Si Moises ug ang nagsiga nga sampinit

Si Moises ug ang Nagsiga nga Sampinit, ni Harry Anderson

Marso 21–27

Exodo 1–6

“Nahinumduman Ko ang Akong Tugon”

Sugdi ang imong pagpangandam sa pagtudlo pinaagi sa pagbasa sa Exodo 1–6. Kini nga outline karong semanaha sa Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.

Irekord ang Imong mga Impresyon

pagpaambit nga icon

Dapita ang Pagpaambit

Pagpakita og pipila ka mga butang nga may kalabutan sa mga asoy dinhi niini nga mga kapitulo—sama pananglit, usa ka dakong basket o bata nga monyeka. Dapita ang mga bata sa paggamit niini nga mga butang sa pagpaambit sa ilang paborito nga mga bahin sa istorya ni Moises.

pagtudlo nga icon

Itudlo ang Doktrina: Mas Gagmay nga mga Bata

Exodo 1–2

Ang Dios makalihok pinaagi kanako aron matuman ang Iyang katuyoan.

Si Moises adunay dako nga tahas sa paghimong gawasnon sa Israel gikan sa pagkaulipon. Apan wala unta siya molampus niini kon ang iyang inahan, ang iyang igsoong babaye, ang anak nga babaye ni Paraon, ug ubang matinud-anong mga babaye wala manalipud ug moatiman kaniya.

Posible nga mga Kalihokan

• Gamita kini nga pahina sa kalihokan karong semanaha ug ang “Ang Batang Moses” (diha sa Mga Istorya sa Daang Tugon) sa pagsugilon ngadto sa mga bata sa unsang paagi si Jochebed (inahan ni Moises), si Miriam (iyang igsoon nga babaye), ug ang anak nga babaye ni Paraon miatiman ni Moises. Ipasabut pag-ayo nga tungod niini ug sa ubang matinud-anong mga babaye, luwas si Moises ug sa umaabut nga adlaw mangulo sa mga anak sa Israel ngadto sa kasiguroan. Dapita ang mga bata sa pagdrowing og usa ka litrato sa mga tawo kinsa miatiman kanila.

  Batang Moises diha sa bukag

  Si Moises sa Kasagbutan, © Providence Collection/licensed from goodsalt.com

• Kantaha og dungan ang usa ka awit mahitungod sa serbisyo, sama sa “Sulti sa Gamay nga Sapa “Hatag” (Songbook sa mga Bata, 116). Tabangi ang mga bata sa paghunahuna og sayon nga mga butang nga ilang mahimo sa pagtabang sa uban diha sa panimalay, sa simbahan, ug sa eskwelahan.

Exodo 3

Si Jesus motabang nako sa paghimo og maayong mga butang.

Si Moises nabalaka mahitungod kon siya makahaw-as ba sa mga Israelite gikan sa Ehipto. Apan ang Ginoo misaad nga Siya motabang ni Moises. Tabangi ang mga bata nga makaangkon og pagtuo nga ang Manluluwas motabang usab kanila.

Posible nga mga Kalihokan

• Sultihi ang mga bata mahitungod kon giunsa sa Ginoo paghatag kang Moises sa usa ka importanting buluhaton nga himoon. Basaha ang pinili nga mga bersikulo gikan sa Exodo 3, o basaha ang “Ang Propeta Moses” (diha sa Mga Istorya sa Daang Tugon). Ipaambit kon unsay gibati ni Moises (tan-awa sa Exodo 3:6, 11) ug kon unsay gisulti sa Ginoo kanila (tan-awa sa mga bersikulo 12 ug 14). Dapita ang mga bata sa pagsubli og sulti dungan nimo sa mga pulong nga “sa pagkamatuod ako magauban kanimo,” ug pagpaambit og usa ka panahon sa dihang ang Ginoo imong gikauban dihang duna kay importanting buhaton alang Kaniya.

• Tabangi ang mga bata sa paghunahuna og mga sitwasyon nga tingali pabuhaton sila og butang nga daw lisud. Ipasabut nga sama sa pagtabang ni Jesus kang Moises, si Jesus motabang usab kanila. Kantaha ang usa ka awit mahitungod kon unsaon ni Jesus sa pagtabang kanato, sama sa “Mokuyog ko ni Jesus” (ChurchofJesusChrist.org). Ipamatuod nga ang Manluluwas motabang kanato kon kita nabalaka o nahadlok.

• Paggunting og papel nga porma og mga kasingkasing ug isulat diha niini ang mga paagi sa Ginoo sa pagtabang sa mga bata. Ibutang ang kasingkasing nga nakakulob sa salog. Dapita ang mga bata nga magpuli-puli sa pagpili og mga kasingkasing, ug tabangi sila sa pagbasa unsay nakasulat niini.

Exodo 3:1–5

Ako mahimo nga mopakita og balaang pagtahud sa balaang mga dapit.

Gamita ang istorya bahin ni Moises ug sa nagsiga nga sampinit sa pagtabang sa mga bata nga makasabut nganong tagdon nato ang sagradong mga butang uban sa balaang pagtahud.

Posible nga mga Kalihokan

• Basaha ang Exodo 3:1–5, ug ipasabut nga si Moises mipakita og balaang pagtahud pinaagi sa paghubo sa iyang mga sapatos. Unsay atong buhaton aron makapakita og balaang pagtahud sa simbahan? Kantaha ang usa ka awit mahitungod sa balaang pagtahud, sama sa “Ang Pagtahud Usa ka Gugma” (Songbook sa mga Bata, 12). Tabangi ang mga bata sa pagpangita sa mga pulong diha sa kanta nga nagtudlo kanato unsaon nga kita makapakita og balaang pagtahud. Ngano nga ang Ginoo gusto nga kita balaang motahud?

• Pagpakita og pipila ka mga litrato sa mga sitwasyon diin kita kinahanglan nga balaang motahud ug pipila diin kita dili kinahanglan nga balaang motahud, sama sa usa ka miting sa sakramento, usa ka pag-ampo, sa parke, ug sa usa ka kumbira sa kasaulogan sa adlawng natawhan [birthday party]. Hangyoa ang mga bata sa pagsuhid sa mga litrato aron ipakita kon asa kita angayang mopakita og balaang pagtahud.

• Dapita ang mga bata sa pagdrowing og litrato sa ilang kaugalingon, ug itudlo ang ilang mga litrato samtang hisgutan nimo ang mga paagi nga sila makapakita og balaang pagtahud uban sa managlahing mga parte sa ilang lawas, sama sa ilang mga mata, mga dalunggan, mga ba-ba, mga kamot, ug mga tiil.

pagtudlo nga icon

Itudlo ang Doktrina: Mas Dagko nga mga Bata

Exodo 1–2

Ang Dios molihok pinaagi sa matag usa kanato sa pagtuman sa Iyang mga katuyoan.

Daghang tawo mitabang sa pagtuman sa mga katuyoan sa Dios pinaagi sa pagpreserbar sa kinabuhi sa batan-ong si Moises. Unsaon nimo sa pagtabang ang mga bata nga imong gitudloan nga makasabut sa importanting tahas nga atong gidala sa pagtuman sa kabubut-on sa Dios?

Posible nga mga Kalihokan

• Dapita ang mga bata sa pagpaambit unsay ilang nahibaloan mahitungod ni Moises sa dihang masuso pa siya. Gamita kini nga pahina sa kalihokan karong semanaha ug ang Exodo 1:22; 2:1–10 sa pag-summarize sa istorya sa pagkabata ni Moises. Basaha ang mga pakisayran sa kasulatan nga naa sa pahina sa kalihokan, ug pangutan-a ang mga bata unsay gibuhat sa matag babaye aron mapreserbar ang kinabuhi ni Moises.

• Sultihi ang mga bata mahitungod sa mga tawo nga imong gidayeg tungod sa ilang kamatinud-anon sa pagserbisyo sa Dios ug niadtong anaa sa ilang palibut, bisan og nakaserbisyo sila sa ginagmayng paagi. Dapita ang mga bata sa paghisgot mahitungod sa mga tawo nga ilang nahibaloan kinsa matinud-anong miserbisyo sa Dios ug sa uban. Unsay atong bahin sa buluhaton sa Dios?

Exodo 3–4

Ang Ginoo motabang kanako nga matuman ang Iyang kabubut-on.

Si Moises mibati nga dili takus sa iyang tawag, apan ang Ginoo misaad nga Iyang ubanan ug tabangan si Moises. Sa unsang paagi kini nga asoy modasig sa mga bata nga imong gitudloan?

Posible nga mga Kalihokan

• Gamit ang asoy diha sa Exodo 3; 4:1–17, papuli-puliha ang mga bata sa pagpakaaron ingnon nga mao si Moises. Kon posible, pagdala og props [butang nga ikapakita] nga ilang magamit, sama sa flashlight ug usa ka tanom nga magrepresentar sa nagsiga nga sampinit.

• Hangyoa ang mga bata sa pagbasa sa Exodo 3:11; 4:1, 10 ug pagsusi unsay gibati ni Moises mahitungod sa paghangyo ni Paraon nga tugutang makalakaw ang mga Israelite. Kanus-a sila dunay susamang mga pagbati? Unsa nga tambag ang ikapaambit sa mga bata kang Moises sa pagtabang kaniya? Tabangi sila sa pagdiskubre sa unsang paagi ang Ginoo miawhag ni Moises (tan-awa sa Exodo 3:12; 4:2–9, 11–12).

• Pagpaambit og kasinatian sa dihang mibati ka nga ang Dios nagtabang nimo nga matuman ang usa ka tawag o pagserbisyo Kaniya sa ubang paagi. Dapita ang mga bata sa pagpaambit og higayon sa dihang gitabangan sila sa Ginoo.

Exodo 3:1–5

Ako mahimo nga mopakita og balaang pagtahud sa balaang mga dapit.

Ang Ginoo mihangyo ni Moises nga huboon ang iyang mga sapatos diha sa nagsiga nga sampinit isip timaan sa pagrespeto ug balaang pagtahud. Unsaon nimo sa paggamit kini nga asoy alang sa pagtudlo sa mga bata mahitungod sa balaang pagtahud?

Posible nga mga Kalihokan

• Basaha ang Exodo 3:1–5, ug hangyoa ang mga bata sa pag-summarize sa mga bersikulo sa ilang kaugalingong mga pulong. Unsay atong mabuhat aron makapakita og balaang pagtahud diha sa balaang mga dapit, sama sa simbahan o sa templo? Tabangi ang mga bata sa paghimo og “mga bag sa balaang pagtahud” nga ilang madala uli sa panimalay nga may sulod nga ginunting nga mga papel nga sinulatan og mga ideya mahitungod kon unsaon sa pagpakita og balaang pagtahud. Dapita sila sa pagpaambit niini nga mga ideya uban sa ilang mga pamilya.

• Kantaha og dungan ang usa ka awit mahitungod sa balaang pagtahud, sama sa “Ang Pagtahud Usa ka Gugma” (Songbook sa mga Bata, 12), ug hangyoa ang matag bata sa pagsulat ug pagpaambit og usa ka kahulugan sa balaang pagtahud base sa liriko.

• Gamita ang litrato ni Jesus nga Naghinlo sa Templo (Libro sa mga Hulagway sa Ebanghelyo, nu. 51) sa pagsugilon sa istorya sa Mateo 21:12–13. Sa unsang paagi ang kinaiya ni Moises diha sa Exodo 3:1–5 lahi kay sa kinaiya sa mga tigpailis og kwarta? Nganong ang Manluluwas gusto nga tagdon nato ang sagradong mga butang uban sa balaang pagtahud?

pagkat-on nga icon

Awhaga ang Pagkat-on diha sa Panimalay

Aron matabangan ang mga bata nga mapaambit unsay ilang nakat-unan gikan sa Exodo 1–6, awhaga sila sa pagdrowing og usa ka litrato sa usa sa mga tawo nga ilang nakat-unan sa klase aron ipaambit ngadto sa ilang pamilya.

Pagpalambo sa Atong Pagtudlo

Ang mga bata makabenepisyo gikan sa pagbalik-balik. Ayaw kahadlok nga ibalik-balik ang mga kalihokan sa makadaghang higayon, ilabi na sa gagmayng mga bata. Makatabang kini sa mga bata nga mahinumdom sa unsay imong gitudlo.

pahina sa kalihokan: Ang Dios molihok pinaagi sa matag usa kanato sa pagtuman sa Iyang mga katuyoan