«Փետրվարի 13-19-ը: Մատթեոս 5, Ղուկաս 6, «Երանի ձեզ», Եկ, հետևիր ինձ․ Երեխաների միության համար. Նոր Կտակարան 2023 (2022)
«Փետրվարի 13-19-ը: Մատթեոս 5, Ղուկաս 6», Եկ, հետևիր ինձ․ Երեխաների միության համար. 2023
Փետրվարի 13-19-ը:
Մատթեոս 5, Ղուկաս 6
«Երանի ձեզ»
Երեխաներին ուսուցանելու ձեր հնարավորությունն անգին է: Երբ դուք հոգեպես պատրաստվեք, Տերը կառաջնորդի ձեզ:
Հրավիրեք կիսվել
Խնդրեք երեխաներին խոսել ինչ-որ բանի մասին, որ արել են այդ շաբաթվա ընթացքում՝ Տիրոջ լույսով ինչ-որ մեկի հետ կիսվելու համար․ գուցե լավ օրինակ լինելով կամ սեր ու բարություն ցուցաբերելով:
Ուսուցանեք վարդապետությունը. կրտսեր խմբի երեխաներ
Ես կարող եմ խաղաղարար լինել
Ձեր ուսուցանած երեխաները կարող են հզոր ազդեցություն ունենալ տանը` ուրիշների հետ սիրով ու բարությամբ վարվելով:
Հնարավոր վարժություններ
-
Երեխաների համար կարդացեք Մատթեոս 5.9 հատվածը և բացատրեք, որ խաղաղարարները ցանկացած վայր դարձնում են խաղաղ, որտեղ էլ լինեն: Թերթիկների վրա գրեք մի քանի վիճահարույց իրավիճակներ, որոնց երեխաները կարող են բախվել (օրինակ` եղբայրներն ու քույրերը խաղալիքի համար վիճելիս): Թող յուրաքանչյուր երեխա վերցնի մի թերթիկ: Իրավիճակները կարդալիս խնդրեք երեխաներին կիսվել, թե ինչպես կարող էին այդ իրավիճակում խաղաղարար լինել: Կամ կիսվեք մի քանի գեղարվեստական սյուժեներով և օգնեք երեխաներին պարզել, թե արդյոք սյուժեի գործող անձիք խաղաղարարներ էին:
-
Հրավիրեք երեխաներից մի քանիսի ծնողներին մասնակցել ձեր դասին ու կիսվել օրինակներով այն ժամանակների մասին, երբ իրենց երեխաները խաղաղարարներ են եղել տանը:
Հիսուսը ցանկանում է, որ ես լույս լինեմ ուրիշների համար
Փոքր երեխաները կարող են հզոր դրական ազդեցություն ունենալ ուրիշների վրա: Ինչպե՞ս կարող եք ոգեշնչել նրանց, որ իրենց լույսը շողա:
Հնարավոր վարժություններ
-
Երեխաներին ցույց տվեք մի քանի առարկաներ, որոնք լույս են արձակում և ցույց տվեք նաև փոքր երեխաների նկարներ: Կարդացեք Մատթեոս 5.14-16 հատվածները և ասացեք երեխաներին, որ իրենց լավ օրինակները կարող են նման լինել լույսի, որոնք ուրիշները կարող են տեսնել: Ինչպե՞ս կարող ենք օգտագործել մեր լույսը, որպեսզի ուրիշներին բերենք Աստծո մոտ:
-
Լապտերի լույսը գցեք սենյակում և խնդրեք երեխաներին աչքերով հետևել լույսին: Լույսն օգտագործեք նրանց աչքերը դեպի Փրկիչի նկարն ուղղորդելու համար: Ինչպե՞ս է լույսն օգնում մեզ: Ինչպե՞ս կարող ենք մենք «լույս լինել աշխարհի համար»։ Ծածկեք լապտերը: Ի՞նչ տեղի կունենա, եթե մենք չկիսվենք մեր լույսով կամ թաքցնենք այն:
-
Լապտերը թաքցրեք սենյակում և հանգցրեք լույսերը: Թող երեխաները փորձեն գտնել այն: Կրկնեք Մատթեոս 5.15 հատվածը և քննարկեք, թե մենք ինչու չպիտի թաքցնենք մեր լույսը:
-
Օգնեք երեխաներին գտնել ու ներկել այս շաբաթվա գործնական աշխատանքի էջում թաքնված մոմերը:
-
Երեխաների հետ երգեք ուրիշների համար լույս լինելու մասին երգ, օրինակ՝ «Jesus Wants Me for a Sunbeam», «Shine On» կամ «I Am like a Star» (Children’s Songbook, 60–61, 144, 163)։
Մենք կարող ենք երջանիկ լինել՝ ապրելով այնպես, ինչպես Հիսուսն է սովորեցրել:
Հիսուս Քրիստոսը ցանկանում է, որ ես սիրեմ բոլորին
Փոքր երեխաներն այժմ կարող են սկսել սեր ցուցաբերել, նույնիսկ, երբ նրանց հետ անարդար են վարվում իրենց հասակակիցները կամ հարազատ քույրերն ու եղբայրները: Մինչ կկարդաք Մատթեոս 5.44-45 հատվածները, մտածեք, թե ինչպես են Փրկիչի ուսմունքները վերաբերում ձեր ուսուցանած երեխաներին:
Հնարավոր վարժություններ
-
Կրկնեք Մատթեոս 5.44 հատվածը` օգտագործելով բառեր և իրավիճակներ, որոնք վերաբերում են երեխաներին և որոնք նրանք կհասկանան: Խնդրեք երեխաներին կիսվել այն ժամանակների մասին, երբ նրանք սեր են ցուցաբերել ինչ-որ մեկի հանդեպ, չնայած դա դժվար է եղել: Այդ փորձառություններից հետո ի՞նչ են զգացել:
-
Որպես դասարան, երգեք ուրիշներին սիրելու մասին երգ, օրինակ՝ «Սեր տան մեջ» (Հիմներ և մանկական երգեր, 44)։ Ի՞նչ ենք սովորում այդ երգից ուրիշներին սիրելու մասին:
-
Երեխաներին թղթե սրտեր տվեք, վրան գրված հետևյալ բառերը. «Ես իմ սերը ցույց կտամ բոլորի հանդեպ»: Խնդրեք նրանց ձևավորել սրտերը ու կախել դրանք իրենց տանը` որպես բոլորին սիրելու մասին հիշեցում:
Ուսուցանեք վարդապետությունը. ավագ խմբի երեխաներ
Ես կարող եմ երջանիկ լինել, եթե ապրեմ այնպես, ինչպես Հիսուսն է ուսուցանել
Երբ կարդում եք Մատթեոս 5.3–12-ը, ո՞ր բառերն ու արտահայտություններն են գրավում ձեր ուշադրությունը: Ինչպե՞ս են այս ուսմունքներն օրհնելու ձեր ուսուցանած երեխաների կյանքը:
Հնարավոր վարժություններ
-
Գրատախտակի վրա կազմեք երկու սյունակ ունեցող աղյուսակ Երանի են … և Օրհնություն վերնագրերով: Հրավիրեք երեխաներին ուսումնասիրել Մատթեոս 5.3–12 հատվածները` ուշադրություն դարձնելով այն մարդկանց հատկանիշներին, ում Հիսուսը երանի էր տալիս, ու ինչպիսի օրհնություններ է Նա խոստացել նրանց: Այնուհետև թող աղյուսակում լրացնեն այն, ինչ գտել են։ Երեխաների հետ քննարկեք, թե ինչ է նշանակում յուրաքանչյուր հատկանիշը և համապատասխան օրհնությունը:
-
Այս հատվածներից յուրաքանչյուր հատկանիշ գրեք որևէ քարտի վրա և դրա համապատասխան օրհնությունը մեկ ուրիշ քարտի վրա: Օրինակ, մի քարտում կգրվի «հեզ», իսկ մյուսում՝ «ժառանգիր երկիրը» (հատված 5): Թող երեխաներն այդ հատկանիշները համապատասխանեցնեն օրհնությունների հետ: Հրավիրեք երեխաներին ընտրել այլ հատվածներում նշված հատկանիշներից մեկը, որը նրանք ցանկանում են զարգացնել:
Ես կարող եմ խաղաղարար լինել
Հիսուսն ուսուցանել է, որ խաղաղարարները պետք է կոչվեն Աստծո զավակներ: Ինչպե՞ս կարող եք ոգեշնչել երեխաներին լինել խաղաղարարներ:
Հնարավոր վարժություններ
-
Հանձնարարեք ուսանողներից մեկին բարձրաձայն կարդալ Մատթեոս 5․9 հատվածը։ Ո՞վ է խաղաղարարը: Ինչպե՞ս կարող ենք խաղաղարար լինել մեր ընտանիքի անդամների և ընկերների հետ: (Որոշ մտքերի համար տես 21–24, 38–47 հատվածները):
-
Խնդրեք յուրաքանչյուր երեխայի մտածել մի իրավիճակի մասին, որտեղ խաղաղարարի կարիք կլինի: Խաղաղարարն ի՞նչ կաներ այդ իրավիճակում:
-
Հրավիրեք երեխաներին կիսվել այն մասին, երբ նրանք սեր են ցուցաբերել ինչ-որ մեկի հանդեպ, չնայած այդ անձնավորությունն իրենց նման չի եղել կամ ում շատ դժվար էր սիրել:
Իմ օրինակը կարող է լուսավորել Հիսուսին հետևելու ուրիշների ճանապարհը
Ձեր ուսուցանած երեխաներից շատերը կապել են մկրտության ուխտերը: Մտածեք այն մասին, թե ինչպես են Փրկիչի խոսքերը Մատթեոս 5.14–16 հատվածներում վերաբերում իրենց ուխտերին: Տերը ի՞նչ ուղերձներ է ընդգրկել այս հատվածում ձեր դասարանի երեխաների համար:
Հնարավոր վարժություններ
-
Օգնեք երեխաներին անգիր սովորել Մատթեոս 5․16-ը։ Գրատախտակին գրեք այդ հատվածը: Կարդացեք միասին մի քանի անգամ` ամեն անգամ մի քանի բառ ջնջելով: Հրավիրեք երեխաներին նկարել այնպիսի քայլեր, որ նրանք կարող են կատարել, որպեսզի լույս լինեն ուրիշների համար: Խոսեք այն մասին, թե լույս լինելով ուրիշների համար, ինչպես ենք կատարում մեր մկրտության ուխտերը (տես Մոսիա 18.8–10):
-
Երգեք լույսով կիսվելու մասին մի երգ, օրինակ՝ «Shine On» (Children’s Songbook, 144)։ Ինչպե՞ս կարող ենք կիսվել Փրկիչի լույսով:
-
Խնդրեք երեխաներին նկարել այնպիսի բաներ, որոնք լույս են արձակում մեզ համար: Կարդացեք Մատթեոս 5.14-16-ը: Հարցրեք նրանց, թե ինչու է Հիսուսն ուզում, որ մենք լույս լինենք աշխարհի համար:
-
Երկու երեխայի հրավիրեք դեմ առ դեմ կանգնել և խնդրեք նրանցից մեկին, որ մյուսի մոտ ծիծաղ առաջացնի` առանց նրան դիպչելու: Խոսեք երեխաների` ուրիշների մեջ ուրախություն առաջացնող զորության մասին:
Խրախուսեք տնային ուսումնասիրությունը
Հորդորեք երեխաներին այս շաբաթվա ընթացքում փնտրել որևէ խաղաղարարի: Հաջորդ շաբաթվա դասի սկզբում հրավիրեք նրանց պատմել, թե ո՞ւմ գտան և ի՞նչ պարզեցին:
Բարելավենք մեր ուսուցումը
Օգնեք երեխաներին ակտիվ լինել: «Երեխաներին ուսուցանելիս թույլ տվեք նրանց կառուցել, նկարել, ներկել, գրել և ստեղծագործել: Սրանք միայն զվարճալի զբաղմունքներ չեն, դրանք կարևոր են սովորելու համար» (Ուսուցանել Փրկիչի ձևով, 25):