Si Cornelio nakig-istorya kang Pedro

Hulyo 15–21

Mga Buhat 10–15

“Ang Pulong sa Dios Mitubo ug Misanay”

Sugdi ang imong pagpangandam sa pagtudlo pinaagi sa pagbasa sa Mga Buhat 10–15. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabut niini nga mga kapitulo, ug kini nga outline makahatag kanimo og mga ideya sa pagtudlo.

Irekord ang Imong mga Impresyon

pagpaambit nga icon

Awhaga ang Pagpaambit

Aron matabangan ang mga bata sa pagpaambit sa ilang nakat-unan ug nasinati, mahimo nimo silang hangyoon sa pagpaambit og mga butang nga ilang ginabuhat nga nagpakita nga mituo sila kang Jesukristo.

pagtudlo nga icon

Itudlo ang Doktrina

Mas Gagmay nga mga Bata

Mga Buhat 10:34–35

Ang Langitnong Amahan nahigugma sa tanan Niyang mga anak.

Usa ka sukaranang doktrina nga bisan ang gagmayng mga bata makasabut mao nga ang tanan anak sa Dios ug nga Siya nahigugma sa tanan Niyang mga anak.

Posible nga mga Kalihokan

• Ipakita ang hulagway nga Si Kristo ug ang Kabataan sa tibuok Kalibutan (Libro sa mga Hulagway sa Ebanghelyo, nu. 116) samtang imong basahon ang Mga Buhat 10:34–35. Ipasabut nga sa panahon ni Pedro ang ubang mga tawo nagtuo nga ang Dios nahigugma lamang sa pipila ka grupo sa mga tawo, apan nakat-unan ni Pedro nga ang Dios nahigugma sa tanan Niyang mga anak, ug gusto Niya nga makakat-on sila sa ebanghelyo.

• Dapita ang mga bata sa pagdrowing og hulagway sa ilang mga kaugalingon. Ipaambit ang imong pagpamatuod nga ang Langitnong Amahan nahigugma sa matag usa kanila ug sa tanan Niyang mga anak, bisan unsa pa ang ilang panagway o diin sila gikan.

• Pagkanta uban sa mga bata og usa ka kanta mahitungod sa paghigugma sa uban—sama pananglit, “Mouban ko Nimo” (Songbook sa mga Bata, 78–79). Dapita sila sa pagpaambit og mga paagi nga makapakita sila og gugma sa tanan—bisan niadtong lahi kanila—sama sa gibuhat ni Jesus.

• Hangyoa daan ang mga ginikanan sa matag bata sa pagpaambit og pipila ka dalaygon nga mga kinaiya sa ilang anak. Ipaambit ang ilang mga tubag diha sa klase, ug ipamatuod nga ang Langitnong Amahan nahigugma sa matag bata.

• Tudloa og tagsa-tagsa ang matag bata ug isulti, “Ang Langitnong Amahan nahigugma ni [ngalan].” Papuli-puliha ang mga bata sa pagtudlo sa usag usa ug sa pagsulti niini nga mga pulong.

Mga Buhat 11:26

Usa ako ka Kristiyano tungod kay nagtuo ug nagsunod ako kang Jesukristo.

Ang mga bata nga imong gitudloan tingali nasayud nga ang mga miyembro sa Simbahan kasagaran gitawag nga mga Mormon tungod kay nagtuo kita sa Basahon ni Mormon, apan nasayud ba sila nga kita mga Kristiyanos usab tungod kay nagtuo kita kang Jesukristo?

Posible nga mga Kalihokan

• Basaha ang Mga Buhat 11:26 ngadto sa mga bata. Ipasabut nga ang usa ka tawo nga nagtuo ug nagsunod ni Jesukristo gitawag og Kristiyano, mao nga kita mga Kristiyano.

• Kantaha uban sa mga bata ang “Ang Simbahan ni Jesukristo” (Songbook sa mga Bata, 48). Sa unsang paagi kita molihok diha sa simbahan, sa eskwelahan, ug sa panimalay tungod kay mga sumusunod kita ni Jesukristo ug sakop sa Iyang Simbahan?

• Pakolori sa mga bata ang badge diha sa pahina sa kalihokan karong semanaha ug itaud kini sa pagpauli.

Mga Buhat 12:1–17

Ang Langitnong Amahan mamati ug motubag sa mga pag-ampo.

Ang istorya sa anghel nga mipalingkawas ni Pedro gikan sa bilanggoan kusganong nagtudlo nga ang Langitnong Amahan motubag sa mga pag-ampo.

Posible nga mga Kalihokan

• Dapita ang mga bata nga idrama ang istorya ni Pedro nga gipalingkawas gikan sa bilanggoan diha sa Mga Buhat 12:1–17 samtang imong i-summarize ang istorya. Giunsa sa Langitnong Amahan pagtubag ang mga pag-ampo niadtong nag-ampo alang kang Pedro?

• Pagkanta og usa ka kanta mahitungod sa pag-ampo—sama pananglit, “Iduko ang Atong Ulo” (Songbook sa mga Bata, 18), ug paghimo og mga aksyon nga makatabang sa mga bata nga makat-on unsaon sa pag-ampo. Dapita ang mga bata sa pagpaambit og mga ehemplo sa mga butang nga mahimo silang magpasalamat sa Langitnong Amahan ug mangayo Kaniya diha sa pag-ampo.

• Pagpakita og mga hulagway sa mga tawo nga nag-ampo (tan-awa, sama pananglit, ang Libro sa mga Hulagway sa Ebanghelyo, nus. 111 ug 112) samtang mopaambit ka og kasinatian dihang ang Langitnong Amahan mitubag sa imong mga pag-ampo.

  hamtong nga babaye ug batang babaye nanag-ampo

  Ang Langitnong Amahan nahigugma kanato ug motubag sa atong mga pag-ampo.

pagtudlo nga icon

Itudlo ang Doktrina

Mas Dagko nga mga Bata

Mga Buhat 10:34–35; 15:6–11

“Ang Dios wala diay pinalabi sa mga tawo.”

Ang mga bata nga imong gitudloan kinahanglang makasabut nga ang Langitnong Amahan nahigugma sa tanan Niyang mga anak, bisan unsa ang ilang panagway, asa sila gikan, o unsa nga mga pagpili ang ilang gihimo.

Posible nga mga Kalihokan

• Pangutan-a ang mga bata kon makasulti ba sila kon sama sa unsa ang usa ka tawo pinaagi lang sa pagtan-aw kanila o pagtag-an kon asa sila gikan. Sumala sa Mga Buhat 10:35, unsaon sa pagdeterminar sa Dios kon ang usa ka tawo “iyang pagakahimut-an”?

• Basaha ang Mga Buhat 10:34–35; 15:6–11 uban sa mga bata. Ipasabut nga sa kapanahunan ni Pedro, ang mga Judeo nagtuo nga ang Dios dili modawat og mga tawo nga dili Judeo (kining mga tawhana gitawag nga mga Hentil). Apan ang Dios mitudlo ni Pedro nga ang Dios nahigugma sa tanan Niyang mga anak, mga Judeo ug mga Hentil. Kantaha og dungan ang “Ako Anak sa Dios” (Songbook sa mga Bata, 2–3). Dapita ang mga bata sa pagpuli sa ilang ngalan sa mga pulong nga sama sa ako o ko.

• Dapita ang mga bata sa pagpaambit og usa ka butang nga talagsaon kabahin sa usa ka tawo diha sa klase. Ipasabut nga ang pamahayag nga “Ang Dios wala diay pinalabi sa mga tawo” nagpasabut nga ang Langitnong Amahan nahigugma sa tanan Niyang mga anak, ug tungod kay nahigugma Siya kanila, gusto Niya nga ang tanan Niyang mga anak makadungog sa ebanghelyo.

Mga Buhat 11:26

Ang usa ka Kristiyano mao ang tawo nga nagtuo ug nagsunod ni Jesukristo.

Unsaon nimo pagtabang ang mga bata nga makasabut nga ang ilang mga pulong ug mga buhat nagpakita nga sila mga Kristiyano?

Posible nga mga Kalihokan

• Dapita ang mga bata sa pagbasa sa Mga Buhat 11:26; 3 Nephi 27:3–8; ug Doktrina ug mga Pakigsaad 115: 4. Isulat ang Christian diha sa pisara ug badlisi ang parte nga nag-ingon og “Christ.” Hangyoa ang mga bata sa pagpaambit kon unsay ilang pagsabut nga mahimong Kristiyano [Christian].

• Hangyoa ang mga bata sa paghingalan og lain-laing mga grupo nga nahisakop sila, sama sa ilang mga pamilya o klase sa Primary. Dapita sila sa pagpaambit og mga rason nganong mapasalamaton sila nga nahimong Kristiyano ug nahisakop sa Ang Simbahan ni Jesukristo sa mga Santos sa Ulahing mga Adlaw. Unsaon nato sa pagpakita sa uban nga kita Kristiyano?

• Pag-display og pipila ka butang o mga hulagway nga nagrepresentar og mga kamatuoran nga eksklusibo diha sa Simbahan ni Jesukristo, sama sa hulagway sa usa ka pagpanalangin sa priesthood. Hangyoa ang usa ka bata sa pagpili og usa sa mga butang o mga hulagway ug sa pagpasabut kon sa unsang paagi kini usa ka panalangin sa atong Simbahan. Ipasabut nga samtang ang mga Kristiyano sa tibuok kalibutan sakop sa daghan nga nagkalain-laing mga simbahan, nahisakop kita sa samang Simbahan nga giestablisar ni Jesukristo dinhi sa yuta.

• Dapita ang mga bata sa pagdrowing og mga butang nga ilang mabuhat aron mahimong tinuod nga mga Kristiyano.

Mga Buhat 12:1–17

Kon mag-ampo ako uban sa hugot nga pagtuo, ang Langitnong Amahan motubag.

Pamalandungi ang mga higayon sa dihang gitubag sa Langitnong Amahan ang imong mga pag-ampo. Unsaon nimo paggamit niini nga mga kasinatian sa pagtudlo sa mga bata nga ang Langitnong Amahan maminaw ug motubag sa ilang mga pag-ampo sa Iyang kaugalingong paagi ug panahon?

Posible nga mga Kalihokan

• Dapita ang mga bata nga idrama ang istorya sa anghel nga mipalingkawas ni Pedro gikan sa bilanggoan diha sa Mga Buhat 12:1–17 samtang isaysay nimo ang istorya sa imong kaugalingong mga pulong.

• Pangutan-a ang mga bata kon unsa kaha ang gipasabut sa “gihimo … ang mainit nga pag-ampo” (Mga Buhat 12:5). Sa unsang paagi gitubag ang mga pag-ampo sa mga tawo? Dapita ang mga bata sa pagpaambit og mga kasinatian diin ang Langitnong Amahan mitubag sa personal o sa pamilya nga pag-ampo. Mahimo ka usab nga mopaambit og usa ka kasinatian diin gitubag Niya ang imong pag-ampo sa paagi nga lahi kay sa imong gilauman o gusto. Pagpamatuod nga ang Dios nahigugma kanato, ug motubag Siya sa atong mga pag-ampo sa paagi ug panahon nga labing maayo alang kanato.

pagkat-on nga icon

Awhaga ang Pagkat-on diha sa Panimalay

Hatagi ang mga bata og hulagway o butang nga i-display diha sa ilang mga panimalay isip usa ka pahinumdom sa mga sakop sa pamilya nga magdungan sa pag-ampo.

Pagpalambo sa Atong Pagtudlo

Pagpamatuod sa gisaad nga mga panalangin. Kon dapiton nimo ang mga bata sa Primary sa pagsunod og piho nga baruganan, pagpaambit og mga panalangin nga gisaad sa Dios niadtong nagsunod niana nga baruganan. Sama pananglit, mahimo ka nga mopamatuod sa gisaad nga mga panalangin nga imong nadawat samtang nagtinguha ka og mga tubag pinaagi sa pag-ampo.

pahina sa kalihokan: Usa ako ka Kristiyano