“27 Mē–2 Sune. Siosefa Sāmita—Mātiu 1; Mātiu 25; Maʻake 12–13; Luke 21: ‘ʻOku Haʻu ʻa e Foha ʻo e Tangatá’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“27 Mē–2 Sune. Siosefa Sāmita—Mātiu 1; Mātiu 25; Maʻake 12–13; Luke 21,” Haʻu, ʻo Muimui ʻIate Au—Maʻá e Palaimelí: 2019
Ko e Hāʻele ʻAnga Ua Maí, tā ʻa Harry Anderson
27 Mē–2 Sune
Siosefa Sāmita—Mātiu 1; Mātiu 25; Maʻake 12–13; Luke 21
“ʻOku Haʻu ʻa e Foha ʻo e Tangatá”
Fakalaulauloto ki he meʻa ʻoku fie maʻu ke akoʻi ki he fānau ʻokú ke akoʻí fekauʻaki mo e Siosefa Sāmita—Mātiu 1; Mātiu 25; Maʻake 12–13; mo e Luke 21. ʻOkú ke tauʻatāina ke liliu ʻa e ngaahi fakakaukau maʻá e fānau lalahi angé ʻi he lēsoni ko ʻení, maʻá e fānau iiki angé.
Lekooti e Ngaahi Ongo ʻOkú ke Maʻú
Fakaafeʻi Ke Vahevahe
Fakaʻaliʻali ha fakatātā ʻoku fehokotaki mo e taha ʻo e ngaahi talanoa ʻi he laukonga ki he uike ní (hangē ko e fakatātā ʻo e kau taupoʻou ʻe toko hongofulú mei he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Kole ki he fānaú ke nau vahevahe e meʻa ʻoku ʻiloʻi fekauʻaki mo e talanoá.
Akoʻi e Tokāteliné
Fānau Iiki Angé
Kimuʻa pea toe hāʻele mai ʻa Sīsuú, ʻe malangaʻi e ongoongoleleí ki he māmaní kotoa.
Naʻe pehē ʻe Sisū kimuʻa ʻEne toe hāʻele maí, ʻe malangaʻi e ongoongoleleí ki he māmaní kotoa. ʻE lava tokoni ʻa e fānaú ke fakakakato e kikite ko ʻení ʻaki hono vahevahe e ongoongoleleí.
Ngaahi ʻEkitivitī ʻe Ala Fakahokó
-
Fakaʻaliʻali ha mape, foʻi māmani, pe fakatātā ʻo e foʻi māmaní ( vakai Tohi Fakatātā ʻo e Ongoongoleleí, fika 3) pea tokoniʻi e fānaú ke nau lea ʻaki e, “Pea ko e Ongoongoleleí ni … ʻe malanga ʻaki ia ʻi he māmaní kotoa pē” (Siosefa Sāmita—Mātiu 1:31). Ko e hā e ʻuhinga ʻoku finangalo ai e ʻOtuá ke fanongo kotoa ʻEne fānaú ki Heʻene ongoongoleleí?
-
Fakaafeʻi e fānaú ke nau laka fakataha ʻi hoʻomou hivaʻi fakataha e “ʻOku ou Fie Hoko Leva ko ha Faifekau” mo e “Fanongo, ko e ʻEikí ʻoku Ui,” Tohi Hiva ʻa e Fānaú, 90, 94. Fakaafeʻi ha kau faifekau taimi kakato pe toki foki mai, ke vahevahe ʻenau ngaahi aʻusia ʻi hono vahevahe ʻo e ongoongoleleí, pea tokoniʻi e fānaú ke nau fakakaukau ki ha ngaahi founga te nau lava ai ʻo vahevahe ʻa e ongoongoleleí.
Tā ʻi he Angalelei ʻa e NASA Johnson Space Center
Te u lava fakaʻaongaʻi e ngaahi meʻafoaki kuo foaki mai ʻe he ʻOtuá kiate aú.
ʻOku ʻiloʻi ʻe he fānau īkí ʻenau ngaahi meʻafoakí mo e ngaahi meʻa ʻoku nau malavá. Tokoniʻi ke mahino kiate kinautolu ko e ngaahi meʻafoaki mo e ngaahi malava ko ʻení ʻoku maʻu ia mei he Tamai Hēvaní.
Ngaahi ʻEkitivitī ʻe Ala Fakahokó
-
ʻOmi ha ngaahi koini ʻe niʻihi ke fakaʻaongaʻi ʻi hoʻo fai e talanoa fakatātā ʻo e ngaahi talēnití, ʻa ia ʻoku maʻu ʻi he Mātiu 25:14–30. Te ke lava ʻo kole ki ha fānau ʻe toko tolu ke nau fakafofongaʻi e kau tamaioʻeiki ʻe toko tolú. Fakamatalaʻi ange, naʻe ʻuhinga ʻa e talēnití ʻi he kuonga ʻo Sīsuú, ki he paʻanga, ka ʻi he ʻahó ni ʻoku ʻuhinga e talēnití ki he ngaahi meʻafoaki mo e ngaahi meʻa ʻoku tau malava ʻo faí.
-
Kole ki he fānaú ke nau fakahingoa ha ngaahi founga kuo tokoniʻi ai kinautolu ʻe heʻenau mātuʻá, ngaahi tokouá, kau faiakó, pe ngaahi kaungāmeʻá. Ko e hā ha ngaahi ʻulungaanga ʻoku maʻu ʻe he kakai ko ʻení ʻokú ne tokoniʻi ai kinautolu ke nau tokoniʻi e niʻihi kehé?
-
Fai ha kiʻi tohi siʻisiʻi ki he fānaú ʻo tala ange kiate kinautolu takitaha fekauʻaki mo e ngaahi meʻaʻofá mo e ngaahi meʻa ʻoku malava ke nau fai ʻa ia ʻokú ke fakatokangaʻi ʻiate kinautolu. Kofu takitaha e fanga kiʻi tohí hangē ha meʻaʻofá pea fakaafeʻi ʻa e fānaú ke nau fakaava ʻenau “ʻū meʻaʻofá.” Poupouʻi kinautolu ke nau fakatupulaki ʻenau ngaahi meʻafoakí pea fakaʻaongaʻi kinautolu ke tokoniʻi e niʻihi kehé.
ʻOku finangalo ʻa Sīsū ke u tokoniʻi e niʻihi kehé.
ʻOku tau tokoniʻi e Tamai Hēvaní mo Sīsū Kalaisi ʻaki hono tokoniʻi e niʻihi ʻoku tau feohí. Naʻa mo e longaʻi fānau īkí te nau lava ʻo tokoni ki he niʻihi kehé.
Ngaahi ʻEkitivitī ʻe Ala Fakahokó
-
Fakamatala fakaikiiki ʻa e talanoa fakatātā ʻi he Mātiu 25:34–46. Tokoniʻi e fānaú ke mahino ko e taimi ʻoku tau tokoniʻi ai e niʻihi kehé, ʻoku tau tokoniʻi ʻa Sīsū.
-
Fakaʻaliʻali ha laʻitā ʻo ha kiʻi tamasiʻi pe taʻahine ʻi hoʻo kalasí, mo ha fakatātā ʻo Sīsū ʻoku fufuuʻi ʻi mui. Ko e hā te tau fai ke tau tokoniʻi ai e tokotaha ko ʻení? Toʻo ʻa e laʻitā ʻo e kiʻi tamasiʻí pe taʻahiné pea fakamatalaʻi ange ko e taimi ʻoku tau tokoniʻi ai e niʻihi kehé, ʻoku tau tokoniʻi ʻa Sīsū.
-
Fakaafeʻi e fānaú ke nau tā ha ngaahi fakatātā ʻo ʻenau tokoniʻi e niʻihi kehé ʻi he ngaahi founga ʻoku fakamatalaʻi ʻe he Fakamoʻuí ʻi he Mātiu 25:35–36. Kole ki he fānau ko eé ke nau mateʻi pe ko e hā e meʻa ʻoku nau tā fakatātaaʻí.
-
Fakaafeʻi e fānaú ke nau vahevahe ʻenau ngaahi aʻusia ʻi he taimi ne fai ai ʻe ha taha ha tokoni faka-Kalaisi kiate kinautolu pe ki honau fāmilí.
Akoʻi e Tokāteliné
Fānau Lalahi Angé
Kimuʻa pea toe hāʻele mai ʻa Sīsuú, ʻe malangaʻi e ongoongoleleí ki he māmaní kotoa.
ʻE lava ke tokoni atu e fānau ʻokú ke akoʻí ke malangaʻi e ongoongoleleí ki he māmaní kotoa kimuʻa ʻi he Hāʻele ʻAngaua Mai ʻa e Fakamoʻuí.
Ngaahi ʻEkitivitī ʻe Ala Fakahokó
-
Fakaafeʻi e fānaú ke vahevahe e ngaahi tāpuaki ne nau maʻu pe te nau maʻu koeʻuhi ko ʻenau hoko ko e kau mēmipa ʻo e Siasi ʻo Kalaisí. Lau fakataha e Siosefa Sāmita—Mātiu 1:31, pea fehuʻi ki he fānaú e founga ʻe tāpuekina ai ʻe he ongoongoleleí ʻa e fānau ʻo e ʻOtuá ʻi he funga ʻo māmaní.
-
Fakaʻaliʻali ki he fānaú ha mape ʻo e māmaní pe mape homou fonuá, pea tokoniʻi kinautolu ke nau kumi e ngaahi feituʻu kuo malangaʻi ai ʻe ha mēmipa ʻo honau fāmilí pe kaungāmeʻá, ʻa e ongoongoleleí ʻi ha ngāue fakafaifekau.
-
Fakaafeʻi ha fānau ʻe niʻihi ke nau omi mateuteu ke vahevahe ha founga naʻe fakafeʻiloaki ʻaki ʻa e ongoongoleleí ki he ngaahi mēmipa honau fāmilí pe ngaahi kuí. Kapau ʻe lava, kole ki ha taha ʻi he uōtí naʻe ngāue fakafaifekau taimi kakato, ke nau vahevahe ha aʻusia ʻo hono vahevahe ʻo e ongoongoleleí.
-
Kole ki he tamasiʻi pe taʻahine takitaha ke ne tohiʻi ha hingoa ʻo ha tokotaha te ne lava ʻo talanoa ki ai fekauʻaki mo e ongoongoleleí pe fakaafeʻi ki he lotú. Kole foki ki he fānaú ke nau lisi e ngaahi meʻa te nau lava ʻo fai he taimí ni ke nau hoko ai ko ha kau faifekau.
ʻOku ou fatongia ʻaki ʻeku fakaului ki he ongoongoleleí.
ʻOku akoʻi ʻe he talanoa fakatātā ʻo e kau taupoʻou ʻe toko hongofulú, ʻoku ʻikai lava ke tau kole ʻetau ului ki he ongoongoleleí mei he niʻihi kehé. Te ke tokoniʻi fēfē e fānaú ke nau fatongia ʻaki ʻenau ului pē ʻanautolu?
Ngaahi ʻEkitivitī ʻe Ala Fakahokó
-
Kole ki ha kiʻi tamasiʻi pe taʻahine mo ha taha ʻo ʻene ongomātuʻá ke omi mateuteu ke vahevahe e founga ne nau ako ʻaki fekauʻaki mo e talanoa fakatātā ʻo e kau taupoʻou ʻe toko hongofulú ʻi ʻapi he uiké ni.
-
Tā ha maama lolo ʻi he palakipoé, pea fakahingoa ko e fakamoʻoni. ʻOange ki he fānau takitaha ha laʻipepa kuo kosi hangē ha foʻi tulutā loló, pea kole ki he tamasiʻi takitaha ke tohiʻi ai ha meʻa te ne fai ke hoko ʻo toe ului ange ki he ongoongoleleí. Fakapipiki ʻenau foʻi tulutaá ki he palakipoé ʻi he tafatafaʻaki ʻo e māmá.
-
Fakaafeʻi e fānaú ke nau tokoni atu ke faʻu ha lisi ʻo e ngaahi meʻa ke fai ke teuteu ai ki ha tokotaha ʻaʻahi makehe. ʻOku faitatau pe faikehekehe fēfē e ngaahi meʻá ni mei he ngaahi founga te tau lava ai ʻo teuteu fakalaumālie ki he Hāʻele ʻAnga Ua Mai ʻa e Fakamoʻuí?
-
ʻI ha ngaahi laʻipepa ʻe nima, hiki ai e ngaahi meʻa he ʻikai lava ke kole maí. ʻI ha ngaahi laʻipepa ʻe nima, hiki ai e ngaahi meʻa ʻe lava ke kole maí. Veuveuki e ʻū laʻipepá, pea kole ki he fānaú ke nau fokotuʻutuʻu lelei kinautolu ki he ongo kulupu ʻe ua ko ʻení. Lau fakataha e Mātiu 25:1–13. Ko e hā e ʻuhinga ʻoku mahuʻinga ai ke ʻoua te tau fakafalala ki he niʻihi kehé ʻetau ului ki he ongoongoleleí?
ʻI he Fakamaau Fakaʻosí, te tau ʻoatu ki he ʻEikí ha fakamatala ʻo ʻetau moʻuí.
Hili e Toetuʻú, ʻe fakamaauʻi kitautolu ʻe he ʻOtuá fakatatau mo ʻetau talangofua ki Heʻene ngaahi fekaú mo hono tali ʻo e feilaulau fakalelei ʻa e Fakamoʻuí. ʻOku akoʻi kitautolu ʻe he talanoa fakatātā ʻo e ngaahi talēnití mo e talanoa fakatātā ʻo e sipí mo e fanga kosí fekauʻaki mo e Fakamaau Fakaʻosi ko ʻení.
Ngaahi ʻEkitivitī ʻe Ala Fakahokó
-
Fakaafeʻi ha vaeua ʻo e kalasí ke nau lau e Mātiu 25:14–30 pea mo e vaeua ʻe tahá ke nau lau e Mātiu 25:31–46. Kole ki he ngaahi kulupú ke nau fakatātaaʻi e ngaahi talanoa fakatātaá maʻá e kalasí.
-
Fakaafeʻi e fānaú ke nau lau tautau toko ua e Mātiu 25:35–36 pea faʻu ha lisi ʻo e ngaahi meʻa te nau lava ʻo fai ke fakahaaʻi ʻaki ʻenau ʻofa kia Sīsū Kalaisí.
Poupouʻi e Ako ʻi ʻApí
Kole ki he fānaú ke nau vahevahe mo honau ngaahi fāmilí e ngaahi founga te nau lava ai ʻo hoko ko ha kau faifekau lelei ange, pea talanoa mo honau ngaahi fāmilí fekauʻaki mo e kakai te nau lava ʻo vahevahe ki ai e ongoongoleleí.
Fakatupulaki ʻEtau Akoʻí
Fakafanongo pe fakatulamaʻi ha talanoa. Koeʻuhi ʻoku saiʻia e fānaú he ngaahi talanoá, fekumi ki ha ngaahi founga ke fakakau kinautolu ʻi he ngaahi talanoa folofola ʻokú ke vahevahé. Te nau lava ʻo puke ha ngaahi fakatātā pe ngaahi meʻa, tā fakatātaaʻi e talanoá, fakatātaaʻi pe tokoni ke fai e talanoá. Toutou fai e talanoá ke tokoni kiate kinautolu ke nau ʻiloʻi e ngaahi fakaikiiki mahuʻingá mo e ngaahi akonaki ʻo e ongoongoleleí.