“20–26 Mē. Mātiu 21–23; Maʻake 11; Luke 19–20; Sione 12: ‘Vakai, ʻOku Haʻu Ho Tuʻí’” Haʻu, ʻo Muimui ʻIate Au—Maʻá e Palaimelí: Fuakava Foʻou 2019 (2019)
“Mē 20–26. Mātiu 21–23; Maʻake 11; Luke 19–20; Sione 12,” Haʻu, ʻo Muimui ʻIate Au—Maʻá e Palaimelí: 2019
Sākeasi ʻi he Funga Sukaminó, tā ʻa James Tissot
20–26 Mē
Mātiu 21–23; Maʻake 11; Luke 19–20; Sione 12
“Vakai, ʻOku Haʻu Ho Tuʻí”
ʻI hoʻo lau e Mātiu 21–23; Maʻake 11; Luke 19–20; mo e Sione 12, tokanga ki he ngaahi ongo ʻokú ke maʻu mei he Laumālie Māʻoniʻoní. Fakahoa ki he “Ko Hono Feau e Ngaahi Fie Maʻu ʻa e Fānau Iiki Angé” ʻi he kamataʻanga ʻo e tohi lēsoni ko ʻení, ki ha ngaahi meʻa ke fakakaukau ki ai lolotonga hoʻo akoʻi e ngaahi tefitoʻi moʻoni ko ʻení.
Lekooti e Ngaahi Ongo ʻOkú ke Maʻú
Fakaafeʻi ke Vahevahe
Fakaʻaliʻali e fakatātā mei he lēsoni ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pea fakaafeʻi e fānaú ke nau vahevahe e meʻa ʻoku nau ʻilo fekauʻaki mo e meʻa ʻoku hoko ʻi he fakatātaá.
Akoʻi e Tokāteliné
Fānau Iiki Angé
ʻOku ʻafioʻi au ʻe he Tamai Hēvaní mo Sīsū Kalaisi ʻaki hoku hingoá.
ʻI hoʻo lau fekauʻaki mo e fengāueʻaki ʻa e Fakamoʻuí mo Sākeasí, ko e hā ha ngaahi pōpoaki ʻokú ke ʻilo ʻe lava tāpuekina ai e fānau ʻokú ke akoʻí?
Ngaahi ʻEkitivitī ʻe Ala Fakahokó
-
Fakaʻaliʻali e fakatātā ʻi he kamataʻanga ʻo e lēsoni ko ʻení. Tokoniʻi e fānaú ke nau ʻiloʻi ʻa Sākeasi pea puʻaki hono hingoá. Fokotuʻu ha ngaahi ngāue ke fai ʻe he fānaú lolotonga hoʻo fai e talanoa ʻo Sākeasi mo Sīsuú—hangē ko ʻení, tuʻu ʻete ke nau vakai ʻo fakalaka atu ʻi he fuʻu kakai tokolahí pe fakatātaaʻi e kaka ʻi ha fuʻu ʻakau. Fakamatalaʻi ange naʻe mamata ʻa e Fakamoʻuí kia Sākeasi peá Ne ui ia ʻaki hono hingoá. Fakamoʻoniʻi ange, ʻoku ʻiloʻi foki ʻe he Fakamoʻuí ʻEne fānaú takitaha pea mo honau ngaahi hingoá.
-
ʻOmi ha ngeʻesi ʻesiaʻi tā ki he kalasí, pe ngaohi ha ʻesiaʻi tā ʻaki e pepá. Fakaafeʻi e tamasiʻi takitaha ke taufetongi ʻi hono puke e ʻesiaʻi taá ki hono fofongá, lolotonga hono lea ʻaki ʻe he toenga ʻo e kalasí, “ʻOku ʻafioʻi ʻe he Tamai Hēvaní mo Sīsū ʻa [hingoa ʻo e tokotahá].”
-
Fakaafeʻi ʻa e fānaú ke nau taufetongi hono fakatātaaʻi e kaka ʻi ha fuʻu ʻakau, ʻo hangē ko Sākeasí. Tuku ki he toenga ʻo e kalasí ke nau lea ʻaki e, “ʻOku ʻafioʻi ʻe he Tamai Hēvaní mo Sīsū ʻa [hingoa ʻo e tokotahá].”
-
Hivaʻi fakataha e “Fānau Au ʻa e ʻOtua,” Tohi Hiva ʻa e Fānaú, 2–3, pea tokoniʻi e fānaú ke nau fakafanongo ki he ngaahi meʻa te ne tokoniʻi kinautolu ke nau ʻiloʻi ʻoku ʻofeina kinautolu ʻe he Tamai Hēvaní.
Ko e temipalé ko ha potu toputapu.
ʻE lava tokoni ʻa hoʻo fakamoʻoni ki he temipalé, ke mahino ki he fānau ʻokú ke akoʻí ko e temipalé ko ha feituʻu toputapu.
Ngaahi ʻEkitivitī ʻe Ala Fakahokó
-
Fakaʻaliʻali e fakatātā Ko Hono Fakamaʻa ʻe Sīsū ʻa e Temipalé (Tohi Fakatātā ʻo e Ongoongoleleí, fika 51), pea fai e talanoa ʻoku lekooti ʻi he Mātiu 21:12–14. Tokoni ki he fānaú ke nau ʻiloʻi e ʻīmisi ʻo e paʻanga mo e monumanu ʻoku hā ʻi he fakatātaá. Hili iá pea aleaʻi e ʻuhinga naʻe fie maʻu ai ʻe he Fakamoʻuí e kau fakafetongi paʻangá mo e kakai ne nau fakatau atu ʻa e fanga monumanú, ke nau mavahe mei he temipalé.
-
Fakaʻaliʻali ha ngaahi fakatātā ʻo e temipalé (hangē ko ʻení, vakai Tohi Fakatātā ʻo e Ongoongoleleí, 117–21), pea kole ki he fānaú ke vahevahe ʻenau ongoʻi ʻi he taimi ʻoku nau sio ai ki ha temipale. Talaange ki he fānaú, ko e ngaahi ongo ko iá, ko e Laumālie Māʻoniʻoní ia ʻokú Ne talamai ko e temipalé ko ha feituʻu makehe. Kole ki he fānaú ke nau fakatātaaʻi, ko e hā te nau fai ʻo kapau te nau ʻi loto ʻi he temipalé. Hangē ko ʻení, te nau lava ʻo talanoa fanafana mo tangutu loto-ʻapasia. Hivaʻi fakataha e “Fie Siofia Ha Temipale,” Tohi Hiva ʻa e Fānaú, 99, pea fakaafeʻi e fānaú ke nau fokotuʻu ha taumuʻa ke nau hū ki he temipalé ha ʻaho.
Ko e temipalé ko e fale ia ʻo e ʻEikí.
Te u lava ʻo talangofua.
ʻOku finangalo e Tamai Hēvaní ke tau talangofua. Ko e talanoa fakatātā ʻo e ongo foha ʻe toko uá, ko ha faingamālie ia ke akoʻi fekauʻaki mo e mahuʻinga ʻo e talangofuá.
Ngaahi ʻEkitivitī ʻe Ala Fakahokó
-
Tā ha fakatātā ʻo ha ongo foha ʻi he palakipoé, pea fakaʻaongaʻi e ngaahi fakatātaá ʻi hoʻo toe fai ʻa e talanoa fakatātā ʻi he Mātiu 21:28–32. Ko e fē ʻa e foha naʻá ne fai e meʻa ʻoku totonú ʻi he fakaʻosí? Kole ki he fānaú ke nau fakahingoa ha ngaahi meʻa te nau lava ʻo fai ke nau talangofua ai ʻi ʻapi. Tuku ke nau tā ha ngaahi fakatātā ʻo kinautolu ʻi heʻenau fakahoko ha taha ʻo e ngaahi meʻa ko iá.
-
Fakaafeʻi e fānaú ke vahevahe e ngaahi aʻusia kuo nau maʻu ʻi heʻenau talangofua ki heʻenau ngaahi mātuʻá, pe ko ha tokotaha tauhi kehe pe takimuʻa. Naʻe tāpuekina fēfē nai kinautolu ʻi heʻenau talangofuá? Te nau lava fēfē nai ʻo talangofua ange ʻi he kahaʻú?
Akoʻi e Tokāteliné
Fānau Lalahi Angé
ʻI heʻeku fekumi ki he Fakamoʻuí, te u ʻiloʻi Ia.
Te ke lava ʻo fakaʻaongaʻi e talanoa ʻo Sākeasí ke tokoniʻi e fānaú ke nau fakakaukau ki he ngaahi meʻa te nau lava ʻo fai ke nau toe ofi ange ai ki he Fakamoʻuí.
Ngaahi ʻEkitivitī ʻe Ala Fakahokó
-
Lau e Luke 19:1–10, pea kiʻi mālōlō ʻi he ngaahi veesi ʻe niʻihi ke aleaʻi e meʻa ʻoku tau ako kau kia Sākeasí. Ko e hā naʻe fai ʻe Sākeasi ke ne lava ai ʻo mamata kia Sīsuú? Naʻá ne tali fēfē ʻi he taimi naʻe kole ange ai ʻe Sīsū ke ne hifo ki lalo mei he fuʻu ʻakaú? Kole ki he fānau takitaha ke vahevahe ha ʻuhinga ʻe taha te nau fie mamata ai kia Sīsū. Kapau naʻe hāʻele mai ʻa e Fakamoʻuí ki ho koló, ko e hā te ke fai ke mateuteu aí?
-
Fakaafeʻi e fānaú ke nau fakakaukau ki ha kakai ʻoku nau ʻiloʻi, ʻoku tatau mo Sākeasí, ʻa ia ʻoku nau fekumi ki he Fakamoʻuí. Fehuʻi ki he fānaú ko e hā te nau fai ke tokoniʻi ai ha taha kehe ke ako fekauʻaki mo e Fakamoʻuí.
-
Fakaafeʻi e fānaú ke vahevahe e ngaahi aʻusia ne nau ongoʻi ai naʻe ʻiloʻi mo ʻofaʻi kinautolu ʻe he Tamai Hēvaní mo Sīsū Kalaisi.
Ko e temipalé ko ha feituʻu toputapu ʻoku totonu ke u fakaʻapaʻapaʻi.
ʻE tokoni fēfē ʻa e talanoa ki hono fakamaʻa ʻe he Fakamoʻuí e temipalé, ke ke akoʻi ki he fānaú ʻa e toputapu ʻo e ngaahi temipalé?
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau e Mātiu 21:12–14. Fakaʻaliʻali e fakatātā Ko Hono Fakamaʻa ʻe Sīsū ʻa e Temipalé (Tohi Fakatātā ʻo e Ongoongoleleí, fika 51), pea fehuʻi ange pe ko e veesi fē ʻoku fakamatalaʻi ʻe he fakatātaá. Kole ange ke nau tā ha ngaahi fakatātā e sīpinga e temipalé kimuʻa pea mo e hili hono fakamaʻa ʻe Sīsuú.
-
Fakaafeʻi e fānaú ke vahevahe ʻenau ongo ʻi heʻenau hū ki loto ʻi ha temipale, ʻaʻahi ki ha ngaahi kelekele ʻo e temipalé, pe sio ʻi ha ngaahi fakatātā ʻo e temipalé. Ko e hā naʻá ne tokoniʻi kinautolu ke nau ʻiloʻi ko e temipalé ko ha feituʻu toputapu?
-
Fakaafeʻi ha toʻu tupu ʻe toko taha pe lahi ange ke haʻu ki he kalasí, pea talanoa fekauʻaki mo e founga ʻo ʻenau teuteu ke nau hū ki he temipalé. Kapau kuo nau ʻosi ʻalu ki he temipalé, kole ange ke nau talanoa fekauʻaki mo ʻenau ongoʻi ʻi he taimi ne nau ʻi he temipalé aí.
-
Kosi ha fakatātā ʻo ha temipale ke hangē ha ʻū kongokonga pāsoló, pea ʻoange ki he tamasiʻi pe taʻahine takitaha ha kiʻi konga ʻe taha. Kole ki he fānaú ke nau tohi ʻi he tuʻa ʻo e konga pāsoló, ha meʻa te nau lava ʻo fai ke nau teuteu ai ke hū ʻi he temipalé. ʻI hono vahevahe ʻe he tamasiʻi pe taʻahine takitaha ha fakakaukaú, tānaki ʻene kongá ki he pāsoló.
ʻOku fie maʻu ke u faitotonu ʻi heʻeku ngaahi ngāué mo ʻeku ngaahi holí.
Naʻe akoʻi ʻe Sīsū ki he kau tangata tohí mo e kau Fālesí fekauʻaki mo hono mahuʻinga ʻo e moʻui totonu ʻaki e ongoongoleleí—kae ʻikai fakangalingali pē ke pehē ʻoku māʻoniʻoní. Ko e hā ʻe tokoni ke mahino e moʻoni ko ʻení ki he fānaú?
Ngaahi ʻEkitivitī ʻe Ala Fakahokó
-
ʻI hoʻo lau e Mātiu 23:25–28 mo e fānaú, fakakaukau ke vahevahe e ʻuhinga ko ʻeni ʻo e hypocrite mei he Bible Dictionary [Tikisinale ʻa e Tohi Tapú]: “Ko ha taha ʻoku fakangalingali ʻoku māʻoniʻoni ka ʻoku ʻikai ke ne pehē.” Ko e hā e ʻuhinga ʻoku kovi ai ʻete hoko ko ha tokotaha mālualoí?
-
Fakaʻaliʻali ki he fānaú ha ipu ʻoku maʻa ʻa tuʻa kae ʻuli ʻa loto, ke tokoni ke fakamatalaʻi ha heliaki ʻi he Mātiu 23:25. Te tau lava fēfē ʻo fakapapauʻi ʻoku tau maʻa mo haohaoa ʻi loto?
Poupouʻi e Ako ʻi ʻApí
Tokoniʻi e fānaú ke nau fili ha tefitoʻi moʻoni pe ʻekitivitī mei he kalasí ke vahevahe mo honau ngaahi fāmilí ʻi ʻapi.
Fakatupulaki ʻEtau Akoʻí
Poupouʻi e ngaahi mātuʻa ʻa e fānaú. “Ko e ngaahi mātuʻá ko e kau faiako mahuʻinga taha kinautolu ʻo e ongoongoleleí ki heʻenau fānaú—ʻokú na fakatou maʻu e tefitoʻi fatongia mo e mālohi lahi taha ke tākiekina ʻenau fānaú (vakai, Teutalōnome 6:6–7). ʻI hoʻo akoʻi e fānaú ʻi he lotú, fekumi ʻi he faʻa lotu ki he ngaahi founga ke poupou ai ki heʻenau mātuʻá ʻi honau fatongia mahuʻingá” (Ko e Faiako ʻi he Founga ʻa e Fakamoʻuí, 25).