Klase sa Primary

Pagtubag sa mga Panginahanglan sa Mas Gagmay nga mga Bata

Ang gagmay nga mga bata andam ug maghinam-hinam nga makakat-on sa ebanghelyo kon ipresentar kini sa paagi nga ilang masabtan. Kon nagtudlo ka og mas gagmayng mga bata, ikonsiderar kini nga mga kalihokan nga makatabang kanila sa pagkat-on (ang mas dagkong mga bata mahimong makabenepisyo usab gikan niini nga mga kalihokan):

• Paminawon o i-aksyon ang usa ka istorya. Ang gagmayng mga bata ganahan og mga istorya—gikan sa mga kasulatan, gikan sa imong kinabuhi, gikan sa kasaysayan sa Simbahan, o gikan sa mga magasin sa Simbahan. Pangita og mga paagi nga maapil sila sa pagsaysay sa istorya. Mahimo silang maghupot og mga litrato o mga butang, modrowing og mga hulagway sa unsay ilang nadunggan, mo-aksyon sa istorya, o motabang sa pagsaysay sa istorya. Tabangi ang mga bata nga makaila sa mga kamatuoran sa ebanghelyo diha sa mga istorya nga imong gipaambit.

• Mobasa og kasulatan. Ang gagmayng mga bata tingali dili pa makamao kaayo nga mobasa, apan mahimo gihapon nimo silang malakip sa pagkat-on gikan sa mga kasulatan. Kinahanglan tingali nimong tutukan ang usa ka bersikulo, importanting hugpong sa mga pulong, o usa ka pulong. Samtang kusgon nimo pagbasa ang usa ka kasulatan, mahimo nimong dapiton ang mga bata sa pagbarug o pag-isa sa ilang mga kamot kon madungog nila ang piho nga pulong o hugpong sa mga pulong nga gusto nimong tutukan. Basin makahimo pa sila sa pagsag-ulo og mubo nga mga hugpong sa mga pulong gikan sa mga kasulatan kon balikon nila kini og sulti sa pipila ka higayon. Samtang madungog nila ang pulong sa Dios, bation nila ang Espiritu.

• Magmahimong aktibo. Tungod kay ang gagmayng mga bata kanunay nga lagsik, pagplano og mga paagi nga matugutan sila sa paglihok-lihok—pagmartsa, paglukso-lukso, pagduko-duko, paglakaw, ug ubang mga lihok nga may kalabutan sa baruganan o istorya nga imong gitudlo. Niini nga mga lihok mahimong epektibo usab samtang dungan kamo nga manganta.

• Motan-aw og hulagway o motan-aw og video. Kon mopakita ka sa mga bata og usa ka hulagway o video nga may kalabutan sa baruganan sa ebanghelyo o istorya sa kasulatan, pangutan-a sila og mga pangutana nga makatabang kanila nga makat-on gikan sa unsay ilang nakita. Sama pananglit, mahimo ka nga mangutana, “Unsa ang nahitabo dinhi niini nga hulagway o video? Unsay gibati ninyo tungod niini?” Makakita ka og mga hulagway ug mga video diha sa medialibrary.lds.org ug children.lds.org.

• Manganta. Ang Mga Himno ug mga awit gikan sa Songbook sa mga Bata ug Mga Himno ug mga Awit sa mga Bata kusganong nagtudlo sa doktrina. Gamita ang indeks sa hilisgutan sa luyo sa Songbook sa mga Bata aron mangita og mga kanta kalabut sa mga baruganan sa ebanghelyo nga imong gitudlo. Tabangi ang mga bata nga makonektar ang mensahe sa mga kanta ngadto sa ilang kinabuhi. Sama pananglit, mahimo kang mangutana kalabut sa mga pulong o hugpong sa mga pulong sa kanta. Agig dugang sa pagkanta, ang mga bata makahimo og mga aksyon nga mobagay sa mga kanta o maminaw lang sa mga kanta isip background nga musika samtang naghimo sila sa ubang mga kalihokan.

• Magpaambit og mga kasinatian. Ang gagmayng mga bata tingali wala pa kaayoy mapaambit sama sa mas dagkong mga bata, apan kon hatagan nimo sila og piho nga giya, makahimo sila sa pagpaambit sa ilang mga pagbati ug mga kasinatian kabahin sa unsay ilang nakat-unan.

• Maghimo. Ang mga bata makahimo, makadrowing, o makakolor og usa ka butang nga may kalabutan sa istorya o baruganan nga ilang gikat-unan. Awhaga sila sa pagdala sa ilang mga hinimo ngadto sa panimalay ug sa pagpaambit niini ngadto sa mga sakop sa pamilya aron sa pagtabang sa mga bata sa paghinumdom sa unsay ilang nakat-unan.

• Moapil sa mga leksyon nga naggamit og mga butang. Ang usa ka yano nga leksyon nga naggamit og butang makatabang sa mga bata nga makasabut sa baruganan sa ebanghelyo nga lisud sabton. Kon mogamit og mga butang sa leksyon, pangita og mga paagi nga makaapil ang mga bata. Mas makakat-on sila gikan sa usa ka interactive nga kasinatian kay sa magtan-aw lang og demonstrasyon.

• Mag-role-play. Kon ang mga bata mo-role-play og usa ka sitwasyon nga malagmit ilang masugatan sa tinuod nila nga kinabuhi, mas maayo nilang masabtan kon sa unsang paagi ang usa ka baruganan sa ebanghelyo magamit sa ilang kinabuhi.

• Mobalik sa mga kalihokan. Ang gagmayng mga bata tingali kinahanglang makadungog sa mga konsepto sa makadaghang higayon aron makasabut niini. Ayaw kahadlok nga balikon sa makadaghan ang mga istorya o mga kalihokan, bisan atol sa samang leksyon. Sama pananglit, mahimo nimong ipaambit ang usa ka istorya sa kasulatan sa pipila ka higayon sa lain-laing mga paagi panahon sa usa ka leksyon—mobasa gikan sa mga kasulatan, mo-summarize sa imong kaugalingong mga pulong, mopasalida og video, motugot sa mga bata nga motabang kanimo sa pagsaysay sa istorya, modapit kanila nga i-aksyon ang istorya, ug uban pa. Kon ang usa ka kalihokan nga gigamit diha sa klase balikon usab diha sa panimalay, ang pagbalik-balik makatabang sa mga bata nga makakat-on ug makahinumdom.

• Mo-interact sa uban. Ang mga bata nagpalambo og sosyal nga mga kahanas ug sa kasagaran malingaw nga magkat-on ug magdula uban sa ilang mga kaedad. Paghimo og mga oportunidad alang kanila nga mopaambit, magpuli-puli, ug mokooperar samtang magkat-on sila.

• Moapil sa lain-laing mga kalihokan. Ang gagmayng mga bata kasagaran mubo ra og atensyon, ug aduna silay lain-laing mga estilo sa pagkat-on. Paggamit og lain-laing mga kalihokan, ug hatagig pagtagad ang mga timailhan nga ang mga bata nagkinahanglan na og kausaban sa kalihokan. Sama pananglit, kinahanglan tingali nimong ipuli-puli tali sa hilum ug madasigon nga mga kalihokan.

Kabahin sa imong tahas isip magtutudlo sa gagmayng mga bata—agig dugang sa pagtudlo sa mga baruganan sa ebanghelyo—mao ang pagtabang sa mga bata nga makakat-on unsaon sa pag-apil sa husto nga paagi diha sa usa ka klase sa Simbahan. Sama pananglit, tingali kinahanglan nilang makat-on mahitungod sa pagpuli-puli, pagpaambit, pagrespeto sa uban, ug uban pa. Ang ubang mga magtutudlo mohimo og mga tsart nga adunay assignment alang sa matag bata sa pag-apil sa klase sa piho nga paagi (sama sa pag-ampo, paggunit og litrato, o pagpasa og mga papel). Ang mga assignment mahimong mausab matag semana. Makatabang kini sa mga bata nga magpuli-puli ug motutok sa angay nga pamatasan diha sa classroom.

Ang mga bata—ilabi na ang mas gagmayng mga bata—kasagaran makabenepisyo sa usa ka regular, naandang buluhaton. Tungod kay ang gagmayng mga bata mubo ra og atensyon ug usahay manlimbasug sa pagtutok sa tibuok klase, labing maayo kon kini nga buluhaton maglakip og daghang kausaban gikan sa usa ka matang sa kalihokan ngadto sa lain. Sama pananglit, ang buluhaton sa inyong klase tingali maglakip sa panagsa nga paghunong aron magdula, mokolor og hulagway, mokanta, ug uban pa.

Klase sa Primary