“Hulyo 22–28. Mga Buhat 16–21: ‘Gitawag Kami sa Dios aron sa Pagmantala sa Maayong Balita’” Dali, Sunod Kanako—Alang sa Primary: Bag-ong Tugon 2019 (2019)
“Hulyo 22–28. Mga Buhat 16–21,” Dali, Sunod Kanako—Alang sa Primary: 2019
Hulyo 22–28
Mga Buhat 16–21
“Gitawag Kami sa Dios aron sa Pagmantala sa Maayong Balita”
Human og basa sa Mga Buhat 16–21, ikonsiderar kon sa unsang paagi ang mga pag-aghat sa Espiritu ug ang mga ideya niini nga outline makatabang nimo sa imong pagpangandam sa leksyon. Konsultaha ang “Pagtubag sa mga Panginahanglan sa Mas Gagmay nga mga Bata” niini nga manwal alang sa dugang nga tabang.
Irekord ang Imong mga Impresyon
Awhaga ang Pagpaambit
Dapita ang mga bata sa pagsulti kanimo kon sa unsang paagi si Pablo sama sa mga misyonaryo karon. Ipangutana, “Nakapaambit ba kamo sa ebanghelyo ngadto sa laing tawo sukad?”
Itudlo ang Doktrina
Mas Gagmay nga mga Bata
Ang mga misyonaryo nagtudlo sa mga tawo mahitungod kang Jesus.
Nahibalo ba ang mga bata nga imong gitudloan kon unsay ginabuhat sa mga misyonaryo? Unsaon nimo pagtabang ang mga bata nga makasabut nga makahimo sila sa pagpaambit sa ebanghelyo ngadto sa uban?
Posible nga mga Kalihokan
-
Tabangi ang mga bata sa pagdrama-drama sa Mga Buhat 16:25–34 samtang imong i-summarize ang istorya ni Pablo ug Silas nga mipaambit sa ebanghelyo diha sa bilanggoan (tan-awa usab sa “Kapitulo 61: Pablo ug Silas Nabilanggo,” Mga Istorya sa Bag-ong Tugon, 158–60). Ipasabut nga ang mga misyonaryo karon nagtudlo usab sa mga tawo mahitungod ni Jesus ug nagtabang kanila nga mangandam sa pagpabunyag.
-
Paghimo og mga missionary name tag nga isul-ob sa mga bata, ug tabangi sila sa pagsulat sa ilang mga ngalan diha sa mga tag. Tudloi ang mga bata og yano nga mga pamahayag sa doktrina nga mahimo nilang mapaambit sa uban, sama sa “Ang Dios mao ang atong mahigugmaong Langitnong Amahan”, “Ang Dios mamulong pinaagi sa buhi nga propeta”, o “Si Jesukristo mao ang atong Manluluwas.”
-
Dapita ang mga bata sa pagpaambit og mga detalye mahitungod sa usa ka tawo nga ilang kaila kinsa anaa sa misyon. Mahimo silang modrowing og hulagway o mohimo og mubo nga sulat aron ipadala ngadto sa usa ka misyonaryo.
Ang mga kasulatan nagpamatuod sa Langitnong Amahan ug ni Jesukristo.
Bisan og ang mga bata nga imong gitudloan tingali dili pa kahibalo mobasa, makatabang ka kanila nga makapalambo og gugma alang sa mga kasulatan ug makakita kon sa unsang paagi nagpamatuod kini sa Manluluwas.
Posible nga mga Kalihokan
-
Pagbutang og pipila ka kopya sa mga kasulatan libut sa kwarto, ug ipapangita kini sa mga bata. Tabangi ang usa sa mga bata sa pagbasa sa mga pulong nga “Sila … sa adlaw-adlaw nanagtuon sa kasulatan” (Mga Buhat 17:11). Dapita ang mga bata nga itudlo ang matag adlaw sa semana diha sa kalendaryo samtang ilang balikon pagsulti kini nga mga pulong uban kanimo.
-
Aron sa pagtudlo sa mga bata nga ang mga kasulatan nagpamatuod sa Langitnong Amahan ug ni Jesukristo, tabangi sila sa pagpakli ngadto sa usa ka kapitulo sa mga kasulatan, sama sa Mga Buhat 17 o 18, ug mangita sa mga pulong nga Dios o Ginoo. Mahimo nimong markahan kini nga mga pulong aron mas dali kining makit-an sa mga bata. Matag higayon nga makakita sila og usa niini nga mga pulong, dapita sila sa pagpaambit og usa ka butang nga ilang nahibaloan mahitungod sa Langitnong Amahan ug ni Jesukristo.
Ako anak sa Dios.
Sa Bungtod sa Mars, si Pablo mitudlo og sukaranang mga kamatuoran mahitungod sa kinaiya sa Dios, lakip sa mga kamatuoran nga kita Iyang mga anak ug nga Siya “dili ra halayo gikan sa matag usa kanato” (Mga Buhat 17:27). Unsaon nimo sa pagtabang ang mga bata nga mobati nga suod sa ilang Langitnong Amahan?
Posible nga mga Kalihokan
-
Dapita ang mga bata sa pagsulti og balik sa mga pulong nga “Kay kaliwat man diay kita sa Dios” (Mga Buhat 17:29), ug ipasabut nga ang kaliwat nagpasabut nga anak. Pagpamatuod ngadto sa matag bata, sa tagsa-tagsa, nga siya anak sa Dios. Pangutan-a sila kon unsay ilang gibati sa dihang nadungog nila nga sila mga anak sa Dios. Dapita sila sa pagpaambit kon unsay ilang gibati mahitungod sa ilang Langitnong Amahan.
-
Pagpakita og mga hulagway sa mga bata uban sa ilang mga pamilya (kon mahimo, paggamit og mga litrato sa mga bata sa imong klase). Ipasabut nga kita mga anak sa atong mga inahan ug mga amahan, ug kitang tanan espiritung mga anak sa atong Langitnon nga mga Ginikanan.
-
Pagkanta og usa ka awit mahitungod sa Langitnong Amahan, sama sa “Ako Nasayud Akong Amahan Buhi” (Songbook sa mga Bata, 8). Uban sa tabang sa mga bata, pagsulat og mga pulong o pagdrowing og mga hulagway diha sa pisara nga nagrepresentar sa mga butang nga atong nakat-unan mahitungod sa Langitnong Amahan gikan sa kanta.
-
Basaha ngadto sa mga bata kini nga mga pulong gikan sa Mga Buhat 17:27: “Siya dili ra halayo gikan sa matag usa kanato.” Hisguti ang mga panahon nga mibati ka nga duol sa Langitnong Amahan, ug dapita ang mga bata sa pagbuhat sa ingon.
Ang matag tawo anak sa Dios.
Itudlo ang Doktrina
Mas Dagko nga mga Bata
Mga Buhat 16:14–15, 25–34; 18:7–8, 24–28
Mamahimo akong misyonaryo karon.
Unsaon nimo pagtabang ang mga bata nga mahimong sama kang Pablo ug mopaambit ngadto sa uban sa unsay ilang nakat-unan mahitungod sa ebanghelyo?
Posible nga mga Kalihokan
-
Dapita ang mga bata sa pagbasa sa Mga Buhat 16:14–15, 25–34; 18:7–8, 24–28 ug sa paghimo og lista sa mga tawo nga gipaambitan ni Pablo ug Apolos sa ebanghelyo. Dayon dapita sila sa paghimo og lista sa mga tawo nga mahimo nilang paambitan sa ebanghelyo. Ipa-role play sa mga bata kon unsaon nila sa pagsulti niining mga tawhana mahitungod ni Jesukristo o sa pagdapit kanila sa simbahan. Mahimo usab nimong dapiton ang mga bata sa paghimo og mugbo nga mga sulat nga nagpamatuod mahitungod sa usa ka kamatuoran sa ebanghelyo ngadto niining mga tawhana.
-
Dapita ang kasamtangan nga full-time nga mga misyonaryo, mga returned missionary, o mga ward missionary sa pagbisita sa klase ug sa pagsulti mahitungod sa ilang mga kasinatian sa pagpaambit sa ebanghelyo. Awhaga ang mga bata sa pagpangutana kon unsaon nila sa pagpaambit sa ebanghelyo ngadto sa uban.
Mga Buhat 17:2–4, 10–12; 18:28
Ang mga kasulatan nagpamatuod mahitungod ni Jesukristo.
Ang tanang mga propeta nagpamatuod mahitungod ni Jesukristo. Unsaon nimo sa pagtudlo ang mga bata sa pagpangita Kaniya diha sa mga kasulatan, bisan kon wala Siya hisguti pinaagi sa ngalan?
Posible nga mga Kalihokan
-
Ipabasa sa mga bata ang Mga Buhat 17:2–4, 10–12; 18:28, ug dapita sila sa pagpangita kon unsa ang komon niini nga mga tudling. Sumala niini nga mga bersikulo, unsa ang nakatabang sa mga tawo nga motuo sa ebanghelyo ni Jesukristo?
-
Dapita ang mga bata sa pagpaambit sa ilang paborito nga mga istorya kabahin ni Jesus nga ilang nakat-unan gikan sa mga kasulatan niining tuiga. Diha sa mga piraso nga papel, isulat ang mga pakisayran sa kasulatan nga nagtudlo mahitungod sa Manluluwas, ug tagoi kini libut sa kwarto. Dayon dapita ang mga bata sa pagpangita niini. Tabangi ang mga bata sa pagtan-aw sa mga pakisayran nga ilang nakit-an, ug hangyoa sila sa pagpaambit sa usag usa kon unsa ang gitudlo sa matag kasulatan mahitungod ni Jesus.
-
Hangyoa ang mga bata sa pagtabang kanimo sa paghimo og yano nga tsart nga mahimo nilang markahan kon makabasa sila o makakat-on mahitungod ni Jesus gikan sa mga kasulatan. I-display kini matag semana sa tibuok tuig, ug tabangi ang mga bata sa pagpangita og mga dapit diha sa mga kasulatan nga nagtudlo mahitungod ni Jesus.
Ako anak sa Dios.
Unsaon nimo sa pagtabang ang mga bata nga makahinumdom nga mga anak sila sa Dios?
Posible nga mga Kalihokan
-
Pakit-a ang mga bata og usa ka bato, ug ipasabut nga sa panahon ni Pablo, ang mga tawo misimba og mga dios-dios nga hinimo nila gikan sa bato ug uban nga mga materyal. Hangyoa ang mga bata sa pagbasa sa Mga Buhat 17:27–29. Unsa ang atong makat-unan mahitungod sa Dios gikan niini nga mga bersikulo? Ipasabut nga ang kaliwat nagpasabut sa mga anak. Pangutan-a ang mga bata kon unsa ang ilang gibati sa pagkasayud nga sila mga anak sa Dios.
-
Hangyoa ang mga bata sa pagbasa sa Mga Buhat 17:27. Dapita ang mga bata sa pagdrowing og mga paagi nga mahimo nilang “mahikapan” o makapangita sa Dios. Kanus-a sila mibati nga Siya “dili ra halayo gikan [kanila]”?
Awhaga ang Pagkat-on diha sa Panimalay
Awhaga ang mga bata sa pagpangita og usa ka kasulatan niining semanaha nga nagtudlo mahitungod ni Jesukristo (mahimong mahitabo kini atol sa ilang personal o tibuok pamilya nga pagtuon sa kasulatan). Sunod semana, dapita sila sa pagpaambit kon unsa ang ilang nakit-an.
Pagpalambo sa Atong Pagtudlo
Tabangi ang mga bata nga mahimong mas maayo nga mga tigkat-on. Ang imong katuyoan sa pagtudlo sa mga bata dili lamang ang pagpaambit sa kamatuoran ngadto kanila. Kinahanglan usab nga imo silang tabangan nga mahimong masaligon sa kaugalingon nga mga tigpangita sa kamatuoran. Pananglitan, imbis nga yano lang nga sultihan ang mga bata sa istorya ni Pablo nga nagsangyaw didto sa Bungtod sa Mars, mahimo ka nga moplano og mga kalihokan, sama niadtong gisugyot niini nga outline, nga makatabang kanila sa pagdiskubre sa ilang kaugalingon sa mga kamatuoran diha sa istorya.