diha sa Ang Giya sa mga Kasulatan), sama sa “mitudlo siya kanamo mahitungod sa mga pakigsaad” (tan-awa sa bersikulo 28), “siya mohatag kanato sa pulong sa Ginoo” (tan-awa sa bersikulo 30), ug “iyang ngalan pagatawgon sama sa iyang amahan” (tan-awa sa bersikulo 33). Human matag-anan sa mga bata, dapita sila sa pagpangita niini nga mga timailhan diha sa mga bersikulo. Unsa pa ang atong makat-unan mahitungod ni Joseph Smith gikan sa panagna ni Jose sa Ehipto?
-
Pagpakita sa mga bata og litrato nga nagrepresentar sa importanting mga butang nga gihimo o gitudlo ni Joseph Smith (tan-awa, pananglit sa, Libro sa mga Hulagway sa Ebanghelyo, mga nu. 89–95, 97, 98, 117, 118). Tabangi ang mga bata sa paghunahuna sa mga panalangin nga anaa kanato tungod ni Joseph Smith. Sama pananglit, sa unsang paagi ang iyang buhat nakatabang nato nga maduol kang Jesukristo?
Awhaga ang Pagkat-on diha sa Panimalay
Dapita ang mga bata nga ipaambit kini nga pahina sa kalihokan karong semanaha diha sa ilang mga pamilya sa panimalay. Magamit nila kini sa pagribyu sa istorya bahin ni Joseph ug sa iyang mga igsoong mga lalaki ug sa paghisgot sa kaimportante sa gugma ug pagpasaylo diha sa atong mga pamilya.
Pagpalambo sa Atong Pagtudlo
Magpamatuod bahin ni Jesukristo. Bisan og ang Daang Tugon wala mohisgot sa ngalan nga Jesukristo, kini nagpasabut ngadto Kaniya pinaagi sa uban nga ngalan, ug kini nagpamatuod bahin Kaniya pinaagi sa mga simbolo ug sa mga istorya. Tabangi ang mga bata nga makat-on sa pagpangita sa mga kamatuoran mahitungod sa Manluluwas sa matag higayon nga magbasa sila sa mga kasulatan.