Enero 3–9

Genesis 1–2; Moises 2–3; Abraham 4–5

“Idi Punganay Pinarsua ti Dios ti Langit ken ti Daga”

Bayat ti panagadalmo iti Genesis 1–2, Moises 2–3, ken Abraham 4–5, panunotem maipapan kadagiti ubbing a sursuruam, ken utobem no ania dagiti kinapudno a pakatulongam kadakuada a mangipaawat manipud kadagitoy a kapitulo.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangibinglay ti maysa a banag a pinarsua ti Nailangitan nga Ama ken ni Jesucristo a pagyamyamananda. Ti panangipakita kadagiti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ti makaited kadakuada kadagiti kapanunotan.

Isuro ti Doktrina: In-inaudi nga Ubbing

Moises 2

Pinarsua ni Jesus ti daga.

Makatulong kadagiti ubbing ti panangammoda maipapan iti Panagparsua tapno mariknada ti ayat ti Dios ken dumakkel ti panangbigbigda iti pateg para iti lubong. Kasano a maaramidmo a makaparegta ti panagsursuro maipapan iti Panagparsua?

Dagiti Mabalin nga Aktibidad

• Ipakitam kadagiti ubbing dagiti ladawan dagiti banag a mangibagi iti nadumaduma a panawen ti Panagparsua (kas nailadawan iti Moises 2; kitaen met iti “Parsuaen ni Jesucristo ti Daga,” iti Dagiti Estoria iti Daan a Tulag), ket tulongam dagiti ubbing nga agpanunot kadagiti tignay a maigiddan kadagiti ladawan. Kas pagarigan, mabalinda ti agaramid iti maysa a gemgem a mangibagi iti namaga a daga wenno ipayapay dagiti takiagda a kas kadagiti dalluyon ti danum (kitaen iti Moises 2:9–10). Ibinglaymo ti pammaneknekmo nga inaramid ni Jesucristo dagitoy a banag gapu ta Isu ken ti Nailangitan nga Ama ket ay-ayatendatayo.

• Agkansion iti maysa a kanta maipapan iti bambanag a pinarsua ni Jesucristo para kadatayo, kas iti “The World Is So Lovely” (Children’s Songbook, 233). Idawat kadagiti ubbing nga agdrowing kadagiti ladawan dagiti pinarsua a nailadawan iti kanta.

  

  Panagparsua, ni Joan Hibbert Durtschi

Moises 2:26–27

Naparsuaak iti ladawan ti Dios.

No maawatan dagiti ubbing a naparsuada iti ladawan ti Dios, maaddaanda iti rikna ti kaipapanan ti panagraem ken panagdayaw iti bukodda a bagi ken ti bagi dagiti dadduma.

Dagiti Mabalin nga Aktibidad

• Tulongam dagiti ubbing a mangulit iti “Siak, a Dios, pinarsuak ti tao a kalanglangak” iti sumagmamano a daras (Moises 2:27). Ilawlawag a pinarsua ti Nailangitan nga Ama dagiti bagitayo a kalanglanga ti Bagina. Awisen dagiti ubbing a mangitudo kadagiti paset dagiti bagida kabayatan ti panangnaganmo kadagitoy, wenno agkansion iti maysa a kanta maipapan kadagiti bagitayo, kas iti “Head, Shoulders, Knees, and Toes” (Children’s Songbook, 275).

• Awisem dagiti ubbing a mangyakem no ania ti mabalinda nga aramiden kadagiti bagida, idinto a pugtuan dagiti dadduma nga ubbing no ania ti ar-aramidenda. Awisem dagiti ubbing a mangibinglay no apay nga agyamanda para kadagiti bagida.

• Mangidrowing iti balabala ti maysa a papel, ket agaramid iti maysa a puzzle babaen iti panangputedputed iti daytoy kadagiti paset. Ipasa dagiti paset ti bagi, ken pagtitinnulongen dagiti ubbing a mangurnos kadagitoy tapno maporma ti maysa a bagi. Kiddawen kadagiti ubbing a mangibinglay kadagiti banag a mabalinda nga aramiden iti tunggal paset. Iburaymo ti pammaneknekmo a naparsua dagiti bagitayo iti ladawan ti Dios.

Moises 3:2–3

Nasantuan ti aldaw ti Sabbath.

Dagiti ubbing nga addaan iti galad a mangngilin ti aldaw ti Sabbath bayat ti kinaubingda ket ad-adda a natulnog kadaytoy a bilin no agbalinen a nakumkumikom ken narikrikut ti panagbiag.

Dagiti Mabalin nga Aktibidad

• Basaem ti Moises 3:2–3, ken kiddawen kadagiti ubbing a dumngeg no ania ti inaramid ti Dios iti maikapito nga aldaw. Mangitugot kadagiti ladawan (wenno agaramid kadagiti simple a drowing) dagiti banag nga aramidentayo a mamagbalin daytoy a maysa a nasantuan nga aldaw ken dagiti banag nga aramidentayo iti sabali nga aldaw. Paurnos kadagiti ubbing dagiti ladawan iti dua a bunton, maysa para iti Domingo ken maysa para kadagiti sabali nga aldaw. Paneknekan no apay a napateg a ngilinen ti aldaw ti Sabbath.

• Iti sumagmamano nga aldaw sakbay iti klase, kiddawem iti maysa kadagiti ubbing ken dagiti nagannakna nga umay a nakasagana a mangibinglay kadagiti banag nga ar-aramidenda iti pamiliada amangngilin iti aldaw ti Sabbath. Awisem dagiti dadduma pay nga ubbing a mangibinglay no ania ti ar-aramiden ti pamiliada.

Isuro ti Doktrina: In-inauna nga Ubbing

Moises 2

Pinarsua ni Jesucristo ti daga babaen ti panangiturong ti Nailangitan nga Ama.

Mabalinmo nga usaren ti Moises 2 a mangtulong kadagiti ubbing a makakita a nairanta a naparsua ti lubong a kas paset ti plano ti Dios. Bayat ti panangbasam kadagitoy a kapitulo, ania dagiti kapanunotan nga umay iti panunotmo a makatulong a mangpapigsa kadagiti pammaneknek dagiti ubbing iti Panagparsua?

Dagiti Mabalin nga Aktibidad

• Tulongam dagiti ubbing nga agpanunot kadagiti panawen idi nakaaramidda iti maysa a banag babaen iti panagtungpalda kadagiti pangiturong ti sabali a tao. Kas pagarigan, nalabit a nagaramidda iti maysa a recipe babaen iti panangtarabay kadakuada ti maysa a naganak wenno kabsat. Isurat ti Asino ti nangparsua iti daga? iti pisarra, ket awisem dagiti ubbing a mangsapul ti sungbat iti Moises 2:1. Paaneknekan a pinarsua ni Jesucristo ti daga babaen ti panangiturong ti Nailangitan nga Ama.

• Dutokam ti tunggal ubing kadagiti bersikulo iti Moises 2 a mainaig iti maysa kadagiti aldaw ti panagparsua, ket idawat kenkuana a mangidrowing iti maysa a ladawan dagiti banag a pinarsua ti Nailangitan nga Ama ken ni Jesus iti dayta nga aldaw. Idawatmo kadagiti ubbing a mangiggem kadagiti ladawanda ket agtakderda iti urnos dagiti aldaw ti Panagparsua, ket kalpasanna awisem ti tunggal ubing a mangisuro iti dadduma pay nga ubbing no ania ti napasamak iti dayta nga aldaw a naidutok kadakuada. Ania ti masursurotayo maipapan iti Nailangitan nga Ama ken ni Jesucristo manipud iti estoria ti Panagparsua?

Moises 2:26–27

Naparsua da Adan ken Eva iti ladawan ti Dios.

Mangtedto ti lubong kadagiti ubbing iti adu a palso a mensahe maipapan kadagiti bagida. Ti doktrina iti Moises 2:26–27 ket nabileg a motibasion a mangdayaw ken mangaywan kadagiti bagitayo.

Dagiti Mabalin nga Aktibidad

• Aggigiddan a basaen ti Moises 2:26 –27. Ania ti isuro kadatayo dagitoy a bersikulo maipapan kadagiti bagitayo? Ipabuya ti video “God’s Greatest Creation” (ChurchofJesusChrist.org), wenno ay-ayamen ti ay-ayam a “Your Body Is a Temple” (Friend, Ago. 2019, 24–25). Mabalin met nga aggigiddankayo nga agbasa kadagiti mainaig nga adaw manipud iti mensahe ni Presidente Russell M. Nelson “Your Body: A Magnificent Gift to Cherish” (New Era, Ago. 2019, 2–7) a makatulong kadagiti ubbing a makarikna iti panagyaman iti Nailangitan nga Ama para kadagiti bagida.

• Agdrowing iti maysa a pigura ti maysa a bagi iti pisarra, ket awisen dagiti ubbing nga agpili iti maysa a paset ti bagi ken isurat iti abay daytoy no apay nga agyamanda iti daytoy. Ipeksam ti panagyamanmo para iti bagim, ken paneknekam a naparsuatayo a kalanglanga ti Dios.

Genesis 2:2–3

Nasantuan ti aldaw ti Sabbath.

Mabalin a nasken nga ilawlawag dagiti ubbing kadagiti gagayyemda no apay a maigiddiat ti panangtratoda iti Domingo manipud kadagiti dadduma nga aldaw. Isuro tiGenesis 2:2–3 no apay a ti aldaw ti Sabbath ket maysa a nasantuan nga aldaw. Ania ti maaramidmo a makatulong kadagiti ubbing a nasaysayaat a maawatan ken mailawlawagda daytoy a doktrina?

Dagiti Mabalin nga Aktibidad

• Kasano a ti panangngilintayo a nasantuan ti aldaw ti Sabbath ket mangipakita iti ayat ken respetotayo iti Nailangitan nga Ama ken ni Jesucristo? Tulongam dagiti ubbing a mangyakem kadagiti senario a mangilawlawag iti maysa a gayyem no apay a pilienda nga aramiden dagiti banag iti Domingo a mangdayaw ti Nailangitan nga Ama ken ni Jesus. Isingasing nga usarenda ti Genesis 2:2–3 kadagiti panangilawlawagda.

• Ikkam dagiti ubbing iti sumagmamano a minuto nga agilista iti adu a banag agingga a kabaelanda a mangpanunot a maaramidda tapno mapagbalin ti Sabbath a maysa a nasantuan nga aldaw. Awisem dagiti ubbing a mangibinglay iti listaanda, ket allukoyem ida nga inayon iti listaanda bayat ti panangibinglay dagiti dadduma a kadagiti singasing a dida napanunot. Isingasing a yawid dagiti ubbing dagiti listaan iti pagtaengan ket agibasarda kadagitoy no kasapulanda dagiti kapanunotan ti nasasayaat a banag nga aramiden iti Sabbath.

Yallukoy ti Panagsursuro iti Pagtaengan

Tulongam dagiti ubbing a mangpanunot maipapan iti no kasano a maaramidda ti maysa nga aktibidad kadagiti pamiliada a kapada ti maysa nga inaramidyo iti klase. Nalabit a kayatmo a tulongan ida nga agsurat iti maysa a note a mangipalagip iti bagbagida.

Panangpadur-as iti Panangisurotayo

Tulongam dagiti ubbing a mangipakita iti kinamanagpartuatda. No dagiti ubbing ti agaramid, agdrowing, wenno agkolor iti maysa a banag a mainaig iti estoria wenno pagbatayan a sursuruenda, masansan a nasaysayaat a malagipda daytoy. Allukoyem ida a mangusar kadagiti partuatda a mangisuro kadagiti pamiliada. (Kitaen iti Panangisuro iti Wagas ti Mangisalakan,25.)