«Մարտի 13-19-ը։ Մատթեոս 11-12, Ղուկաս 11․ «Ես հանգիստ կտամ ձեզ», Եկ, հետևիր ինձ․ Երեխաների միության համար. Նոր Կտակարան 2023 (2022)
«Մարտի 13-19-ը։ Մատթեոս 11-12, Ղուկաս 11», Եկ, հետևիր ինձ․ Երեխաների միության համար. 2023
Մարտի 13-19-ը։
Մատթեոս 11-12, Ղուկաս 11
«Ես հանգիստ կտամ ձեզ»
Այս համառոտ շարադրանքի ուսմունքները նախատեսված են կյանքի կոչել ձեր սեփական ստեղծագործական գաղափարները։ Կարող եք հարմարեցնել դրանք այն երեխաների կարիքներին, որոնց ուսուցանում եք:
Հրավիրեք կիսվել
Խրախուսեք երեխաներին կիսվել, թե նրանք ինչ կարող են անել Հանգստության օրը Տիրոջը երկրպագելու համար:
Ուսուցանեք վարդապետությունը. կրտսեր խմբի երեխաներ
Հիսուսը կօգնի ինձ, եթե գամ Նրա մոտ
Երեխաները մխիթարություն են զգում՝ իմանալով, որ Հիսուսը կօգնի իրենց, երբ հոգսեր ունենան և գան Նրա մոտ:
Հնարավոր վարժություններ
-
Կարդացեք Մատթեոս 11.28–30 հատվածները և ցույց տվեք լծված եզների նկարը այս շաբաթվա համառոտ շարադրանքում Եկ, հետևիր ինձ․ Անհատների և ընտանիքների համար նյութից: Խնդրեք երեխաներին ցույց տալ պատկերված եզներին և լուծը: Բացատրեք, որ լծված եզները միասին կարող են ավելի մեծ ծանրություն քաշել, քան ամեն մեկն առանձին-առանձին։ Վկայեք, որ երբ մենք տխրություն, անհանգստություն կամ վախ ենք զգում, կարող ենք փնտրել Հիսուսին ու Նա կօգնի մեզ:
-
Խնդրեք երեխաներից մեկին ծանր առարկա բարձրացնել: Երբ նա դժվարանա, առաջարկեք օգնել: Ինչպե՞ս է Հիսուսն օգնում մեզ դժվար գործեր կատարել։ Կիսվեք մի փորձառությամբ, երբ զգացել եք, որ Հիսուսն օգնում է ձեզ դժվար բան անել, և խնդրեք երեխաներին կիսվել անձնական փորձով:
Ես կարող եմ Հանգստության օրը սուրբ պահել
Ի՞նչ զվարճալի եղանակներով կարող եք երեխաներին ուսուցանել հանգստության օրը սուրբ պահելու մասին, և ինչո՞ւ ենք մենք այն սուրբ պահում:
Հնարավոր վարժություններ
-
Բարձրաձայն կարդացեք Մատթեոս 12․10-13 հատվածները: Հրավիրեք երեխաներին ոտքի կանգնել և նստել ամեն անգամ «Հանգստության օր» ասելիս, և նրանց հետ կրկնեք «[ճիշտ] է շաբաթ օրը բարիք գործել» արտահայտությունը (Մատթեոս 12.12): Նրանց կարծիքով, ի՞նչ է դա նշանակում:
-
Երեխաներին ցույց տվեք օրացույց և նրանց համար նշեք Հանգստության օրերը: Շաբաթվա մյուս օրերին ի՞նչ ենք անում: Ի՞նչ կարող ենք անել Հանգստության օրը, որպեսզի այն տարբերվի մյուս օրերից (տես Եսայիա 58․13–14)։
-
Հրավիրեք երեխաներին նկարել բարի գործեր, որոնք կարող են անել Հանգստության օրը (տես այս շաբաթվա գործնական աշխատանքի էջը)։
-
Հրավիրեք երեխաներին շարժումներ հորինել, որոնք կօգնեն նրանց հիշել, թե ինչպես ենք մենք պատրաստվում Հանգստության օրվան` մինչ կերգեն «Saturday» երգը (Children’s Songbook, 196):
-
Գրատախտակի վրա նկարեք աչքեր, ականջներ, բերան ու ձեռքեր: Խնդրեք երեխաներին ասել, թե մարմնի այս մասերից յուրաքանչյուրն ի՞նչ կարող է անել Հանգստության օրը սուրբ պահելու համար:
Երկնային Հայրը մեզ լավ պարգևներ է տալիս
Ղուկաս 11.11-13 հատվածներում Փրկչի ուսմունքը կարող է օգնել ձեր ուսուցանած երեխաներին հասկանալ, որ Երկնային Հայրը սիրում է և ցանկանում է օրհնել նրանց:
Հնարավոր վարժություններ
-
Ղուկաս 11.11-13 հատվածներում Փրկչի ուսմունքները լուսաբանելու համար օգտագործեք առարկայական դաս: Օրինակ՝ կարող եք քար տեղադրել հացի տոպրակի մեջ կամ կարիճի նկար տեղադրել ձվի տուփի մեջ: Խնդրեք երեխաներին կռահել, թե ինչ կա ներսում, իսկ հետո ցույց տվեք նրանց այդ առարկան: Հրավիրեք նրանց քարը կամ նկարը փոխարինել մի կտոր հացով կամ ձվով: Կարդացեք Ղուկաս 11.11-13 հատվածները և կիսվեք ձեր վկայությամբ, որ Երկնային Հայրը սիրում է մեզ, պատասխանում է մեր աղոթքներին և մեզ տալիս է բազմաթիվ օրհնություններ Իր Հոգու միջոցով:
-
Երեխաների հետ որևէ երգ երգեք Աստծո սիրո մասին, օրինակ՝ «Սեր տան մեջ» (Հիմներ և մանկական երգեր, 44): Որո՞նք են այն բարի պարգևները, որոնք Նա տվել է մեզ: Խնդրեք երեխաներին նկարել Երկնային Հոր օրհնությունների նկարներ, որոնց համար նրանք երախտապարտ են:
Ուսուցանեք վարդապետությունը. ավագ խմբի երեխաներ
Հիսուսը կօգնի ինձ, եթե գամ Նրա մոտ
Ինչպե՞ս կարող եք օգնել երեխաներին հասկանալ, որ Փրկիչը հանգիստ կտա նրանց իրենց դժվարություններից, եթե մոտենան Նրան:
Հնարավոր վարժություններ
-
Հրավիրեք երեխաներին կիսվել այն ժամանակի մասին, երբ անհանգիստ կամ մտահոգված են եղել ինչ-որ բանի համար: Հրավիրեք նրանց ուսումնասիրել Մատթեոս 11.28-30 հատվածները` որպես խորհուրդ, որը կարող է օգնել նրանց նման հանգամանքներում: Ինչպե՞ս է Փրկիչը «հանգիստ [տալիս մեզ]» (հատված 28):
-
Հրավիրեք երեխաներին նկարել նկարներ այն մասին, թե ինչ են անում, որպեսզի գան Հիսուսի մոտ ու սովորեն Նրանից:
-
Օգնեք երեխաներին անգիր սովորել հավատո չորրորդ հանգանակը: Խոսեք նրանց հետ այն մասին, թե ինչպես է ավետարանի առաջին սկզբունքներից և արարողություններից յուրաքանչյուրն օգնում մեզ ընդունել Հիսուսի «Ինձ մոտ եկեք» հրավերը (Մատթեոս 11.28):
Հանգստության օրը բարի գործեր կատարելու օր է. դրանք ինձ մոտեցնում են Աստծուն
Ձեր ուսուցանած երեխաները կզորանան, երբ նշեք Հանգստության օրը սուրբ պահելու նպատակներն ու օրհնությունները:
Հնարավոր վարժություններ
-
Հրավիրեք երեխաներից մեկին հանդես գալ այն մարդու դերում, որի ձեռքը Փրկիչը բուժեց (տես Մատթեոս 12.10–13): Մեկ այլ երեխա կարող է նրան հարցեր տալ նրա փորձառության մասին:
-
Միասին կարդացեք Մատթեոս 12․12-ը։ Որո՞նք են այն մի քանի լավ գործերը, որ կարող ենք անել Հանգստության օրը: Թող երեխաներն այդ շաբաթվա գործնական աշխատանքի էջում նկարեն իրենց մտքերը, կտրեն դրանք և այդ կտորները հերթականությամբ դասավորեն։
-
Թաքցրեք որոշ մարդկանց նկարներ, որոնք գործերի միջոցով ցույց են տալիս Հանգստության օրը Երկնային Հոր հանդեպ ունեցած իրենց սերը: Խնդրեք երեխաներին գտնել նկարները և կիսվել, թե ինչպես են նկարում պատկերված գործողությունները ցույց տալիս մեր սերը Աստծո հանդեպ:
Աշակերտները շաբաթ օրը ցորեն են ուտում, Ջեյմս Թիսոտ
Ե՛վ իմ գործերը, և՛ իմ սիրտը պետք է մաքուր լինեն
Փրկիչն ուսուցանել է, որ բավական չէ արդար երևալ ուրիշների առաջ: Մեր մտքերը, զգացմունքներն ու անձնական արարքները նույնպես պետք է մաքուր լինեն:
Հնարավոր վարժություններ
-
Որպեսզի լուսաբանեք, թե ինչ են սովորեցնում այս հատվածները, ցույց տվեք երեխաներին մի բաժակ կամ այլ տարա, որը մաքուր է դրսից, բայց կեղտոտ է ներսից: Օգնեք նրանց մտածել, թե ինչ կարող է ներկայացնել «բաժակի արտաքին կողմը»: Ի՞նչ է ներկայացնում «ներսի կողմը»: Ինչու՞ է կարևոր մաքրել ինչպես դրսից, այնպես էլ ներսից:
-
Կարդացեք մի քանի այլ սուրբ գրություններ, որոնք ընդգծում են արդարությունը՝ ինչպես մեր սրտերում, այնպես էլ՝ մեր գործերում, օրինակ՝ Սաղմոս 24.3–5, Մատթեոս 15.7–8, Մորոնի 7.6–9։ Քննարկեք, թե ինչու է Փրկիչը ցանկանում, որ մեր սրտերն ու անձնական արարքները լինեն հոգևորապես մաքուր:
Խրախուսեք տնային ուսումնասիրությունը
Հրավիրեք երեխաներին իրենց ընտանիքի անդամների հետ կիսվել Հանգստության օրը սուրբ պահելու մասին մտքերով:
Բարելավենք մեր ուսուցումը
Հարցեր տվեք «Հարցը, որը հրավիրում է սովորողներին արտահայտել ավետարանի սկզբունքը իրենց սեփական բառերով, հատկապես, երբ հարցը տրվում է դասի սկզբում, կարող է օգնել ձեզ գնահատել, թե որքան ժամանակ կպահանջվի՝ այդ սկզբունքը դասարանում ուսումնասիրելու համար» (Ուսուցանել Փրկչի ձևով, 32)։